Kāpite 29

ʼE Natou Hivaʼi Te Hiva Foʼou ʼo Te Mālo

Te meʼa ʼaē neʼe hā 9​—Fakahā 14:1-20

Te manatu tāfito: ʼE tutuʼu fakatahi te toko 144 000 mo te ʼAkeno ʼi te Moʼuga ʼo Sione; ʼe logoʼi te ʼu leʼo ʼo te kau ʼāselo ʼi te kele kātoa; kua tānaki te ʼu taʼukai

Te temi ʼaē ʼe hoko ai: Mai te taʼu 1914 ʼo aʼu ki te mamahi lahi

1. Koteā ʼaē kua ʼosi tou ʼiloʼi ʼo ʼuhiga mo te Fakahā kāpite 7, 12, pea mo 13, pea koteā ʼaē kā tou vakaʼi ʼi te lakaga nei?

ʼI MEʼA fakaloto māfana hatatou hiki atu ki te meʼa ʼaē neʼe hā ki muli age kiā Soane! ʼI te lakaga nei, ʼe mole tou talanoa anai ʼo ʼuhiga mo te ʼu kautahi ohagē ko te ʼu manu fekai ʼaē ʼe fakalogo ki te talakone, kae ʼe tou talanoa anai ʼo ʼuhiga mo te ʼu kaugana agatonu ʼa Sehova pea mo tanatou ʼu gāue lolotoga te ʼaho ʼo te ʼAliki. (Fakahā 1:10) Neʼe kua ʼosi fakahā mai kiā tātou iā Fakahā 7:1, 3, ʼe tāʼofi maʼu ia te ʼu matagi e fā ʼo te fakaʼauha ʼo aʼu ki te fakaʼiloga fuli ʼo te ʼu kaugana fakanofo, ia te toko 144 000. ʼE fakahā mai iā Fakahā 12:17, lolotoga te temi ʼaia ʼe liliu ai te ‘toe ʼo te hōloga ʼo [te fafine]’ ko te koga tāfito ʼaē kā tauʼi e Satana, te talakone. Pea ʼe fakamatala mai iā Fakahā kāpite 13, ia te ʼu kautahi faka politike ʼaē ʼe fakatupu e Satana ʼi te kele moʼo fai ʼo ni ʼu fakamamahi pea mo ni ʼu fakataga ki te ʼu kaugana agatonu ʼa Sehova. Kae ʼe mole feala ki te fili tāfito ʼaia ke ina tāʼofi ia te fakatuʼutuʼu ʼa te ʼAtua! ʼE tou vakaʼi anai ʼi te lakaga nei, logo aipē ia te ʼu faiga agakovi ʼa Satana, kae ʼe iku lelei anai ia te fakatahiʼi fuli ʼo te toko 144 000.

2. Koteā ia te ikuʼaga fakafiafia ʼaē neʼe sio fakatomuʼa kiai pea mo fakamatala mai e Soane iā Fakahā 14:1, pea ko ai ia te ʼAkeno?

² Neʼe sio fakatomuʼa ia Soane pea mo tona kalasi ki te ikuʼaga fakafiafia ʼaia: “Pea neʼe au sio, pea koʼenī! te ʼAkeno ʼe tuʼu ʼi te Moʼuga ʼo Sione, pea neʼe tutuʼu ai mo ia te toko teau-fāgofulu-mā-fā afe ʼaē kua tohi ʼi tonatou ʼu laʼe ia tona huafa pea mo te huafa ʼo tana Tamai.” (Fakahā 14:1) Ohagē ko te meʼa ʼaē neʼe tou vakaʼi, ko te ʼAkeno ʼaia ʼe ko Mikaele, ʼaē kua ina fakamaʼa ia te lagi ʼo kapu ifo ia te Tēvolo pea mo tana kau temonio. Ko te Mikaele ʼaia neʼe ʼui e Taniela, “ ʼe ina haofaki te ʼu foha [ʼo te hahaʼi ʼa te ʼAtua],” ʼe ʼamanaki “tuʼu ake” moʼo fakahoko ia te ʼu fakamāu faitotonu ʼa Sehova. (Taniela 12:1; Fakahā 12:7, 9) Talu mai te taʼu 1914, ko te ʼAkeno ʼaia ʼo te ʼAtua, ʼaē neʼe ina tali ke ina sākilifisioʼi tona maʼuli, kua tuʼu ʼi tona tuʼulaga Hau Faka Mesianike ʼi te Moʼuga ʼo Sione.

