Tou Tauhi Ohage Ko He Kau ʼAve Logo ʼo Te Tokalelei Fakaʼatua
“ ʼE matalelei ʼi te ʼu moʼuga te ʼu vaʼe ʼo . . . ia ʼaē ʼe ina tala te tokalelei.”—Isaia 52:7.
1, 2. (a) Ohage ko tona fakakikite ia Isaia 52:7, koteā te logo lelei ʼaē ʼe tonu ke kalagaʼi? (b) Koteā te faka ʼuhiga ʼo te lea faka polofeta ʼa Isaia ki te Iselaele ʼāfea?
ʼE ʼI AI te logo lelei ʼe tonu ke kalagaʼi! Ko te logo lelei ʼo ʼuhiga mo te tokalelei—te tokalelei moʼoni. ʼE ko he logo ʼo ʼuhiga mo te hāofaki ʼaē ka tou maʼu ʼaki te Puleʼaga ʼo te ʼAtua. Neʼe kua fualoa te faitohi ʼa te polofeta ko Isaia ʼo ʼuhiga mo te faʼahi ʼaia, pea neʼe taupau tana ʼu palalau maʼa tatou ia Isaia 52:7, ʼaē ʼe tou lau fēnei ai: “ ʼE matalelei ʼi te ʼu moʼuga te ʼu vaʼe ʼo ia ʼaē ʼe ina ʼave te logo lelei, ia ia ʼaē ʼe ina tala te tokalelei, ia ia ʼaē ʼe ina ʼave te ʼu logo lelei ʼo he meʼa ʼe lelei age, ia ia ʼaē ʼe ina tala te hāofaki, ia ia ʼaē ʼe ina ʼui ki Sione: ‘Kua nofo hau tou ʼAtua!’ ”
2 Neʼe takitaki e Sehova ʼaki tona laumālie tana polofeta ko Isaia ke ina tohi te logo ʼaia, ke ʼaoga ki te Iselaele ʼāfea pea ke toe ʼaoga kia tatou. Koteā te faka ʼuhiga ʼo te ʼu palalau ʼaia? ʼI te temi ʼaē neʼe tohi ai e Isaia te ʼu palalau ʼaia, neʼe lagi kua ʼave fakapōpula e te kau Asilia te puleʼaga ʼo te potu tokelau ʼo Iselaele. Ki muli age, ko te hahaʼi ʼo te potu toga ʼo te puleʼaga ʼo Suta neʼe ʼave fakapōpula ki Papiloni. Neʼe ko te ʼu ʼaho ʼaia ʼo te lotomamahi pea mo te maveuveu ʼi te puleʼaga, he neʼe mole fakalogo te hahaʼi kia Sehova pea neʼe tupu ai tanatou mole tokalelei mo te ʼAtua. Ohage ko tona ʼui age e Sehova kia nātou, neʼe nātou tokakovi ai mo ia ʼuhi ko tanatou agahala. (Isaia 42:24; 59:2-4) Kae ʼaki ia Isaia, neʼe fakakikite e Sehova, ʼi tona temi tonu, ʼe tuku ava anai te ʼu matapā ʼo Papiloni. ʼE faka ʼāteainaʼi anai te hahaʼi ʼa te ʼAtua ke nātou toe liliu ki tonatou fenua, ke nātou toe laga ai te fale lotu ʼa Sehova. ʼE toe fakatuʼu anai ia Sione, pea ʼe toe fakahoko anai te tauhi ʼo te ʼAtua moʼoni ʼi Selusalemi.—Isaia 44:28; 52:1, 2.
3. He koʼe ko te fakapapau ʼo te toe fakaliliu ʼo Iselaele ki tona fenua, neʼe ko he tahi lea faka polofeta ʼo ʼuhiga mo te tokalelei?
3 Ko te fakapapau ʼaia ʼo te faka ʼāteaina neʼe ko he tahi lea faka polofeta ʼo ʼuhiga mo te tokalelei. Ko te toe fakaliliu e Sehova ia te kau Iselaelite ki tonatou fenua, neʼe ko he fakamoʼoni ʼaia ʼo tana manavaʼofa pea mo tanatou fakahemala. Neʼe fakahā ʼaki ai kua nātou tokalelei mo te ʼAtua.—Isaia 14:1; 48:17, 18.
“Kua Nofo Hau Tou ʼAtua!”
