Ko Te Hāofaki ʼi Te Fakahā ʼo Sesu Kilisito

“Koutou haga fakafiafia (...) ke koutou fakafiafia pea mo koutou fonu foki ʼi te fiafia lolotoga te fakahā ʼo tona kolōlia.” — 1 Petelo 4:13.

1. Neʼe feafeaʼi te fakakoloaʼi e Sehova tana ʼu kaugana?

KO SEHOVA neʼe ina fakakoloaʼi tana kau Fakamoʼoni ʼaki te ʼu tuʼuga meʼa ʼofa. ʼI tona ʼuhiga Tagata fai ako Lahi maʼa tatou, neʼe ina fakamālamaʼi tatou ʼaki te mahino lahi ki tona finegalo pea mo tona ʼu fakatuʼutuʼu. ʼAki tona laumālie maʼoniʼoni, neʼe ina fakatupu ia tatou te fealagia ʼaē ko te fakahā te mālama ʼaki he loto toʼa. Ko te ʼapositolo ko Paulo neʼe ina tala fēnei mai kia tatou ia 1 Kolonito 1:6, 7: “Ko te fakamoʼoni ʼo ʼuhiga mo Kilisito neʼe mālohi ʼio koutou, ʼo tupu ai he mole hāla mo koutou he meʼa ʼofa lolotoga te temi ʼaē ʼe koutou fakatalitali ʼaki he loto hoha ki te fakahā ʼo totatou ʼAliki ko Sesu Kilisito.”

2. Koteā te ʼamanaki fakafiafia ʼe hoko ʼi te “fakahā ʼo totatou ʼAliki ko Sesu Kilisito”?

² “Ko te fakahā ʼo totatou ʼAliki ko Sesu Kilisito” — koteā tona faka ʼuhiga? ʼE faka ʼuhiga ki te temi ʼaē ka hā ai ia Sesu ʼi tona ʼuhiga Hau faka kolōlia, ʼo ina toʼo te gāue ʼaē ko te fakapale ʼo tana kau tisipulo agatonu pea mo fakahoko te kami ki te kau heletiko. Ohage ko tana fakahā ia 1 Petelo 4:13, ʼe ko he temi ʼe “fakafiafia anai pea mo fonu ʼi te fiafia” te kau kilisitiano agatonu, ʼaē neʼe fakanofo e te laumālie feiā mo tonatou kaugā fagona ʼo te toe hahaʼi tokolahi, koteʼuhi ʼe ina fakaʼiloga te fakaʼosi ʼo te ʼu faʼahiga meʼa ʼo te tuʼu ʼaenī.

3. ʼE feafeaʼi hatatou tuʼu maʼu, ohage ko ʼotatou ʼu tēhina ʼi Tesalonika?

³ ʼI te fakaōviōvi mai ʼo te temi ʼaia, ko Satana ʼe ina fakalahilahi te ʼu fakahala ʼaē kia tatou. Hage ko he laione ʼe gugulu, ʼe ina faigaʼi ke ina kai tatou. ʼE tonu ke tou lotomālohi (1 Petelo 5:8-10)! Ko ʼotatou ʼu tēhina ʼo te kolo ʼāfea ko Tesalonika, ʼi tanatou foʼofoʼou ʼi te moʼoni, neʼe nātou tau mo te ʼu fakataga ohage ko te meʼa ʼe hoko ki te tokolahi ʼo te kau Fakamoʼoni ʼa Sehova ʼi te temi nei. Koia, ko te ʼu palalau ʼa te ʼapositolo ko Paulo ʼe ʼi ai tona ʼuhiga kia tatou. Neʼe ina tohi fēnei: “ ʼIo, ʼe tonu nai te faʼahi ʼo te ʼAtua te liufaki te fakataga kia nātou ʼaē e nātou fakatagaʼi koutou, kae kia koutou, ʼaē ʼe tau mo te tautea, ko te fakafimālie mo mātou, lolotoga te temi ʼo te fakahā ʼo te ʼAliki ko Sesu, mai selo, ʼaki ʼana ʼu ʼaselo mālohi, ʼi he afi kakaha, ʼi te temi ʼaē ka ina fakahoko ai te kami kia nātou ʼaē ʼe mole nātou ʼiloʼi te ʼAtua pea kia nātou ʼaē ʼe talagataʼa ki te logo lelei ʼo ʼuhiga mo totatou ʼAliki ko Sesu.” (2 Tesalonika 1:6-8). ʼIo, ko te fīmālie ʼe hoko anai!

