ʼE Moʼoni Koa Kia Koutou Ia Te Takitaki ʼa Kilisito?
“ ʼAua naʼa fakahigoaʼi koutou ko he ‘kau takitaki,’ heʼe ko te tokotahi pe ʼe ko tokotou Takitaki, ko Kilisito.”—Mateo 23:10, MN.
1. Ko ai tokotahi pe ʼaē ko te Takitaki ʼo te kau Kilisitiano moʼoni?
NEʼE ko te Feliatolu ʼaho 11 ʼo Nisani. Hili kiai ʼaho e tolu pea matehi ai leva ia Sesu Kilisito. Neʼe ko tana ʼalu fakamuli ʼaia ki te fale lotu. ʼI te ʼaho ʼaia, neʼe fai e Sesu te akonaki maʼuhiga ki te hahaʼi tokolahi ʼaē neʼe fakatahi ai mo tana kau tisipulo. Neʼe ina ʼui fēnei: “ ʼAua naʼa fakahigoaʼi koutou ko Lapi, heʼe ko te tokotahi pe ʼe ko tokotou tagata faiako, pea ko koutou ʼe koutou tautēhina fuli. Pea tahi foki, ʼaua naʼa koutou fakahigoa he tahi ko hakotou tāmai ʼi te kele, heʼe ko te tokotahi pe ʼe ko takotou Tāmai, ia Ia ʼaē ʼe ʼi selo. ʼAua naʼa fakahigoaʼi koutou ko he ‘kau takitaki,’ heʼe ko te tokotahi pe ʼe ko tokotou Takitaki, ko Kilisito.” (Mateo 23:8-10, MN ) ʼE mahino ia, ko Sesu Kilisito ʼe ko te Takitaki ʼo te kau Kilisitiano moʼoni.
2, 3. ʼE malave feafeaʼi ki totatou maʼuli takita fakalogo kia Sehova pea mo tali te Takitaki ʼaē neʼe ina fakanofo?
2 ʼE tou maʼu te ʼu fua lelei ʼi totatou maʼuli mokā ʼe tou tali te takitaki ʼa Sesu! ʼI te fakakikite e Sehova ʼAtua ia te ʼamanaki haʼu ʼo te Tagata Takitaki ʼaia, neʼe ina ʼui fēnei ʼaki te polofeta ko Isaia: “Ê! ia koutou fuli ʼaē ʼe fia ʼiʼinu! Koutou ʼōmai ki te vai. Pea mo nātou ʼaē ʼe mole hanatou paʼaga! Koutou ʼōmai, ʼo totogi pea mo kakai. ʼIo, koutou ʼōmai, koutou totogi te vino pea mo te huʼa pipi, mole hona paʼaga mo hona totogi. . . . Koutou fagono lelei mai kia te ʼau, pea ke koutou kai te meʼa ʼaē ʼe lelei, pea ke fiafia tokotou nefesi ʼi te gako. . . . Koʼeni! Neʼe ʼau foaki ia ia ko he fakamoʼoni ki te ʼu kūtuga faka puleʼaga, ko te tagata takitaki pea mo te pule ki te ʼu kūtuga faka puleʼaga.”—Isaia 55:1-4.
