Neʼe toe fakatotonu fēnei e Sesu ki tana kau tisipulo: “ ʼAua naʼa koutou ʼave he taga paʼaga, pe ko he kato fafaʼo meʼa kai, pe ko he ʼu tapugā vaʼe, pea ʼaua naʼa koutou fāʼufua ki he tahi ʼi te ala moʼo fefakaʼalofaʼaki.” (Luka 10:4) ʼI te agamāhani, neʼe ʼave e te tagata folau hana kato fafaʼo meʼa kai pea mo hana ʼu tapugā vaʼe foʼou, koteʼuhi neʼe feala ke maumau te lalo sūlie pea mo motu te meʼa haʼi sūlie. Kae neʼe mole tuʼania te kau tisipulo ʼa Sesu ki te ʼu meʼa ʼaia. Neʼe tonu ke nātou falala, ʼe taupau anai nātou e Sehova ʼo ina fakaʼaogaʼi te tahi ʼu hahaʼi Iselaelite, ʼaē neʼe ko tanatou agaʼi fenua te tali kāiga.

Kae he koʼe neʼe tala age e Sesu ki tana kau tisipulo, ke mole nātou fāʼufua ki he tahi moʼo fakaʼalofa ki ai? Neʼe tonu koa ke nātou fakamamaʼo ʼi te hahaʼi, peʼe ke nātou heʼe fakaʼapaʼapa? Kailoa ia! Ko te kupu faka Keleka ko a·spaʹzo·mai, ʼaē ʼe faka ʼuhiga ki te fāʼufua ʼo kita ki he fakaʼalofa, neʼe mole gata pe ki takita ʼui ʼaē “mālo te maʼuli” peʼe “mālo siʼi ʼau kātaki.” Neʼe toe faka ʼuhiga foki ki te ʼu fekita, mo te fefāʼufuaʼaki, pea mo te fai palalau ʼa he toko lua ʼi tanā fakafetaulaki ʼi te ala. ʼE ʼui fēnei e te tagata ʼe ina sivi te ʼu agaʼi fenua: “Ko te ʼu fakaʼalofa ʼi te ʼu fenua ʼo te Potu Hahake, neʼe mole gata pe ki takita fai ʼaki te ʼulu peʼe ʼaki te nima, ohage ko tatatou fai ʼi te ʼu fenua ʼo te Potu Hihifo, kae neʼe nātou fāʼufua, pea mo punou, pea māʼiape la mo tanatou tulolo ʼi te kele. Neʼe ʼaoga kia nātou he temi lahi moʼo fai ai te ʼu meʼa fuli ʼaia.” (Vakaʼi ia 2 Hau 4:​29.) Koia, neʼe tokoni age ia Sesu ki tana kau tisipulo ke nātou līaki te ʼu meʼa ʼaē neʼe mole maʼuhiga, tatau aipe pe neʼe ko he ʼu agaʼi fenua.

Ko te maʼua ʼaē ko te faka mafola ʼo te logo lelei ʼo te Puleʼaga ʼa te ʼAtua pea mo te fai ʼo ni ʼu tisipulo, ʼe fakahoko ia ʼaho nei e te kau Fakamoʼoni ʼa Sehova e toko 5 000 000 tupu ʼi te malamanei katoa. (Mateo 24:14; 28:19, 20) ʼE mahino kia nātou, ʼe maʼuhiga te meʼa ʼaē ʼe nātou fagonogono ki te hahaʼi. Koia, ʼe nātou fakaʼaogaʼi fakalelei tonatou temi, ʼo nātou līaki te ʼu meʼa fuli ʼaē ʼe feala ke nātou fakatātāʼofi ia nātou ʼi tanatou tokagaʼi tāfito te gāue maʼuhiga ʼaē neʼe tuku age kia nātou.

ʼE faiga te kau Fakamoʼoni ʼa Sehova ke nātou agalelei ki te hahaʼi fuli ʼaē ʼe nātou felāveʼi mo nātou. Kae ʼe mole nātou fai palalau mo nātou ʼo ʼuhiga mo he ʼu meʼa laulaunoa, pea ʼe mole nātou fakafifihi mo te hahaʼi ʼo ʼuhiga mo te ʼu faigataʼaʼia faka sosiale pea mo te mole feala ʼaē ke fakatokatoka e te ʼu puleʼaga te ʼu meʼa heʼe faitotonu ʼaē ʼe hoko. (Soane 17:16) Kae ʼe nātou faka maʼuhigaʼi tanatou fai palalau ʼo ʼuhiga mo te puleʼaki pe ʼaē e tahi ki te ʼu fihifihia ʼo te malamanei: te Puleʼaga ʼo te ʼAtua.