Ko He Temi Ke Tou Nofo Tokaga

“ ʼE tonu muʼa ke ʼuluaki faka mafola te logo lelei ʼi te ʼu puleʼaga fuli. . . . Kaʼe ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.”—Maleko 13:10, 13.

1. He koʼe ʼe tonu ke tou faʼa kātaki pea mo lototoʼa?

ʼE TONU ke tou faʼa kātaki—ʼi te lotolotoiga ʼo te taʼiake heʼe agatonu pea mo pikopiko ʼaenī! Talu mai te taʼu 1914 neʼe liliu te taʼiake ʼo aga fakahehema, ohage pe ko te temi ʼo Sesu. Pea ia ʼaho nei, ko te aga fakahehema kua mafola ʼi te malamanei katoa. ʼI “te ʼu ʼaho fakamuli” ʼaenī, ko “te ʼu temi maʼuhiga ʼaupito mo faigataʼa” ʼaē neʼe talanoa kiai ia Paulo, ʼe nātou fakamamahiʼi te malamanei. ‘Ko te kau tagata agakovi pea mo te kau malualoi ʼe fakaʼāsili anai tonatou agakovi.’ ʼE mahino ia, “ko te malamanei katoa ʼe takoto ia ʼi te mālohi ʼo te agakovi,” ia Satana te Tevolo, ʼaē ʼe faiga fakamalotoloto ke ina maumauʼi te kele. Kae koutou lototoʼa! ʼE ʼi ai te “mamahi lahi” ʼe tonu ke hoko, pea ʼe ina foaki anai he fīmālie heʼegata kia nātou fuli ʼaē ʼe ʼoʼofa ki te faitotonu.—2 Timoteo 3:1-5, 13; 1 Soane 5:19; Fakahā 7:14.

2. Neʼe fakahoko feafeaʼi te lea faka polofeta ʼi te taʼu 1914?

² ʼI meʼa fakafiafia foki, ko Sehova kua ina fakanofo hau te ʼAliki ko Sesu Kilisito ʼi te lagi, ʼo teuteu ke ina molehi te ʼu fili ʼaē ʼe nātou fakamamahiʼi te malamanei. (Fakahā 11:15) Ko te lea faka polofeta faka Tohi-Tapu ʼaē neʼe tohi e Taniela, neʼe hoko lolotoga te haʼu ʼuluaki ʼo te Mesia, ʼo toe feiā aipe, ko te tahi lea faka polofeta fakaofoofo ʼaē neʼe fakamatala e Taniela neʼe hoko ʼi te sēkulō ʼaenī. Ia Taniela 4:16, 17, 32, ʼe talanoa mai ki te fakagata faka temi ʼo te pule faka hau faitotonu ki te kele, lolotoga te ʼu “temi e fitu.” ʼI tona fakahoko katoa, ko te ʼu temi e fitu ʼaia ʼe faka ʼuhiga ki he ʼu taʼu faka Tohi-Tapu e fitu pea ʼi te ʼu taʼu ʼaia ko ‘ ʼaho’ e 360 takitahi, peʼe ko taʼu e 2 520 ʼi tona fakakatoa.a Neʼe kamata te ʼu taʼu ʼaia ʼi te taʼu 607 ʼi muʼa ʼo totatou temi, ʼi te temi ʼaē neʼe kamata maumauʼi ai e Papiloni te puleʼaga ʼo Iselaele, ʼo aʼu ki te taʼu 1914 ʼo totatou temi, te taʼu ʼaē neʼe fakanofo hau ai Sesu ʼi te lagi ʼi tona ʼuhiga Hau faitotonu ʼo te malamanei. Koia, kua ʼosi “te ʼu temi ʼaē kua fakakatofa ki te ʼu puleʼaga.” (Luka 21:24) Kae neʼe mole fia fakalogo te ʼu puleʼaga ki te hoko mai ʼo te Puleʼaga Faka Mesianike.—Pesalemo 2:1-6, 10-12; 110:1, 2.

3, 4. (a) Koteā te fakatatau ʼe feala ke tou fai ʼi te ʼu meʼa ʼaē neʼe hoko ʼi te ʼuluaki sēkulō pea mo te ʼu meʼa ʼaē ʼe hoko ʼi totatou temi? (b) Koteā te ʼu fehuʼi maʼuhiga ʼe feala ke tou fai?