4. (a) ʼE lava feafeaʼi hatatou ʼui, neʼe ‘nofo hau ia Sehova’ ʼi te taʼu 537 ʼi muʼa ʼo totatou temi? (b) ʼI te ʼu taʼu ki muli age, koteā te ʼu meʼa ʼaē neʼe fai e Sehova ke fua lelei ki tana hahaʼi?
4 ʼI te temi ʼaē neʼe fakahoko ai e Sehova te faka ʼāteaina ʼaia ʼi te taʼu 537 ʼi muʼa ʼo totatou temi, neʼe feala ai ke fai te tala ʼaenī ki Sione: “Kua nofo hau tou ʼAtua!” ʼI tona ʼuhiga moʼoni, ko Sehova ʼe ko te “Hau ʼo te heʼegata.” (Fakahā 15:3) Kae ko te faka ʼāteaina ʼaia ʼo tona hahaʼi neʼe ko he tahi fakahā ʼaia ʼo tona ʼuhiga pule faʼitaliha. ʼAki he aga mālohi, neʼe ina fakahā ai te lahi ʼo tona mālohi ʼi te ʼu mālohi ʼo te ʼu puleʼaga fakatagata, ʼo aʼu ki te temi ʼaenī. (Selemia 51:56, 57) ʼAki te gāue ʼa te laumālie ʼa Sehova, neʼe mole hoko te tahi ʼu fakatuʼutuʼu fakakākā ʼaē neʼe fai moʼo fakafeagai ki tana hahaʼi. (Esitele 9:24, 25) Neʼe lahi te ʼu lakaga ʼaē neʼe uga ai e Sehova te ʼu hau ʼo Metia mo Pelesia, ke nātou lagolago ki te fakahoko ʼo tona finegalo fakaʼatua. (Sakalia 4:6) Ko te ʼu meʼa fakaofoofo ʼaē neʼe hoko ʼi te ʼu ʼaho ʼaia, ʼe fakamatala mai kia tatou ʼi te ʼu tohi faka Tohi-Tapu ʼo Esitalasi, mo Nehemia, mo Esitele, mo Asea, pea mo Sakalia. Pea ʼe ko he meʼa fakaloto mālohi ki tatatou tui ia tatatou toe vakaʼi te ʼu meʼa ʼaia!
5. Koteā te ʼu meʼa maʼuhiga ʼaē ʼe talanoa kiai te ʼu vaega ʼo Isaia 52:13–53:12?
5 Kae, ko te meʼa ʼaē neʼe hoko ʼi te taʼu 537 ʼi muʼa ʼo totatou temi pea ki muli age, neʼe ko te kamataʼaga pe ʼaia. ʼO hoa atu pe ki te lea faka polofeta ʼo te toe laga ʼo te fenua ʼi te kapite 52, neʼe faitohi ia Isaia ʼo ʼuhiga mo te haʼu ʼa te Mesia. (Isaia 52:13–53:12) ʼAki te Mesia, ʼaē neʼe ko Sesu Kilisito, ʼe foaki e Sehova he logo ʼo ʼuhiga mo te faka ʼāteaina pea mo te tokalelei, ʼe maʼuhiga age ia ʼi te meʼa ʼaē neʼe hoko ʼi te taʼu 537 ʼi muʼa ʼo totatou temi.
Te Tagata ʼAve Logo Lahi ʼo Te Tokalelei ʼa Sehova
6. Ko ai te tagata ʼave logo lahi ʼo te tokalelei ʼa Sehova, pea koteā te gāue ʼaē neʼe ina faka ʼuhiga kia ia totonu?
6 Ko Sesu Kilisito ʼe ko te tagata ʼave logo lahi ʼo te tokalelei ʼa Sehova. Ko ia te Folafola ʼa te ʼAtua, te Tagata ʼAve Folafola ʼa Sehova. (Soane 1:14) ʼO mulimuli ki te manatu ʼaia, ʼi te tahi temi ʼi tana kua ʼosi papitema ʼi te Vaitafe ʼo Solotane, neʼe tuʼu ia Sesu ʼi te sinakoka ʼi Nasaleti pea neʼe ina lau leʼolahi te gāue ʼaē neʼe fekauʼi mai ia ia kiai ʼi te tohi ʼo Isaia kapite 61. Neʼe fakahā lelei e te gāue ʼaia, neʼe fekauʼi ia ia ke ina faka mafola ia te “ ʼāteaina” pea mo te “toe sisio” ʼa te hahaʼi, pea mo te fealagia ke tali nātou e Sehova. Kae, neʼe mole gata pe te gāue ʼa Sesu ki tana tala te logo ʼo te tokalelei, he neʼe toe fekauʼi foki ia ia e te ʼAtua ke ina foaki te tafitoʼaga ʼo he tokalelei ʼe heʼegata.—Luka 4:16-21.
