Ko Ai Anai Ka Hāo ‘ ʼi Te Temi ʼo Te Mamahi’?
“Ko ʼaē ʼe fetapā anai ki te huafa ʼo Sehova ʼe hāo anai ia.” — Soele 2:32.
1. Ohage ko tona tohi e Taniela pea mo Malakia, koteā ʼe ʼiloga kehe ai ia nātou ʼaē ʼe feala ke fakahāo lolotoga te “temi ʼo te mamahi”?
ʼI TANA manatu ki totatou temi, neʼe tohi e te polofeta ko Taniela ʼo fēnei: “ ʼE hoko anai he temi ʼo te mamahi ʼe mole ʼi ai hona tatau neʼe kua hoko talu mai he tuʼu ʼo te puleʼaga ʼo aʼu ki te temi ʼaia. Pea lolotoga ʼi te temi ʼaia, ko tau hahaʼi ʼe hāo anai, ia ia ʼaē ʼe maʼu anai ʼe tohi ʼi te tohi.” (Taniela 12:1). ʼE ko he ʼu palalau fakaloto mālohi ia! ʼE manatuʼi anai e Sehova te hahaʼi ʼaē ʼe ina leleiʼia, ohage ko tona toe fakahā ia Malakia 3:16: “ ʼI te temi ʼaia, ko nātou ʼaē ʼe manavasiʼi kia Sehova neʼe nātou fai palalau ia nātou, takitokotahi pe mo tona kaumeʼa, pea neʼe tokaga ia Sehova pea mo fakalogo. Pea neʼe ʼi ai te tohi fakamanatu neʼe kamata tohi ʼi ʼona muʼa maʼa nātou ʼaē ʼe manavasiʼi kia Sehova pea mo nātou ʼaē ʼe fakaanau ki tona huafa.”
2. Koteā te meʼa ʼaē ka hoko ki ʼaē ʼe fakaanau ki te huafa ʼo Sehova?
2 Ko ʼaē ʼe fakaanau ki te huafa ʼo Sehova, ʼe fakatupu ʼaki ai tana maʼu he mālama totonu ʼo ʼuhiga mo ia, mo tona Kilisito pea mo tana ʼu fakatuʼutuʼu fuli ʼo ʼuhiga mo te Puleʼaga. Koia, ko tana hahaʼi ʼe nātou akoʼi te ʼiloʼi ʼo ia ʼaki he fakaʼapaʼapa, pea mo maʼu he vahaʼa lelei mo ia ʼaki hanatou foaki ia nātou kia te ia, pea mo ʼofa kia te ia ‘ ʼaki tonatou loto katoa, pea mo tonatou ʼatamai katoa pea mo tonatou mālohi katoa’. (Maleko 12:33; Fakahā 4:11.) Neʼe fai foki e Sehova te fakatuʼutuʼu ʼofa maʼuhiga ʼaki te sakilifisio ʼa Sesu Kilisito, ke feala ai ki te kau agavaivai ʼo te kele, ke nātou maʼu te maʼuli heʼe gata. Koia ko nātou ʼaia ʼe nātou toe fai mo te palalau falala ʼa te kau ʼaselo ʼi selo ʼi te temi ʼaē neʼe nātou fakafetaʼi ki te ʼAtua ʼi te tupu ʼa Sesu, ʼo nātou ʼui fēnei: “Kolôlia ki te ʼAtua i óluga, pea fimâlie i te lalo-nei [kele] ki te tagata loto lelei.” — Luka 2:14, TTK.
