Te Kau Kaugana Fiafia ʼa Sehova
“Fiafia ia nātou ʼaē ʼe nātou ʼiloʼi tonatou masiva fakalaumālie.”—Mateo 5:3, MN.
1. Koteā te fiafia moʼoni, pea koteā ʼaē ʼe fakahā ai?
KO TE fiafia ʼe ko he koloā maʼuhiga ʼe maʼu e te hahaʼi ʼa Sehova. Neʼe ʼui fēnei e te tagata fai pesalemo ko Tavite: “Fiafia te hahaʼi ʼaē ko tonatou ʼAtua ko Sehova!” (Pesalemo 144:15) Ka fiafia he tahi pea ʼe logo lelei. Ko te fiafia moʼoni, ʼaē ʼe haʼu mai totatou loto, ʼe tupu ko tatatou ʼiloʼi ʼaē ʼe tapuakina tatou e Sehova. (Tāʼaga Lea 10:22) ʼE fakahā e te fiafia ʼaia tatatou ʼu felogoi lelei mo tatatou Tāmai ʼaē ʼe ʼi selo pea mo tatatou ʼiloʼi ʼaē ʼe tou fai tona finegalo. (Pesalemo 112:1; 119:1, 2) Tou fakatokagaʼi neʼe tala e Sesu te ʼu tupuʼaga e hiva ʼaē ʼe feala ke tou fiafia ai. Ko te vakaʼi ʼo te ʼu tupuʼaga ʼaia ʼo te fiafia ʼi te alatike ʼaenī pea mo ʼaē ka hoa mai, ʼe tokoni mai anai ke tou ʼiloʼi ʼe tou fiafia lahi anai mo kapau ʼe tou tauhi agatonu kiā Sehova, “te ʼAtua fiafia.”—1 Timoteo 1:11, MN.
Tou Mahino Ki Totatou Masiva Fakalaumālie
2. Ko te lakaga fea ʼaē neʼe palalau ai Sesu ʼo ʼuhiga mo te fiafia, pea neʼe koteā tana ʼu ʼuluaki palalau?
2 ʼI te taʼu 31 ʼo totatou temi, neʼe fai e Sesu te akonaki ʼe ʼiloa ʼaupito ʼo aʼu mai ki te temi nei. ʼE fakahigoa ko te Akonaki ʼi te Moʼuga, he neʼe fai e Sesu te akonaki ʼaia ʼi te faʼahi moʼuga ʼaē ʼe haga ki te Tai ʼo Kalilea. ʼE ʼui fēnei e te Evaselio ʼo Mateo: “ ʼI tana sio ki te hahaʼi tokolahi, neʼe hake ia ki te moʼuga; pea ʼi tana ʼosi heka ifo ʼi ai, neʼe ʼolo age ʼana tisipulo kiā te ia; pea haga ai ʼo akonaki kiā nātou ʼo ʼui maʼana: ‛Fiafia ia nātou ʼaē ʼe nātou ʼiloʼi tonatou masiva fakalaumālie, heʼe ʼa nātou te puleʼaga ʼo selo.’ ” ʼI tona fakaliliu moʼoni, neʼe fēnei te ʼu ʼuluaki palalau ʼaē ʼa Sesu: “Fiafia te hahaʼi ʼaē ʼe masisiva fakalaumālie,” peʼe “Fiafia ia nātou ʼaē ʼe nātou kolekole te laumālie.” (Mateo 5:1-3, Les Saintes Écritures — Traduction du monde nouveau — avec notes et références, kiʼi nota ʼi te lalo pasina)
3. ʼE tokoni feafeaʼi te agavaivai ki te kau Kilisitiano ke nātou maʼu te fiafia?
3 ʼI tana akonaki ʼi te moʼuga, neʼe fakahā ai e Sesu ʼe lahi age te fiafia ʼa he tahi mo kapau ʼe mahino kiā ia ʼe masiva fakalaumālie. Ko te kau Kilisitiano agavaivai, ʼaē ʼe nātou mahino lelei ki tonatou ʼuhiga agahala, ʼe nātou kolekole kiā Sehova ke fakamolemole age kiā nātou ʼo fakatafito ki te sakilifisio faitotogi ʼa Kilisito. (1 Soane 1:9) ʼE tokalelei ai tonatou ʼatamai pea mo nātou maʼu ai te fiafia moʼoni. “Fiafia ia ia ʼaē neʼe fakamolemole tana agatuʼu, ʼaē neʼe ʼuʼufi tana agahala.”—Pesalemo 32:1; 119:165.