7. Koteā te ʼu fua ʼaē ʼe tou maʼu ʼaki ia Sesu Kilisito ʼi tatatou tokalelei mo te ʼAtua?
7 ʼI te temi ʼaē neʼe tupu ai ia Sesu, neʼe hā te ʼu ʼaselo ki te kau tagata tauhi manu neʼe nātou nonofo ōvi ki Petelehemi, ʼo nātou fakavikiviki ki te ʼAtua pea mo nātou ʼui fēnei: “Kolōlia ki te ʼAtua ʼi te ʼu potu tauʼaluga, pea tokalelei ʼi te kele ʼi te lotolotoiga ʼo te ʼu tagata ʼo te finegaloʼofa.” (Luka 2:8, 13, 14) Ei, ʼe hoko anai te tokalelei kia nātou ʼaē neʼe fakahā age e te ʼAtua tona finegaloʼofa, koteʼuhi neʼe nātou tui ki te fakatuʼutuʼu ʼaē neʼe ina fai ʼaki tona ʼAlo. Koteā tona faka ʼuhiga? Ko tona faka ʼuhiga ʼaē, logope la ʼe tupu agahala te tagata, kae ʼe feala ke maʼa ia muʼa ʼo te ʼAtua, pea mo felogoi lelei mo ia. (Loma 5:1) ʼE feala ke nātou maʼu te ʼu meʼa ʼaē ʼe mole feala ke nātou maʼu ʼi hona tahi age ʼaluʼaga, ohage ko te fīmālie ʼo te loto, te tokalelei. ʼI te temi ʼaē kua fakakatofa ai e te ʼAtua, ʼe hoko anai he faka ʼāteaina mai te ʼu fua kehekehe ʼo te agahala ʼaē neʼe nātou maʼu ia Atama, ʼo kau ai te mahaki pea mo te mate. ʼE mole toe ʼi ai anai he ʼu hahaʼi kivi, mo ni hahaʼi tuli, pea mo he kau ketu. ʼE pulihi anai ʼo talu ai te ʼu mahaki fakatupu lotovaivai pea mo te ʼu fihifihia fakaʼatamai ʼaē ʼe fakaloto mamahi. ʼE feala anai ke tou maʼuli haohaoa ʼo talu ai.—Isaia 33:24; Mateo 9:35; Soane 3:16.
8. ʼE foaki kia ai te tokalelei fakaʼatua?
8 ʼE foaki kia ai te tokalelei fakaʼatua? ʼE foaki kia nātou fuli ʼaē ʼe nātou tui kia Sesu Kilisito. Neʼe tohi fēnei e te ʼapositolo ko Paulo ‘neʼe manatu e te ʼAtua, ʼe lelei ʼaki ia Kilisito ke toe fakatokatoka mo ia te ʼu meʼa fuli ʼaē, ʼo ina fakahoko te tokalelei ʼaki te taʼataʼa ʼa Sesu ʼaē neʼe liligi ʼi te pou fakamamahi.’ Neʼe toe ʼui e te ʼapositolo ʼe kau anai ki te fakatokatoka ʼaia “te ʼu meʼa ʼo te lagi”—ʼaē ʼe ina fakatātā ia nātou ʼaē ka nātou maʼu anai te tofiʼa mo Kilisito ʼi te lagi. ʼE toe kau anai kiai mo “te ʼu meʼa ʼaē ʼo te kele”—ia nātou ʼaē ka nātou maʼu anai te fealagia ʼaē ko te maʼuʼuli ʼo heʼegata ʼi te kele ʼaenī, ʼi te temi ʼaē ʼe liliu ai anai ko he Palatiso. (Kolose 1:19, 20) Ko nātou fuli ʼaia ʼe nātou felogoi lelei anai mo te ʼAtua, heʼe nātou fakaʼaogaʼi te maʼuhiga ʼo te sakilifisio ʼa Sesu pea mo nātou fakalogo ki te ʼAtua ʼaki tonatou loto.—Vakaʼi ia Sake 2:22, 23.
9. (a) Koteā te tahi ʼu felogoi ʼaē ʼe lave kiai te tokalelei mo te ʼAtua? (b) ʼI tana fakatuʼutuʼu ʼaē ke ina foaki ