Koutou Hāofaki Tokotou Loto

“Ko te meʼa tāfito ʼaē ʼe tonu ke hāofaki, hāofaki tou loto, heʼe ko ia te ʼu matapuna ʼo te maʼuli.”—Tāʼaga Lea 4:23.

1, 2. He koʼe ʼe ʼaoga ke tou hāofaki totatou loto?

KO TE tagata kua matuʼa ʼi te motu ʼo Caraïbes neʼe hū ki tuʼa mai te koga meʼa neʼe fakaū ʼi te temi afā. ʼI tana sio ki te maumau lahi ʼaē neʼe hoko, neʼe ina tokagaʼi te kua toka ʼo te fuʼu ʼakau lahi neʼe kua fualoa tana tuʼu ʼi tona muʼa kaupā. Neʼe ina feʼekeʼaki fēnei: ‘He koʼe neʼe tō te fuʼu ʼakau lahi ʼaia, kae hāo te ʼu kiʼi fuʼu ʼakau liliki?’ Neʼe mahino leva kiai ʼi tana sioʼi te tafitoʼi ʼakau. Ko te fuʼu ʼakau lahi ʼaia ʼaē neʼe hage neʼe mālohi, neʼe kua popo ʼi loto, pea neʼe hā ʼaki te afā te popo ʼaē neʼe mole ʼasi ki tuʼa.

² ʼE ko he meʼa fakaʼofaʼofa mokā ko he tahi ʼe tauhi moʼoni pea ʼe hage ʼe aka mālohi ʼi te maʼuli faka Kilisitiano, kae tō ʼi te temi ʼaē ʼe ʼahiʼahiʼi ai tana tui. ʼE ʼui tonu e te Tohi-Tapu ko “te holi ʼo te loto ʼo te tagata ʼe kovi ia talu mai tana kei veliveli.” (Senesi 8:21) Ko tona faka ʼuhiga kapau ʼe mole tou nofo tokaga, pea māʼia mo te loto ʼaē ʼe lelei ʼe feala ke ina fai te meʼa ʼaē ʼe kovi. Mai tona ʼaluʼaga ʼaē ʼe mole he loto ʼe haohaoa, koia ʼe tonu ke tou tokagaʼi fakalelei te tokoni ʼaenī: “Ko te meʼa tāfito ʼaē ʼe tonu ke hāofaki, hāofaki tou loto.” (Tāʼaga Lea 4:23) ʼE tou lava hāofaki feafeaʼi totatou loto?

ʼE Tonu Ke Tou Fai Tuʼumaʼu He ʼu Sivi

3, 4. (a) Koteā te ʼu fehuʼi ʼaē ʼe feala ke tou fai ʼo ʼuhiga mo te loto? (b) Koteā ʼaē ka tokoni mai ke tou sivi totatou loto?

³ Kapau ʼe fai hokotou sivi e te tōketā, pea ʼe mahino ia ʼe ina vakaʼi anai mo tokotou mafu. ʼE ʼiloga koa ʼi tokotou sino, pea mo tokotou mafu, ʼe feʼauga takotou kai? E feafeaʼi te feʼaluʼaki ʼo tokotou toto? ʼE lelei koa pea mo mālohi te tā ʼo tokotou mafu? ʼE feʼauga koa takotou faigaoʼi? ʼE ʼi ai koa he ʼu meʼa ʼe fakatupu hoha ki tokotou mafu?

