Tou Faʼifaʼitakiʼi Te Nofo ʼAlaʼala ʼa Sesu

“Kotou alaala pea kotou faikole.”—MAT. 26:41.

ʼE KOTOU TALI FEAFEAʼI ANAI?

․․․․․

ʼE hā feafeaʼi ʼi ʼatatou faikole ʼe tou nofo ʼalaʼala?

․․․․․

Ko te ʼu ʼaluʼaga fea ʼaē ʼe tou fakahā ai tatatou nofo ʼalaʼala ʼi te minisitelio?

․․․․․

He koʼē ʼe maʼuhiga ke tou haga nofo ʼalaʼala ʼi te ʼu temi faigataʼa, pea ʼe tou lava fakahā feafeaʼi ia te faʼahi ʼaia?

1, 2. (a) Koteā te ʼu fehuʼi ʼe tou feʼuiʼaki ʼo ʼuhiga mo te nofo ʼalaʼala ʼa Sesu? (b) ʼE ʼaoga koa te faʼifaʼitaki haohaoa ʼa Sesu ki te kau agahala? Kotou tuku mai he faʼifaʼitaki.

ʼE LAGI kotou feʼuiʼaki: ‘ ʼE feala koa hatatou faʼifaʼitakiʼi te nofo ʼalaʼala ʼa Sesu? Heʼe ko Sesu neʼe haohaoa! Pea tahi, neʼe maʼu e Sesu ia te fealagia ʼaē ke ina ʼiloʼi lelei te kā haʼu—ʼo sio ki he ʼu taʼu e lauʼi afe ki muʼa atu ʼi tona temi! Neʼe ʼaoga moʼoni koa kiā ia ke nofo ʼalaʼala? (Mat. 24:37-39; Hep. 4:15) Tou kumi muʼa te ʼu tali ki te ʼu fehuʼi ʼaia ke feala hatatou mahino ki te ʼaoga mo te maʼuhiga ʼo te faʼahi ʼaia kiā tātou.

² ʼE feala koa ke tokoni he faʼifaʼitaki haohaoa ki he kau agahala? ʼEī, koteʼuhi ʼe feala hatatou maʼu he ako mai he faʼifaʼitaki ʼo he tagata faiako lelei. Ohagē lā, kotou fakakaukauʼi age muʼa he tahi ʼe ina kamata akoako ʼi te lupi ia te ʼakahi ʼo te foʼi fiti ke hū ki te kolo. Heʼeki faʼa poto lelei ke ina fakahū he foʼi kai, kae ʼe ʼaoga anai kiai ke lahi age tana akoako pea mo tana ʼu faiga. Pea ke hikihiki tana akoako, ʼe maʼua leva ke tokaga lelei ki te faʼifaʼitaki ʼo tana tagata faiako, ʼaē ʼe ko he tagata faiva ʼi te ʼakahi ʼo te foʼi fiti. ʼE ina fakasiosio lelei anai ki te faʼahiga fakatuʼu ʼaē ʼo te foʼi fiti e tana tagata faiako, mo te faʼahiga tuʼu ʼo tona ʼu vaʼe pea mo te tuʼuʼaga ʼo te kolo. ʼAki te temi, kua poto leva ia ia ʼi te fakafuafua te mālohi ʼo tana ʼakahi te foʼi fiti; mo ina tokagaʼi te agaaga ʼo te matagi pea mo te hoko atu ʼo tana ʼu faiga. ʼAki tana faʼifaʼitakiʼi te faʼahiga fai ʼo tana tagata faiako, ʼe fakaʼaluʼalu pē anai tana ʼakahi te foʼi fiti ke hū ki te kolo. ʼO fēia mo tātou, tou faiga ke hikihiki totatou ʼuhiga Kilisitiano ʼo tou fakahoko lelei te ʼu fakatotonu ʼa Sesu pea mo mulimuli ki tana faʼifaʼitaki haohaoa.

3. (a) Neʼe fakahā feafeaʼi e Sesu neʼe ʼaoga kiā ia te kalitātē ʼaē ko te nofo ʼalaʼala? (b) Koteā anai kā tou vakaʼi ʼi te ʼalatike ʼaenī?

