ʼE Koutou Falala Mālohi Koa Ki Te ʼAtua?
“Ke koutou haga kumi muʼa te puleʼaga.”—Mateo 6:33, MN.
1, 2. Koteā te fakatuʼutuʼu ʼaē neʼe fai e te tagata kei tūpulaga ʼo ʼuhiga mo tana gāue, pea koteā tona tupuʼaga?
NEʼE ʼi ai te tagata kei tūpulaga neʼe fakaʼamu ke toe lahi age tona ʼaoga ki tana kokelekasio, kae ʼaki tana gāue faka mālama neʼe mole feala hana kau tuʼumaʼu ki te ʼu fono. Koteā te puleʼaki ʼaē neʼe ina fai ʼo ʼuhiga mo te ʼaluʼaga ʼaia? Neʼe ina faka faigafua tona maʼuli, neʼe mavae ʼi tana gāue, pea ʼaki te temi neʼe ina maʼu tana tahi gāue neʼe feala ai hana fai tona ʼu maʼua faka Kilisitiano. ʼI te temi nei, ʼe mole lahi tona totogi ohage ko tana gāue ʼāfea, kae ʼe kei ina taupau aipe te maʼuli fakasino ʼo tona famili pea kua faigafua age hana lagolago ki te kokelekasio.
2 ʼE koutou mahino koa pe koʼe neʼe fai e te tagata tūpulaga ia te fakatuʼutuʼu ʼaia? Kanapaula neʼe koutou nofo ʼi te ʼaluʼaga ʼaia, ʼe koutou fai anai koa he ʼu fetogi feiā? Tokolahi te kau Kilisitiano neʼe nātou fai te ʼu fetogi feiā ʼi tonatou maʼuli, moʼo fakahā tanatou falala ki te fakapapau ʼaenī ʼa Sesu: “Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia kiā koutou.” (Mateo 6:33, MN ) ʼO ʼuhiga mo tonatou maʼuli fakasino, neʼe nātou falala kiā Sehova kae mole ki te mālama.—Tāʼaga Lea 3:23, 26.
3. He koʼe ʼe feala ke manatu niʼihi peʼe fakapotopoto koa iā ʼaho nei takita kumi muʼa ia te Puleʼaga ʼo te ʼAtua?
3 ʼUhi ko te faigataʼa ʼo totatou temi, ʼe feala anai ke ʼui e niʼihi pe neʼe ko he tonu fakapotopoto koa ʼaē neʼe fai e te tūpulaga. ʼI te temi nei, ko ʼihi hahaʼi ʼo te malamanei ʼe nātou māʼuʼuli fakaʼofaʼofa kae ko ʼihi ʼe nātou māʼuʼuli fīmālie. ʼI te ʼu fenua māsisiva, tokolahi ʼe nātou fai anai ni ʼu gāue ʼe feala ai ke fīmālie age tonatou maʼuli. ʼI te tahi faʼahi, ko te tokolahi ʼi te ʼu fenua koloaʼia ʼe nātou sisio ki te faigataʼa ʼo te taupau ʼo tonatou maʼuli ʼi te faʼahi faka ekonomika, mo te haʼele kovi ʼo te ʼu gāue, pea mo te ʼu patolo ʼaē ʼe nātou fakaʼaogaʼi lahi te temi ʼo te kau gāue. ʼUhi ko te ʼu tuʼania ʼo ʼuhiga mo te taupau ʼo totatou maʼuli, ʼe lagi manatu fēnei anai niʼihi: ‘ ʼE ko he aga fakapotopoto koa ke kita kumi muʼa ia te Puleʼaga?’ Moʼo tali ki te fehuʼi ʼaia, tou vakaʼi age muʼa pe neʼe feafeaʼi te maʼuli ʼo te nofoʼaki ʼaē neʼe faiakonaki kiai ia Sesu.
“Tuku Takotou Hoha”
4, 5. ʼI te lea fakatātā ʼa Sesu, neʼe ina fakahā feafeaʼi ʼe mole tonu ki te hahaʼi ʼa te ʼAtua ke nātou hoha fau ki te ʼu tuʼania ʼo te maʼuli ʼo te ʼaho fuli?