⁴ Kapau ʼe ʼaoga ke sivi tuʼumaʼu te mafu, pea e feafeaʼi age la ʼo ʼuhiga mo tokotou loto? ʼE sivi e Sehova tokotou loto. (1 Fakamatala 29:17) Pea ʼe tonu mo tatou ke tou fai feiā. ʼO feafeaʼi? ʼE tonu ke tou fai te ʼu fehuʼi ʼaenī: ʼE feʼauga koa taku fafaga ʼo toku loto ʼaki te meʼa kai fakalaumālie, ʼo ʼau fai haku ako tokotahi pea mo ʼau kau ki te ʼu fono? (Pesalemo 1:1, 2. Hepeleo 10:24, 25) ʼE faka maʼuhigaʼi koa e toku loto te logo ʼa Sehova, ohage ko “he afi kakaha ʼe nofo ʼi toku ʼu hui,” ʼo ina uga ʼau ke ʼau kau ki te gāue fai faka mafola ʼo te Puleʼaga pea mo fai ni ʼu tisipulo? (Selemia 20:9; Mateo 28:19, 20; Loma 1:15, 16) ʼE ʼau faiga fakamalotoloto koa ke ʼau kau ki te minisitelio temi katoa mokā ʼe feala? (Luka 13:24) Koteā ʼaē kua māhani kiai toku loto? ʼE ʼau kumi koa ke ʼau fakakaugā mo nātou ʼaē ʼe nātou fakatahiʼi tonatou loto ʼi te tauhi moʼoni? (Tāʼaga Lea 13:20; 1 Kolonito 15:33) ʼOfa pe ke tou foimo tokagaʼi totatou ʼu vaivaiʼaga pea mo fakatonutonuʼi fakavilivili.

5. He koʼe ʼe ʼaoga ke ʼahiʼahiʼi tatatou tui?

⁵ ʼE tau ʼahiʼahiʼi tatatou tui. ʼAki te ʼu ʼahiʼahi ʼaia, ʼe tou maʼu ai te ʼu faigamālie ke tou ʼiloʼi peʼe feafeaʼi totatou loto. Ki te kau Iselaele ʼaē neʼe ʼamanaki hū ki te Kele ʼo Te Fakapapau, neʼe ʼui fēnei e Moisese: “Ko Sehova tou ʼAtua neʼe ina fakahaʼele koe ʼi te ʼu taʼu ʼaia ʼe fāgofulu ʼi te toafa, ke ina fakamālaloʼi ifo koe, ke ina ʼahiʼahiʼi koe ke ina ʼiloʼi ai te meʼa ʼi tou loto, peʼe ke taupau anai tana ʼu fakatotonu peʼe kailoa.” (Teutalonome 8:2) ʼI ʼihi temi, ʼe mole tou punamaʼuli koa la ki tatatou ʼu manatu, totatou ʼu holi peʼe ko tatatou aga mokā hoko fakapunamaʼuli mai kia tatou he ʼu ʼaluʼaga peʼe ka fakahalaʼi tatou? ʼE mahino ia, ʼaki te ʼu ʼahiʼahi ʼaē ʼe fakagafua e Sehova ke hoko, ʼe feala ai ke tou ʼiloʼi totatou ʼu vaivaiʼaga, pea ʼe feala ai ke tou fai he ʼu fetogi. (Sakopo 1:2-4) ʼOfa pe ke tou fakakaukauʼi tuʼumaʼu ʼi te faikole tatatou aga mokā hoko he ʼu ʼahiʼahi!

Koteā ʼAē ʼe Hā ʼi Tatatou ʼu Palalau?

6. Koteā ʼaē ʼe feala ke hā ʼi tatatou ʼu fai palalau ʼo ʼuhiga mo totatou loto?

⁶ ʼE tou lava ʼiloʼi feafeaʼi te meʼa ʼaē ʼe maʼuhiga ki totatou loto? Neʼe ʼui fēnei e Sesu: “Ko he tagata agalelei ʼe ina toʼo mai ki tuʼa te ʼu meʼa lelei mai te koloā ʼaē ʼe lelei ʼo tona loto, kaʼe ko he tagata agakovi ʼe ina toʼo mai ki tuʼa te ʼu meʼa kovi mai tona koloā ʼaē ʼe kovi; heʼe ko te mahu ʼo te loto ʼaē ʼe palalau ai te gutu.” (Luka 6:45, MN ) Ko te ʼu meʼa ʼaē ʼe tou palalau māhani kiai ʼe nātou fakahā lelei mai te ʼu meʼa ʼaē ʼe fia fai kiai totatou loto. ʼE tou faʼa palalau koa ki te ʼu koloā pea mo te ʼu gāue fakamālama ʼaē neʼe tou fai? Peʼe tou fai palalau koa ki te ʼu meʼa fakalaumālie pea mo tatatou ʼu fakatuʼutuʼu faka teokalatike? ʼE tou faiga koa ʼuhi ko totatou ʼofa, ke tou ʼuʼufi te ʼu lākahala ʼa ʼihi, kae mole tou palalau kiai? (Tāʼaga Lea 10:11, 12) ʼE tou faʼa palalau koa ʼo ʼuhiga mo te hahaʼi pea mo te ʼu meʼa ʼaē ʼe hoko ʼi tonatou maʼuli, kae mole tou palalau ki te ʼu pelesepeto peʼe ko te ʼu manatu fakalaumālie? ʼE hā ʼaki ai koa ʼe tou fia ʼiloʼi meʼa fuli ʼo ʼuhiga mo te maʼuli ʼo te hahaʼi?—1 Petelo 4:15.