³ ʼI te fakaōvi mai ʼo te fitugofulu vāhaʼaʼi taʼu (te taʼu 29 ki te taʼu 36 ʼo totatou temi), ʼo toe feiā aipe mo te fakaōvi mai ʼo te taʼu 1914, ko te hahaʼi ʼaē neʼe manavasiʼi ki te ʼAtua neʼe nātou talitali ki te haʼu ʼo te Mesia. Pea neʼe hoko ia! Kae, ʼi te ʼu ʼaluʼaga ʼaia e lua, ko te agaaga ʼo tana hā neʼe kehekehe ia mo te meʼa ʼaē neʼe nātou ʼamanaki kiai. Tahi ʼaē meʼa, ʼi te ʼu ʼaluʼaga takitahi ʼaia, ʼi te hili ʼo he kiʼi temi nounou, pea neʼe fakaʼauha te “taʼiake” agakovi ʼaki te fakatotonu fakaʼatua.—Mateo 24:34.

⁴ ʼI tatatou ʼuluaki alatike, neʼe tou fakatokagaʼi pe neʼe feafeaʼi te pulihi ʼo te taʼiake agakovi faka Sutea ʼaē neʼe ina kole ke matehi ia Sesu. Kae e feafeaʼi ki te taʼiake agakovi ʼo te malamanei ʼaē ʼe fakafeagai kia te ia pea mole ina fia ʼiloʼi ia ia? Ko ʼafea ʼaē ka fakahoko anai te fakamāu ki te taʼiake heʼe tui ʼaenī?

“Koutou Nonofo Fakaonoono”!

5. (a) He koʼe ʼe lelei ke mole tou ʼiloʼi “te ʼaho mo te hola” ʼo Sehova? (b) Ohage ko tona ʼui e Maleko, koteā te tokoni lelei neʼe fakaʼosi ʼaki e Sesu tana lea faka polofeta?

⁵ ʼI tana ʼosi fakakikite te ʼu meʼa ʼaē ka iku ki te temi ʼo te “mamahi lahi,” neʼe toe ʼui fēnei e Sesu: “Pea ki te ʼaho ʼaia mo te hola ʼaia, ʼe mole he tahi ʼe ina ʼiloʼi, pe ko te kau ʼaselo ʼo te lagi pe ko te ʼAlo, kaʼe gata pe ki te Tāmai.” (Mateo 24:3-36; Maleko 13:3-32) ʼE mole ʼaoga kia tatou ke tou ʼiloʼi te temi totonu ʼaē ka hoko ai anai te ʼu meʼa ʼaia. Kae ke tou tokakaga ʼo nonofo fakaonoono, ʼo gāueʼi tatatou tui ke mālohi, pea ke tou maʼumaʼua tuʼumaʼu ʼi te tauhi kia Sehova—kae mole tou faka au peʼe tou ʼifea ʼo ʼuhiga mo te temi. Neʼe fakaʼosi fēnei e Sesu tana lea faka polofeta lahi ʼo ina ʼui fēnei: “Koutou haga lamalama, pea ke koutou nonofo ʼalaʼala, heʼe mole koutou ʼiloʼi pe ko ʼafea te temi ʼaē kua fakakatofa. . . . Koutou nonofo fakaonoono . . . Ko te meʼa ʼaē ʼe ʼau tala atu kia koutou ʼe ʼau tala foki ki te hahaʼi fuli: ke koutou nonofo fakaonoono.” (Maleko 13:33-37) ʼE nofo ū te tuʼutāmaki ʼi te fakapōʼuli ʼo te mālama ʼo te temi ʼaenī. ʼE tonu ke tou nonofo ʼalaʼala!—Loma 13:11-13.

6. (a) ʼE tonu ke tou fakapipiki kiteā tatatou tui? (b) ʼE lava feafeaʼi ke tou “lau totatou ʼu ʼaho”? (c) Koteā ʼaē neʼe faka ʼuhiga tāfito kiai e Sesu ʼi tana fakaʼaogaʼi te kupu “taʼiake”?

