Ko Te Kolōlia Lahi ʼo Te Fale ʼo Sehova

“ ‘ ʼE ʼau fakafonu anai te fale ʼaenī ʼaki te kolōlia,’ ʼe ko te ʼui ʼaia ʼa Sehova ʼo te ʼatu kautau.”—Asea 2:7.

1. ʼE pipiki feafeaʼi te laumālie maʼoniʼoni ki te tui pea mo te gāue?

LOLOTOGA tana fai faka mafola ʼi te ʼu ʼapi, neʼe felāveʼi te tuagaʼane Fakamoʼoni ʼa Sehova mo te fafine ʼo te lotu Pentecôtiste pea neʼe ʼui fēnei e te fafine, ‘ ʼE ia mātou te laumālie maʼoniʼoni, kae ʼe koutou fai koutou ia te gāue.’ ʼAki he aga fakaʼapaʼapa, neʼe fakamahino age e te Fakamoʼoni ʼa Sehova ki te fafine ʼaia, ko he tahi ʼe ia ia te laumālie maʼoniʼoni, ʼe mahino ia ʼe uga anai ia ia ke ina fai te gāue ʼa te ʼAtua. ʼE ʼui fēnei ia Sake 2:​17: “Ko te tui, kapau ʼe mole fai ʼaki he ʼu gāue, pea ʼe mate ia.” ʼAki te tokoni ʼo te laumālie ʼa Sehova, ʼe maʼu e tana kau Fakamoʼoni te tui mālohi, pea ʼe ina ‘fakafonu tona fale ʼaki te kolōlia’ ʼo ina teuteuʼi nātou ke nātou fai te ʼu gāue faitotonu​—tāfito te ‘faka mafola ʼo te logo lelei ʼo te Puleʼaga ʼi te kele katoa ko he meʼa moʼo fakamoʼoni ki te ʼu puleʼaga katoa.’ Kapau kua ʼosi fakahoko katoa te gāue ʼaia maʼa Sehova, “pea hoko mai ai leva te fakaʼosi.”​—Mateo 24:14.

2. (a) Ko te ʼu tapuakina fea ʼaē ka tou maʼu anai mo kapau ʼe tou kau katoa ki te gāue ʼa Sehova? (b) He koʼe ʼe tonu ke tou fiafia ʼi tatatou ʼiloʼi ʼaē ʼe hage ʼe “tuai” te ʼaho ʼo Sehova?

² ʼI te ʼu palalau ʼaia ʼa Sesu, ʼe tou ʼiloʼi ai ko tatatou gāue ia ʼaho nei ʼe tonu ke fakatafito ki te faka mafola ki te hahaʼi ia “te logo lelei faka kolōlia ʼo te ʼAtua fiafia,” ʼaē ʼe tou falala ki ai. (1 Timoteo 1:​11) Kapau ʼe tou kau katoa ki te gāue ʼa Sehova, pea ʼe hage ai kia tatou kua vave mai anai te ʼaho fakaʼosi. Ia Hapakuke 2:​2, 3, ʼe tou lau te ʼu palalau ʼaenī ʼa Sehova: “Tohi te meʼa ʼaē neʼe hā, pea fakahā ʼi te ʼu maka ke mātala lelei, ke feala kia ia ʼaē ʼe ina lau leʼolahi ke faigafua tana lau. Heʼe ko te meʼa ʼaē neʼe hā ʼe kei tuku ia ki te temi ʼaē neʼe fakakatofa kiai, pea ʼe fakatupu lotohoha ia ʼo aʼu ki te fakaʼosi, pea ʼe mole loi anai ia. Tatau aipe peʼe tuai, haga talitali kiai; heʼe hoko moʼoni anai ia. ʼE mole tauhala anai ia.” ʼIo, ko “te meʼa ʼaē neʼe hā” ʼe hoko moʼoni anai “tatau aipe peʼe tuai.” ʼI te 83 taʼu ʼo te takitaki ʼo te Puleʼaga e Sesu, ʼe lagi ʼui anai e ʼihi ʼe kei tuai te temi. Kae, ʼe mole tonu koa la ke tou fiafia, ʼi te mole heʼeki hoko mai ʼo te fakaʼosi? Lolotoga te ʼu taʼu e hogofulu ʼo te ʼu taʼu 1990, ʼe ko he meʼa faka milakulo te kua faka mafola ʼo te logo lelei ʼi te Potu Hahake ʼo te Eulopa, mo te ʼu fenua ʼo Afelika, pea mo te tahi ʼu fenua. ʼE hā lelei mai ko te ‘tuai’ ʼo te ʼaho fakaʼosi, ʼe ko he temi ʼe faka fealagia ai ke tānaki te tahi ʼu “ōvi” ʼi te ʼu telituale ʼaē neʼe hoki fakagafua ai te fai faka mafola.​—Soane 10:16.

3. He koʼe ko tatatou mahino ʼi te temi ʼaenī ki te “taʼiake ʼaia,” ʼe tonu ke ina uga tatou ke tou gāue fakatoʼotoʼo ʼi te fai ʼo te gāue ʼa te ʼAtua?

