ʼE Natou “Haga Muliʼi Te ʼAkeno”
“Ko nātou ʼaia [ʼe] natou haga muliʼi te ʼAkeno ʼi te potu fuli pē ʼaē ʼe ʼalu kiai.”—FAKH. 14:4.
1. Neʼe feafeaʼi ki te ʼu tisipulo moʼoni ʼa Sesu ʼo ʼuhiga mo tanatou mulimuli ʼaē iā te ia?
IĀ TEITEI taʼu e lua vaelua ʼo tana minisitelio, neʼe “faiakonaki [Sesu] ʼi te fakatahi ʼa te hahaʼi ʼi Kapenaume.” ʼI te matakovi ʼaupitō ki ʼihi ia tana faiakonaki, “tokolahi ʼo tana kau tisipulo neʼe natou toe liliu ki te ʼu meʼa ʼaē ʼi muli, pea neʼe mole kei natou haʼele mo ia.” ʼI te fehuʼi age ʼa Sesu ki tana ʼu ʼapositolo e toko 12, peʼe natou toe fia mavae mo nātou, neʼe tali fēnei age e Simone Petelo: “ ʼAliki, ke matou ʼolo lā kiā ai? ʼE ke maʼu koe te ʼu folafola ʼo te maʼuli heʼegata; koia neʼe matou tui ai, pea neʼe matou ʼiloʼi ai ko koe ko te Māʼoniʼoni ʼa te ʼAtua.” (Soa. 6:48, 59, 60, 66-69) Ko te ʼu tisipulo moʼoni ʼa Sesu neʼe mole natou fia mavae mai iā te ia. ʼI tonatou ʼosi fakanofo ʼaki te laumālie māʼoniʼoni, neʼe hoko atu tanatou fakalogo ki te takitaki ʼaē ʼa Sesu.—Gāue 16:7-10.
2. (a) Ko ai koa ia “te tagata kaugana agatonu mo poto,” peʼe ko “te tagata tauhi ʼapi agatonu”? (b) Koteā ia te fakamatala lelei neʼe fai e te kalasi ʼo te tagata kaugana ʼo ʼuhiga mo te ‘muliʼi ʼaē ʼo te ʼAkeno’?
2 ʼE feafeaʼi ki te kau Kilisitiano fakanofo ʼo totatou temi? ʼI tana lea fakapolofetā ʼo ʼuhiga mo “te fakaʼiloga ʼo [tana] ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī,” neʼe talanoa ia Sesu ki te kūtuga ʼe faʼufaʼu e tana ʼu tisipulo ʼaē ʼi te kele, ʼaē neʼe fakanofo ʼaki te laumālie māʼoniʼoni, ʼe ko te “tagata kaugana agatonu mo poto,” peʼe ko “te tagata tauhi ʼapi agatonu.” (Mat. 24:3, 45; Luka 12:42) ʼI tonatou ʼuhiga kūtuga, neʼe fai e te kalasi ʼo te tagata kaugana ia te fakamatala lelei ʼo ʼuhiga mo te “muliʼi [ʼo] te ʼAkeno ʼi te potu fuli pē ʼaē ʼe ʼalu kiai.” (Lau ia Fakahā 14:4, 5.) Ko nātou ʼaia ʼe natou māʼuʼuli ohagē ko ni tāupoʼou ʼi te faʼahi fakalaumālie heʼe mole natou ʼulihi ia nātou ʼaki ni ʼu akonaki pea mo ni ʼu gāue ʼa “Papiloni Lahi,” ia te kautahi ʼo te ʼu lotu hala fuli. (Fakh. 17:5) ‘Neʼe mole maʼu ʼi ʼonatou gutu’ ia he akonaki loi, pea neʼe “mole he mele iā nātou” mai te mālama ʼa Satana. (Soa. 15:19) ʼI te kā haʼu, ko te kau fakanofo ʼaē kei māʼuʼuli ʼi te kele ʼe natou ‘mulimuli anai’ ʼi te ʼAkeno, ʼo natou ʼolo ki selō.—Soa. 13:36.
3. He koʼē ʼe maʼuhiga ke tou falala ki te kalasi ʼo te tagata kaugana?
3 Neʼe fakanofo e Sesu ia te tagata kaugana agatonu mo poto “ki tana hahaʼi faifekau,” ko tona fakaʼuhiga ko nātou takitokotahi ʼaē ʼe natou faʼufaʼu ia te kalasi ʼo te tagata kaugana, “ke ina foaki kiā nātou tanatou meʼa kai ʼi tona temi totonu.” Neʼe ina toe fakanofo te tagata kaugana “ki ʼona koloa fuli.” (Mat. 24:45-47) ʼI ‘te ʼu koloa fuli’ ʼaia, ʼe kau kiai ia “te toe hahaʼi tokolahi” ʼaē ʼe tuputupu peʼe ko “te tahi ʼu ovi.” (Fakh. 7:9; Soa. 10:16) ʼE mole tonu koa lā ki te kau fakanofo takitokotahi pea mo te “tahi ʼu ovi” ke natou falala ki te tagata kaugana ʼaē neʼe ina fakanofo nātou? ʼE lahi ia te ʼu tupuʼaga ke tou falala ai ki te kalasi ʼo te tagata kaugana. Ko tupuʼaga maʼuhiga e lua: (1) ʼE falala ia Sehova ki te kalasi ʼo te tagata kaugana. (2) ʼE toe falala mo Sesu ki te tagata kaugana. Tou vakaʼi age muʼa ia te fakamoʼoni ʼaē ko Sehova ʼAtua pea mo Sesu Kilisito ʼe nā falala kātoa ki te tagata kaugana agatonu mo poto.
ʼE Falala Ia Sehova Ki Te Tagata Kaugana
4. He koʼē ʼe tou lava falala ki te meʼa kai fakalaumālie ʼaē ʼe foaki mai e te tagata kaugana agatonu mo poto?
4 Tou vakaʼi age muʼa ia te tupuʼaga ʼo te lava foaki ʼaē e te tagata kaugana agatonu mo poto ia te meʼa kai fakalaumālie lelei ʼi tona temi totonu. ʼE ʼui fēnei e Sehova: “ ʼE au fakaliliu anai koe ke ke fakasiosio poto pea mo au akoʼi anai koe ʼi te ala ʼaē ʼe tonu ke ke haʼele ai.” ʼE ina toe ʼui fēnei: “ ʼE au foaki atu anai he ʼu tokoni, ʼo au leʼoleʼo koe.” (Pes. 32:8) ʼEī, ko Sehova ʼaē ʼe ina takitaki ia te tagata kaugana. Koia ʼe feala ai ke tou falala kātoa ki te fakasiosio poto Fakatohi-tapu, mo te mahino, mo te takitaki ʼaē ʼe tou maʼu mai te tagata kaugana.
5. Koteā ʼaē ʼe hā mai ai ko te laumālie ʼo te ʼAtua neʼe ina foaki ia te mālohi ki te kalasi ʼo te tagata kaugana?
5 ʼE toe tapuakiʼi foki e Sehova ia te kalasi ʼo te tagata kaugana ʼaki tona laumālie māʼoniʼoni. ʼE fakapulipuli ia te laumālie ʼo Sehova, kae ʼe hā lelei ia tana gāue iā nātou ʼaē ʼe natou maʼu ia te laumālie ʼaia. Kotou fakakaukauʼi age muʼa ki te ʼu gāue ʼaē neʼe lava fakahoko e te tagata kaugana agatonu mo poto ʼi tana fakahoko he fakamoʼoni ʼi te mālamanei kātoa ʼo ʼuhiga mo Sehova ʼAtua, mo tona ʼAlo, pea mo te Puleʼaga. Ko te kau ʼatolasio ʼa Sehova ʼe natou fakamafola mālohi ia te logo lelei ʼo te Puleʼaga iā fenua e 230 tupu pea mo te ʼatu ʼu motu. ʼE mole ko he fakamoʼoni koa lā ʼaia ko te laumālie ʼo te ʼAtua ʼe ina foaki ia te mālohi ki te tagata kaugana? (Lau ia Gāue 1:8.) Moʼo foaki ia te meʼa kai fakalaumālie ʼi tona temi totonu ki te hahaʼi ʼa Sehova ʼi te mālamanei kātoa, neʼe tonu ki te tagata kaugana ke ina fai ia te ʼu tuʼuga tonu maʼuhiga ʼo ʼuhiga mo tona teuteuʼi pea mo tona tufaki. ʼI tana fai ia te ʼu tonu ʼaia pea mo mulimuli kiai, neʼe fakahā aipē e te tagata kaugana ia te ʼofa, mo te agamalū, pea mo te tahi age ʼu agaaga ʼo te fua ʼo te laumālie māʼoniʼoni.—Kal. 5:22, 23.