3. Ia muʼa ʼo te maʼu ʼo te tokalelei ʼi te kele, koteā anai te meʼa ka fai e Sehova?
3 Ko te tokalelei ʼaia kua ōvi ʼosi mai ia, logope te mole manatu feiā ʼa te tokolahi. Kae ʼe tonu muʼa ke fakahoko te fakamāu ʼa Sehova ki te mālama aga kākā ʼaenī. Neʼe ʼui fēnei e tana polofeta ko Sofonia: “Ko te ʼaho lahi ʼo Sehova kua ōvi mai. Kua ōvi mai pea kua fakatoʼotoʼo ʼaupito.” Ko te ʼaho feafeaʼi koa ʼaia? ʼE toe ʼui fēnei e te lea faka polofeta ʼaia: “Ko te ʼuʼulu ʼo te ʼaho ʼo Sehova ʼe kona. ʼE tagi kalaga ai te tagata mālohi. Ko te ʼaho ʼaia ko te ʼaho ʼo te hāūhāū, ko te ʼaho ʼo te mamahi pea mo te tuʼania, ko te ʼaho ʼo te afā pea mo te lotomamahi lahi, ko te ʼaho ʼo te fakapōʼuli gaogao, ko te ʼaho ʼaoʼaoa pea mo fakapōʼuli mātolu, ko te ʼaho pupuhi fakatagi pea mo te fakaʼiloʼilo, ki te ʼu kolo kua fakamālohi pea mo te ʼu tule maʼoluga. Pea ʼe ʼau fakatupu anai he tuʼania lahi ki te tagata, pea ʼe nātou haʼele anai ohage ko he kau kivi; he neʼe nātou agahala kia Sehova.” — Sofonia 1:14-17; vakaʼi mo Hapakuke 2:3; 3:1-6, 16-19.
4. Ko ai koa ʼaē ʼe tali ki te fakaafe ʼaē ke ina ʼiloʼi pea mo tauhi ki te ʼAtua ia ʼaho nei?
4 ʼE ko he meʼa lelei foki, ko he toko miliona hahaʼi ia ʼaho nei kua nātou tali te fakaafe ʼaē ke nātou ako pea mo nātou kaugana ki te ʼAtua. Neʼe fakakikite fēnei ʼo ʼuhiga mo te kau kilisitiano fakanofo ʼaē neʼe fakahu ki te fuakava foʼou: “ ‘Ko nātou fuli, ʼe nātou ʼiloʼi anai ʼau, mai ia ia ʼaē ʼe veliveli ia nātou kia ia ʼaē ʼe lahi’, ko te tala ʼaia ʼa Sehova.” (Selemia 31:34). Ko nātou ʼaia neʼe nātou kamata avahi te gāue faka mafola ʼo te temi nei. Pea ʼi te temi nei, ʼi te kua lahi ʼo te kau kilisitiano fakanofo ʼe nātou fakaʼosi tonatou maʼuli fakakelekele, ko te “hahaʼi tokolahi” ʼo te “tahi ʼu ōvi” ʼe nātou ʼomai ke nātou ‘tauhi ki te ʼAtua ʼaki he tauhi fakataputapu ʼi te ʼaho pea mo te po’ ʼi te fakatuʼutuʼu fakaʼatua ʼaē ʼe fakatatau ki he fale lotu (Fakahā 7:9, 15; Soane 10:16). ʼE koutou kau koa ia nātou ʼaē ʼe nātou fiafia ʼi te maʼu ʼo te pilivilesio fakatalakitupua ʼaia?
ʼE feafeaʼi koa te hu ʼo te “ ʼu meʼa ʼaē ʼe manakoʼia”
5, 6. ʼI muʼa ʼo te faka galulu pea mo te faka ʼauha ʼo te ʼu puleʼaga fuli, koteā te gāue fakamaʼuli ʼe tonu ke fai?
5 Tou vakaʼi age muʼa ia Asea 2:7, ʼaē ʼe talanoa ki te ʼu lea faka polofeta ʼa Sehova ʼo ʼuhiga mo tona fale tauhi fakalaumālie. ʼE ina ʼui fēnei: “Pea ʼe ʼau fakagalulu anai te ʼu puleʼaga fuli, pea ʼe tonu anai ke hu ia te ʼu meʼa ʼaē ʼe manakoʼia ʼo te ʼu puleʼaga fuli; pea ʼe ʼau fakafonu anai te api ʼaenī ʼaki te kolōlia.” ʼE fakahā e te ʼu lea faka polofeta ʼo te Tohi-Tapu ko te ‘galulu ʼo te ʼu puleʼaga’ ʼe faka ʼuhiga ki te fakahoko ʼaē e Sehova tana fakamāu ki te ʼu puleʼaga. (Naomi 1:5, 6; Fakahā 6:12-17) Koia, ko te gāue ʼa Sehova ʼaē neʼe ina fakakikite ia Asea 2:7 ʼe aʼu anai ki tona ikuʼaga mokā fakagalulu anai te ʼu puleʼaga ʼo aʼu ki tonatou puli ʼosi. Kae koteā te meʼa ka hoko ki te “ ʼu meʼa ʼaē ʼe manakoʼia ʼo te ʼu puleʼaga fuli”? ʼE tonu koa ke nātou talitali ke fakahu nātou e te galulu fakaʼosi pea mo faka ʼauha ʼaia? Kailoa ia.