⁶ ʼE mole tonu pe ke tou fakatokagaʼi te ʼu lea faka polofeta ʼaē ʼe haʼu mai te ʼAtua ʼo ʼuhiga mo te ʼu ʼaho fakamuli ʼo te tuʼu agakovi ʼaenī, kae ʼe maʼua tāfito ke pipiki mālohi tatatou tui ki te sakilifisio maʼuhiga ʼo Kilisito Sesu pea mo te ʼu fakapapau fakatalakitupua ʼa te ʼAtua ʼaē ʼe fakatafito ki te sakilifisio ʼaia. (Hepeleo 6:17-19; 9:14; 1 Petelo 1:18, 19; 2 Petelo 1:16-19) ʼI tanatou holi ʼaē ke nātou sisio ki te fakaʼosi ʼo te tuʼu agakovi ʼaenī, ʼi ʼihi temi neʼe kumi e te hahaʼi ʼa Sehova ke nātou ʼiloʼi te temi ʼaē ka hoko ai te “mamahi lahi,” ʼo nātou fakapikipiki kiai te ʼu faka au ʼo ʼuhiga mo te loaloaga ʼo te maʼuli ʼo te taʼiake talu mai te taʼu 1914. Koia neʼe mātou “fakahū he loto fakapotopoto,” ʼo mole mātou kumi ke mātou ʼiloʼi pe ko taʼu e fia pe ko ʼaho e fia te maʼuli loaloaga ʼo he taʼiake, kae neʼe mātou fakakaukauʼi peʼe feafeaʼi te “lau ʼo tomatou ʼu ʼaho” ke mātou foaki he ʼu fakavikiviki fakafiafia kia Sehova. (Pesalemo 90:12) Neʼe mole foaki mai he faʼahiga fai moʼo faka au ʼo te temi, kae ko te kupu “taʼiake” ʼaē neʼe fakaʼaogaʼi e Sesu, ʼe faka ʼuhiga tāfito ki te hahaʼi ʼo te temi ʼaia ʼi he faʼahiga lakaga faka hisitolia, ʼaki tanatou ʼu agaaga.b

7. Koteā ʼaē neʼe tohi e te polofesea faka hisitolia ʼo ʼuhiga mo te “taʼiake ʼo te taʼu 1914,” pea e feafeaʼi te ʼalutahi ʼo te ʼu palalau ʼaia mo te lea faka polofeta ʼa Sesu?

⁷ ʼO ʼalutahi mo te manatu ʼaē ʼe tuʼu ʼi ʼoluga, ko te polofesea faka hisitolia ko Robert Wohl neʼe ina tohi fēnei ʼi tana tohi The Generation of 1914: “ ʼI te faʼahi faka hisitolia, ʼe mole fakafuafua he taʼiake ʼaki he ʼu ʼaho . . . ʼE mole ko he meʼa kua ʼiloʼi papau te loaloaga ʼo tona ʼu ʼaho.” Kae neʼe ina fakahā ko te ʼUluaki Tau Faka Malamanei neʼe ina fakatupu “he fetogi lahi mo te temi ʼāfea,” pea neʼe ina toe ʼui fēnei: “Ko nātou ʼaē neʼe hāo mai te tau ʼaia neʼe nātou taupau tuʼumaʼu te manatu ʼaenī, kua ʼosi te tahi mālama pea ko te tahi mālama neʼe tupu ʼi ʼAukusito 1914.” ʼI moʼoni leva ʼo te faʼahi ʼaia! Ko te ʼu palalau ʼaia ʼe ina fakatokagaʼi mai te potu tāfito ʼo te faʼahi ʼaia. Ko “te taʼiake ʼaia” ʼo te malamanei talu mai te taʼu 1914 neʼe ina ʼiloʼi te ʼu fetogi fakamataku. Neʼe sio ia ki te kele neʼe fonu ʼi te toto ʼo te lauʼi miliona hahaʼi. Kua hoko ʼi te malamanei katoa te ʼu tau, te tāmateʼi ʼo te hahaʼi ʼo te tahi lanu, te agamālohi, te fai fakapō, pea mo te meʼa noaʼi ʼo te lao. Ko te hoge, mo te ʼu mahaki, pea mo te ʼu aga heʼeʼaoga kua mafola ia ʼi te kele katoa. Neʼe lea fakakikite fēnei ia Sesu: “ ʼO toe feiā pe kia koutou, ka koutou [tana kau tisipulo] sisio anai ki te hoko mai ʼo te ʼu meʼa fuli ʼaia, ke koutou ʼiloʼi kua ōvi mai te puleʼaga ʼo te ʼAtua. ʼE ʼau tala moʼoni atu kia koutou, kailoa, ko te taʼiake ʼaia ʼe mole puli anai ia ka heʼeki hoko te ʼu meʼa fuli ʼaia.”—Luka 21:31, 32.

8. ʼE fakahā feafeaʼi e te kau polofeta te maʼuhiga ʼaē ke tou nonofo ʼalaʼala?