4. He koʼe koa ʼe tāu te fakamāu ʼo te kau takitaki lotu mo te temi ʼo te fakahā ʼo Sesu?

⁴ ʼI te temi ʼo Paulo, neʼe lahi te ʼu fakataga neʼe fakatupu e te kau takitaki lotu faka sutea. ʼO toe feiā aipe ʼi te temi nei, ko te fakafeagai ki te kau Fakamoʼoni ʼa Sehova ʼaē ʼe aga fakatokatoka ʼe tau fakaneke e nātou ʼaē e nātou ʼui e nātou fakafofoga te ʼAtua, kae tāfito te kau takitaki ʼo te keletiate. Ko nātou ʼaia e nātou ʼui e nātou ʼiloʼi te ʼAtua, kae e nātou lituʼa ki te “Sehova e tahi” ʼo te Tohi-Tapu, ʼo nātou fetogi ia ia ʼaki te Tahitolu ʼaē ʼe ko te misitelio (Maleko 12:29). ʼE mole nātou fakalogo nātou ki te logo lelei ʼo ʼuhiga mo totatou ʼAliki Sesu, ʼo nātou kumi te fīmālie mai te takitaki fakatagata pea mo lituʼa ki te logo lelei ʼo ʼuhiga mo te Puleʼaga ʼo te faitotonu ʼa Kilisito ʼe ka haʼu. Ko te kau fakafeagai faka lotu ʼaia ʼe tonu ke nātou mamate ʼi te temi ʼo te “fakahā ʼo te ʼAliki Sesu mai te lagi”!

Ko te “Haʼu” ʼa Sesu Kilisito

5. ʼE feafeaʼi te fakamatalatala lelei ʼo te fakahā ʼo Sesu ia Mateo 24:29, 30?

⁵ Ko te fakahā ʼaia ʼe fakamatalatala lelei e Sesu ia Mateo 24:29, 30. ʼI tana fakamatalatala ʼo te ʼu koga kehekehe ʼo te fakaʼiloga ʼo tana ʼafio pea mo te fakaʼosi ʼo te ʼu faʼahiga meʼa ʼo te tuʼu ʼaenī, ʼe ina ʼui fēnei: “Ko te laʼā ʼe fakapōʼuli anai, pea ko te māhina ʼe mole tuku ifo anai tona mālama, pea ko te ʼu fetuʼu ʼe fetoki anai mai te lagi, pea ko te ʼu mālohi ʼo te lagi ʼe galulu anai.” ʼI te temi ʼaia, “ ʼe hā anai mai te lagi te fakaʼiloga ʼo te Foha ʼo te tagata”. Ko te ʼu puleʼaga ʼo te kele “ ʼe nātou tuki fatafata anai mo fetagihi, pea e nātou sisio anai ki te Foha ʼo te tagata [ia te Hau mesianike ʼo te ʼAtua] ʼe haʼu ʼi te ʼu ʼao mai selo ʼaki te mālohi pea mo te kolōlia lahi”. Ko te “haʼu” ʼaia, ʼi te faka keleka erkhomenon, ʼe faka ʼuhiga ki tana hā ʼi tona ʼuhiga Lagiaki Lahi ʼa Sehova.

6, 7. ʼE feafeaʼi te faka ʼuhiga “ko te mata fuli pe ʼe sio anai kia te ia”, pea ko ai ʼe kau ai?