4. (a) ʼE tou lava fakahā feafeaʼi ʼe tou mahino ki totatou masiva fakalaumālie pea mo te masiva fakalaumālie ʼa te hahaʼi? (b) ʼO hilifaki ki totatou fiafia, koteā ʼaē ʼe tou toe maʼu mokā tou mahino ki totatou masiva fakalaumālie?
4 Ko tatatou ʼiloʼi ʼaē ʼe tou masiva fakalaumālie, ʼe ina uga tatou ke tou lau ia te Tohi-Tapu ʼi te ʼaho fuli, mo tou fakaʼaogaʼi te meʼa kai fakalaumālie ʼaē ʼe foaki mai “ ʼi tona temi totonu” e “te tagata kaugana agatonu mo poto,” pea mo tou kau tuʼumaʼu ki te ʼu fono faka Kilisitiano. (Mateo 24:45, MN; Pesalemo 1:1, 2; 119:111; Hepeleo 10:25) ʼUhi ko totatou ʼofa ki totatou kāiga, ʼe tou tokaga ai ki te masiva fakalaumālie ʼa te hahaʼi, pea mo uga ai tatou ke tou faʼafai ʼi te fai faka mafola pea mo te akoʼi ʼo te logo lelei ʼo te Puleʼaga. (Maleko 13:10; Loma 1:14-16) Ka tou vaevae ia te ʼu moʼoni ʼo te Tohi-Tapu mo te hahaʼi pea ʼe tou fiafia ai. (Gaue 20:20, 35) ʼE toe lahi age totatou fiafia mokā tou metitasio ki te ʼamanaki taulekaleka ʼo te Puleʼaga pea mo te ʼu tapuakina ʼaē ka tuku mai anai e te Puleʼaga ʼaia. Ki te kau Kilisitiano fakanofo ʼaē ʼe nātou faʼufaʼu te “kiʼi fagaovi,” ko te ʼamanaki ʼo te Puleʼaga ʼe ko hanatou maʼuli tuputupua ʼi selo pea mo nātou kau ki te pule ʼo te Puleʼaga ʼo Kilisito. (Luka 12:32; 1 Kolonito 15:50, 54) Maʼa te “tahi ʼu ōvi” ʼe nātou maʼu anai te maʼuli heʼegata ʼi te palatiso ʼi te kele, ʼi te takitaki ʼo te Puleʼaga ʼaia.—Soane 10:16, MN; Pesalemo 37:11; Mateo 25:34, 46.
Fiafia Ia Nātou ʼAē ʼe Putu
5. (a) Koteā te faka ʼuhiga ʼo te kupusiga palalau “ia nātou ʼaē ʼe putu”? (b) ʼE fakaloto fīmālie feafeaʼi ia nātou ʼaia ʼe putu?
5 ʼE hage ʼe mole ʼalutahi te ʼu palalau ʼaē ʼe hoko atu e Sesu, he neʼe ina ʼui fēnei: “Fiafia ia nātou ʼaē ʼe putu, heʼe fakafimālie anai ia nātou.” (Mateo 5:4, MN ) ʼE lava feafeaʼi ki he tahi ke putu pea mo fiafia? Ke tou mahino ki te faka ʼuhiga ʼo te ʼu palalau ʼa Sesu, ʼe tonu ke tou vakaʼi peʼe ko te faʼahiga putu feafeaʼi ʼaē neʼe talanoa kiai. ʼE fakamahino e te tisipulo ko Sakopo ʼe tonu ke tou putu ʼuhi ko totatou ʼuhiga agahala. Neʼe ina tohi fēnei: “Koutou fufulu outou nima hahai agahala, pea koutou fakamaʼa outou loto hahai lotolotolua. Koutou fakamooni ki toutou mauli fakaofaofa, koutou putu pea mo fetagihi; ke liliu o putu tautou kokolo, pea ke liliu o mamahi toutou fiafia. Koutou fakavaivai ifo ia mua o te Aliki pea e ina hikihiki ake anai koutou.” (Sakopo 4:8-10) Ko nātou ʼaē ʼe lotomamahi moʼoni ʼuhi ko tonatou ʼuhiga agahala, ʼe nātou maʼu he loto fīmālie ʼi tanatou ʼiloʼi ʼaē ʼe feala ke fakamolemole tanatou ʼu agahala, mo kapau ʼe nātou tui ki te sakilifisio faitotogi ʼa Kilisito pea mo nātou fakahemala moʼoni ʼo fai te finegalo ʼo Sehova. (Soane 3:16; 2 Kolonito 7:9, 10) ʼE feala ai ke nātou maʼu he ʼu felogoi lelei mo Sehova pea mo maʼu te ʼamanaki ʼaē ke nātou tauhi kiā te ia pea mo vikiʼi ia ia ʼo talu ai. ʼAki te faʼahi ʼaia, ʼe nātou maʼu ai he fiafia lahi.—Loma 4:7, 8.