7. ʼO ʼuhiga mo te hāofaki ʼo totatou loto, koteā te ako ʼe tou tāʼofi mai te fakamatala ʼo te ʼu tēhina ʼe toko hogofulu ʼo Sosefo?

⁷ Koutou tokagaʼi te meʼa ʼaē neʼe hoko ʼi te foʼi famili kaugamālie. Ko te ʼu foha lalahi ʼo Sakopo “neʼe mole feala ke nātou palalau lelei” mo tonatou kiʼi tēhina veliveli ʼaē ko Sosefo. Koteā tona tupuʼaga? Neʼe nātou maheka he neʼe ko te foha fakapelepele ʼaia ʼo tanatou tāmai. Ki muli age, neʼe nātou maʼu “te tahi tupuʼaga ke nātou fehiʼa” kia Sosefo, he neʼe ina fai te ʼu moemisi neʼe fakahā age e te ʼAtua, ʼo fakamoʼoni ai tona leleiʼia e Sehova. (Senesi 37:4, 5, 11) ʼI tanatou fehiʼa ʼaia, neʼe nātou fakatau tonatou tēhina ke ʼave ʼo fakapōpulaʼi. Pea ʼi tanatou faiga ʼaē ke fufū tanatou aga kovi ʼaia, neʼe nātou kākāʼi tanatou tāmai ke manatu neʼe matehi ia Sosefo e te manu fekai. Ko te ʼu tēhina ʼaia ʼe toko hogofulu ʼo Sosefo neʼe mole nātou hāofaki tonatou loto ʼi te ʼaluʼaga ʼaia. Kapau ko tatatou agamāhani te fatufatuʼi ʼo ʼihi, pea ʼe ko he fakaʼiloga koa ʼaia ʼo hotatou loto mānumānu pea mo maheka? ʼE tonu ke tou tokakaga ʼo sivi te ʼu palalau ʼaē ʼe tou fai, pea ke tou foimo fakagata te ʼu palalau ʼaē ʼe kovi.

8. Koteā ʼaē ka tokoni anai kia tatou ke tou sivi totatou loto mo kapau neʼe tou loi?

⁸ Logola “e mole feala ki te Atua ke lohi” kae ko te tagata agahala ʼe feala ke loi. (Hepeleo 6:18) Neʼe meo fēnei te tagata fai pesalemo: “Ko te tagata fuape ʼe loi.” (Pesalemo 116:11) Māʼia mo te ʼapositolo ko Petelo neʼe loi ʼi tana fakafisi tuʼa tolu kia Sesu. (Mateo 26:69-75) ʼE mahino ia ʼe tonu ke tou tokakaga ke mole tou gutuloi, heʼe ko Sehova ʼe fehiʼa ki “te ʼalelo ʼaē ʼe loi.” (Tāʼaga Lea 6:16-19) Kapau ʼe tou agamāhani ʼi te loi, pea ʼe lelei ke tou vakavakaʼi tona tupuʼaga. ʼE tou mataku koa ki te tagata? ʼE tou mataku koa naʼa fakatūʼa tatou? Neʼe tupu tāfito koa he neʼe mole tou loto ke ʼulihi totatou matagafua, peʼe tou manatu fau koa kia tatou? Tatau aipe pe koteā tona tupuʼaga, kae ʼe lelei ke tou fakakaukauʼi te faʼahi ʼaia, ke tou agavaivai ʼo fakamoʼoni neʼe tou agahala, pea mo kole kia Sehova ke fakamolemole mai, mo tou kumi tana tokoni moʼo tauʼi te vaivaiʼaga ʼaia! Ko “te ʼu tagata ʼāfea ʼo te kokelekasio” ʼe feala ke nātou foaki mai he ʼu tokoni lelei ʼaupito.—Sakopo 5:14, MN.