³ Kae ʼe feafeaʼi ʼo ʼuhiga mo te nofo ʼalaʼala? Neʼe ʼaoga moʼoni koa ke maʼu e Sesu te kalitātē ʼaia? ʼI tona fakahagatonu, ʼeī. Ohagē lā, ʼi te pō fakaʼosi ʼo tana maʼuli ʼi te kele, neʼe fakalotomālohiʼi fēnei e Sesu tana kau ʼapositolo agatonu: “Kotou alaala mo au.” Neʼe ina toe ʼui fēnei: “Kotou alaala pea kotou faikole [tuʼumau], ke aua naa kotou higa ki te fakahala.” (Mat. 26:38, 41) Logolā neʼe nofo ʼalaʼala tuʼumaʼu, kae ʼi te lakaga faigataʼa ʼaia neʼe ʼaoga moʼoni tāfito kiā Sesu ke nofo ʼalaʼala pea mo ovi ki tana Tamai ʼe ʼi selō. Neʼe ina ʼiloʼi neʼe toe ʼaoga ki tana ʼu tisipulo ke natou nofo tokaga—ʼo mole gata pē ʼi te temi ʼaia, kae ʼo toe fēia ʼi te temi kā haʼu. Koia tou vakaʼi muʼa pe he koʼē ʼe loto ia Sesu ke tou nofo ʼalaʼala. ʼOsi ʼaia pea ʼe tou vakaʼi anai ʼaluʼaga e tolu ʼe feala ai hatatou faʼifaʼitakiʼi te nofo ʼalaʼala ʼa Sesu ʼi te ʼaho fuli.

HE KO’Ē ʼE LOTO IA SESU KE TOU NOFO ʼALAʼALA

4. Koteā te pikipikiga ʼo te meʼa ʼaē ʼe mole tou ʼiloʼi ʼo ʼuhiga mo te kā haʼu pea mo te maʼua ʼaē ke tou nofo ʼalaʼala?

⁴ ʼE loto ia Sesu ke tou nofo ʼalaʼala ʼuhi ko tupuʼaga e lua. ʼUluaki, ʼe mole tou mālama kiā meʼa fuli ʼo ʼuhiga mo te kā haʼu. ʼI te temi ʼaē neʼe nofo ai ia Sesu ʼi te kele, neʼe ina ʼiloʼi koa te ʼu meʼa fuli ʼo ʼuhiga mo te kā haʼu? Kailoa ia, heʼe ʼaki he agavaivai neʼe ina fakamoʼoni fēnei: “O uhiga mo te aho pea mo te hola, e mole iloi e he tahi, pee ko te kau aselo i te atu lagi, pee ko te Alo, kae ko te Tamai toko tahi.” (Mat. 24:36) ʼI te temi ʼaia, ko Sesu, “te Alo,” neʼe mole ina ʼiloʼi papau te ʼaho ʼaē kā hoko ai te fakaʼosi ʼo te mālama agakovi ʼaenī. Kae ʼe feafeaʼi kiā tātou iā ʼaho nei? ʼE kei ʼi ai koa he ʼu faʼahi ʼe mole tou mālama kiai ʼo ʼuhiga mo te kā haʼu? ʼEī! ʼE mole tou ʼiloʼi peʼe ko te ʼaho fea ʼaē kā fekauʼi mai anai e Sehova ia tona ʼAlo, ke ina pulihi te tuʼu ʼo te ʼu faʼahiga meʼa agakovi ʼaenī. Kae kapau lā neʼe tou ʼiloʼi, ʼe kei ʼaoga moʼoni koa ke tou haga nofo ʼalaʼala? Ohagē ko tona fakamahino e Sesu, ʼe hoko fakapunamaʼuli anai te fakaʼosi; koia ʼaē ʼe maʼua ai ke tou nofo ʼalaʼala tuʼumaʼu.—Lau ia Mateo 24:43.