6. Koteā te faka ʼuhiga ʼo te putu ʼa ʼihi, pea ʼe fakaloto fīmālie feafeaʼi ia nātou ʼaia?
6 ʼE toe faka ʼuhiga te ʼu palalau ʼa Sesu kiā nātou ʼaē ʼe putu ʼuhi ko te ʼu ʼaluʼaga fakaʼofaʼofa ʼaē ʼe hoko ʼi te kele. Neʼe faka ʼuhiga e Sesu kiā ia totonu te lea faka polofeta ʼo Isaia 61:1, 2, ʼaē ʼe ʼui fēnei ai: “Ko te laumālie ʼo te Tuʼi ʼAliki ko Sehova ʼe ia te au, heʼe ko Sehova neʼe ina fakanofo au ke au fakahā he ʼu logo lelei ki te kau agavaivai. Neʼe ina fekauʼi au ke au faitoʼo ia nātou ʼe lavea ʼonatou loto, . . . moʼo fakafimālieʼi ia nātou fuli ʼaē ʼe putu.” ʼE toe faka ʼuhiga te gāue ʼaia ki te kau Kilisitiano fakanofo ʼaē ʼe kei māʼuʼuli ʼi te kele, ʼaē ʼe nātou fakahoko ʼaki te tokoni ʼo tanatou ʼu kaumeʼa, te “tahi ʼu ōvi.” ʼI hona ʼaluʼaga fakatātā ʼe nātou kau fuli ki te gāue ʼaē ko te fakaʼiloga ʼi te laʼe “te hahaʼi ʼaē ʼe nātou toʼetoʼe pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko ʼi te loto kolo [ʼo te Selusalemi ʼaposita, ʼaē ʼe ina fakatātā te Keletiate].” (Esekiele 9:4) ʼE faka fīmālieʼi te loto ʼo te hahaʼi putu ʼaia ʼaki te “Logolelei . . . o te Puleaga.” (Mateo 24:14) ʼE nātou fiafia ʼi tanatou ʼiloʼi ʼaē ko te tuʼu agakovi ʼaenī ʼa Satana ʼe vave fetogi anai ʼaki te tuʼu foʼou pea mo faitotonu ʼa Sehova.
Fiafia Ia Nātou ʼe Agamālū
7. Koteā ʼaē ʼe mole faka ʼuhiga kiai ia te kupu “agamālū”?
7 Neʼe hoko atu e Sesu tana Akonaki ʼi te Moʼuga, ʼo ina ʼui fēnei: “Fiafia ia nātou ʼaē ʼe agamālū, heʼe nātou maʼu anai te kele.” (Mateo 5:5, MN ) ʼI ʼihi temi, ʼe ʼui ko te agamālū ʼe ko he vaivaiʼaga. Kae ʼe mole moʼoni te faʼahi ʼaia. Neʼe fakamahino fēnei e te tagata sivi Tohi-Tapu te faka ʼuhiga ʼo te kupu ʼaē neʼe fakaliliu ʼaki te kupu “agamālū”: “Ko te agaaga maʼuhiga ʼo te tagata ʼaē ʼe [agamālū] ʼe ko he tagata ʼe loto lolomi ʼaupito. ʼE mole ko he tahi ʼe malū, he tahi ʼe ʼofa fakavalevale, pea mo fakaʼauʼauganoa. ʼE ko he tahi ia ʼe mālohi ʼi te fai puleʼaki.” Neʼe ʼui fēnei e Sesu ʼo ʼuhiga mo ia totonu: “E au agamalu mo agavaivai.” (Mateo 11:29) Kae ko Sesu neʼe lototoʼa ʼi tana palalau moʼo lagolago ki te ʼu pelesepeto faitotonu.—Mateo 21:12, 13; 23:13-33.
