Koutou Fakamolemole ʼAki He Loto Katoa

“Pea e fai feia anai e taku Tamai i Selo kia koutou, kapau e mole koutou tahi fakamolemole ki tona tehina mo te loto katoa.”​—Mateo 18:35.

1, 2. (a) Neʼe fakahā feafeaʼi e te fafine agahala tana loto fakafetaʼi kia Sesu? (b) Koteā te manatu maʼuhiga ʼaē neʼe fakahā e Sesu ʼi tana tali?

LAGI neʼe ko he fafine paomutu, pea neʼe mole ʼamanaki te hahaʼi ʼe nātou sio anai ki ai ʼi te ʼapi ʼo he tagata takitaki lotu. Neʼe punamaʼuli te hahaʼi ʼi tanatou sio ki ai ʼi te ʼapi ʼaia, kae neʼe nātou toe punamaʼuli foki ʼi te meʼa ʼaē neʼe ina fai. Neʼe fakaōvi ki te tagata ʼaia ʼaē ʼe mole hona kiʼi mele e tahi ʼi tona maʼuli, pea mo ina fakahā tona loto fakafetaʼi ki tana ʼu gāue, ʼo ina fufulu ʼona vaʼe ʼaki ʼona loʼimata, pea mo ina holoholoʼi ʼaki tona lauʼulu.

² Ko te tagata ʼaia ko Sesu, neʼe mole fehiʼa ki te fafine ʼaia, “neʼe ʼiloʼi ʼi te kolo ko te fafine agahala, MN.” Kae ko te pule ʼo te ʼapi, ko te Faliseo ko Simone, neʼe tuʼania he neʼe ko te fafine agahala ia. Neʼe tali ki ai Sesu ʼo ina fakamatala age te hisitolia ʼo te ʼu tagata e lua neʼe tuʼu maʼua ki te tahi tagata. Ko te tahi ia nāua neʼe lahi ʼaupito tona maʼua​—ko tona tatau ko te litotogi ʼo he tagata gāue kele lolotoga taʼu e lua. Ko te maʼua ʼo te lua tagata neʼe ko te vahe hogofulu pe ʼo te maʼua lahi ʼaia, neʼe ko te litotogi ʼo māhina e tolu. ʼI tanā mole lava huʼi te ʼu maʼua ʼaia, ko te tagata fai maʼua “nee ina fakamolemole kia naua tokolua.” ʼE mahino ia, ko ia ʼaē neʼe lahi ʼaupito tona maʼua, neʼe tonu ke lahi age tona ʼofa ki te tagata fai maʼua. ʼI tana ʼosi fakapipiki te hisitolia ʼaia ki te gāue ʼofa ʼa te fafine, neʼe fakahā e Sesu te pelesepeto ʼaenī: “E fakamolemole velivelipe kia ia e veliveli tona ofa.” Pea neʼe ina ʼui fēnei age ki te fafine: “Kua fakamolemole tau u agahala.”​—Luka 7:​36-​48.

3. Koteā ʼaē ʼe maʼuhiga ke tou ʼiloʼi ʼo ʼuhiga mo tatou totonu?

³ Koutou fai te fehuʼi ʼaenī kia koutou, ‘Kapau neʼe ko ʼau te fafine ʼaia, peʼe kapau neʼe ʼau nofo ʼi he ʼaluʼaga feiā pea neʼe fakamolemole ʼaku ʼu agahala, ʼe ʼau agakovi anai koa ʼo mole ʼau fakamolemole te ʼu hala ʼa ʼihi?’ E lagi koutou tali anai, ‘Kailoa ia!’ Kae ʼe koutou tui papau koa ʼe koutou fakamolemole gafua? ʼE ko hakotou agamāhani koa te fai ʼo te faʼahi ʼaia? ʼE faigafua koa hakotou fai te faʼahi ʼaia, pea ʼe lau koa e te hahaʼi ʼe koutou fakamolemole gafua? Tou vakaʼi pe koʼe ʼe maʼuhiga kia tatou takitokotahi ke tou sivisivi fakalelei ia tatou ʼo ʼuhiga mo te faʼahi ʼaia.

