ʼE Foaki Mai e Sehova Te ʼu Meʼa ʼAē ʼe ʼAoga Kia Tatou ʼi Te ʼAho Fuli

“Aua [takotou] hoha. Koteuhi . . . e iloi e [takotou] Tamai ia mea e aoga kia koutou.”​—Luka 12⁠:​29, 30.

1. ʼE taupau feafeaʼi e Sehova te ʼu manu?

NEʼE kua koutou sio koa la ki he misi ʼe ina togi te kele? Neʼe lagi koutou feʼekeʼaki peʼe koteā ʼapē ʼaē ʼe ina kai. ʼI tana Akonaki ʼi te Moʼuga, neʼe fakahā e Sesu ʼe ʼi ai te ako ʼe feala ke tou maʼu mai te faʼahiga taupau e Sehova ia te ʼu manulele. Neʼe ʼui maʼana: “Koutou vakavakaʼi lelei te ʼu manulele ʼo te lagi, heʼe mole nātou to magisi, pea ʼe mole nātou utu magisi, pea ʼe mole nātou tānaki ki he ʼu faleoko; kaʼe fafaga nātou e takotou Tāmai ʼaē ʼe ʼi selo. ʼE mole koa la koutou maʼuhiga age ia nātou?” (Mateo 6⁠:​26, MN ) ʼI hona ʼaluʼaga fakatalakitupua, ʼe fafaga e Sehova te ʼu meʼa fuli ʼaē neʼe ina fakatupu.​—Pesalemo 104⁠:​14, 21; 147⁠:⁠9.

2, 3. Koteā te ʼu ako fakalaumālie ʼe tou maʼu mai te akoʼi ʼo tatou e Sesu ke tou faikole ʼo ʼuhiga mo te ʼu meʼa ʼaē ʼe ʼaoga kia tatou ʼi te ʼaho fuli?

² Kae he koʼe koa neʼe ʼui e Sesu ke tou faikole fēnei: “Foaki mai ʼi te ʼaho nei tamatou pane ki te ʼaho ʼaenī”? (Mateo 6⁠:​11, MN ) ʼAki te kole ʼaia, ʼe feala ke tou maʼu he ʼu ako loloto ʼi te faʼahi fakalaumālie. ʼUluaki, ʼe ina fakamanatuʼi mai kia tatou ko Sehova ʼe ko te Matapuna ʼo meʼa fuli ʼaē ʼe ʼaoga kia tatou. (Pesalemo 145⁠:​15, 16) ʼE feala ki te tagata ke ina tō pea mo gāueʼi te kele, kae ko te ʼAtua tokotahi pe ʼaē ʼe ina fakahomo ake, ʼi te faʼahi fakalaumālie pea mo te faʼahi fakasino. (1 Kolonito 3⁠:⁠7) Ko te meʼa kai pea mo te meʼa ʼinu ʼe ko he ʼu meʼa ʼofa mai te ʼAtua. (Gaue 14⁠:17) Ko tatatou kole ʼaē ke ina foaki mai te ʼu meʼa ʼaē ʼe ʼaoga kia tatou ʼi te ʼaho fuli, ʼe tou fakahā ai ʼe mole tou maʼuli galo ʼo ʼuhiga mo te ʼu meʼa ʼaia ʼaē ʼe ina foaki mai. ʼE mahino ia ko te kole ʼaia ʼe mole ina toʼo ia tatou te maʼua ʼaē ke tou gāue, mo kapau ʼe tou fealagia.​—Efeso 4⁠:28; 2 Tesalonika 3⁠:⁠10.

