Te Faikole Ko Tatatou Tāmai ʼAē ʼe ʼi Selo Tona Faka ʼUhiga Kia Koutou
KO TE faikole ko tatatou Tāmai ʼaē ʼe ʼi selo, ohage ko tona fakahā e Sesu Kilisito ʼi te Akonaki ʼi te Moʼuga, ʼe tuʼu ʼi te Tohi-Tapu ia Mateo kapite 6, ʼi te vaega 9 ki te 13. ʼI muʼa ʼo tana akoʼi age ia te faikole ʼaia, neʼe ʼui fēnei e Sesu: “Ka koutou faikole, ʼaua naʼa koutou lau ʼo liuliuga ʼakotou ʼu palalau ohage ko te hahaʼi ʼo te ʼu puleʼaga, heʼe nātou mahalo ʼe fakalogo anai nātou ʼi te lahi ʼo tanatou ʼu palalau.”—Mateo 6:7, MN.
ʼE mahino lelei mai neʼe mole loto e Sesu ke tou lau fakaʼatamai te faikole ʼaē ko tatatou Tāmai ʼaē ʼe ʼi Selo. ʼE moʼoni neʼe ina toe fakahā age te faikole ʼaia ki te tahi ʼu hahaʼi ʼaē neʼe fakalogo kia te ia. (Luka 11:2-4) Kae ʼe mole tatau te ʼu kupu ʼi te Evaselio ʼo Mateo pea mo Luka. Tahi ʼaē meʼa, ko te ʼu faikole ʼaē neʼe fai ki muli age e Sesu pea mo tana ʼu tisipulo neʼe mole nātou fakaʼaogaʼi te ʼu kupu totonu ʼo te faikole ʼaē neʼe ina tuku ohage ko te faʼifaʼitaki.
He koʼe neʼe tohi te faikole ʼaē ko tatatou Tāmai ʼaē ʼe ʼi Selo ʼi te Tohi-Tapu? ʼAki te faʼifaʼitaki ʼaia ʼo te faikole, ʼe akoʼi mai e Sesu te ʼu faʼahiga meʼa ʼe tali e te ʼAtua ʼi tatatou ʼu faikole. ʼI te faikole ʼaia, ʼe tou toe maʼu ai mo te ʼu tali ki te ʼu fehuʼi ʼo te maʼuli. Koia tou vakaʼi te ʼu faʼahi takitahi ʼo te faikole ʼo te Tāmai ʼaē ʼe ʼi Selo.
Ko Ai Te Huafa ʼo Te ʼAtua?
“Ko tamatou Tāmai ʼaē ʼe ʼi selo, ke tāpuhā tou huafa!” (Mateo 6:9, MN ) Ko te ʼu ʼuluaki kupu ʼaia ʼo te faikole faʼifaʼitaki ʼaia ʼe tokoni mai kia tatou ke tou fakaōvi ki te ʼAtua ʼo tou palalau kia ia ohage ko “[hatatou] Tāmai.” Ohage ko he tamasiʼi, ʼe fakaōvi ki tana tāmai peʼe ki tana faʼe ʼaē ʼe ʼofa pea mo mahino kia ia, ʼe feala mo tatou ke tou fakaōvi ki tatatou Tāmai ʼaē ʼe ʼi selo, ʼo tou falala ʼe fia fagono mai. Neʼe hiva fēnei te Hau ko Tavite: “Ia koe ʼaē ʼe fagono ki te faikole, ʼe ʼolo atu anai kia te koe te hahaʼi fuli pe.”—Pesalemo 65:2.
ʼE akoʼi tatou e Sesu ke tou faikole ke tāpuhā te huafa ʼo te ʼAtua, peʼe ke tuku kehe ohage ko he meʼa taputapu. Kae ko ai te huafa ʼo te ʼAtua? ʼE tali fēnei e te Tohi-Tapu: “Ko koe, ʼaē ko tou huafa ko Sehova, ko koe tokotahi pe, te Māʼoluga ʼAupito ʼi te kele katoa.” (Pesalemo 83:18) Neʼe kua koutou lau koa te huafa ʼo Sehova ʼi te Tohi-Tapu?