³ ʼE ʼui fēnei e te polofeta: “ ʼE mole tauhala anai ia.” Neʼe ʼui e Sesu ko te taʼiake ʼo te tuʼu agakovi ʼaenī, ʼe mole puli anai kae heʼeki “hoko te ʼu meʼa fuli ʼaia.” (Mateo 24:34) Ko tatatou mahino ki tana ʼu palalau ʼaia ʼi te temi ʼaenī, ʼe faka ʼuhiga koa ʼe mole maʼuhiga ke tou gāue fakatoʼotoʼo ʼi te fai ʼo te faka mafola?a Ko te ʼu meʼa ʼaē ʼe hoko ʼe mole ʼalutahi mo te manatu ʼaia! Kua nofo katoa totatou taʼiake ʼi te agakovi, pea mo te aga fakahehema lahi ʼe mole heʼeki hoko. (Vakaʼi ia Gāue 2:​40.) ʼE tonu ke tou gāue fakatoʼotoʼo ʼi te fai faka mafola. (2 Timoteo 4:2) Ko te ʼu lea faka polofeta fuli ʼo ʼuhiga mo te temi ʼo te mamahi lahi, ʼe nātou fakahā mai ʼe hoko fakapunamaʼuli anai, pea mo fakafokifā​—ohage ko te haʼu ʼa he tagata kaihaʼa. (1 Tesalonika 5:​1-4; Fakahā 3:3; 16:15) “Koia ke toe feiā foki mo koutou ke koutou nofo teuteu, heʼe ko te Foha ʼo te tagata ʼe haʼu ʼi te hola ʼaē ʼe mole koutou manatu kiai.” (Mateo 24:44) ʼI te kua vave fakaʼauha ʼo te taʼiake agakovi ʼaenī, ʼe mahino papau ia ʼe mole tou loto anai ke puli tatatou ʼamanaki taulekaleka ʼo ʼuhiga mo te maʼuli heʼegata, ʼo tou toe liliu ʼo “makafulifuli ʼi te pela” ʼo te ʼu fakafiafia ʼo te mālama!​—2 Petelo 2:​22; 3:​10; Luka 21:32-​36.

4. Ko te ʼaluʼaga fea ʼaē neʼe tonu ai ke fakatuputupu te “meʼa kai ʼi tona temi totonu,” pea ʼe fakahoko feafeaʼi te faʼahi ʼaia?

⁴ ʼO mulimuli ki te lea faka polofeta ʼa Sesu, ʼi te taʼu 1914 neʼe hoko ai “te kamataʼaga ʼo te ʼu nunuʼa ʼo te tuʼania” ʼo hū ai te malamanei ki “te fakaʼosi ʼo te tuʼu ʼo te ʼu faʼahiga meʼa ʼaenī.” Kua tuputupu te lotomamahi, te ʼu tuʼutāmaki, pea mo te meʼa noaʼi ʼo te lao ʼo aʼu mai ki te temi ʼaenī. (Mateo 24:​3-8, 12) ʼI te temi pe ʼaia, neʼe fakatotonu e Sehova ki te kalasi ʼo te tagata kaugana agatonu mo poto ʼaē neʼe ina fakanofo ke ina foaki te “meʼa kai [fakalaumālie] ʼi tona temi totonu” ki te loto fale ʼo tonatou Pule, ko Kilisito. (Mateo 24:45-​47) Mai tona hekaʼaga faka hau ʼi selo, ʼe takitaki e te Hau Faka Mesianike ʼaia ʼi te temi ʼaenī te polokalama taulekaleka ʼo te meʼa kai fakalaumālie ʼaē ʼe tufa ʼi te kele katoa.

Te ʼu Tuʼuga “Meʼa Kai”

5. ʼE teuteuʼi feafeaʼi te “meʼa kai” tāfito ʼaē ʼe tou maʼu?

⁵ Tou vakaʼi te teuteuʼi ʼo te ʼu “meʼa kai.” (Luka 12:42) Ko te meʼa ʼaē ʼe fakaʼaogaʼi tāfito e te kau Kilisitiano, ko te Folafola ʼa te ʼAtua, te Tohi-Tapu. Moʼo akoʼi fakalelei ʼo te Tohi-Tapu, ʼe ʼaoga tāfito tona fakaliliu ke faigafua tona lau, pea mo totonu. ʼAki te temi neʼe fakahoko māmālie te faʼahi ʼaia, tāfito ʼi te kamata ʼo te taʼu 1950, ʼi te temi ʼaē neʼe fakaliliu ai te koga ʼo te Tohi-Tapu Les Écritures grecques chrétiennes—Traduction du monde nouveau ʼi te lea Fakapilitānia. ʼI te taʼu 1961 neʼe maʼu ai te Tohi-Tapu katoa Traduction du monde nouveau, ʼo mole fualoa pea neʼe fakaliliu te Tohi-Tapu ʼaia ʼi te tahi ʼu lea. Ko te ʼu Tohi-Tapu e 3 neʼe fai lolotoga te taʼu gāue 1996 ʼo fakakatoa ai leva ko te ʼu tohi e 27, pea ʼi te ʼu tohi ʼaia, ʼe ko te ʼu tohi e 14 ʼe ko te Tohi-Tapu katoa. Ke feala he fai ʼo te Tohi-Tapu, ʼo feiā aipe ki te ʼu tohi faka Tohi-Tapu, ʼe gāue ʼi te temi nei te kau Kilisitiano e toko 1 174 ʼi te temi katoa ʼi te fai fakaliliu ʼi te ʼu fenua e 77.

