Te ʼu Gāue Lalahi Lolotoga Te ʼAfio ʼo Kilisito
“Koia ʼe ʼui anai e te hau kia nātou ʼaē ʼe nonofo anai ʼi tona toʼomataʼu: ‘Koutou ʼomai, koutou ʼaē neʼe tapuakiʼi e taku Tāmai, ke koutou maʼu te puleʼaga ʼaē neʼe teuteuʼi maʼa koutou talu mai te kamata ʼo te malamanei.’ ” — Mateo 25:34.
1. ʼE feafeaʼi te ʼaluʼaga ʼo te tatau ʼo te parousia ʼo Kilisito pea mo “te temi ʼo Noe”?
KO TE ʼafio ʼo Kilisito — ko te meʼa ʼaia neʼe fualoa tana fakatalitali! Ko te temi ʼaē ʼe tatau mo te “temi ʼo Noe” ʼaē neʼe talanoa kiai ia Sesu ʼe felogoi anai mo “te fakaʼosi ʼo te ʼu faʼahiga meʼa ʼo te tuʼu ʼaenī”, neʼe hoko ʼi te taʼu 1914 (Mateo 24:3, 37). Kae koteā anai te fua ʼa te ʼafio ʼo Kilisito peʼe parousia ki te toe ʼo te kau fakanofo ʼo “te tagata kaugana agatonu mo poto”? (Mateo 24:45.) ʼE tonu anai ke hikihiki tanatou gāue ʼi tonatou ʼuhiga ʼave mālama! Ko te ʼu meʼa fakaofoofo neʼe ʼamanaki ke hoko! Ko te gāue tānaki ʼe mole hona fakatatau ʼe ʼamanaki ke kamata.
2. Koteā te fakamaʼa neʼe fai moʼo fakahoko ia Malakia 3:1-5?
2 Kae ʼuluaki muʼa, ko te kau kilisitiano fakanofo ʼaia neʼe ʼaoga ke fakamaʼa nātou. Ohage ko tana fakakikite ia Malakia 3:1-5, ko Sehova ʼAtua mo tana “faifekau ʼo te fuakava”, ia Sesu Kilisito, neʼe ʼomai ʼo ʼaʼahi te fale lotu fakalaumālie ʼi te temi māfana ʼo te taʼu 1918. Pea ko te fakamāu neʼe tonu ke kamata muʼa ʼi te “ ʼapi ʼo te ʼAtua”. (1 Petelo 4:17.) ʼE fakakikite fēnei ia Malakia 3:3: “ ʼE tonu anai ke nofo [Sehova] ohage ko he tagata fakamaʼa tutu ukamea pea mo fakamaʼa ʼo te siliva, pea ʼe tonu anai ke ina fakamaʼa te ʼu foha ʼo Levi; pea ʼe tonu anai ke ina fakamaʼa ia nātou ohage ko te aulo pea mo te siliva.” Neʼe ko te temi fakamaʼa pea mo fakaʼātea.
3. He koʼe koa neʼe maʼuhiga ke hoko te fakamaʼa fakalaumālie ʼaia?
3 ʼI te lolotoga ʼo te temi fakamāu ʼaia, ʼaē neʼe kovi ʼaupito ai ʼi te taʼu 1918, ko te toe ʼo te kalasi ʼo te kaugana neʼe fakamaʼa mai te ʼu meʼa ʼuli ʼo te malamanei mo te ʼu meʼa ʼuli faka lotu. He koʼe koa neʼe fakamaʼa nātou e Sehova? Koteʼuhi ʼe pipiki ki te fale lotu fakalaumālie. Ko te fakatuʼutuʼu ʼaia, ʼe hage he fale lotu, ki te tauhi kia Sehova ʼaki te sakilifisio faifakalelei ʼo Sesu Kilisito. Neʼe loto e Sehova ke maʼa tona fale lotu ke fealagia ki te hahaʼi tokolahi ʼaē ʼaki te ʼamanaki e nātou maʼuʼuli ʼi te kele ʼe ʼaumai ki ai ke nātou maʼu he koga meʼa ʼe fakaʼapaʼapa ai ki tona Pule faʼifaʼitaliha, pea ʼe tāpuhā ai tona huafa fakaʼatua, pea ʼe ko he koga meʼa ʼe talagafua ai ki tana ʼu lao faitotonu. Koia, e nātou faka maʼuhiga anai ia Sehova pea mo nātou kau anai ki te fakaʼilo ʼo tana ʼu fakatuʼutuʼu taulekaleka.
