“Pe Ko Ai Anai Te Tagata Faifekau Agatonu Mo Poto?”

1, 2. Ko ai ʼae ʼe fakaʼaogaʼi e Sesu moʼo fafaga ʼo tatou ia ʼaho nei, pea he ko ʼe ʼe maʼuhiga ke tou iloʼi pe ko ai te tagata faifekau agatonu ʼaia?

MOʼO fakaha tana loto fakafetaʼi ki te ʼu tehina ʼae ʼe gaue ʼi ʼatatou pilo lalahi, neʼe tohi fenei e te tuagaʼane: “ ʼE mole feala haku lau ia te ʼu lakaga fuli ʼae neʼe kotou foaki mai ai he ʼu alatike neʼe ʼaoga kia au ʼi tona temi totonu.” Neʼe kua kotou hage koa ko te tuagaʼane ʼaeni? ʼE mahino ia tokolahi ia tatou. ʼE tonu koa ke tou punamaʼuli ki ai? Kailoa ia.

² Ko tatatou maʼu te meʼa kai fakalaumalie ʼi tona temi totonu ʼe fakamoʼoni ai ko Sesu, te Pule ʼo te kokelekasio, ʼe ina fakahoko tana fakapapau ʼae ke ina fafaga tatou. Ko ai ʼae ʼe ina fakaʼaogaʼi moʼo fakahoko te faʼahi ʼaia? ʼI tana talanoa ki te fakaʼiloga ʼo tana ʼi heni, neʼe ui e Sesu ʼe ina fakaʼaogaʼi anai “te tagata faifekau agatonu mo poto” moʼo foaki “te meakai i tona temi totonu” ki tana hahaʼi.a (Lau ia Mateo 24:45-47.) ʼE fakaʼaogaʼi e Sesu te tagata faifekau agatonu ʼaia moʼo fafaga ʼana kau tisipulo moʼoni ʼi te temi ʼaeni ʼo te fakaʼosi. ʼE maʼuhiga ke tou iloʼi pe ko ai te tagata faifekau agatonu ʼaia. Koteʼuhi ʼe fakalogo ki ai totatou maʼuli fakalaumalie pea mo ʼatatou felogoʼi mo te ʼAtua.—Mat. 4:4; Soa. 17:3.

3. Neʼe fakamahino feafeaʼi ʼi ʼatatou tohi te lea fakatata ʼo te tagata faifekau agatonu?

³ ʼE tonu ke feafeaʼi tatatou mahino ki te lea fakatata ʼa Sesu ʼo ʼuhiga mo te tagata faifekau agatonu? ʼI muʼa atu, neʼe fakamahino fenei ʼi ʼatatou tohi: ʼI te Penikosite ʼo te taʼu 33 H.T.S., neʼe fakanofo e Sesu te tagata faifekau agatonu ki tana hahaʼi. Ko te tagata faifekau ʼe ina fakata te kau Kilisitiano fakanofo fuli ʼi te kele, ʼi he temi pe, talu mai te taʼu ʼaia. Ko te hahaʼi ʼo te tagata pule ʼe natou fakata te kau Kilisitiano fakanofo ʼaia takitokotahi. ʼI te taʼu 1919, neʼe fakanofo e Sesu te tagata faifekau ʼaia ki “ona koloa fuli,” ʼae ʼe fakaʼuhiga ki ʼona koloa fuli ʼo te Puleʼaga ʼae ʼi te kele. Kaʼe ʼi tatatou ako fakalelei pea mo metitasio ʼi te faikole, neʼe tou mahino ai ʼe ʼaoga ke fetogi tatatou mahino ki te ʼu palalau ʼa Sesu ʼo ʼuhiga mo te tagata faifekau agatonu mo poto. (Taag. 4:18) Tou vakaʼi te lea fakatata ʼaia pea mo tona pikipikiga mo tatou, peʼe tou ʼamanaki maʼuli ʼi selo peʼe ʼi te kele.

KO ʼANAFEA ʼAE NEʼE HOKO AI TE LEA FAKATATA ʼAIA?

4-6. He ko ʼe ʼe feala ke tou ui ko te lea fakatata ʼa Sesu ʼo ʼuhiga mo te tagata faifekau agatonu neʼe kamata hoko pe ia ʼi te kua ʼosi kamata ʼo te taʼu 1914?