4 Neʼe nofo ia Sesu ʼi Kalilea, ʼo faiakonaki ki te toe hahaʼi tokolahi mai te ʼu kolo kehekehe. (Mateo 4:25) Tokosiʼi iā nātou neʼe maʼu koloā, heʼe tokolahi iā nātou neʼe māsisiva. Kae ko Sesu neʼe ina fakaloto mālohiʼi nātou ke ʼaua naʼa nātou faiga ke nātou maʼu koloā kae ke nātou tānaki te meʼa ʼe maʼuhiga age—ko te koloā fakalaumālie. (Mateo 6:19-21, 24) Neʼe ina ʼui fēnei: “Tuku takotou hoha ki tokotou nefesi, pe koteā anai he meʼa ke koutou kai pe ko he meʼa ke koutou ʼinu, peʼe ki tokotou sino, pe koteā anai he meʼa ke koutou kofuʼi. ʼE mole koa la lahi age te maʼuli ʼi te meʼa kai pea mo te sino ʼi te kofu?”—Mateo 6:25, MN.
5 Tokolahi ʼi te nofoʼaki, lagi neʼe nātou punamaʼuli ki te ʼu palalau ʼa Sesu. Neʼe nātou ʼiloʼi kapau ʼe mole nātou faʼa gāue, pea ʼe mole nātou maʼu anai he meʼa taupau maʼuli ʼo tonatou ʼu famili. Kae neʼe toʼo e Sesu te faʼifaʼitaki ʼa te ʼu manulele. ʼI te ʼaho fuli ʼe tonu ki te ʼu manulele ke nātou kakai pea mo maʼu honatou nofoʼaga, kae ko Sehova ʼe tokaga aipe ki te ʼu manulele. Neʼe toe talanoa ia Sesu ʼo ʼuhiga mo te teuteuʼi ʼaē e Sehova ia te ʼu fisiʼi teu, ʼe nātou matalelei age ʼi te kolōlia kātoa ʼaē neʼe maʼu e Salomone. Kapau ʼe tokaga ia Sehova ki te ʼu manulele pea mo te ʼu fisiʼi teu, ʼe mahino ia ʼe toe lahi age anai ia tana tokaga ʼaē kiā tatou. (Mateo 6:26-30) Ohage ko tona ʼui e Sesu, ʼe maʼuhiga age totatou maʼuli (te ʼu nefesi) pea mo totatou sino, ʼi te meʼa kai ʼaē ʼe tou totogi moʼo taupau totatou maʼuli pea mo te ʼu mutuʼi meʼa ʼaē moʼo kofuʼi totatou sino. ʼE mole tou ʼiloʼi anai te maʼuli moʼoni mo kapau ʼe tou fakaʼaogaʼi totatou mālohi kātoa moʼo kumi hatatou meʼa kai pea mo hotatou ʼu mutuʼi meʼa, ʼo mole kei maʼu hotatou temi moʼo tauhi kiā Sehova.—Tagata Tānaki 12:13.
Tou Maʼu He Manatu Fakapotopoto
6. (a) Koteā te maʼua ʼa te kau Kilisitiano? (b) Ko ai ʼaē ʼe falala ki ai te kau Kilisitiano?
6 Neʼe mole ʼui leva e Sesu ki te nofoʼaki ke tuku tanatou gāue kae nātou fakatalitali pe ke foaki age e te ʼAtua ia te ʼu meʼa ʼaē ʼe ʼaoga moʼo taupau ʼo tonatou ʼu famili. Ko te ʼu manulele ʼe tonu ke nātou kumi tanatou meʼa kai maʼa nātou pea mo ʼonatou ʼuhi. Koia, ko te kau Kilisitiano ʼo te ʼuluaki sēkulō kapau neʼe nātou fia kakai, neʼe tonu ke nātou faʼa gāue. Neʼe tonu ke nātou tōkakaga ki tonatou ʼu maʼua faka famili. Neʼe tonu ki te ʼu Kilisitiano ʼaē ʼe faifekau pea mo sinifu ke nātou gāue fakalelei ki tonatou ʼu pule. (2 Tesalonika 3:10-12; 1 Timoteo 5:8; 1 Petelo 2:18) ʼI ʼihi temi, ko te ʼapositolo ko Paulo neʼe gāue ʼo faʼu te ʼu falelā moʼo taupau tona maʼuli. (Gaue 18:1-4; 1 Tesalonika 2:9) Kae ko te ʼu Kilisitiano ʼaia neʼe mole nātou falala ki tanatou ʼu gāue moʼo maʼu ia tonatou maʼuli fīmālie. Neʼe falala nātou kiā Sehova, ʼo nātou maʼu ai te fiafia ʼaē neʼe mole maʼu e ʼihi. Neʼe ʼui fēnei e te tagata fai pesalemo: “Ko nātou ʼaē ʼe nātou falala kiā Sehova ʼe nātou hage ko te Moʼuga ʼo Sione ʼaē ʼe mole feala ke holo, kae ʼe tuʼu ki he ʼu temi ʼe mole ʼiloʼi hona gataʼaga.”—Pesalemo 125:1.
