15, 16. Ko ai ‘te taʼiake ʼaia’ ʼae neʼe talanoa ki ai ia Sesu?

¹⁵ Pea ko ʼafea leva ʼae ʼe hoko mai anai te Puleʼaga ʼo te ʼAtua? Neʼe mole fakaha e Sesu tona ʼaho. (Mat. 24:36) Kaʼe neʼe ina fakaha he faʼahi ʼe tou iloʼi papau ai kua ovi mai. Neʼe ui e Sesu ʼe hoko mai anai te Puleʼaga hili te sio ʼa ‘te taʼiake ʼaiaʼ ki te hoko ʼo te fakaʼiloga ʼae neʼe fakakikite. (Lau ia Mateo 24:32-34.) Ko ai ‘te taʼiake ʼaiaʼ? Tou vakavakaʼi fakalelei ia te ʼu palalau ʼa Sesu.

¹⁶ ‘Te taʼiake ʼaia.ʼ Neʼe manatu koa ia Sesu ki te hahaʼi ʼae ʼe mole tui? Kailoa ia. Tou vakaʼi pe ko ai ʼae neʼe nofo mo Sesu ʼi tana fai te ʼu palalau ʼaia. Neʼe fakamatala e Sesu te lea fakapolofeta ʼaia ki ʼihi ʼo tana kau apositolo, ʼae “nee omai ateaina” kia te ia. (Mat. 24:3) Neʼe fakanofo ki muli age te kau apositolo ʼaki te laumalie maʼoniʼoni. Tou toe tokagaʼi mo te ʼu vaega ki muʼa atu. ʼI muʼa ʼo tana talanoa ki ‘te taʼiake ʼaia,ʼ neʼe ui fenei e Sesu: “Kotou ako mai te folafola fakatata o te fuu fiki. Ka kamata malulu ona vaa, pea mo hohomo ona lau, e kotou iloi kua ovi mai te temi vevela. Pea e fena foki, moka kotou sisio anai ki te u mea fuli aia, ke kotou iloi kua ovi mai te Foha o te tagata, i te matapa.” ʼE ko te kau tisipulo fakanofo ʼa Sesu, kaʼe mole ko te hahaʼi ʼae ʼe mole tui, ʼae ka natou sisio ki te ʼu meʼa ʼae neʼe ina fakakikite pea mo mahino ai ko Sesu “kua ovi mai . . . i te matapa.” Koia, ko te ‘taʼiake ʼaiaʼ ʼae neʼe talanoa ki ai ia Sesu neʼe ko ʼana tisipulo fakanofo.

17. Kotea te fakaʼuhiga ʼo te “taʼiake” pea mo “te ʼu meʼa fuli ʼaia”?

¹⁷ ‘ ʼE mole puli anai te taʼiake ʼaeni, kaʼe heʼeki hoko te ʼu meʼa fuli ʼaia.ʼ ʼE hoko feafeaʼi anai te ʼu palalau ʼaia? Moʼo tali ki ai, ʼe tonu ke tou iloʼi ia faʼahi ʼe lua: Ko ai te “taʼiake” pea kotea “te ʼu meʼa fuli ʼaia.” ʼI te Tohi-Tapu, ko te kupu “taʼiake” ʼe tau fakaʼuhiga ki he hahaʼi ʼe kehekehe ʼonatou taʼu kaʼe ʼe natou maʼuʼuli tahi ʼi he temi ʼo te hisitolia; pea ko te temi ʼaia ʼe mole loaloaga fau, pea ʼe ʼi ai tona gataʼaga. (Eke. 1:6) Pea ko “te ʼu meʼa fuli ʼaia” ʼe fakaʼuhiga ki te ʼu aluʼaga fuli ʼae neʼe fakakikite ka hoko ʼi te ʼi heni ʼa Sesu, ʼae neʼe kamata ʼi te taʼu 1914 ʼo kaku ki tona ikuʼaga ʼi te “mamahi lahi.”—Mat. 24:21.

18, 19. ʼE tonu ke tou mahino feafeaʼi ki te kupu “taʼiake” ʼi te ʼu palalau ʼa Sesu, pea kotea ʼae ʼe feala ke tou ui ʼi tatatou mahino ʼaia?

¹⁸ Koia, ʼe tonu ke tou mahino feafeaʼi ki te kupu “taʼiake” ʼi te ʼu palalau ʼa Sesu? Ko te taʼiake ʼaia ʼe ko kutuga Kilisitiano fakanofo ʼe lua ʼe natou maʼuʼuli tahi ʼi he temi, ko te ʼuluaki kutuga, ko te kau Kilisitiano fakanofo ʼae neʼe natou sisio ki te kamata hoko ʼo te fakaʼiloga ʼi te taʼu 1914, pea ko te lua kutuga, ko te kau Kilisitiano fakanofo ʼae neʼe natou maʼuʼuli tahi ʼi he kiʼi temi mo natou ʼo te kutuga ʼuluaki. Pea ko ʼihi ʼi te lua kutuga ʼe natou sisio anai ki te kamata ʼo te mamahi lahi. ʼE faʼufaʼu e te ʼu kutuga ʼaia ʼe lua he taʼiake, he ʼe ko te kau Kilisitiano fakanofo ʼaia neʼe natou maʼuʼuli tahi lolotoga he kiʼi temi.c

¹⁹ Kotea ʼae ʼe feala ke tou ui ʼi tatatou mahino ʼaia? ʼE tou iloʼi ko te fakaʼiloga ʼo te ʼi heni ʼa Sesu ʼi te malohi ʼo te Puleʼaga kua hoko ia ʼi te kele katoa. ʼE tou toe tokagaʼi foki ko te kau fakanofo ʼae ʼe kei maʼuʼuli pea mo natou kau ki ‘te taʼiake ʼaiaʼ kua matuʼatuʼa; kaʼe ʼe mole natou mamate fuli anai ʼi muʼa ʼo te kamata ʼo te mamahi lahi. Koia, ʼe feala ai ke tou ui kua vave hoko mai pe te Puleʼaga ʼo te ʼAtua pea mo pule ki te kele! ʼI meʼa fakafiafia lahi foki moka tou sisio anai ki te fakahoko ʼo te faikole ʼae neʼe akoʼi mai e Sesu: “Ke hoko mai tou Puleʼaga”!