6 ʼE ʼui fēnei ia Soele 2:32 “ko ʼaē ʼe fakatapā anai ki te huafa ʼo Sehova ʼe hāo anai ia; heʼe ʼi te moʼuga ko Sione pea mo Selusalemi ʼe ʼi ai anai ia nātou neʼe hāo, ohage ko te ʼui ʼaē ʼa Sehova, pea ia nātou ʼaē neʼe maʼuʼuli, ʼaē ʼe pāuʼiʼi e Sehova”. Neʼe fakamavae nātou e Sehova, pea ʼe nātou fetapā ki tona huafa ʼaki te tui ki te sakilifisio ʼa Sesu ia muʼa ʼo te galulu ʼo te mamahi lahi (Vakaʼi ia Soane 6:44; Gāue 2:38, 39). Kae meʼa lelei pe la, ko te hahaʼi tokolahi maʼuhiga, ʼaē kua fakalaka nei tona hahaʼi ʼi te toko fā miliona, kua ‘hu’ ki te fale tauhi ʼo Sehova, ia muʼa ʼo tana ‘fakagalulu te ʼu puleʼaga fuli’ ʼi Halamaketone — Fakahā 7:9, 10, 14.
7. Koteā te faka ʼuhiga ʼo te ʼui ʼaē ke ‘fetapā ki te huafa ʼo Sehova’?
7 ʼE feafeaʼi koa te fetapā ʼa nātou ʼaia neʼe hāo ki te huafa ʼo Sehova? ʼE tuku mai ia Sake 4:8 te fakamahino ʼaenī: “Koutou fakaōvi ki te ʼAtua, pea ʼe fakaōvi atu anai kia koutou. Koutou fufulu ʼo koutou nima, kau agahala, pea mo fakamaʼa tokotou ʼu loto, hahaʼi lotolotolua!” Ohage ko te toe ʼo te kau kilisitiano fakanofo ʼaē neʼe nātou fakahā te ala, ko nātou ʼaē ʼe fakaʼamu ke kau ʼi te hahaʼi tokolahi ʼaē ka maʼuʼuli ʼi Halamaketone, ʼe tonu ke nātou fakakaukau gāue ʼaki he loto fakapapau. Kapau ʼe tou fia maʼuʼuli, ʼe tonu ke tou ʼinu te Folafola maʼa ʼaē ʼa Sehova pea mo fakaʼaoga tana ʼu lekula faitotonu ʼi totatou maʼuli. ʼE tonu ke tou foaki totatou maʼuli kia Sehova, pea mo fakahā te meʼa ʼaia ʼaki te papitema ʼi te vai. Ko te fetapā ʼaē kia Sehova ʼaki te tui ʼe tonu ai foki ke tou fai fakamoʼoni maʼa te ia. Koia ʼe tohi ai e Paulo ia Loma kapite 10, ʼu vaega 9 mo te 10, neʼe tohi e Paulo: “Kapau ʼe ke fakahā ʼi te kauga mālie te ‘folafola ʼaenī ʼi tou gutu’, ko Sesu ʼe ʼAliki, pea kapau ʼe ke haga tui ʼi tou loto, ko te ʼAtua neʼe ina toe fakatuʼuake ia ia mai te ʼu mate, ʼe ke hāo anai.” (MN). “Nai kaiga, ko te tui i te loto e kita iku ai ki te agatonu, kae kote fakamooni i te gutu ki tata tui, pea e kita iku ai ki te mauli.” (TTK). Pea ʼi te vaega 13, ʼe lau ai e te ʼapositolo te fakakikite ʼa Soele, ʼaē ʼe ʼui ai “ko ʼaē ʼe fetapā anai ki te huafa ʼo Sehova ʼe hāo anai ia”.
‘Kumi, kumi, kumi’
8. a) Ohage ko tona tohi e te polofeta ko Sofonia, koteā ʼaē ʼe fakamaʼua e Sehova ʼo ʼuhiga mo te hāofaki? b) Koteā te fakatoga ʼaē ʼe fai mai ʼaki te kupu ʼaē “lagi” ia Sofonia 2:3 ʼo ʼuhiga mo tatou?