6. Ko te meʼa fea neʼe fai e te Sosiete moʼo fai ʼo te ʼu tohi faka Tohi-Tapu?

⁶ Moʼo lagolago ki te gāue ʼa te tokolahi ʼaia ʼaē ʼe nātou fakaliliu te ʼu tohi, neʼe toe fakalahi age te fai ʼo te ʼu tohi e te ʼu filiale tā tohi e 24 ʼo te Sosiete Watch Tower. ʼO ʼuhiga mo te faʼahi ʼaia, ʼe ʼi ʼai ki te ʼu filiale lalahi, te tahi ʼu masini ʼe tā fakavilivili ai te ʼu tohi. Ko te fai ʼo te ʼu nusipepa ʼaē ko Te Tule Leʼo pea mo te Réveillez-vous! ʼe tuputupu ʼi te māhina fuli, ʼo aʼu ki te 943 892 500 nusipepa, ko tona lahi ko te 13,4 ʼi te teau ʼi te taʼu ʼaia. Ko te tā ʼo te Tohi-Tapu pea mo te ʼu tohi faka Tohi-Tapu ʼi Amelika, mo Pelesile, mo Finilani, mo Siamani, mo Italia, mo Saponia, mo Corée, pea mo Mekesike neʼe tuputupu ko te 40 ʼi te teau ʼi te taʼu 1995, pea ko te ʼu tohi e 76 760 098 ʼi te taʼu 1996. Neʼe kau te tahi ʼu filiale ki te fakatuputupu ʼo te tā ʼo te ʼu tohi.

7. E feafeaʼi te maʼuhiga ʼaupito ʼo Isaia 54:2 ʼi te temi nei?

⁷ Neʼe ʼaoga tāfito ke lahi ʼo te tā ʼo te ʼu tohi ʼi te lolotoga ʼo te ʼu taʼu 1990, ʼi te fakagafua ʼo te gāue ʼa te kau Fakamoʼoni ʼa Sehova ʼi te Potu Hahake ʼo te Eulopa pea mo Afelika. ʼE tokolahi ʼaupito te hahaʼi ʼaē ʼe pakupaku ʼi te faʼahi fakalaumālie ʼi te ʼu koga meʼa ʼaia. Koia kua maʼuhiga ʼaupito te ʼu palalau ʼa Isaia: “Fakalahi te potu ʼo tou fale fehikitaki. Pea faoʼi te ʼu tapoleni ʼo tou tapenakulo taulekaleka. ʼAua naʼa ke fakatātāʼofi ia koe. Faoʼi te ʼu maea ʼo tou fale fehikitaki, pea mo tutuki ke maʼu te ʼu faʼo ʼo tou fale fehikitaki.”​—Isaia 54:2.

8. Koteā te tali agaʼofa ʼaē neʼe fai moʼo foaki ʼo te falā moʼo lagolago ki te gāue?

⁸ Koia, neʼe ʼaoga ai ke fakalahi te ʼu fale ʼo te ʼu filiale ʼo te Sosiete e 104. ʼUhi ko te faigataʼa ʼo te maʼuli faka ekonomike ʼo te ʼu telituale ʼaē neʼe hoki fakagafua ai te gāue, koia neʼe fakahoko te ʼu fakalahi ʼo te ʼu fale ʼaia ʼaki te ʼu meʼa ʼofa ʼaē neʼe foaki ki te gāue ʼi te malamanei katoa e te ʼu fenua ʼaē ʼe lelei tonatou maʼuli ʼi te faʼahi faka ekonomike. Meʼa fakafiafia foki, neʼe tali e te ʼu kokelekasio pea mo te hahaʼi takitokotahi ʼaki tonatou loto katoa, ʼo nātou mulimuli ki te manatu ʼaē ia Ekesote 35:21: “Pea neʼe nātou ʼōmai ai, ia nātou fuli ʼaē neʼe uga e ʼonatou ʼu loto, pea neʼe nātou fetuku mai, ia nātou fuli ʼaē neʼe uga e tonatou ʼatamai, te meʼa ʼofa kia Sehova ʼo ʼuhiga mo te gāue.” ʼE feala ke tou fakamālo kia nātou fuli ʼaē ʼe nātou foaki te ʼu meʼa ʼofa ʼaia.​—2 Kolonito 9:​11.

9. ʼE hoko feafeaʼi ia Loma 10:13, 18 ia ʼaho nei?

⁹ Lolotoga te taʼu 1996, ko te ʼu tohi ʼo te Sosiete Watch Tower neʼe nātou faka kolōliaʼi moʼoni te huafa ʼo Sehova pea mo tana ʼu fakatuʼutuʼu ʼo aʼu ki te ʼu potu taupotu ʼo te kele. ʼE hoko te faʼahi ʼaia ohage pe ko te meʼa ʼaē neʼe fakakikite e te ʼapositolo ko Paulo. ʼI tana talanoa ki te lea faka polofeta ʼa Soele pea mo te 19 Pesalemo, neʼe ina tohi fēnei: “ ‘He ko ʼaē ʼe fetapā ki te huafa ʼo Sehova ʼe hāo anai ia.’ Kae ʼe ʼau fai te fehuʼi ʼaenī, Neʼe nātou logo moʼoni koa la kiai? Kae, koʼeni, ‘ ʼi te kele katoa, kua mafola ai tonatou leʼo, pea ko tanatou ʼu akonaki kua kaku ki te ʼu potu taupotu ʼo te kele ʼaē ʼe nofoʼi.’ ” (Loma 10:13, 18) Koia, moʼo faka kolōliaʼi te huafa maʼuhiga ʼo Sehova, ʼe kau tāfito tana hahaʼi ki te fakafonu ʼo tona fale tauhi ʼaki te kolōlia. Kae, neʼe feafeaʼi te tuputupu tāfito ʼo te pāui ʼaia lolotoga te taʼu 1996? Tou vakaʼi te pasina 18 ʼo aʼu ki te pasina 21.