Ko te tahi ʼu pilivilesio
4, 5. a) ʼE feafeaʼi te fakamaʼua e te fehuʼi ʼa Sesu Kilisito kia nātou takitokotahi ʼo te kalasi ʼo te kaugana ʼo te temi nei? b) ʼE tonu ke feafeaʼi te mahino ki te ʼu fasiga palalau ʼaē ko te “tagata kaugana agatonu mo poto” pea mo “tana ʼu hahaʼi faifekau”? c) Koteā te fekau neʼe tuku e Sesu ki te tagata kaugana?
4 ʼI te 1919, ko te kalasi ʼo te kaugana ʼaē neʼe kua fakamaʼa neʼe feala leva ke sio ki te ʼu gāue ʼe tuputupu tuʼumaʼu pe. ʼI te 1914, Ko Sesu Kilisito, te Pule ʼo te kalasi ʼaia, neʼe ina foaki kia ia te Puleʼaga ʼi selo. ʼI tana toe liliu ʼaē ki tona ʼapi moʼo ʼaʼahi tana ʼu “hahaʼi faifekau” fuli, neʼe kua ina maʼu te tuʼulaga faka hau, ʼaē neʼe mole heʼeki ina maʼu ʼi tana nofo ʼi te kele. Koteā ʼaē neʼe ina maʼu? Ko te kalasi ʼo te kaugana neʼe maʼumaʼua koa ʼi tana tokaga ʼaē ki te ʼu koloā ʼo te Pule? Ohage ko tana fakahā ia Mateo 24:45-47, neʼe fai e Sehova te fehuʼi neʼe ina fakamaʼua ai ki te tisipulo fakanofo takitokotahi ke ina vakaʼi tana pipiki ʼaē ki te Mesia ʼa Sehova: “Ko ai moʼoni te tagata kaugana agatonu mo poto, ʼaē kua fakanofo ʼe tona ʼaliki ki tana hahaʼi faifekau, moʼo tufaki kia nātou tanatou meʼa kai ʼi tona lakaga totonu? Manuʼia te tagata kaugana ʼaia, mokā haʼu, tona ʼaliki, ʼo maʼu mai ʼe ina fai feiā! ʼE ʼau tala moʼoni atu kia koutou: ʼE ina fakanofo anai ia ki tana ʼu koloā fuli.”
5 ʼE ʼiloga ia, ko te meʼa ʼaē neʼe ʼui e Sesu ki te tagata kaugana agatonu ʼaia ʼe mole faka ʼuhiga ia ki he tagata. Kailoa ia, kae ko te fakamatala ʼe faka ʼuhiga ki te kokelekasio agatonu ʼa Kilisito, te kau fakanofo ʼi tonatou katoa. Ko te kau hahaʼi faifekau ʼe ko te kau tisipulo fakanofo pe ʼaia ʼa Kilisito takitahi. Neʼe ʼiloʼi e Sesu ʼe ina totogi anai te kau fakanofo ʼaia ʼaki tona taʼataʼa totonu, koia ʼaē neʼe palalau ai kia nātou ohage ko hana kaugana. ʼO ʼuhiga mo nātou, ʼe ʼui fēnei ia 1 Kolonito 7:23: “Neʼe toʼo KOUTOU [ʼo talanoa kia nātou fuli] ʼaki he totogi; ʼaua naʼa koutou toe fakaliliu ia koutou ko te ʼu kaugana ʼo te ʼu tagata.” Neʼe fekauʼi e Sesu te kalasi ʼo tana kaugana ke ina fakamū tana mālama ke tupu ai he ʼomai ʼa te hahaʼi pea mo fai ʼihi ʼu tisipulo, pea mo fafaga tana ʼu hahaʼi faifekau ʼo ina foaki age kia nātou tanatou meʼa kai fakalaumālie ʼi tona lakaga totonu.