6, 7. ʼE lahi feafeaʼi ia te falala ʼa Sehova ki te tagata kaugana agatonu?
6 Ke tou mahino ki te lahi ʼaupitō ʼaē ʼo te falala ʼa Sehova ki te tagata kaugana agatonu, tou fakakaukauʼi age muʼa te fakapapau ʼaē neʼe ina fai kiā nātou ʼaia. Neʼe tohi fēnei e te ʼapositolo ko Paulo: “[ʼE] pupuhi anai te fakatagi, pea mo fakatuʼuake ia te kau mate ʼo heʼe popo, pea ko tātou ʼaenī, ʼe tou fetogi anai. Heʼe tonu ki te meʼa ʼaē ʼe popo ke ina kofuʼi te meʼa ʼaē ʼe heʼe popo, pea ko te meʼa ʼaē ʼe mate ke ina kofuʼi ia te meʼa ʼaē ʼe tuputupua.” (1 Ko. 15:52, 53) Ko te kau tisipulo fakanofo ʼa Kilisito, ʼaē ʼe natou tauhi agatonu ki te ʼAtua pea mo mamate ʼi te ʼu sino ʼe popo, ʼe mole fakatuʼuake pē nātou ko he ʼu meʼa maʼuli fakalaumālie ʼe natou maʼu ia te maʼuli heʼegata. ʼE foaki age kiā nātou ia te maʼuli tuputupua: te maʼuli ʼe heʼegata pea ʼe mole feala ke toe fakaʼauha nātou. Tahi ʼaē, ʼe foaki age kiā nātou ia te maʼuli heʼe popo, ʼe natou maʼu he ʼu sino ʼe mole toe pala pea ʼe mole ʼaoga he ʼu faʼahi kehekehe moʼo taupau tonatou maʼuli. Iā Fakahā 4:4, ʼe talanoa ki te kau fakatuʼuake ʼaia, ʼe natou heheka ʼi te ʼu hekaʼaga fakahau mo tonatou ʼu kolona ʼaulo ʼi ʼonatou ʼulu. ʼE ʼamanaki maʼu e te kau Kilisitiano fakanofo ia te kolōlia ʼo te tuʼulaga hau. Kae ʼe mole gata aipē.
7 ʼE ʼui fēnei iā Fakahā 19:7, 8: “Kua hoko mai te ʼohoana ʼo te ʼAkeno, pea kua teuteu tona ʼohoana. ʼIo, neʼe fakatotonu age ke ina kofuʼi te lino mānifi gigila pea mo mamaʼa, heʼe ko te lino mānifi ʼe ina fakatātā ia te ʼu gāue faitotonu ʼa te kau māʼoniʼoni.” Neʼe fili e Sehova ia te kau Kilisitiano fakanofo ke natou liliu ko te fafine ʼohoana ʼo tona ʼAlo. ʼE ko he ʼu meʼa ʼofa fakaʼatua ʼe natou maʼu anai, ia te heʼe popo, mo te maʼuli tuputupua, mo te ʼalikisia, “te ʼohoana ʼo te ʼAkeno.”! ʼE ko he ʼu fakamoʼoni fakaofoofo ʼaia ʼo te falala ʼa te ʼAtua ki te kau fakanofo, ʼaē ʼe natou ‘haga muliʼi aipē te ʼAkeno ʼi te ʼu potu fuli pē ʼe ʼalu kiai.’
ʼE Falala Ia Sesu Ki Te Tagata Kaugana
8. ʼE fakahā feafeaʼi e Sesu ia tana falala ki tana ʼu tisipulo ʼaē neʼe fakanofo ʼaki te laumālie māʼoniʼoni?