5, 6. (a) ʼE tokoni feafeaʼi mai te mahino ki te ʼu meʼa ʼaē kā hoko ʼi te kā haʼu pea mo te ʼu fakatuʼutuʼu ʼa te ʼAtua ke tou nofo ʼalaʼala? (b) He koʼē ʼe tonu ki tatatou mahino ki te ʼu fakatuʼutuʼu ʼa Satana ke ina uga tātou ke tou haga nofo ʼalaʼala?

⁵ Ko te tahi tupuʼaga ʼo te loto ʼaē ʼa Sesu ke tou nofo ʼalaʼala, ʼe ko te ʼu faʼahi kua tou mahino kiai ʼo ʼuhiga mo te kā haʼu. ʼI tana kei ʼi te kele, neʼe ʼiloʼi e Sesu te ʼu moʼoni ʼaē neʼe mole mahino kiai te hahaʼi ʼaē neʼe fakaovi age kiā te ia. ʼE moʼoni ʼe mole feala ke fakatatau te ʼu meʼa ʼaē kua tou mālama kiai mo ʼaē ʼa Sesu, kae ʼuhi ko tana ʼu akonaki, kua lahi te ʼu faʼahi kua tou ʼiloʼi lelei ʼo ʼuhiga mo te Puleʼaga ʼo te ʼAtua pea mo te meʼa ʼaē kā ina fakahoko anai ʼi te kā haʼu. ʼE tou fakatokagaʼi koa ʼi ʼotatou tafaʼaki, peʼe ʼi te faleako, peʼe ko te fale gāue, peʼe ko te telituale ʼaē ʼe tou fai fakamafola ai, ia te mole mahino ʼaē ʼa te hahaʼi ki te ʼu moʼoni taulekaleka ʼaia? ʼE ko te tahi tupuʼaga ʼaia ke tou nofo ʼalaʼala ai. Ohagē ko Sesu, ʼe ʼaoga ke tou nofo tokaga tuʼumaʼu, ʼo kumi he ʼu faigamālie ke tou fakahā ki ʼihi te ʼu meʼa ʼaē kua tou mālama kiai ʼo ʼuhiga mo te Puleʼaga ʼo te ʼAtua. ʼE maʼuhiga te ʼu faigamālie fuli, pea ʼe mole tou fakaʼalunoa anai he faigamālie, heʼe ko te maʼuli ʼo te hahaʼi ʼe fakalogo kiai!—1 Tim. 4:16.

⁶ Neʼe ʼiloʼi e Sesu te tahi faʼahi ʼaē neʼe tupu ai tana nofo ʼalaʼala. Neʼe mahino kiā Sesu ʼe faiga mālohi anai Satana ke ina fakahalaʼi mo fakatagaʼi ia ia pea mo ina maumauʼi tana nofo agatonu ki te ʼAtua. Ko te fili kākā ʼaia neʼe ina lamalama tuʼumaʼu pē “he tahi temi faigamalie” ke ina fakahalaʼi ai ia Sesu. (Luka 4:13) Neʼe nofo tokaga ia Sesu ʼi te temi fuli pē. Neʼe loto ia ke nofo teuteu ki he faʼahiga ʼahiʼahi pē, peʼe ko he fakahala, peʼe ko he fakafeagai peʼe ko he fakataga. ʼE mole tonu koa lā ke tou toe fai fēia mo tātou? ʼE tou ʼiloʼi ko Satana ʼe kei ‘hagē pē ko he laione gugulu, ʼe ina kumi ke ina kai he tahi.’ Ko te tupuʼaga lā ʼaia ʼo te fakalotomālohiʼi fēnei e te Folafola ʼa te ʼAtua ia te kau Kilisitiano fuli: “Ke koutou fakapotopoto, mo alaala!” (1 Pet. 5:8) Kae ʼe feafeaʼi hatatou fakahoko ia te faʼahi ʼaia?

ʼE FEAFEAʼI HATATOU NOFO ʼALAʼALA ʼI TE FAIKOLE

7, 8. Koteā te tokoni neʼe fai e Sesu ʼo ʼuhiga mo te faikole, pea koteā te faʼifaʼitaki neʼe ina tuku ʼi te faʼahi ʼaia?