3. Koteā ia “te Moʼuga ʼo Sione” ʼaē ʼe ‘tutuʼu’ ai te ʼAkeno pea mo te toko 144 000?

³ ʼE hoko ia meʼa fuli ohagē pē ko tona fakakikite fēnei e Sehova: “Ko au, ʼio, kua au fakanofo taku hau ki Sione, toku moʼuga taputapu.” (Pesalemo 2:6; 110:2) ʼE mole ko te Moʼuga ʼo Sione ʼaē ʼe tuʼu ʼi Selusalemi, ʼaē neʼe pule ai te ʼu hau ʼo te hōloga ʼo Tavite. (1 Fakamatala 11:4-7; 2 Fakamatala 5:2) Heʼe ʼi te hili ʼo tona mate pea mo tona fakatuʼuake ʼi te taʼu 33 ʼi totatou temi, neʼe fakanofo ia Sesu ko te maka agele ʼo te tafitoʼaga ʼi te Moʼuga ʼo Sione ʼaē ʼi selō, te potu ʼo selō ʼaē neʼe fakatuʼutuʼu ai e Sehova ke ina fakatuʼu kiai te “kolo ʼo te ʼAtua maʼuli, te Selusalemi ʼaē ʼi selō.” ʼO mahino mai, ʼe fakatātā e “te Moʼuga ʼo Sione” ia te tuʼulaga māʼoluga ʼo Sesu pea mo tona ʼu kaugā maʼu tofiʼa, ʼaē ko te Selusalemi ʼaē ʼi selō, ia te Puleʼaga ʼo te ʼAtua. (Hepeleo 12:22, 28; Efesi 3:6) ʼE ina fakatātā ia te tuʼulaga faka kolōlia pea mo fakahau ʼaē ʼe fakanofo ia nātou kiai e Sehova ʼi te lolotoga ʼo te ʼaho ʼo te ʼAliki. ʼI te hoholo ʼo te ʼu sēkulō, neʼe fakatalitali ia te kau Kilisitiano fakanofo, ʼi tonatou ʼuhiga ʼaē ko te ʼu “maka maʼuli,” ki te ʼaho ʼaē kā feala ai hanatou tutuʼu ʼi te Moʼuga ʼo Sione ʼaē ʼi selō, ʼo natou fakatahi kiā Sesu Kilisito, ia te ʼAliki ʼi tona kolōlia ʼi te Puleʼaga taulekaleka.—1 Petelo 2:4-6; Luka 22:28-30; Soane 14:2, 3.

4. Koteā tona faka ʼuhiga ʼo te ʼui ʼaē ko te toko 144 000 ʼe natou tutuʼu fuli ʼi te Moʼuga ʼo Sione?

⁴ ʼE mole gata ʼaki pē te sio ʼa Soane kiā Sesu, kae ʼe toe sio foki ki te toko 144 000 kaugā hau ʼo te Puleʼaga ʼaē ʼi selō ʼe natou tutuʼu ʼi te Moʼuga ʼo Sione. ʼI te temi ʼaē ʼe hā ai te ʼu meʼa ʼaia, tokolahi ʼi te toko 144 000 kae mole ko nātou fuli, ʼe kua natou nonofo ʼi selō. Ki muli age ʼi te meʼa ʼaia neʼe hā, neʼe fakahā age kiā Soane ko ʼihi ʼi te kau māʼoniʼoni ʼe kei tonu ke natou kātakiʼi tonatou ʼu mamahi pea mo natou mamate agatonu. (Fakahā 14:12, 13) ʼE mahino mai, ʼe ʼi ai ʼihi ʼi te toko 144 000 ʼe kei natou māʼuʼuli ʼi te kele. Kae he koʼē ʼe ʼui e Soane ʼe sio kiā nātou fuli ʼe tutuʼu fakatahi mo Sesu ʼi te Moʼuga ʼo Sione?a ʼI tanatou kau ʼaē ki te kōkelekāsio ʼo te kau Kilisitiano fakanofo, ʼi te temi nei kua natou “fakaovi ki te Moʼuga ʼo Sione mo te kolo ʼo te ʼAtua maʼuli, te Selusalemi ʼaē ʼi selō.” (Hepeleo 12:22) Ohagē ko Paulo, ʼi tana kei maʼuli ʼi te kele, neʼe kua fakatuʼuake ia nātou ʼi te faʼahi fakalaumālie, ke natou fakatahi mo Kilisito Sesu ʼi te ʼu potu ʼaē ʼi selō. (Efesi 2:5, 6) Tahi ʼaē meʼa, ʼi te taʼu 1919, neʼe natou tali ia te fakaafe ʼaenī, ‘kolua hake mai ki henī,’ pea ʼi he ʼaluʼaga fakatā neʼe natou “hake ai ki te lagi ʼi te ʼao.” (Fakahā 11:12) ʼO ʼuhiga mo te ʼu vaega Tohi-Tapu ʼaia, ʼe feala hatatou mahino ko te toko 144 000 kātoa, ʼi tona ʼaluʼaga fakalaumālie, ʼe natou tutuʼu mo Sesu Kilisito ʼi te Moʼuga ʼo Sione.

5. Ko te ʼu huafa ʼo ai ʼaē ʼe tohi ʼi te ʼu laʼe ʼo te toko 144 000, pea ʼe hā ʼaki ai teā?

⁵ ʼE mole kau te toko 144 000 ki te hahaʼi ʼaē ʼe natou ʼatolasio ki te manu fekai, ʼaē kua fakaʼiloga ia nātou ʼaki te nūmelo fakatātā ʼaē ko te 666. (Fakahā 13:15-18) Kae ko te kau Kilisitiano agatonu ʼaenī, neʼe tohi ʼi tonatou ʼu laʼe ia te huafa ʼo te ʼAtua pea mo ʼaē ʼo te ʼAkeno. ʼE mahino ia, ko Soane ʼi tona ʼuhiga Sutea, neʼe sio ki te tohi ʼo te huafa ʼo te ʼAtua ʼaki te ʼu mataʼi tohi Faka Hepeleo ʼaenī: יהוה.b ʼE tohi ʼi tonatou ʼu laʼe te huafa ʼo te Tamai ʼa Sesu, ʼo hā ʼaki ai ʼe natou fakamoʼoni ko nātou ko te ʼu Fakamoʼoni ʼa Sehova, ko Tana ʼu kaugana. (Fakahā 3:12) ʼE toe tohi foki ʼi tonatou ʼu laʼe ia te huafa ʼo Sesu, ʼo hā ʼaki ai ʼe natou fakamoʼoni ʼe natou kau kiā Sesu, pea ko tonatou “ ʼohoana,” pea ʼe natou “ ʼohoana” anai mo ia, “ko he ʼu fakatupu foʼou” ʼe natou tauhi ki te ʼAtua pea mo natou maʼu te ʼamanaki ʼaē ko te maʼuli ʼi te lagi. (Efesi 5:22-24; Fakahā 21:2, 9; 2 Kolonito 5:17) ʼE ʼiloga tanatou felōgoi lelei mo Sehova pea mo Sesu Kilisito ʼi tanatou ʼu manatu pea mo tanatou ʼu gāue fuli.

ʼE Natou Hiva Ohagē Ko He Hiva Foʼou

6. Koteā te hiva ʼaē ʼe logo kiai ia Soane, pea ʼe ina fakatatau kiteā?

⁶ ʼO ʼalutahi mo te manatu ʼaē neʼe kua ʼosi talanoa kiai, neʼe ʼui fēnei e Soane: “Pea neʼe au logoʼi te logoaʼa ʼe haʼu mai te lagi, ohagē ko te ʼuʼulu ʼo he tuʼuga vai pea ohagē ko te ʼuʼulu ʼo he mana mālohi; pea ko te logoaʼa ʼaia neʼe au logo kiai neʼe hagē ko te logoaʼa ʼa he kau hiva ʼe natou hiva ʼo faka ʼalutahi mo te ʼu ʼalepa. Pea ʼe natou hiva ohagē ko he hiva foʼou iā muʼa ʼo te hekaʼaga fakahau pea mo iā muʼa ʼo te ʼu fakatupu maʼuli e fā pea mo te kau tagata ʼāfea; pea neʼe mole he tahi neʼe feala ke ina akoʼi fakalelei te hiva ʼaia gata pē ki te toko teau fāgofulu-mā-fā afe ʼaē neʼe totogi mai te kele.” (Fakahā 14:2, 3) Koia ʼe mole tou punamaʼuli ai, ki te ʼui ʼaē e Soane, ʼi tana logoʼi te hiva mālie ʼo te toko 144 000, ʼe hagē kiā ia ko te ʼuʼulu ʼo te ʼu vai pea mo te ʼuʼulu ʼo te ʼu mana. Pea ʼe logo mālie te māholo ʼaia, ohagē ko he māholo ʼaki he ʼu ʼalepa! (Pesalemo 81:2) ʼE feala koa ki he foʼi māholo ʼi te kele ke natou fai he hiva mālie ʼaupitō fēia?

7. (a) Koteā te hiva foʼou ʼaē ʼe talanoa kiai ia Fakahā 14:3? (b) He koʼē ʼe foʼou te hiva ʼaē ia Pesalemo 149:1 ʼi totatou temi?