⁶ Ko te “haʼu” ʼaia ʼe toe fakamatala e te ʼapositolo ko Soane ia Fakahā 1:7, ʼe ina ʼui ai: “Koʼeni, ʼe haʼele mai mo te ʼu ʼao.” Ko te ʼu fili ʼo Sesu ʼe mole nātou sio mata anai ki ai, kae ko “te ʼu ʼao” ʼe faka ʼuhiga ʼe haʼu fakapulipuli moʼo fakahoko ʼo te fakamāu. Kapau neʼe sio mata feiā pe te ʼu hahaʼi ki tana kolōlia ʼi selo, e nātou kivi anai, ohage ko Saulo, ʼi te ala ʼaē ki Damas, neʼe kivi ʼi te hā age ʼa Sesu kua faka kolōlia ʼi te mālama lahi fakapulagia. — Gāue 9:3-8; 22:6-11.

⁷ Ko te fakamatala ia Fakahā ʼe ina ʼui “ ʼe sio anai ki ai te mata fuli pe, pea mo nātou ʼaē neʼe nātou hukiʼi ia ia; pea ko te ʼu telepi fuli ʼo te kele e nātou tuki fatafata anai ʼi te mamahi ʼuhi ko ia”. Ko te meʼa ʼaia ʼe faka ʼuhiga ko te kau fakafeagai ʼi te kele e nātou mahino anai ki te tautea ʼe tuku ifo e Sesu kia nātou pea ʼe haʼu ʼaki te mālohi pea mo te kolōlia lahi ʼi tona ʼuhiga Lagiaki ʼo Sehova. He koʼe ʼe fakamatala te ʼu fili ʼaia ohage “ko nātou ʼaē neʼe nātou hukiʼi ia ia”? Koteʼuhi ko tonatou fehiʼa ki te kau kaugana ʼa Sehova ʼi te temi nei ʼe tatau mo nātou ʼaē neʼe nātou matehi ia Sesu. ʼIo, e nātou ‘tuki fatafata mamahi anai ʼi te lotomamahi ʼuhi ko ia’.

8. Koteā te fakatokaga ʼe fai e Sesu mo Paulo ʼo ʼuhiga mo te ʼauha fakafokifā?

⁸ ʼE hoko feafeaʼi anai te ʼaho lagavaka ʼa Sehova? ʼI te lea faka polofeta ia Luka kapite 21, ko Sesu ʼe ina fakamatalatala te ʼu meʼa fakamataku ko te fakaʼiloga ʼaia ʼo tana ʼafio talu mai te taʼu 1914. Koia, ʼi te ʼu vaega 34 pea mo te 35, ʼe fēnei te fakatokaga ʼa Sesu: “Koutou tokaga kia koutou totonu, ke ʼaua naʼa mamafa ʼo koutou loto ʼi te lahi fau ʼo te meʼa kai, pea mo te lahi fau ʼo te meʼa ʼinu, pea mo te ʼu tuʼania ʼo te maʼuli, pea mo fokifā pe kua hoko fakapuna’maʼuli kia koutou te ʼaho ʼaia, ohage ko he hele. Heʼe haʼu anai kia nātou fuli ʼaē ʼe nonofo ʼi te kele.” ʼIo, ko te ʼaho lagavaka ʼa Sehova ʼe haʼu fakafokifā, fakapuna’maʼuli! Ko te ʼapositolo ko Paulo ʼe ina fakamoʼoni te faʼahi ʼaia ia 1 Tesalonika 5:2, 3, ʼi tana ʼui ʼaē: “Ko te ʼaho ʼo Sehova ʼe haʼu moʼoni ia ohage ko he tagata kaihaʼa ʼi te pōʼuli. Ka nātou ʼui anai: ‘Tokalelei pea mo fīmālie!’, pea ko te faka ʼauha fakafokifā ʼe hoko anai kia nātou.” Ko te ʼu puleʼaga kua nātou talanoa ʼi te temi nei ki te tokalelei pea mo te fīmālie, pea e nātou feʼuiʼaki ke nātou foaki fakalahi he mālohi ki te Kautahi ʼo te ʼatu ʼu puleʼaga fakatahi ke ina fakatokatoka te ʼu tokakovi ʼaki te mālohi faka solia.