3 Neʼe palalau ia Isaia ki te ʼu meʼa ʼe tou māhani kiai—te vai, mo te huʼa pipi, pea mo te vino—moʼo fakatā peʼe malave feafeaʼi ki totatou maʼuli takitokotahi ia tatatou fakalogo kia Sehova pea mo tatatou muliʼi te Tagata Takitaki pea mo te Pule ʼaē neʼe ina foaki mai. ʼE malave lelei kia tatou, ohage ko hakita ʼinu he moʼi vai momoko ʼi he ʼaho vevela. ʼE fakafimālie anai tatatou fia ʼinu ki te moʼoni pea mo te faitotonu. Ohage ko te huʼa pipi ʼe ina fakamālohiʼi he kiʼi toe kei meamea pea mo tokoni ki tana tuputupu, ʼo toe feiā pe ‘ko te huʼa pipi ʼo te folafola’ ʼe ina fakamālohiʼi tatou pea mo faka fealagia ke tou tuputupu ʼi te faʼahi fakalaumālie ʼo ʼuhiga mo tatatou ʼu felogoi mo te ʼAtua. (1 Petelo 2:1-3) Pea ʼe mole fakafisi anai he tahi ki te ʼui ʼaē ʼe fakatupu fiafia te vino ʼi he ʼu temi fakafiafia. ʼO toe feiā pe, ka tou tauhi ki te ʼAtua moʼoni pea mo muliʼi ia ia ʼaē neʼe ina fakanofo moʼo takitaki totatou maʼuli, pea ʼe fakatupu “fiafia” kia tatou. (Teutalonome 16:15) Koia ʼe maʼuhiga ai kia tatou fuli—tūpulaga pea mo matuʼa, tagata mo fafine—ke tou fakahā ko te takitaki ʼa Kilisito ʼe moʼoni kia tatou. Kae ʼi te ʼaho fuli, e feafeaʼi hatatou fakahā ʼi totatou maʼuli ko te Mesia ʼe ko totatou Takitaki?
Kau Tūpulaga—Koutou ‘Tuputupu ʼi Te Poto’
4. (a) Koteā ʼaē neʼe hoko ʼi te taʼu 12 ʼo Sesu, ʼi tana ʼalu ki te ʼaho lahi ʼo te Pāsikate ʼi Selusalemi? (b) Neʼe feafeaʼi te ʼatamai ʼo Sesu logola neʼe kei taʼu 12?
4 Tou fakatokagaʼi te faʼifaʼitaki ʼaē neʼe tuku e totatou Takitaki maʼa te kau tūpulaga. Logola te mole lahi ʼo te ʼu meʼa ʼaē ʼe tou ʼiloʼi ʼo ʼuhiga mo te kei veliveli ʼa Sesu, kae neʼe ʼi ai te meʼa maʼuhiga neʼe hoko. ʼI tona taʼu 12, ohage ko tanatou agamāhani neʼe ʼolo ia Sesu mo tana ʼu mātuʼa ki Selusalemi ki te ʼaho lahi ʼo te Pāsikate. ʼI te ʼaho ʼaia, neʼe kau ia Sesu ki te fai palalau ki te Tohi-Tapu, pea neʼe mole tokagaʼi e tana ʼu mātuʼa ia tana puli. Hili ia ʼaho e tolu ʼo te tuʼania ʼo tanā ʼu mātuʼa, neʼe maʼu atu e Sosefo mo Malia ia ia ki te fale lotu, “nee nofo ia i te lotolotoga o te kau faiʼako o fagono kia natou pea mo fakafehufehui natou.” Pea tahi ʼaē, “nee punamauli ia natou fuape nee fagono kia te ia i tona poto mo tana u tali.” Koutou fakakaukauʼi age muʼa, neʼe ko te taʼu 12 ʼaia ʼo Sesu, kae neʼe ina lagaʼi te ʼu fehuʼi fakapotopoto ʼi te faʼahi fakalaumālie, pea mo ina fai mo te ʼu tali fakapotopoto! ʼE mahino papau ia, neʼe poto feiā he neʼe akoʼi ia ia e tana ʼu mātuʼa.—Luka 2:41-50.
5. ʼE lava ʼiloʼi feafeaʼi e te kau tūpulaga peʼe nātou leleiʼia te ako faka famili faka Tohi-Tapu?
5 ʼE lagi ko koutou ko he tūpulaga. Kapau ko tau ʼu mātuʼa ko te ʼu Fakamoʼoni ʼa te ʼAtua, ʼe mahino ia ʼe ʼi ai tuʼumaʼu takotou ako faka famili faka Tohi-Tapu. ʼE ke leleiʼia koa te ako faka famili ʼaia? ʼE lagi lelei ke ke fakakaukauʼi te ʼu fehuʼi ʼaenī: ‘ ʼE ʼau kau koa mo toku loto katoa ki te fakatuʼutuʼu ʼo te ako faka famili ʼo te Tohi-Tapu? ʼE ʼau lagolago koa kiai, ʼo mole ʼau fai he meʼa ke ina kaihaʼa te temi ki te ako ʼaia?’ (Filipe 3:16) ‘ ʼE ʼau tali koa ki te ʼu fehuʼi ʼaē ʼe fai ʼi te ako ʼaia? Kapau ʼe feala, ʼe ʼau lagaʼi koa he ʼu fehuʼi ʼo ʼuhiga mo te ʼu alatike ʼaē ʼe mātou ako pea mo fai he ʼu fakamahino kiai? ʼI taku tuputupu ʼi te faʼahi fakalaumālie, ʼe ʼau leleiʼia koa “te meakai fefeka maʼa te hahai lalahi”?’—Hepeleo 5:13, 14.