⁷ Pea koteā te “hiva foʼou” ʼaia? Ohagē ko te meʼa ʼaē neʼe tou fakatokagaʼi ʼi tatatou vakaʼi ia Fakahā 5:9, 10, ʼe fai te hiva ʼaia ʼo ʼuhiga mo te finegalo ʼo Sehova ʼaē kā hoko anai ʼaki tona Puleʼaga pea mo te ʼu fakatuʼutuʼu fakatalakitupua ʼaē neʼe ina fai ʼaki ia Sesu Kilisito, moʼo fakaliliu ia te Iselaele fakalaumālie ko “he puleʼaga pea mo he ʼu pelepitelō maʼa totatou ʼAtua.” ʼE ko he hiva fakavikiviki kiā Sehova moʼo kalagaʼi ia te ʼu meʼa foʼou ʼaē ʼe ina fakahoko ʼaki ia te Iselaele ʼo te ʼAtua pea mo ʼaoga anai ki te Iselaele ʼaia. (Kalate 6:16) ʼE tali ia te Iselaele fakalaumālie ʼaia ki te fakaafe ʼaenī ʼa te tagata fai pesalemo: “Kotou fakavikiviki kiā Sah! Kotou hiva kiā Sehova he hiva foʼou, tona fakavikiviki ʼi te kōkelekāsio ʼa te kau faitotonu. Ke fakafiafia Iselaele ʼi tona Tupuʼaga māʼoluga, ke fakafiafia ia te ʼu foha ʼo Sione ʼi tonatou Hau.” (Pesalemo 149:1, 2) ʼEī, neʼe tohi te ʼu palalau ʼaenī kua hili kiai ni ʼu sēkulō, kae ʼi totatou temi, ʼe hivaʼi ʼaki te mahino foʼou. ʼI te taʼu 1914, neʼe tupu ai te Puleʼaga Faka Mesianike. (Fakahā 12:10) ʼI te taʼu 1919, neʼe kamata fakahā e te hahaʼi ʼa Sehova “te folafola ʼo te puleʼaga” ʼaki he lotomālohi kua fakafoʼou. (Mateo 13:19) ʼI te taʼu ʼaia, ʼaki te fakaloto mālohiʼi ʼo nātou e te vaega ʼaē neʼe filifili e te Sōsiete, ʼo Isaia 54:17, pea mo tanatou kua lotomālohi ʼi tanatou hū ki te palatiso fakalaumālie, neʼe natou ‘hiva kiā Sehova ʼaki te musika ʼi tonatou loto.’—Efesi 5:19.

8. He koʼē ʼe gata pē ki te toko 144 000 ʼe natou lava akoʼi ia te hiva foʼou ʼaē ʼe tuʼu iā Fakahā 14:3?

⁸ Kae he koʼē ʼe gata pē ki te toko 144 000 ʼe natou lava akoʼi ia te hiva ʼaē ʼe tuʼu iā Fakahā 14:3? ʼE tupu heʼe ʼalutahi mo te ʼu ʼaluʼaga ʼaē neʼe hoko kiā nātou ʼi tonatou ʼuhiga kaugā maʼu tōfiga ʼo te Puleʼaga ʼo te ʼAtua. Ko nātou ʼāteaina pē ʼaē neʼe vaheʼi ko te ʼu foha ʼo te ʼAtua pea mo fakanofo ʼaki ia te laumālie māʼoniʼoni. Ko nātou ʼāteaina pē ʼaē neʼe totogi mai te kele ke natou kau ki te Puleʼaga ʼaē ʼi selō, pea ko nātou ʼāteaina pē ʼaē kā ‘liliu ko te ʼu pelepitelō pea mo natou hau anai’ mo Sesu Kilisito lolotoga ia taʼu e afe moʼo fakaliliu ia te mālamanei ke natou maʼuli haohaoa. Ko nātou ʼāteaina pē ʼaē neʼe hā mai “neʼe natou hiva ohagē ko he hiva foʼou” iā muʼa totonu ʼo Sehova.c ʼAki te ʼu pilivilēsio pea mo te ʼu ʼamanaki makehe ʼaia, ʼe tupu ai tanatou tōkakaga ʼaupitō ki te Puleʼaga pea mo feala ai hanatou hiva ki te Puleʼaga ʼaia ʼi hona ʼaluʼaga ʼe mole feala ke fai e he tahi kehe.—Fakahā 20:6; Kolose 1:13; 1 Tesalonika 2:11, 12.

9. Koteā ʼaē neʼe fai e te toe hahaʼi tokolahi ʼi tanatou logo ki te hiva ʼa te kau fakanofo, pea koteā te fakaloto mālohi ʼaē neʼe hoa kiai?

⁹ Kae ʼe ʼi ai ʼihi hahaʼi ʼe natou fakalogo ki tanatou hiva pea mo natou mulimuli ki te ʼu palalau ʼo tanatou hiva. Talu mai te taʼu 1935, ko te toe hahaʼi tokolahi ʼo te tahi ʼu ovi, ʼaē ʼe haga tuputupu pē tonatou kaugamālie, neʼe natou logoʼi te hiva ʼaia ʼo te mālo pea neʼe uga ai nātou ke natou kau fakatahi ʼo fakahā ia te Puleʼaga ʼo te ʼAtua. (Soane 10:16; Fakahā 7:9) ʼE moʼoni, ʼe mole feala ki te ʼu tisipulo foʼou ʼaia ke natou ako ke natou hiva ke tatau ʼosi ia te hiva foʼou ʼaia ʼaē ʼe hivaʼi e te ʼu hau ʼo te temi kā haʼu ʼo te Puleʼaga ʼo te ʼAtua. Kae ʼe natou toe hivaʼi foki mo te hiva mālie moʼo faka kolōlia kiā Sehova, moʼo fakavikivikiʼi ia ia ʼo ʼuhiga mo te ʼu meʼa foʼou ʼaē ʼe ina lolotoga fakahoko. ʼE natou fakahoko te fakaloto mālohi ʼaenī ʼa te tagata fai pesalemo: “Kotou hiva kiā Sehova he hiva foʼou. Kotou hiva kiā Sehova, ia koutou fuli ʼo te kele. Kotou hiva kiā Sehova, kotou tapuakiʼi tona huafa. ʼI te ʼaho fuli pē, kotou fakahā te logo lelei ʼo tana haofaki. Kotou kalagaʼi tona kolōlia ʼi te lotolotoiga ʼo te ʼu puleʼaga, mo tana ʼu gāue fakaofoofo ʼi te lotolotoiga ʼo te ʼu hahaʼi fuli. Kotou foaki kiā Sehova, ia koutou ʼu fāmili ʼo te hahaʼi, kotou foaki kiā Sehova te kolōlia pea mo te mālohi. Kotou tala ʼi te lotolotoiga ʼo te ʼu puleʼaga: ‘Ko Sehova totonu kua liliu ko te hau.’ ”—Pesalemo 96:1-3, 7, 10; 98:1-9.