9. Ko “te mālama ʼe fakapulagia” kia ai, pea koteā tona tupuʼaga?

⁹ ʼI te ʼu vaega 4 pea mo te 5, ko te ʼapositolo ko Paulo ʼe hoko atu tana palalau mai: “Kae ia koutou, ʼu tēhina, ʼe mole koutou ʼi te fakapōʼuli, ke hoko mai te ʼaho ʼaia ohage ko he hā fakapuna’maʼuli ʼa he kau kaihaʼa, koteʼuhi ko koutou fuli ko te ʼu foha ʼo te mālama pea mo te ʼu foha ʼo te ʼaho. ʼE mole tou kau ki te ʼu pōʼuli peʼe ki te fakapōʼuli ʼaoʼao.” ʼE tou fakafiafia ʼi totatou ʼuhiga foha ʼo te mālama — ko te kau ʼave mālama ki te hahaʼi ʼaē e nātou holi mamahi ki te tokalelei pea mo he fīmālie moʼoni ʼi he mālama foʼou ʼo te ʼAtua. Ia Pesalemo 97:10, 11, ʼe tou lau fēnei ʼi ai: “Ko koutou ʼaē ʼe ʼoʼofa kia Sehova, koutou fehiʼa ki te meʼa ʼaē ʼe kovi. ʼE ina taupau te ʼu nefesi ʼo tana kau agatonu; mai te kau agakovi, ʼe ina hāofaki nātou. Ko te mālama neʼe hā ki te agatonu, pea ko te fiafia maʼa nātou ʼaē ʼe totonu tonatou loto.”

Te fakahoahoa ʼo te ʼu ʼaluʼaga

10. Koteā te fakatokaga fakatomuʼa ʼe tonu ke tou fakatokagaʼi ʼo ʼuhiga mo te ʼaho ʼo te ʼAtua, ʼaho ʼo te huʼi maʼua (Fakahā 16:15)?

¹⁰ ʼE feafeaʼi koa te faka ʼaluʼalu ʼo te ʼu meʼa mokā hoko mai anai te toe mamahi lahi? Tou vakaʼi ia Fakahā kapite 16. Koutou fakatokagaʼi, ʼi te fakamatala te vaega 13 ʼo aʼu ki te vaega 16, ko te ʼu laumālie fakatemonio ʼuli e nātou fakatahitahiʼi te ʼu puleʼaga ʼo te kele katoa ki Hala-Maketone, te tau ʼo te ʼaho lahi ʼo te ʼAtua Māfimāfi. Ko te Tohi-Tapu ʼe ina toe fakahā foki ko te ʼaho ʼo te huʼi maʼua ʼe fakaōviōvi mai ohage ko he tagata kaihaʼa, pea ʼe ina fakatokaga mai ke tou nonofo ʼalaʼala — ke tou taupau totatou ʼu teu fakalaumālie, ʼaē ko te fakaʼiloga ki te fakamaʼuli. Kua hoko mai te temi ʼo te fakamāu te hahaʼi ʼo te kele katoa, te ʼu puleʼaga, pea mo te tahi age. Ko ai ia ia ʼaia?

11. ʼE feafeaʼi te fakamatalatala e te fafine ʼaē ia Fakahā 17:5 ia ia totonu?

