Tou Fiafia ʼi Te ʼIloʼi ʼo Sehova
“Manuia natou e natou fakalogo te folafola a te Atua pea e natou taupau ia.”—Luka 11:28.
1. Ko te temi fea ʼaē neʼe kamata felogoi ai Sehova mo te hahaʼi?
ʼE ʼOFA ia Sehova ki te hahaʼi pea ʼe tokaga ke nātou maʼuli lelei. ʼE mole tou punamaʼuli ai ki tana felogoi mo te hahaʼi. Neʼe kamata te felogoi ʼaia ʼi te ʼōloto ʼo Eteni. Ohage ko tona tuʼu ia Senesi 3:8, “ ʼi te lakaga ʼo te ʼaho ʼaē ʼe agiagi ai te matagi,” ko Atama mo Eva neʼe nā “logo ki te leʼo ʼo Sehova ʼAtua.” ʼE faka ʼuhiga e ʼihi te faʼahi ʼaia neʼe ko te agamāhani ʼa Sehova tana felogoi mo Atama ʼi te temi ʼaia, lagi ʼi te ʼaho fuli pe. Tatau aipe pe neʼe feafeaʼi, kae ʼe fakahā lelei e te Tohi-Tapu neʼe fakaʼaogaʼi e te ʼAtua te temi moʼo akoʼi te ʼuluaki tagata pea ke ina ʼiloʼi te ʼu meʼa ʼaē neʼe tonu ke ina fai moʼo fakahoko tona ʼu maʼua.—Senesi 1:28-30.
2. Neʼe fakamamaʼo feafeaʼi ia te ʼuluaki taumatuʼa mai te takitaki ʼa Sehova, pea neʼe koteā tona fua?
2 Neʼe foaki e Sehova kia Atama mo Eva te maʼuli, te pule ki te ʼu manu pea mo te kele katoa. Neʼe ʼi ai pe te meʼa e tahi neʼe tapuʼi age kia nāua: neʼe mole tonu ke nā kai ki te fuʼu ʼakau ʼo te mālama ki te lelei pea mo te kovi. Neʼe fakahalaʼi nāua e Satana, koia neʼe talagataʼa ai ia Atama pea mo Eva ki te fakatotonu ʼa te ʼAtua. (Senesi 2:16, 17; 3:1-6) Neʼe nā fia maʼuʼuli faʼifaʼitaliha, ke nā filifili e nāua totonu te meʼa ʼaē ʼe lelei mo te meʼa ʼaē ʼe kovi. ʼI tanā fai ʼaia, neʼe nā fakamamaʼo mai te takitaki ʼo tonā Tupuʼaga ʼofa. Neʼe fua kovi kia nāua pea mo tonā hākoga. Neʼe matutuʼa ia Atama mo Eva, pea mo nā mamate ʼo mole ʼamanaki ke fakatuʼuake nāua. Neʼe maʼu e tonā hākoga te agahala pea mo tona fua, ʼaē ko te mate.—Loma 5:12.
3. He koʼe neʼe felogoi Sehova mo Kaino, pea neʼe koteā ʼaē neʼe fai e Kaino?
3 Logope la te agatuʼu ʼi Eteni, kae neʼe hoko atu pe te felogoi ʼa Sehova mo te hahaʼi. Ko Kaino, te ʼuluaki foha ʼo Atama mo Eva, neʼe ʼamanaki to ki te agahala. Neʼe fakatokagaʼi age ki ai e Sehova ʼe fua kovi anai tana aga kia ia pea mo tokoni ki ai ke “maliu ʼo fai te meʼa ʼaē ʼe lelei.” Neʼe fakafisi ia Kaino ki te tokoni ʼofa ʼaia pea ina matehi ai tona tēhina. (Senesi 4:3-8) Koia, ko te ʼu ʼuluaki hahaʼi e toko tolu ʼi te kele neʼe nātou fakafisi fuli ki te takitaki lelei ʼo ia ʼaē neʼe ina foaki age te maʼuli, te ʼAtua ʼaē ʼe ina akoʼi tana hahaʼi ke fua lelei kia nātou. (Isaia 48:17) ʼE mahino ia neʼe lotomamahi lahi ia Sehova!