8. ʼE pipiki kiteā te agamālū, pea he koʼe ʼe ʼaoga kiā tatou te kalitātē ʼaia ʼi tatatou ʼu felogoi mo te hahaʼi?
8 Koia ko te agamālū ʼe pipiki ki te loto lolomi. ʼE fakatahiʼi e te ʼapositolo ko Paulo te agamālū pea mo te loto lolomi ʼi tana talanoa ki “te fua o te Laumalie.” (Kalate 5:22, 23) ʼE tou lava maʼu te agamālū ʼaki te tokoni ʼa te laumālie maʼoniʼoni. ʼE ko he kalitate faka Kilisitiano ʼe lagolago ki te tokalelei ʼi te loto kokelekasio pea mo tuʼa. Neʼe tohi fēnei e Paulo: “Koutou kofuʼi te ʼu ʼofa mamahi ʼo te manavaʼofa, pea mo te agalelei, te manatu agavaivai, te agamālū pea mo te kātaki fualoa. Koutou haga fekātakiʼaki pea mo fefakamolemoleʼaki ʼaki he lotolelei.”—Kolose 3:12, 13, MN.
9. (a) He koʼe ko te agamālū ʼe mole gata pe ʼi tatatou ʼu felogoi mo te hahaʼi? (b) Ko ai ʼaē ka ina faka fealagia anai ki te kau agamālū ke nātou maʼu te kele?
9 Kae ʼe mole tou agamālū pe ʼi tatatou ʼu felogoi mo te hahaʼi. ʼE tou toe fakahā foki ʼe tou agamālū mokā tou fakalogo ʼaki he lotolelei ki te pule faʼitaliha ʼo Sehova. Ko te faʼifaʼitaki maʼuhiga ʼi te faʼahi ʼaia ʼe ko Sesu Kilisito, ʼi tona maʼuli ʼi te kele neʼe agamālū pea mo fakalogo katoa ki te finegalo ʼo tana Tāmai. (Soane 5:19, 30) ʼE maʼu tāfito e Sesu te kele ohage ko he tofiʼa, heʼe ko ia te Hau ʼaē neʼe fakanofo. (Pesalemo 2:6-8; Taniela 7:13, 14) ʼE ina vaevae te tofiʼa ʼaia mo te toko 144 000 “ko he u kauga maù-tofia,” neʼe fili “mai te hahaʼi” ke nātou “hau ki te kele.” (Loma 8:17; Apokalipesi 5:9, 10; 14:1, 3, 4, MN; Taniela 7:27) Ko Kilisito pea mo tana ʼu kaugā hau ʼe nātou puleʼi anai te ʼu tagata mo fafine e toko lauʼi miliona ʼe nātou hage ko ni ʼu ōvi, pea ʼe hoko fakafiafia anai kiā nātou te meʼa ʼaē neʼe fakakikite e te tagata fai pesalemo: “Ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.”—Pesalemo 37:11; Mateo 25:33, 34, 46.
Fiafia Ia Nātou ʼe Nātou Fia Kakai Ki Te Faitotonu
10. ʼE lava fakafimālie feafeaʼi ia nātou ʼaē ʼe “fia kakai pea mo fia ʼiʼinu ki te faitotonu”?
10 Ko te tahi fiafia neʼe fakahā lelei e Sesu ʼi tana faiakonaki ʼi te moʼuga ʼo Kalilea, ʼo ina ʼui fēnei: “Fiafia ia nātou ʼaē ʼe fia kakai pea mo fia ʼiʼinu ki te faitotonu, heʼe nātou mākokona anai.” (Mateo 5:6, MN ) ʼE fakatuʼu e Sehova maʼa te kau Kilisitiano te ʼu lekula ʼo te faitotonu. Koia, ko nātou ʼaē ʼe nātou fia kakai pea mo fia ʼiʼinu ki te faitotonu, ʼi tona ʼuhiga moʼoni ʼe nātou fia kakai pea mo fia ʼiʼinu ki te takitaki ʼa te ʼAtua. Ko te hahaʼi ʼaia ʼe nātou ʼiloʼi lelei tanatou ʼu hala pea mo tonatou ʼuhiga agahala, pea ʼe nātou loto moʼoni ke tali nātou e Sehova. ʼE nātou fiafia lahi heʼe ʼaki te Folafola ʼa te ʼAtua, ʼe nātou ʼiloʼi, kapau ʼe nātou fakahemala pea mo kumi ke fakamolemole kiā nātou ʼo fakatafito ki te sakilifisio faitotogi ʼa Kilisito, pea ʼe nātou liliu anai ko he kau faitotonu iā muʼa ʼo te ʼAtua.—Gaue 2:38; 10:43; 13:38, 39; Loma 5:19.
