Kua Koutou Tokalelei Koa Ki Te Hāofaki?
“Hū ki te aleka, ia koe pea mo tou loto fale kātoa, heʼe ko koe pe ʼi te taʼiake ʼaenī neʼe au sio ʼe faitotonu ʼi ʼoku muʼa.”—Senesi 7:1.
1. Ko te fakatuʼutuʼu fea ʼaē neʼe fai e Sehova ʼi te temi ʼo Noe moʼo hāofaki ia te hahaʼi?
ʼI TE temi ʼo Noe neʼe “fakatō [e Sehova] te tulivio ki te mālama agahala,” kae neʼe ʼi ai te fakatuʼutuʼu neʼe Ina fai moʼo hāofaki ia te hahaʼi. (2 Petelo 2:5, MN ) Ko te ʼAtua moʼoni neʼe ina foaki ki te tagata agatonu ko Noe, ia te ʼu fakatotonu moʼo faʼu te aleka ʼaē ka ina hāofaki anai te hahaʼi ʼi te tulivio. (Senesi 6:14-16) Ohage pe ko te ʼu kaugana agatonu fuli ʼa Sehova ʼaē ʼe fakalogo kiā te ia, “neʼe fai e Noe ia meʼa fuli, ʼo mulimuli pe ki te ʼu meʼa ʼaē neʼe fakatotonuʼi age e te ʼAtua.” Ei “neʼe ina fai ʼo mulimuli pe kiai.” ʼE feala pe ke tou ʼui, ʼe kei tou māʼuʼuli ʼi te temi nei ʼuhi ko te fakalogo ʼa Noe.—Senesi 6:22.
2, 3. (a) Neʼe tali feafeaʼi ia te gāue ʼa Noe e te hahaʼi? (b) Neʼe fakahā feafeaʼi e Noe tana falala ʼi tana hū ki te aleka?
2 Neʼe mole ko he kihiʼi gāue te faʼu ʼo te aleka. ʼE mahino ia neʼe punamaʼuli te hahaʼi tokolahi ki te gāue ʼaē neʼe fai e Noe pea mo tona famili. Kae neʼe mole heʼeki faka tui nātou ʼe fakalogo tonatou maʼuli ki tanatou hū ki te aleka. Ki muli age, neʼe fakaʼauha leva e te ʼAtua ia te mālama agakovi ʼaia heʼe kua ina faka tuʼakoi ia tana faʼa kātaki.—Senesi 6:3; 1 Petelo 3:20.
3 Hili te ʼu taʼu ki te gāue kinakina ʼa Noe pea mo tona famili, pea ʼui age e Sehova kiā Noe: “Hū ki te aleka, ia koe pea mo tou loto fale kātoa, heʼe ko koe pe ʼi te taʼiake ʼaenī neʼe au sio ʼe faitotonu ʼi ʼoku muʼa.” Neʼe tui ia Noe kiā Sehova pea mo falala ki tana folafola, koia “neʼe hū Noe ki loto, pea neʼe hū mo ia [ki te loto aleka] ia tona ʼu foha, tona ʼohoana pea mo te ʼu ʼohoana ʼo tona ʼu foha.” Pea ko Sehova ʼaē neʼe ina pupunu te matapā ʼo te aleka moʼo puipui tana ʼu kaugana. ʼI te tō ʼo te Tulivio ki te kele, neʼe liliu moʼoni ia te aleka ko he puipuiʼaga neʼe fakatuʼutuʼu e te ʼAtua moʼo hāofaki ia te hahaʼi fakalogo.—Senesi 7:1, 7, 10, 16.
ʼE Hage Totatou Temi Ko Te Temi ʼo Noe
4, 5. (a) Neʼe fakatatau kiteā e Sesu te temi ʼo tana ʼi henī? (b) Ko te ʼu faʼahi fea ʼaē ʼe tatau ai totatou temi pea mo te temi ʼo Noe?