ʼE Hā Sehova Ki Te ʼu Pateliaka ʼo Te Temi Muʼa
4. ʼO ʼuhiga mo te hākoga ʼo Atama, neʼe koteā ʼaē neʼe falala kiai Sehova, pea ʼi tana ʼiloʼi te faʼahi ʼaia, neʼe koteā te logo ʼo ʼuhiga mo te ʼamanaki neʼe ina foaki ai?
4 Logola neʼe feala pe ke ina fakagata tana ʼu felogoi mo te hahaʼi, kae neʼe mole fai e Sehova te faʼahi ʼaia. Neʼe falala ia ko ʼihi ʼi te hākoga ʼo Atama ʼe nātou aga fakapotopoto anai ʼo tokagaʼi Tana takitaki. Ohage la, ʼi tana tala te fakatūʼa kia Atama mo Eva, neʼe fakakikite e Sehova te haʼu ʼo he “hāko” ʼe fakafeagai anai ki te Gata, ia Satana te Tevolo. Ki muli age, ʼe moloki anai te ulu ʼo Satana ʼo mate. (Senesi 3:15) Ko te lea faka polofeta ʼaia neʼe ko he logo fakafiafia ʼo ʼuhiga mo te ʼamanaki kia “natou [ʼe] fakalogo te folafola a te Atua pea . . . natou taupau ia.”—Luka 11:28.
5, 6. Neʼe feafeaʼi te felogoi ʼa Sehova mo tana hahaʼi ʼi muʼa ʼo te ʼuluaki sēkulō, pea neʼe ʼaoga feafeaʼi kia nātou te faʼahi ʼaia?
5 Neʼe fakahā e Sehova tona finegalo ki te kau pateliaka agatonu ʼo te temi muʼa, ohage ko Noe, Apalahamo, Isaake, pea mo Sopo. (Senesi 6:13; Ekesote 33:1; Sopo 38:1-3) Ki muli age, ʼaki ia Moisese, neʼe ina fakatuʼu te ʼatu ʼu lao maʼa te puleʼaga ʼo Iselaele. Neʼe lahi te ʼu faʼahi ʼaē neʼe ʼaoga ai kia nātou te Lao ʼa Moisese. ʼI tana mulimuli kiai, neʼe mavae kehe ia Iselaele mai te tahi ʼu puleʼaga fuli, ʼo liliu ai ko he hahaʼi makehe ʼa te ʼAtua. Neʼe fakapapau e te ʼAtua ki te kau Iselaele, kapau ʼe nātou fakalogo ki te Lao pea ʼe ina tapuakina anai nātou, ʼi te faʼahi fakasino pea mo fakalaumālie, ʼo ina fakatuʼutuʼu nātou ko he puleʼaga ʼo te kau pelepitelo, ko he puleʼaga taputapu. Neʼe toe fai e te Lao te ʼu lekula ʼo ʼuhiga mo te kai pea mo te maʼa, ʼo nātou maʼuʼuli lelei ai. Kae neʼe toe fakatokagaʼi e Sehova kia nātou te fua kovi ʼo te talagataʼa.—Ekesote 19:5, 6; Teutalonome 28:1-68.
6 ʼAki te temi, neʼe hilifaki te tahi ʼu tohi ki te ʼu ʼuluaki tohi ʼo te Tohi-Tapu. ʼE fakamatala ʼi te ʼu hisitolia ʼaia te felogoi ʼa Sehova mo te ʼu puleʼaga pea mo te hahaʼi. Ko te ʼu tohi fakatuketuke ʼe fakahā ai tona ʼu kalitate. Ko te ʼu tohi faka polofeta ʼe nātou fakakikite te fakahoko ʼi te ka haʼu ia te finegalo ʼo Sehova. Ko te ʼu tagata agatonu ʼo te temi muʼa neʼe nātou ako fakalelei pea mo mulimuli ki te ʼu tohi ʼaia neʼe haʼu mai te ʼAtua. Neʼe tohi fēnei e te tahi ʼi te ʼu tagata ʼaia: “Ko tau folafola ʼe ko he mālama taki ki toku vaʼe, pea ʼe ko he mālama ki toku ala.” (Pesalemo 119:105) Kia nātou ʼaē neʼe fia fagono, neʼe akoʼi nātou e Sehova pea neʼe ina fakamālamaʼi nātou.