6. Neʼe feafeaʼi te fakapale ʼo te tagata kaugana ʼi te ʼaʼahi ʼa Sesu?
6 Talu mai te temi ʼaē neʼe kamata ai te ʼafio ʼo Kilisito ʼo aʼu ki te taʼu 1918, ko te kalasi ʼo te kaugana, logope hona fehiʼaʼinaʼi, pea mo fakatagaʼi, neʼe ina faigaʼi aipe ke ina tufa te meʼa kai ki te ʼu hahaʼi faifekau ʼi tona lakaga totonu. Ko te meʼa ʼaia neʼe maʼu e tona Pule ʼi te temi ʼaē neʼe kamata ai tana ʼaʼahi. Ko te ʼAliki ko Sesu neʼe fiafia, pea ʼi te taʼu 1919 neʼe ina tala te manuʼia ʼo te kalasi ʼo te tagata kaugana ʼaia. Neʼe koteā te fakapale fakafiafia neʼe fai ki te tagata kaugana ʼi tana fai te fakatotonu ʼo tana Pule? Ko he hiki tuʼulaga! Ei, ko te ʼu maʼua lalahi neʼe foaki moʼo hikihiki te ʼu koloā ʼo tona Pule. ʼUhi ko te Pule kua liliu ko he Hau ʼi selo, ko tona ʼu koloā ʼi te kele kua liliu ia ʼo maʼuhiga age.
7, 8. a) Koteā “te ʼu koloā fuli” ʼa te Pule? b) Koteā te meʼa ʼe fakamaʼua ki te tagata kaugana ʼi tana leʼoleʼo ki te ʼu koloā ʼaia?
7 Koia, koteā “tana ʼu koloā fuli”? ʼE ʼiloga ia ko te ʼu meʼa fakalaumālie fuli ʼaē kua liliu ia ko te ʼu meʼa ʼa Kilisito ʼi te kele pea mo pipiki ki tana pule ʼi tona ʼuhiga Hau ʼi selo. Ko te meʼa ʼaia ʼe kau ai foki mo te fakatotonu ʼaē ko te fai ʼo he ʼu tisipulo ʼa Kilisito, ʼo fakatahi mo te pilivilesio lahi ʼaē ko te gāue ki te ʼu puleʼaga fuli ʼi te ʼuhiga fakafofoga ʼo te Puleʼaga ʼaē neʼe fakatuʼu e te ʼAtua.
8 Ko te hiki tuʼulaga ʼaia, ʼaē ko te leʼoleʼo ʼo te ʼu meʼa fuli ʼa te Pule neʼe fakamaʼua ai ki te kalasi ʼo te kaugana ke lahi tona temi pea mo tana tokaga ki te fakahoko ʼo te gāue ʼo te Puleʼaga pea mo te laga ʼo he tahi ʼu fale lalahi ki te gāue ʼaia. Kua ina maʼu nei tana gāueʼaga: ko te kele katoa.
Ko te tānaki ʼo te faga ōvi
9. Koteā te fua ʼo te fakalahi ʼo te ʼu gāue ʼo te kaugana?
9 ʼI tana talagafua, ko te tagata kaugana agatonu mo poto ʼa Kilisito neʼe ina fakalahi tana ʼu gāue. Koteā tona fua? Ko te toe ʼo te toko 144 000 fakanofo kua ʼosi tānaki. Koia ko te misi ʼa Soane ʼaē ʼe fakamatala ia Fakahā 7:9-17 kua liliu ia ko he meʼa moʼoni fakatupu fiafia. Tāfito talu mai te taʼu 1935, ko te kalasi ʼo te kaugana neʼe fiafia ʼi tana mamata ʼaē ki te hoko ʼo te lea faka polofeta ʼaia. Mai te potu fuli ʼo te kele, “ko te toe hahaʼi tokolahi”, ko te toko miliona hahaʼi, neʼe nātou tutuʼu ʼi te loto fale lotu fakalaumālie ʼo Sehova ko te kau atolasio ʼo Ia. Ko te ʼaselo ʼa Sehova neʼe ina tala kia Soane ʼe mole he tagata ʼe feala ke ina lau te toe hahaʼi tokolahi ʼaia. Ko tona ʼuhiga ʼe mole he tuʼakoi ʼo te hahaʼi ʼaē ʼe ʼaumai e te tagata kaugana ki te fale lotu fakalaumālie ʼo Sehova. ʼI te temi fuli pe ʼe ava ai te matapā, ko te gāue ʼaē ko te tānaki ʼe haga fai anai pe ia.