³ Lua, ko tatatou kole te “pane ki te ʼaho ʼaenī” ʼe ina fakahā ai ʼe mole tonu ke tou tuʼania fau ʼo ʼuhiga mo te ka haʼu. Ki muli age neʼe ʼui fēnei e Sesu: “ ʼAua naʼa koutou hoha ʼo ʼui maʼa koutou: ‘Koteā he meʼa ka tou kai?’ peʼe: ‘Koteā he meʼa ka tou ʼinu?’ peʼe: ‘Koteā he meʼa ka tou kofu ʼaki?’ Heʼe ko te ʼu meʼa fuli ʼaia ʼe kumi faka mānumānu e te ʼu puleʼaga. Kae ʼe ʼiloʼi pe e takotou Tāmai ʼaē ʼe ʼi selo, ʼe ʼaoga kia koutou te ʼu meʼa fuli ʼaia. Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia kia koutou. Koia, ʼaua naʼa koutou hoha ʼo ʼuhiga mo te ʼapogipogi, heʼe ko te ʼapogipogi ʼe ʼi ai anai tona ʼu hoha ʼo ʼona.” (Mateo 6⁠:​31-34, MN ) Ko te kole ʼaē ke foaki mai “te pane ki te ʼaho ʼaenī” ʼe ko te faʼifaʼitaki ʼaia ke tou maʼuli faka faigafua ʼi te ‘aga faka lotu pea mo faka feʼauga pe mo te meʼa ʼaē ʼe tou maʼu.’​—1 Timoteo 6⁠:​6-8.

Te Meʼa Kai Fakalaumālie ʼi Te ʼAho Fuli

4. Koteā te ʼu meʼa neʼe hoko ʼi te maʼuli ʼo Sesu pea mo te kau Iselaele ʼe ina fakahā lelei te maʼuhiga ʼaē ke tou kai ki te meʼa kai fakalaumālie?

⁴ Ko tatatou faikole ki tatatou meʼa kai ʼe tonu ke ina toe fakamanatuʼi mai ʼe ʼaoga kia tatou te meʼa kai fakalaumālie ʼi te ʼaho fuli. Logola tona hālofia hili te temi fualoa ʼaē neʼe ʼaukai ai, kae neʼe tekeʼi e Sesu tona fakahalaʼi e Satana ke ina fakaliliu te ʼu maka ko he ʼu pane, ʼo ina ʼui fēnei: “ ʼE tohi fēnei: ‘Ko te tagata ʼe mole tonu ke maʼuli ʼaki pe te pane, kaʼe ʼaki te folafola fuli pe ʼe haʼu mai te gutu ʼo Sehova.’ ” (Mateo 4⁠:⁠4) ʼI te lakaga ʼaia, neʼe fakaʼaogaʼi e Sesu te ʼu palalau ʼaē neʼe fai e te polofeta ko Moisese ki te kau Iselaele: “Neʼe fakamālaloʼi koe [e Sehova], neʼe ina faka hālofia koe pea neʼe ina fafaga koe ʼaki te mane, ʼaē neʼe mole ke ʼiloʼi pea neʼe mole ʼiloʼi e tau ʼu tāmai; ke feala hau ʼiloʼi ko te tagata ʼe mole maʼuli ʼaki pe te pane, kae ʼe maʼuli te tagata ʼaki te folafola fuli pe ʼaē ʼe haʼu mai te gutu ʼo Sehova.” (Teutalonome 8⁠:⁠3) Ko te fafaga ʼaē e Sehova te kau Iselaele ʼaki te mane neʼe nātou maʼu ai te meʼa kai fakasino pea neʼe nātou ako ai ʼi te faʼahi fakalaumālie. ʼUluaki, neʼe tonu ke nātou “tahi tae te mane ʼo fakafuafua maʼa nātou ki te ʼaho katoa.” Kapau neʼe nātou tānaki ʼo laka age ʼi te mane ʼaē neʼe ʼaoga kia nātou ʼi te ʼaho e tahi, pea ko te toega mane neʼe liliu ʼo mamanu pea mo ʼugagaia. (Ekesote 16⁠:​4, 20) Kae neʼe mole hoko te faʼahi ʼaia ʼi te ono ʼaho, he neʼe maʼua ʼaē ke nātou tānaki lahi age te mane, ke ʼi ai hanatou meʼa kai ki te Sapato. (Ekesote 16⁠:​5, 23, 24) Ko te mane neʼe ina fakamanatuʼi lahi kia nātou ʼe tonu ke nātou talagafua pea ʼe mole fakalogo pe tonatou maʼuli ki te pane kae toe fakalogo foki ki “te ʼu folafola fuli pe ʼaē ʼe haʼu mai te gutu ʼo Sehova.”