⁸ Ei, ko te mālo katoa ʼo te Puleʼaga Faka Mesianike kua ōvi mai! ʼE ʼi ai koa hona ʼaoga ke tou ʼiloʼi te ʼu ʼaho pe ko te loaloaga ʼo te maʼuli ʼo he “taʼiake” ʼi tona ʼuhiga moʼoni? Kailoa ia. ʼE ʼui lelei mai e Hapakuke 2:3 ʼo fēnei: “Ko te meʼa ʼaē neʼe fakahā ʼe kei tuku ia ki te temi ʼaē neʼe fakakatofa kiai. Pea ʼe fakatupu lotohoha ia ʼo aʼu ki te fakaʼosi, pea ʼe mole loi anai ia. Tatau aipe peʼe tuai, haga talitali kiai; heʼe hoko moʼoni anai ia. ʼE mole tauhala anai ia.” Kua fakaōvi mai te ʼaho ʼaē ka tou huʼi maʼua ai kia Sehova.—Selemia 25:31-33; Malakia 4:1.

9. Koteā te ʼu fetogi ʼaē neʼe hoko talu mai te taʼu 1914 ʼaē ʼe hā ʼaki ai kua nounou te temi?

⁹ ʼI te temi ʼaē neʼe kamata ʼafio ai te Puleʼaga ʼo Kilisito ʼi te taʼu 1914, neʼe lī ifo ia Satana ki te kele. Neʼe liliu te faʼahi ʼaia ko he “malaʼia ki te kele . . . he kua hifo atu te Tevolo kia koutou, mo tona ʼita lahi, he kua ina ʼiloʼi kua nounou tona temi.” (Fakahā 12:12) ʼE moʼoni, ko te temi ʼaia ʼe nounou mokā fakatatau ki te ʼu taʼu ʼe lauʼi afe ʼaē neʼe pule ai Satana. Ko te Puleʼaga kua fakaōvi mai, ʼo feiā mo te ʼaho pea mo te hola ʼa Sehova ke ina fakahoko ai te fakamāu ki te taʼiake agakovi ʼaenī!—Tāʼaga Lea 3:25; 10:24, 25.

Ko “Te Taʼiake” ʼAē Ka Pulihi

10. ʼE hoko feafeaʼi “te taʼiake ʼaia” ki te taʼiake ʼo te temi ʼo Noe?

¹⁰ Tou vakaʼi lelei age muʼa te fakamatala ʼa Sesu ia Mateo 24:34, 35: “ ʼE ʼau tala moʼoni atu kia koutou: Kailoa, ko te taʼiake ʼaia ʼe mole ʼosi anai ia ka heʼeki hoko te ʼu meʼa fuli ʼaia. Ko te lagi pea mo te kele ʼe mole anai ia, kaʼe ko ʼaku lea ʼe mole feala tuʼa tahi anai ia ke mole.” Ko te ʼu palalau ʼa Sesu ʼaē ʼe hoa mai ʼe nātou fakahā mai ‘ ʼe mole he tahi ʼe ina ʼiloʼi te ʼaho ʼaia pea mo te hola ʼaia.’ Ko te meʼa ʼaē ʼe maʼuhiga tāfito age, ʼe ina fakahā mai ʼe tonu ke tou tekeʼi te ʼu hele ʼaē ʼe hoko kia tatou ʼi te taʼiake ʼaenī. Koia ʼe toe ʼui fēnei e Sesu: “Heʼe, ohage pe ko te ʼu ʼaho ʼaē ʼo Noe, ʼe toe feiā pe anai mo te ʼi henī ʼa te Foha ʼo te tagata. Ohage pe ko te ʼu ʼaho ʼaia ʼi muʼa ʼo te tulivio: neʼe nātou kakai pea mo ʼiʼinu, ko te hahaʼi tagata neʼe nātou ʼohoana pea ko te hahaʼi fafine neʼe foaki ke ʼohoanaʼi, ʼo aʼu ki te ʼaho ʼaē neʼe hū ai ia Noe ki te aleka; pea neʼe mole nātou fakatokagaʼi he meʼa ʼo aʼu ki te haʼu ʼa te tulivio pea ʼave ai ia nātou fuli, ʼe toe feiā pe anai mo te ʼi henī ʼa te Foha ʼo te tagata.” (Mateo 24:36-39) Neʼe fakatatau ʼi henī e Sesu te taʼiake ʼo tona temi mo te taʼiake ʼo te temi ʼo Noe.—Senesi 6:5, 9; vakaʼi te kiʼi nota ʼi te lalo pasina, tā fakapilitānia.