Te Taʼukai ʼi Te Malamanei Katoa

10. Koteā te ʼu meʼa maʼuhiga ʼaē ʼe koutou fakatokagaʼi ʼi te gāue ʼa te hahaʼi ʼa Sehova, ohage ko tona fakahā ʼi te pasina 18 ki te pasina 21?

¹⁰ Kua maʼuhiga ʼaupito ia ʼaho nei te ʼu palalau ʼaē neʼe fai e Sesu ia Luka 10:2: “Ko te taʼukai ʼe lahi, kaʼe tokosiʼi te kau gāue. Koia ke koutou kole ki te Pule ʼo te taʼukai ke ina fekauʼi mai he kau gāue ki tana taʼukai.” ʼE koutou tali koa te fakaafe ʼaia? Ko te lauʼi miliona hahaʼi ʼi te kele katoa ʼe nātou tali te fakaafe ʼaia. ʼE fakamoʼoni kiai te tānaki foʼou ʼaē kua aʼu ki te toko 5 413 769 kaugā fai faka mafola ʼo te Puleʼaga, ʼaē neʼe nātou fai faka mafola ʼi te lolotoga ʼo te taʼu gāue 1996. Tahi ʼaē meʼa, neʼe papitema ai te ʼu tēhina pea mo tuagaʼane foʼou e 366 579. ʼE tou leleiʼia “te ʼu meʼa ʼaē ʼe manakoʼia ʼo te ʼu puleʼaga fuli,” ʼaē ʼe nātou kau ʼi te temi nei ki te ‘fakafonu ʼo te fale ʼo Sehova ʼaki te kolōlia’!​—Asea 2:7.

11. He koʼe ʼe tonu ke tou fakafiafia?

¹¹ ʼE ko he meʼa fakaofoofo te ʼu tānaki ʼo te tuputupu ʼo te gāue ʼi te ʼu telituale ʼaē neʼe hoki fakagafua ai te gāue. ʼE tou maheka koa kia nātou ʼaē ʼe nātou fiafia ʼi te tuputupu ʼaia ʼi te temi ʼaenī? Kailoa, ʼe tou fakafiafia mo nātou. ʼI te ʼu fenua fuli, neʼe kamata māmālie ai te tuputupu. Ko te polofeta ko Sakalia ʼi te temi ʼo Asea neʼe ina tohi fēnei: “Ko ai ʼaē ʼe ina meʼa noaʼi te ʼaho ʼo te ʼu meʼa liliki?” (Sakalia 4:​10) ʼE tou fiafia ʼi tatatou ʼiloʼi ʼaē kua fai te gāue fai faka mafola ʼi te ʼu fenua ʼaia, pea ʼi te temi nei kua katoa te lauʼi miliona kaugā fai faka mafola ʼo te Puleʼaga, ʼe nātou fai tuʼumaʼu te telituale, ʼo teitei ke fai ʼi te vāhaʼa fuli te ʼu kolo lalahi. ʼE tonu koa ke māmālie tatatou gāue ʼi te temi nei, ʼi tatatou sio ʼaē ʼe fakalahi e Sehova te ʼu faigamālie ʼo ʼuhiga mo te hāofaki, ʼi te ʼu fenua ʼaē neʼe tapuʼi ai te gāue ki muʼa atu? Kailoa! Neʼe ʼui fēnei e Sesu: “Ko te gāueʼaga, ko te malamanei.” (Mateo 13:38) ʼE tonu ke hoko atu tatatou fai faka mafola, ohage ko te fai faka mafola ʼa te ʼu ʼuluaki tisipulo ʼi te fakaʼosi ʼo te tuʼu ʼo te ʼu faʼahiga meʼa faka Sutea.​—Gāue 2:​40; 10:42; 20:24; 28:23.

Tou Haʼele Tuʼumaʼu Ki Muʼa

12. Koteā te meʼa ʼaē ʼe tonu ke ina uga ai tatou ke tou haga haʼele “ki muʼa?” (Vakaʼi mo te kupu tāfito, “Te Taʼukai ‘ ʼi Te ʼu Potu Taupotu ʼo Te Kele.’ ”)

¹² ʼIo, ʼe tonu ke tou haga fai, ʼo haʼele “ki muʼa” mo te saliote ʼaē ʼi selo ʼa Sehova. (Esekiele 1:​12) ʼE tou manatuʼi te ʼu palalau ʼaē neʼe fai e Petelo: “Ko Sehova ʼe mole tuai ʼo ʼuhiga mo tana fakapapau, ohage ko te faka ʼuhiga e ʼihi ia te tuai, kae ʼe faʼa kātaki kia koutou heʼe mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.” (2 Petelo 3:9) Ko te faʼifaʼitaki lelei ʼo totatou ʼu tēhina ʼi te ʼu fenua masiva, ʼe nātou uga ia tatou. Ko te ʼui ʼaē ʼe tuai te hoko mai ʼo Halamaketone, ʼe ina faka fealagia ai ke tānaki te lauʼi teau afe hahaʼi ʼi te ʼu fenua ʼaia, pea mo te tahi ʼu fenua ʼaē ʼe gāueʼi tuʼumaʼu. Ke ʼaua naʼa tou faihala ʼo ʼuhiga mo te ʼaho ʼaia: “Ko te ʼaho lahi ʼo Sehova kua ōvi mai. Kua ōvi mai, pea ʼe fakavilivili ʼaupito mai.” (Sofonia 1:​14) Ko te faʼahi ʼaia ʼe tonu ke ina uga tatou ke tou gāue fakatoʼotoʼo ʼi te fai faka mafola!

13, 14. (a) Koteā te meʼa ʼaē ʼe feala ke tou ʼui ʼo ʼuhiga mo te tufa ʼo te ʼu nusipepa lolotoga te taʼu 1996? (b) Koteā te ʼu fakatuʼutuʼu makehe ʼaē ʼe feala ke fai e te ʼu kokelekasio ʼi te taʼu fuli, pea e feafeaʼi hakotou fakatuʼutuʼu ke koutou kau ki te faʼahi ʼaia?

¹³ Logope la ʼe ʼi ai te tahi ʼu meʼa ʼe mole hā ʼi te tānaki ʼo te gāue, kae neʼe lahi ʼaupito te tuputupu ʼo te tufa ʼo te ʼu Tohi-Tapu, te ʼu tohi, pea mo te ʼu nusipepa lolotoga te taʼu ʼaenī kua hili. Ohage la, neʼe hā ʼi te tufa ʼo te ʼu nusipepa ʼi te malamanei katoa neʼe tuputupu ko te 19 ʼi te teau, ʼo fakakatoa ko te ʼu nusipepa e 543 667 923 neʼe tufa. ʼE lahi te ʼu fealagia ʼaē ʼe tou maʼu moʼo tufa ʼo te ʼu nusipepa​—ʼi te ʼu ala, mo te ʼu lotoʼā, mo te ʼu taulaga kā, mo te ʼu fale koloā. ʼE fakahā e te ʼu tānaki ʼi te tahi ʼu telituale ʼaē ʼe fai tuʼumaʼu ai te fai faka mafola, ʼe ōfo te ʼu hahaʼi ʼaē ʼe maʼu gāue lelei ki te lelei ʼo tatatou ʼu nusipepa, pea ʼe nātou tali te ʼu ako Tohi-Tapu.

¹⁴ ʼI te taʼu fuli lolotoga te māhina ʼo ʼApelili, ʼe fakatuʼutuʼu e te ʼu kokelekasio ʼi te agamāhani ke nātou fai te tufa makehe, ʼo nātou fai ʼi te ʼu ʼapi pea mo te ʼu koga meʼa ʼaē ʼe lahi ai te feʼaluʼaki ʼa te hahaʼi. ʼE kau anai koa takotou kokelekasio ki te gāue ʼaia lolotoga te māhina ʼo ʼApelili 1997? Neʼe teuteuʼi te ʼu alatike maʼuhiga ʼo Te Tule Leʼo pea mo te Réveillez-vous! ʼo ʼApelili, pea ʼe mahino ia ʼe ko he meʼa fakaofoofo anai te tufa ʼo te ʼu nusipepa ʼaia ʼi te malamanei katoa ʼi te moʼi temi pe e tahi! ʼI te motu ʼo Chypre, neʼe fakatotonu e te kokelekasio ke nātou “fakaaʼu te logo ʼo te Puleʼaga ki te hahaʼi fuli,” pea neʼe nātou fai te polokalama moʼo tufa ʼo te ʼu nusipepa ʼi te māhina fuli, ʼo maʼu ai te tuputupu foʼou ʼi te tufa ʼo te taʼu ʼaia ʼe ko te 275 359, ko te 54 ʼi te teau.

Te ʼu Logo Fakaʼosi ʼa Asea

15. (a) He koʼe neʼe fakaʼaogaʼi e Sehova ia Asea moʼo fakahā ʼo te tahi ʼu logo? (b) Koteā te ako ʼaē ʼe tonu ke tou maʼu ʼi te tolu logo ʼa Asea?

¹⁵ ʼI te hili ʼo ʼaho e 63 ʼi tana fakahā tana lua logo, neʼe fekauʼi e Sehova ia Asea mo te tolu logo ʼaē ʼe feala ke tou taupau maʼu ia ʼaho nei. Neʼe palalau ia Asea ohage neʼe lolotoga fakatuʼu e te kau Sutea te ʼu fakatafito ʼo te fale lotu, kae ʼi tona ʼuhiga moʼoni neʼe kua nātou fai te faʼahi ʼaia kua hili kiai taʼu e 17 ki muʼa atu. Neʼe toe fakatokagaʼi e Sehova ʼe tonu ke fai he fakamaʼa. Neʼe meʼa noaʼi e te kau pelepitelo pea mo te hahaʼi tonatou ʼu maʼua, pea koia la ʼaē neʼe nātou heʼemaʼa ai ia mata ʼo Sehova. ʼE feala koa ki te hahaʼi ʼa Sehova ke nātou fakavaivai tonatou ʼu nima ia ʼaho nei, ʼo nātou kau ki te ʼu aga heʼeʼaoga ʼo te mālama pea mo tana mānumānu koloā? ʼE maʼuhiga ke tou taupau fuli ʼotatou loto “ ʼo kamata ʼi te ʼaho [ʼaenī] pea mo hoko atu ai” ʼo tou faka kolōliaʼi te huafa ʼo Sehova, pea mo tou falala ki tana fakapapau ʼaenī: “ ʼO kamata ʼi te ʼaho ʼaenī ʼe ʼau tapuakiʼi anai.”​—Asea 2:​10-​19; Hepeleo 6:​11, 12.