⁴ Ko te tahi ʼu vaega ia Mateo kapite 24 ʼe fakaha ai ko te lea fakatata ʼo te tagata faifekau agatonu mo poto, neʼe mole kamata hoko ia ʼi te Penikosite ʼo te taʼu 33 H.T.S., kaʼe neʼe kamata hoko ia ʼi te temi ʼaeni ʼo te fakaʼosi. Tou vakaʼi te ʼu vaega Tohi-Tapu ʼe tokoni mai ke tou mahino ki te faʼahi ʼaia.

⁵ Ko te lea fakatata ʼo te tagata faifekau agatonu ʼe kau ki te lea fakapolofeta ʼa Sesu ʼo ʼuhiga mo “te fakailoga o [tana “ ʼi heni,” MN] pea mo te fakaosi o te malamanei.” (Mat. 24:3) Ko te ʼuluaki koga ʼo te lea fakapolofeta ʼaia, ʼae ʼe tuʼu ia Mateo 24:4-22, neʼe hoko ʼuluaki ʼi te taʼu 33 H.T.S. ki te taʼu 70 H.T.S., pea lua, ʼe hoko ia ʼaho nei, ʼi hona aluʼaga ʼe lahi age. Ko tona fakaʼuhiga koa ko te ʼu palalau ʼa Sesu ʼo ʼuhiga mo te tagata faifekau agatonu ʼe ʼi ai mo ʼona fakahoko ʼe lua? Kailoa.

⁶ ʼO kamata ia Mateo 24:29, neʼe talanoa tafitō Sesu ki ni aluʼaga ʼe hoko anai ʼi totatou temi. (Lau ia Mateo 24:30, 42, 44.) ʼO ʼuhiga mo te ʼu aluʼaga ka hoko lolotoga te mamahi lahi, neʼe ina ui ko te hahaʼi “e natou sio anai ki te Foha o te tagata e hau i te u ao o te lagi.” Pea ʼi te ʼu palalau neʼe ina fai kia natou ʼae ka maʼuʼuli ʼi te ʼu ʼaho fakamuli, neʼe ina uga natou ke natou nofo ʼalaʼala, ʼo ina ui fenei: “E mole kotou iloi pe ko te aho fea e hau ai anai tokotou Aliki” pea “e hau anai te Foha o te tagata i te hola ae e mole kotou talitali ki ai.”b ʼI te ʼosi talanoa ʼa Sesu ki te ʼu aluʼaga ka hoko ʼi te ʼu ʼaho fakamuli, neʼe ina oloi ki ai te lea fakatata ʼo te tagata faifekau agatonu. Koia, ʼe feala ke tou ui ai ko ʼana palalau ʼo ʼuhiga mo te tagata faifekau agatonu neʼe kamata hoko pe ia ʼi te kua ʼosi kamata ʼo te ʼu ʼaho fakamuli ʼi te taʼu 1914. ʼE ko he manatu fakapotopoto ia. Kotea tona tupuʼaga?

7. Kotea te fehuʼi maʼuhiga neʼe lagaʼi ʼi te kamata ʼo te temi ʼo te taʼukai, pea kotea tona tupuʼaga?

⁷ Kotou fakakaukauʼi te fehuʼi ʼaeni: “Pe ko ai anai te tagata faifekau agatonu mo poto?” ʼI te temi ʼo te kau apositolo, neʼe mole he tupuʼaga ke lagaʼi ai te fehuʼi ʼaia. Ohage ko tatatou vakaʼi ʼi te alatike kua ʼosi atu, neʼe feala ke fakahoko e te kau apositolo ni milakulo pea mo foaki te fealagia ʼaia ki ʼihi moʼo fakamoʼoni ko natou ʼae neʼe fakaʼaogaʼi e te ʼAtua. (Gaue 5:12) Koia, neʼe mole ʼaoga ke fehuʼi pe ko ai moʼoni ʼae neʼe fakanofo e Kilisito moʼo takitaki. Kaʼe ʼi te taʼu 1914, neʼe mole kei tatau ia. Neʼe kamata te temi ʼo te taʼukai ʼi te taʼu ʼaia. Neʼe hoko mai leva te temi ʼae ke tuku keheʼi te vao kovi mai te fulumeto. (Mat. 13:36-43) ʼI te kamata ʼo te temi ʼo te taʼukai, neʼe lagaʼi ai te fehuʼi maʼuhiga ʼaeni: ʼAki te atu ʼu Kilisitiano loi ʼae ʼe natou lau ko te ʼu tisipulo moʼoni ʼa Sesu, ʼe lava iloʼi feafeaʼi anai pe ko ai te fulumeto, te kau Kilisitiano fakanofo? ʼE tali ki ai te lea fakatata ʼo te tagata faifekau agatonu. Ko te ʼu tisipulo fakanofo ʼa Kilisito ʼe ko natou ʼae neʼe fafaga lelei ʼi te faʼahi fakalaumalie.