9. Koteā ʼaē ʼe feala ke hā ʼi tatatou ʼu faikole ʼo ʼuhiga mo totatou loto?

⁹ Moʼo tali ki te kole ʼa te Hau tūpulaga ko Salomone ke ina maʼu te poto pea mo te ʼatamai, neʼe ʼui fēnei e Sehova: “Mai tona ʼaluʼaga ʼaē ʼe ko te faʼahi ʼaia ʼaē ʼe loto moʼoni kiai tou loto pea neʼe mole ke kole mai he paʼaga, he ʼu koloā pea mo te fakaʼapaʼapaʼia . . . , ʼe ʼau foaki atu kia koe te poto pea mo te ʼatamai; ʼe ʼau toe foaki atu anai mo te paʼaga, mo te ʼu koloā pea mo te fakaʼapaʼapa.” (2 Fakamatala 1:11, 12) ʼAki te meʼa ʼaē neʼe kole age e Salomone pea mo te ʼu meʼa ʼaē neʼe mole ina kole age, neʼe ʼiloʼi ai e Sehova te meʼa ʼaē neʼe ʼi te loto ʼo Salomone. Koteā ʼaē ʼe fakahā e tatatou ʼu faikole ʼo ʼuhiga mo totatou loto? ʼE fakahā ai koa tatatou fia maʼu te ʼatamai mālama, mo te poto pea mo te fakasiosio tonu? (Tāʼaga Lea 2:1-6; Mateo 5:3) ʼE leleiʼia koa e totatou loto te ʼu gāue ʼo te Puleʼaga? (Mateo 6:9, 10) Kapau ʼe tou faikole kae mole tou fai ʼaki totatou loto katoa, pea ʼe fakahā ai ʼe tonu ke tou toʼo he temi ke tou metitasio ki te ʼu gāue ʼa Sehova. (Pesalemo 103:2) ʼE tonu ki te kau Kilisitiano fuli ke nātou tokagaʼi lelei te meʼa ʼaē ʼe hā ʼi tanatou ʼu faikole.

Koteā ʼAē ʼe Hā ʼi Tatatou Aga?

10, 11. (a) ʼE tupu maifea te tono pea mo te fai folonikasio? (b) Koteā ʼaē ka tokoni anai kia tatou ke mole tou ‘tono ʼi totatou loto’?

¹⁰ ʼE ʼui ʼe lahi age te ʼu meʼa ʼaē ʼe hā ʼi te ʼu aga ʼi te ʼu palalau. ʼE mahino ia ʼaki tatatou aga, ʼe hā lahi ai totatou ʼuhiga ʼo loto. Ohage la, ʼo ʼuhiga mo te aga ʼaē ʼe tonu ke fai, ko te hāofaki ʼo te loto ʼe mole faka ʼuhiga pe ke tou tekeʼi te fai folonikasio peʼe ko te tono. ʼI tana Akonaki ʼi te Moʼuga, neʼe ʼui fēnei e Sesu: “Ko he tahi pe e sio ki he fafine mo he sio holi, kua tono mo ia i tona loto.” (Mateo 5:28) ʼE tou lava tekeʼi feafeaʼi te tono ʼi totatou loto?

¹¹ Neʼe tuku e te pateliaka agatonu ko Sopo te faʼifaʼitaki ki te kau Kilisitiano tagata mo fafine ʼaē kua ʼohoana. ʼE mahino ia neʼe fetaulaki ia Sopo mo he ʼu fafine kei finemui pea mo tokoni kia nātou ʼi tonatou ʼu temi faigataʼaʼia. Kae neʼe mole hake tuʼa tahi ʼi te manatu ʼa te tagata agatonu ʼaia ke ina fai he ʼu felāveʼi fakasino mo nātou. Koteā tona tupuʼaga? Koteʼuhi neʼe ina fakatotonu ke mole ina sioʼi te ʼu fafine ʼaki he holi kia nātou. Neʼe ina ʼui fēnei: “Neʼe ʼau fai te fuakava mo toku ʼu mata. Koia ʼe lava feafeaʼi anai haku tokagaʼi he taʼahine taupoʼou?” (Sopo 31:1) ʼOfa pe ke tou fai mo tatou he fuakava feiā ʼaki totatou ʼu mata pea mo hāofaki totatou loto.