10. Koteā te gāue ʼe fai ʼaki te ʼofa e te tagata kaugana ʼi te temi nei?
10 Ko te kalasi ʼo te tagata kaugana agatonu mo poto ʼe ʼi ai tona maʼua mamafa ʼaē ko te tokaga ki te hahaʼi tuputupu ʼo te tahi ʼu ōvi, ʼo ʼiloʼi ko te ʼu hahaʼi ʼaia ʼe ʼomai mai te ʼu potu fuli pe ʼo te kele pea e nātou hage ko he ʼu ōvi e nātou maʼuhiga ʼaupito kia mata ʼo te Pule, ia Sesu. Ko nātou ko tana faga ōvi (Soane 10:16; Gāue 20:28; 1 Petelo 5:2-4). Koia, ʼi tanatou ʼoʼofa ʼaē ki te Pule pea mo te ʼu ōvi, ko te kalasi ʼo te kaugana ʼe tokaga fakafiafia ki te ʼu meʼa fakalaumālie ʼe ʼaoga ki te toe hahaʼi tokolahi.
11-13. Koteā te talanoa ʼe tāu neʼe fai e te pelesitā ʼo te Sosiete Watch Tower ʼo ʼuhiga mo te gāue ʼa te tagata kaugana?
11 ʼIo, ko te koga lahi ʼo te gāue ʼa te kau kaugana ʼave mālama ʼe faka ʼuhiga ʼaki te tānaki ʼo te kau fakalogo fakakelekele ʼo te Puleʼaga ʼo te ʼAtua. ʼI tana talanoa ʼaē ki te ʼu gāue ʼe tuputupu tuʼumaʼu ʼa te tagata kaugana agatonu, neʼe ʼui fēnei e F. Franz, ʼaē neʼe pelesitā ki te Sosiete Watch Tower, ʼi muʼa ʼo tana mate ʼi tesepeli 1992:
12 “ ʼI taku ʼu taʼu e 99 ʼo toku maʼuli, ko Sesu Kilisito neʼe ina fakaʼaogaʼi tuʼumaʼu pe te kautahi ki he ʼu ʼaluʼaga fakatalakitupua. ʼE mole ko he tagata noa pe ʼaē ʼe ina lolotoga takitaki nei te kautahi, kae ko te ʼAliki ko Sesu Kilisito totonu. Koteʼuhi neʼe gāue lahi ʼaupito pea ʼi he ʼaluʼaga fakatalakitupua ʼo laka ʼi te meʼa neʼe tou ʼamanaki. ʼI te temi nei, ʼe ʼi ai totatou kautahi ʼe mafola ʼi te malamanei katoa. ʼE lolotoga gāue nei ʼi te potu Tokelau, ʼi te potu Toga, ʼi te potu Hahake ʼo feiā ai mo te potu Hihifo. ʼE gata pe ki te tagata e tahi ʼe feala ke ina fai te toe faka mafola fakaofoofo ʼaia — te ʼAlo ʼo te ʼAtua, ʼaē ʼe ina takitaki te kalasi ʼo te tagata kaugana agatonu mo poto. ʼE ina fakahoko lelei tona ʼu maʼua, pea koia ʼaia ʼe tupu ai te toe mafola lahi ʼaenī ʼe tou mamata ki ai.
13 “Ko te faʼufaʼu ʼaia ʼe mole falala pe ki he tagata e tahi. ʼE ʼi ai tomatou kautahi faka teokalatike, pea ʼe haʼele faka teokalatike, ʼe takitaki e te ʼAtua. ʼE mole he tagata, māʼiape la mo ia ʼaē neʼe ina fakatuʼu te Sosiete Watch Tower ʼe feala ke ina tukuʼaki ko ia ʼaē ʼe tupu ai te fua ʼaia ʼe hoko ʼi te malamanei katoa. ʼE ko he meʼa fakatalakitupua pe ia.” ʼE mole koa la manatu tahi te toe hahaʼi tokolahi mo te tēhina ko Franz? ʼIo, e nātou loto fakafetaʼi ki te ʼu gāue tuputupua ʼa te tagata kaugana agatonu.
Ko te kau fakalogo ʼo te Puleʼaga
14, 15. a) Koteā neʼe fakatā e Sesu ʼi tana lea fakatātā ʼo ʼuhiga mo te ʼu taleta (Mateo 25:14-30)? b) Koteā te meʼa ʼaē ʼe tāu ʼe hoa mai ia Mateo kapite 25?