KO AI TE TAGATA FAIFEKAU AGATONU MO POTO?

8. He ko ʼe ʼe tuha ke faʼufaʼu ia te tagata faifekau agatonu e ni Kilisitiano fakanofo?

⁸ Ko natou ʼae ʼe faʼufaʼu ia te tagata faifekau agatonu ʼe tonu ko ni Kilisitiano fakanofo. ʼE higoa natou ʼaia ko “he kau pelepitelo fakahau” pea neʼe fekauʼi natou ke natou “tala te ʼu kalitate ʼo ia ʼae neʼe ina pauʼi [natou] mai te fakapoʼuli ki tona malama taulekaleka.” (1 Pet. 2:9, MN) Koia ʼe tuha ai ke akoʼi e te “kau pelepitelo fakahau” ʼaia te ʼu moʼoni ki ʼonatou tehina mo tuagaʼane.—Mala. 2:7; Apk. 12:17.

9. ʼE ko te kau Kilisitiano fakanofo fuli koa ʼae ʼe natou faʼufaʼu ia te tagata faifekau agatonu? Kotou fakamahino.

⁹ ʼE ko te kau fakanofo fuli koa ʼae ʼe natou faʼufaʼu ia te tagata faifekau agatonu? Kailoa. ʼI tona ʼuhiga moʼoni, ʼe mole ko te kau fakanofo fuli ʼae ʼe natou kau ki te foaki ʼo te meʼa kai fakalaumalie ki te ʼu tehina mo tuagaʼane ʼi te malamanei. ʼI te fulumeto, ʼe maʼu ai te ʼu tehina fakanofo ʼe lagi natou tagata faifekau fakaminisitelio peʼe tagata ʼafeā ʼi ʼanatou kokelekasio. ʼE natou akoʼi te hahaʼi ʼi te ʼu ʼapi pea ʼi te kokelekasio, pea mo natou mulimuli agatonu ki te takitaki mai ʼatatou pilo lalahi. Kaʼe ʼe mole natou kau ki te foaki ʼo te meʼa kai fakalaumalie ki te fale tau tehina ʼi te malamanei. Pea ʼe kau ki te kau fakanofo te ʼu tuagaʼane agavaivai, ʼe mole natou faiga anai ʼi he temi ke natou akoʼi te kokelekasio.—1 Ko. 11:3; 14:34.

10. Ko ai te tagata faifekau agatonu mo poto?

¹⁰ Kaʼe ko ai koa te tagata faifekau agatonu mo poto? ʼO mulimuli ki te faʼahiga fai ʼa Sesu, ʼae ko tana fakaʼaogaʼi he tokosiʼi moʼo fafaga te kauga malie, ʼe faʼufaʼu ia te tagata faifekau ʼaia e he kiʼi kutuga ʼo te ʼu tehina fakanofo ʼae ʼe natou teuteuʼi mo foaki te meʼa kai fakalaumalie talu mai te taʼu 1919. Lolotoga te ʼu ʼaho fakamuli, ko te ʼu tehina fakanofo ʼae ʼe natou faʼufaʼu ia te tagata faifekau agatonu ʼe natou gaue fakatahi ʼi te ʼu pilo lalahi. Ko te tagata faifekau ʼaia ʼe ko te Kolesi Pule ʼa te kau Fakamoʼoni ʼa Sehova. Kaʼe kotou tokagaʼi, ʼi tana lea fakatata, neʼe ui e Sesu ʼe ʼi ai pe anai “te tagata faifekau” ʼe tahi. Koia, ʼe toʼo fakatahi te ʼu tonu e te Kolesi Pule.

KO AI TE HAHAʼI ʼO TE TAGATA PULE?

11, 12. (1) Kotea te ʼu faʼahi ʼe lua neʼe fakanofo ki ai te tagata faifekau agatonu mo poto? (2) Ko ʼanafea ʼae neʼe fakanofo ai e Sesu te tagata faifekau agatonu ki ʼana hahaʼi, pea ko ai ʼae neʼe ina filifili?