11, 12. (a) ʼE liliu feafeaʼi te kau Kilisitiano fakanofo ko he kau faitotonu? (b) ʼE faka fealagia feafeaʼi anai ia te fia ʼiʼinu ʼaē ʼa te ʼu kaumeʼa ʼa te kau fakanofo ki te faitotonu?
11 Neʼe ʼui e Sesu ko te hahaʼi ʼaia ʼe nātou fiafia anai, koteʼuhi ʼe nātou “mākokona.” (Mateo 5:6, Kingdom Interlinear) Ko te kau Kilisitiano fakanofo ʼaē ʼe tonu ke “natou pule” mo Kilisito ʼi selo, ʼe nātou liliu ʼo ‘faitotonu ki te maʼuli.’ (Loma 5:1, 9, 16-18) ʼE fakatupu foʼou nātou e Sehova, koia ʼe nātou liliu ai ko tona ʼu foha fakalaumālie. ʼE nātou kaugā maʼu tofiʼa mo Kilisito, ʼe nātou liliu ko he ʼu hau pea mo he ʼu pelepitelo ʼi tona Puleʼaga ʼi selo.—Soane 3:3; 1 Petelo 2:9.
12 Ko te ʼu kaumeʼa ʼa te kau fakanofo ʼe mole heʼeki tala ʼe nātou faitotonu ki te maʼuli. Kae ʼi hona faʼahiga ʼaluʼaga, ʼe tala e Sehova ʼe nātou faitotonu ʼuhi ko tanatou tui ki te taʼataʼa ʼaē neʼe liligi e Kilisito. (Sakopo 2:22-25; Apokalipesi 7:9, 10) ʼE nātou liliu ko te kau faitotonu ʼi tonatou ʼuhiga kaumeʼa mo Sehova pea ʼe hāofaki anai nātou ʼi te temi ʼo “te mamahi lahi.” (Apokalipesi 7:14, MN ) Ko tanatou fia ʼiʼinu ki te faitotonu ʼe faka fealagia anai ʼi te temi ʼaē ka takitaki ai nātou e te “lagi foʼou” pea mo nātou kau ki te kele foʼou ʼaē “ ʼe tonu ke nofo ai te faitotonu.”—2 Petelo 3:13, MN; Pesalemo 37:29.
Fiafia Ia Te Kau Manavaʼofa
13, 14. Ko te ʼu faʼahi fea ʼaē ʼe tonu ke tou fakahā ai te manavaʼofa, pea koteā te ʼu lelei ʼaē ka tou maʼu ai?
13 ʼI tana hoko atu tana Akonaki ʼi te Moʼuga, neʼe ʼui fēnei e Sesu: “Fiafia ia nātou ʼaē ʼe manavaʼofa, heʼe fai anai kiā nātou te manavaʼofa.” (Mateo 5:7, MN ) ʼI te faʼahi ʼo te lao, ko te manavaʼofa ʼe faka ʼuhiga ki te agaʼofa ʼa te tagata tuʼi fakamāu, ʼo mole ina fakahoko kātoa te fakatūʼā ʼaē ʼe fakagafua e te lao ke fai kiā ia ʼaē neʼe agakovi. Kae ʼi te Tohi-Tapu, ko te ʼuluaki kupu ʼaē neʼe fakaliliu ʼaki te kupu “manavaʼofa” ʼe faka ʼuhiga tāfito ki te loto tokaga peʼe ko te fakaʼofaʼofa ʼo fakaloto fīmālie ia nātou ʼaē ʼe nonofo ʼi te faigataʼaʼia. Ko nātou ʼaē ʼe manavaʼofa ʼe nātou fai he ʼu gāue moʼo tokoni ki te hahaʼi. Ko te lea fakatātā ʼa Sesu ʼo ʼuhiga mo te tagata Samalitana agalelei, ʼe ko he faʼifaʼitaki lelei ʼaia ʼo he tahi ʼe “manavaʼofa” kiā ia ʼaē ʼe nofo ʼi te faigataʼaʼia.—Luka 10:29-37, MN.