11. Koteā te fakatatau neʼe fai e Sesu ʼo ʼuhiga mo ‘te ʼu taʼiake,’ ʼaē ʼe talanoa kiai ia Mateo pea mo Luka?

¹¹ Neʼe mole ko te hoki logoe ʼa te kau ʼapositolo ki te fai e Sesu te fakatatau ʼaia ʼo ‘te ʼu taʼiake,’ koteʼuhi ʼi te ʼu ʼaho ki muʼa atu, neʼe ina ʼui ʼo ʼuhiga mo ia totonu: “Ko te Foha ʼo te tagata . . . ʼe tonu muʼa ke ina kātakiʼi te ʼu mamahi lahi pea mo līaki ia ia e te taʼiake ʼaenī. Pea tahi foki, ohage pe ko te meʼa ʼaē neʼe hoko ʼi te ʼu ʼaho ʼo Noe, ʼe toe feiā pe anai ʼi te ʼu ʼaho ʼo te Foha ʼo te tagata.” (Luka 17:24-26) Ia Mateo kapite 24 pea mo Luka kapite 17 ʼe toe maʼu ai te fakatatau ʼaia. ʼI te ʼu ʼaho ʼo Noe “ko te kakano fuli pe [ʼaē] neʼe kua fakalialia tonatou aga ʼi te kele” pea mo fakaʼauha ʼi te Tulivio, neʼe ko nātou “te taʼiake ʼaia.” ʼI te temi ʼo Sesu, ko te hahaʼi Sutea ʼaposita ʼaē neʼe nātou līaki ia Sesu, neʼe ko nātou “te taʼiake ʼaia.”—Senesi 6:11, 12; 7:1.

12, 13. (a) Ia ʼaho nei, koteā “te taʼiake ʼaia” ʼaē ʼe tonu ke puli? (b) ʼE tauʼi feafeaʼi e te hahaʼi ʼa Sehova te “taʼiake aga fakalialia pea mo fakapikopiko” ʼaenī?

¹² Koia, ʼi te fakahoko fakaʼosi ʼo te lea faka polofeta ʼa Sesu ʼi totatou temi, ko “te taʼiake ʼaia” ʼe mahino ia ʼe faka ʼuhiga ki te hahaʼi ʼo te kele, ʼaē ʼe nātou sisio ki te fakaʼiloga ʼo te ʼi henī ʼo Kilisito kae mole nātou fakatonutonuʼi tonatou ʼu ala. Kae ko tatou, ʼi totatou ʼuhiga kau tisipulo ʼa Sesu, ʼe mole tou fia mulimuli ki te faʼahiga maʼuli ʼo “te taʼiake ʼaia.” Logope ʼe tou maʼuʼuli ʼi te mālama, kae ʼe mole tonu ke tou kau kiai, “heʼe ko te temi ʼaē neʼe fakakatofa kua ōvi mai.” (Fakahā 1:3; Soane 17:16) ʼE tokoni mai te ʼapositolo ko Paulo kia tatou ʼo ina ʼui fēnei: “Koutou haga fai ia meʼa fuli ʼo mole koutou muhumuhu pea mo fakatupu kē, ke mole tukugakoviʼi ai koutou ʼi he meʼa pea ke koutou maʼa, ko he ʼu fānau ʼa te ʼAtua, ʼe mole honatou mele ʼi te lotolotoiga ʼo he taʼiake aga fakalialia pea mo fakapikopiko, ʼaē ʼe koutou mū ai ohage ko he ʼu nofoʼaga mālama ʼi te malamanei.”—Filipe 2:14, 15; Kolose 3:5-10; 1 Soane 2:15-17.

¹³ Ko tatatou “mū ai ohage ko he ʼu nofoʼaga mālama” ʼe mole gata ʼaki pe hatatou fakahā he ʼuhiga Kilisitiano ʼe maʼa, kae ʼe maʼuhiga tāfito age, ke tou fakahoko te fakatotonu faka polofeta ʼaenī ʼa Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14) ʼE mole feala ki he tagata ke ina ʼiloʼi pe ko ʼafea ʼaē ka hoko ai te fakaʼosi, kae ʼe tou ʼiloʼi ko te fakaʼosi ʼo “te taʼiake ʼaia” ʼo te hahaʼi agakovi, ʼe hoki hoko anai mokā fakaaʼu te fai faka mafola “ki te potu taupotu ʼo te kele,” ohage ko tana fakatuʼutuʼu e te ʼAtua.—Gāue 1:8.