Neʼe Fai Mai Te Fakamolemole ʼAē Neʼe ʼAoga Kia Tatou

4. Koteā ʼaē ʼe tonu ke tou mahino kiai ʼo ʼuhiga mo tatou fuli?

⁴ ʼE koutou heʼe haohaoa, pea ʼe koutou mālama lelei ki tokotou ʼuhiga agahala ʼaia. Kapau ʼe fehuʼi atu kia koutou peʼe koutou agahala, pea ʼe koutou ʼio anai kiai, heʼe lagi koutou ʼiloʼi te ʼu palalau ʼaē ʼe tuʼu ia 1 Soane 1:8: “Kapau e tou lau: ‘E mole hatatou agahala,’ e tou lohiʼi pe tatou, pea e mole ia tatou te mooni.” (Loma 3:​23; 5:​12) Ko ʼihi, neʼe hā lelei tonatou ʼuhiga agahala he neʼe nātou fai te ʼu agahala mamafa ʼaupito. Kae tatau aipe pe neʼe mole koutou fai te taʼi agahala ʼaia, ʼe ʼi ai pe te ʼu temi neʼe mole koutou mulimuli ai ki te ʼu pelesepeto ʼa te ʼAtua​—neʼe koutou agahala. ʼE mole moʼoni koa la te faʼahi ʼaia?

5. He koʼe ʼe tonu ke tou fakafetaʼi ki te ʼAtua?

⁵ Koia, ʼe lagi koutou nofo ʼi te ʼaluʼaga ʼaē neʼe talanoa kiai te ʼapositolo ko Paulo: “Nee koutou mamate i autou higa mo te hee silikosisio o toutou kakano, pea nee ina fakamauli koutou fakatahi mo ia [ia Sesu]. Nee ina fakamolemole atatou higa fuape.” (Kolose 2:​13; Efeso 2:​1-3) Koutou fakatokagaʼi te ʼu kupuʼi palalau “nee ina fakamolemole atatou higa fuape.” ʼE faka ʼuhiga ki he ʼu tuʼuga agahala neʼe tou fai. Koia ʼe tonu ai kia tatou fuli ke tou fai te pāui ʼaenī neʼe fai e Tavite: “ ʼUhi ko tou huafa, Ê Sehova, ʼe tonu ke ke fakamolemole mai ki taku hala, heʼe lahi ʼaupito.”​—Pesalemo 25:11.

6. Koteā ʼaē ʼe tou ʼiloʼi papau ʼo ʼuhiga mo Sehova pea mo te loto fakamolemole?

⁶ ʼE lava feafeaʼi te fakamolemole ʼo takotou ʼu agahala​—pea mo te ʼu agahala ʼo tatou fuli? Ko te tahi agaaga ʼo Sehova ʼe ko tana fakamolemole gafua. (Ekesote 34:​6, 7; Pesalemo 86:5) ʼE mahino ia, ʼe kole mai e Sehova ke tou haga kia te ia ʼi te faikole, pea mo tou kole age ke ina fakamolemole mai kia tatou. (2 Fakamatala 6:​21; Pesalemo 103:​3, 10, 14) Tahi ʼaē, neʼe ina fai he fakatuʼutuʼu ke feala hana fai te taʼi fakamolemole ʼaia​—ʼe ko te sakilifisio faitotogi ʼa Sesu.​—Loma 3:​24; 1 Petelo 1:​18, 19; 1 Soane 4:​9, 14.

7. Koteā te ʼaluʼaga ʼaē ʼe tonu ai ke koutou fia faʼifaʼitaki kia Sehova?

⁷ Ko te fakamolemole gafua ʼaia ʼa te ʼAtua, ʼe ko he faʼifaʼitaki lelei ke koutou mulimuli kiai ʼi takotou ʼu vāhaʼa mo te hahaʼi. Neʼe faka maʼuhigaʼi e Paulo te faʼahi ʼaia ʼi tana tohi fēnei: “Kae koutou fe’lotoleleiʼaki, mo feʼofaʼaki, koutou fe’fakamolemoleʼaki o hage ko te Atua nee fakamolemole kia koutou ia Kilisito.” (Efeso 4:​32) ʼE mahino papau kia tatou, neʼe fia ʼui e Paulo ʼe tonu ke tou faʼifaʼitakiʼi te ʼAtua, heʼe hoko fēnei atu tana ʼu palalau: “Koia, koutou liliu [ʼo] faifaitaki [ki] te Atua, ke tuha mo he u fanau ofaina.” (Efeso 5:1) ʼE koutou mahino koa ki te manatu ʼaia? Neʼe fakakaukau fēnei e Paulo, kapau neʼe fakamolemole atu ia Sehova ʼAtua, pea koia ʼe tonu ke koutou faʼifaʼitaki kia Ia ʼo koutou ‘feʼofaʼaki pea mo fefakamolemoleʼaki.’ Kae koutou fai te fehuʼi ʼaenī kia koutou, ‘ ʼE ʼau fai koa te faʼahi ʼaia? Kapau ʼe mole faigafua kia ʼau tona fai, kae ʼe ʼau gāue mālohi koa ke ʼau lavaʼi te faʼahi ʼaia, ʼo ʼau faiga moʼoni ke ʼau faʼifaʼitakiʼi te loto fakamolemole ʼa te ʼAtua?’

Tou Faiga Ke Tou Loto Fakamolemole

8. Koteā ʼaē ʼe tonu ke mahino kia tatou ʼo ʼuhiga mo nātou ʼo te kokelekasio?

⁸ ʼE ko he meʼa lelei mo kanapaula neʼe tahitahiga te ʼaoga ʼaē ke tou fefakamolemoleʼaki ʼi te kokelekasio faka Kilisitiano. Kae ʼi tona ʼaluʼaga moʼoni ʼe mole feiā. ʼE moʼoni, ʼe faiga totatou ʼu tēhina mo tuagaʼane Kilisitiano ke nātou mulimuli ki te faʼifaʼitaki ʼofa ʼa Sesu. (Soane 13:35; 15:12, 13; Kalate 6:2) Kua fualoa tanatou faiga ke nātou tekeʼi te ʼu faʼahiga aga, mo te ʼu faʼahiga palalau ʼa te hahaʼi ʼo te mālama agakovi ʼaenī. ʼE nātou loto moʼoni ke nātou fakahā te ʼuhigaʼi tagata foʼou. (Kolose 3:​9, 10) Kae ʼe tonu ke mahino kia tatou, ko te kokelekasio faka Kilisitiano katoa, pea mo te ʼu kokelekasio fuli, ʼe faʼufaʼu e te hahaʼi agahala. ʼE moʼoni, kua lelei age tonatou ʼulugaaga faka Kilisitiano, kae ʼe kei nātou heʼe haohaoa.

9, 10. He koʼe ʼe mole tonu ke tou punamaʼuli mo kapau ʼe hoko te ʼu fihifihia ʼi te kokelekasio?

⁹ ʼI te Tohi-Tapu, ʼe fakahā fakalelei mai e te ʼAtua, ʼe mole haohaoa te ʼu tēhina mo tuagaʼane ʼo te kokelekasio. Ohage la, koutou vakaʼi te ʼu palalau ʼaē neʼe fai e Paulo ia Kolose 3:​13: “Koutou fe’katakiʼaki mo fe’fakamolemoleʼaki, kapau e mau e he tahi hona mamahi ki he tahiʼage; io, o hage ko te Aliki nee fakamolemole kia koutou, pea mo koutou, koutou fai feia.”