8 Tou toe vakaʼi age muʼa te tohi ʼa Sofonia, ʼi te kapite 2, ʼu vaega 2 mo te 3, pea tou lau te meʼa ʼaē ʼe fakamaʼua e Sehova ke feala ai he hāo: “Ia muʼa ʼo te haʼu kia koutou te hāūhāū lahi ʼo Sehova, ia muʼa ʼo te haʼu kia koutou te ʼaho ʼo te hāūhāū ʼo Sehova, koutou kumi ia Sehova, ia koutou fulifuli, hahaʼi agavaivai ʼo te kele, ʼaē neʼe koutou fakahoko Tana tonu fakamāu. Koutou kumi te faitotonu, koutou kumi te agavaivai. ʼE lagi feala pe anai ke fufū koutou ʼi te ʼaho hāūhāū ʼo Sehova.” Koutou fakatokagaʼi te kupu ʼaē “lagi”. ʼE mole ʼui kua hāofaki, pea hāofaki ʼo talu ʼosi ai. ʼE fufū anai tatou ʼi te ʼaho ʼaia, mo kapau ʼe tou haga fai te ʼu meʼa ʼaia e tolu. ʼE tonu ke tou kumi ia Sehova, ke tou kumi te faitotonu, pea mo tou kumi te agavaivai.
9. Koteā te fakapale ʼaē ʼe fakapapauʼi kia nātou ʼaē ʼe nātou kumi te agavaivai?
9 ʼIo, ʼe ko he meʼa taulekaleka ia te fakapale ʼonatou ʼaē ʼe nātou kumi te agavaivai! Ia Pesalemo 37, ʼu vaega 9 ki te 11, ʼe tou lau: “Ko nātou ʼaē ʼe falala kia Sehova ʼe nātou maʼu anai te kele. Pea kei toe siʼisiʼi pe te temi, pea pulihi anai te tagata agakovi (...). Kae ko te kau agavaivai ʼe nātou maʼu anai te kele, pea ʼe nātou fiafia ʼaupito anai ʼi te lahi ʼo te tokalelei.” Kae ʼe feafeaʼi ia nātou ʼaē ʼe nātou kumi te faitotonu? Ko te vaega 29 ʼe ina ʼui fēnei: “ ʼE maʼu anai te kele e te hahaʼi agatonu, pea ʼe nātou nonofo anai ʼi ai ʼo talu ai.” ʼO ʼuhiga mo nātou ʼaē ʼe nātou kumi ia Sehova, ko te ʼu vaega 39 mo te 40 ʼe ʼui fēnei mai ai kia tatou: “Ko te fakamaʼuli ʼo te kau agatonu ʼe haʼu mai ia Sehova; ko ia ko tonatou tule mālohi ʼi te temi ʼo te mamahi. Pea ko Sehova ʼe ina fakamaʼuli anai ia nātou pea ʼe ina tuku anai ke nātou hāo. ʼE ina fakahāo anai nātou mai te kau agakovi pea mo ina fakamaʼuli anai nātou, he neʼe nātou hola kia te ia.”
10. Ko ai ʼaē tāfito neʼe fakafisi ki te kumi ʼo Sehova pea mo te kumi ʼo te agavaivai?
10 Ko te ʼu ’Ēkelesia ʼo te keletiate neʼe mole nātou kumi ia Sehova. Ko tonatou ʼu takitaki neʼe nātou fakafisiʼi ki tona huafa taputapu, ʼo nātou toʼo ʼosi ʼi tanatou ʼu fakaliliu ʼo te Tohi-Tapu. ʼE nātou leleiʼia age nātou he tauhi ʼo he ʼAliki pe ʼe ko he ʼAtua ʼe mole hona huafa pea mo fakaʼapaʼapa lahi ki he Tahitolu pagani. Pea tahi, ko te keletiate ʼe mole ina kumi te faitotonu. Tokolahi ʼi tana ʼu hahaʼi ʼe nātou nonofo ʼi te ʼu maʼuli kovi. ʼO mole nātou kumi te agavaivai ohage ko tona fai e Sesu, kae ʼe nātou fia fakahāhā, ohage la ʼi te televisio, tonatou ʼu maʼuli maʼu koloā pea mo tonatou maʼuli ʼaē ʼe kovi. Ko te kau takitaki lotu ʼe nātou maʼu meʼa mai tanatou ʼu hahaʼi. Ohage ko te ʼu palalau ʼa Sake 5:5, neʼe nātou “maʼuʼuli ʼi te maʼu koloā ʼi te kele pea mo nātou kumi te ʼu lelei ʼo te sino”. ʼI te fakaōvi mai ʼo te ʼaho ʼo Sehova, ʼe nātou tokagaʼi anai ko te ʼu palalau ʼa te Tohi-Tapu ʼe faka ʼuhiga kia nātou: “Ko te ʼu meʼa maʼuhiga ʼe mole ʼi ai anai hona ʼaoga ʼi te ʼaho ʼo te hāūhāū.” — Tāʼaga Lea 11:4.