12. ʼE koutou maʼuliʼi feafeaʼi anai ia Luka 16:10, moʼo hāofaki tokotou loto?

¹² Neʼe tala fēnei e te ʼAlo ʼo te ʼAtua: “Ko ʼaē ʼe agatonu ʼi te ʼu meʼa liliki ʼe toe agatonu pe foki ʼi te ʼu meʼa lalahi, pea ko ʼaē ʼe heʼe faitotonu ʼi te ʼu meʼa liliki ʼe toe heʼe faitotonu pe foki ʼi te ʼu meʼa lalahi.” (Luka 16:10, MN ) Ei, ʼe tonu ke tou vakaʼi tatatou aga ʼi te ʼu kiʼi meʼa ʼaē ʼe hage ʼe liliki ʼi totatou maʼuli, māʼia mo te ʼu meʼa ʼaē ʼe tou fai takitokotahi ʼi totatou loto fale. (Pesalemo 101:2) Ka tou heheka ʼi totatou loto fale, ʼo sio televisio, peʼe ko te Internet, ʼe tou ʼiloʼi papau koa peʼe tou mulimuli ki te tokoni faka Tohi-Tapu ʼaenī: “ ʼAua naʼa maʼu ʼi te lotolotoiga ʼo koutou te folonikasio, te faʼahiga aga heʼemaʼa fuli pe pea mo te holi fakavale, heʼe mole tāu mo he kau maʼoniʼoni; ke ʼaua naʼa ʼi ai mo he aga fakaufiufi, he lea vale, pea mo he ʼu fakahuahua heʼeʼaoga, ʼaē ko he ʼu meʼa ʼe mole tāu”? (Efeso 5:3, 4, MN ) Pea e feafeaʼi ʼo ʼuhiga mo te agamālohi ʼaē ʼe feala ke tou sio kiai ʼi te televisio peʼe ko te ʼu gaoʼi viteo? Neʼe ʼui fēnei e te tagata fai pesalemo: “Ko Sehova totonu ʼe ina sivisivi te agatonu pea mo te agakovi, pea ko ʼaē ʼe manako ki te agamālohi, ʼe mahino ia, ʼe fehiʼa ki ai Tona nefesi.”—Pesalemo 11:5.

13. Koteā ʼaē ʼe lelei ke tou tokakaga kiai mokā tou fakakaukauʼi te ʼu meʼa ʼaē ʼe haʼu mai totatou loto?

¹³ Neʼe fakatokagaʼi fēnei e Selemia: “ ʼE kākā te loto, ʼo laka ʼi te meʼa kehe fuli, pea ʼe mole hona faitoʼo.” (Selemia 17:9) ʼE feala ke hā te kākā ʼo totatou loto mokā tou faiga ke tou faka lākatonuʼi tatatou ʼu hala, peʼe tou ʼui ʼe mole faʼa kovi totatou ʼu mele, peʼe tou meʼa noaʼi he ʼu agaaga ʼe kovi ʼaupito ʼo totatou ʼulugaaga, peʼe tou laupisi ki te ʼu meʼa ʼaē neʼe tou fai. Ko he loto ʼe kākā ʼe feala ke ina toe fakaʼasi he ʼu aga ʼe lua—ʼe tou fai he ʼu palalau lelei kae kehe ʼaupito tatatou aga. (Pesalemo 12:2; Tāʼaga Lea 23:7) ʼE maʼuhiga ke tou agatonu mokā tou sivi te ʼu meʼa ʼaē ʼe haʼu mai totatou loto!

ʼE Lelei Koa Totatou Mata?

14, 15. (a) Koteā te faka ʼuhiga ʼo te mata ʼaē ʼe “lelei”? (b) Kapau ʼe tou tokaga ʼo taupau totatou mata ke lelei, ʼe ina hāofaki feafeaʼi anai totatou loto?