8 Ko te fakamoʼoni fea ʼe fakahā ai ia te falala kātoa ʼa Sesu ki tana ʼu tisipulo ʼaē neʼe fakanofo ʼaki te laumālie? ʼI te pō fakaʼosi ʼo tona maʼuli ʼaē ʼi te kele, neʼe fai e Sesu ia te fakapapau ki tana ʼu ʼapositolo e toko 11, ʼo ina ʼui fēnei: “Ko koutou ia ʼaē neʼe nonofo fakatahi tuʼumaʼu mo au ʼi toku ʼu ʼahiʼahiʼi; pea ʼe au fai he fuakava mo koutou, ohagē ko taku tamai neʼe ina fai te fuakava mo au, ki he puleʼaga, koteʼuhi ke kotou kakai pea mo ʼiʼinu ʼi toku laupapa kai ʼi toku puleʼaga, pea mo kotou heheka ʼi he ʼu hekaʼaga fakahau moʼo fakamāuʼi ia te ʼu telepī e hogofulu-mā-lua ʼo Iselaele.” (Luka 22:28-30) Ko te fuakava ʼaē neʼe fai e Sesu mo te ʼu ʼapositolo e toko 11, neʼe toe fai mo te toko 144 000 kau Kilisitiano fakanofo. (Luka 12:32; Fakh. 5:9, 10; 14:1) Kanapau lā neʼe mole falala ia Sesu kiā nātou, ʼe ina fai anai koa ia he fuakava moʼo vaevae ia tona Puleʼaga mālohi mo nātou ʼaia?
9. Koteā ia te ʼu ‘koloa fuli ʼo Kilisito’?
9 Tahi ʼaē, neʼe fakanofo e Sesu Kilisito ia te tagata kaugana agatonu mo poto “ki ʼona koloa fuli,” ʼaē ʼe fakaʼuhiga ki te ʼu lelei fuli ʼo te Puleʼaga ʼaē ʼi te kele. (Mat. 24:47) ʼI te ʼu koloa ʼaia, ʼe ʼi ai te ʼu pilo gāue ʼo te fale lahi fakamālamanei ʼa te kau Fakamoʼoni ʼa Sehova, te ʼu filiale ʼaē ʼe tuʼu ʼi te ʼu fenua kehekehe, pea mo te ʼu Fale Fakatahi pea mo te ʼu Fale ʼo Te Puleʼaga ʼaē ʼi te mālamanei kātoa. ʼE toe kau ai foki mo te gāue fai fakamafola ʼo te logo lelei ʼo te Puleʼaga pea mo te fai ʼo ni ʼu tisipulo. Neʼe feala koa ke ina fakanofo he tahi ʼe mole falala ki ai ke tokaga pea mo ina fakaʼaogaʼi ia tona ʼu koloa ʼaia?
10. Koteā ʼaē ʼe tou ʼiloʼi ai ko Sesu Kilisito ʼe nofo mo tana ʼu tisipulo fakanofo?
10 Mole faʼa fualoa ʼi muʼa ʼo tana hake ki selō, ko Sesu ʼaē neʼe kua fakatuʼuake neʼe hā ki tana ʼu tisipulo agatonu pea neʼe ina fai age kiā nātou ia te fakapapau, ʼo ʼui māʼana: “Koʼenī, ʼe au nofo mo koutou ʼi te ʼaho fuli pē, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mat. 28:20) Neʼe fakahoko koa e Sesu ia te fakapapau ʼaia? ʼI te ʼu taʼu e 15 ʼaenī kua hili, ko te lahi ʼo te ʼu kōkelekāsio ʼa te kau Fakamoʼoni ʼa Sehova ʼi te mālamanei kua fakalaka ʼi te 70 000 ki te 100 000 tupu—ʼe ko he tuputupu e 40 tupu ki te teau. Pea ʼe feafeaʼi ki te ʼu tisipulo foʼou ʼaē neʼe hilifaki mai kiai? Ko te teitei 4 miliona tupu tisipulo neʼe papitema ʼi te ʼu taʼu e 15 kua hili atu—ko tona fakafuafua ko papitema e 800 tupu ʼi te ʼaho fuli. Ko te ʼu tuputupu fakatalakitupua ʼaia, ʼe ko he fakamoʼoni ʼe takitaki e Kilisito ia tana ʼu tisipulo fakanofo mokā nātou fakatahitahi ʼi tanatou ʼu fono pea ʼe lagolago kiā nātou ʼi tanatou fai he ʼu tisipulo.
Ko Te Tagata Kaugana ʼe Agatonu Pea Mo Poto
11, 12. Neʼe fakahā feafeaʼi e te tagata kaugana ia tana agatonu mo poto?