5. ʼE foaki feafeaʼi mai kia tatou e Sehova te meʼa kai fakalaumālie ʼi te ʼaho fuli?

⁵ ʼE toe ʼaoga foki kia tatou ke tou kai ki te meʼa kai fakalaumālie ʼaē ʼe foaki mai e Sehova ʼaki tona ʼAlo. Moʼo fakahoko te faʼahi ʼaia, neʼe fakanofo e Sesu te “tagata kaugana agatonu mo poto” moʼo foaki te “meʼa kai ʼi tona temi totonu” ki te loto fale ʼo te tui. (Mateo 24⁠:​45, MN ) Ko te kalasi ʼaia ʼo te kaugana agatonu ʼe mole ina foaki lahi pe te meʼa kai fakalaumālie ʼaki te ʼu tohi ako ʼo te Tohi-Tapu kae ʼe ina toe fakaloto mālohiʼi tatou ke tou lau te Tohi-Tapu ʼi te ʼaho fuli. (Sosue 1⁠:8; Pesalemo 1⁠:​1-3) Ohage ko Sesu, ʼe feala mo tatou ke tou kai ki te meʼa kai fakalaumālie ʼi te ʼaho fuli, mo kapau ʼe tou faiga ʼo ako pea mo fai ia te finegalo ʼo Sehova.​—Soane 4⁠:⁠34.

Te Fakamolemole ʼo Te ʼu Agahala

6. Ko te ʼu maʼua fea ʼaē ʼe tou kole ke fakamolemole mai, pea koteā ʼaē ʼe tonu ke tou fai ke lotolelei ai Sehova ʼo molehi te ʼu maʼua ʼaia?

⁶ ʼE hoko atu te faikole ʼo ʼui fēnei: “Fakamolemole ʼomātou maʼua, ohage foki ko tamatou fakamolemole kia nātou ʼe maʼua mai kia mātou.” (Mateo 6⁠:​12, MN ) ʼI henī ʼe mole talanoa ia Sesu ki he ʼu maʼua faka paʼaga. Neʼe manatu ia ki te fakamolemole ʼo tatatou ʼu agahala. ʼI te tohi ʼa Luka ʼe tou lau fēnei te faikole ʼaia: “Fakamolemole ʼamatou ʼu agahala, heʼe mātou toe fakamolemole foki mo mātou kia nātou ʼaē ʼe nātou maʼua mai kia mātou.” (Luka 11⁠:​4, MN ) Koia ka tou agahala, pea ʼe hage ʼe tou tuʼu maʼua kia Sehova. Kae ʼe lotolelei e totatou ʼAtua ʼofa ke ina ‘molehi,’ te maʼua ʼaia mo kapau ʼe tou fakahemala moʼoni, ke tou “mafuli” pea mo tou kole ke ina fakamolemole mai ʼo fakatafito ki te tui ki te sakilifisio faitotogi ʼa Kilisito.​—Gaue 3⁠:​19, MN; 10⁠:43; 1 Timoteo 2⁠:​5, 6.