11. Ko ai koa te tagata ʼaē ʼe manuki ki te lao, pea neʼe feafeaʼi te lahi ʼo tana ʼu fakapō?
11 ʼI te ʼuluaki sekulo ʼo totatou temi, ohage ko tona fakahā e te ʼapositolo ko Paulo ʼi tana lua tohi ki te kau Tesalonika, neʼe ʼi ai te kau kilisitiano neʼe nātou loto mahalohalo, ʼi tanatou manatu ʼaē ko te ʼaho ʼo Sehova kua hoko kia nātou. Kae neʼe fakatokagaʼi age ʼe Paulo ʼe tonu muʼa ke hoko te ʼapositasia lahi pea mo hā muʼa te “tagata ʼaē ʼe manuki ki te lao”. (2 Tesalonika 2:1-3.) ʼI te temi nei, ʼi te 20 sekulo, kua tou mahino katoa ki te lahi ʼaupito ʼo te ʼapositasia ʼaia pea mo tokagaʼi te meʼa noaʼi ʼo te lao e te keletiate ia mata ʼo te ʼAtua. ʼI te lolotoga ʼo te ʼu ʼaho fakamuli ʼaenī, talu mai te taʼu 1914, ko te kau takitaki lotu neʼe lahi tanatou ʼu fakapō ʼi tanatou lagolago ki te hahaʼi ʼaē ʼe nātou ‘tuki te ʼu huo fulikele ke liliu ko he ʼu heletā’. (Soele 3:10.) Pea tahi foki, neʼe ina haga fai te ʼu akonaki loʼi, ohage ko te nefesi ʼaē ʼe mole toe mate, te pulekatolio, te ʼu mamahi ʼo te ʼifeli kakaha, te papitemaʼi ʼo te ʼu toe kei memea, te Tahitolu pea mo ʼihi age ʼu meʼa. Koteā anai honatou ʼu ikuʼaga mokā fakahoko e Sehova tana tonu fakamāu? ʼE ʼui fēnei ia Tāʼaga Lea 19:5: “Ko ʼaē ʼe ina ʼave haʼele he ʼu loʼi ʼe mole hāo anai ia.”
12. a) Ko ai koa te ʼu tagata ʼo te ʼu “lagi” pea mo te “kele” ʼaē kua vave tonatou faka ʼauha? b) Koteā te akonaki ʼe tou maʼu ʼi te ʼiloʼi ʼaē kua ōvi te faka ʼauha ʼo te mālama kovi ʼaenī?
12 Ia 2 Petelo 3:10, ʼe tou lau fēnei: “Ko te ʼaho ʼo Sehova ʼe haʼu anai ohage ko he tagata kaihaʼa, ko te ʼaho ʼaia ko te ʼu lagi ʼe puli anai ʼi he logoaʼa, kae ko te ʼu meʼa ʼaē kua kakaha ʼe mavetevete anai, pea ko te kele pea mo te ʼu gāue ʼaē ʼe fai ʼi ai ʼe hā anai.” Ko te kau takitaki kākā ʼaē kua nātou hage ko he ʼu lagi ki te malamanei, ʼo fakatahi mo te ʼu meʼa fuli ʼaē ʼe faʼufaʼu ʼaki ia ʼaho nei te sosiete fakatagata agakovi, ʼe faka ʼauha anai e te ʼAtua ʼi te kele. Ko te ʼu tagata faʼu pea mo fakatau mahafu, mo te kau tagata kākā, mo te hahaʼi malualoi pea mo tonatou ʼu hahaʼi takitaki, mo te kau fakatupu gāue kovi, pea mo te hahaʼi aga fakamālohi, pea mo te kau fai fakapō — ko nātou fuli ʼaia ʼe pulihi anai. ʼE nātou ʼauha katoa anai ʼi te hāūhāū ʼo Sehova. Kae ʼi te ʼu vaega 11 pea mo 12, ʼe fakatokagaʼi e Petelo ki te kau kilisitiano, ʼo fēnei: “Pea kapau ko te ʼu meʼa fuli ʼaia ʼe tonu ke pulihi ko te faʼahiga tagata feafeaʼi koa ia koutou ʼo ʼuhiga mo te aga fakamaʼoniʼoni pea mo te aga faka lotu, ʼo atali pea ʼaua naʼa galo ʼi he temi te hoko mai ʼo te ʼafio ʼo te ʼaho ʼo Sehova.”