7. Koteā ʼapē te manatu ʼo ia ʼaē ʼe mole falala kātoa kiā Sehova?
7 ʼE lagi mole manatu feiā anai ia ia ʼaē ʼe mole falala kātoa kiā Sehova. Maʼa te tokolahi, ko te maʼuli fīmālie ʼe maʼu pe ʼaki te ʼu koloā faka mālama. Pea ko te ʼu mātuʼa ʼe nātou uga tanatou fānau ke hoko atu tanatou ʼu ako ʼi te ʼu faleako lalahi, heʼe nātou falala ʼaki te ʼu ako ʼaia ʼe feala anai ki tanatou ʼu fānau ke maʼu hanatou ʼu gāue ʼe totogi lelei ai nātou. Kae meʼa fakaʼofaʼofa, heʼe ko ʼihi famili Kilisitiano ʼi tanatou uga tanatou ʼu tamaliki ki te ʼu ako lalahi, neʼe mole kei tōkakaga leva tanatou ʼu fānau ki te ʼu gāue fakalaumālie kae kua nātou tōkakaga pe nātou ki te kumi koloā.
8. Ko te manatu fakapotopoto fea ʼaē ʼe taupau e te kau Kilisitiano?
8 Koia, ʼe mahino ki te kau Kilisitiano fakapotopoto ʼo totatou temi, ko te tokoni ʼa Sesu ʼe kei ʼaoga pe ohage ko tona ʼaoga ʼi te ʼuluaki sēkulō, pea ʼe nātou faiga ke nātou maʼuli fakapotopoto ʼo ʼuhiga mo tanatou ʼu gāue. Tatau aipe peʼe tonu ke nātou gāue lolotoga ni ʼu hola ʼi tanatou ʼu gāue faka mālama ʼuhi ko tonatou ʼu maʼua faka famili ʼaē ʼe fakamaʼua age ʼi te Tohi-Tapu, kae ʼe mole nātou tuku ki te maʼua ʼaia ke ina fakavaivaiʼi tonatou ʼu maʼua fakalaumālie ʼaē ʼe maʼuhiga age.—Tagata Tānaki 7:12.
“ ʼAua Naʼa Koutou Hoha”
9. Koteā te fakapapau ʼaē ʼe fai e Sehova kiā nātou ʼaē ʼe falala kātoa kiā te ia?
9 ʼI tana Akonaki ʼi te Moʼuga, neʼe fakaloto mālohiʼi fēnei e Sesu te nofoʼaki: “ ʼAua naʼa koutou hoha ʼo ʼui maʼa koutou: ‘Koteā he meʼa ka tou kai?’ peʼe: ‘Koteā he meʼa ka tou ʼinu?’ peʼe: ‘Koteā he meʼa ka tou kofu ʼaki?’ Heʼe ko te ʼu meʼa fuli ʼaia ʼe kumi faka mānumānu e te ʼu puleʼaga. Kae [ʼe] ʼiloʼi pe e takotou Tāmai ʼaē ʼe ʼi selo, ʼe ʼaoga kiā koutou te ʼu meʼa fuli ʼaia.” (Mateo 6:31, 32, MN ) ʼE ko he ʼu palalau fakaloto mālohi! Kapau ʼe tou falala kātoa kiā Sehova, ʼe tokaga tuʼumaʼu anai ia kiā tatou. Kae ko te ʼu palalau ʼa Sesu ʼe ko he ʼu palalau ʼe ina uga tatou ke tou fakakaukau, heʼe nātou fakamanatuʼi mai kapau ʼe tou kumi “faka mānumānu” te ʼu koloā faka mālama, ʼe tou hage anai ko te hahaʼi ʼo “te ʼu puleʼaga,” ko te hahaʼi ʼe mole ko he kau Kilisitiano moʼoni.