“Ko Te ʼAho ʼAia Pea Mo Te Hola ʼAia”

14. Koteā te fakatokaga ʼaē neʼe foaki mai e Sesu pea mo Paulo ʼo ʼuhiga mo “te ʼu temi pea mo te fasiga taʼu,” pea ʼe tonu ke tou tali feafeaʼi?

¹⁴ ʼI te temi ʼaē ka hoko katoa ai te fai faka mafola ʼo mulimuli ki te fakatuʼutuʼu ʼa Sehova, ʼe ko te temi anai ʼaia ʼo tona “ ʼaho pea mo tona hola” ke ina fakaʼauha ai te tuʼu faka malamanei ʼaenī. ʼE mole hona ʼaoga ke tou ʼiloʼi fakatomuʼa te ʼaho ʼaia. Koia, ʼo mulimuli ki te faʼifaʼitaki ʼa Sesu, neʼe fakatokagaʼi fēnei mai e te ʼapositolo ko Paulo: “Pea ʼo ʼuhiga mo te ʼu temi pea mo te ʼu fasiga taʼu, ʼu tēhina, ʼe mole hona ʼaoga kia koutou ke mātou faitohi atu ʼo ʼuhiga mo te ʼu faʼahi ʼaia. Koteʼuhi ʼe koutou ʼiloʼi lelei pe ko te ʼaho ʼo Sehova ʼe haʼu moʼoni ia ohage ko he tagata kaihaʼa ʼi te pōʼuli. Ka nātou ʼui anai: ‘Tokalelei pea mo fīmālie!’ pea ʼe tonu anai ke hoko fakafokifā he fakaʼauha kia nātou, ohage ko te ʼu nunuʼa ʼo te tuʼania ki te fafine faitama; pea ʼe mole nātou hāo anai.” Koutou fakatokagaʼi te ʼui ʼa Paulo: ‘ ʼE hoko ʼi te temi ʼaē ka nātou ʼui ai.’ Ei, ʼi te temi ʼaē ka nātou palalau ai ki te “Tokalelei pea mo te fīmālie,” ʼi te temi ʼe mole nātou ʼamanaki ai ʼe hoko anai he meʼa, ko te fakamāu ʼa te ʼAtua ʼe fakahoko fakafokifā anai. ʼE tau pea mo feʼauga te tokoni ʼa Paulo, ʼi tana ʼui ʼaē: “ ʼAua naʼa tou momoe ohage ko niʼihi, kae ke tou nonofo ʼalaʼala pea mo tou aga fakapotopoto”!—1 Tesalonika 5:1-3, 6; koutou vakaʼi foki mo te ʼu vaega 7-11; Gāue 1:7.

15, 16. (a) He koʼe koa ʼe mole tonu ke tou manatu ʼe kei mamaʼo ia Halamaketone? (b) ʼE tonu ke fakahā feafeaʼi te pule faʼitaliha ʼa Sehova ʼi te temi ka haʼu ʼaē kua ōvi mai?

¹⁵ Ko tatatou kua mahino lelei ʼaē ʼo ʼuhiga mo “te taʼiake ʼaia,” ʼe ina faka ʼuhiga koa ko Halamaketone ʼe mole heʼeki fakaōvi mai? Kailoa ia! Logope la ʼe mole tou ʼiloʼi anai ʼi he temi “te ʼaho mo te hola” ʼo te ʼaho ʼaia, kae neʼe ʼiloʼi tuʼumaʼu e Sehova te “ ʼaho pea mo te hola” ʼaia, pea ʼe mole heʼeki fetogi ia. (Malakia 3:6) ʼE mahino papau ia, ko te malamanei kua fakaōvi ʼaupito ki tona fakaʼauha fakaʼosi. Kua ʼaoga ʼaupito ʼi te temi ʼaenī ke tou nonofo ʼalaʼala. Neʼe fakahā mai e Sehova kia tatou “te ʼu meʼa ʼaē kua ʼamanaki ke hoko,” pea ʼe tonu ke tou foimo gaūgaūe ʼaki he nofo tokaga katoa.—Fakahā 1:1; 11:18; 16:14, 16.