14 Ia Mateo kapite 25, ko te lea fakatātā ʼa Sesu ʼo ʼuhiga mo te ʼu ōvi mo te ʼu tao ʼe ina fakamatalatala te gāue lahi ʼaia ʼaē ko te tānaki ʼo te kau fakalogo fakakelekele ʼo te Puleʼaga ʼo te ʼAtua. ʼI muʼa atu, ʼi tana lea fakatātā ʼo ʼuhiga mo te ʼu taleta, ʼe fakahā e Sesu ko tana kau tisipulo fakanofo ʼaē e nātou ʼamanaki e nātou kaugā hau mo ia ʼi tona Puleʼaga ʼi selo ʼe tonu ke nātou fakalahi tana ʼu koloā fakakelekele. Koia, ʼe ko he meʼa ia ʼe tāu ʼi te lea fakatātā, ʼaē ʼe hoa mai, te fakahāhā e Sesu te meʼa ʼaē ʼe fakamaʼua kia nātou ʼe fia liliu ko he kau fakalogo ʼo tona Puleʼaga ʼi selo.
15 Koutou fakatokagaʼi te meʼa ʼaē neʼe ina ʼui ia Mateo 25:31-33: “Ka aʼu anai te Foha ʼo te tagata ki tona kolōlia, pea mo te kau ʼaselo fuli pea mo ia, pea ʼe heka anai ki tona hekaʼaga hau faka kolōlia. ʼE fakatahitahiʼi anai ʼi ʼona muʼa te ʼatu puleʼaga katoa, pea ʼe ina vaevae anai te hahaʼi, ohage ko te vaheʼi e te tagata tauhi manu te ʼu ōvi mai te ʼu tao. Pea ʼe ina tuku anai te ʼu ōvi ki tona fahaʼi mataʼu, kae ko te ʼu tao ki tona fahaʼi hema.”
16. ʼE feafeaʼi te fakatahitahiʼi ʼo te ʼu puleʼaga pea mo te vaevae ʼo te hahaʼi?
16 Ko Sesu neʼe aʼu ki tona kolōlia ʼi te taʼu 1914. Ko ia mo tana kau ʼaselo neʼe nātou tauʼi tana ʼu fili fakatemonio fuli pea neʼe nātou kapu ifo mai te lagi. Ko te meʼa ʼe hoko mai ʼi tana lea fakatātā ʼe ko he tokoni ke tou mahino ko te heka ʼaē ʼa Sesu ʼi tona hekaʼaga hau ʼe faka ʼuhiga ki tona tuʼulaga ʼaē ko te fakamāu lolotoga tona ʼafio. Ko te fakatahitahiʼi ʼo te ʼu puleʼaga fuli ʼi ʼona muʼa ʼe faka ʼuhiga, ʼi te lea fakatātā, ko Sesu ʼe gāue ki te ʼu puleʼaga ohage ko hana faga ōvi. ʼE ko he faga ōvi ʼe fio ai te ʼu ōvi mo te ʼu tao. Kapau ʼe feala ke vaevae te ʼu ōvi pea mo te ʼu tao lolotoga he kogaʼi ʼaho, kae ko te vaevae ʼo te hahaʼi ʼaē ʼe ia nātou pe te loto faʼitaliha ʼi te fili ʼo te aga ʼaē ʼe lelei pea mo ʼaē ʼe kovi, ʼe loaloaga ia. Koteʼuhi ko te vaevae ʼe fakalogo ki te aga ʼo te tagata takitokotahi.
17. He koʼe koa ʼe maʼuhiga te ʼaluʼaga ʼi te temi nei ki te hahaʼi fuli?
17 ʼI te lea fakatātā, ʼi tona ʼuhiga Tauhi manu pea mo Hau ʼe ina vaheʼi ia nātou ʼaē ʼe fakatatau ki he ʼu ōvi ki tona faʼahi mataʼu pea ko nātou ʼaē ʼe fakatatau ki he ʼu tao ki tona faʼahi hema. Ko te faʼahi mataʼu ʼe ko he fakamāu ʼaki tona ikuʼaga lelei — te maʼuli heʼegata. Ko te faʼahi hema ʼe fakatātā ia ki he fakamāu ʼe kovi — heʼe ko te ʼauha heʼegata. Ko te fakatuʼutuʼu ʼa te ʼAtua ʼo ʼuhiga mo te faʼahi ʼaia ʼe ʼi ai tona ʼu ikuʼaga mamafa.