7. He koʼe ʼe tonu ke tou kole ʼi te ʼaho fuli ke fakamolemole mai?

⁷ ʼI te tahi age faʼahi, ʼe tou agahala mo kapau ʼe mole tou mulimuli ki te fakatuʼutuʼu ʼo te ʼu lekula faitotonu ʼa Sehova. ʼUhi ko totatou ʼuhiga agahala, ʼe tou agahala fuli ʼi tatatou ʼu palalau, mo tatatou aga pea mo tatatou ʼu manatu peʼe mole tou fai te meʼa ʼaē ʼe tonu ke tou fai. (Tagata Tānaki 7⁠:20; Loma 3⁠:​23; Sakopo 3⁠:2; 4⁠:17) Koia, tatau aipe peʼe tou ʼiloʼi neʼe tou agahala ʼi te ʼaho peʼe kailoa, kae ʼe tonu ke tou kole ʼi tatatou ʼu faikole ke ina fakamolemole tatatou ʼu agahala.​—Pesalemo 19⁠:12; 40⁠:⁠12.

8. Koteā ʼaē ʼe tonu ke tou fai mokā tou kole ke fakamolemole mai, pea koteā tona ʼu fua lelei?

⁸ ʼI tatatou ʼosi kole ʼaē ke fakamolemole mai, ʼe tonu ke tou vakavakaʼi fakalelei ia tatou, mo tou fakahemala, pea mo fakahā tatatou agahala, ʼo tou tui ki te mālohi ʼo te taʼataʼa ʼaē neʼe liligi e Kilisito moʼo totogi tatou. (1 Soane 1⁠:​7-9) Moʼo fakahā te fakamalotoloto ʼo tatatou faikole, ʼe tonu ke tou fai he ʼu “gaue e tuha mo te fakahemala,” ke ʼalutahi mo tatatou kole ke fakamolemole mai. (Gaue 26⁠:20) ʼE feala ai ke tou tui ki te lotolelei ʼo Sehova ke ina fakamolemole ki tatatou ʼu agahala. (Pesalemo 86⁠:5; 103⁠:​8-14) ʼE tou maʼu ai te tokalelei ʼo te ʼatamai, “te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli,” ʼaē ka ina “taupau anai [totatou] ʼu loto pea mo [totatou] ʼu ʼatamai ʼaki ia Kilisito Sesu.” (Filipe 4⁠:​7, MN ) Kae ko te faikole ʼaē neʼe akoʼi mai e Sesu ʼe ina fakahā mai te tahi ʼu faʼahi ʼe tonu ke tou fai ke fakamolemole tatatou ʼu agahala.

Tou Loto Fakamolemole, Ke Feala Hana Fakamolemole Mai

9, 10. (a) Koteā te fakamahino neʼe fai e Sesu ʼo ʼuhiga mo te faikole, pea koteā ʼaē neʼe hā lelei ai? (b) Ko te lea fakatātā fea ʼaē neʼe fai e Sesu moʼo fakahā te maʼua ʼaē ke tou fakamolemole?

⁹ Ko te kole ʼaē “ke fakamolemole [ʼotatou] maʼua, ohage foki ko [tatatou] fakamolemole kia nātou ʼe maʼua mai kia [tatou],” ʼe ko te faʼahi pe ʼaia e tahi ʼo te faikole ʼaē ʼe tuku mai e Sesu tona fakamahino. ʼI te ʼosi ʼo te faikole, neʼe ina ʼui fēnei: “He kapau ʼe koutou fakamolemole ki te hahaʼi ʼanatou hala, pea ʼe toe fakamolemole anai mo takotou Tāmai kia koutou; kaʼe kapau ʼe mole koutou fakamolemole ki te hahaʼi ʼanatou hala, pea ʼe mole fakamolemole anai e takotou Tāmai kia koutou takotou ʼu hala.” (Mateo 6⁠:​14, 15, MN ) Koia neʼe fakahā lelei e Sesu, ke feala ke fakamolemole mai e Sehova ʼe tonu ke tou fakamolemole ki te hahaʼi.​—Maleko 11⁠:⁠25.