⁷ ʼE fakahā ʼi te Tohi-Tapu ʼe maʼuhiga ʼaupitō te faikole ki te nofo tokaga peʼe ko te nofo ʼalaʼala ʼi te faʼahi fakalaumālie. (Kol. 4:2; 1 Pet. 4:7) ʼI te hili pē ʼo tana kole ki tana ʼu tisipulo ke natou nofo ʼalaʼala mo ia, neʼe ina ʼui fēnei: “Kotou alaala pea kotou faikole, ke aua naa kotou higa ki te fakahala.” (Mat. 26:41) Ko tona fakaʼuhiga, neʼe ʼaoga pē koa te tokoni ʼaia ki te ʼaluʼaga faigataʼa ʼaē neʼe tau mo nātou ʼi te temi ʼaia? Kailoa ia, ko tana tokoni ʼe ko he pelesepeto ʼe tonu ke tou maʼuliʼi ʼi te ʼaho fuli.

⁸ Neʼe tuku e Sesu ia he faʼifaʼitaki lelei ʼaupitō ʼo ʼuhiga mo te faikole. ʼE lagi kotou manatuʼi te lakaga ʼaē neʼe faikole pō kātoa ai ki tana Tamai. Tou fakakaukauʼi age muʼa te meʼa ʼaē neʼe hoko. (Lau ia Luka 6:12, 13.) ʼI te fasigā taʼu mātala, neʼe lagi nofo ovi Sesu ki te kolo geluʼia ko Kapenaume, ʼi Kalilea. ʼI te malu ifo ʼo te afiafi, neʼe hake leva Sesu ki he moʼuga ʼi te ʼu moʼuga ʼaē ʼe haga age ki te Tai ʼo Kalilea. ʼI tana sioʼi ia te toe fenua kātoa ʼaia ʼi te pōʼuli, neʼe lagi sio ifo ki te mū ʼo te ʼu kiʼi mālama taki ʼo te kolo ʼo Kapenaume pea mo te ʼu kolo ʼaē ʼe tuʼu ovi age. Kae ʼi te faikole leva ʼa Sesu kiā Sehova, neʼe mole toe ʼi ai he meʼa neʼe ina fakaleluʼi ia ia. ʼO fakalaka ai te ʼu minuta mo te ʼu hola. Neʼe mole ina tokagaʼi lelei te matehi takitātahi ʼo te ʼu kiʼi mālama taki peʼe ko te hake ʼo te māhina ʼi te lagi peʼe ko te kumi meʼa kai ʼa te ʼu manu ʼi te vao matuʼa. ʼE mahino ia neʼe faikole ʼo ʼuhiga mo te tonu maʼuhiga ʼaē neʼe tonu ke ina fai—ko te filifili ʼo tana kau ʼapositolo e toko 12. ʼE feala ke tou fakakaukauʼi te tokaga tāfito ʼa Sesu ʼo fakahā ki tana Tamai tana ʼu manatu fuli pea mo te ʼu faʼahi ʼe hoha kiai ʼo ʼuhiga mo te ʼu tisipulo takitokotahi, ʼi tana kole ʼaē te takitaki pea mo te poto ʼa te ʼAtua.