10. ʼE lava feafeaʼi ki te toko 144 000 hanatou hihiva “iā muʼa” ʼo te toko 24 kau tagata ʼāfea fakatātā?

¹⁰ ʼE lava feafeaʼi ki te toko 144 000 hanatou hihiva “iā muʼa” ʼo te kau tagata ʼāfea, heʼe ko te toko 24 kau tagata ʼāfea ʼe natou fakatātā ia te toko 144 000 ʼi tonatou tuʼulaga faka kolōlia ʼaē ʼi selō? ʼI te kamata ʼo te ʼaho ʼo te ʼAliki, ko nātou ʼaē “neʼe mamate ʼo fakatahi mo Kilisito” neʼe fakatuʼuake ia nātou ko he ʼu laumālie. Koia, ko te ʼu Kilisitiano fakanofo agatonu ʼaē neʼe mālo, kua natou ʼi selō ʼi te temi nei, pea ʼe natou fakahoko ʼi hona ʼaluʼaga fakatā ia te ʼu tuʼulaga ʼaē ʼe tatau mo ʼaē ʼo te ʼu kalasi e toko 24 ʼo te kau tagata ʼāfea ʼaē ʼe gāue faka pelepitelō. ʼE natou hā ʼi te meʼa ʼaē ʼe hā mai ai ia te kautahi ʼa Sehova ʼi te lagi. (1 Tesalonika 4:15, 16; 1 Fakamatala 24:1-18; Fakahā 4:4; 6:11) Koia, ko te toe ʼo te toko 144 000 ʼaē ʼe kei māʼuʼuli ʼi te kele, ʼe natou hivaʼi ia te hiva foʼou iā muʼa, peʼe iā mata ʼo tonatou ʼu tehina ʼaē kua fakatuʼuake ki selō.

11. He koʼē ko te kau Kilisitiano fakanofo ʼaia neʼe mālo, ʼe faka ʼuhiga ki te toko 24 kau tagata ʼāfea fakatātā pea mo te toko 144 000?

¹¹ ʼE feala pē ke tou lagaʼi ia te fehuʼi ʼaenī: He koʼē ko te kau fakanofo ʼaia neʼe mālo, ʼe faka ʼuhiga ki te toko 24 kau tagata ʼāfea fakatātā pea mo te toko 144 000? Koteʼuhi heʼe faka ʼuhiga ʼi te Fakahā ia te kūtuga ʼaia ki te ʼu tuʼulaga e lua. ʼE fakahā tuʼumaʼu mai ia te toko 24 kau tagata ʼāfea ʼi tonatou tuʼulaga fakaʼosi ʼaē iā tafa ʼo te hekaʼaga fakahau ʼo Sehova, kua fakanofo hau pea mo pelepitelō ʼi selō. ʼE natou fakatātā ia te kātoa ʼo te toko 144 000 ʼi tonatou tuʼulaga ʼaē ʼi selō, logopē lā ʼi te temi nei, ʼe kei toe niʼihi ʼo nātou ʼi te kele. (Fakahā 4:4, 10; 5:5-14; 7:11-13; 11:16-18) Kae iā Fakahā kāpite 7, ʼe ina fakahā mai ʼe toʼo mai te toko 144 000 mai te mālamanei, pea ʼe talanoa tāfito ʼo ʼuhiga mo te fakatuʼutuʼu lahi ʼa Sehova ke ina fakaʼiloga ia te Iselaele fakalaumālie kātoa pea mo haofaki ia te toe hahaʼi tokolahi ʼaē ʼe mole malau tona kaugamālie. ʼE tou maʼu iā Fakahā kāpite 14 te fakamatala ʼaē ʼe ina fakamoʼoni mai ko te kalasi kātoa ʼo te Puleʼaga, ia te toko 144 000 ʼaē neʼe mālo, ʼe natou fakatahitahi anai mo te ʼAkeno ʼi te Moʼuga ʼo Sione. ʼE tou vakaʼi anai ʼi te kāpite ʼaenī ia te ʼu meʼa ʼaē ʼe fakamaʼua ki te toko 144 000.d

ʼE Natou Mulimuli ʼi Te ʼAkeno

12. (a) Koteā ʼaē neʼe toe ʼui e Soane ʼo ʼuhiga mo te toko 144000? (b) ʼE faka ʼuhiga feafeaʼi te ʼui ʼaē ʼe tāupoʼou ia te toko 144 000?