18. He koʼe koa ko te ʼuhiga fakapulipuli ʼa te Hau ʼe mole feala ke takuʼaki e he tahi?
18 Ko te ʼuhiga fakapulipuli ʼa te Hau, te Foha ʼo te tagata lolotoga tona ʼafio, peʼe parousia, ʼe mole feala ke takuʼaki e he tahi. Kua fakahahaʼi ia nātou ʼaē e nātou kau ki te kalasi ʼo te tagata kaugana ki te faka mafola ʼo te logo lelei ʼo te Puleʼaga ʼo te ʼAtua ʼi te malamanei katoa, ʼo nātou fakamū tanatou mālama. ʼIo, ko tanatou gāue fagonogono kua kaku ki te ʼu potu mamaʼo ʼo te kele. — Mateo 24:14.
19. Koteā te ʼu kalitate ʼo te kalasi ʼo te ʼu ōvi ʼe fakatā ʼi te lea fakatātā ʼo te ʼu ōvi pea mo te ʼu tao?
19 Heʼe koʼe koa ʼe fakapale anai e te Tauhi manu pea mo Hau ia te kalasi ʼo te ʼu ōvi ʼaki he tapuakina ʼi te temi ka haʼu? ʼUhi ko tanatou lagolago ʼaki he loto katoa ki te gāue faka mafola ʼo te Puleʼaga pea mo tanatou agalelei ʼaē ki tona ʼu tēhina fakanofo, ʼe hage e faka ʼuhiga e Sesu ʼe fai age kia ia totonu. Koia, ko te Hau, te Foha ʼo te tagata ʼe ina ʼui fēnei age kia nātou: “Koutou ʼomai, koutou ʼaē neʼe tapuakiʼi e taku Tāmai, ke koutou maʼu te puleʼaga ʼaē neʼe teuteuʼi maʼa koutou talu mai te kamata ʼo te malamanei.” — Mateo 25:34; 28:19, 20.
Ko te tokoni ki te Hau
20, 21. Koteā te fakamoʼoni ʼe foaki e te ʼu ōvi moʼo fakahā tanatou kau ki te faʼahi ʼo te Puleʼaga?
20 Koutou fakatokagaʼi ʼi te fakaafe e te Hau te ʼu ōvi ke nātou maʼu te tofiʼa fakakelekele ʼo te Puleʼaga ʼo te ʼAtua, e nātou puna’maʼuli. E nātou fehuʼi age ki ai: ‘ ʼAliki, ko ʼanafea ʼaē neʼe mātou fai ai te ʼu meʼa fuli ʼaia kia te koe?’ ʼE ina tali fēnei age: “ ʼE ʼau tala moʼoni atu kia koutou: Ko te meʼa ʼaē neʼe koutou fai ki he tahi ʼe veliveli ʼosi ʼi toku ʼu tēhina ʼaenī, neʼe koutou fai te meʼa ʼaia kia te ʼau.” (Mateo 25:40). ʼI te hā ʼaē ʼa Sesu kia Malia Makatalena ʼi te ʼaho ʼo tana fakatuʼuake, neʼe talanoa ia ki tona ʼu tēhina fakalaumālie ʼi tana ʼui age fēnei: “ ʼAlu ki ʼoku ʼu tēhina.” (Soane 20:17). Lolotoga te temi ʼo tana ʼafio fakapulipuli, ʼe kei ʼi ai pe te toe siʼi ʼo te toko 144 000 ʼu tēhina fakalaumālie ʼa Sesu ʼe kei nātou maʼuʼuli ʼi te kele.