9. Koteā te ako ʼe tou lava tāʼofi mai te faʼifaʼitaki ʼa Sesu ʼi tana faikole pō kātoa?

⁹ Koteā te ako ʼe tou tāʼofi mai te faʼifaʼitaki ʼa Sesu? ʼE tonu ai koa ke tou faikole lolotoga ni hola? Kailoa ia, he neʼe lotomahino ia ʼo ʼuhiga mo tana ʼu tisipulo, ʼo ina ʼui fēnei: “E loto lelei te laumalie kae e vaivai te sino.” (Mat. 26:41) Kae ʼe feala pē ke tou faʼifaʼitakiʼi ia Sesu. Ohagē lā, ʼe tou kumi tokoni koa ki tatatou Tamai ʼe ʼi selō ʼi muʼa ʼo hatatou fai he tonu ʼe feala ke malave kiā tātou, peʼe ki totatou fāmili, peʼe ko totatou ʼu tehina mo tuagaʼane fakalaumālie? ʼE tou hūfakiʼi koa ʼi ʼatatou faikole totatou ʼu tehina mo tuagaʼane ʼi te tui? ʼE tou faikole fakamālotoloto koa peʼe tou lau liuliuga pē ni palalau kua tou māhani kiai? Kotou toe tokagaʼi foki, neʼe fakamaʼuhigaʼi e Sesu ia te ʼu felōgoi lelei mo ʼāteaina ʼaē mo tana Tamai. ʼI te mālama maʼumaʼua mo maveuveu ʼaenī, ʼe toe faigafua pē hatatou efihia ʼi te taʼi maʼuli ʼaia pea mo tou galoʼi te ʼu meʼa ʼaē ʼe maʼuhiga age. Kapau ʼe tou fakaʼaogaʼi he temi loaloaga ki te faikole ʼāteaina mo fakamālotoloto, ʼe mālohi age anai tatatou nofo tokaga ʼi te faʼahi fakalaumālie. (Mat. 6:6, 7) ʼE lahi age anai tatatou fakaovi kiā Sehova, ʼo tou faiga ke toe mālohi tatatou ʼu felōgoi ʼaē mo ia pea mo fakafisi ki te ʼu meʼa ʼaē ʼe feala ke ina maumauʼi te ʼu felōgoi ʼaia.—Pes. 25:14.

ʼE FEAFEAʼI HATATOU NOFO ʼALAʼALA ʼI TE GĀUE FAI FAKAMAFOLA

10. Koteā te faʼifaʼitaki ʼaē ʼe ina fakahā mai ko Sesu neʼe nofo tokaga ki te ʼu faigamālie ʼaē ke ina fakahā ai te logo lelei?

¹⁰ Neʼe nofo ʼalaʼala ia Sesu ʼi te gāue ʼaē neʼe hinoʼi kiai ia ia e Sehova ke ina fai. ʼE lahi te ʼu gāue ʼe feala ke hēʼia ai te fakakaukau ʼa he tagata gāue kae ʼe mole ʼi ai hona fua kovi kiā ia. Kae ʼe lahi te ʼu gāue ʼe fakamaʼua kiai ia te nofo tokaga mo te nofo ʼalaʼala, pea ʼe kau ia te minisitelio Fakakilisitiano ki te faʼahiga gāue ʼaia. Neʼe nofo tokaga tuʼumaʼu ia Sesu ki te fakahoko ʼo tana gāue, ʼo ina kumi he ʼu faigamālie moʼo fakahā te logo lelei. Ohagē lā, ʼi te tau atu ʼaē ʼa Sesu mo tana ʼu tisipulo ki te kolo ko Sisale hili tanatou haʼele loaloaga ʼi te ʼuhu kātoa, neʼe ʼolo tana ʼu tisipulo ʼo kumi meʼa kai. Neʼe nofo ovi ia Sesu ki te vai keli ʼo te kolo ʼo mālōlō ai, kae neʼe nofo tokaga aipē, pea neʼe ina maʼu ai he temi faigamālie ke ina fakahā te logo lelei. Neʼe fakaovi age te fafine Samalitana ke ʼohu vai. Neʼe feala pē kiā Sesu ke ina filifili ke mālōlō, peʼe ke ina maʼu he ʼu takuʼaki ke ʼaua naʼa fai palalau. Kae neʼe palalau ia mo te fafine, ʼo ina fakahoko ai he fagonogono mālohi neʼe malave ki te hahaʼi tokolahi ʼo te kolo ʼaia. (Soa. 4:4-26, 39-42) ʼE feala koa ke lahi age tatatou faʼifaʼitakiʼi te nofo ʼalaʼala ʼa Sesu, lagi ʼo tou faiga ke tuputupu tatatou nofo tokaga ʼo ʼuhiga mo te ʼu faigamālie ʼaē ke tou fakahā ai te logo lelei ki te hahaʼi ʼaē ʼe tou felāveʼi mo nātou ʼi te ʼaho fuli?