Kua Lesili Mū Te Mālama
7. Logope la neʼe fai e Sesu te ʼu milakulo, kae ko te potu fea ʼaē neʼe ʼiloʼi tāfito ai ia ia, pea koteā tona tupuʼaga?
7 ʼI te ʼuluaki sēkulō, neʼe hilifaki e te ʼu kūtuga lotu faka Sutea te ʼu talatisio faka tagata ki te Lao. Neʼe fakamahino hala te Lao, pea neʼe mole ina fakamālamaʼi te hahaʼi kae neʼe liliu ia ko he meʼa mamafa ʼuhi ko tanatou ʼu talatisio. (Mateo 23:2-4) Kae ʼi te 29 ʼo totatou temi, neʼe hā ia Sesu ʼi tona ʼuhiga Mesia. Neʼe fekauʼi ifo ia ia ke ina foaki tona maʼuli maʼa te malamanei pea ke ina toe “fakamooni ki te mooni.” Logope la neʼe ina fai te ʼu milakulo, kae neʼe ʼiloʼi tāfito ia ia ʼi tona ʼuhiga “Tagata Faiakonaki.” Ko tana akonaki neʼe hage ko he mālama ʼe mū ʼi te fakapōʼuli fakalaumālie ʼaē neʼe ina ʼuʼufi te ʼatamai ʼo te hahaʼi. Neʼe ʼui tonu e Sesu: “E ko au te malama o te malama-nei.”—Soane 8:12; 11:28, MN; 18:37.
8. Koteā te ʼu tohi ʼaē neʼe tohi ʼi te ʼuluaki sēkulō ʼaki te takitaki ʼa te ʼAtua, pea neʼe koteā tona ʼaoga ki te ʼu ʼuluaki Kilisitiano?
8 Ki muli age neʼe hilifaki ki te ʼu tohi faka Hepeleo te ʼu Evaselio, te ʼu fakamatala e fā ʼo te maʼuli ʼo Sesu, pea mo te tohi ʼo Gaue, ʼaē ʼe fakamatala ai te mafola ʼo te Lotu Faka Kilisitiano hili te mate ʼa Sesu. Neʼe toe ʼi ai mo te ʼu tohi neʼe fai e te ʼu tisipulo ʼa Sesu ʼaki te takitaki ʼa te ʼAtua, pea mo te tohi faka polofeta ʼo Apokalipesi. Ko te ʼu tohi ʼaia, ʼo fakatahi ki te ʼu tohi faka Hepeleo, ʼe nātou fakakatoa te ʼu tohi ʼo te Tohi-Tapu. ʼAki te ʼu tohi fuli ʼaia mai te ʼAtua, neʼe feala ai ki te kau Kilisitiano ke nātou “mahino fakatahi mo te kaigalotu katoa, pe kotea te laulahi, mo te loa, mo te maoluga pea mo te loloto” ʼo te moʼoni. (Efeso 3:14-18) Neʼe feala ai ke nātou maʼu “te manatu a te Aliki.” (1 Kolonito 2:16) Kae neʼe mole mahino katoa te ʼu ʼuluaki Kilisitiano ʼaia ki te agaaga fuli ʼo te ʼu fakatuʼutuʼu ʼa Sehova. Neʼe tohi fēnei e te ʼapositolo ko Paulo ki te kau Kilisitiano: “I te temi-nei e tou sio i he sioata pea e nenefu.” (1 Kolonito 13:12) Neʼe mole fakaʼata lelei te faʼahiga sioʼata ʼaia. Neʼe tonu ia ke atalitali ki he fakamahino ʼe katoa age ʼo te Folafola ʼa te ʼAtua.