11 Mai tona ʼaluʼaga ʼaē ko Sehova ʼAtua pea mo Sesu Kilisito ʼe nā falala kātoa ki te tagata kaugana agatonu mo poto, ʼe mole tonu koa lā mo tātou ke tou falala kiai? ʼI tona fakahagatonu, neʼe fakahā e te tagata kaugana ia tana agatonu ʼi tana fai fakalelei ia te gāue ʼaē neʼe tuku age ke ina fai. Ohagē lā, ko te nusipepa Te Tule Leʼo kua hili nei kiai taʼu e 130 ia tona tā. Ko te ʼu fono, mo te ʼu fakatahi lalahi ʼa te kau Fakamoʼoni ʼa Sehova, ʼe kei hoko atu pē tonatou fakalotomālohiʼi tātou ʼi te faʼahi fakalaumālie.
12 Ko te tagata kaugana agatonu ʼe toe poto heʼe mole falala ia ki tona poto fakatagata, ʼe mole faiga ia ke muʼa age ia iā Sehova, ʼe mole toe holomuli mokā ʼe mahino lelei ki te takitaki ʼa te ʼAtua ʼo ʼuhiga mo he meʼa. Ohagē lā, logolā ia te tali fakafufū peʼe fakahāhā e te kau takitaki lotu ia tanatou leleiʼia ia te aga ʼa te hahaʼi ʼo te mālamanei ʼaē ko te manatu pē kiā nātou totonu pea mo te aga heʼe lotu, kae ko te tagata kaugana ʼe ina foaki ia te ʼu fakatokaga ʼo ʼuhiga mo te ʼu kākā ʼa te tuʼu agakovi ʼa Satana. ʼE feala ki te tagata kaugana ke ina foaki he ʼu fakatokaga fakapotopoto pea ʼi tona temi totonu, koteʼuhi ko Sehova ʼAtua pea mo Sesu Kilisito ʼe nā tapuakina tana gāue. Koia ʼe tuha mo te tagata kaugana ke tou falala kātoa kiai. Kae ʼe feafeaʼi hatatou fakahā ʼe tou falala ki te tagata kaugana agatonu mo poto?
Kotou ‘ ʼOlo Mo’ Te Kau Fakanofo ʼi Tanatou Muliʼi ʼAē Ia Te ʼAkeno
13. ʼI te lea fakapolofetā ʼa Sakalia, ʼe lava fakahā feafeaʼi e te hahaʼi ia tanatou falala ʼaē ki te tagata kaugana agatonu mo poto?
13 Ko te tohi ʼa Sakalia ʼe talanoa kiā “tagata e toko hogofulu” ʼe natou fakaovi ki “te tagata Sutea” pea ʼe natou ʼui fēnei: “ ʼE matou ʼolo anai mo koutou.” (Lau ia Sakalia 8:23.) ʼAki te kupu “koutou,” ʼe fakatā ai e “te tagata Sutea” ia te hahaʼi. ʼI totatou temi, ʼe ina fakatā te toe ʼo te kau Kilisitiano fakanofo—te koga ʼo “te Iselaele ʼo te ʼAtua.” (Kal. 6:16) Ko “te ʼu tagata e toko hogofulu mai te ʼu lea kehekehe ʼo te ʼu puleʼaga,” ʼe natou fakatā te toe hahaʼi tokolahi ʼo te tahi ʼu ovi. Ohagē pē ko te kau Kilisitiano fakanofo ʼaē ʼe natou mulimuli iā Sesu ʼi te ʼu potu fuli pē ʼaē ʼe ʼalu kiai, ko te toe hahaʼi tokolahi ʼe natou ‘ ʼolo’ peʼe natou kaugā ʼolo mo te tagata kaugana agatonu mo poto. Ko nātou ʼaē ʼe natou kau ki te toe hahaʼi tokolahi ʼe mole tonu ke natou ufiufi ʼi he temi ʼi tanatou kaugā gāue mo nātou ʼaē ʼe “kau ki te pāui ʼaē mai lagi.” (Hep. 3:1) ʼE mole ufiufi ia Sesu ʼi te pāui ʼo te kau fakanofo ko tona ‘ ʼu tehina.’—Hep. 2:11.