¹² Neʼe toe ʼui fēnei e Soane ʼo ʼuhiga mo te toko 144 000 ʼaē ʼe “totogi mai te kele”: “Ko nātou ʼaia ʼaē neʼe mole heʼeki natou ʼulihi ia nātou ʼaki he ʼu fafine; ʼi tona ʼaluʼaga moʼoni, ʼe kei natou tāupoʼou. Ko nātou ʼaia neʼe natou haga muliʼi te ʼAkeno ʼi te potu fuli pē ʼaē ʼe ʼalu kiai. Ko nātou ʼaia neʼe totogi mai te hahaʼi ko te ʼu polopolo maʼa te ʼAtua pea mo te ʼAkeno, pea neʼe mole maʼu he kākā ʼi ʼonatou gutu, ʼe mole he mele iā nātou.” (Fakahā 14:4, 5) Ko te ʼui ʼaē ko te toko 144 000 ʼe natou “tāupoʼou” ʼe mole faka ʼuhiga leva ko nātou ʼo te kalasi ʼaia ʼe mole feala hanatou ʼohoana ʼi tonatou temi maʼuli ʼi te faʼahi ʼo te kakano. He neʼe tohi fēnei e te ʼapositolo ko Paulo ki te kau Kilisitiano ʼaē kā ʼolo anai ki selō, ʼi te tahi ʼu ʼaluʼaga ʼe ʼaoga anai te nofo ʼohoana ʼi te nofo selipatea, logolā ʼe maʼu te ʼu lelei ki he Kilisitiano ke mole ʼohoana. (1 Kolonito 7:1, 2, 36, 37) ʼE natou tāupoʼou ʼi te faʼahi fakalaumālie, heʼe mole natou tono fakalaumālie mo te ʼu fakatuʼutuʼu faka politike ʼo te mālamanei pea mo te ʼu lotu hala. (Sake 4:4; Fakahā 17:5) ʼI tonatou ʼuhiga ʼohoana ʼaē neʼe fakapapauʼi kiā Kilisito, ʼe natou nonofo maʼa pea mo “heʼe mele ʼi te lotolotoiga ʼo he taʼiake aga fakalialia pea mo aga fakapikopiko.”—Filipe 2:15.

13. He koʼē ʼe tāu mo feʼauga mo te toko 144 000 ke natou liliu ko he ʼohoana ʼo Sesu Kilisito, pea ko te ʼu ʼaluʼaga fea ʼaē ʼe tou lava ʼui ai ʼe natou “haga mulimuli ki te ʼAkeno ʼi he potu pē ʼe ʼalu kiai”?

¹³ Tahi ʼaē meʼa, “neʼe mole maʼu he kākā ʼi ʼonatou gutu.” ʼE natou hagē ai ko tonatou Hau, ia Sesu Kilisito. ʼI tana kei maʼuli ko he tagata haohaoa, “neʼe mole agahala, pea neʼe mole maʼu he lakahala ʼi tona gutu.” (1 Petelo 2:21, 22) ʼI tonatou ʼuhiga heʼe mele pea mo moʼoni, ʼe teuteuʼi te toko 144 000 ohagē ko he “fafine ʼohoana” aga fakapoipoi maʼa te Pelepitelō Lahi ʼa Sehova. ʼI te kei maʼuli ʼa Sesu ʼi te kele, neʼe ina fakaafe ia te hahaʼi ʼaē ʼe fia fai ki te faitotonu ke natou mulimuli iā te ia. (Maleko 8:34; 10:21; Soane 1:43) Ko nātou ʼaē neʼe natou tali ia te fakaafe ʼaia, neʼe natou faʼifaʼitakiʼi tona faʼahiga maʼuli pea mo maʼuliʼi tana ʼu akonaki. Koia, ʼi tanatou lolotoga māʼuʼuli ʼi te kele, ʼe natou “haga muliʼi te ʼAkeno ʼi te potu fuli pē ʼaē ʼe ʼalu kiai,” ʼo ina takitaki ia nātou ʼi te mālamanei ʼaē ʼe puleʼi e Satana.

14. (a) Ko te ʼaluʼaga fea ʼaē ʼe ʼui ai ko te toko 144 000 ʼe ko “te ʼu polopolo maʼa te ʼAtua pea mo te ʼAkeno”? (b) Koteā tona faka ʼuhiga ʼo te ʼui ʼaē ko te toe hahaʼi tokolahi ʼe natou kau foki mo nātou ki te ʼu polopolo?