9. Koteā te ʼu meʼa kua tou mahino kiai ʼe hoko ʼi “te u aho fakamuli”?
9 ʼE tou maʼuʼuli ʼi te temi nei ʼi “te u aho fakamuli,” pea ʼe ko he ʼu “temi faigataa.” (2 Timoteo 3:1) Neʼe fakakikite e te polofeta ko Taniela, ʼi te temi ʼaia “ko te ʼatamai mālama moʼoni ʼe mahu anai ia.” (Taniela 12:4) Koia ko Sehova, te Tagata Felogoi Lahi, neʼe tokoni ki te hahaʼi loto moʼoni ke nātou mahino ki te faka ʼuhiga ʼo tana Folafola. ʼI te temi nei, ko te hahaʼi kaugamālie kua nātou mahino, neʼe fakanofo ke hau ia Sesu Kilisito ʼi te lagi fakapulipuli ʼi te 1914. Pea ʼe nātou toe ʼiloʼi kua ōvi mai te temi ʼaē ka ina fakagata ai anai te agakovi fuli pe pea mo ina fetogi te kele katoa ko he palatiso. Ko te faʼahi maʼuhiga ʼaia ʼo te logo lelei ʼo te Puleʼaga ʼaē ʼe lolotoga faka mafola nei ʼi te malamanei katoa.—Mateo 24:14.
10. ʼI te ʼu sēkulō, neʼe tali feafeaʼi e te hahaʼi te tokoni ʼa Sehova?
10 Ei, ʼi te ʼu temi fuli pe neʼe felogoi ia Sehova mo te hahaʼi ʼo te kele, moʼo fakahā kia nātou tona finegalo pea mo tana fakatuʼutuʼu. ʼE fakamatala ʼi te Tohi-Tapu ko te tokolahi neʼe nātou fakalogo, mo nātou maʼuliʼi te poto fakaʼatua, pea neʼe tapuakina ai nātou. ʼE toe palalau ai ʼo ʼuhiga mo ʼihi neʼe nātou līaki te tokoni ʼofa ʼa te ʼAtua, ʼo nātou fai te meʼa ʼaē ʼe kovi ohage ko Atama mo Eva. Neʼe fakatātā e Sesu te faʼahi ʼaia ki he ʼu ala e lua. Ko te tahi ala ʼe ina taki ki te fakaʼauha. ʼE laulahi pea mo ʼātea, ko te kaugamālie ʼaē ʼe haʼele ai ʼe nātou fakafisi ki te Folafola ʼa te ʼAtua. Ko te tahi ala ʼe ina taki ki te maʼuli heʼegata. ʼE lauveliveli, pea ko te hahaʼi tokosiʼi ʼaē ʼe haʼele ai, ʼe nātou tali te Tohi-Tapu heʼe ko te Folafola ʼa te ʼAtua, pea mo nātou mulimuli kiai.—Mateo 7:13, 14.
Tou Fakafetaʼi Ki Te ʼu Meʼa Kua Tou Maʼu
11. Koteā ʼaē ʼe fakamoʼoni ai ʼi tatatou kua mahino pea mo tui ki te Tohi-Tapu?
11 ʼE koutou kau koa ia nātou ʼaē neʼe nātou fili te ala ʼaē ʼe ina taki ki te maʼuli? Kapau koia ʼaia, pea ʼe mahino ia ʼe koutou fia nofo anai ʼi te ala ʼaia. ʼE lava feafeaʼi hakotou nofo ai? Koutou fakakaukau tuʼumaʼu pea ʼaki he loto fakafetaʼi ki te ʼu tapuakina ʼaē neʼe koutou maʼu ʼi takotou ʼiloʼi te ʼu moʼoni ʼo te Tohi-Tapu. Ko takotou tali pea mo mulimuli ki te logo lelei, ʼe ko he fakamoʼoni ʼaia ʼe tapuakina koutou e te ʼAtua. Neʼe fakahā e Sesu te faʼahi ʼaia ʼi tana faikole fēnei ki tana Tāmai: “E au fakafetai atu kia te koe, Tamai, koteuhi kua ke fufu ia mea aeni maia tagata poto mo atamai, pea ke fakaha kia natou liliki.” (Mateo 11:25) Ko te ʼu tagata gelu pea mo te kau tānaki tukuhau neʼe nātou mahino ki te faka ʼuhiga ʼo te faiakonaki ʼa Sesu, kae neʼe mole mahino kiai te kau takitaki lotu ʼaē neʼe lahi tanatou ako. Neʼe ʼui fēnei e Sesu ki muli age: “E mole feala ki he tahi ke haù kia te au, kapau e mole taki mai ia kia te au e te Tamai.” (Soane 6:44) Kapau kua koutou ʼiloʼi te Tohi-Tapu, pea mo koutou tui pea mo mulimuli ki tana ʼu akonaki, pea ʼe ko he fakamoʼoni ʼaia neʼe taki koutou e Sehova. ʼE tou fiafia lahi ai.