¹⁰ ʼI te tahi lakaga, neʼe fai e Sesu te lea fakatātā moʼo fakahā te maʼua ʼaē ke tou fakamolemole mo kapau ʼe tou loto ke fakamolemole mai ia Sehova. Neʼe ina fakamatala te hisitolia ʼo te hau neʼe ina molehi ki tana tagata kaugana tona maʼua lahi neʼe tonu ke ina huʼi age. Ki muli age, neʼe fakatūʼa mamafa e te hau te tagata kaugana ʼaia he neʼe mole ina fia molehi te maʼua veliveli ʼaupito neʼe tonu ke huʼi age e te tahi tagata kaugana kia ia. Neʼe fakaʼosi e Sesu tana lea fakatātā, ʼo ʼui maʼana: “Koia ʼe toe fai feiā pe anai kia koutou e taku Tāmai ʼaē ʼe ʼi selo, mo kapau ʼe mole koutou tahi fakamolemole ʼaki tokotou loto katoa, ki tona tēhina.” (Mateo 18⁠:​23-35, MN ) ʼE tou mahino lelei ai, ko te ʼu agahala ʼaē neʼe fakamolemole mai e Sehova kia tatou takitokotahi ʼe lahi ʼaupito age ʼi te ʼu hala ʼaē ʼe lava fai e he tahi kia tatou. Tahi ʼaē meʼa, ʼe fakamolemole mai e Sehova kia tatou ʼi te ʼaho fuli. Koia ʼe mahino ia ʼe feala ke tou fakamolemole te ʼu hala ʼaē ʼe fai mai ʼi ʼihi temi kia tatou.

11. Ko te tokoni fea ʼa te ʼapositolo ko Paulo ʼe tou muliʼi anai mo kapau ʼe tou loto ke fakamolemole mai e Sehova, pea koteā tona ʼu fua lelei?

¹¹ Neʼe tohi fēnei e te ʼapositolo ko Paulo: “Koutou fe’lotoleleiʼaki, mo feʼofaʼaki, koutou fe’fakamolemoleʼaki o hage ko te Atua nee fakamolemole kia koutou ia Kilisito.” (Efeso 4⁠:32) Kapau ʼe fefakamolemoleʼaki te kau Kilisitiano, pea ʼe nātou maʼuʼuli ai ʼi te tokalelei. Neʼe toe fakaloto mālohiʼi fēnei e Paulo: “Koia, koutou teu, o hage ko te u filifiliʼia maonioni mo ofaina a te Atua: te lotoofa, te agaofa, te agavaivai, te agamalu, te kataki. Koutou fe’katakiʼaki mo fe’fakamolemoleʼaki, kapau e mau e he tahi hona mamahi ki he tahiʼage; io, o hage ko te Aliki nee fakamolemole kia koutou, pea mo koutou, koutou fai feia. Kae uluaki ia meafuape aia, koutou teu te ofa e ko te haiʼaga tahi o te katoa o meafuape.” (Kolose 3⁠:​12-14) ʼE tou mahino ki te ʼu faʼahi fuli ʼaia ʼi te faikole ʼaē neʼe akoʼi mai e Sesu: “Fakamolemole ʼomātou maʼua, ohage foki ko tamatou fakamolemole kia nātou ʼe maʼua mai kia mātou.”

Te Puipui Mai Te Fakahala

12, 13. (a) Koteā ʼaē ʼe mole faka ʼuhiga kiai te ʼu palalau ʼaē neʼe hoko atu e Sesu ʼi te faikole ʼaē neʼe ina akoʼi mai? (b) Ko ai te Fai Fakahala lahi, pea koteā te faka ʼuhiga ʼo tatatou kole ke mole tuku tatou ki te fakahala?