¹⁶ ʼI te kua ōvi mai ʼo te temi ʼaia, tou nonofo ʼalaʼala, koteʼuhi kua ʼamanaki e Sehova ke ina fakaʼauha te tuʼu katoa ʼa Satana! (Selemia 25:29-31) ʼE ʼui fēnei e Sehova: “ ʼE mahino papau ia, ʼe ʼau hikihiki anai ia ʼau pea mo ʼau faka maʼoniʼoniʼi ia ʼau, pea ʼe ʼau fakahā anai ia ʼau kia mata ʼo te ʼu puleʼaga tokolahi; pea ʼe mahino papau ia, ʼe nātou ʼiloʼi anai ko ʼau ia Sehova.” (Esekiele 38:23) Kua fakaōvi mai te “ ʼaho [maʼuhiga ʼaia] ʼa Sehova”!—Soele 1:15; 2:1, 2; Amosi 5:18-20; Sofonia 2:2, 3.

Ko “Te ʼu Lagi Foʼou Mo Te Kele Foʼou” ʼe Maʼu Ai Te Faitotonu

17, 18. (a) Ohage ko tona ʼui e Sesu pea mo Petelo, e feafeaʼi te pulihi ʼo “te taʼiake ʼaenī”? (b) He koʼe ʼe tonu ke tou nofo tokaga ʼo ʼuhiga mo tatatou aga pea mo tatatou ʼu gāue ki te ʼAtua?

¹⁷ ʼO ʼuhiga mo ‘te ʼu meʼa fuli ʼaenī ʼaē ʼe tonu ke hoko,’ neʼe ʼui fēnei e Sesu: “Ko te lagi pea mo te kele ʼe mole anai ia, kaʼe ko ʼaku lea ʼe mole feala tuʼa tahi anai ia ke mole.” (Mateo 24:34, 35) ʼI tana talanoa ʼo ʼuhiga mo te “lagi pea mo te kele,” neʼe lagi manatu ia Sesu—ki te ʼu pule pea mo te hahaʼi fakalogo—ʼo te “taʼiake ʼaia.” Neʼe fakaʼaogaʼi e te ʼapositolo ko Petelo te ʼu kupu feiā ʼi tana talanoa ʼaē ki “te ʼu lagi mo te kele ʼo te temi ʼaenī,” ʼaē “kua tānaki pea mo tāʼofi ki te ʼaho ʼo te fakamāu pea mo te fakaʼauha ʼo te hahaʼi heʼe aga faka lotu.” Ki muli age, ʼe ina fakamatala ko “te ʼaho ʼo Sehova ʼe haʼu anai ohage ko he tagata kaihaʼa, [pea] ko te ʼaho ʼaia ko te ʼu lagi [faka puleʼaga] ʼe puli anai” ʼo kau kiai mo te sosiete fakatagata aga fakahehema, peʼe ko “te kele,” pea mo tana ʼu gāue agakovi. Koia ʼe fakaloto mālohiʼi tatou e te ʼapositolo ke tou “aga faka maʼoniʼoni pea mo aga faka lotu, ʼo [tou] talitali pea mo ʼaua naʼa galo kia tatou te hoko mai ʼo te ʼaho ʼo Sehova, ʼaia ʼe tupu ai anai te mavetevete ʼo te ʼu lagi ʼaē kua ulo pea mo te huhuʼa ʼo te ʼu meʼa ʼaē kua vela ʼaupito!” Koteā ʼaē ka hoko ki muli age? ʼE fakatokagaʼi mai e Petelo kia tatou ‘te ʼu lagi foʼou pea mo te kele foʼou ʼaia ʼe tonu ke nofo ai te faitotonu.’—2 Petelo 3:7, 10-13.c

¹⁸ Ko “te ʼu lagi foʼou” ʼaia, te Puleʼaga ʼaē ʼe taki e Kilisito Sesu pea mo tana ʼu kaugā hau, ʼe nātou tuku mai anai te ʼu tapuakina ki te hahaʼi ʼaē ʼe nātou faʼufaʼu te “kele foʼou.” ʼE koutou ʼamanaki koa ke koutou kau ki te sosiete fakatagata ʼaia? Kapau koia ʼaia, ʼe feala hakotou fiafia ʼo ʼuhiga mo te ka haʼu maʼuhiga ʼaē ʼe tou fakatalitali kiai!—Isaia 65:17-19; Fakahā 21:1-5.