12. Neʼe fakamālamaʼi feafeaʼi tatou e te Tohi-Tapu?
12 ʼE maʼu ʼi te Folafola ʼa te ʼAtua he ʼu moʼoni ʼe nātou faka ʼāteaina pea mo nātou fakamālamaʼi tatou. Ko nātou ʼaē ʼe nātou mulimuli ki te ʼatamai mālama ʼo te Tohi-Tapu ʼe faka ʼāteaina nātou mai te mataku, mo te ʼu akonaki hala, pea mo te mole ʼiloʼi ʼo he meʼa, ʼaē ʼe nofo ai te ʼu lauʼi miliona hahaʼi. Ohage la, ʼi tatatou ʼiloʼi ia te moʼoni ʼo ʼuhiga mo te nefesi, neʼe faka ʼāteaina ai tatou mai te mataku ʼaē naʼa fai mai e te kau mate he meʼa ʼe kovi kia tatou, peʼe ko te manatu ʼaē ʼe fakamamahiʼi nātou ʼaē neʼe tou ʼofa ai. (Esekiele 18:4) Ko tatatou ʼiloʼi te moʼoni ʼo ʼuhiga mo te kau ʼaselo agakovi, ʼe tokoni mai kia tatou ke tou tekeʼi te ʼu fua kovi ʼo te faifakalauʼakau. Ko te akonaki ʼo te fakatuʼuake ʼe ina fakaloto fīmālieʼi te hahaʼi ʼaē neʼe mate he tahi neʼe nātou ʼofa ai. (Soane 11:25) ʼE fakahā mai kia tatou e te ʼu lea faka polofeta ʼo te Tohi-Tapu peʼe tou ʼifea ʼi te temi nei, pea mo foaki mai te falala ki te ʼu fakapapau ʼa te ʼAtua ʼo ʼuhiga mo te ka haʼu. ʼE toe mālohi ai foki mo tatatou ʼamanaki ki te maʼuli heʼegata.
13. Neʼe fua lelei feafeaʼi kia tatou ʼi te faʼahi fakasino tatatou tokagaʼi te Folafola ʼa te ʼAtua?
13 ʼE akoʼi mai kia tatou e te ʼu pelesepeto fakaʼatua ʼi te Tohi-Tapu, te faʼahiga maʼuli ʼaē ka fua lelei kia tatou ʼi te faʼahi fakasino. Ohage la, ʼe tou ako ke tou tekeʼi te ʼu aga ʼaē ʼe nātou ʼulihi totatou sino, ohage ko te suluka pea mo te toloke. ʼE tou fakamamaʼo mai te ʼinu kava fakavalevale. (2 Kolonito 7:1) Ko tatatou tokagaʼi te ʼu lao ʼa te ʼAtua ʼo ʼuhiga mo te aga ʼaē ʼe tonu ke fai, ʼe ko he puipui ʼaia kia tatou mai te ʼu mahaki ʼaē ʼe maʼu ʼi te ʼu felāveʼi fakasino. (1 Kolonito 6:18) ʼI tatatou mulimuli ki te tokoni ʼa te ʼAtua ʼaē ke ʼaua naʼa tou manako ki te paʼaga, ʼe mole hoha totatou ʼatamai, ohage ko te hahaʼi tokolahi ʼaē ʼe nātou kumi te ʼu koloā. (1 Timoteo 6:10) Ko te ʼu faʼahi fea ʼo tokotou maʼuli neʼe fua lelei ai takotou maʼuliʼi ia te Folafola ʼa te ʼAtua?
14. ʼE malave feafeaʼi te laumālie maʼoniʼoni ki totatou maʼuli?