21 ʼUhi ko Sesu ʼe fakapulipuli ʼi te lagi, ko te hahaʼi ʼe fakatatau ki te ʼu ōvi ʼe mole nātou fai kia ia totonu te ʼu meʼa ʼaia neʼe fai ʼaki te ʼofa. E nātou sisio kia ia ʼaki pe tanatou ʼu mata ʼo te tui. ʼE leleiʼia e Sesu te ʼu faiga fuli ʼaia ʼa nātou moʼo lagolago ki tona ʼu tēhina fakalaumālie, ʼaē e nātou liliu anai ko hana ʼu kaugā hāko ʼi selo. Ko te meʼa ʼaē neʼe fai ki ʼona ʼu tēhina ʼe ina faka ʼuhiga ko he meʼa neʼe fai kia ia totonu. Ko nātou ʼaē ʼe fakatatau ki te ʼu ōvi e nātou agalelei ki te ʼu tēhina ʼa Kilisito ʼaki tonatou loto katoa koteʼuhi e nātou fakamoʼoni ia nātou ʼi tonatou ʼuhiga. E nātou mahino ko te ʼu tēhina fakalaumālie ʼa Sesu ko te kau fakafofoga ʼo te Puleʼaga ʼo Sehova, pea e nātou fia foaki he fakamoʼoni e nātou kau mo nātou ki te Puleʼaga ʼaia.
22. ʼE feafeaʼi te fakapale ʼo te kalasi ʼo te ʼu ōvi (vakaʼi ia Fakahā 7: 14-17)?
22 Neʼe fakakikite e Sehova ko te kalasi ʼo nātou ʼaē ʼe fakatatau ki te ʼu ōvi e nātou hā anai lolotoga te temi ʼo te ʼafio ʼo tona ʼAlo, pea ʼe ʼi ai te fakapale fakatalakitupua kia nātou! Ko te toe hahaʼi tokolahi e nātou maʼu anai te ʼu tapuakina ʼo te tokalelei ʼi te kele lolotoga te taʼu e afe, ʼi te ʼafio ʼo te Hau ʼa Sehova, ko Sesu Kilisito.
23. ʼI tanatou mahino, ʼe feafeaʼi te tokoni ʼa te ʼu ōvi ki te ʼu tēhina ʼa te Hau?
23 Ka tou fakatokagaʼi te ʼu lea faka polofeta ʼe faka ʼuhiga ki te temi ʼo te ʼafio ʼo Kilisito, feiā mo te ʼu lea fakatātā ʼa Sesu ʼo ʼuhiga mo te ʼu ōvi pea mo te ʼu tao, koteā te meʼa ʼe tou sio ki ai? Ko te meʼa ʼaenī: ʼe mole ko he agalelei ʼe hoko fai pea mo faka fuanoa pe ʼaē ki te ʼu tēhina fakalaumālie ʼa te Hau ʼe liliu ai he tahi ko he ōvi ʼaki he ʼuhiga agatonu ʼi muʼa ʼo te ʼAtua pea mo tona Hau. Ko nātou ʼo te kalasi ʼo te ʼu ōvi e nātou ʼiloʼi te meʼa ʼaē e nātou lolotoga fai, tatau aipe peʼe mole nātou sisio ʼaki ʼonatou mata ki te Hau ʼaē ʼe lolotoga ʼafio. E nātou faiga ke nātou tokoni ki te ʼu tēhina ʼo te Hau mole gata pe ʼi te faʼahi fakakoloa kae hoko atu ʼi te faʼahi fakalaumālie. ʼO feafeaʼi? ʼO nātou lagolago kia nātou ʼi te faka mafola ʼo te logo lelei ʼo te Puleʼaga ʼo te ʼAtua pea mo taki he ʼu ako faka tohi-tapu ke iku ki he fai ʼo he ʼu tisipulo maʼa Kilisito. Koia, ʼi te temi nei ko te toko fā miliona tupu kau ʼave mālama e nātou kalagaʼi te Puleʼaga ʼo te ʼAtua.
Ko te ʼu gāue fakalahi
24. Koteā te ʼu gāue neʼe fai ke liliu te kalasi ʼo te tagata kaugana ko te hahaʼi ʼe fiafia ʼaupito ʼi te kele ʼi te temi nei?