¹¹ Ko te fafine fakatātā neʼe faiga ke ina fakaliliu “ia ia ko he tahi e maʼuhiga”. ʼE fakamatala tona ʼuhiga ia Fakahā 17:5 ohage ko “he misitelio: ‘Papiloni Lahi, te faʼe ʼo te ʼu paomutu pea mo te ʼu meʼa fakalialia ʼo te kele’ ”. Kae ki te kau Fakamoʼoni ʼa Sehova, kua puli tona ʼuhiga faka misitelio. Neʼe ina fakahā ia ia totonu ko ia ko te puleʼaga faka malamanei ʼo te lotu hāla, ʼaē ko te ʼu lotu ʼo te keletiate ʼe ko hona koga maʼuhiga. ʼE fakalialia kia mata ʼa Sehova koteʼuhi neʼe kau ki te ʼu meʼa faka politike, koteʼuhi ʼe “kona ʼi te toto ʼo te kau maʼoniʼoni”, ʼi tana fakatagaʼi te kau kilisitiano moʼoni, pea ʼe lākahala ʼi te toto “ ʼo nātou fuli ʼaē neʼe matehi ʼi te kele”, ʼo kau ai mo te toko teau miliona tupu hahaʼi neʼe matematehi pe ʼi te sēkulō 20. — Fakahā 17:2, 6; 18:24.

12. He koʼe koa ʼe tauteaʼi te ʼu magaʼi lotu ʼo te keletiate?

¹² Kae kovi age ia, ko te ʼu magaʼi lotu ʼo te keletiate neʼe nātou ʼulihi te huafa ʼo te ʼAtua ʼaē e nātou lau ʼaki te malualoi e nātou fakafofoga. Neʼe nātou ako te ʼu filosofia faka papiloni pea mo te ʼu filosofia faka keleka kae nātou lituʼa ki te ʼu Folafola maʼa ʼo te ʼAtua pea neʼe nātou kau ki te fakahehema ʼo te ʼu aga ʼo te ʼu puleʼaga katoa ʼi tanatou tali te ʼu faʼahiga maʼuli tokanoa ʼaē ʼe fakafeagai ki te ʼu fakatuʼutuʼu ʼo te Tohi-Tapu. Ko te ʼu hahaʼi gaohi matani gāue mānumānu ʼe maʼu ʼi te lotolotoiga ʼo nātou ʼe tauteaʼi e te ʼu palalau ia Sake 5:1, 5: “Kia koutou ʼi te temi nei, hahaʼi maʼu koloā: koutou fetagihi, koutou fai he ʼu kalaga ʼo ʼuhiga mo te ʼu malaʼia ʼe hoko kia koutou. ʼI te kele neʼe koutou maʼuʼuli ʼi te maʼu koloā pea neʼe koutou kumi te ʼu holi ʼo te sino. Neʼe koutou fakagako tokotou loto ʼi te ʼaho ʼo te fakamate.”

Ko Papiloni Lahi kua to!

13. ʼE kamata feafeaʼi te toe mamahi lahi, pea koteā te tokaga ʼe faka maʼuhiga ia Fakahā 18:4, 5?

¹³ ʼE kamata anai te toe mamahi lahi ʼaki te fakahoko ʼo te fakamāu ʼa Sehova ki te Papiloni Lahi. ʼE fakamatalatala lelei e Fakahā 17:15-18 te “manatu” ʼa te ʼAtua ʼaē ko te fakaʼaogaʼi ʼo te “ ʼu tala e hogofulu” ʼo te ʼu mālohi lalahi ʼo te O.N.U. (Kautahi ʼo te ʼatu ʼu fenua fakatahi), “te manu fekai” ʼo te ʼatu ʼu fenua, ke nātou faka ʼauha ia ia. “Pea ko te ʼu tala ʼaē e hogofulu ʼaē neʼe ke sio ki ai mo te manu fekai, — ko nātou ʼaia e nātou fehiʼa anai ki te paomutu pea e nātou maumauʼi anai ia ia pea tuku telefua pea e nātou kai anai ki tona ʼu kakano, pea e nātou tutu anai ia ia ʼi te afi ʼo puli noa ʼosi. Koteʼuhi ko te ʼAtua neʼe ina ai ki tonatou ʼu loto ke nātou fakahoko tana manatu.” Koia ʼe mole ko he meʼa fakapuna’maʼuli ko te leʼo mai lagi ʼe ina kalagaʼi te fakatokaga maʼuhiga ʼaē ʼe tuʼu ia Fakahā 18:4, 5: “Koutou mavae mai ia ia, ê taku hahaʼi, mo kapau ʼe mole koutou fia maʼu he vahe ʼo tona ʼu tautea. Koteʼuhi ko tana ʼu agahala kua faka aʼu ki te lagi, pea ko te ʼAtua neʼe ina toe manatuʼi tana ʼu gāue heʼe faitotonu.” Ko te kalaga ʼaia ʼe kei hoko atu tana fai: koutou motuhi fuli te pikipiki mo te lotu hāla, ia muʼa ʼo te tauhala!