¹¹ ʼE lelei ke tou tokagaʼi, ʼi te lea fakatata ʼa Sesu, ʼe fakanofo te tagata faifekau agatonu mo poto kia faʼahi ʼe lua. ʼUluaki, ʼe fakanofo ki te hahaʼi ʼo te tagata pule; lua ʼe fakanofo ki te ʼu koloa fuli ʼo te tagata pule. Mai tona aluʼaga ʼae ʼe hoko pe ia te lea fakatata ʼaia ʼi te temi ʼaeni ʼo te fakaʼosi, koia ʼe hoko tona fakanofo ki te ʼu faʼahi ʼaia ʼe lua ʼi te kua ʼosi kamata ʼo te ʼi heni ʼa Sesu ʼi tona ʼuhiga hau, ʼi te taʼu 1914.

¹² Ko te temi fea ʼae neʼe fakanofo ai e Sesu te tagata faifekau agatonu ki ʼana hahaʼi? Moʼo tali ki ai, ʼe tonu ke tou toe liliu ki te taʼu 1914, ʼae neʼe kamata ai te temi ʼo te taʼukai. Ohage ko tatatou ako ʼi muʼa atu, ʼi te temi ʼaia neʼe tokolahi te ʼu kutuga neʼe natou ui ko he ʼu Kilisitiano. Ko te kutuga fea ʼae neʼe filifili mai ai e Sesu pea mo ina fakanofo te tagata faifekau agatonu? Neʼe tali ki te fehuʼi ʼaia hili tana ʼaʼahi mo tana Tamai te fale lotu, peʼe ko te ʼu fakatuʼutuʼu fakalaumalie ki te tauhi, mai te taʼu 1914 ki te kamata ʼo te taʼu 1919.c (Mala. 3:1) Neʼe nā fiafia ʼi te kiʼi kutuga ʼo te kau Ako Tohi-Tapu agatonu, ʼae neʼe natou fakaha tanatou ʼoʼofa kia Sehova mo tana Folafola. ʼE moʼoni, neʼe ʼaoga ke fakamaʼa natou, kaʼe neʼe natou tali ʼaki he agavaivai te kiʼi temi nounou ʼaia neʼe ʼahiʼahiʼi mo fakamaʼa ai natou. (Mala. 3:2-4) Ko te kau Ako Tohi-Tapu agatonu ʼaia neʼe ko te fulumeto, te kau Kilisitiano moʼoni. ʼI te taʼu 1919, neʼe filifili e Sesu mai ia natou ʼaia te ʼu tehina fakanofo kua fotufotuʼa ʼi te faʼahi fakalaumalie, ke natou liliu ko te tagata faifekau agatonu mo poto pea mo ina fakanofo natou ki ʼana hahaʼi.

13. Ko ai ʼae ʼe kau ki te hahaʼi ʼo te tagata pule, pea kotea tona tupuʼaga?

¹³ Ko ai te hahaʼi ʼo te tagata pule? Moʼo fakanounou, ʼe ko natou ʼae ʼe fafaga. ʼI te kamata pe ʼo te ʼu ʼaho fakamuli, ko te hahaʼi ʼo te tagata pule ʼae neʼe fafaga neʼe fakanofo fuli natou ʼaki te laumalie. Ki muli age, neʼe hilifaki ki ai te toe hahaʼi tokolahi ʼo te tahi ʼu ovi. ʼI te temi nei, ʼe ko te tahi ʼu ovi ʼae ʼe natou faʼufaʼu tafitō te “faga ovi e tahi” ʼae ʼe takitaki e Kilisito. (Soa. 10:16) Ko te ʼu kutuga ʼaia ʼe lua ʼe nā maʼu ʼi tona temi totonu ia te meʼa kai fakalaumalie ʼae ʼe foaki e te tagata faifekau agatonu. ʼE feafeaʼi ki te ʼu tehina ʼo te Kolesi Pule ʼae ʼe natou faʼufaʼu ia ʼaho nei te tagata faifekau agatonu mo poto? ʼE toe ʼaoga ke fafaga te ʼu tehina ʼaia ʼi te faʼahi fakalaumalie. Koia, ʼaki he agavaivai, ʼe mahino kia natou ko natou takitokotahi ʼe natou kau ki te hahaʼi ʼo te tagata pule, ohage pe ko te ʼu tisipulo moʼoni fuli ʼa Sesu.

14. (1) Kotea te gaue ʼae neʼe foaki ki te tagata faifekau agatonu, pea kotea ʼae ʼe kau ki ai? (2) Kotea te fakatokaga neʼe fai e Sesu ki te tagata faifekau agatonu mo poto ʼaia? (Vakaʼi te fakamatala ʼae ʼe ʼatakai “Kae Kapau Ko He Faifekau Agakovi Ia Ia . . .”)