¹⁰ ʼE hā mai ʼi henī, ʼe fakamanatuʼi mai kia tatou e te Tohi-Tapu te pikipikiga ʼo te fakamolemole mai ʼa te ʼAtua kia tatou, pea mo te maʼua ʼaē ke tou fakamolemole ki ʼihi. He koʼe koa ʼe faigataʼa te faʼahi ʼaia? He neʼe fakamoʼoni e Paulo, ʼe feala pe ke “mau e he tahi hona mamahi ki he tahiʼage.” Neʼe mahino kia ia, ʼe hoko anai he ʼu meʼa feiā. Neʼe lagi hoko te faʼahi ʼaia ʼi te ʼuluaki sēkulō, māʼia mo te “kau maʼoniʼoni,” ʼaē neʼe ʼi ai tanatou ‘ ʼamanaki kua tāʼofi maʼa nātou ʼi selo.’ (Kolose 1:​2, 5) Kapau koia ʼaia, pea ʼe mole tonu koa la ke hoko te faʼahi ʼaia ki te tokolahi ʼo te kau Kilisitiano moʼoni ia ʼaho nei, ʼaē ʼe mole nātou maʼu te fakamoʼoni ʼo te laumālie maʼoniʼoni, ʼe ko nātou ko he kau “filifiliʼia maonioni mo ofaina a te Atua”? (Kolose 3:​12) Koia, ʼe mole tonu ai ke kita manatu, ʼe kovi te kokelekasio mo kapau ʼe hoko ai he ʼu meʼa fakatupu mamahi feiā​—kapau ʼe kita mamahi ʼi te hala neʼe hoko moʼoni mai kia kita peʼe ko he agahala ʼe kita manatu neʼe hoko.

11. Koteā te fakatokaga ʼaē neʼe fai mai e te tisipulo ko Sakopo?

¹¹ Neʼe fakahā mai e te tēhina ʼo Sesu ko Sakopo, ʼe tonu ke mahino kia tatou, ʼe hoko anai he ʼu ʼaluʼaga ʼe tonu ai ke tou fakamolemole ki totatou ʼu tēhina. “Pe ko ai ae ia koutou e poto mo atamai? Ke fakaha e ia aki te taulekaleka o tona mauli ana u gaue i te agamalu o te poto. Kae kapau e koutou mau te fuaʼa kona mo te fe’filiʼaki i outou loto, aua tautou hikisia pea mo tohi o fakafehagai ki te mooni.” (Sakopo 3:​13, 14) Neʼe ʼi ai koa “te fuaʼa kona mo te fe’filiʼaki” ʼi te loto ʼa te kau Kilisitiano moʼoni? Ei, ʼe hā lelei mai ʼi te ʼu palalau ʼa Sakopo, neʼe hoko te faʼahi ʼaia ʼi te kokelekasio ʼo te ʼuluaki sēkulō, pea ʼe toe hoko ʼi te temi nei.

12. Koteā te fihifihia ʼaē neʼe hoko ʼi te kokelekasio ʼo Filipe ʼo te temi muʼa?

¹² ʼI te tahi lakaga, neʼe hoko moʼoni te faʼahi ʼaia ki te ʼu Kilisitiano fakanofo e toko lua neʼe lelei tonā matagafua he neʼe nā kaugā gāue mo Paulo. Lagi ʼe koutou manatuʼi ia Eutia pea mo Sunitika, ʼaē neʼe kau ʼi te kokelekasio ʼo Filipe. Logope la ʼe mole fakamatamatala katoa tonā hisitolia, kae ʼe hā lelei ia Filipe 4:​2, 3, neʼe nā tokakovi. Neʼe hoko koa ʼuhi ko he palalau vale, pe ko he palalau fefeka, pe ko he maheka? Tatau aipe pe koteā te tupuʼaga ʼo tanā tokakovi, kae neʼe kua kovi ʼaupito he neʼe maʼu logo Paulo ʼo ʼuhiga mo te faʼahi ʼaia logope la tana nofo mamaʼo ʼi Loma. Neʼe lagi ʼāsili kovi te vāhaʼa ʼa te ʼu tuagaʼane fakalaumālie ʼaia e toko lua, ʼo nā lagi faiga ke mole nā fetaulaki ʼi te ʼu fono, peʼe nā fefatufatuʼaki ʼi tanā ʼu fai palalau mo tonā ʼu kaumeʼa.