4 “Ohage pe ko te ʼu ʼaho ʼaē ʼo Noe, ʼe toe feiā pe anai mo te ʼi henī ʼa te Foha ʼo te tagata.” (Mateo 24:37, MN ) ʼI te ʼu palalau ʼaia ʼa Sesu, neʼe ina fia fakahā ko tana ʼi henī fakapulipuli ʼe hage anai ko te temi ʼo Noe, pea neʼe moʼoni te faʼahi ʼaia. Tāfito la talu mai te taʼu 1919, neʼe tala ki te hahaʼi ʼo te ʼatu ʼu puleʼaga ia te ʼu fakatokaga ohage pe ko te fai ʼaē ʼa Noe. Pea ko te hahaʼi, neʼe hage pe tanatou aga ko te hahaʼi ʼo te temi ʼo Noe.
5 ʼAki te Tulivio, neʼe fakaʼauha e Sehova ia te mālama “kua fonu ʼi te agamālohi.” (Senesi 6:13) Neʼe sio fuli te hahaʼi ko Noe pea mo tona famili neʼe mole nātou lagolago ki te ʼu agamālohi ʼaia kae neʼe nātou māʼuʼuli ʼi te tokalelei ʼo faʼu ia te aleka. ʼE toe hoko mo te ʼaluʼaga feiā ʼi totatou temi. Ko te hahaʼi tauhi fakamalotoloto ki te ʼAtua ʼo te temi nei ʼe nātou lava “sisio . . . ki te kehekehe ʼo te tagata faitotonu pea mo te tagata agakovi, te kehekehe ʼo te tagata ʼaē ʼe kaugana ki te ʼAtua pea mo te tagata ʼaē ʼe mole kaugana kiā te ia.” (Malakia 3:18) Ko te hahaʼi ʼaē ʼe mole fakapalatahi, ʼe nātou vikiʼi te kau Fakamoʼoni ʼa Sehova ʼo ʼuhiga mo tanatou agatonu, mo tanatou agalelei, mo tanatou maʼuli tokalelei, pea mo tanatou faʼa gāue, pea mo fakamoʼoni ko te ʼu kalitātē ʼaia ʼe nātou fakakehekeheʼi ia te ʼu kaugana ʼa te ʼAtua mo te hahaʼi ʼo te mālama. ʼE fakafeagai te kau Fakamoʼoni ki te ʼu agamālohi fuli, pea ʼe nātou tuku ke takitaki nātou e te laumālie ʼo Sehova. Ko te tupuʼaga ʼaia ʼo tanatou māʼuʼuli ʼi te tokalelei pea mo māʼuʼuli ʼi te faitotonu.—Isaia 60:17.
6, 7. (a) Koteā ʼaē neʼe mole mahino kiai te hahaʼi ʼo te temi ʼo Noe, pea ko te ʼu faʼahi fea ʼaē ʼe tatau ai mo totatou temi? (b) Ko te ʼu faʼifaʼitaki fea ʼaē ʼe hā ai kua ʼiloʼi e te hahaʼi ko te kau Fakamoʼoni ʼa Sehova ʼe mole nātou tatau mo te ʼu lotu fuli?
6 Neʼe mole mahino ki te hahaʼi ʼo te temi ʼo Noe, ko te ʼAtua neʼe tokoni kiā Noe pea mo ina takitaki ia ia. Koia neʼe mole nātou tokagaʼi ai tana fai faka mafola pea mole nātou fakalogo ki te ʼu fakatokaga ʼaē neʼe ina tala. E feafeaʼi ki totatou temi? Logola te leleiʼia e te hahaʼi ia te gāue pea mo te aga ʼa te kau Fakamoʼoni ʼa Sehova, kae tokolahi ia nātou ʼe mole nātou tali te logo lelei pea mo te ʼu fakatokaga faka Tohi-Tapu. ʼE lagi ko he ʼu vāhaʼa fale, ko he ʼu patolo peʼe ko he ʼu kāiga ʼe nātou vikiʼi te ʼu kalitātē ʼa te kau Kilisitiano moʼoni, kae ʼe nātou ʼui ki muli age, “Kana neʼe mole ko he kau Fakamoʼoni la ʼa Sehova!” Ko te meʼa ʼaē ʼe mole mahino ki te hahaʼi ʼaia, kapau ʼe maʼuliʼi e te kau Fakamoʼoni te ʼu kalitātē ohage ko te ʼofa, te tokalelei, te agalelei, te agaʼofa, te agamālū, pea mo te loto lolomi, ʼuhi heʼe ko te laumālie maʼoniʼoni ʼo te ʼAtua ʼaē ʼe tokoni kiā nātou. (Kalate 5:22-25) ʼE ko he tahi faʼahi ʼaia, ʼe feala ke ina uga te hahaʼi ke nātou fia logo ki te logo lelei.