11, 12. (a) Neʼe tali feafeaʼi ia Sesu kiā nātou ʼaē neʼe faiga ke natou fakaleluʼi ia ia mai te fakahoko ʼo tana gāue? (b) Neʼe fakahā feafeaʼi e Sesu tana fakapotopoto ʼi te fakahoko ʼo tana gāue?

¹¹ ʼI ʼihi temi, neʼe faigaʼi e ʼihi ke natou fakaleluʼi te gāue ʼa Sesu, kae neʼe mole natou fai ʼaki he ʼu fakatuʼutuʼu kovi. ʼI Kapenaume, ʼi te malave ʼaupitō ki te hahaʼi ia te ʼu fakamālōlō fakamilakulo ʼaē neʼe fai e Sesu, neʼe natou loto ke nofo ia ia mo nātou. Ko he ʼaluʼaga ia ʼe tou mahino kiai. Kae ko te gāue ʼa Sesu, neʼe ko te fai fakamafola ki “te u ovi hehe [fuli] o te fale o Iselaele,” kae neʼe mole gata ʼaki pē ki te ʼu hahaʼi ʼo he kolo e tahi. (Mat. 15:24) Koia ʼaē neʼe ina ʼui fēnei ai ki te hahaʼi ʼaia: “E tonu foki ke au fakaha ki te u kolo ake ae te logo lelei o te puleaga o te Atua; koteuhi ko te tupuaga aia o toku fekaui mai ai.” (Luka 4:40-44) ʼO hā lelei mai ai, ko te maʼuli ʼo Sesu neʼe hagahaga pē ki tana minisitelio. Neʼe mole ina tuku he meʼa ke ina fakaleluʼi ia ia.

¹² ʼI te tokaga tāfito ʼaē ʼa Sesu ki tana gāue, neʼe tauhi lotu fakavale koa pe neʼe maʼuli fakamamahi? Neʼe maʼumaʼua koa ʼi tana minisitelio, ʼo tupu ai hana mole kei tokaga ki te ʼu meʼa ʼaē neʼe ʼaoga ki te ʼu fāmili? Kailoa ia, neʼe tuku e Sesu ia he faʼifaʼitaki lelei ʼo ʼuhiga mo te fakapotopoto. Neʼe maʼuli fiafia ia, mo ina leleiʼia te ʼu temi fakafiafia ʼaē neʼe fakatahi ai mo tona ʼu kaumeʼa. Neʼe ina fakamaʼuhigaʼi te ʼu fāmili, ʼo ina tokagaʼi te ʼu meʼa ʼaē neʼe ʼaoga kiā nātou mo tonatou ʼu fihifihia, pea neʼe ina fakahā faʼifaʼitaliha tona ʼofa ki te ʼu tamaliki.—Lau ia Maleko 10:13-16.

13. ʼE feafeaʼi hatatou lava faʼifaʼitakiʼi te nofo ʼalaʼala pea mo te fakapotopoto ʼa Sesu mokā tou fakamafola te Puleʼaga?

¹³ ʼI tatatou faʼifaʼitakiʼi te nofo ʼalaʼala ʼa Sesu, ʼe feafeaʼi hatatou faigaʼi ke tou maʼu te faʼahiga fakapotopoto ʼaē neʼe ina maʼu? ʼE mole tou tuku anai te mālama ʼaenī ke ina fakaleluʼi tātou ʼi te fakahoko ʼo tatatou gāue. Māʼia mo ʼotatou kaumeʼa mo ʼotatou fāmili ʼaē ʼe natou uga ia tātou ke tou fakasiʼisiʼi tatatou minisitelio, peʼe ke hagē totatou maʼuli ko nātou. Kae kapau ʼe tou faʼifaʼitakiʼi ia Sesu, ʼe hagē anai tatatou minisitelio ko he meʼa kai. (Soa. 4:34) Ko tatatou gāue ʼe ina fafaga ia tātou ʼi te faʼahi fakalaumālie mo tou maʼu ai te fiafia. Kae, ʼe mole tou gāue fakavale anai, ʼuhi he tou fia faitotonu fau pe neʼe tou fakafisi kiā meʼa fuli. Ohagē ko Sesu, ʼe tou loto ke tou tauhi fakafiafia mo fakapotopoto ki “te Atua manuia.”—1 Tim. 1:11.