13. Koteā ʼaē neʼe lagi hoko kia Eutia pea mo Sunitika, pea koteā tona ʼaoga kia tatou?

¹³ ʼE mole koutou māhani koa ʼi te meʼa ʼaia neʼe lagi hoko ki ʼihi ʼi te kokelekasio peʼe kia koutou totonu? Peʼe lagi koutou tau pe mo te fihifihia ʼaia ʼi te temi ʼaenī. Koteā ʼaē ʼe feala ke kita fai? ʼI te meʼa ʼaia ʼaē neʼe hoko ʼi te ʼuluaki sēkulō, neʼe fakaloto mālohiʼi e Paulo te ʼu tuagaʼane ʼaia “ke na lototahi i te Aliki.” Neʼe lagi nā tali ke nā fai palalau ki tonā fihifihia, ʼo nā vakaʼi pe neʼe mole hoko he femahinohalaʼaki, pea neʼe nā fakahā tanā loto ʼaē ke nā fefakamolemoleʼaki, ʼo nā faʼifaʼitakiʼi leva te loto fakamolemole ʼa Sehova. ʼE mahino papau ia, neʼe lavaʼi te faʼahi ʼaia e Eutia pea mo Sunitika, pea ʼe feala mo tatou ke tou fai te faʼahi ʼaia. Ia ʼaho nei, ʼe feala ke lava lelei te taʼi loto fakamolemole ʼaia.

Koutou Fakatokatoka ʼo Koutou Fakamolemole

14. He koʼe ʼe faigafua age te galoʼi ʼo te fihi ʼaē neʼe hoko?

¹⁴ Koteā ʼaē ʼe ʼaoga kia koutou mokā koutou tokakovi mo he tahi Kilisitiano? ʼI tona fakahagatonu, ʼe mole he puleʼaki faigafua kiai, kae ʼe tuku mai e te Tohi-Tapu he ʼu faʼifaʼitaki pea mo he ʼu tokoni ʼaoga. Ko te tokoni tāfito ʼaenī​—logope ʼe faigataʼa tona muliʼi​—ke kita galoʼi te fihifihia ʼaia, ʼo mole kita tokagaʼi. ʼI te agamāhani, ka tokakovi he toko lua ohage ko te tokakovi ʼo Eutia pea mo Sunitika, ʼe nā tahi ʼui ʼe mole ko tanā hala, kae ʼe ko te hala ia ʼo te tahi Kilisitiano. Koia ʼi te taʼi ʼaluʼaga ʼaia, ʼe lagi koutou ʼui anai ʼe ko te hala tāfito ʼo te Kilisitiano ʼaē ʼe koutou fihi mo ia. Kae ʼe mole feala koa ke koutou tuku feiāʼi te fihifihia ʼaia ʼo koutou fakamolemole ki ai? ʼE tonu ke mahino kia koutou, kapau ʼe ko te hala tāfito ʼa te tahi Kilisitiano, logola ʼi te agamāhani ʼe mole feiā, pea ʼe ʼa koutou te maʼua ʼaē ke koutou fakamolemole.

15, 16. (a) Koteā te ʼu palalau ʼaē neʼe fai e Mikea ʼo ʼuhiga mo Sehova? (b) Koteā te faka ʼuhiga ʼo te ʼui ʼaē ko te ʼAtua ʼe “fakalaka ʼi te talagataʼa”?

¹⁵ ʼAua naʼa galo kia tatou, ko tatatou faʼifaʼitakiʼaga ʼo ʼuhiga mo te fakamolemole ʼe ko te ʼAtua. (Efeso 4:⁠32–5:1) Neʼe tohi fēnei e Mikea ʼo ʼuhiga mo te faʼifaʼitaki ʼaē neʼe Ina tuku mai ʼo ʼuhiga mo te fakamolemole ʼo te ʼu hala: “Ko ai te ʼAtua ʼe hage ko koe, ʼo ina fakamolemole te hala pea mo fakalaka ʼi te talagataʼa ʼo te toe ʼo tana tofiʼa? Ei, ʼe mole ina taupau anai tona ʼita ʼo talu ai, heʼe fiafia ʼi te lotoʼofa.”​—Mikea 7:​18.