7 Ohage la ʼi Lusia, neʼe laga e te kau Fakamoʼoni ʼa Sehova ia te Fale ʼo Te Puleʼaga. Ko te tagata neʼe tuʼu ʼo palalau ki te tēhina ʼi te kau gāue, pea neʼe ina ʼui fēnei: “Ko te aga ʼa te kau gāue ʼe mole tatau mo te kau gāue ʼa ʼihi fale gāue—ʼe mole he tahi ʼe suluka, mo lea kovi, ko te hahaʼi fuli ʼe aga fakapotopoto! Ko koe la ko he Fakamoʼoni ʼa Sehova?” Pea tali age e te tēhina: “ ʼE ke faka tui anai mo kapau ʼe au ʼui atu ʼe mole ko au ko he Fakamoʼoni ʼa Sehova?” Pea neʼe tali atu aipe e te tagata: “Kailoa, ʼe mole au tui anai.” ʼI te tahi kolo ʼi Lusia, neʼe punamaʼuli ʼaupito ia te pule kolo ʼi tana sio ki te laga e te kau Fakamoʼoni tonatou Fale foʼou ʼo Te Puleʼaga. Neʼe ina ʼui, maʼa ia ʼe tatau te ʼu lotu fuli, kae ʼi tana sio leva ki te gāue fakamalotoloto ʼa te kau Fakamoʼoni ʼa Sehova, neʼe mahino ai leva ʼe kehe ʼosi pe nātou. ʼE ko he ʼu faʼifaʼitaki pe ʼaia e lua moʼo fakahā mai ko te ʼu kaugana ʼa Sehova ʼe nātou kehekehe mo te hahaʼi ʼaē ʼe mole nātou maʼuliʼi te ʼu lēkula ʼo te Tohi-Tapu.
8. Kapau ʼe tou fia hāo ʼi te fakaʼauha ʼo te tuʼu agakovi ʼaenī, koteā ʼaē ʼe tonu ke tou fai?
8 Lolotoga te koga fakaʼosi ʼo te “mālama ʼāfea” ʼaē neʼe fakaʼauha ʼi te Tulivio, ko Noe neʼe ko te “tagata fai faka mafola faitotonu.” (2 Petelo 2:5, MN ) ʼI te ʼu ʼaho fakamuli ʼo te tuʼu ʼo te ʼu faʼahiga meʼa ʼaenī, ʼe tala e te kau Fakamoʼoni ʼa Sehova ia te ʼu lēkula faitotonu ʼa te ʼAtua pea mo te logo lelei ʼo ʼuhiga mo te fealagia ʼaē ke hāofaki te hahaʼi ke nātou māʼuʼuli ʼi te mālama foʼou. (2 Petelo 3:9-13) Ohage pe ko te hāofaki ʼaē e te aleka ia Noe pea mo tona famili ʼaē neʼe manavasiʼi ki te ʼAtua, ʼe fakalogo te hāofaki ʼo te hahaʼi ʼo te temi nei, ki tanatou tui pea mo tanatou lagolago agatonu ki te kautahi ʼa Sehova ʼaē ʼe tuʼu ʼi te kele.
ʼE Tonu Ke Tou Tui Mo Kapau ʼe Tou Fia Hāo
9, 10. He koʼe ʼe maʼuhiga te tui mo kapau ʼe tou fia hāo mai te fakaʼauha ʼo te tuʼu ʼo te ʼu faʼahiga meʼa ʼaenī ʼa Satana?