¹² ʼI te hoko atu ʼo te faikole ʼaē neʼe akoʼi mai e Sesu, ʼe ina ʼui fēnei: “ ʼAua naʼa ke tuku mātou ki te fakahala.” (Mateo 6⁠:​13, MN ) Neʼe ʼui koa e Sesu ke tou kole kia Sehova ke ʼaua naʼa ina fakahalaʼi tatou? Kailoa ia, heʼe ʼi te Tohi-Tapu neʼe tohi fēnei e te tisipulo ko Sakopo: “Aua naa lau e he tahi moka fakahalai: ‘Kua fakahalai au e te Atua.’ Koteuhi e mole mafai e te Atua ke ina ahiahi te kovi pea e mole ina fakahalai he tahi.” (Sakopo 1⁠:13) Tahi ʼaē meʼa, neʼe tohi fēnei e te tagata fai pesalemo: “Kapau neʼe ke sivi te ʼu hala, Ê Sah, Ê Sehova, ko ai koa ʼaē ʼe feala anai ke tuʼu?” (Pesalemo 130⁠:⁠3) ʼE mole lamalama e Sehova tatatou ʼu hala fuli, pea ʼe mahino ia ʼe mole ina ʼahiʼahiʼi tatou. Koteā te faka ʼuhiga ʼo te koga ʼaia ʼo te faikole?

¹³ Ko ia ʼaē ʼe ina faigaʼi ke ina fakahiga tatou, mo fakatō tatou ʼaki tana ʼu aga kākā, pea mo ina kai tatou, ʼe ko Satana te Tevolo. (Efeso 6⁠:11) Ko ia te Fai Fakahala lahi. (1 Tesalonika 3⁠:⁠5) Ko tatatou kole ʼaē ke mole tuku tatou ki te fakahala, ʼe tou kole ai kia Sehova ke mole ina tuku tatou ke tou tō mokā fakahalaʼi tatou. ʼE tou kole kia ia ke tokoni mai kia tatou ke ʼaua naʼa “kākāʼi tatou e Satana,” ke mole tou tō ʼi te ʼu fakahala. (2 Kolonito 2⁠:11) ʼE tou kole ke tou nonofo “ ʼi te malumalu ʼo te Māfimāfi,” heʼe tou maʼu ai te puipui fakalaumālie ʼaē ʼe foaki kia nātou ʼaē ʼe nātou tali te pule faʼitaliha ʼa Sehova ʼi te ʼu meʼa fuli ʼaē ʼe nātou fai.​—Pesalemo 91⁠:​1-3.

14. ʼE fakahā feafeaʼi mai e Paulo ʼe tou lava tui papau mokā fakahalaʼi tatou, ʼe mole līaki anai tatou e Sehova mo kapau ʼe tou kumi Ia ia?

¹⁴ ʼE tou lava tui papau, kapau ʼe tou loto moʼoni ke tou hāo mai te fakahala, ʼo tou fakahā ʼi tatatou ʼu faikole pea mo te ʼu meʼa ʼaē ʼe tou fai, pea ʼe mole līaki anai tatou e Sehova. ʼE ʼui papau mai e te ʼapositolo ko Paulo: “ ʼE mole he fakahala kua hoko kia koutou ka mole heʼeki hoko ki he tagata. Kae ko te ʼAtua ʼe agatonu, ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe koutou lava tali, kae ʼaki te fakahala ʼe ina toe foaki atu anai mo he puleʼaki ke feala hakotou kātakiʼi.”​—1 Kolonito 10⁠:​13, MN.

“Hāofaki Mātou Mai Te Agakovi”