¹⁴ Neʼe ʼui fēnei e Sesu: “Ko te mata e ko te malama o te sino.” Neʼe ina toe ʼui fēnei: “Kapau leva e lelei tou mata, e malama anai tou sino katoa.” (Mateo 6:22) Ko te mata ʼaē ʼe lelei ʼe tokaga ki te faʼahi pe e tahi, pea ʼe mole he meʼa ʼe ina fakaleluʼi. Koia ʼe tonu ke tokaga pe totatou mata ke ina “kumi te Puleaga o Selo mo [te] susitisia [ʼa te ʼAtua].” (Mateo 6:33) Koteā ʼaē ʼe feala ke hoko ki totatou loto mo kapau ʼe mole tou taupau lelei totatou mata?

¹⁵ Tou vakaʼi muʼa ʼo ʼuhiga mo te taupau ʼo te maʼuli. ʼE ko he maʼua ki te kau Kilisitiano ke nātou foaki te ʼu meʼa ʼaē ʼe ʼaoga ki tonatou famili. (1 Timoteo 5:8) Kae e feafeaʼi mo kapau ʼe tou holi ke tou maʼu te meʼa kai ʼaē ʼe lelei ʼaupito, te ʼu mutuʼi meʼa foʼou, te ʼapi ʼaē ʼe lelei ʼaupito peʼe ko he tahi age ʼu meʼa foʼou? ʼE mole popūla anai koa te loto pea mo te ʼatamai ki te ʼu meʼa ʼaia, ʼo mole kei katoa ai totatou loto moʼo tauhi ki te ʼAtua? (Pesalemo 119:113; Loma 16:18) He koʼe koa ʼe tou liliu anai ʼo tokaga fau ki te ʼu meʼa fakasino, ʼo tou haga tokaga pe ʼi totatou maʼuli ki totatou famili, mo tatatou gāue pea mo te ʼu koloā? Tou manatuʼi te tokoni fakaʼatua ʼaenī: “Koutou tokaga kia koutou, naa mafasia outou loto i te maveuveu, mo te inu vale pea mo te u fakahoha o te mauli, naa ha fakapunamauli kia koutou te aho aia o hage he kupega; koteuhi e to anai kia natou e nonofo i te kelekele katoa.”—Luka 21:34, 35.

16. Koteā te fakatokaga neʼe foaki e Sesu ʼo ʼuhiga mo te mata, pea koteā tona tupuʼaga?

¹⁶ ʼE maʼuhiga te meʼa ʼaē ʼe fakahā e te mata ki te ʼatamai pea mo te loto. Ko te meʼa ʼaē ʼe ina tokagaʼi ʼe malave mālohi ki tatatou ʼu fakakaukau, te ʼu meʼa ʼi totatou loto pea mo te ʼu meʼa ʼe tou fai. Ko Sesu, ʼaki he lea fakatātā, neʼe talanoa ki te mālohi ʼo te fakahalaʼi ʼo te ʼu mata pea neʼe ina ʼui fēnei: “Koia, kapau e fakahiga koe e tou mata mataʼu, kapei pea ke liaki mamao maia te koe; koteuhi e leleiʼage ke tamatei hou logoʼagasino e tahi i ou logoʼagasino, kae e mole ko tou sino katoa e li ki te afi.” (Mateo 5:29) ʼE tonu ke tou tāʼofi totatou mata ke mole sio ki he ʼu meʼa ʼe kovi. Ohage la, ʼe mole lelei ke tou sioʼi he ʼu meʼa ʼe feala ke fakatupu ia tatou he ʼu holi ʼe kovi.

17. Kapau ʼe tou maʼuliʼi ia Kolose 3:5, pea ʼe tokoni feafeaʼi mai kia tatou ke tou hāofaki totatou loto?

¹⁷ ʼE mole gata pe ki totatou ʼu mata ʼaē ʼe tou lava sio ai ki te ʼu meʼa ʼo te mālama. ʼE toe kau kiai mo te tahi ʼu logoʼaga sino, ohage la ko te fāfā pea mo te logo, pea ʼe tonu ke tou tokakaga fakalelei ki te ʼu koga ʼo totatou sino ʼaē ʼe faka ʼuhiga kiai. Neʼe fakatotonu fēnei e te ʼapositolo ko Paulo: “Koia, koutou tamatei outou logoʼagasino fakakelekele: te feauaki, te agauli, te holikovi, mo te manumanu aia e ko he taulaʼatua.”—Kolose 3:5.