6, 7. He koʼe ʼe ʼaoga ki te kau tūpulaga ke nātou fai hanatou polokalama lau Tohi-Tapu ʼi te ʼaho fuli?
6 ʼE toe ʼaoga mo he polokalama lau Tohi-Tapu ʼi te ʼaho fuli. Neʼe hiva fēnei te tagata fai Pesalemo: “Manuʼia te tagata ʼaē neʼe mole haʼele ʼi te tokoni ʼa te kau agakovi, . . . kae ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te po.” (Pesalemo 1:1, 2) Ko Sosue, ʼaē neʼe hoa mai kia Moisese, neʼe ina ‘lau leʼo veliveli te tohi ʼo te lao ʼi te ʼaho mo te po.’ Neʼe lava ai tana fai te ʼu tonu fakapotopoto pea mo ina fai fakalelei te ʼu gāue ʼaē neʼe foaki age e te ʼAtua. (Sosue 1:8) Ko totatou Takitaki ko Sesu Kilisito, neʼe ina ʼui fēnei: “Kua tohi: ‘E mole gata pe ki te pane e mauli ai anai te tagata, kae e mauli anai i te folafola fuape e mavae maia fofoga o te Atua.’ ” (Mateo 4:4) Kapau ʼe ʼaoga ʼi te ʼaho fuli ke tou kai te meʼa kai fakasino, pea ʼe toe ʼaoga tāfito age kia tatou ke tou kai tuʼumaʼu ki te meʼa kai fakalaumālie!
7 ʼI tana mahino ʼaē ʼe ʼaoga kia ia te ʼu meʼa fakalaumālie, ko Nicole ʼi tona taʼu 13 neʼe ina kamata lau te Tohi-Tapu ʼi te ʼaho fuli.a ʼI te temi nei ko tona taʼu 16 pea kua ina lau katoa te Tohi-Tapu pea ʼe ina lolotoga lau tuʼa lua nei. ʼE faigafua tana fakatuʼutuʼu. ʼE ina ʼui fēnei: “ ʼE ʼau fakatuʼutuʼu ʼi te ʼaho fuli ke ʼau lau te kapite katoa.” ʼE tokoni feafeaʼi kia ia tana lau ia te Tohi-Tapu ʼi te ʼaho fuli? ʼE ina tali fēnei: “Ia ʼaho nei kua lahi ʼaupito te ʼu fakakaugā kovi. ʼE ʼau felāveʼi ʼi te ʼaho fuli mo te ʼu fakahala ʼi te faleako pea ʼi te temi fuli ʼe ʼahiʼahiʼi taku tui. Ko taku lau te Tohi-Tapu ʼi te ʼaho fuli ʼe tokoni mai ke ʼau manatuʼi fakavilivili te ʼu fakatotonu pea mo te ʼu pelesepeto ʼaē ʼe nātou fakaloto mālohiʼi ʼau ke ʼau tauʼi te ʼu fakahala ʼaia. Pea ʼe ʼau logoʼi ʼi toku loto ʼe ʼau fakaōvi kia Sehova pea mo Sesu.”