15. He koʼe ʼe maʼuhiga ʼi te temi nei ke tou faikole ke hāofaki tatou mai te agakovi?

¹⁵ ʼO mulimuli ki te ʼu tohi ʼāfea ʼaē ʼe tau mo te falala ʼo te ʼu Koga Tohi-Tapu Faka Kilisitiano Faka Keleka, ʼe fakaʼosi fēnei te faikole ʼaē neʼe akoʼi mai e Sesu: “Hāofaki mātou mai te agakovi.”a (Mateo 6⁠:​13, MN ) ʼE ʼaoga ʼaupito ʼi te ʼu temi fakaʼosi ʼaenī ke puipui tatou mai ia Satana te Tevolo. Ko Satana pea mo tana kau temonio ʼe nātou tauʼi te toe ʼo te kau fakanofo pea mo tonatou ʼu kaumeʼa ʼo te “toe hahaʼi tokolahi,” “ ʼaē ʼe nātou mulimuli ki te ʼu fakatotonu ʼa te ʼAtua pea mo nātou maʼu te gāue ʼaē ko te fakamoʼoni kia Sesu.” (Apokalipesi 7⁠:9; 12⁠:​9, 17, MN ) Neʼe fakatokagaʼi fēnei e te ʼapositolo ko Petelo te kau Kilisitiano: “Koutou nonofo ʼalaʼala, koutou nonofo tokakaga. Ko tokotou fili, ia te Tevolo, ʼe feʼaluʼaki ohage ko he laione ʼe gugulu, ʼo ina kumi ke ina kai he tahi. Kae ke koutou fakafeagai kia ia, ʼo koutou mālohi ʼi te tui.” (1 Petelo 5⁠:​8, 9, MN ) ʼE loto e Satana ke ina fakagata tatatou gāue fai faka mafola, pea ʼaki tana hahaʼi ʼi te kele​—te lotu, peʼe ko te fai fakatau peʼe ko te politike​—ʼe ina fia fakamatakuʼi tatou. Kae kapau ʼe tou haga nonofo mālohi, pea ʼe hāofaki anai tatou e Sehova. Neʼe tohi fēnei e te tisipulo ko Sakopo: “Koia, koutou fakalogo ki te Atua, pea koutou fakafehagai ki te temonio pea e hola mamao anai maià koutou.”​—Sakopo 4⁠:⁠7.

16. Ko ai ʼaē ʼe fakaʼaogaʼi e Sehova moʼo tokoni ki tana ʼu kaugana ʼaē ʼe ʼahiʼahiʼi?

¹⁶ Neʼe tuku e Sehova ke fakahalaʼi tona ʼAlo. Kae ʼi te ʼosi fakafeagai ʼa Sesu ki te Tevolo, ʼo ina fakaʼaogaʼi te Tohi-Tapu moʼona hāofaki, neʼe fekauʼi e Sehova te ʼu ʼaselo ke nātou fakaloto mālohiʼi ia ia. (Mateo 4⁠:​1-11) ʼO toe feiā aipe, ʼe fakaʼaogaʼi e Sehova tana kau ʼaselo moʼo tokoni mai kia tatou mo kapau ʼe tou faikole ʼaki te tui pea mo tou hola kia ia ke ina hāofaki tatou. (Pesalemo 34⁠:7; 91⁠:​9-11) Neʼe tohi fēnei e te ʼapositolo ko Petelo: “E iloi e te Aliki te haofaki o te hahai agatonu mai te ahiahi, kae e ina taupau te hahai agahala ke tautea natou i te aho o te Fakamau.”​—2 Petelo 2⁠:⁠9.

Kua Ōvi Mai Totatou Hāofaki

17. ʼI tana fakahā mai peʼe feafeaʼi te faikole, neʼe fakatuʼutuʼu feafeaʼi e Sesu te ʼu meʼa ʼaē ʼe tonu ke tou faikole kiai?

¹⁷ ʼI te faikole ʼaē neʼe akoʼi mai e Sesu, ʼe ina fakatuʼutuʼu lelei te ʼu faʼahi ʼaē ʼe tonu ke tou faikole kiai. ʼE tonu ke fakamuʼamuʼa te tāpuhā ʼo te huafa lahi pea mo taputapu ʼo Sehova. Mai tona ʼaluʼaga ʼaē ʼe ko te Puleʼaga Faka Mesianike ʼaē ka ina fakaʼaogaʼi moʼo fakahoko te faʼahi ʼaia, koia ʼe tou kole ai ke hoko mai te Puleʼaga ke ina fakaʼauha te ʼu puleʼaga fuli ʼa te tagata agahala, pea ke fakahoko katoa te finegalo ʼo te ʼAtua ʼi te kele ohage ko selo. Ko tatatou ʼamanaki ki te maʼuli heʼegata ʼi te palatiso ʼi te kele, ʼe fakalogo ki te tāpuhā ʼo te huafa ʼo Sehova pea mo te fakamoʼoni ʼa te ʼatulaulau ki tana pule faʼitaliha faitotonu. ʼI tatatou ʼosi faikole ʼo ʼuhiga mo te ʼu meʼa maʼuhiga ʼaia, ʼe feala ke tou faikole ʼo ʼuhiga mo te ʼu meʼa ʼaē ʼe ʼaoga kia tatou ʼi te ʼaho fuli, mo te fakamolemole ʼo tatatou ʼu agahala, pea mo hāofaki tatou mai te ʼu fakahala pea mo te aga kākā ʼa te agakovi, ia Satana te Tevolo.