16. Ko te “luluʼi” fea ʼaē kua ōvi mai, pea ʼe iku anai kiteā?

¹⁶ ʼI te ʼaho pe ʼaia, neʼe ko te tuʼa fā ʼaia pea ʼe ko fakaʼosi ʼaia ʼo te folafola ʼaē neʼe fai e “Sehova ʼo te ʼatu kautau” kia Asea. Neʼe ina fakahā te meʼa ʼaē ka hoko ʼi Tana “luluʼi te ʼu lagi pea mo te kele,” ʼo ina ʼui fēnei: “ ʼE ʼau holoʼi anai te hekaʼaga faka hau ʼo te ʼu puleʼaga, pea ʼe ʼau maumauʼi anai te mālohi ʼo te ʼu puleʼaga; pea ʼe ʼau fulihi anai te saliote pea mo nātou ʼaē ʼe heheka ʼi ai, pea ʼe mahino papau ia ko te ʼu hōsi pea mo te ʼu tagata heka hōsi ʼe nātou fetōkaʼi anai, ʼo takitahi mo ia te heletā ʼo tona tēhina.” (Asea 2:​6, 21, 22) Ko te “luluʼi” ʼaia ʼo te ʼu puleʼaga ʼe hoki aʼu anai ki tona ikuʼaga fakaʼosi mokā fakamaʼa anai e Sehova te kele ʼi Halamaketone. Pea ko “te ʼu meʼa manakoʼia ʼo te ʼu puleʼaga fuli” ʼe ʼōmai fuli anai, ʼo faʼufaʼu te sosiete fakatagata ʼaē ka hū ki te mālama foʼou. Koʼena te ʼu meʼa ʼaē ʼe feala ke tou fiafia ai pea mo tou fakavikiviki ai kia Sehova!​—Asea 2:7; Fakahā 19:​6, 7; 21:1-4.

17. Neʼe feafeaʼi te fakanofo ʼo Sesu ohage ko he “meʼa fakaʼiloga”?

¹⁷ Moʼo fakaʼosi tana lea faka polofeta, ʼe tohi fēnei e Asea: “ ‘ ʼI te ʼaho ʼaia,’ ʼe ko te tala ʼaia ʼa Sehova ʼo te ʼatu kautau, ‘ ʼe ʼau toʼo anai koe, Ê Solopapele . . . , pea ʼe mahino papau ia ʼe ʼau tuku anai koe ohage ko he meʼa fakaʼiloga, koteʼuhi ko koe ʼaē neʼe ʼau fili,’ ʼe ko te tala ʼaia ʼa Sehova ʼo te ʼatu kautau.” (Asea 2:​23) ʼI te temi ʼaenī, ʼe ko Kilisito Sesu te Hau Faka Mesianike pea mo Pelepitelo Lahi ʼa Sehova, ʼo ina maʼu te ʼu tuʼulaga ʼaia e lua ʼaē neʼe maʼu e te Kovana ko Solopapele, pea mo te Pelepitelo Lahi ko Sosue ʼi Selusalemi. Ohage ko he meʼa fakaʼiloga ʼi te nima mataʼu ʼo Sehova, ʼe kua liliu ia Sesu ʼo “ ʼIo” ʼi tona ʼuhiga meʼa gāue ʼa Sehova, moʼo fakahoko te ʼu tuʼuga “fakapapau ʼa te ʼAtua.” (2 Kolonito 1:​20; Efesi 3:​10, 11; Fakahā 19:10) Ko te logo faka polofeta katoa ʼo te Tohi-Tapu, ʼe ina faka maʼuhigaʼi tāfito te ʼu fakatuʼutuʼu ʼa Sehova ʼo ʼuhiga mo Kilisito ʼi tona ʼuhiga Hau, pea mo Pelepitelo ʼaē neʼe ina foaki te totogi.​—Soane 18:37; 1 Petelo 1:18, 19.

18. ʼE hoko feafeaʼi anai te ʼu palalau fakaloto fīmālie ʼaenī “ ʼe ko te tala ʼaia ʼa Sehova ʼo te ʼatu kautau”?

¹⁸ ʼE moʼoni ʼi totatou temi, ko te kolōlia lahi ʼe feala ke tou maʼu ʼi te fale lotu fakalaumālie pea mo gigila ʼo Sehova! Pea mole tuai, ʼi te ʼosi fakaʼauha katoa anai e Sehova te tuʼu ʼo te ʼu faʼahiga meʼa ʼa Satana, ʼe hoko anai te ʼu palalau fakafiafia ʼaē ʼe tuʼu ia Asea 2:9: “ ‘ ʼE ʼau foaki anai te tokalelei ki te potu ʼaia,’ ʼe ko te tala ʼaia ʼa Sehova ʼo te ʼatu kautau.” Kua hoko te tokalelei!​—ko he tokalelei ʼe tologa pea ʼe hoko ʼi te malamanei katoa, pea kua fakamoʼoni kiai te “meʼa fakaʼiloga” ʼa Sehova ia Kilisito Sesu, te “ ʼAliki ʼo te Tokalelei,” ʼaē neʼe tohi fēnei ʼo ʼuhiga mo ia: “Ki te lahi ʼo te pule fakaʼaliki pea mo te tokalelei, ʼe mole ʼi ai anai hona gataʼaga . . . ko te faiva totonu ʼo Sehova ʼa te ʼatu kautau ʼe ina fakahoko anai te meʼa ʼaia.” (Isaia 9:​6, 7) Ko te kolōlia ʼo te fale tauhi ʼa Sehova, ʼe hā ai anai ʼo talu ai, ʼi tana pule faʼitaliha ki te ʼatulaulau katoa, ʼaē ka maʼu ai te tokalelei. ʼOfa pe ke tou nonofo tuʼumaʼu ʼi te fale ʼaia!​—Pesalemo 27:4; 65:4; 84:⁠10.