14 Kapau ʼe tou maʼuʼuli ʼo mulimuli ki te Folafola ʼa te ʼAtua, pea ʼe tou maʼu ai te laumālie maʼoniʼoni ʼo Sehova. ʼE tou faiga ke tou faʼifaʼitakiʼi te ʼulugaaga ʼo Kilisito, ʼaē neʼe ina maʼu te ʼu kalitate ohage ko te fakamolemole gafua pea mo te loto manavaʼofa. (Efeso 4:24, 32) ʼE toe maʼu ia tatou te fua ʼo te laumālie ʼo te ʼAtua—te ʼofa, te fiafia, te tokalelei, te kātaki, te agalelei, te agaʼofa, te tui, te agamālū, pea mo te loto lolomi. (Kalate 5:22, 23) ʼAki te ʼu kalitate ʼaia ʼe fiafia pea mo lelei ai tatatou felogoi mo te hahaʼi, ʼo kau ai mo totatou famili. ʼE tou mālohi ʼi totatou loto ʼo feala ai ke tou tauʼi ʼaki he lototoʼa te ʼu faigataʼaʼia. ʼE koutou tokagaʼi koa te malave lelei ʼo te laumālie maʼoniʼoni ki tokotou maʼuli?
15. Neʼe fua lelei feafeaʼi kia tatou tatatou mulimuli ki te finegalo ʼo te ʼAtua?
15 ʼI tatatou mulimuli ki te finegalo ʼo te ʼAtua, ʼe mālohi ai mo tatatou felogoi mo ia. ʼE tou tui lahi ai ʼe mahino pea mo ʼofa kia tatou. ʼI te ʼu meʼa ʼaē neʼe hoko kia tatou, ʼe tou ʼiloʼi ai ʼe tokoni mai kia tatou ʼi te ʼu temi faigataʼaʼia. (Pesalemo 18:18) ʼE tou tokagaʼi ʼe fakalogo moʼoni ki tatatou ʼu faikole. (Pesalemo 65:2) ʼE tou falala ai ki tana takitaki, ʼo tou tui papau ʼe fua lelei kia tatou. Pea ʼe tou maʼu te ʼamanaki taulekaleka ʼaē, ʼi tona temi totonu, ʼe taki anai e te ʼAtua tana hahaʼi faitotonu ki te maʼuli haohaoa, pea mo ina foaki anai kia nātou tona meʼa ʼofa ʼaē ko te maʼuli heʼegata. (Loma 6:23) Neʼe tohi fēnei e te tisipulo ko Sakopo: “Koutou fakaovi ki te Atua pea e fakaovi atu anai kia koutou.” (Sakopo 4:8) Neʼe koutou logoʼi koa neʼe mālohi age takotou ʼu felogoi mo Sehova ʼi te temi ʼaē neʼe koutou fakaōvi ai kia te ia?
Ko He Koloā ʼe Mole Hona Tatau
16. Koteā te ʼu fetogi ʼaē neʼe fai e ʼihi kau Kilisitiano ʼo te ʼuluaki sēkulō?
16 Neʼe fakamanatuʼi e Paulo ki te kau Kilisitiano ʼo te ʼuluaki sēkulō ʼaē neʼe fakanofo e te laumālie, ko ʼihi ia nātou ʼi te temi muʼa neʼe fai folonikasio, tono, neʼe ko he ʼu tagata neʼe momoe mo te tahi ʼu tagata, kaihaʼa, mānumānu, konahia, leakovi, pea neʼe nātou faʼao he ʼu meʼa ka mole ʼanatou. (1 Kolonito 6:9-11) ʼAki te moʼoni ʼo te Tohi-Tapu, neʼe nātou fai ai te ʼu fetogi lahi; neʼe “fakamaʼa” nātou. Koutou fakakaukauʼi age muʼa peʼe feafeaʼi anai tokotou maʼuli mo kanapau neʼe mole koutou ako ʼi te Tohi-Tapu te ʼu moʼoni ʼaē ʼe nātou faka ʼāteaina ai koutou. ʼE mahino papau ia ko te moʼoni ʼe ko he koloā ʼe mole hona tatau. ʼE tou fiafia lahi ʼi tatatou felogoi mo Sehova!
17. ʼI te faʼahi fakalaumālie, neʼe fafaga feafeaʼi te kau Fakamoʼoni ʼa Sehova ʼaki te ʼu fono?