14. Neʼe foaki feafeaʼi ia he lagolago agatonu ki te ʼu tehina ʼo Kilisito?
14 ʼE fakaʼuhiga e Sesu Kilisito ia te lagolago agatonu ʼaē ʼe foaki ki tona ʼu tehina ohagē ko he lagolago ʼe fai age kiā te ia. (Lau ia Mateo 25:40.) Kae ʼe feafeaʼi kiā nātou ʼaē ʼe natou maʼu ia te ʼamanaki ʼaē ke natou māʼuʼuli ʼi te kele, ia hanatou lava lagolago ki te ʼu tehina ʼo Kilisito ʼaē neʼe fakanofo ʼaki te laumālie māʼoniʼoni? ʼE natou fai tāfito ia te faʼahi ʼaia ʼaki tanatou tokoni ʼaē kiā nātou ʼi te fakamafola ʼo te logo lelei ʼo te Puleʼaga. (Mat. 24:14; Soa. 14:12) ʼE hifohifo ia te kaugamālie ʼo te kau fakanofo ʼi te ʼu taʼu e hogofulu ʼaenī kua hili, kae kua tuputupu ake ia te kaugamālie ʼo te tahi ʼu ovi. ʼI te temi ʼaē ʼe kau ai ki te gāue fai fakamafola ia nātou ʼaē ʼe ʼamanaki māʼuʼuli ʼi te kele, pea mo natou gāue ko he kau fai fakamafola ʼo te evaselio temi kātoa mokā natou fealagia, ʼe natou lagolago kiā nātou ʼaē neʼe fakanofo ʼaki te laumālie māʼoniʼoni, ʼi te fakahoko ʼo te gāue ʼaē ko te fai ʼo he ʼu tisipulo. (Mat. 28:19, 20) ʼAua naʼa galo kiā tātou ia te ʼu faigamālie ʼaē ke tou lagolago ki te gāue ʼaia ʼaki hatatou foaki ia he ʼu meʼa ʼofa fakapaʼaga ʼi he ʼu ʼaluʼaga kehekehe.
15. Koteā ia tatatou manatu takitokotahi ki te meʼa kai fakalaumālie ʼaē ʼe foaki ʼi tona temi totonu e te tagata kaugana pea mo te ʼu tonu ʼaē ʼe ina fai ʼo ʼuhiga mo te kautahi?
15 ʼI totatou ʼuhiga Kilisitiano takitokotahi, koteā ia tatatou manatu ʼo ʼuhiga mo te meʼa kai fakalaumālie ʼaē ʼe foaki mai ʼi tona temi totonu e te tagata kaugana, ʼaki te ʼu tohi Fakatohi-tapu pea ʼaki te ʼu fakatahitahi Fakakilisitiano? ʼE tou loto fakafetaʼi koa ki te meʼa kai ʼaia pea mo tou foimo maʼuliʼi ia te ʼu meʼa ʼaē ʼe tou ako? Koteā ia tatatou manatu ki te ʼu tonu ʼaē ʼe fai e te tagata kaugana ʼo ʼuhiga mo te kautahi? Ko tatatou lotolelei ʼo fakalogo ki te takitaki ʼaē ʼe foaki mai, ʼe ko he fakamoʼoni ʼaia ʼo tatatou tui ki te ʼu fakatuʼutuʼu ʼa Sehova.—Sake 3:17.
16. He koʼē ʼe tonu ki te kau Kilisitiano fuli ke natou fakalogo ki te ʼu tehina ʼo Kilisito?
16 Neʼe ʼui fēnei e Sesu: “ ʼE fakalogo taku ʼu ovi ki toku leʼo, pea ʼe au ʼiloʼi ia nātou, pea ʼe natou mulimuli iā te au.” (Soa. 10:27) ʼE moʼoni ia te faʼahi ʼaia ʼo ʼuhiga mo te kau Kilisitiano fakanofo. ʼE feafeaʼi kiā nātou ʼaē ʼe ‘ ʼolo mo’ nātou? Ko nātou ʼaia ʼe tonu ke natou fakalogo kiā Sesu. ʼE tonu foki ke natou toe fakalogo ki tona ʼu tehina. ʼI tona fakahagatonu, neʼe tuku age kiā nātou ia te maʼua tāfito ʼaē ke natou tōkakaga ki te maʼuli lelei fakalaumālie ʼo te hahaʼi ʼa te ʼAtua. Koteā ia te fakaʼuhiga ʼo te fakalogo ʼaē ki te leʼo ʼo te ʼu tehina ʼo Kilisito?