Ko Mikaele kua kamata tana gāue
13, 14. Ko ai koa te Taupau lahi ʼo te pule ʼa Sehova, pea neʼe feafeaʼi tana gāue mālohi talu mai te taʼu 1914?
13 ʼE feafeaʼi anai he hāo ʼa he tahi ʼi te “temi ʼo te mamahi” ʼa Sehova? Ko te meʼa gāue ʼaē ka fakaʼaoga e Sehova ʼo ʼuhiga mo te faʼahi ʼaia, ko te alekaselo ko Mikaele, ʼaē ko te faka ʼuhiga ʼo tona higoa “ko ai ʼe hage ko te ʼAtua?” Koia, ʼe feʼauga mo ia ke ina fakalaka tonuʼi te pule ʼa Sehova, ʼo lagolago ki te ʼAtua moʼoni pe ʼaē e tahi, te Tuʼi ʼAliki ʼo te ʼatulaulau katoa.
14 ʼE ko he meʼa fakatalakipua foki ʼaē ʼe tuʼu ʼi te tohi ʼo te Fakahā kapite 12, te ʼu vaega 7 ki te 17 ʼaē ʼo ʼuhiga mo te “ ʼaho ʼo te ʼAliki” talu mai te taʼu 1914 (Fakahā 1:10)! Neʼe lī ifo e te alekaselo ko Mikaele ia te ʼaposita ko Satana ki te kele. Ki muli age, ohage ko tona fakamatala mai ʼi te tohi ʼo te Fakahā kapite 19, te ʼu vaega 11 ki te 16, ko ʼaē ʼe fakahigoaʼi ko “Agatonu pea mo Moʼoni” ʼe ina “malamalaki te meʼa lomi ʼo te vino ʼo te hāūhāū ʼo te ʼAtua Māfimāfi”. Ko te tagata tau mālohi ʼaia ʼo selo ʼe toe fakahigoaʼi ko te “Hau ʼo te ʼu hau pea mo te ʼAliki ʼo te ʼu ʼaliki”. Pea, ʼe toe ʼui ʼi te tohi ʼo te Fakahā kapite 20 ʼi te ʼu vaega 1 pea mo te 2, ko te ʼaselo lahi ʼe ina lī ia Satana ki te vanu pea mo ina pupunu ai ia taʼu e afe. ʼE ʼiloga lelei mai ia, ko te ʼu vaega fuli ʼaia ʼe talanoa aipe ki te taupau pe ʼaē e tahi ʼo Pule Faʼitaliha ʼa Sehova, ia te ʼAliki ko Sesu Kilisito, ʼaē neʼe fakanofo e Sehova ki tona hekaʼaga hau faka kolōlia ʼi selo ʼi te taʼu 1914.
15. ʼE faka ʼuhiga makehe feafeaʼi te ʼui ʼaē kua vave te “tuʼu” ʼa Mikaele?
15 Ohage ko tona tuʼu ia Taniela 12:1, ko Mikaele “ ʼe ina hāofaki” te hahaʼi ʼa Sehova, ko tona faka ʼuhiga kua tuʼu ia maʼa ia talu mai tona fakanofo hau, ʼi te taʼu 1914. Kae kua vave pe, “te malaga anai” ʼa Mikaele ʼi tona tahi faka ʼuhiga: he ko ia anai ko te Meʼa Gāue ʼaē ka haga anai ia Sehova ʼo toʼo te agakovi fuli pe ʼi te kele pea ko ia ko te Tagata Hāofaki ʼo te sosiete faka malamanei ʼaē ʼe faʼufaʼu e te hahaʼi ʼo te ʼAtua. ʼE lahi anai te “temi mamahi” ohage ko tona fakahā e Sesu ia Mateo 24:21, 22: “ ʼE ʼi ai anai te toe mamahi lahi, neʼe heʼeki hoko feiā talu mai te kamata ʼo te malamanei ʼo aʼu kia ʼaho nei, kailoa ia, pea ʼe mole toe hoko anai ia. ʼIo, ka na pau la ʼe mole fakanounou te ʼu ʼaho ʼaia, ʼe mole ʼi ai anai he kakano ʼe hāo; kae ʼuhi ko nātou ʼaē neʼe fili ko te ʼu ʼaho ʼaia ʼe fakanounou.”
16. Ko te kakano feafeaʼi ʼaē ka hāo anai lolotoga ʼo te toe mamahi lahi?
16 ʼI fakafiafia leva kia tatou ia he hāo ʼa ni “kakano” ʼi te temi ʼaia! ʼE mole hage anai ia ko te kau Sutea talagataʼa ʼaē neʼe ʼauha ʼi Selusalemi ʼi taʼu 70 ʼo totatou temi, tokolahi neʼe ʼave ʼo fakapōpulaʼi ʼi Loma. Kae, ko nātou ʼaē ka hāo anai “ ʼi te temi fakaʼaosi” ohage ko te kokelekasio faka kilisitiano ʼaē neʼe kua feholaki kehe ʼi Selusalemi ʼi te kamata ʼo tona puipui fakaʼosi. Ko nātou anai te hahaʼi ʼa te ʼAtua ia te toko miliona hahaʼi ʼaia ʼaē ʼe kau ki te hahaʼi tokolahi pea mo te kau kilisitiano fakanofo ʼaē kei nonofo anai ʼi te kele (Taniela 12:4). Ko nātou ʼaē ʼe nātou faʼufaʼu te hahaʼi tokolahi “ ʼe nātou ʼomai mai te mamahi lahi”. Koteā tona tupuʼaga? Koteʼuhi “neʼe fo tonatou ʼu kofu loloa pea neʼe nātou fakahihina ʼi te taʼataʼa ʼo te Akeno”. ʼE nātou tui ki te mālohi ʼaē ʼo te taʼataʼa ʼaē neʼe liligi e Sesu pea ʼe nātou fakahā te tui ʼaia ʼo tauhi ʼaki te agatonu ki te ʼAtua. ʼO kamata atu nei, ko Sehova, “Ia ia ʼaē ʼe heka ʼi te hekaʼaga faka hau”, ʼe ina folahi kia nātou tona fale fakamalumaluʼaga, kae ko te Akeno ia Sesu Kilisito, ʼe ina fafaga nātou pea ʼe ina taki nātou ki te ʼu matapuna ʼo te maʼuli — Fakahā 7:14, 15.
17. Neʼe feafeaʼi te fakaloto mālohiʼi ʼo te hahaʼi tokolahi ke nātou fai he aga ke fufū ai nātou ʼi te temi ka hoko ai te ʼaho ʼo te mamahi?
17 ʼI tanatou kumi ia Sehova, te faitotonu, pea mo te agavaivai, ko te ʼu miliona ʼo te hahaʼi tokolahi ʼe mole tonu ke nātou tuku ke momoko tonatou ʼuluaki ʼofa ki te moʼoni! Kapau ko koutou ko he tahi ʼi te ʼu hahaʼi ʼaia ʼaē ʼe fakatātā ki he ʼu ōvi, koteā ʼaē ʼe tonu ke koutou fai? Ohage ko tona tala e Kolose, kapite 3, ʼu vaega 5 ki te vahe 14, ʼe tonu ke “koutou huʼi ia koutou ia tokotou ʼuhiga ʼāfea mo tana ʼu aga”. Koutou kumi te tokoni fakaʼatua, ke koutou tau moʼo ‘koutou kofuʼi ia te ʼuhiga foʼou ʼaē ʼe fakatafito ki te mālama totonu’. ʼAki te agavaivai, koutou fakamālohiʼi pea mo taupau maʼu ia te fia gāue ʼaē ʼe ʼaoga moʼo vikivikiʼi ia Sehova pea mo fakaʼilo ki ʼihi tana ʼu fakatuʼutuʼu lalahi. Koia, ʼe lagi feala pe ke fufū ai koutou ʼi te “temi ʼo te mamahi”, ia te ʼaho “ ʼo te hāūhāū lahi ʼo Sehova”.