14. Ko ai anai ʼaē ka fakamamahi ki te pulihi ʼo te Papiloni Lahi, pea koteā tona tupuʼaga?

¹⁴ Koteā anai ka fai e te malamanei mokā maumauʼi anai te Papiloni Lahi? Ko te ʼu hahaʼi politike — te “ ʼu hau ʼo te kele” — e nātou tutuʼu mamaʼo pea e nātou fetagihi anai ki ai koteʼuhi neʼe nātou fefakafiafiaʼaki ʼi tanatou folonikasio fakalaumālie lolotoga te temi loaloaga. Ko te “kau fakatau koloā haʼele”, te ʼu hahaʼi gaohi matani gāue mānumānu ʼaē neʼe “nātou koloā ia ia” e nātou fetagihi anai pea mo nātou fakamamahi anai kia ia. Mo nātou ʼaia, e nātou tutuʼu mamaʼo anai mai ia ia ʼo nātou ʼui: “Meʼa kovi foki, meʼa kovi foki! ko te kolo lahi, ʼaē neʼe teu ki te lino mānifi, ʼe lanu kula fakapōʼuli pea mo kula ʼahoʼaho, neʼe teu fakakoloa ki te ʼu meʼa aulo, te ʼu maka taulekaleka pea mo te ʼu mataʼi tofe, koteʼuhi ʼi te hola e tahi ko te ʼu toe koloā lalahi neʼe molehi!” Ko te ʼu mutuʼi meʼa maʼuhiga fuli ʼo te kau takitaki lotu feiā mo te ʼu katetalale fakamataku ʼo te malamanei ʼe pulihi anai ʼo talu ai (Fakahā 18:9-17)! Kae ʼe fetagihi fuli anai koa te hahaʼi ki te Papiloni Lahi?

15, 16. Koteā te meʼa fakatupu fiafia ʼe maʼu anai e te hahaʼi ʼa Sehova?

¹⁵ ʼE tali fēnei ia Fakahā 18:20, 21: “Koutou fiafia kia te ia, ê selo, pea mo koutou te kau maʼoniʼoni, te kau ʼapositolo pea mo te kau polofeta, koteʼuhi neʼe fai e te ʼAtua maʼa koutou ia te tautea faitotonu kia ia!” Ohage ko he maka momosi meʼa neʼe lī ki te tai, “ ʼe lī anai ia te Papiloni te kolo lahi, pea ʼe mole tou toe sio anai ki ai”.

¹⁶ Ko he meʼa fakatupu fiafia! Ko te meʼa ʼaia ʼe fakamoʼoni ia Fakahā 19:1-8. ʼE tuʼa fā te fai ʼo te kalaga “Koutou fakavikiviki kia Sah!” ʼi te lagi. Ko te ʼu ʼuluaki Aleluia e tolu e nātou fakavikiviki ia Sehova koteʼuhi neʼe ina fakahoko tana fakamāu faitotonu ki te paomutu fakalialia, ia te Papiloni Lahi. Ko te puleʼaga faka malamanei ʼo te lotu hāla kua puli talu ai! Ko te leʼo ʼe haʼu mai te hekaʼaga hau ʼo te ʼAtua, ʼe ina ʼui fēnei: “Koutou fakavikiviki ki totatou ʼAtua, ia koutou fuli tana ʼu tagata kaugana, ia nātou ʼaē ʼe manavasiʼi kia te ia, te kau liliki pea mo te kau lalahi!” ʼE ko he pilivilesio anai ka tou maʼu te hivaʼi ʼo te fakavikiviki ʼaia!