10. ʼI te temi ʼaē neʼe haʼu ai te tūpulaga ʼo kumi tokoni kiā Sesu, neʼe hā feafeaʼi ʼaki te ʼu palalau ʼa Sesu te meʼa ʼaē neʼe manako tāfito kiai ia te tūpulaga?
10 ʼI te tahi ʼaho, ko te tūpulaga maʼu koloā neʼe ina fehuʼi age kiā Sesu, pe koteā ʼaē ʼe tonu ke ina fai ke feala hana maʼu ia te maʼuli heʼegata. Neʼe fakamanatuʼi age e Sesu ia te ʼu fakatotonu ʼo te Lao, ʼaē neʼe kei ʼaoga ʼi tona temi. Neʼe tali age e te tama: “Ko te ʼu meʼa fuli ʼaia, kua au taupau au; koteā ʼaē kei puli ia te au?” Lagi maʼa te tokolahi, ʼe mata faikehe anai ia te tali ʼaē neʼe fai age e Sesu, he neʼe ʼui maʼana: “Kapau ʼe ke fia haohaoa, ʼalu ʼo fakatau te meʼa ʼaē ʼe ke maʼu, pea ke ke foaki ki te kau māsisiva, pea ʼe ke maʼu anai hou koloā ʼi te lagi; pea ke haʼu ʼo muli mai ia te au.” (Mateo 19:20, 21, MN ) Neʼe ʼalu te tūpulaga ʼaki he lotomamahi, he neʼe mole ina tali ke puli tona ʼu koloā. Logola neʼe ʼofa te tūpulaga kiā Sehova, kae neʼe lahi age pe tana ia manako ki tona ʼu koloā faka mālama.
11, 12. (a) Koteā te ʼu palalau loloto neʼe fai e Sesu ʼo ʼuhiga mo te ʼu koloā? (b) He koʼe ʼe faka faigataʼa e te ʼu koloā ia tatatou tauhi ʼaē kiā Sehova?
11 Koia ʼaē neʼe fai ai e Sesu te palalau fakatā ʼaenī: “ ʼE faigataʼa anai ki he tagata maʼu koloā tana hū ki te puleʼaga ʼo selo. . . . ʼE faigafua age ki he kamelo tana hū ʼi he pu ʼo he hui tui ʼi he tagata maʼu koloā ke hū ki te puleʼaga ʼo te ʼAtua.” (Mateo 19:23, 24, MN ) ʼE faka ʼuhiga koa te ʼu palalau ʼa Sesu, ko he tahi ʼe maʼu koloā ʼe mole lava hū anai ki te Puleʼaga? Kailoa ia, he neʼe ina toe ʼui fēnei: “Ki te ʼAtua ko meʼa fuli ʼe feala.” (Mateo 19:25, 26, MN ) Ei, ki muli age ʼaki te tokoni ʼa Sehova neʼe feala ki ʼihi hahaʼi maʼu koloā ke nātou liliu ko te kau Kilisitiano fakanofo. (1 Timoteo 6:17) Kae neʼe fai e Sesu te ʼu palalau ʼaia he neʼe ʼi ai tona tupuʼaga tāfito. Neʼe ina fai te fakatokaga.
12 Kapau ʼe manako fau he tahi ki tona ʼu koloā ohage ko te tūpulaga maʼu koloā, pea ʼe faigataʼa anai hana tauhi mo tona loto kātoa kiā Sehova. ʼE lava hoko te faʼahi ʼaia ki he tahi ʼe maʼu koloā pea mo he tahi ʼe ‘kua fakapapau ia ke maʼu koloā.’ (1 Timoteo 6:9, 10) Ka falala fau he tahi ki tona ʼu koloā faka mālama, pea ʼe mole kei ina ‘ ʼiloʼi tona masiva fakalaumālie.’ (Mateo 5:3) Koia, lagi kiā ia ʼe mole ʼaoga age ia te tokoni ʼa Sehova. (Teutalonome 6:10-12) ʼE lagi loto anai ke fai age he fakatalitali makehe ʼi te kokelekasio. (Sakopo 2:1-4) Pea ʼe ina fakaʼaogaʼi tāfito anai tona temi ki tona ʼu koloā faka mālama kae mole ina fakaʼaogaʼi moʼo fai tana tauhi ʼaē kiā Sehova.