[Nota ʼi te lalo pasina]

ʼE Feala Koa Hakotou Fakamahino?

◻ Ia ʼaho nei, e feafeaʼi te ‘fakafonu ʼo te fale ʼa Sehova ʼaki te kolōlia’?

◻ He koʼe ʼe maʼuhiga ʼaupito te fai faka mafola ʼo te logo lelei ia ʼaho nei?

◻ Ohage ko tona fakahā ʼi te 1996 Tānaki ʼo Te Gāue, koteā ʼaē ʼe tonu ke ina uga tatou ke tou gāue fakatoʼotoʼo ʼi te fai faka mafola?

◻ E feafeaʼi te gāue ʼa Kilisito ohage ko he “meʼa fakaʼiloga”?

[Talanoa ʼo te pasina 15]

Te Taʼukai “ ʼi Te ʼu Potu Taupotu ʼo Te Kele”

IA Isaia 43:6, ʼe tou lau ai te fakatotonu ʼaenī ʼa Sehova: “Ke ʼaua naʼa ke tātāʼofi. ʼAumai toku ʼu foha mai mamaʼo, pea mo toku ʼu ʼofafine mai te potu taupotu ʼo te kele.” Ko te vaega ʼaenī ʼe hoko ʼi hona ʼaluʼaga makehe ia ʼaho nei ʼi te Potu Hahake ʼo te Eulopa. Tou vakaʼi he faʼifaʼitaki, ʼi te fenua Kominisi ʼāfea ko Moldova. ʼE ʼi ai te ʼu kolo ʼe teitei ko te vaelua ʼo te hahaʼi ʼe ko te ʼu Fakamoʼoni ʼa Sehova ʼi te temi nei. ʼE tonu ke nātou ʼolo ki te ʼu koga meʼa ʼaē ʼe tuʼu mamaʼo ke nātou maʼu ai he ʼu telituale ki tanatou gāue faka mafola, kae neʼe nātou faiga! Tokolahi te ʼu kaugā fai faka mafola ʼi te ʼu kokelekasio ʼaia ʼe ko te ʼu fānau ʼo te ʼu hahaʼi neʼe fakamavae ʼi Sipelia ʼi te kamata ʼo te ʼu taʼu 1950. ʼI te temi nei ʼe takitaki e tonatou ʼu famili te gāue ʼo te taʼukai. Ko te ʼu kaugā fai faka mafola e toko 12 565 pea neʼe papitema te toko 1 917 ʼi te taʼu ʼaenī kua hili. ʼE ko te ʼu kokelekasio e 43, pea ʼi te ʼu kokelekasio takitahi ʼe ko te ʼu kaugā fai faka mafola e 150, pea neʼe tuputupu te ʼu silikosikilipisio e fā ʼo maʼu te ʼu silikosikilipisio e valu ʼi te taʼu gāue foʼou.