Te ʼohoana ʼo te Akeno

17. ʼI te fakatatau ʼaē ʼo Fakahā 11:17 pea mo Fakahā 19:6, kofea ʼi te ʼu fakamatala ʼaia e lua ʼe kamata ai te ʼafio ʼa Sehova?

¹⁷ Ko te fā Aleluia ʼe ina kamata te tahi kupu: “Koutou fakavikiviki ia Sah, koteʼuhi ko Sehova totatou ʼAtua, te Māfimāfi, kua kamata tana ʼafio.” Kae ʼe mole koa la ko he fakatauga ʼe tatau mo ia ʼaē ʼe tuʼu ia Fakahā 11:17? ʼE tou lau feiā ʼi te vaega ʼaia: “ ʼE mātou fakafetaʼi atu kia te koe, Sehova ʼAtua, te Māfimāfi, (...) koteʼuhi neʼe ke toʼo tau mālohi lahi pea neʼe ke kamata ʼafio.” ʼIo. Kae, ko te ʼu vaega ʼi muʼa pea mo te ʼu vaega ʼe hoa kia Fakahā 11:17 ʼe faka ʼuhiga ia ki te laga e Sehova te Puleʼaga mesianike ʼi te taʼu 1914 “moʼo taupau ʼo te ʼu puleʼaga fuli ʼaki te toko ukamea”. (Fakahā 12:5.) Ko te vaega ʼo Fakahā 19:6 ʼe faka ʼuhiga ia ki te temi ʼo te faka ʼauha ʼo te Papiloni Lahi. ʼAki te pulihi ʼo te lotu ʼaē ʼe fakatatau ki he paomutu, ko te ʼuhiga fakaʼatua ʼo Sehova ʼe nofo totonu aipe. Ko te tauhi ʼaē kia te ia ʼi tona ʼuhiga Tuʼi faʼifaʼitaliha Māʼoluga pea mo Hau ko tona faie ʼo heʼegata!

18. Ko te ala ʼo te kalaga fakafiafia fea ʼaē ʼe avahi ʼaki te pulihi ʼo te Papiloni Lahi?

¹⁸ Koia, ko te logo fakafiafia ʼaia ʼe feala tona tala: “Ke tou fakafiafia pea ke tou fonu ʼi te fiafia, pea ke tou faka kolōlia kia te ia [Sah], koteʼuhi ko te ʼohoana ʼo te Akeno kua hoko mai pea kua teuteu tona ʼohoana. ʼIo, neʼe foaki age ki ai te lino mānifi gigila pea mo maʼa, koteʼuhi ko te lino mānifi ʼe ina fakatā te ʼu gāue faitotonu ʼo te kau maʼoniʼoni.” (Fakahā 19:7, 8). ʼE mole tala mai peʼe ko te temi fea ʼaē ka maʼu anai e te kau fakanofo ʼaē ʼe kei toe ʼi te kele tanatou fakatuʼuake ki selo. Kae ʼe tou ʼiloʼi papau ohage ko tona fakahā e te vaega ʼi muʼa atu pea mo te ʼu vaega ʼe hoa mai ki te vaega ʼaia, e nātou fiafia lahi anai ʼi te kau ki te ʼohoana ʼo te Akeno, ia Sesu Kilisito, pea ʼo laka tanatou fiafia ʼi tanatou ʼuhiga kau mamata pilivilesio ia ki te fakalainoaʼi ʼo te paomutu fakalialia, ia te Papiloni Lahi.