ʼE FEAFEAʼI HATATOU NOFO ʼALAʼALA ʼI TE ʼU TEMI FAIGATAʼA

14. ʼI te ʼu temi faigataʼa, koteā te agamāhani ʼe tonu ke tou tekeʼi, pea koteā tona tupuʼaga?

¹⁴ Ohagē ko te faʼahi kua tou vakaʼi, ko ʼihi fakalotomālohi ʼa Sesu ke tou nofo ʼalaʼala, neʼe ina fai ʼi te temi ʼaē neʼe felāveʼi ai mo te ʼu faigataʼa kovi. (Lau ia Maleko 14:37.) Kā tou tau mo ni faigataʼaʼia, ʼe ʼaoga tāfito kiā tātou ia tana faʼifaʼitaki. Kā hoko he ʼahiʼahi, ʼe tau galoʼi e te tokolahi ia te moʼoni maʼuhiga ʼaenī ʼe talanoa tuʼa lua kiai te tohi ʼo Taaga Lea: “E feala ke totonu he ala kia mata o he tagata, kae ko tona ikuaga ko te ala o te mate.” (Taag. 14:12; 16:25) Kapau ʼe tou falala pē ki tatatou ʼu manatu, tāfito lā mokā tou tau mo he ʼu fihifihia lahi, ʼe mahino ia ʼe tou tuʼutāmaki anai ʼo fēia mo nātou ʼaē ʼe tou ʼoʼofa ai.

15. Koteā ʼaē ʼe lagi fia fakahoko e he pule fāmili ʼi te ʼu temi faigataʼa fakaekonomika?

¹⁵ Ohagē lā, ʼe lagi gāue kinakina he pule fāmili moʼo foaki te ʼu meʼa ʼaē ʼe ʼaoga ʼi te faʼahi fakasino “kia natou o tona api.” (1 Tim. 5:8) ʼE lagi ina fia fakahoko he gāue kae ʼe mole ina maʼu ai anai hona temi ke kau ki te ʼu fono Fakakilisitiano, peʼe ki te fakahoko ʼo te tauhi fakafāmili, peʼe ki tana kau ki te minisitelio. Kapau ʼe falala pē ia ki te ʼu manatu fakatagata, pea ko te ʼaluʼaga ʼaia ʼe hagē anai kiā ia ʼe matatonu, peʼe lagi totonu. Kae ʼe feala ia ke iku ki te mahaki peʼe ki te mate ʼi te faʼahi fakalaumālie. Koia ʼaē ʼe lelei age ai te muliʼi te tokoni ʼaē ʼe tuʼu iā Taaga Lea 3:5, 6! Neʼe ʼui fēnei e Salomone: “Falala ki te Eteleno i tou loto katoa, kae aua naa ke falala ki tou poto. Ke ke falala kia ia i ou ala fuli, pea e ina fakatokatoka anai ou ala.”

16. (a) Koteā te faʼifaʼitaki neʼe tuku mai e Sesu ʼo ʼuhiga mo tana falala ki te poto ʼo Sehova ʼi hana falala ki tona poto ʼo ia totonu? (b) ʼE faʼifaʼitakiʼi feafeaʼi e te kau pule fāmili ia Sesu ʼi tana falala ʼaē kiā Sehova ʼi te ʼu temi faigataʼa?