¹⁴ Neʼe foaki e Sesu he gaue maʼuhiga ki te tagata faifekau agatonu mo poto. ʼI te temi muʼa, ko te tagata faifekau ʼae neʼe tuha mo te falala, peʼe ko “te tagata tauhi ʼapi,” neʼe tonu ke tokaga ki te ʼu faʼahi fuli ʼo he loto fale. (Luka 12:42, MN) Koia, neʼe foaki ki te tagata faifekau agatonu mo poto te maʼua ʼae ke tokaga fakalelei ki te ʼu koloa fuli ʼa Kilisito ʼi te kele. ʼE kau ki te maʼua ʼaia te tokaga ʼae ki te falā, mo te ʼu kele, mo te gaue faifakamafola, pea mo te ʼu polokalama ʼo te ʼu fakatahi. ʼO toe feia mo te ta ʼo te ʼu tohi Fakatohi-tapu moʼo fakaʼaogaʼi ʼi te minisitelio pea mo ako ʼi te kokelekasio peʼe takitokotahi. ʼE fakalogo te maʼuli fakalaumalie ʼo te hahaʼi ʼo te tagata pule ki te ʼu meʼa kai fakalaumalie fuli ʼae ʼe foaki e te tagata faifekau agatonu ʼaia.

KO ʼAFEA ʼAE KA FAKANOFO AI KI TE ʼU KOLOA FULI ʼO TANA TAGATA PULE?

15, 16. Ko ʼafea ʼae ka fakanofo ai e Sesu te tagata faifekau agatonu ki ʼona koloa fuli?

¹⁵ Ko ʼafea ʼae ka fakanofo e Sesu te tagata faifekau ki te lua faʼahi, “ki ona koloa fuli”? Neʼe ui fenei e Sesu: “Manuia te tagata faifekau aia, moka kaku mai [ʼi te Fakakeleka ko te kupu “haʼu”] tona pule, o mau anai ia ia e fai feia! E au ui mooni atu kia koutou, e ina fakanofo anai ia ia ke pule ki ona koloa fuli.” (Mat. 24:46, 47) Kotou tokagaʼi, ʼe fakanofo e Sesu te tagata faifekau ki te lua faʼahi, ʼi tana kua ʼosi haʼu pea mo maʼu mai te tagata faifekau ʼaia ʼe lolotoga “fai feia,” ko tona fakaʼuhiga ʼe ina haga foaki tuʼumaʼu pe te meʼa kai fakalaumalie. Koia, ʼe tonu ke fakalaka he temi ʼi te fakanofo ʼo te tagata faifekau ki te ʼuluaki faʼahi pea mo te lua faʼahi. Ke tou mahino pe fakanofo feafeaʼi e Sesu tana tagata faifekau ki ʼona koloa fuli pea mo ʼafea, ʼe ʼaoga ke tou iloʼi ia faʼahi ʼe lua: te temi ʼae ʼe haʼu ai pea kotea ʼae ʼe kau ki ʼona koloa ʼaia.

¹⁶ Ko te temi fea ʼae ʼe haʼu ai Sesu? ʼE tou maʼu tona tali ʼi te ʼu vaega ki muʼa atu ʼi te kapite 24 ʼo Mateo. Kotou manatuʼi, ʼi te ʼu vaega ʼaia, moka talanoa ki te “hau” ʼa Sesu, ʼe fakaʼuhiga ki te temi ʼae ʼe haʼu ai ʼo tala pea mo fakahoko te fakamau ʼi te fakaʼosi ʼo te tuʼu ʼaeni.d (Mat. 24:30, 42, 44) Koia, ko te “kaku mai” ʼa Sesu peʼe ko tana “hau” ʼae neʼe talanoa ki ai ʼi te lea fakatata ʼo te tagata faifekau agatonu, ʼe hoko ia lolotoga te mamahi lahi.

17. Kotea ʼae ʼe kau ki te ʼu koloa ʼa Sesu?

¹⁷ Kotea ʼae ʼe kau ki te ʼu “koloa fuli” ʼa Sesu? Neʼe mole fakaʼaogaʼi e Sesu te kupu “fuli” moʼo talanoa pe ki ʼona koloa ʼi te kele. ʼI tona ʼuhiga moʼoni, ʼe lahi te pule ʼae kua maʼu e Sesu ʼi selo. Neʼe ina ui fenei: “Ko te pule fuli i te lagi mo te kele kua tuku mai kia au.” (Mat. 28:18; Efe. 1:20-23) ʼI te temi nei, ʼe kau ki ʼona koloa te Puleʼaga Fakamesia, ʼae neʼe ina maʼu talu mai te taʼu 1914. Pea ʼe ina fakagafua anai ki ʼana tisipulo fakanofo ke natou kauga hau mo ia ʼi te Puleʼaga ʼaia.—Apk. 11:15.