17 Pea koutou fakakaukauʼi muʼa te fiafia ʼaē ʼe tou maʼu ʼi totatou fale tautēhina ʼaē ʼe lanu kehekehe! Ko “te kaugana agatonu mo fakapotopoto” ʼe ina foaki mai te meʼa kai fakalaumālie ʼi tona temi totonu, ʼo kau kiai te ʼu Tohi-Tapu, te ʼu nusipepa, pea mo te tahi ʼu tohi ʼi te ʼu lea kehekehe. (Mateo 24:45-47) ʼI te ʼu fono ʼi te taʼu 2000, ko te kau Fakamoʼoni ʼa Sehova ʼi te ʼu fenua e tokolahi neʼe nātou toe vakaʼi te ʼu puani maʼuhiga ʼo te ʼu tohi tāfito e valu ʼo te Tauhi ʼĀfea. ʼAki te tohi Étude perspicace des Écritures, neʼe nātou metitasio ai ki te ʼu maʼuli ʼo te hahaʼi e toko 40 ʼi te Tohi-Tapu. Neʼe nātou ako te ʼu kapite e 22 ʼo te tohi Te tagata ʼaē ʼe lahi tokotahi ʼo te ʼu temi fuli mo te tohi Te Kalavi ʼo Te Manuʼia Faka Famili. Ko alatike e 36 neʼe feala ke nātou lau ʼi Te Tule Leʼo ʼaē neʼe hoa ki te ʼu alatike ako e 52. Tahi ʼaē meʼa, neʼe fafaga te hahaʼi ʼa Sehova ʼaki te ʼu Minisitelio ʼo Te Puleʼaga ʼe 12 pea mo te ʼu akonaki ʼi te vāhaʼa fuli ʼo ʼuhiga mo he ʼu puani kehekehe ʼo te Tohi-Tapu. Neʼe ko he ʼatamai mālama fakalaumālie lahi neʼe foaki mai!
18. ʼE tokoni feafeaʼi mai kia tatou te kokelekasio?
18 ʼI te malamanei katoa, ʼe foaki ʼi te ʼu kokelekasio e 91 000 tupu te fakaloto mālohi ʼaki te ʼu fono pea mo tatatou fakatahi ʼaē mo te hahaʼi. ʼE tou toe maʼu ai mo te tokoni ʼa te ʼu Kilisitiano kua fakapotopoto ʼe nātou fia tokoni mai kia tatou ʼi te faʼahi fakalaumālie. (Efeso 4:11-13) Ei, neʼe lahi te ʼu lelei neʼe tou maʼu ʼaki tatatou mālama ki te moʼoni. ʼE ko he fiafia te ʼiloʼi pea mo te tauhi kia Sehova. ʼE moʼoni te ʼu palalau ʼa te tagata fai pesalemo ʼaē neʼe ina tohi fēnei: “Manuʼia te hahaʼi ʼaē ko tonatou ʼAtua ko Sehova!”—Pesalemo 144:15.
Kei Koutou Manatuʼi Koa?
• Neʼe felogoi ia Sehova mo ai ʼi te ʼu temi ʼi muʼa atu ʼo te ʼuluaki sēkulō?
• Neʼe liliu feafeaʼi te mālama fakalaumālie ʼo ʼāsili gigila age ʼi te ʼuluaki sēkulō? ʼi totatou temi?
• Koteā te ʼu lelei ʼe tou maʼu ʼi tatatou mulimuli ki te ʼatamai mālama ʼo ʼuhiga mo Sehova?
• He koʼe ʼe tonu ke tou fiafia ʼi tatatou ʼiloʼi te ʼAtua?
[Paki ʼo te pasina 8]
Neʼe fakahā e Sehova tona finegalo kia Noe, mo Apalahamo, pea mo Moisese
[Paki ʼo te pasina 9]
ʼI totatou temi, neʼe tuku ifo e Sehova he mālama ki tana Folafola
[Paki ʼo te pasina 10]
Koutou fakakaukau ki te ʼu tapuakina ʼaē ʼe tou maʼu ʼi totatou fale tautēhina ʼaē ʼe lanu kehekehe