Te ʼu Fehuʼi ʼa Te Kau Lautohi
Ko Malia ʼaē neʼe liliu ko te faʼe ʼa Sesu neʼe kua faitama koa ia ʼi te temi ʼaē neʼe ʼalu ai ʼo fakasiosio ki tona kāiga ko Elisapeta?
Ei, neʼe kua faitama ia.
Ia Luka kapite 1, ʼe tou ʼuluaki lau ai te faitama ʼa Elisapeta, te ʼohoana ʼo te pelepitelo ko Sakalia pea ko te fafine ʼaia neʼe ina fānauʼi ia Soane (Patita). Ko Elisapeta “ ʼi tona māhina ono . . . [ko] te ʼaselo ko Kapeliele” neʼe ina ʼaʼahi ia Malia ʼo fakahā ki ai ʼe faitama anai ia pea ʼe ina fānauʼi anai te “ ʼAlo ʼo te Māʼoluga ʼAupito.” (Luka 1:26, 30-33) Kae ko te temi fea ʼaē neʼe faitama ai ia Malia?
ʼE hoko atu te fakamatala ʼa Luka ʼo ina fakahā neʼe ʼalu ia Malia ki Suta ʼo fakasiosio ki tona kāiga ko Elisapeta ʼaē ʼe faitama. ʼI te felāveʼi ʼa te ʼu fafine ʼaia, neʼe hopo (ia Soane) te kiʼi tamasiʼi ʼaē neʼe fuafatuʼi e Elisapeta. Neʼe talanoa ia Elisapeta ki ‘te fua ʼo te ʼalo ʼo Malia,’ pea neʼe ina fakahigoa ia Malia ko “te faʼe ʼo toku ʼAliki.” (Luka 1:39-44) Koia ʼe totonu ai te ʼui ʼaē neʼe kua faitama ia Malia, ʼi te temi ʼaē neʼe ʼalu ai ʼo fakasiosio kia Elisapeta.
ʼE tou lau fēnei ia Luka 1:56: “Pea neʼe nofo ai Malia mo ia ʼo lagi māhina tolu, pea toe liliu ki tona ʼapi.” ʼE mole fakahā mai e te vaega ʼaenī he ʼaho totonu ke tou maʼu ʼi te kaletalio. ʼE ina ʼui mai pe “lagi māhina tolu,” ʼe ko he faʼahi ʼaia ʼe fakaaʼu ai ia Elisapeta ki tona māhina hiva.
ʼI te ʼosi tokoni kia Elisapeta ʼi tona māhina fakaōvi ʼaē ki tana fānau, neʼe toe liliu ia Malia ki tona ʼapi ʼi Nasaleti. E lagi neʼe manatu ia Malia ki te temi ʼaē ʼe ʼosi fānauʼi ai e Elisapeta (ia Soane), e lagi feala pe anai ke tokolahi te hahaʼi ʼaē ka ʼolo ʼo fakasiosio ki ai, ko ʼihi ia nātou ʼaia lagi ko hona ʼu kāiga. Lagi ko he faʼahi ʼaia neʼe feala ke fakafitaʼa ki he finemui mole heʼeki ʼohoana ka kua faitama. Neʼe ko te māhina fia ʼo Malia ʼi te temi ʼaē neʼe mavae ai ia Elisapeta ʼo ʼalu ki Nasaleti? Mai tona ʼaluʼaga ʼaē neʼe nofo ia mo Elisapeta “lagi māhina e tolu” e mahalo pe ʼi te temi ʼaē neʼe liliu ai Malia ki Nasaleti neʼe ko te fakaʼosi ʼaia ʼo tona māhina tolu peʼe ko te kamata ʼo tona māhina fā.