Tou Maʼu Te Manatu ʼAē ʼe Lelei
13. Koteā te manatu ʼe mole lelei ʼaē neʼe maʼu e te kau Laotisea?
13 ʼI te ʼuluaki sēkulō, neʼe maʼu e te kūtuga ʼi te kokelekasio ʼo Laotisea ia te manatu ʼe mole lelei ʼo ʼuhiga mo te ʼu koloā. Neʼe ʼui fēnei e Sesu kiā nātou: “ ʼI tau ʼui ʼaē: ‘ ʼE au koloaʼia pea kua au maʼu te ʼu koloā, ʼe mole kei ʼaoga he meʼa kiā au,’ kae ʼe mole ke ʼiloʼi koe ʼe ke pukofekofe, mo fakaʼofaʼofa pea mo masiva, mo kivi pea mo telefua.” Neʼe mole fakaʼofaʼofa te kau Laotisea ʼi te faʼahi fakalaumālie ʼuhi ko tonatou ʼu koloā kae ʼuhi ko tanatou fakamuʼamuʼa tonatou ʼu koloā iā Sehova. Koia ʼi te faʼahi fakalaumālie neʼe nātou māfana, pea neʼe tonu ke “luaʼi” nātou e Sesu.—Apokalipesi 3:14-17, MN.
14. He koʼe neʼe tāu mo te kau Kilisitiano Hepeleo ke vikiʼi nātou e Paulo?
14 ʼI te tahi faʼahi, neʼe vikiʼi e Paulo ia te kau Kilisitiano Hepeleo ʼo ʼuhiga mo tanatou aga ʼi te kamata ʼo te ʼu fakataga. Neʼe ina ʼui fēnei: “Nee koutou kauga mamahi mo natou nee pilisoni, pea nee koutou tali mo te fiafia te faʼao o outou koloa, i tautou iloi, e koutou mau he koloa leleiʼage pea mo tologa.” (Hepeleo 10:34) Neʼe mole lotomamahi te kau Kilisitiano ʼaia ʼi te puli ʼo tonatou ʼu koloā. Neʼe nātou fiafia tuʼumaʼu he neʼe kei nātou taupau tonatou ʼu koloā ʼaē neʼe maʼuhiga age kiā nātou, ia tonatou ʼu “koloa [ʼe] leleiʼage pea mo tologa.” Ohage ko te lea fakatātā ʼa Sesu ʼo te tagata fakatau koloā ʼaē neʼe ina fakatau ia meʼa fuli ʼuhi pe ko te mataʼi tofe matalelei, neʼe nātou taupau maʼu te ʼamanaki ʼo te Puleʼaga, logola te ʼu sākilifisio ʼaē neʼe tonu ke nātou fai ki te faʼahi ʼaia. (Mateo 13:45, 46) Neʼe ko he aga fakapotopoto ʼaē neʼe nātou fai!
15. Koteā ʼaē neʼe fai e te tuagaʼane kei finemui moʼo fakamuʼamuʼa ia te ʼu gāue ʼo te Puleʼaga?
15 Tokolahi iā ʼaho nei, ʼe nātou maʼu ia te aga fakapotopoto ʼaia. Ohage la ʼi Lipelia, neʼe maʼu e te tuagaʼane kei finemui ia te faigamālie ke ʼalu ʼo ako ʼi te univelesitē. ʼI te fenua ʼaia, ka foaki he faigamālie feiā pea ʼe ko he fakatuʼutuʼu lelei ʼaia ki te kau tūpulaga ʼo ʼuhiga mo tonatou ka haʼu. Kae ko te kiʼi tuagaʼane neʼe pionie, ʼe fai faka mafola temi kātoa, pea neʼe fakaafe ia ia ke pionie makehe faka temi. Neʼe ina fili ke ina kumi muʼa te Puleʼaga pea mo taupau tana selevisi temi kātoa. Neʼe ina fai tana selevisi ʼaia pea iā māhina e tolu neʼe ina kamata tana ʼu ako Tohi-Tapu e 21. Ko te tuagaʼane ʼaia pea mo te toko lauʼi afe ohage ko ia, neʼe nātou kumi muʼa te Puleʼaga, tatau aipe peʼe tonu ke nātou māʼuʼuli faka sākilifisio ʼi te faʼahi faka koloā. Koteā ʼaē neʼe ina faka fealagia ke nātou taupau te manatu ʼaia ʼi te mālama ʼaenī ʼaē ʼe manako ki te ʼu koloā? Neʼe nātou maʼu ia te ʼu kalitātē maʼuhiga. Tou vakaʼi age muʼa te ʼu kalitātē ʼaia.
16, 17. (a) Ke feala hatatou falala kiā Sehova, he koʼe ʼe maʼuhiga ia te agavaivai? (b) He koʼe ʼe tonu ke tou falala ki te ʼu fakapapau ʼa te ʼAtua?
16 Te agavaivai: ʼE ʼui ʼi te Tohi-Tapu: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou. ʼAua naʼa ke lau kua ke poto.” (Tāʼaga Lea 3:5-7) ʼI ʼihi temi, lagi ʼi te manatu fakatagata ʼe lelei age he faʼahiga maʼuli. (Selemia 17:9) Kae ko te Kilisitiano fakamalotoloto ʼe ina tuku anai ia Sehova ke takitaki kiā ia. (Pesalemo 48:14) ʼE ina kumi anai ʼaki he agavaivai ia te tokoni ʼa Sehova ‘ ʼi tona ʼu ala fuli’—ʼi te ʼu gāue ʼo te kokelekasio, ʼi te ako peʼe ʼi te gāue faka mālama, ʼi te ʼu fakafiafia, peʼe ʼi te tahi age ʼu meʼa.—Pesalemo 73:24.
17 Te falala ki te ʼu fakapapau ʼa Sehova: Neʼe ʼui fēnei e Paulo: “Ko ʼaē ʼe fakaōvi ki te ʼAtua ʼe tonu ke tui [ʼe ina fakapale] pea ʼe ko ia ʼaē ʼe ina fakapale ia nātou ʼaē ʼe nātou kumi moʼoni ia ia.” (Hepeleo 11:6, MN ) Kapau ʼe mole tou tui ko Sehova ʼe ina fakahoko anai tana ʼu fakapapau, pea ʼe mahino ia ʼe tou ‘fakaʼaogaʼi kātoa anai ia te ʼu meʼa ʼo te malamanei.’ (1 Kolonito 7:31) Tahi ʼaē meʼa, kapau ʼe mālohi ia tatatou tui, ʼe tou holi mālohi anai ke tou kumi muʼa ia te Puleʼaga. E feafeaʼi hatatou fakatuputupu ia he tui mālohi? ʼAki tatatou fakaōvi tuʼumaʼu mo he loto kātoa kiā Sehova ʼi te faikole, pea mo tatatou ako takitokotahi ia te Tohi-Tapu. (Pesalemo 1:1-3; Filipe 4:6, 7; Sakopo 4:8) Ohage ko te Hau ko Tavite, ʼe tou lava faikole fēnei: “Neʼe au tuku kiā te koe taku falala, Ê Sehova. Neʼe au ʼui fēnei: ‘Ko koe ko toku ʼAtua.’ ʼE lahi ʼaupito, tou finegaloʼofa.”—Pesalemo 31:14, 19.
18, 19. (a) Ko te faʼafai ʼe ina fakamālohiʼi feafeaʼi tatatou falala ʼaē kiā Sehova? (b) He koʼe ʼe tonu ki he Kilisitiano ke ina tali lelei ke maʼuli faka sākilifisio?
18 Te faʼafai ʼi te tauhi kiā Sehova: Neʼe fakapipiki tahi e Paulo ia te falala ki te ʼu fakapapau ʼa Sehova pea mo te faʼafai, he neʼe ina tohi fēnei: “ ʼE mātou loto ke koutou tahi fakahā he loto faʼafai feiā, ke feala hakotou tui papau ki te ʼamanaki ʼo aʼu ki te fakaʼosi.” (Hepeleo 6:11, MN ) ʼE tokoni mai anai ia Sehova kiā tatou mo kapau ʼe tou maʼumaʼua ʼi tana tauhi. ʼI te ʼu temi fuli ʼaē ʼe tou maʼu ai tana tokoni, ʼe lahi age anai tatatou falala ʼaē kiā te ia, pea ʼe tou “malohi mo taofi maù.” (1 Kolonito 15:58) ʼE toe mālohi age tatatou tui pea mo tatatou ʼamanaki.—Efeso 3:16-19.