18, 19. ʼE faka ʼuhiga feafeaʼi ia te maʼuhiga ʼo te faʼa kātaki ki te hāofaki?
18 Kua ōvi mai te ʼaho ʼaia! Kua fakatoʼotoʼo ʼaupito mai kia tatou. Kua taʼu 57 nei te tānaki ʼo te hahaʼi ʼo te tokolahi. Tokolahi ia nātou ʼaia kua mamate pea ʼe talitali nei ia nātou ki tonatou toe fakatuʼuake. Kae ʼe tou ʼiloʼi papau ʼaki te fakakikite ʼaē ʼi te tohi ʼo Fakahā ko te hahaʼi tokolahi ʼe nātou ʼomai fakatahi anai mai te mamahi lahi pea ʼe nātou faʼufaʼu anai ia te uho ʼo he “kele foʼou” pe ʼe fakatagata (Fakahā 21:1). ʼE koutou ʼi ai anai koa? ʼE feala pe ia, he neʼe ʼui e Sesu ia Mateo 24:13: “Ko ʼaē ka ina kātakiʼi anai ki tona fakaʼosi, ko ia ʼaia ka hāo anai.”
19 Ko te ʼu kinakina ʼaē ʼe tau nei mo te kau kaugana ʼa Sehova ʼi te tuʼu ʼāfea ʼaenī ʼe feala pe anai ke ʼasili tona kovi. Pea ka hoko mai leva te mamahi lahi, ʼe feala pe ke tou maʼu ai he ʼu ʼahiʼahi. Kae, ke tou nonofo ōvi ia Sehova pea mo tana kautahi. Tou nonofo ʼalaʼala! “ ‘Koutou atalitali mai’, ko te tala ʼaia ʼa Sehova, ‘ ʼo aʼu ki te ʼaho ʼaē ʼe ʼau tuʼu ai anai ki te koloā, heʼe ko taku fakatotonu fakamāu ko te tānakiʼi ʼo te atu fenua, ke ʼau fakatahiʼi te atu puleʼaga, koteʼuhi ke ʼau huaʼi age kia nātou toku ʼu hāūhāū, toku hāūhāū lahi; heʼe ʼaki te afi ʼo toku mālohi ko te kele katoa ʼe ʼauha anai.’ ” — Sofonia 3:8.
20. ʼI te kua ōvi fakavilivili mai ʼo te “temi ʼo te mamahi”, koteā ʼaē ʼe tonu ke tou fai?
20 ʼO ʼuhiga mo totatou taupau pea mo totatou fakaloto mālohiʼi, neʼe foaki e Sehova ki tana hahaʼi te “lea maʼa” ʼaē ʼe kau ki ai te logo ʼo te Puleʼaga ʼaē kua ōvi mai, “ke nātou fetapā fuli ki te huafa ʼo Sehova, ke nātou tauhi fakatahi kia te ia”. (Sofonia 3:9.) ʼI te kua ōvi mai ʼo te ʼaho ʼo te “temi ʼo te mamahi”, ʼe tonu ke tou tauhi mālohi, ʼo tokoni ki niʼihi hahaʼi agavaivai ke nātou ‘fetapā ki te huafa ʼo Sehova’ ke nātou hāo.
Kei koutou manatuʼi koa?
◻ Koteā te gāue ʼa Sehova ka hoko anai ia muʼa ʼo te fakatuʼu ʼo te tokalelei ʼi te kele?
◻ ʼI tona tohi ʼaē ia Soele, koteā te meʼa ʼaē ʼe tonu ke fai ke kita hāo ai?
◻ ʼI tona tohi ʼaē ia Sofonia, ʼe feafeaʼi anai ki te kau agavaivai tanatou hāofaki ia nātou ʼi te hāūhāū lahi ʼa Sehova?
◻ Ko ai koa te “tagata ʼaē ʼe ina manukiʼi te lao”, pea neʼe feafeaʼi tana kau ki te ʼu fakapō?
◻ ʼO ʼuhiga mo te hāofaki, koteā te maʼuhiga ʼo te faʼa kātaki?