18, 19. ʼE tokoni feafeaʼi mai te faikole ʼaē neʼe akoʼi mai e Sesu, ke tou nofo tokaga pea mo tou ‘taupau maʼu tatatou falala ʼo kaku ki te ikuʼaga’?

¹⁸ Kua ōvi mai te faka ʼāteainaʼi ʼo tatou mai ia ia ʼaē ʼe agakovi pea mo tana mālama aga fakahehema. ʼE ʼiloʼi lelei e Satana ʼe kei toe pe tana kiʼi “temi siʼi” ke ina fakahoko ai tona “hauhau fakamataku” ki te kele, tāfito ki te kau kaugana agatonu ʼa Sehova. (Apokalipesi 12⁠:​12, 17) ʼI te fakaʼiloga ʼo “te fakaosi o te malama-nei,” neʼe fakakikite e Sesu te ʼu ʼaluʼaga ʼe tonu ke hoko, pea ko ʼihi ʼu ʼaluʼaga ʼe ʼamanaki hoko anai. (Mateo 24⁠:​3, 29-31) Ka tou sio ki te hoko ʼo te ʼu meʼa ʼaia, pea kua vave hoko tatatou ʼamanaki ʼaē ki te ʼāteaina. Neʼe ʼui fēnei e Sesu: “Ka kamata hoko mai ia mea aia, koutou tuuʼake mo hiki ake outou fofoga, koteuhi kua fakaovi mai toutou haofaki.”​—Luka 21⁠:​25-28.

¹⁹ Ko te faikole nounou ʼaē neʼe foaki e Sesu ki tana kau tisipulo ʼe ina fakahā mai te ʼu meʼa ʼaē ʼe tonu ke tou faikole kiai ʼi te ōvi mai ʼo te fakaʼosi. ʼOfa pe ke tou haga falala ʼo aʼu ki te fakaʼosi, ko Sehova ʼe ina foaki mai anai te ʼu meʼa ʼaē ʼe ʼaoga kia tatou ʼi te faʼahi fakalaumālie pea mo te faʼahi fakasino. Kapau ʼe tou nofo tokaga ʼo faikole, pea ʼe feala anai ke tou “taupau maʼu ʼo kaku ki te ikuʼaga, te falala ʼaē neʼe tou maʼu ʼi te kamata.”​—Hepeleo 3⁠:​14, MN; 1 Petelo 4⁠:⁠7.

[Kiʼi nota]

Moʼo Fakamanatu

• Koteā te faka ʼuhiga ʼo tatatou kole ʼo ʼuhiga mo “te pane ʼo te ʼaho ʼaenī”?

• Koutou fakamahino te kole ʼaē “ke fakamolemole ʼomātou maʼua, ohage foki ko tamatou fakamolemole kia nātou ʼe maʼua mai kia mātou.”

• Koteā te faka ʼuhiga ʼo tatatou kole kia Sehova ke mole ina tuku tatou ki te fakahala?

• He koʼe ʼe ʼaoga ke tou faikole ‘ke hāofaki tatou mai te agakovi’?

[Paki ʼo te pasina 13]

Lydekker

[Paki ʼo te pasina 15]

ʼE tonu ke tou fakamolemole ki te hahaʼi mo kapau ʼe tou loto ke fakamolemole mai kia tatou