17. Koteā ia te fakaʼuhiga ʼo te fakalogo ki te kalasi ʼo te tagata kaugana?
17 Ko te Kolesi Pule iā ʼaho nei ʼaē ʼe ina fakafofoga ia te tagata kaugana agatonu mo poto, ʼo ina takitaki pea mo lagiaki ia te fakamafola ʼo te logo lelei ʼo te Puleʼaga ʼi te kele kātoa. Ko te ʼu tehina ʼo te Kolesi Pule kua natou popoto ʼi te gāue, ko te ʼu tagata ʼāfea ʼaē neʼe fakanofo ʼaki te laumālie māʼoniʼoni. Ko nātou tāfito ʼaia, ʼe feala ke ʼui ko he kau “takitaki” iā tātou. (Hep. 13:7) Moʼo tokaga ki te kau fai fakamafola e toko 7 000 000 tupu iā kōkelekāsio e 100 000, ko te kau taupau fakanofo ʼaia ʼe ‘lahi tuʼumaʼu tanatou ʼu gāue ʼi te ʼAliki.’ (1 Ko. 15:58) Ko te fakalogo ʼaē ki te tagata kaugana, ko tona fakaʼuhiga ke tou lagolago kātoa ki te takitaki ʼa te Kolesi Pule.
Ko Nātou ʼAē ʼe Fakalogo Ki Te Tagata Kaugana ʼe Tapuakinaʼi Nātou
18, 19. (a) ʼE tapuakinaʼi feafeaʼi ia nātou ʼaē ʼe fakalogo ki te tagata kaugana agatonu mo poto? (b) Koteā ʼaē ʼe tonu ke tou fakatotonu ke tou fai?
18 Talu mai tona fakanofo, ko te tagata kaugana agatonu mo poto ʼe ina “ ʼaumai te tokolahi ki te faitotonu.” (Tan. 12:3) Iā nātou ʼaia, ʼe kau ai ia nātou ʼaē ʼe ʼamanaki ke natou hao ʼi te fakaʼauha ʼo te tuʼu ʼo te ʼu faʼahiga meʼa ʼaenī. ʼI tapuakina leva ia hatatou maʼu ia te ʼuhiga faitotonu ʼaia iā muʼa ʼo te ʼAtua!
19 ʼI te kā haʼu, mokā ‘ ʼe hifo anai mai te lagi, mai te ʼAtua ia te kolo tapu, ia te Selusalemi Foʼou [ʼe faʼufaʼu e te toko 144 000], pea kua teuteuʼi ohagē ko he fafine ʼohoana kua fakamataleleiʼi ki tona ʼohoana,’ koteā ʼaē kā hoko anai kiā nātou ʼaē neʼe fakalogo ki te leʼo ʼo te tagata kaugana? ʼE ʼui fēnei ʼi te Tohi-Tapu: “Ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.” (Fakh. 21:2-4) Koia ʼe tonu ai ke tou fakalogo kiā Kilisito pea mo tona ʼu tehina ʼaē neʼe fakanofo ʼaki te laumālie māʼoniʼoni, ʼaē ʼe tāu mo te falala.
Koteā ʼAē Neʼe Kotou Ako?
• Ko te fakamoʼoni fea ʼaē ʼe hā mai ai ko Sehova ʼe falala ki te tagata kaugana agatonu mo poto?
• Koteā ʼaē ʼe fakahā ai ko Sesu Kilisito ʼe falala kātoa ki te kalasi ʼo te tagata kaugana?
• He koʼē ʼe tuha ke tou falala ki te tagata tauhi ʼapi agatonu?
• ʼE tou fakahā feafeaʼi ia tatatou falala ʼaē ki te tagata kaugana?
[Paki ʼo te pasina 25]
ʼE kotou ʼiloʼi koa pe ko ai ʼaē neʼe fili e Sehova ke liliu ko te fafine ʼohoana ʼo tona ʼAlo ʼi te kā haʼu?
[Paki ʼo te pasina 26]
Neʼe tuku e Sesu Kilisito tona ʼu “koloa” ki te tagata kaugana agatonu mo poto
[Paki ʼo te pasina 27]
Kā tou kau ki te fai fakamafola, pea ʼe tou lagolago kiā nātou ʼaē neʼe fakanofo ʼaki te laumālie māʼoniʼoni