¹⁶ Ka ʼui e te Tohi-Tapu, ko Sehova ʼe “fakalaka ʼi te talagataʼa,” ʼe mole ina fia ʼui ʼe mole feala ke manatuʼi e Sehova te ʼu hala ʼaia, ohage kua molehi te meʼa ʼaia ʼi tana fakakaukau. Koutou fakatokagaʼi te ʼu hisitolia ʼo Samisoni pea mo Tavite, ʼaē neʼe nā agahala mamafa. Neʼe fakamanatuʼi e te ʼAtua te ʼu agahala ʼaia ʼo fualoa ʼaupito ki muli age; pea ʼe tou ʼiloʼi te ʼu agahala ʼaē neʼe nā fai he neʼe tohi e Sehova ʼi te Tohi-Tapu. Kae neʼe manavaʼofa Sehova kia nāua ʼaia, ʼo ina ʼui ko nāua ko te ʼu faʼifaʼitakiʼaga ʼo te tui ʼaē ʼe tonu ke tou mulimuli kiai.​—Hepeleo 11:32; 12:1.

17. (a) Koteā te manatu ʼaē ka tokoni anai kia tatou ke tou fakalaka ʼi te ʼu hala ʼa ʼihi? (b) Kapau ʼe tou fai te faʼahi ʼaia, ʼe tou faʼifaʼitaki feafeaʼi anai kia Sehova? (Vakaʼi te kiʼi nota ʼi te lalo pasina.)

¹⁷ Ei, neʼe lava “fakalaka”a Sehova ʼi te ʼu hala, ohage ko tona kole liuliuga age e Tavite. (2 Samuele 12:13; 24:10) ʼE feala koa ke tou faʼifaʼitaki ki te ʼAtua ʼi te faʼahi ʼaia, ʼo tou lotolelei ke tou fakalaka ʼi te ʼu hala pea mo te ʼu lākahala ʼaē ʼe fai mai e totatou ʼu tēhina mo tuagaʼane ʼi tonatou ʼuhiga agahala? Koutou fakakaukauʼi age muʼa ʼe koutou heka ʼi te vakalele kua vave mahiki. ʼE koutou fakasiosio ki tuʼa, pea koutou sio ʼi te malaʼe vakalele ki he tahi ʼi takotou ʼu feʼilo, ʼe fakalili atu. ʼE koutou ʼiloʼi neʼe lagi koutou fai he meʼa ʼe fakatupu mamahi kia ia pea kua ʼita kia koutou. Peʼe lagi mole manatu pe la kia koutou. Kae ʼi te hake ʼa te vakalele, ʼe koutou fakalaka ʼi ʼoluga ʼo te fafine ʼaia, pea liliu ia ʼo veliveli ʼaupito. Hili kiai te hola katoa, pea kua galo ʼosi kia koutou tana aga heʼe fakaʼapaʼapa ʼaia kia koutou. ʼO toe feiā pe, ʼe lelei anai mo kapau ʼe tou faiga ke tou hage ko Sehova ʼaē ʼe fakalaka ʼi te ʼu talagataʼa. (Tāʼaga Lea 19:11) Hili kiai taʼu e hogofulu peʼe ko taʼu e luageau ʼi te kua kamata ʼo te ʼu taʼu e afe, ʼe kei maʼuhiga anai koa te hala ʼaia neʼe fai atu kia koutou? He koʼe ʼe mole koutou tuku ai pe la kae koutou galoʼi te faʼahi ʼaia?