ʼE toe fakaofoofo foki mo te gāue ʼi Alepania. ʼI te fenua ʼaia ʼe ʼi ai te ʼu Fakamoʼoni agatonu, neʼe nātou kātakiʼi tonatou gaohi koviʼi e te ʼu puleʼaga mālohi ia taʼu e 50. Ko ʼihi ia nātou neʼe matematehi. Ko te faʼahi ʼaia ʼe ina fakamanatuʼi mai te fakapapau ʼaenī ʼa Sesu: “ ʼAua naʼa ke manavasiʼi ki te ʼu mamahi ʼaē ʼe ke ʼamanaki felāveʼi anai mo ia. Koʼeni ʼe hoholo anai te haga ʼa te Tevolo ʼo lī niʼihi ia koutou ki te fale pilisoni, ke lahi ʼaupito te ʼahiʼahiʼi ʼo koutou . . . Nofo agatonu ʼo kaku ki te mate, pea ʼe ʼau foaki atu anai kia te koe te kolona ʼo te maʼuli.” (Fakahā 2:​10; vakaʼi mo Soane 5:​28, 29; 11⁠:​24, 25.) Koteā koa te meʼa ʼe tou sisio kiai ʼi Alepania ʼi te temi nei? ʼE mahino ia ʼe fakaloto fiafia te hoko ʼo te fakapapau ʼa Sehova ʼaē ʼe tuʼu ia Isaia 60:22: “Ko te tokosiʼi ʼe liliu anai ko te lauʼi afe”! ʼI te taʼu 1990 neʼe ko te tokotahi pe ʼaē neʼe ina foaki tana pepa tānaki gāue ʼi Alepania. Kae, ʼe lahi “te kau gāue” mai Italia pea mo ʼihi ʼu fenua neʼe nātou tali te fakaafe ʼaenī ʼa Sesu: “Koutou ʼolo pea ke koutou fai ni ʼu tisipulo ʼi te hahaʼi . . . , ʼo papitemaʼi ia nātou.” (Mateo 28:19; Luka 10:2) ʼI te ʼAho Fakamanatu ʼo te mate ʼo Sesu ʼi te taʼu 1996, neʼe ko te ʼu kaugā fai faka mafola e 773 neʼe nātou fai faka mafola, pea neʼe nātou fakatahitahi ko te toko 6 523 hahaʼi ʼi te ʼu fono ʼo tonatou ʼaho Fakamanatu, ʼo tuʼa valu tonatou kaugamālie ʼi te ʼu kaugā fai faka mafola! Neʼe fakapunamaʼuli te kaugamālie ʼo te hahaʼi ʼaē neʼe kau ki te ʼAho Fakamanatu ʼi te ʼu koga meʼa mamaʼo ʼaia. Logope la neʼe mole ʼi ai he ʼu kaugā fai faka mafola ʼo te fenua, ko te ʼu kolo ʼo Kukës pea mo Divjakë neʼe ko te toko 192 pea mo te toko 230 hahaʼi ʼaē neʼe kau ki te ʼAho Fakamanatu. ʼI Krujë, neʼe ko te kaugā fai faka mafola pe e tahi, kae neʼe ko te toko 212 ʼaē neʼe kau ki te ʼAho Fakamanatu. Ko te ʼu kaugā fai faka mafola e 30 ʼi Korçë neʼe nātou lue te fale ki te toko 300 tupu. ʼI te ʼosi hū fuli ʼa te hahaʼi ʼaia ki te fale, neʼe fakaliliu te toko 200 koteʼuhi neʼe mole kei ʼi ai he lapalasi. ʼE moʼoni kua tokalelei te gāueʼaga ʼo ʼuhiga mo te taʼukai!

Koʼeni te tānaki gāue ʼe maʼu mai Lomania: “Lolotoga tamatou fai faka mafola ʼi te ʼu ʼapi, neʼe mātou felāveʼi mo te tagata neʼe ina ʼui mai ʼe ko ia ko te Fakamoʼoni ʼa Sehova, pea ʼe nofo ʼi te kiʼi kolo veliveli, neʼe mātou ʼiloʼi neʼe mole ʼi ai he Fakamoʼoni. Neʼe ina ʼui mai ʼe ʼi ai te tahi ʼu hahaʼi e toko 15, talu mai te ʼu taʼu mo tanatou fai tanatou ʼu fono ʼi te Feliaono pea mo te ʼAhotapu, pea neʼe kua nātou kamata fai faka mafola ʼi te ʼu ʼapi. ʼI te ʼaho ake neʼe mātou ʼolo ki te kolo ʼaia. Neʼe ko te toko 15 tagata mo fafine pea mo te ʼu tamaliki neʼe nātou fakatalitali mātou ʼi te ʼu kogafale e lua, pea neʼe nātou toʼo te ʼu tohi e 20 pea mo te ʼu nusipepa foʼou e 20. Neʼe mātou fakahā age kia nātou peʼe feafeaʼi te fai ʼo te ʼu ako Tohi-Tapu. Neʼe mātou hiva fakatahi pea neʼe mātou tali ki tanatou ʼu fehuʼi ʼaē neʼe nātou fia mahino tāfito kiai. Ko ia ʼaē neʼe ina takitaki te kūtuga ʼaia neʼe ina ʼui fēnei: ‘Kua hili kiai te ʼu ʼaho, neʼe ʼau faikole kia Sehova ke ina fekauʼi mai he tagata tauhi ōvi, pea neʼe tali taku kole.’ Neʼe lahi ʼaupito tomatou fiafia, pea ʼi tamatou mavete, neʼe hage ia ia ko he tahi neʼe hala mo tāmai pea ʼi te temi nei kua ina maʼu tana tāmai, koia neʼe ina ʼui fēnei mai: ‘Fakalelei kae ke koutou manatuʼi mātou. Koutou toe liliu mai ʼo ʼaʼahi mātou!’ Neʼe mātou fai te faʼahi ʼaia, pea ʼi te temi nei kua fai te ʼu ako Tohi-Tapu e fitu ʼi te kolo ʼaia. ʼE lahi te ʼu telituale foʼou ʼe kamata ai te gāue ʼi he ʼaluʼaga taulekaleka ʼaki he tohi faka Tohi-Tapu, pea ʼe leleiʼia ʼaupito e te hahaʼi te ʼu tohi ʼaia, pea ʼe hā ʼaki ai ko te gāue ʼaia ʼe haʼu mai te ʼAtua.”

[Tanāki ʼo te taʼu gāue, ʼu pasina 18-21]

1996 TĀNAKI ʼO TE GĀUE FAKA MALAMANEI ʼA TE KAU FAKAMOʼONI ʼA SEHOVA

(Vakaʼi te nusipepa.)

[Paki ʼo te pasina 16, 17]

“Ko te ʼu meʼa manakoʼia ʼo te ʼu puleʼaga fuli” ʼe tātānaki ʼi te ʼu Motu (1), ʼi te Potu Tokelau ʼo Amelika (2), ʼi Afelika (3), ʼi Asia (4), ʼi te Potu Toga ʼo Amelika (5), pea mo Eulopa (6)