Ko te pulihi ʼo te mālama ʼo Satana

19. Koteā te tahi age meʼa ʼe hoko ʼe fakamatala ia Fakahā 19:11-21?

¹⁹ Ko te hōsi hina ʼaē neʼe kua ʼuluaki fakahā ia Fakahā 6:2 kua toe hā. ʼE tou lau fēnei ia Fakahā 19:11: “Pea ko ia ʼaē ʼe heka ai ʼe higoa ko Agatonu pea mo Moʼoni, pea ʼe ina fakamāu pea laga tau ʼaki te faitotonu.” Koia ko te “Hau ʼo te ʼu hau pea mo ʼAliki ʼo te ʼu ʼaliki” ʼe heka hōsi mo haha te ʼu puleʼaga pea moloki te meʼa tataʼo vino ʼo te “ ʼita ʼo te hāūhāū ʼo te ʼAtua te Māfimāfi”. ʼE vaʼiga noa te fakatahitahi ʼo te “ ʼu hau ʼo te kele pea mo tanatou kautau” moʼo laga tau ʼi Hala-Maketone. Ko Ia ʼaē ʼe heka ʼi te hōsi hina ʼe ina fakaʼosiʼosi tona mālo. ʼE mole he meʼa ʼe toe ʼi te mālama fakakelekele ʼa Satana. — Fakahā 19:12-21.

20. Koteā te meʼa ʼe hoko ki te Tevolo?

²⁰ Kae koteā te meʼa ʼe hoko ki te Tevolo? Ia Fakahā 20:1-6, ʼe fakamatalatala ko Sesu Kilisito ʼe hage ko “he ʼaselo ʼe hifo mai te lagi mo te kalavi ʼo te vanu pea mo te seini lahi ʼi tona nima”. ʼE fā ki te talakone, te gata olisinale, ʼaē ko te Tevolo pea mo Satana, pea ina lavalava ia ia, pea ina lī ki te vanu ʼaē ʼe ina pupunu pea mo lokaʼi. ʼAki te mole kei mafai he meʼa e Satana pea mo te mole fealagia ʼaē ke ina fakahēʼi te ʼu puleʼaga, ʼe kamata ai leva te ʼafio faka kolōlia ʼa te Akeno mo tona ʼohoana lolotoga te taʼu e afe. ʼE mole toe ʼi ai he loʼimata ʼo te lotomamahi! ʼE mole toe ʼi ai te mate faka atama! ʼE mole toe ʼi ai he putu, he kalaga pea mo he mamahi! “Ko te ʼu meʼa ʼāfea kua puli ia.” — Fakahā 21:4.

21. ʼI tatatou fakatalitali ʼaki he loto hoha ki te fakahā ʼo Sesu Kilisito, koteā te meʼa ʼe tonu ke tou faiga ki ai?

²¹ ʼI tatatou fakatalitali ʼaki he loto hoha ki te fakahā ʼo totatou ʼAliki ko Sesu Kilisito, tou palalau ʼaki he loto faiva ki ʼihi ʼo ʼuhiga mo te ʼu fakapapau ʼofa ʼaē ʼe fakahoko anai e te Puleʼaga ʼo te ʼAtua. Ko te hāofaki kua ōvi mai! ʼOfa pe ke tou haga haʼele ki muʼa, ʼi totatou ʼuhiga fānau ʼo te mālama ʼo te Tuʼi ʼAliki ko Sehova!

Ko te toe vakaʼi

◻ Koteā te meʼa ʼe fakahā ʼaki kua ōvi mai te fakahā ʼo Sesu Kilisito?

◻ ʼE feafeaʼi anai te haʼu ʼo te ʼaho lagavaka ʼo Sehova?

◻ ʼE tonu ke sio feafeaʼi te “ ʼu kaumeʼa ʼo Sehova” ki te ʼaluʼaga ʼo te mālama ʼaenī?

◻ ʼE feafeaʼi anai te faka ʼaluʼalu ʼo te ʼu meʼa mokā hoko mai te toe mamahi lahi?

[Paki ʼo te pasina 21]

Ko Sesu ‘ ʼe haʼu ʼi te ʼu ʼao’ ʼe haʼu fakapulipuli, moʼo fakahoko te fakamāu.

[Paki ʼo te pasina 23]

Kua vave pe te pulihi ʼo te lotu hāla, pea mo te ʼu faʼahiga meʼa ʼo te tuʼu ʼa Satana, pea mo Satana totonu pe.