18. Kapau ʼe hage ʼe mole feala ke tou fakamolemole, pea koteā te tokoni ʼaē ʼe feala ke tou maʼuliʼi?

¹⁸ Kae ʼe ʼi ai te ʼu lakaga neʼe lagi koutou faikole ai ʼo ʼuhiga mo tokotou fihifihia pea neʼe koutou faiga ke koutou fakamolemole, kae neʼe hage ʼe mole feala hakotou fai te faʼahi ʼaia. Koteā ʼaē ʼe tonu ai ke koutou fai? Neʼe fakaloto mālohiʼi tatou e Sesu ke kita ʼalu ʼo fakatokatoka mo tokita tēhina. “Koia, ka ke aumai hou molaga ki te aletale pea, e ke manatui, e i ai he mea e fakafehagai ai tou tehina kia te koe. Tuku tou molaga i te mua aletale, alu mua o fakatokatoka mo tou tehina pea ke haù o momoli tou molaga.”​—Mateo 5:​23, 24.

19. Ka tou faiga ke tou fakatokatoka mo totatou ʼu tēhina, koteā te faʼahiga manatu ʼaē ʼe tonu ke tou maʼu, pea koteā te faʼahiga manatu ʼaē ʼe tonu ke tou tekeʼi?

¹⁹ ʼE hā lelei mai, neʼe mole ʼui e Sesu ke koutou ʼolo ki tokotou tēhina moʼo fakamahino kia ia neʼe koutou tonu koutou kae hala ia. E lagi moʼoni te faʼahi ʼaia. Kae neʼe lagi koulua faihala toko lua. Tatau aipe pe koteā te ʼaluʼaga moʼoni, kae ʼe mole koutou ʼolo anai ʼo fai palalau mo te tēhina ʼaia ke fakalogo kia koutou pea ke ina ʼui, ko koutou ʼaē ʼe tonu. Kapau ʼe feiā takotou manatu ʼo ʼuhiga mo te fai palalau ʼaia, pea ʼe mole maʼu anai hona fua. Tahi ʼaē, ʼe mole tonu ke koutou fai palalau anai ke koutou toe vakaʼi fuli te ʼu meʼa ʼaē neʼe koutou fihi ai. Kapau ʼaki te fai palalau ʼaia ʼe fai ʼaki te ʼofa, ʼe koutou fakatokagaʼi neʼe hoko te fihifihia ʼaia he neʼe koutou femahinohalaʼaki, pea koutou faiga ke koutou fakamahino te fihifihia ʼaia. Tatau aipe peʼe mole koutou manatu tahi ʼi te ʼosi ʼo takotou fai palalau, kae ʼe maʼua koa ke hoko tuʼumaʼu te faʼahi ʼaia? ʼE mole lelei age koa la ke koutou ʼui, ko te tēhina ʼaia ʼe fia tauhi fakamalotoloto ki totatou ʼAtua ʼaē ʼe loto fakamolemole? Kapau ʼe mahino kia koutou te faʼahi ʼaia, pea ʼe faigafua age anai takotou ʼui ʼi tokotou loto, “ ʼE ʼau fakasilou atu, kae neʼe tā fefihiʼaki ʼuhi ko totā ʼuhiga agahala. Fakalelei tou loto, kae ʼe lelei ke tā galoʼi te fihifihia ʼaia.”

20. Koteā te ʼu meʼa ʼaē ʼe tou ako mai te faʼifaʼitaki ʼa te kau ʼapositolo?

²⁰ Koutou manatuʼi, neʼe hoko te ʼu tokakovi ʼi te kau ʼapositolo, he ko ʼihi ia nātou neʼe nātou loto ke fakaʼapaʼapaʼi nātou. (Maleko 10:35-​39; Luka 9:​46; 22:24-​26) Ko te faʼahi ʼaia neʼe fakatupu maveuveu pea mo faka lotomamahi ki ʼihi. Kae neʼe nātou lava fakamolemole te ʼu agahala ʼaia pea mo nātou haga gāue fakatahi. Ki muli age, neʼe tohi fēnei e te tahi ia nātou: “Ko ae e fia ofa ki te mauli pea mo mamata ki he u aho manuʼia, ke ina taupau tona alelo mai te kovi pea mo ona laugutu mai te u lea kaka, ke fakamamao ia mai te kovi pea mo fai te lelei, ke ina fekumi te tokalelei pea mo tulikaki ia.”​—1 Petelo 3:​10, 11.