18. Koteā te ʼu meʼa ʼaē ʼe tonu ke tou fai ʼo ʼuhiga mo te ʼu manatu ʼaē ʼe kovi?

¹⁸ Ko te holi ʼaē ʼe kovi ʼe feala ke tupu ʼi he kiʼi faʼahi ʼo tatatou fakakaukau. ʼI te agamāhani, kapau ʼe kita fakakaukau tuʼumaʼu kiai pea ʼe mālohi ai te holi ʼaē ʼe kovi, ʼo ina fakahalaʼi te loto. “Pea ko te holi, ka fakatupu, pea ʼe ina fānauʼi te agahala.” (Sakopo 1:14, 15, MN ) ʼE fakamoʼoni e te tokolahi ko te faʼahi ʼaia ʼe tau iku ki te aga ʼaē ko te mulu. ʼE maʼuhiga ai ke tou fakafonu totatou ʼatamai ʼaki he ʼu manatu fakalaumālie! (Filipe 4:8) Pea kapau ʼe tou maʼu he fakakaukau kovi, pea ʼe tonu ke tou faiga ke pulihi te manatu ʼaia.

‘Tou Tauhi Kia Sehova ʼAki He Loto Katoa’

19, 20. E feafeaʼi hatatou tauhi kia Sehova ʼaki he loto katoa?

¹⁹ ʼI tana kua matuʼa, neʼe ʼui fēnei e te Hau ko Tavite ki tona foha: “Salomone, toku foha, ke ke ʼiloʼi te ʼAtua ʼo tau tāmai pea mo ke tauhi kia te ia ʼaki he loto katoa pea mo he nefesi fiafia, heʼe ko Sehova ʼe ina sivi te ʼu loto fuli pea ʼe ina ʼiloʼi te ʼu faleleʼaga fuli pe ʼo te ʼu fakakaukau.” (1 Fakamatala 28:9) Neʼe faikole ia Salomone ke ina maʼu he “loto ʼe fakalogo.” (1 Hau 3:9) Kae neʼe faigataʼa kia ia tana taupau te ʼaluʼaga ʼaia ʼo tona loto ʼi tona maʼuli katoa.

²⁰ Ke tou lavaʼi te faʼahi ʼaia, ʼe tonu ke leleiʼia e Sehova totatou loto pea ke tou hāofaki totatou loto. Moʼo fakahoko te faʼahi ʼaia, ʼe tonu ki te ʼu fakamanatu ʼa te Folafola ʼa te ʼAtua ke nofo ōvi ki totatou loto—‘ ʼi te lotomalie ʼo totatou loto.’ (Tāʼaga Lea 4:20-22) Pea ʼe tonu ke liliu ko hatatou agamāhani te sivisivi ʼo totatou loto, ʼo tou vakaʼi ʼi te faikole te meʼa ʼaē ʼe hā ʼi tatatou ʼu palalau pea mo tatatou ʼu aga. ʼE ʼaoga anai koa te sivi ʼaia mo kapau ʼe mole tou kumi fakamalotoloto te tokoni ʼa Sehova ke ina fakatonutonuʼi te faʼahi ʼaē ʼe tou vaivai ai? Pea ʼe maʼuhiga ke tou leʼoleʼo lelei te ʼu meʼa ʼaē ʼe hū ki totatou loto! Ka tou fai feiā, pea ʼe tou ʼiloʼi papau ai “ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.” (Filipe 4:6, 7) Ei, tou lotomālohi ʼo hāofaki tāfito totatou loto ia meʼa fuape ʼaē ʼe tonu ke tou hāofaki mai ai, pea mo tou tauhi kia Sehova ʼaki he loto katoa.

ʼE Kei Koutou Manatuʼi Koa?

• He koʼe ʼe maʼuhiga ke tou hāofaki te loto?

• Moʼo hāofaki totatou loto, ʼe tokoni feafeaʼi kia tatou te sivi ʼo tatatou ʼu palalau?

• He koʼe ʼe tonu ke tou taupau totatou mata ke “lelei”?

[Paki ʼo te pasina 23]

Koteā ʼaē ʼe tou palalau māhani kiai ʼi te gāue fai faka mafola, ʼi te ʼu fono, pea ʼi te loto fale?

[Paki ʼo te pasina 25]

Ko te mata ʼaē ʼe lelei ʼe mole he meʼa ʼe ina fakaleluʼi