8. Neʼe koteā te agamāhani ʼa Sesu ʼo ʼuhiga mo te sinakoka, pea ʼe lava faʼifaʼitakiʼi feafeaʼi e te kau tūpulaga?
8 Neʼe ko he agamāhani ʼa Sesu ke ina fakalogo pea mo kau ki te lau ʼo te Tohi-Tapu ʼi te sinakoka. (Luka 4:16; Gaue 15:21) ʼE fua lelei ki te kau tūpulaga mokā nātou muliʼi te faʼifaʼitaki ʼaia ʼo kau tuʼumaʼu ki te ʼu fono, heʼe lau ai pea mo akoʼi ai te Tohi-Tapu! ʼI tana fakahā ia tana loto fakafetaʼi ki te ʼu fono ʼaia, neʼe ʼui fēnei e Richard ʼaē ʼe taʼu 14: “ ʼE maʼuhiga kia ʼau te ʼu fono. ʼI te ʼu lakaga ʼaia ʼe ʼau fakakaukauʼi tuʼumaʼu te meʼa ʼaē ʼe lelei pea mo te meʼa ʼaē ʼe kovi, te aga ʼaē ʼe tonu ke fai pea mo ʼaē ʼe mole tonu ke fai, mo te aga faka Kilisitiano pea mo te aga ʼaē ʼe mole faka Kilisitiano. ʼE mole tonu ke ʼau fai he ʼu meʼa ʼe kovi ke ʼau ʼiloʼi ai te meʼa ʼaē ʼe kovi.” Ei, “ko te fakamanatu ʼa Sehova ʼe tāu mo te falala, ʼo ina fakaliliu ke poto ia ia ʼaē ʼe mole heʼeki fakapotopoto.” (Pesalemo 19:7) Pea ʼe toe kau ia Nicole ki te ʼu fono fuli e nima ʼaē ʼe fai ʼi te vāhaʼa fuli. ʼE toe tokaga ʼo teuteuʼi tana ʼu fono ʼaia ia hola e lua peʼe tolu.—Efeso 5:15, 16.
9. Ko te kau tūpulaga, ʼe lava “tuputupu [feafeaʼi] . . . ʼi te poto”?
9 ʼE lahi te temi ʼo te kau tūpulaga ke nātou ‘ ʼiloʼi te ʼAtua moʼoni pe ʼaē e tahi, pea mo ia ʼaē neʼe ina fekauʼi mai, ia Sesu Kilisito.’ (Soane 17:3) ʼE lagi koutou ʼiloʼi he kau tūpulaga ʼe lahi te temi ʼaē ʼe nātou fakaʼaogaʼi moʼo lau ia te ʼu tohi kapoe, mo sio televisio, mo gaoʼi viteo, peʼe nātou fakaʼaogaʼi te Internet. He koʼe koa ʼe koutou faʼifaʼitakiʼi anai ia nātou ʼaia mo kapau ʼe koutou lava muliʼi te faʼifaʼitaki lelei ʼo tokotou Takitaki? ʼI te kei veliveli ʼa Sesu, neʼe fakafiafia ʼi tana ako ʼo ʼuhiga mo Sehova. Pea neʼe koteā tona fua? ʼI tana manako ʼaia ki te ʼu meʼa fakalaumālie, “neʼe tuputupu ia Sesu ʼi te poto.” (Luka 2:52, MN ) ʼE koutou lava fai feiā.
“Koutou Fefakalogoʼaki”
10. Koteā ʼaē ka tokoni ki he maʼuli faka famili ke liliu ʼo tokalelei pea mo fīmālie?
10 ʼE lava liliu te loto fale ko he koga meʼa tokalelei pea mo fīmālie, peʼe ko he koga meʼa ʼe hoko ai he ʼu kē. (Tāʼaga Lea 21:19; 26:21) ʼE tokalelei pea mo fīmālie totatou maʼuli faka famili mo kapau ʼe tou tali ia te takitaki ʼa Kilisito. ʼIo ko te faʼifaʼitakiʼi ʼo Sesu ʼe ko he faʼifaʼitaki ki te ʼu felogoi faka famili. ʼE ʼui e te Tohi-Tapu: “Koutou fefakalogoʼaki ʼi te manavasiʼi kia Kilisito. Ke fakalogo te ʼu fafine ki ʼonatou ʼohoana ohage ko hanatou fakalogo ki te ʼAliki, koteʼuhi ʼe pule te tagata ki tona ʼohoana ohage ko te pule ʼa Kilisito ki te kokelekasio, ia ia, ʼaē ko te fakamaʼuli ʼo te sino ʼaia. . . . ʼU tagata ʼohoana, ke koutou haga ʼofa ki ʼokotou ʼohoana, ohage ko te ʼofa ʼa Kilisito ki te kokelekasio pea mo ina foaki ia ia totonu maʼa te kokelekasio.” (Efeso 5:21-25, MN ) Neʼe faitohi fēnei ia Paulo ki te kokelekasio ʼo Kolose: “U fanau, koutou fakalogo ki autou u matua i te meafuape, koteuhi e ko te mea aia e lelei i te Aliki.”—Kolose 3:18-20.