21. Koteā te tokoni maʼuhiga ʼaē neʼe fai e Sesu ʼo ʼuhiga mo te fakamolemole?

²¹ ʼI te kamata, neʼe tou fakatokagaʼi te manatu ʼaenī: Neʼe fakamolemole e te ʼAtua te ʼu tuʼuga agahala ʼaē neʼe tou fai ʼi muʼa atu, koia ʼe tonu ke tou faʼifaʼitaki kia te ia ʼo tou fakamolemole ki totatou ʼu tēhina. (Pesalemo 103:12; Isaia 43:25) Kae ʼe ʼi ai te tahi faʼahi maʼuhiga ʼo te manatu ʼaia. ʼI tana ʼosi fakahā te faikole faʼifaʼitaki, neʼe ʼui fēnei e Sesu: “He kapau e koutou fakamolemole te hahai ki anatou agahala, pea e fakamolemole anai kia koutou tautou Tamai e i Selo.” Hili kiai te taʼu katoa, neʼe ina toe fai te ʼu palalau ʼaia ʼo ina akoʼi ki tana kau tisipulo ke nātou faikole fēnei: “Ke fakamolemole mai ki amatou agahala he matou fakamolemole kia natou fuape e hala mai kia matou.” (Mateo 6:​12, 14; Luka 11:4) Koia, ʼi muʼa pe ʼo tana mate, neʼe ʼui fēnei e Sesu: “Ka koutou tutuu o faikole, kapau e i ai he mea e koutou fakafehagai ai ki he tahi, fakamolemole, ke fakamolemole e tautou Tamai i Selo ki autou hala.”​—Maleko 11:25.

22, 23. Kapau ʼe tou loto fakamolemole, pea ʼe feafeaʼi anai tatatou manatu mokā tou tokakovi mo he tahi?

²² Ei, kapau ʼe tou loto ke fakamolemole mai te ʼAtua kia tatou, pea ʼe maʼua ke tou fakamolemole ki totatou ʼu tēhina. Ka koutou tokakovi mo he tahi Kilisitiano, koutou fai te fehuʼi ʼaenī kia koutou, ‘ ʼE mole maʼuhiga age koa la ke fakamolemole mai te ʼAtua kia ʼau, ʼi haku faiga ke ʼau fakahā te hala ʼo toku tēhina pe ko toku tuagaʼane ʼaē neʼe lākahala mai kia ʼau ʼuhi ko tona ʼuhiga agahala?’ ʼE koutou ʼiloʼi pe tona tali.

²³ Kae e feafeaʼi mo kapau ʼe kovi age te agahala ʼaē neʼe fai? Pea koteā te ʼu ʼaluʼaga ʼaē ʼe feala ke fakaʼaogaʼi ai te tokoni ʼa Sesu ʼaē ʼe tuʼu ia Mateo 18:15-​18? ʼE tou vakaʼi anai te faʼahi ʼaia ʼi te alatike ʼaē ka hoa mai.

[Nota ʼi te lalo pasina]

ʼE Kei Koutou Manatuʼi Koa?

◻ Koteā te faʼifaʼitaki ʼaē ʼe tuku mai e Sehova ʼo ʼuhiga mo te fakamolemole?

◻ Koteā ʼaē ʼe tonu ke tou manatuʼi ʼo ʼuhiga mo te kokelekasio?

◻ ʼI te agamāhani, ʼe tonu ke tou tali feafeaʼi te ʼu hala ʼaē ʼe fai mai e ʼihi?

◻ Kapau ʼe ʼaoga, pea koteā ʼaē ʼe feala ke tou fai ke tou fakatokatoka mo totatou ʼu tēhina?

[Paki ʼo te pasina 15]

Ka koutou tokakovi mo he Kilisitiano, koutou faiga ke koutou galoʼi; ʼaki te temi, ʼe pulinoa anai te tokakovi ʼaia