ʼI tona ʼaluʼaga moʼoni, ʼe hā teitei tuʼa 7 000 te huafa ʼo te ʼAtua ʼi te ʼu tohi ʼāfea ʼo te Tohi-Tapu. Kae ko ʼihi kau fakaliliu neʼe nātou toʼo te huafa ʼaia ʼi tanatou fakaliliu te Tohi-Tapu. Koia ʼaē ʼe tou kole ai ki totatou Tupuʼaga ke tāpuhā tona huafa, peʼe ke fakaliliu ʼo maʼoniʼoni. (Esekiele 36:23) Ke tou mulimuli ki te faʼahi ʼaia ʼo te faikole ʼe tonu ke tou fakaʼaogaʼi te huafa ʼo Sehova mokā tou faikole ki te ʼAtua.
Ko te fafine ʼe higoa ko Patricia, neʼe lahilahi ake ʼi te Katolika pea neʼe ina ʼiloʼi lelei te faikole ʼaē ko tatatou Tāmai ʼaē ʼe ʼi selo. Neʼe feafeaʼi te fafine ʼaia ʼi te fakahā age ʼa te Fakamoʼoni ʼa Sehova te huafa ʼo te ʼAtua ʼi te Tohi-Tapu? Neʼe ina ʼui fēnei: “Neʼe ʼau punamaʼuli ʼaupito! Neʼe ʼau vakaʼi ʼi taku Tohi-Tapu, pea neʼe toe tuʼu ai. Pea neʼe fakahā mai e te Fakamoʼoni ia Mateo 6:9, 10 pea mo ina fakamahino mai ʼe talanoa te faikole ʼaē ko tatatou Tāmai ʼaē ʼe ʼi selo ki te huafa ʼo te ʼAtua. Neʼe ʼau fiafia lahi pea mo ʼau kole kia ia ke ina akoʼi mai te Tohi-Tapu.”
Ke Hoko Te Finegalo ʼo Te ʼAtua ʼi Te Kele
“Ke hoko mai tou puleʼaga. Ke fai tou finegalo ʼi te kele, ohage ko selo!” (Mateo 6:10, MN ) ʼE hoko feafeaʼi anai te faʼahi ʼaenī ʼo te faikole ʼa Sesu? Ki te hahaʼi tokolahi ko selo ʼe ko he koga meʼa tokalelei pea mo fīmālie. ʼE ʼui e te Tohi-Tapu ko selo ʼe ko “te nofoʼaga lahi ʼo te maʼoniʼoni pea mo te matalelei” ʼo Sehova. (Isaia 63:15) Ko tona tupuʼaga la ʼaia ʼo tatatou faikole ʼaē ke hoko te finegalo ʼo te ʼAtua ʼi te kele “ohage ko selo”! Kae ʼe hoko anai koa te faʼahi ʼaia?
Neʼe fakakikite fēnei e te polofeta ʼa Sehova ko Taniela: “Ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia [ʼi te kele], pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga.” (Taniela 2:44) Ko te Puleʼaga ʼaia ʼi selo ʼe ina fakatuʼu anai te tokalelei ʼi te kele katoa ʼaki he pule ʼe faitotonu.—2 Petelo 3:13.
Ko tatatou kole ʼaē ke haʼu te Puleʼaga ʼa te ʼAtua pea mo fakahoko tona finegalo ʼi te kele, ʼe tou fakahā ai ʼe tou tui ʼe hoko moʼoni anai te faʼahi ʼaia. Neʼe tohi fēnei e te ʼapositolo ko Soane: “Neʼe ʼau logo ki te leʼo mālohi ʼe haʼu mai te hekaʼaga faka hau, ʼo ina ʼui fēnei: ‘Koʼeni! Ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai mo nātou, pea ʼe nātou liliu anai ko tana ʼu hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.’ ” Pea neʼe toe ʼui fēnei e Soane: “Neʼe ʼui e Ia ʼaē neʼe heka ʼi te hekaʼaga faka hau: . . . ‘Haga ʼo tohi, heʼe ko te ʼu folafola ʼaenī ʼe agatonu pea mo moʼoni.’ ”—Apokalipesi 21:3-5, MN.
Tatatou Faikole ʼo ʼUhiga Mo Te ʼu Meʼa ʼe ʼAoga Kia Tatou
ʼI te faʼifaʼitaki ʼo te faikole ʼaē neʼe tuku mai e Sesu, neʼe ina fakahā ai ʼe tonu ke tou ʼuluaki faikole ʼo ʼuhiga mo te huafa pea mo te finegalo ʼo te ʼAtua. Pea ʼe hoko atu te faikole ʼaia ʼaki te tahi ʼu meʼa ʼaē ʼe feala ke tou kole kia Sehova.
ʼE tou ʼuluaki kole fēnei: “Foaki mai ʼi te ʼaho nei tamatou pane ki te ʼaho ʼaenī.” (Mateo 6:11, MN ) ʼE mole tou kole ke tou maʼu ni ʼu koloā. Neʼe fakaloto mālohiʼi tatou e Sesu ke tou kole “[tatatou] pane ki te ʼaho ʼaenī, ʼaē ʼe ʼaoga ki te ʼaho nei.” (Luka 11:3, MN ) ʼO mulimuli ki te faikole ʼaē ko tatatou Tāmai ʼaē ʼe ʼi selo, ʼe feala ke tou faikole ʼo tou tui ʼe foaki mai anai e te ʼAtua te ʼu meʼa ʼaē ʼe ʼaoga kia tatou ʼi te ʼaho fuli, mo kapau ʼe tou ʼoʼofa pea mo fakalogo kia te ia.
Kapau ʼe lahi fau tatatou tuʼania ʼo ʼuhiga mo te ʼu fihifihia faka paʼaga, pea ʼe mole tou toe tokagaʼi te ʼu meʼa fakalaumālie pea mole tou toe fai ai te ʼu meʼa ʼaē ʼe fakamaʼua mai e te ʼAtua. Kae kapau ʼe tou fakamuʼamuʼa ʼi totatou maʼuli te tauhi ki te ʼAtua, pea ʼe feala ke tou tui papau ko tatatou kole ʼo ʼuhiga mo te ʼu meʼa ʼaē ʼe ʼaoga kia tatou ʼi te faʼahi fakasino, ohage ko te meʼa kai pea mo te mutuʼi meʼa, ʼe fakalogo anai kiai. Neʼe ʼui fēnei e Sesu: “Ke koutou haga kumi muʼa te puleʼaga pea mo tona faitotonu [ʼa te ʼAtua], pea ʼe toe foaki atu anai mo te ʼu meʼa fuli ʼaia kia koutou.” (Mateo 6:26-33) ʼE faigataʼa te kumi ia te faitotonu ʼa te ʼAtua, heʼe ko tatou fuli ʼe tou agahala pea ʼe tonu ke fakamolemole mai. (Loma 5:12) ʼE toe kau te faʼahi ʼaia ki te faikole ʼo te Tāmai ʼaē ʼe ʼi selo.
Tatatou Faikole ʼAē Ke Fakamolemole Mai
“Ke fakamolemole ʼomātou maʼua, ohage foki ko tamatou fakamolemole kia nātou ʼe maʼua mai kia mātou.” (Mateo 6:12, MN ) ʼI te faikole ʼaē ko tatatou Tāmai ʼaē ʼe ʼi selo ʼaē ʼe tuʼu ia Luka, ko te ʼu “maʼua” ʼaia ʼe ko te ʼu “agahala.” (Luka 11:4) ʼE fakamolemole moʼoni koa e Sehova ʼAtua tatatou ʼu agahala?