11. ʼE lava fakahā feafeaʼi e te tagata ʼohoana ʼe tui ki te takitaki ʼa Kilisito?
11 ʼE hā mai ʼi te tokoni ʼaia ʼe ko te ʼu tagata ʼohoana te ʼu pule famili, pea ʼe lagolago lelei tona ʼohoana ki ai, pea ko te ʼu fānau ʼe nātou fakalogo ki tanatou ʼu mātuʼa. Pea kapau ʼe lelei te pule ʼa te tagata pea ʼe maʼuli fiafia anai tona famili. Ko he tagata ʼohoana poto ʼe tonu ke ina ako peʼe feafeaʼi te fai ʼo tana pule, ʼo mulimuli pe ki te Pule pea mo te Takitaki ʼa Kilisito Sesu. (1 Kolonito 11:3) Logola ki muli age neʼe liliu ia Sesu ko te “pule kia meʼa fuli ʼi te kokelekasio,” kae ʼi tana haʼu ki te kele “nee mole haele mai ke tauhi kia te ia, kae ke ina tauhi.” (Efeso 1:22, MN; Mateo 20:28) ʼO toe feiā pe, ʼe fakahā e te tagata tana pule ʼi tana takitaki, kae ʼe mole ina fai pea mo manatu pe kia ia totonu, kae ʼe tokaga tāfito ki te ʼu meʼa ʼaē ʼe ʼaoga ki tona ʼohoana pea mo tana fānau—ei, ki tona famili katoa. (1 Kolonito 13:4, 5) ʼE faiga ke ina faʼifaʼitakiʼi te ʼu kalitate fakaʼatua ʼo tona pule ko Sesu Kilisito. Ohage ko Sesu, ʼe agamālū pea mo agavaivai. (Mateo 11:28-30) Ohage la, kapau neʼe faihala pea ʼe mole faigataʼa anai kia ia hana fai te ʼu palalau ʼaenī: “ ʼE ʼau fakalelei atu” peʼe “ ʼe ke tonu koe.” ʼE faigafua anai ki tona ʼohoana ke liliu ko he “tokoni,” mo he “fakakatoa,” pea mo he “hoa” ki te taʼi tagata ʼaia, ʼo ina ako he ʼu meʼa mai ia ia pea mo gāue fakatahi mo ia.—Senesi 2:20; Malakia 2:14.
12. Koteā ʼaē ka tokoni anai ki te fafine ke mole fakafeagai ki te pelesepeto ʼo te tuʼulaga pule?
12 Pea ko te fafine ʼe tonu ke fakalogo ki tona ʼohoana. Kae kapau ʼe holi ki te ʼu meʼa ʼo te mālama, ʼe lava taʼomia e te ʼu meʼa ʼaia ia tana fakakaukau ʼo ʼuhiga mo te tuʼulaga pule, pea ʼe mole fia fakalogo anai ki te tagata. ʼE mole ʼui mai e te Tohi-Tapu ʼe tonu ke pule fakamālohi te tagata, kae ʼe ina fakamaʼua ki te ʼu fafine ke nātou fakalogo ki ʼonatou ʼohoana. (Efeso 5:24) ʼE toe fakamaʼua e te Tohi-Tapu ki te ʼu tagata ʼohoana peʼe ko te ʼu tāmai, ke nātou fakahoko ia tonatou ʼu maʼua faka famili, pea kapau ʼe muliʼi tana tokoni, pea ʼe lagolago ki te tokalelei pea mo te haʼele lelei ʼo te famili.—Filipe 2:5.