9 Koteā ʼaē ʼe tonu ke fai e he tahi ke feala hana hāo ʼi te fakaʼauha ʼo te mālama ʼaenī ʼe takoto ʼi te mālohi ʼa Satana? (1 Soane 5:19) ʼE tonu muʼa ke mahino ʼe ʼaoga ke puipui ia ia. Pea hoki ina maʼu leva ia te puipui ʼaia. ʼI te temi ʼo Noe, ko te hahaʼi neʼe nātou tōkakaga pe ki tanatou ʼu gāue ʼaē ʼi te ʼaho fuli pea maʼa nātou neʼe mole ʼaoga ke puipui nātou mai he tuʼutāmaki fakamataku. Neʼe ʼi ai te tahi meʼa neʼe mole nātou mahino kiai, neʼe tonu ke nātou tui ki te ʼAtua.
10 Kae kiā Noe pea mo tona famili neʼe mahino kiā nātou, ʼe ʼaoga ke puipui pea mo hāofaki nātou. Neʼe nātou tui ki te Tuʼi ʼAliki ko Sehova ʼAtua. Neʼe tohi fēnei e te ʼapositolo ko Paulo: “Kapau ʼe mole [ia kita] te tui, pea ʼe molemo feala ke kita lelei kiā [Sehova], heʼe ko ʼaē ʼe fakaōvi ki te ʼAtua ʼe tonu ke tui ko ia pea ʼe ko ia ʼaē ʼe ina fakapale ia nātou ʼaē ʼe nātou kumi moʼoni ia ia.” Pea toe ʼui e Paulo: “ ʼAki te tui, ko Noe, ʼaē neʼe fakahā age ki ai e te ʼAtua te ʼu meʼa ʼaē neʼe mole heʼeki hā, neʼe ina fakahā tana manavasiʼi fakaʼatua ʼo ina faʼu te aleka moʼo hāofaki ai tona loto fale; pea ʼaki te tui ʼaia neʼe ina tauteaʼi te malamanei, pea neʼe liliu ko he tagata ʼe ina maʼu te tofiʼa ʼo te faitotonu ʼuhi ko te tui.”—Hepeleo 11:6, 7, MN.
11. Koteā te ako ʼe tou maʼu mai te fakatuʼutuʼu ʼaē neʼe fai e Sehova ʼi te temi ʼo te kau Iselaele moʼo puipui ia nātou?
11 Kapau ʼe tou fia hāo mai te fakaʼauha ʼo te tuʼu agakovi ʼaenī, ʼe mole tonu pe ke tou tui ʼe fakaʼauha anai ia te mālama ʼaenī, kae ʼe tonu ke tou tui ki te ʼu fakatuʼutuʼu ʼaē neʼe fai e te ʼAtua moʼo hāofaki tatou pea mo tou fakaʼaogaʼi lelei ia te ʼu fakatuʼutuʼu ʼaia. ʼE ʼaoga anai ke tou tui mālohi ki te sākilifisio faitotogi ʼa Sesu Kilisito, ia te ʼAlo ʼo te ʼAtua. (Soane 3:16, 36) Kae tou manatuʼi, neʼe ko nātou pe ʼaē neʼe hū ki te aleka ʼaē neʼe hāo ʼi te Tulivio. ʼO toe feiā ki te ʼu kolo ʼo te hāofaki ʼi te Iselaele ʼāfea, kapau neʼe hola kiai he tagata neʼe ina matehi he tahi kae neʼe faihala, neʼe ina maʼu ai te puipui pea neʼe tonu ke nofo ʼi te kolo ʼaia ʼo aʼu ki te mate ʼa te pelepitelo lahi. (Faka au 35:11-32) ʼI te hogofulu tautea ʼaē neʼe tō ki Esipito ʼi te temi ʼo Moisese, neʼe mamate ai te ʼu ʼuluaki foha ʼa te kau Esipito, kae neʼe hāo te ʼu ʼuluaki foha ʼa te kau Iselaele. Koteā tona tupuʼaga? ʼI muʼa ʼo te Pāsikate, neʼe fakatotonu fēnei age e Sehova kiā Moisese: “ ʼE tonu [ki te kau Iselaele] ke nātou toʼo he vaega toto [ʼo te akeno ʼo te Pāsikate] pea nātou vali ki te ʼu kaumatapā pea mo te ʼu fuga matapā ʼo te ʼu ʼapi ʼaē ka kai ai anai [te akeno]. . . . Pea ʼe mole tonu ki he tahi iā koutou ke hū ki tuʼa ʼi te hūʼaga ʼo tona ʼapi ʼo aʼu ki te uhu.” (Ekesote 12:7, 22) Neʼe ʼi ai koa he ʼuluaki foha ʼa te kau Iselaele neʼe fia talagataʼa ki te ʼu fakatotonu ʼaia ʼa te ʼAtua, ʼo hū ki tuʼa mai te ʼapi ʼaē neʼe vali ʼaki te toto ʼo te akeno ia te ʼu kaumatapā pea mo te ʼu fuga matapā?