14 Ke tou maʼu te fiafia mai te manavaʼofa, ʼe tonu ke tou fai he ʼu gāue ʼe lelei maʼa nātou ʼaē ʼe nonofo ʼi te faigataʼaʼia. (Kalate 6:10) Neʼe manavaʼofa ia Sesu ki te hahaʼi ʼaē neʼe sio ki ai. “Nee fonu i te ofa kia natou, koteuhi kua natou hage he u ovi e mole honatou [“tagata,” MN ] tauhi, pea nee lahi ia mea nee kamata akonaki ki ai kia natou.” (Maleko 6:34) Neʼe mahino kiā Sesu ko te meʼa ʼaē neʼe ʼaoga tāfito ki te malamanei neʼe ko te ʼu meʼa fakalaumālie. ʼE feala mo tatou ke tou manavaʼofa pea mo ʼofa ʼo tou vaevae ki te hahaʼi te meʼa ʼaē ʼe ʼaoga tāfito kiā nātou—te “Logolelei . . . o te Puleaga.” (Mateo 24:14) ʼE toe feala ke tou tokoni ki te ʼu Kilisitiano kua mātutuʼa, mo te kau vītua, pea mo te ʼu fānau ʼaē ʼe hala mo tāmai pea mo “fakalotomalohiʼi natou kua lotovaivai.” (1 Tesalonika 5:14; Tāʼaga Lea 12:25; Sakopo 1:27) ʼE tou liliu ai ʼo fiafia pea ʼe toe manavaʼofa anai Sehova kiā tatou.—Gaue 20:35; Sakopo 2:13.
ʼE Maʼa Tonatou Loto Pea Mo Nātou Manako Ki Te Tokalelei
15. ʼE lava feafeaʼi hatatou loto maʼa pea mo manako ki te tokalelei?
15 Neʼe fakahā lelei e Sesu te ono pea mo te fitu fiafia, ʼi tana ʼui fēnei: “Fiafia ia nātou ʼaē ʼe maʼa tonatou loto, heʼe nātou sio anai ki te ʼAtua. Fiafia ia nātou ʼaē ʼe manako ki te tokalelei, heʼe fakahigoa anai nātou ko ‘te ʼu foha ʼo te ʼAtua.’ ” (Mateo 5:8, 9, MN ) Ko te loto ʼaē ʼe maʼa ʼe mole maʼa pe ʼi te aga ʼaē ʼe tonu ke fai, kae ʼe toe heʼe mele ʼi te faʼahi fakalaumālie pea mo tauhi ʼaki he loto katoa kiā Sehova. (1 Fakamatala 28:9; Pesalemo 86:11) ʼI te lea faka Keleka, ko te kupu ʼaē neʼe fakaliliu ʼaki te kupu “manako ki te tokalelei,” ʼe faka ʼuhiga ki “te ʼu hahaʼi ʼe nātou gāue ki te tokalelei.” Ko nātou ʼaē ʼe manako ki te tokalelei ʼe nātou tokalelei mo tonatou ʼu tēhina Kilisitiano, pea mo tonatou ʼu kāiga mo kapau ʼe fealagia. (Loma 12:17-21) ʼE nātou “kumi te tokalelei pea [mo nātou] haga muliʼi.”—1 Petelo 3:11, MN.
16, 17. (a) He koʼe ʼe fakahigoaʼi te kau fakanofo ko “te ʼu foha ʼo te ʼAtua,” pea ʼe nātou ‘sio feafeaʼi ki te ʼAtua’? (b) Ko te “tahi ʼu ōvi” ʼe nātou ‘sio feafeaʼi ki te ʼAtua’? (c) Ko te temi fea ʼaē ka liliu moʼoni ai te “tahi ʼu ōvi” ko “te ʼu foha ʼo te ʼAtua” pea ʼe hoko feafeaʼi anai ia te faʼahi ʼaia?
