ʼAua Naʼa Ke Tuʼania

PELESEPETO FAKATOHI-TAPU: “Aua naa kotou tuania ki tokotou mauli.”​—Mateo 6:25.

Kotea tona fakaʼuhiga? Neʼe fai e Sesu te ʼu palalau ʼaia ʼi tana Akonaki ʼi Te Moʼuga. ʼE fakamahino ʼi te tikisionalio Fakatohi-tapu, ko te kupu Fakakeleka ʼae neʼe fakaliliu ʼaki te kupu “tuʼania,” ʼe fakaʼuhiga ki te “manatu ʼe maʼu e te tagata ʼo ʼuhiga mo te maʼuli masiva, peʼe ko te hoge pea mo ʼihi atu fihifihia ʼo tona maʼuli ʼi te ʼaho fuli.” ʼE tou toe tuʼania ki te ʼu meʼa ʼae ka hoko ʼi te ka haʼu. Ko te tuʼania ki te ʼu meʼa ʼae ʼe ʼaoga ki te faʼahi fakasino pea mo te maʼuli fimalie ʼo natou ʼae ʼe tou ʼofa mamahi ai, ʼe mole hona ia kovi. (Filipe 2:20) Kaʼe, ʼi te ui ʼae e Sesu ke “aua naa kotou tuania,” neʼe ina tokoniʼi ʼana tisipulo ke ʼaua naʼa natou tuʼania fau te ka haʼu ʼae ʼe feala ke ina kaihaʼa tonatou fiafia ia ʼaho nei.—Mateo 6:31, 34.

ʼE kei ʼaoga koa ia ʼaho nei? ʼE tonu ke tou fakalogo ki te tokoni ʼa Sesu. Kotea tona tupuʼaga? ʼE ui ʼi ʼihi tohi ka tuʼania fau te hahaʼi, pea ʼe gaue tuʼumaʼu ʼanatou fakakaukau ʼo tupu ai he ʼu mahaki. Ohage la, “ko he ʼu mataʼi papala, peʼe ko te mahaki mafu pea mo te hela.”

Neʼe fakaha e Sesu pe ʼe koʼe ʼe mole tonu ke tou tuʼania fau koteʼuhi ʼe mole hona ʼaoga. Neʼe fehuʼi fenei e Sesu: “Ko ai ae ia koutou e feala ke ina fakaloaloa tona mauli i he tuli nima e tahi aki ona tuania?” (Mateo 6:27) Koia, ka tou tokakaga pe ki ʼotatou faigataʼaia, ʼe mole ina fakatologa anai totatou maʼuli. Pea tahi, ka tou tuʼania ki he aluʼaga, ʼe feala pe ke mole hoko. Neʼe ui fenei e he tagata poto: “ ʼE tahitahiga te kovi ʼaupito ʼo totatou ka haʼu ohage ko tatatou tuʼania ki ai.”

ʼE feafeaʼi hatatou tekeʼi te tuʼania? ʼUluaki, tou falala ki te ʼAtua. Kapau ʼe fafaga e te ʼAtua ia te ʼu manulele mo teuteuʼi te ʼu fisiʼi ʼakau, ʼe mole koa la ina foaki te meʼa ʼae ʼe ʼaoga ki te maʼuli ʼo te tagata ʼae ʼe ina fakamuʼamuʼa tana tauhi ʼi tona maʼuli? (Mateo 6:25, 26, 28-30) Lua, ʼaua naʼa tou hoha ki te apogipogi. Neʼe ui fenei e Sesu: “Aua naa kotou tuania te apogipogi, koteuhi e tokaga te apogipogi kia ia totonu.” ʼE mole ke manatu tahi koa la mo te manatu ʼaeni ko te “aho taki tahi e feauga mo tona kinakina”?​—Mateo 6:34.

Ka tou mulimuli ki te tokoni ʼa Sesu, ʼe tou puipui ai totatou maʼuli malolō fakasino. Pea ʼe tou maʼu anai te tokalelei ʼae ʼe ui ʼi te Tohi-Tapu ko “te tokalelei o te Atua.”​—Filipe 4:6, 7.