¹⁴ Ko te toko 144 000 ʼe “totogi mai te kele,” ʼe “totogi mai te hahaʼi.” Kua vavae nātou ko te ʼu foha ʼo te ʼAtua, pea ʼi tonatou ʼosi fakatuʼuake ʼe mole kei natou nonofo ʼi tonatou ʼuhiga kelekele ʼi te kakano pea mo te toto. Ohagē ko tona fakahā mai ʼi te vaega 4, ʼe natou liliu ko te “ ʼu polopolo maʼa te ʼAtua pea mo te ʼAkeno.” ʼE moʼoni, ʼi te ʼuluaki sēkulō, neʼe ko Sesu “te ʼu polopolo ʼo nātou ʼaē kua momoe ʼi te mate.” (1 Kolonito 15:20, 23) Kae ko te toko 144 000 ʼe ko he ʼu “faʼahiga polopolo” ʼo te mālamanei heʼe haohaoa, neʼe totogi ʼaki te sākilifisio ʼa Sesu. (Sake 1:18) ʼE mole fakaʼosi ʼaki ia nātou ia te tānaki ʼo te hahaʼi ʼo te mālamanei. Neʼe kua talanoa te tohi ʼo te Fakahā ki te tānaki ʼo te toe hahaʼi tokolahi ʼe mole malau, pea ʼe natou kalaga leʼolahi fēnei: “Ko te fakamaʼuli, ʼe tou maʼu mai totatou ʼAtua ʼaē ʼe heka ʼi te hekaʼaga fakahau, pea mo te ʼAkeno.” ʼE hao anai te hahaʼi ʼaia ʼi te toe mamahi lahi, pea ʼi tanatou ʼinu ki “he ʼu matapuna vai ʼo te maʼuli,” ʼe natou liliu anai ʼaki te temi ko he ʼu hahaʼi haohaoa ʼi te kele. Hili anai he kiʼi temi ʼi te ʼosi ʼo te mamahi lahi, pea ʼe fakaʼātea anai ia te Hatesi, pea ʼe fakatuʼuake anai te tahi ʼu lauʼi miliona hahaʼi pea mo faka fealagia ke natou ʼiʼinu ki te ʼu vai ʼaia ʼo te maʼuli. ʼAki tatatou mahino ʼaia, ʼe feala ke tou ʼui ko te toe hahaʼi tokolahi, ʼe ko te ʼu polopolo ʼo te tahi ʼu ovi—ʼaē ko te ʼu ʼuluaki hahaʼi ʼaē ʼe natou ‘fō tonatou ʼu kofu loloa pea mo natou fakahihina ʼi te taʼataʼa ʼo te ʼAkeno,’ pea mo natou maʼu ia te ʼamanaki ʼaē ko te maʼuli ʼo heʼegata ʼi te kele.—Fakahā 7:9, 10, 14, 17; 20:12, 13.

15. Koteā ia te ʼu faʼahi ʼaē ʼe tatau ai te ʼu polopolo kehekehe ʼaia e tolu pea mo te ʼu lafeti ʼaē neʼe fai ʼo mulimuli ki te Lao ʼa Moisese?

¹⁵ ʼE ʼi ai te ʼu faʼahi ʼe tatau ai te ʼu polopolo ʼaia e tolu (ia Sesu Kilisito, te toko 144 000, pea mo te hahaʼi tokolahi) pea mo te ʼu lafeti ʼaē neʼe fai ʼo mulimuli ki te Lao ʼa Moisese ʼi te temi muʼa. ʼI te ʼaho 16 ʼo Nisani, lolotoga te Lafeti ʼo te ʼu Keke ʼaē ʼe mole hona Meʼa Fakatupu, neʼe mōlagaʼi kiā Sehova te fuhiga ʼo te ʼu polopolo ʼo te taʼukai ʼo te olose. (Levitike 23:6-14) Pea ko te ʼaho tonu ʼaia ʼo te 16 ʼo Nisani, ʼaē neʼe fakatuʼuake ai ia Sesu mai te mate. ʼI te 50 ʼaho, ʼo kamata mai te ʼaho 16 ʼo Nisani, ʼi te tolu māhina, neʼe fai e te kau Iselaele ia te lafeti ʼo te Taʼukai ʼo te ʼu polopolo ʼo te ʼu fulumeto ʼaē kua mātutuʼa. (Ekesote 23:16; Levitike 23:15, 16) Neʼe fakahigoaʼi ia te lafeti ʼaia ko te Penikositē (mai te kupu faka Keleka ʼaē ko tona faka ʼuhiga ko te “nimagofulu”), pea neʼe ko te Penikositē ʼo te taʼu 33 ʼo totatou temi ʼaē neʼe fakanofo ai ʼaki te laumālie māʼoniʼoni ia te ʼu ʼuluaki hahaʼi ʼaē ʼe kau ki te toko 144 000. Pea ʼi te fitu māhina, kā ʼosi te tānaki kātoa ʼo te ʼu taʼukai, neʼe fai e te kau Iselaele ia te Lafeti ʼo Te ʼu Fale Lau, ʼaē neʼe ko he temi ʼo he ʼu fakafetaʼi fakafiafia, pea lolotoga ia he vāhaʼa kātoa neʼe nonofo te kau Iselaele ʼi te ʼu fale lau neʼe faʼu ʼaki te lau ʼo te ʼu pālema. (Levitike 23:33-43) ʼO ʼalutahi mo te faʼahi ʼaia, ko te hahaʼi tokolahi, ʼaē ko he koga ʼo te taʼukai lahi, ʼe natou fakafetaʼi iā muʼa ʼo te hekaʼaga fakahau ʼaki “te ʼu pālema ʼi tonatou ʼu nima.”—Fakahā 7:9.