Logola neʼe agahala mamafa ia Tavite, te Hau ʼo te Iselaele ʼāfea, kae neʼe fakahemala pea neʼe faikole fēnei ʼaki he loto falala: “Ko koe, Ê Sehova, ʼe ke agalelei pea mo fakamolemole gafua; pea mo mahu ʼi te lotoʼofa kia nātou fuli ʼaē ʼe nātou fetapā kia te koe.” (Pesalemo 86:5) ʼE ko he manatu fakaloto fīmālie! Ko tatatou Tāmai ʼaē ʼe ʼi selo ʼe ina “fakamolemole gafua” te ʼu agahala ʼo nātou ʼaē ʼe nātou pāui kia te ia ʼaki he loto fakahemala. Ohage pe ko te lava molehi katoa ʼo he maʼua, ko Sehova ʼAtua ʼe feala ke ina fakamolemole katoa tatatou ʼu agahala.
Kae ʼe fakahā e Sesu ʼe ʼi ai te meʼa ʼe tonu ke tou fai: Ke fakamolemole mai e te ʼAtua, ʼe tonu ke tou fakamolemole ki te hahaʼi. (Mateo 6:14, 15) Logola neʼe gaohi koviʼi ia Sopo e tona ʼu kaumeʼa e toko tolu, kae neʼe ina fakamolemole kia nātou pea mo faikole maʼa nātou. (Sopo 42:10) Kapau ʼe tou fakamolemole kia nātou ʼaē ʼe agahala mai, ʼe tou fakafiafia anai te ʼAtua pea ʼe ina fakahā mai anai tona manavaʼofa.
Ko te lotolelei ʼa te ʼAtua ke ina fakalogo ki tatatou ʼu faikole ʼe tonu ke ina uga tatou ke tou kumi ke ina leleiʼia tatou. Pea ʼe feala te faʼahi ʼaia tatau aipe peʼe tou agahala. (Mateo 26:41) ʼE feala ke toe tokoni mai ia Sehova ʼi te faʼahi ʼaia, ohage ko tona fakahā e Sesu, ʼo ina fakaʼosi te faikole ʼaki te kole maʼuhiga.
Tatatou Kole Ke Tokoni Mai Ke Tou Haga Nofo Agatonu
“ ʼAua naʼa ke tuku mātou ki te fakahala, kae ke fakamaʼuli mātou mai te agakovi.” (Mateo 6:13, MN ) ʼE mole līaki tatou e Sehova mokā fakahalaʼi tatou peʼe ina uga tatou ke tou tō ki te agahala. ʼE ʼui fēnei e tana Folafola: “ ʼE mole feala ke ʼahiʼahiʼi e te ʼAtua ʼaki he ʼu meʼa ʼe kovi pea ko ia totonu ʼe mole ina ʼahiʼahiʼi he tahi.” (Sakopo 1:13, MN ) ʼE fakagafua e te ʼAtua ke fakahalaʼi tatou, kae ʼe feala ke ina hāofaki tatou mai te Fai Fakahala Lahi—“te agakovi” ʼaē ko Satana te Tevolo.
Neʼe uga fēnei e te ʼapositolo ko Petelo te kau Kilisitiano: “Koutou nonofo ʼalaʼala, koutou nonofo tokakaga. Ko tokotou fili, ia te Tevolo, ʼe feʼaluʼaki ohage ko he laione ʼe gugulu, ʼo ina kumi ke ina kai he tahi.” (1 Petelo 5:8, MN ) Neʼe faiga e Satana ke ina fakahalaʼi te tagata haohaoa ko Sesu Kilisito. Neʼe koteā te fakatuʼutuʼu ʼa te Tevolo? Neʼe ina fia fakamamaʼo ia Sesu mai te tauhi maʼa kia Sehova ʼAtua. (Mateo 4:1-11) Kapau ʼe koutou kumi ke koutou tauhi ki te ʼAtua, ʼe toe fia fakamamaʼo koutou e Satana mai te tauhi maʼa!
