Koutou Taupau Tokotou Mata Ke Lelei
1. Koteā te faka ʼuhiga ʼo he mata ʼe lelei, pea he koʼe ʼe maʼuhiga te faʼahi ʼaia?
1 ʼI tana Akonaki ʼi te Moʼuga, neʼe fakahā lelei e Sesu ko te mata fakatātā ʼe malave mālohi ki totatou maʼuli. Neʼe ina ʼui fēnei: “Kapau leva e lelei tou mata, e malama anai tou sino katoa. Kae kapau e kovi tou mata, e nofo katoa anai tou sino i te fakapouli.” (Mat. 6:22, 23) Ko he mata ʼe lelei ʼe tokaga ki he meʼa pe e tahi, te fai ʼo te finegalo ʼo te ʼAtua, kae ʼe mole tokaga ki he tahi meʼa, ʼuhi ko te hoha fau ki te ʼu meʼa fakasino. (Mat. 6:19-21, 24-33) Koteā ʼaē ka tokoni mai ke tou taupau he mata ʼe lelei?
2. Koteā te manatu ʼaē ʼe fakaloto mālohiʼi mai e te Folafola ʼa te ʼAtua ʼo ʼuhiga mo te ʼu koloā?
2 Tou Maʼuli Faka Feʼauga: ʼE ko he maʼua faka Tohi-Tapu ke foaki ki tota loto fale te ʼu meʼa ʼaē ʼe ʼaoga kiai ʼi te maʼuli fakasino. (1 Tim. 5:8) Kae ʼe mole faka ʼuhiga leva ke tou kumi tuʼumaʼu te ʼu meʼa ʼaē ʼe lelei ʼaupito pea mo te ʼu meʼa foʼou. (Taag. 27:20; 30:8, 9) ʼE fakaloto mālohiʼi tatou e te Tohi-Tapu ke tou faka feʼauga ki te ʼu meʼa ʼaē ʼe ʼaoga tāfito ki te maʼuli, te “meakai mo [te] mutui mea.” (1 Tim. 6:8; Hep. 13:5, 6) Kapau ʼe tou muliʼi te tokoni ʼaia pea ʼe feala anai ke haga tokaga totatou mata ki te meʼa ʼaē ʼe lelei.
3. Koteā ʼaē ka lava tokoni mai ke ʼaua naʼa tou mafasia ʼi he ʼu kavega?
3 ʼE ko he aga fakapoto anai mo kapau ʼe mole tou fakamamafa totatou maʼuli ʼaki he ʼu tuʼuga maʼua ʼe mole honatou ʼaoga pea mo he ʼu koloā peʼe ko he ʼu fakatuʼutuʼu, ʼe fakapuli temi anai pea mo fakatupu hoha. (1 Tim. 6:9, 10) ʼE tou lava fakahoko feafeaʼi te faʼahi ʼaia? Moʼo fai ʼo he puleʼaki, tou faikole fakamalotoloto ʼo ʼuhiga mo te faʼahi ʼaia pea mo fakafuafua fakalelei peʼe fua kovi anai ki te ʼu meʼa fakalaumālie. Tou fakatotonu ke tou haga fakamuʼamuʼa te ʼu meʼa fakalaumālie ʼi totatou maʼuli.—Filp. 1:10; 4:6, 7.
4. He koʼe ʼe tonu ke tou faka faigafua totatou faʼahiga maʼuli?
4 Koutou Faka Faigafua Tokotou Faʼahiga Maʼuli: Ko te tahi tokoni kia tatou moʼo teteke te fia maʼu koloā, ʼe ko te faka faigafua ʼo totatou faʼahiga maʼuli. Ko te tēhina neʼe ina tokagaʼi ʼe lava maʼuli lelei tona famili logola te mole lahi ʼo tonatou ʼu koloā, neʼe ina ʼui fēnei: “ ʼE feala ʼi te temi nei ke lahi taku ʼu gāue ʼi te kokelekasio moʼo tauhi ki toku ʼu tēhina. ʼE ʼau tui papau ʼe tapuakina e Sehova tana ʼu kaugana fuli, mokā nātou fakamuʼamuʼa te tauhi moʼoni ʼi te ʼu meʼa ʼaē ʼe nātou loto kiai.” ʼE koutou lava maʼu koa he tahi ʼu tapuakina ʼe lahi age, mo kapau ʼe koutou faka faigafua tokotou faʼahiga maʼuli?
5. He koʼe ʼe tonu ke tou faiga tuʼumaʼu ke tou taupau totatou mata ke lelei?
5 ʼE tonu ke tou faiga tuʼumaʼu moʼo tauʼi te mālohi ʼa Satana, mo tana mālama ʼaē ʼe fia maʼu koloā, pea mo totatou kakano agahala. ʼAua naʼa tou tuku totatou ʼu mata ke hēʼia, kae tou haga fai ke nātou tokagaʼi tāfito te finegalo ʼo te ʼAtua pea mo tatatou ʼamanaki maʼuhiga ʼaē ko te maʼuli heʼegata.—Taag. 4:25; 2 Ko. 4:18.