ʼE Kalagaʼi Te Logo Lelei Heʼegata

16, 17. (a) Neʼe sio ia Soane ki te ʼāselo ʼe lele ʼifea, pea koteā te logo ʼaē neʼe ina kalagaʼi? (b) Ko ai ʼaē ʼe kau ki te faka mafola ʼo te Puleʼaga, pea koteā tona ʼu fakamoʼoni?

¹⁶ Neʼe toe ʼui fēnei e Soane: “Pea neʼe au sio ki te tahi ʼāselo ʼe lele ʼi te lotomālie ʼo te lagi, pea neʼe ʼi ai tana logo lelei ʼe heʼegata ke ina kalagaʼi ohagē ko he evaselio kiā nātou ʼaē ʼe nonofo ʼi te kele, pea mo te ʼu puleʼaga kehekehe, te telepī kehekehe, te lea kehekehe pea mo te hahaʼi kehekehe, ʼo ina ʼui leʼolahi: ‘Kotou manavasiʼi ki te ʼAtua pea mo kotou faka kolōlia kiā te ia, heʼe kua hoko mai te hola ʼo tana fakamāu, pea ke kotou ʼatolasio kiā te ia ʼaē neʼe ina faʼu ia te lagi mo te kele mo te tai pea mo te ʼu matapuna vai.’ ” (Fakahā 14:6, 7) ʼE lele te ʼāselo “ ʼi te lotomālie ʼo te lagi,” ʼaē ʼe lele ai te ʼu manulele. (Vakaʼi ia Fakahā 19:17.) Koia, ʼe feala ke logoʼi tona leʼo ʼi te mālamanei kātoa. Ko te kalaga faka mālamanei ʼa te ʼāselo ʼaia, ʼe kaugamālie age te hahaʼi ʼaē ʼe natou logo kiai, ʼi he tala logo ʼe fai ʼi te televisio!

¹⁷ ʼE uga tātou takitokotahi e te ʼāselo ke mole tou manavasiʼi ki te manu fekai pea mo tona fakatātā, kae ke tou manavasiʼi kiā Sehova, ʼaē ʼe mālohi age ʼi te ʼu manu fakatātā ʼaē ʼe fakalogo kiā Satana. Neʼe ko Sehova ʼaē neʼe ina faʼu ia te lagi pea mo te kele, pea ʼi te lakaga nei, kua hoko mai te temi ʼaē ʼe tonu ai ke ina fakamāuʼi te kele! (Vakaʼi ia Senesi 1:1; Fakahā 11:18.) ʼI tana kei maʼuli ʼi te kele, neʼe fai fakakikite ia Sesu ʼo ʼuhiga mo totatou temi ʼo ina ʼui fēnei: “Pea ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mateo 24:14) ʼE fakahoko te gāue ʼaia e te kōkelekāsio ʼo te kau Kilisitiano fakanofo. (1 Kolonito 9:16; Efesi 6:15) Kae ʼe fakahā mai ʼi te Fakahā ʼe toe kau foki mo te kau ʼāselo fakapulipuli ki te gāue fai faka mafola. ʼE lahi te ʼu lakaga neʼe taki ai e te kau ʼāselo te kau Fakamoʼoni ʼa Sehova ki te ʼu hahaʼi ʼe natou tau mo te ʼu mamahi pea neʼe natou fakaʼamu ki he tokoni fakalaumālie, pea ʼi ʼihi temi, neʼe natou faikole ke foaki age kiā nātou he tokoni fakalaumālie!

18. Ohagē ko tana fakahā mai e te ʼāselo ʼaē ʼe lele ʼi te lotomālie ʼo te lagi, ko te hola fea ʼaē kua hoko mai, pea ko ai ʼaē kā ina fakahā te tahi ʼu logo?

¹⁸ Ohagē ko tona kalagaʼi e te ʼāselo ʼaē ʼe lele ʼi te lotomālie ʼo te lagi, kua hoko mai te hola ʼo te fakamāu. Koteā te fakamāu ʼaē kā fakahoko e te ʼAtua ʼi te temi nei? ʼE makini anai te ʼu taliga ʼo te hahaʼi ʼi te ʼu logo ʼaē kā fakahā ʼi te temi nei e te lua, mo te tolu, mo te fā, pea mo te nima ʼāselo.—Selemia 19:3.

[Kiʼi nota]

[Paki ʼo te pasina 202, 203]

Te toko 144 000

Te toko 24 kau tagata ʼāfea

Ko te ʼu kaugā hau ʼo te ʼAkeno ko Kilisito Sesu, ʼaki tona ʼu fakamahino kehekehe e lua