19. Koteā te pilivilesio lahi ʼe feala ke tou maʼu ʼi te temi nei?

¹⁹ Ei, ʼi te temi nei, ʼe tānaki te hahaʼi ʼo te “taʼiake” faitotonu ʼo te malamanei. Ia ʼaho nei, ko te “kaugana agatonu mo poto” ʼaē neʼe fakanofo, ʼe ina akoʼi te hahaʼi ʼo ʼuhiga mo te ʼAtua, ʼo mulimuli ki te ʼu palalau ʼaē ʼe tuʼu ia Pesalemo 78:1, 4, ʼaē ʼe ʼui fēnei ai: “Fagono ki taku lao, Ê toku hahaʼi; koutou fakalogo ki te ʼu folafola ʼo toku gutu . . . , ʼo fakamatala te ʼu meʼa ʼaia ki te taʼiake ʼaē ka haʼu, te ʼu fakavikiviki ʼo Sehova pea mo tona mālohi, pea mo tana ʼu meʼa fakatalakitupua, ʼaē neʼe ina fai.” (Mateo 24:45-47) ʼI te ʼaho 14 ʼo ʼApelili ʼo te taʼu ʼaenī, ʼi te malamanei katoa, ʼi te ʼu kokelekasio e 75 500 tupu pea ʼi te ʼu fenua e 230 tupu, ko te toko 12 000 000 tupu kau hahaʼi ʼaē neʼe kau ki te Fakamanatu ʼo te ʼaho mate ʼo Kilisito. Neʼe koutou kau koa ia nātou ʼaia? ʼOfa pe ke koutou tui kia Kilisito Sesu pea mo koutou ‘pāui ki te huafa ʼo Sehova ke hāofaki koutou.’—Loma 10:10-13.

20. Koteʼuhi “kua nounou te temi,” ʼe lava feafeaʼi ke tou nofo ʼalaʼala, pea ʼaki te ʼamanaki fea?

²⁰ “Ko te temi kua nounou,” ko te ʼui ʼaia ʼa te ʼapositolo ko Paulo. Koia, ko te temi ʼaenī, ʼe ko he temi ke tou nonofo ʼalaʼala ai pea ke tou maʼumaʼua ʼi te gāue kia Sehova, ʼo tou kātakiʼi te ʼu ʼahiʼahi pea mo te fehiʼa ʼaē ʼe fakahā e te taʼiake agakovi ʼo te malamanei. (1 Kolonito 7:29; Mateo 10:22; 24:13, 14) Tou nofo tokaga, ʼo tou fakasiosio te ʼu meʼa fuli ʼaē neʼe fakahā fakatomuʼa ʼi te Tohi-Tapu ʼaē ʼe tonu ke hoko ki “te taʼiake [ʼaenī].” (Luka 21:31-33) Kapau ʼe tou hāo mai te ʼu meʼa ʼaia pea mo tou maʼu te ʼofa ʼo te ʼAtua ia muʼa ʼo te Foha ʼo te tagata, ʼe hoki feala anai ke tou maʼu te totogi ʼaē ko te maʼuli ʼo heʼegata.

[Nota ʼi te lalo pasina]

Te ʼu Fehuʼi Fakamanatu:

◻ ʼI tatatou fakatokagaʼi te fakahoko ʼo te vaega ʼo Taniela 4:32, ʼe tonu ke feafeaʼi tatatou “nofo tokaga” ʼi te temi nei?

◻ ʼE faka ʼuhiga kiteā “te taʼiake ʼaia” ʼi te ʼu Evaselio ʼo Mateo pea mo Luka?

◻ ʼI tatatou fakatalitali ki te “ ʼaho pea mo te hola ʼaia,” koteā ʼaē kua tou mahino kiai, pea koteā te meʼa ʼaē ʼe tonu ke tou fai?

◻ ʼAki te ʼamanaki ʼaē ke tou sio ki “te ʼu lagi foʼou pea mo te kele foʼou” ʼe maʼu ai te faitotonu, koteā ʼaē ʼe tonu ke tou lotomālohi ʼo fai?

[Paki ʼo te pasina 17]

Ko te lotomamahi ʼo te malamanei ʼe fakafimālieʼi anai mokā pulihi anai te taʼiake agamālohi, pea mo agakovi ʼaenī

[Haʼuʼaga ʼo te paki]

Alexandra Boulat/Sipa Press

[Haʼuʼaga ʼo te paki]

Left and below: Luc Delahaye/Sipa Press

[Paki ʼo te pasina 18]

Kua ōvi mai te fakatuʼu ʼo “te ʼu lagi foʼou pea mo te kele foʼou” faka kolōlia maʼa te hahaʼi ʼo te malamanei