13. Koteā te faʼifaʼitaki neʼe tuku e Sesu ki te fānau ʼo ʼuhiga mo te fakalogo?
13 ʼE tonu ke fakalogo te ʼu fānau ki tanatou ʼu mātuʼa. ʼI te faʼahi ʼaia, neʼe tuku e Sesu te faʼifaʼitaki lelei. Hili te meʼa ʼaē neʼe hoko ʼi te fale lotu ʼi tona taʼu 12 he neʼe puli Sesu ia ʼaho e tolu, “nee hifo ai mo [ʼana mātuʼa] o olo ki Nasaleti, [pea] nee fakalogo ia kia naua.” (Luka 2:51) Ko te fakalogo ʼa te ʼu fānau ki tanatou ʼu mātuʼa ʼe kau ki te tokalelei pea mo te felogoi lelei ʼa te famili. Kapau ʼe mulimuli te famili katoa ki te takitaki ʼa Kilisito, pea ʼe maʼuli fīmālie anai.
14, 15. Koteā ʼaē ka tokoni mai anai ke tou tauʼi fakalelei te ʼu fihifihia ʼaē ʼi totatou loto fale? Tuku mai he faʼifaʼitaki.
14 Tatau aipe mokā hoko he ʼu fihifihia ʼi te loto fale, ʼe tonu ke muliʼi te faʼifaʼitaki pea mo te takitaki ʼa Sesu. Ohage la, ko Jerry neʼe taʼu 35 pea neʼe ʼohoana mo te fafine ko Lana, pea ko te fafine ʼaia neʼe ʼi ai tana kiʼi taʼahine, pea neʼe hoko leva te fihifihia lahi. ʼE ʼui fēnei e Jerry: “Neʼe mahino kia ʼau kapau ʼe ʼau fia takitaki lelei tomatou maʼuli faka famili pea ʼe tonu ke ʼau maʼuliʼi te ʼu pelesepeto faka Tohi-Tapu ʼo ʼuhiga mo te famili. Kae neʼe ʼau toe fakatokagaʼi neʼe tonu ke ʼau poto pea mo fakasiosio tonu ʼo ʼuhiga mo te maʼuliʼi ʼo te ʼu pelesepeto ʼaia.” Neʼe hage ki te kiʼi taʼahine ʼo tona ʼohoana, ko Jerry neʼe ko he fihifihia kia ia mo tana faʼe, pea neʼe fehiʼa ʼaupito kia Jerry. Neʼe ʼaoga kia Jerry ke ina maʼu he fakasiosio tonu ʼo ʼuhiga mo te ʼu palalau ʼa te kiʼi taʼahine pea mo te ʼu meʼa ʼaē neʼe ina fai. Neʼe ina fakatokatoka feafeaʼi te faʼahi ʼaia? ʼE tali fēnei e Jerry: “Neʼe ma felogoi mo Lana ʼe ko ia pe anai ʼaē ka ina akoʼi muʼa ia tana fānau, kae ʼe ʼau faiga muʼa ʼau ke ʼau fakatuputupu he ʼu felogoi lelei mo tana kiʼi taʼahine. ʼAki te temi, neʼe fua lelei tamā ʼu felogoi.”
15 Kapau ʼe tou tau mo he fihifihia ʼi totatou loto fale, ʼe tonu ke tou ʼiloʼi peʼe koteā te ʼu meʼa pea mo te ʼu gāue ʼaē ʼe tonu ke tou fai. ʼE toe ʼaoga foki ke tou popoto ʼi te maʼuliʼi ʼo te ʼu pelesepeto faka lotu. Ohage la ko Sesu, neʼe mahino lelei pe koʼe neʼe fāfā ki tona tapaʼi kofu, ia te fafine ʼaē neʼe hali te toto ia ia, pea neʼe tokaga fakapotopoto kia ia pea mo manavaʼofa ki ai. (Levitike 15:25-27; Maleko 5:30-34) Ko te poto pea mo te fakasiosio tonu neʼe ko te ʼu kalitate ʼaia ʼo totatou Takitaki. (Tāʼaga Lea 8:12) ʼE tou fiafia anai mo kapau ʼe tou mulimuli ki tana faʼifaʼitaki.