12. Ko te fehuʼi fea ʼaē ʼe tonu ke tou fai takitokotahi, pea koteā tona tupuʼaga?
12 Koia, ʼe ʼaoga ai ke tou fakakaukauʼi fakalelei peʼe feafeaʼi totatou maʼuli takitokotahi ʼi te temi nei. ʼE tou nonofo nei koa ʼi loto ʼo te fakatuʼutuʼu ʼaē neʼe fai e Sehova moʼo puipui ia te maʼuli fakalaumālie ʼo tana hahaʼi? Ka hoko mai anai te mamahi lahi, ko nātou ʼaē neʼe nātou kumi ia te puipui ʼaia ʼe nātou fetāgihi anai ʼi te loto fiafia pea mo loto fakafetaʼi ʼaupito. Kae ko ʼihi, ʼe nātou fetāgihi anai ʼuhi heʼe nātou lotomamahi pea mo fakahemala.
Ko Te ʼu Fetogi ʼAē ʼe Fai e Te Kautahi Moʼo Teuteuʼi ʼo Tatou Ki Te Hāofaki
13. (a) He koʼe neʼe ʼaoga ke fai he ʼu fetogi ʼi te kautahi? (b) Koutou fakamahino he ʼu fetogi neʼe fai.
13 Ko Sehova ʼaki tana kautahi ʼaē ʼi te kele, ʼe ina fai māmālie te ʼu fetogi. Pea neʼe fai te ʼu fetogi ʼaia moʼo fakamataleleiʼi, mo fakatuʼu maʼu, pea mo fakamālohiʼi ʼo tana fakatuʼutuʼu ʼaē moʼo puipui ʼo tatou ʼi te faʼahi fakalaumālie. Mai te taʼu 1870 ki te taʼu 1932, ko ʼihi tēhina ʼo te kokelekasio neʼe nātou vote moʼo fakanofo te ʼu tagata ʼāfea pea mo te ʼu tiakono. ʼI te taʼu 1932, ko te ʼu tagata ʼāfea ʼaē neʼe voteʼi ke fakanofo, neʼe fetogi e te komite gāue neʼe voteʼi e te kokelekasio moʼo lagolago ki te tēhina takitaki ʼaē neʼe fakanofo ki te gāue. ʼI te lolotoga ʼo te taʼu 1938, neʼe fai te ʼu fetogi ke filifili faka teokalatike ia te ʼu tagata faifekau fuli ʼi te kokelekasio. Talu mai te taʼu 1972, ʼaki te takitaki ʼa te Kolesi Pule ʼa te kau Fakamoʼoni ʼa Sehova, ʼe fakahāhā ki te filiale ia te ʼu tēhina ʼaē ʼe filifili, pea kapau ʼe tali ia te ʼu tēhina ʼaia, pea ʼe momoli ki te ʼu kokelekasio te ʼu tohi moʼo fakahā te filifili faka teokalatike ʼa te ʼu tagata taupau pea mo te ʼu tagata faifekau faka minisitelio. Lolotoga te ʼu taʼu, kua toe lahi age ia te gāue ʼaē ʼe fai e te Kolesi Pule, pea neʼe ina fai te ʼu fetogi moʼo faka faigafua tana gāue.
14. Koteā te polokalama ako ʼaē neʼe kamata ʼi te taʼu 1959?
14 ʼI te taʼu 1950, ʼi te toe vakavakaʼi fakalelei ʼo te koga tohi ʼo Pesalemo 45:16, neʼe fakatuʼu ai leva te polokalama ako. ʼE ʼui fēnei ʼi te koga tohi ʼaia: “ ʼE fetogi anai tau ʼu kui e tou ʼu foha, ʼaē ka ke fakanofo anai ko te ʼu tama ʼaliki ʼi te kele kātoa.” Ko te ʼu tagata ʼāfea ʼaē ʼe gāue nei ʼi te ʼu kokelekasio, neʼe akoʼi nātou moʼo fai ia te ʼu gāue faka teokalatike ʼi te temi nei pea ʼi te hili ʼo Halamaketone. (Apokalipesi 16:14, 16) ʼI te taʼu 1959, neʼe kamata ai te Ako ʼo Te Minisitelio ʼo Te Puleʼaga. ʼI te temi ʼaia, lolotoga te māhina kātoa, neʼe ʼi ai te ako neʼe fai ki te ʼu tagata faifekau ʼo te ʼu kokelekasio, neʼe ko te higoa ʼāfea ʼaia ʼo te ʼu taupau pelesita. Ko te ako ʼaia ʼi te temi nei, kua fakakau kiai ia te kau taupau fuli pea mo te ʼu tagata faifekau fuli faka minisitelio. ʼOsi ʼaia, pea ko te ʼu tēhina ʼaia, ʼe ko nātou ʼaē ʼe nātou akoako te kau Fakamoʼoni ʼa Sehova fuli ʼaē ʼe kau ʼi tanatou ʼu kokelekasio. Koia, ko te kokelekasio kātoa ʼe fakaloto mālohiʼi ʼi te faʼahi fakalaumālie pea mo tokoniʼi ke nātou faiva ʼi tanatou minisitelio, ʼi tonatou ʼuhiga kau fai faka mafola ʼo te logo lelei ʼo te Puleʼaga.—Maleko 13:10.
15. Ko te ʼu faʼahi fea e lua ʼaē ʼe puipui ai te kokelekasio faka Kilisitiano ke maʼa ʼi te faʼahi fakalaumālie?
15 ʼE tonu ki te hahaʼi ʼaē ʼe fia kau ki te kokelekasio faka Kilisitiano ke nātou mulimuli ki te ʼu lēkula. Heʼe mole feala ki te hahaʼi vāvā ʼo totatou temi ke nātou kau ki te kokelekasio, ohage pe ko te hahaʼi ʼaē neʼe mole fakagafua ke hū ki te aleka ʼo Noe. (2 Petelo 3:3-7) Tāfito talu mai te taʼu 1952, ko te kau Fakamoʼoni ʼa Sehova neʼe nātou lagolago lelei ki te ʼu fakamahinohino ʼaē neʼe fai moʼo puipui ia te kokelekasio—ʼaē ko te fakamavae ʼo te kau agahala ʼaē ʼe mole fakahemala. Ko nātou ʼaē ʼe fakahemala moʼoni ʼe nātou maʼu ia te tokoni ʼofa moʼo ‘fakatonutonuʼi tonatou ʼu ala.’—Hepeleo 12:12, 13; Tāʼaga Lea 28:13; Kalate 6:1.
16. E feafeaʼi te maʼuli fakalaumālie ʼa te ʼu kaugana ʼa Sehova?
16 ʼE mole tou punamaʼuli ʼi te tuputupu ʼa te ʼu kaugana ʼa Sehova ʼi te faʼahi fakalaumālie. He neʼe ʼui fēnei e Sehova ʼaki te polofeta ko Isaia: “Koʼeni! ko ʼaku tagata kaugana ʼe kakai anai, kae ko koutou ʼe koutou pākupapaku anai. Koʼeni! ko ʼaku tagata kaugana ʼe ʼiʼinu anai, kae ko koutou ʼe koutou fia ʼiʼinu anai. Koʼeni! ko ʼaku tagata kaugana ʼe nātou fiafia anai, kae ko koutou, ʼe koutou ufiufi anai. Koʼeni! ko ʼaku tagata kaugana ʼe nātou kalaga fakafiafia anai, heʼe lelei tonatou loto, kae ko koutou ʼe koutou kalaga anai, heʼe mamahi tokotou loto, pea ʼe koutou kekē anai, ʼuhi ko te mamahi ʼo te ʼatamai.” (Isaia 65:13, 14) Ko Sehova ʼe kei ina foaki mai kiā tatou te ʼu tuʼuga meʼa kai ʼi tona temi totonu pea mo te meʼa kai fakalaumālie lelei ʼaē ʼe ina fakamālohiʼi tatou ʼi te faʼahi fakalaumālie.—Mateo 24:45.
Tou Nonofo Tōkakaga Ke Hāofaki Tatou
17. Koteā ʼaē ka tokoni mai kiā tatou ke tou tokalelei ki te hāofaki?
17 ʼE maʼuhiga ʼi te temi nei ke tou “fetokagaʼaki [ʼo] uga ia tatou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, ohage ko te agamāhani ʼa ʼihi, kae ke tou fefakaloto mālohiʼaki.” (Hepeleo 10:23-25, MN ) Ka tou lagolago pea mo gāue mālohi mo he kokelekasio ʼi te ʼu kokelekasio e 98 000 ʼa te kau Fakamoʼoni ʼa Sehova, pea ʼe feala anai hatatou hāo ʼi te fakaʼauha. ʼE tokoni mai anai totatou ʼu tēhina mo tuagaʼane fonu ʼi te ʼofa, ke tou kofuʼi “te ʼulugaaga foʼou” pea mo tou tōkakaga ʼaki he loto kātoa ʼo tokoni ki te hahaʼi ke nātou mahino ki te fakatuʼutuʼu ʼa Sehova ʼo ʼuhiga mo te maʼuli.—Efeso 4:22-24, MN; Kolose 3:9, 10; 1 Timoteo 4:16.
18. He koʼe ʼe koutou lotomālohi ke koutou pipiki maʼu ki te kokelekasio faka Kilisitiano?
18 ʼE faiga mālohi ia Satana pea mo tana mālama ke tou mavae mai te kokelekasio faka Kilisitiano. Kae ʼe tou lava nonofo ʼi te loto kokelekasio pea mo hāo ʼi te fakaʼauha ʼo te mālama agakovi ʼaenī. ʼOfa pe ki totatou ʼofa ʼaē kiā Sehova pea mo totatou loto fakafetaʼi ʼaē ki tana ʼu fakatuʼutuʼu ʼofa, ke ina uga tatou ke tou tekeʼi te ʼu fai fakahala ʼa Satana. Pea ka tou fakakaukauʼi te ʼu tapuakina ʼaē ʼe tou maʼu ʼi te temi nei, ʼe tou lotomālohi ke tou fakafeagai kiā Satana. ʼE tou vakaʼi anai te tahi ʼu tapuakina ʼi te alatike ʼaē ka hoa mai.
Koteā Takotou ʼu Tali?
• Ko te ʼu faʼahi fea ʼaē ʼe tatau ai totatou temi pea mo te temi ʼo Noe?
• Ko te kalitātē fea ʼaē ʼe maʼuhiga moʼo hāofaki totatou maʼuli?
• Koteā te ʼu fetogi neʼe fai māmālie moʼo lagolago ki te fakatuʼutuʼu ʼa te ʼAtua moʼo puipui ʼo tatou?
• Koteā ʼaē ʼe tonu ke tou fai moʼo teuteuʼi ʼo tatou ke tou hāo ʼi te fakaʼauha?
[Paki ʼo te pasina 4]
Ko te hahaʼi ʼo te temi ʼo Noe, neʼe mole nātou tokagaʼi ia ia
[Paki ʼo te pasina 5]
ʼE tonu ke tou tokagaʼi te ʼu fakatokaga ʼa te ʼAtua
[Paki ʼo te pasina 6]
He koʼe neʼe fakatuʼutuʼu ia te Ako ʼo Te Minisitelio ʼo Te Puleʼaga?
[Paki ʼo te pasina 7]
ʼE maʼuhiga ʼi te temi nei ke tou kau ki te kokelekasio faka Kilisitiano