19 Te tali ʼo te maʼuli faka sākilifisio: Neʼe fakafisi ia Paulo ki he gāue lelei ke feala hana muliʼi iā Sesu. Neʼe lelei te filifili ʼaē neʼe ina fai, logola ʼi ʼihi temi neʼe faigataʼaʼia tona maʼuli ʼi te faʼahi fakasino. (1 Kolonito 4:11-13) ʼE mole fakapapau mai e Sehova he maʼuli koloaʼia, pea ʼi ʼihi temi ko tana ʼu kaugana ʼe nātou ʼutakiʼi te ʼu mamahi. Kae ʼe tou fakahā tatatou fia tauhi mālohi ʼaē kiā Sehova mo kapau ʼe tou lotolelei ke tou faka faigafua totatou maʼuli pea mo maʼuli faka sākilifisio.—1 Timoteo 6:6-8.
20. He koʼe ʼe maʼuhiga ke faʼa kātaki he tahi ʼe ina fakamuʼamuʼa ia te ʼu gāue ʼo te Puleʼaga?
20 Te faʼa kātaki: Neʼe fakaloto mālohiʼi fēnei e te tisipulo ko Sakopo ia tona ʼu tēhina: “Koutou kataki, u tehina, o kaku ki te haele mai a te Aliki.” (Sakopo 5:7) ʼI te mālama maveuveu ʼaenī, ʼe faigataʼa ia te maʼu ʼo he loto faʼa kātaki. ʼE tou loto ke hoko fakavilivili te ʼu meʼa ʼaē ʼe tou loto kiai. Kae ʼe tokoniʼi tatou e Paulo ke tou faʼifaʼitakiʼi ia nātou ʼaē “aki te tui pea mo te faʼa kātaki, ʼe nātou maʼu te ʼu fakapapau.” (Hepeleo 6:12, MN ) Koutou lotolelei ʼo fakatalitali ki te tokoni ʼa Sehova. ʼE mahino ia ko te maʼuli heʼegata ʼi he palatiso ʼe ko he ʼamanaki ʼe tāu mo feʼauga ke tou fakatalitali kiai!
21. (a) Koteā ʼaē ʼe tou fakahā mokā ʼe tou fakamuʼamuʼa ia te ʼu gāue ʼo te Puleʼaga? (b) Koteā ʼaē ka tou vakaʼi anai ʼi te alatike ʼaē ka hoa mai?
21 Ei, ko te tokoni ʼa Sesu ʼaē ke tou kumi muʼa ia te Puleʼaga, ʼe ʼaoga kiā tatou ʼi totatou temi. Kapau ʼe tou kumi muʼa ia te Puleʼaga, pea ʼe tou fakahā ai tatatou falala moʼoni ʼaē kiā Sehova, pea ko te ala pe ʼaia e tahi ki te maʼuli maʼa he Kilisitiano. Kae neʼe toe tokoniʼi tatou e Sesu ke tou haga “kumi muʼa te . . . faitotonu [ʼa te ʼAtua].” ʼI te alatike ʼaē ka hoa mai, ʼe tou vakaʼi anai pe koʼe ʼe ʼaoga tāfito te fakaloto mālohi ʼaia kiā tatou iā ʼaho nei.
ʼE Feala Koa Hakotou Fakamahino?
• ʼO ʼuhiga mo te ʼu koloā, koteā te manatu fakapotopoto ʼaē neʼe fakaloto mālohiʼi tatou e Sesu ke tou maʼu?
• Koteā te ako ʼe tou tāʼofi mai te lea fakatātā ʼa Sesu ʼo ʼuhiga mo te kamelo pea mo te pu ʼo he hui tui?
• Ko te ʼu kalitātē faka Kilisitiano fea ʼaē ka tokoni mai anai ke tou kumi muʼa te Puleʼaga ʼo te ʼAtua?
[Paki ʼo te pasina 21]
Tokolahi iā nātou ʼaē neʼe fagono ki te faiakonaki ʼa Sesu, neʼe māsisiva
[Paki ʼo te pasina 23]
Neʼe lahi age te manako ʼa te tūpulaga ki tona ʼu koloā ʼi tona ʼofa ʼaē ki te ʼAtua
[Paki ʼo te pasina 23]
Ko te tagata fakatau koloā ʼo te lea fakatātā ʼa Sesu, neʼe ina sākilifisioʼi ia meʼa fuli ʼuhi pe ko te mataʼi tofe maʼuhiga
[Paki ʼo te pasina 24]
ʼE tokoni mai anai ia Sehova kiā tatou mo kapau ʼe tou maʼumaʼua ʼi tana tauhi