18. He ko ʼe ʼe fiafia anai ia Sesu ʼi tana haga fakanofo te tagata faifekau agatonu ki ʼona koloa fuli?

¹⁸ ʼAki te ʼu manatu fuli ʼaeni neʼe tou vakaʼi, kotea ʼae ʼe feala ke tou mahino ki ai? ʼI te temi ʼae ʼe haʼu ai Sesu ʼo fakahoko te fakamau lolotoga te mamahi lahi, ʼe ina maʼu anai te tagata faifekau agatonu ʼe ina haga foaki tuʼumaʼu pe te meʼa kai fakalaumalie ʼi tona temi totonu ki ʼana hahaʼi. ʼE fiafia anai ia Sesu ʼi tana haga fakanofo ia ia ki te lua faʼahi, ki ʼona koloa fuli. Ko natou ʼae ʼe natou faʼufaʼu te tagata faifekau agatonu ʼe fakanofo anai natou ki ʼona koloa ʼi te temi ʼae ka natou maʼu tonatou fakapale ʼi selo, ʼo natou kauga hau ai mo Kilisito.

19. ʼE lahi age koa te fakapale ʼae ʼe maʼu e te tagata faifekau agatonu ʼi selo ʼi te tahi kau fakanofo? Kotou fakamahino.

¹⁹ ʼE lahi age koa te fakapale ʼae ʼe maʼu e te tagata faifekau agatonu ʼi selo ʼi te tahi kau fakanofo? Kailoa ia. Ko he fakapale neʼe fakapapau ʼuluaki ki he kiʼi kutuga, ʼe feala ki muli age ke toe kau ki ai ʼihi. Ohage la, kotou tokagaʼi te meʼa neʼe ui e Sesu ki ʼana apositolo agatonu ʼe toko 11 ʼi te po ʼi muʼa ʼo tana mate. (Lau ia Luka 22:28-30.) Neʼe fakapapau age e Sesu ki te kiʼi kutuga tagata ʼaia te fakapale lelei ka natou maʼu ʼuhi ko tanatou nonofo agatonu. ʼE natou kauga hau anai mo ia. Kaʼe ʼi ni taʼu ki muli age, neʼe fakaha e Sesu ʼe ko te toko 144 000 fuli ʼae ka natou heheka anai ʼi ni hekaʼaga fakahau pea mo kauga hau mo ia. (Apk. 1:1; 3:21) ʼO toe feia pe, ia Mateo 24:47, neʼe ina fakapapau ʼe ina fakanofo anai ki ʼona koloa fuli he kiʼi kutuga tagata, te ʼu tehina fakanofo ʼae ʼe natou faʼufaʼu te tagata faifekau agatonu. Kaʼe ʼi tona ʼuhiga moʼoni, ʼe ko te toko 144 000 fuli ʼae ka natou vaevae anai mo ia tona pule lahi ʼi selo.—Apk. 20:4, 6.

20. He ko ʼe neʼe fakanofo e Sesu te tagata faifekau agatonu, pea kotea ʼae ʼe kotou fakatotonu ke kotou fai?

²⁰ ʼAki te tagata faifekau agatonu mo poto, ʼe mulimuli pe Sesu ki tana faʼahiga fai ʼi te temi ʼo te kau apositolo, ʼae ko tana fakaʼaogaʼi he tokosiʼi moʼo fafaga ʼo te kauga malie. Neʼe fakanofo e Sesu te tagata faifekau ʼaia ke tokaga ʼo foaki tuʼumaʼu ki ʼana tisipulo moʼoni, peʼe ko te kau fakanofo peʼe ko te tahi ʼu ovi, ia te meʼa kai fakalaumalie ʼi tona temi totonu ʼi te ʼu ʼaho fakamuli ʼaeni. Tou fakatotonu ke tou fakaha tatatou loto fakafetaʼi ʼaki tatatou haga mulimuli agatonu ki te ʼu tehina fakanofo ʼae ʼe natou faʼufaʼu te tagata faifekau agatonu mo poto.—Hep. 13:7, 17.