¹⁶ ʼI te temi ʼaē neʼe felāveʼi ai ia Sesu mo te ʼahiʼahi, neʼe mole falala ia ki tona ʼatamai totonu. Kotou fakakaukauʼi age muʼa te faʼahi ʼaia! Ko te tagata poto tokotahi ʼaia ʼi te ʼu temi fuli ʼi te kele neʼe mole ina filifili ke falala ki tona poto totonu. Ohagē lā, ʼi te temi ʼaē neʼe fakahalaʼi ai ia ia e Satana, neʼe tali liuliuga Sesu ʼaki te kupusiga palalau ʼaenī: “E tuu i te tohi.” (Mat. 4:4, 7, 10) Neʼe falala ia ki te poto ʼo tana Tamai moʼo teteke ʼaki te fakahala, ʼo ina fakahā te agavaivai, ʼaē ʼe mole maʼu pea mo fehiʼa kiai ia Satana. ʼE tou hagē koa ko Sesu? Ko he pule fāmili ʼe ina faʼifaʼitakiʼi te nofo ʼalaʼala ʼa Sesu ʼe ina tuku anai ke takitaki tona maʼuli e te Folafola ʼa te ʼAtua, tāfito ʼi te ʼu temi faigataʼa. ʼI te mālamanei kātoa, ko te toko lauʼi afe pule fāmili ʼe natou fakahoko te faʼahi ʼaia. ʼE natou fakamuʼamuʼa ʼi tonatou maʼuli te Puleʼaga ʼo te ʼAtua mo te tauhi maʼa, māʼia pē lā mo te ʼu tuʼania ʼi te faʼahi fakasino ʼe tuʼulaga lua. ʼAki tanatou fai te faʼahi ʼaia, ʼe natou tōkakaga lelei ai ki ʼonatou fāmili. ʼE tapuakiʼi e Sehova tanatou ʼu faiga ʼo ina foaki te ʼu koga ʼaē ʼe ʼaoga kiā nātou ʼi te faʼahi fakasino, ohagē pē ko tona fakapapau mai ʼi tana Folafola.—Mat. 6:33.

17. Koteā ʼaē ʼe ina uga koutou ke kotou faʼifaʼitakiʼi ia te nofo ʼalaʼala ʼa Sesu?

¹⁷ ʼE tou ʼiloʼi papau neʼe tuku mai e Sesu te faʼifaʼitaki lelei pē e tahi ʼo ʼuhiga mo te nofo ʼalaʼala. Ko tana faʼifaʼitaki ʼe ʼaoga mo fua lelei pea ʼe feala ke tou maʼu ai te maʼuli. Kotou manatuʼi, ʼe loto e Satana ke ina taki māmālie koutou ke kotou māʼumoea ʼi te faʼahi fakalaumālie—ke kotou vaivavai ʼi te tui, ke kotou fakaʼauʼauganoa ʼi te tauhi, pea ke ina maumauʼi takotou agatonu. (1 Tes. 5:6) ʼAua naʼa kotou tuku ia ia ke mālo! Kotou haga nofo ʼalaʼala ohagē ko tona fai e Sesu—ʼo kotou nofo ʼalaʼala ʼi te faikole, mo takotou minisitelio, pea mo te ʼu temi faigataʼa. Kā kotou fai fēia, pea ʼe kotou maʼu ai anai he maʼuli tapuakina mo fiafia pea mo fīmālie māʼia ʼi te fakaʼosi ʼo te tuʼu ʼo te ʼu faʼahiga meʼa ʼaenī. Pea kapau ʼe kotou nofo ʼalaʼala, ko Sesu ʼe ina maʼu mai anai takotou nofo tokaga pea mo maʼumaʼua ʼi te fakahoko ʼo te finegalo ʼo tana Tamai, ʼi te temi ʼaē kā liliu mai anai ʼo fakaʼauha te tuʼu ʼaenī. ʼE fiafia lahi anai Sehova ʼi te fakapale ʼo koutou ʼuhi ko takotou nofo agatonu!—Apk. 16:15.

[Paki ʼo te pāsina 16]

Neʼe fai fakamafola ia Sesu ki te fafine ʼi te vai keli. Koteā te ʼu faigamālie ʼe kotou maʼu ke kotou fai fakamafola ai ʼi te ʼaho fuli?

[Paki ʼo te pāsina 17]

Ko takotou tokaga ki te lelei ʼo te maʼuli fakalaumālie ʼo tokotou fāmili ʼe ina fakahā ai takotou nofo ʼalaʼala