ʼI te malamanei ʼaē ʼe ina puleʼi, ʼe feala ke fakahalaʼi tatou e te Tevolo ke tou fai he ʼu aga ʼe mole leleiʼia e te ʼAtua. (1 Soane 5:19) Koia ʼe maʼuhiga ke tou kole tokoni tuʼumaʼu ki te ʼAtua, tāfito la ʼi te temi ʼaē ʼe fakahalaʼi ai tatou. Pea kapau ʼe tou tauhi kia Sehova ʼo mulimuli ki tana Folafola, te Tohi-Tapu, pea ʼe ina hāofaki anai tatou, ʼo tokoni mai ke tou tauʼi te Tevolo. ʼE ʼui fēnei mai e te Tohi-Tapu: “E agatonu te Atua, e mole ina fakagafua anai ke lahiʼage toutou fakahalaʼi i te mea e koutou lavaʼi.”—1 Kolonito 10:13.
ʼE Maʼuhiga Ke Tou Tui Ki Te ʼAtua
ʼE fakaloto māfana ʼaupito tatatou ʼiloʼi ʼaē ʼe tokaga tatatou Tāmai ʼaē ʼe ʼi selo kia tatou takitokotahi! Neʼe ina fekauʼi mai tona ʼAlo, ia Sesu Kilisito, ke ina akoʼi mai peʼe feafeaʼi te faikole. ʼE mahino ia ʼe tou fia fakafiafia ia Sehova ʼAtua. ʼE tou lava fakahoko feafeaʼi te faʼahi ʼaia?
ʼE ʼui fēnei e te Tohi-Tapu: “E mole feala ki he tahi ke lelei ki te Atua, kapau e mole ina mau te tui, he ko ae e laka ki te Atua, e maua ke tui, e mauli pea e ina fakapale natou e natou kumi iaʼia.” (Hepeleo 11:6) ʼE tou lava maʼu feafeaʼi te tui ʼaia? ʼE ʼui fēnei e te Tohi-Tapu: “ ʼE tupu te tui mai te meʼa ʼaē neʼe kita logo kiai.” (Loma 10:17, MN ) ʼE fiafia te kau Fakamoʼoni ʼa Sehova ʼi tanatou palalau ʼo ʼuhiga mo te ʼu manatu faka Tohi-Tapu mo te hahaʼi fuli ʼaē ʼe nātou fia tauhi ki te ʼAtua mo he tui moʼoni.
ʼOfa pe ʼaki te vakaʼi ʼaenī ʼo te faikole ʼo tatatou Tāmai ʼaē ʼe ʼi Selo, ke loloto age takotou mahino ki tona faka ʼuhiga. Kapau ʼe lahi tatatou ʼiloʼi ia Sehova pea mo tana fakapale ia “natou e natou kumi iaʼia,” pea ʼe feala ke mālohi ai takotou tui ki te ʼAtua. ʼOfa pe ke lahi te ʼu meʼa ka koutou ako ʼo ʼuhiga mo ia pea mo tana ʼu fakapapau, ke koutou maʼu ai he ʼu felogoi lelei ʼo talu ai mo takotou Tāmai ʼaē ʼe ʼi selo.—Soane 17:3.
[Talanoa ʼo te pasina 5]
“Ko tamatou Tāmai ʼe ʼi selo, ke tāpuhā tou huafa! Ke hoko mai tou puleʼaga! Ke fai tou finegalo ʼi te kele, ohage ko selo. Foaki mai ʼi te ʼaho nei tamatou pane ki te ʼaho ʼaenī; pea ke fakamolemole ʼomātou maʼua, ohage foki ko tamatou fakamolemole kia nātou ʼe maʼua mai kia mātou. Pea ʼaua naʼa ke tuku mātou ki te fakahala, ka ke fakamaʼuli mātou mai te agakovi.”—Mateo 6:9-13, MN
[Paki ʼo te pasina 7]
ʼE foaki e Sehova te ʼu meʼa ʼaē ʼe ʼaoga kia nātou ʼaē ʼe ʼoʼofa kia te ia
[Paki ʼo te pasina 7]
ʼE toe tokoni te ʼAtua kia tatou ke tou tauʼi te Tevolo
[Paki ʼo te pasina 7]
Kapau ohage ko Sopo ʼe tou fakamolemole kia nātou neʼe agahala mai, ʼe feala ke manavaʼofa te ʼAtua kia tatou