16 ʼE fai kiā nātou ʼaē ʼe manako ki te tokalelei pea mo te loto maʼa, ia te fakapapau ʼaē ʼe “fakahigoa anai nātou ko ‘te ʼu foha ʼo te ʼAtua’ ” pea “ ʼe nātou sio anai ki te ʼAtua.” Ko te ʼu Kilisitiano fakanofo ʼe nātou maʼu te laumālie pea ʼe nātou liliu ko “te u fanau” ʼa Sehova ʼi tanatou kei māʼuʼuli ʼi te kele. (Loma 8:14-17) ʼI te temi ʼaē ʼe fakatuʼuake ai nātou ke nātou fakatahi mo Kilisito ʼi selo, ʼe nātou tauhi iā muʼa ʼo Sehova pea mo nātou sio moʼoni kiā te Ia.—1 Soane 3:1, 2; Apokalipesi 4:9-11.
17 Ko te “tahi ʼu ōvi” ʼaē ʼe manako ki te tokalelei, ʼe nātou tauhi kiā Sehova ʼo fakalogo ki te Tagata Tauhi Ōvi Agalelei, ia Kilisito Sesu, ʼaē ʼe liliu ko tanatou “Tāmai Heʼegata.” (Soane 10:14, 16, MN; Isaia 9:6) Ko nātou ʼaē ʼe nātou fakalaka ʼi te ʼahiʼahi fakamuli hili te Pule ʼa Kilisito Ia Taʼu e Afe, ʼe nātou liliu anai ko te ʼu foha ʼo Sehova ʼi te kele pea mo nātou maʼu “te ateaina o te kololia o te u fanau a te Atua.” (Loma 8:21; Apokalipesi 20:7, 9) ʼO fakatalitali kiai, ʼe nātou palalau kiā Sehova ohage ko hanatou Tāmai, koteʼuhi neʼe nātou foaki tonatou maʼuli kiā te ia, ʼo nātou fakamoʼoni ai ko Ia ʼaē neʼe ina foaki te maʼuli. (Isaia 64:8) Ohage ko Sopo pea mo Moisese ʼi te temi muʼa, ʼe feala ke nātou ‘sio ki te ʼAtua’ ʼaki te ʼu mata ʼo te tui. (Sopo 42:5; Hepeleo 11:27) ʼAki ‘te ʼu mata ʼo tonatou loto’ pea mo te ʼatamai mālama totonu ʼo ʼuhiga mo te ʼAtua, ʼe nātou sio ai ki te ʼu kalitate fakatalakitupua ʼa Sehova pea mo nātou faiga ke nātou faʼifaʼitaki kiā te ia ʼi tanatou fakahoko tona finegalo.—Efeso 1:18; Loma 1:19, 20; 3 Soane 11.
18. ʼO mulimuli ki te ʼu ʼuluaki fiafia e fitu ʼaē neʼe talanoa kiai Sesu, ko ai ʼaē ʼe nātou maʼu te fiafia moʼoni ia ʼaho nei?
18 Neʼe tou vakaʼi ko nātou ʼaē ʼe nātou mahino ki tonatou masiva fakalaumālie, mo nātou ʼaē ʼe putu, mo agamālū, mo nātou ʼaē ʼe fia kakai pea mo fia ʼiʼinu ki te faitotonu, mo manavaʼofa, mo maʼa ʼi tonatou loto, pea mo manako ki te tokalelei, ʼe nātou maʼu te fiafia moʼoni ʼi te tauhi kiā Sehova. Kae ko nātou ʼaia neʼe nātou felāveʼi tuʼumaʼu mo te ʼu fakafeagai, peʼe ko te ʼu fakataga. ʼE puli ai koa tonatou fiafia? ʼE vakaʼi anai te fehuʼi ʼaia ʼi te alatike ʼaē ka hoko mai.
Moʼo Fakamanatu
• Koteā te fiafia ʼe maʼu e nātou ʼaē ʼe mahino ki tonatou masiva fakalaumālie?
• ʼE fakaloto fīmālie feafeaʼi ia nātou ʼaē ʼe putu?
• ʼE tou fakahā feafeaʼi te agamālū?
• He koʼe ʼe tonu ke tou manavaʼofa, mo maʼa ʼi totatou loto, pea mo manako ki te tokalelei?
[Paki ʼo te pasina 10]
“Fiafia ia nātou ʼaē ʼe nātou ʼiloʼi tonatou masiva fakalaumālie”
[Paki ʼo te pasina 10]
“Fiafia ia nātou ʼaē ʼe manavaʼofa”
[Paki ʼo te pasina 10]
“Fiafia ia nātou ʼaē ʼe fia kakai pea mo fia ʼiʼinu ki te faitotonu”