‘Tou Kumi Muʼa Te Puleʼaga’
16. Koteā ʼaē ʼe tonu ke tou fakamuʼamuʼa ʼi totatou maʼuli, pea neʼe fakahā feafeaʼi e Sesu te faʼahi ʼaia ʼaki tana faʼifaʼitaki?
16 Neʼe fakahā lelei e Sesu pe koteā ʼaē ʼe tonu ke tou fakamuʼamuʼa ʼi totatou maʼuli mo kapau ʼe tou tali tana takitaki. Neʼe ina ʼui fēnei: “Ke koutou haga kumi muʼa te puleʼaga pea mo [te] faitotonu [ʼa te ʼAtua].” (Mateo 6:33, MN ) Pea ʼaki tana faʼifaʼitaki ʼaia, neʼe ina fakahā mai te meʼa ʼaē ʼe tonu ke kita fai. Hili te ʼu ʼaho e 40 ʼaē neʼe sesunio ai, mo metitasio, pea mo faikole ai ʼi tana ʼosi papitema, neʼe fai te fakahala kia Sesu. Neʼe tuku age e Satana te Tevolo “te ʼatu puleʼaga katoa ʼo malamanei” ke ina puleʼi. Koutou fakakaukauʼi age muʼa ia te maʼuli ʼo Sesu mo kanapaula neʼe ina tali te meʼa ʼaē neʼe foaki age e te Tevolo! Kae ko Kilisito neʼe ina fakamuʼamuʼa te fai ʼo te finegalo ʼo tana Tāmai. Neʼe ina ʼiloʼi ko te taʼi maʼuli ʼaia ʼi te mālama ʼa Satana ʼe nounou pe ia. Neʼe ina līaki atu aipe te fakahala ʼa te Tevolo, ʼo ʼui maʼana: “[ʼE] tohi fēnei: ‘Ko Sehova, tou ʼAtua, ʼaē ʼe maʼua ke ke atolasio ki ai, pea ʼe ko ia tokotahi pe ʼe maʼua ke ke tauhi ki ai ʼaki he tauhi tapu.’ ” Hili pe kiai, pea “kamata ai ʼi te lakaga ʼaia te akonaki ʼa Sesu ʼo ʼui maʼana: ‘Koutou fakahemala, he kua fakaōvi mai te puleʼaga ʼo selo.’ ” (Mateo 4:2, 8-10, 17, MN ) Pea ʼi te hoko atu ʼo tona maʼuli fakakelekele, ko Kilisito neʼe ko te tagata fai faka mafola temi katoa ʼo te Puleʼaga ʼo te ʼAtua.
17. ʼE tou lava fakahā feafeaʼi ʼe tou fakamuʼamuʼa ʼi totatou maʼuli te ʼu meʼa ʼo te Puleʼaga?
17 ʼE tonu ke tou faʼifaʼitakiʼi totatou Takitaki pea ke ʼaua naʼa tou tuku te mālama ʼa Satana ke ina fakahalaʼi tatou ke tou fakamuʼamuʼa ʼi totatou maʼuli he gāue ke kita maʼu paʼaga ai. (Maleko 1:17-21) ʼE ko he agavale anai mo kapau ʼe tou maʼumaʼua fau ki te ʼu meʼa faka mālama, kae tou fakatō ki muli te ʼu meʼa ʼo te Puleʼaga! Neʼe foaki mai e Sesu te gāue ʼaē ko te faka mafola ʼo te Puleʼaga pea mo fai he ʼu tisipulo. (Mateo 24:14; 28:19, 20) ʼE moʼoni, ʼe ʼi ai totatou famili pea mo totatou ʼu maʼua kehekehe, kae ʼe mole tou fiafia koa la ʼi te fakaʼaogaʼi ʼo totatou ʼu afiafi pea mo totatou ʼu fakaʼosi vāhaʼa moʼo fakahoko ʼo totatou ʼu maʼua faka Kilisitiano ʼaē ko te faka mafola pea mo te akoʼi ʼo te hahaʼi? ʼE ko he meʼa fakaloto mālohi heʼe ʼi te taʼu gāue 2001, neʼe ko te toko 780 000 neʼe minisi temi katoa, peʼe pionie!