24 Tou toe lau ʼihi ʼi te ʼu tuʼuga gāue lelei ʼa te tagata kaugana agatonu. ʼUluaki, neʼe fakanofo te kalasi ʼo te tagata kaugana ki te ʼu koloā ʼa te Pule — ko te ʼu koloā ʼa te Puleʼaga ʼi te kele — pea ko tana ʼu koloā ʼaē ʼe haga tuputupu pe. Lua, ko te kalasi ʼaia ʼe mole gata tana fafaga te ʼu hahaʼi gāue ʼaē neʼe hinoʼi kae ʼe ina toe fafaga foki mo te toe hahaʼi tokolahi ʼo te tahi ʼu ōvi ʼe tuputupu tuʼumaʼu ʼaki te meʼa kai fakalaumālie. Tolu, ko te kalasi ʼo te tagata kaugana ko ia ʼaē ʼe ina takitaki te gāue ʼaē ko te faka mafola ʼo te mālama. Fā, ko te fakalahi ʼaupito ʼo tana ʼu gāue ʼe ko te fakatahitahiʼi ʼo te toe hahaʼi tokolahi ʼo te tahi ʼu ōvi, ko te taki ʼo nātou ki te fale lotu fakalaumālie ʼa Sehova. Nima, ko te kalasi ʼo te tagata kaugana, ʼaki te lagolago fakamalotoloto ʼo nātou ʼe fakatatau ki te ʼu ōvi, ʼe lolotoga laga nei te ʼu fale lalahi ko te ʼu filiale ʼi te malamanei, ʼo feiā aipe mo te ʼu pilō tāfito ʼi te ʼu ʼAtu ʼu Fenua ʼo Amelika. Ko te ʼu taʼi gāue ʼaia ʼaki te ʼofa neʼe nātou fakaliliu te kalasi ʼo te tagata kaugana ko te ʼu hahaʼi ʼe fiafia ʼaupito age ia ʼi te hahaʼi ʼo te kele ʼi te temi nei, pea neʼe nātou toe fakaliliu foki mo te toe hahaʼi tokolahi ko he hahaʼi fiafia. Ko te meʼa fuli ʼaia ʼe tupu pe mai ia Sehova ʼAtua mo Sesu Kilisito, ʼaē ʼe nā takitaki te ʼu gāue lalahi ʼo te tagata kaugana agatonu!
25. ʼE feafeaʼi he fealagia ki te ʼu ōvi ke nātou haga lagolago te kalasi ʼo te tagata kaugana, pea koteā te fakatuʼutuʼu ʼe faiga ki ai?
25 Ko te kalasi ʼo te tagata kaugana ʼe lolotoga ʼāʼāsili nei tana gāue kinakina ʼo laka ʼi te temi ʼaē, ko te fai ʼo te ʼu maʼua neʼe tuku age e te ʼAtua. Ko te temi ʼaē ʼe kei toe pea hoko mai te “toe mamahi lahi” kua vave ʼosi pe (Mateo 24:21)! Koia ʼe maʼuhiga kia nātou ʼaē ko te ʼu ōvi ʼo te ʼAtua ke nātou nonofo ʼi te faʼahi ʼaē ʼe tonu ke nātou nonofo ai ke nātou maʼu ai te ʼofa ʼo te Tauhi manu pea mo Hau! Koia, tou haga lagolago ʼaki he loto faiga ki te tagata kaugana agatonu mo poto. Ko tona faʼahiga fai pe ʼaia ʼe tupu ai ʼi he ʼaho kua ōvi mai ke nātou logo ki te ʼu palalau fakafiafia ʼaenī: “Koutou ʼomai, koutou ʼaē neʼe tapuakiʼi e taku Tāmai, ke koutou maʼu te puleʼaga ʼaē neʼe teuteuʼi maʼa koutou talu mai te kamata ʼo te malamanei.”
ʼE feala koa hakotou tali?
◻ Koteā te fakamāu ʼuluaki neʼe hoa mai ki te nofo hau ʼo te Hau?
◻ Neʼe feafeaʼi te fakahoko ʼa Mateo 24:45-47 ʼi totatou temi?
◻ ʼO ʼuhiga mo te ʼu gāue lalahi, ko te ʼu gāue fea ʼaē ʼe loto fakafetaʼi ʼaupito ai te kalasi ʼo te tagata kaugana pea mo te toe hahaʼi tokolahi?
◻ ʼE feafeaʼi te fakahoko ʼo Mateo 25:34-40 lolotoga te parousia?
[Paki ʼo te pasina 14]
Ko te pule ʼe ina tuku fuli tana ʼu koloā ki te tagata kaugana agatonu.
[Paki ʼo te pasina 16]
Ko Sesu neʼe heka ʼi tona hekaʼaga hau faka kolōlia moʼo fakamāu te malamanei.