18. Koteā ʼaē ka tokoni mai anai ke tou fiafia ʼi te minisitelio?
18 Ka tou lau te ʼu Evaselio, pea ʼe tou fakatokagaʼi ko Sesu neʼe ko te tagata gāue mālohi pea mo loto manavaʼofa. ʼI tana sio ʼaē ʼe māsisiva te hahaʼi ʼi te faʼahi fakalaumālie, neʼe ʼofa mamahi kia nātou pea neʼe tokoni fakavilivili kia nātou. (Maleko 6:31-34) ʼE tou fiafia ʼi totatou minisitelio mo kapau ʼe tou tokoni ki te hahaʼi ʼaki te ʼofa pea mo tou fia tokoni fakamalotoloto kia nātou. Kae ʼe tou lava maʼu feafeaʼi te taʼi holi ʼaia? ʼE ʼui fēnei e te tūpulaga ʼe higoa ko Jayson: “ ʼI taku kei tūpulaga, neʼe mole ʼau leleiʼia te minisitelio.” Koteā ʼaē neʼe tokoni ki ai ke manako ki te gāue ʼaia? ʼE tali fēnei e Jayson: “ ʼI te ʼu Moeaki uhu fuli neʼe ʼolo tuʼumaʼu toku famili ki te fai faka mafola. Neʼe ko he meʼa lelei kia ʼau heʼe ʼi taku ʼalu tuʼumaʼu ʼaia ʼo fai faka mafola neʼe ʼau sio ai ki tona fua lelei pea mo ʼau fiafia ʼaupito ai.” ʼE tonu foki mo tatou ke tou kau tuʼumaʼu pea mo faʼafai ʼi te minisitelio.
19. Koteā anai tatatou fakatuʼutuʼu ʼo ʼuhiga mo te takitaki ʼa Kilisito?
19 ʼE moʼoni ko te takitaki ʼa Kilisito ʼe fakaloto fīmālie pea mo fua lelei. Kapau ʼe tou fai feiā, pea ʼe liliu te temi tūpulaga ko he temi moʼo fakatuputupu ai te ʼatamai mālama pea mo te poto. ʼE liliu te maʼuli faka famili ko he matapuna ʼo te tokalelei pea mo te fīmālie, pea ʼe fakafiafia te minisitelio. Koia, tou fakahā ʼi totatou maʼuli pea mo te ʼu tonu ʼaē ʼe tou fai ʼi te ʼaho fuli, ʼe moʼoni kia tatou ia te takitaki ʼa Kilisito. (Kolose 3:23, 24) Kae ko Sesu Kilisito ʼe ina fai tana takitaki ʼi te tahi ʼaluʼaga—ko te kokelekasio faka Kilisitiano. ʼE talanoa anai te alatike ka hoa mai peʼe lava feafeaʼi hakita leleiʼia te fakatuʼutuʼu ʼaia.
[Kiʼi nota]
a Neʼe fetogi te ʼu higoa.
Kei Koutou Manatuʼi Koa?
• Koteā tona fua lelei kia tatou te mulimuli ki te Tagata Takitaki ʼaē neʼe fakanofo e te ʼAtua?
• ʼE lava fakahā feafeaʼi e te kau tūpulaga ʼe nātou fia muliʼi te takitaki ʼa Sesu?
• ʼE malave feafeaʼi te takitaki ʼa Kilisito ki te ʼu famili ʼaē ʼe nātou fakalogo ki tana takitaki?
• ʼE tou lava fakahā feafeaʼi ʼi totatou minisitelio, ʼe tou tui ki te takitaki ʼa Kilisito?
[Paki ʼo te pasina 9]
Ko te temi tūpulaga ʼe ko he temi lelei moʼo maʼu ai te ʼatamai mālama ʼo ʼuhiga mo te ʼAtua pea mo te Tagata Takitaki ʼaē neʼe ina fakanofo
[Paki ʼo te pasina 10]
ʼE maʼuli fiafia te famili mo kapau ʼe fakalogo ki te takitaki ʼa Kilisito
[Paki ʼo te pasina 12]
Neʼe kumi muʼa e Sesu te Puleʼaga. E feafeaʼi kia koutou?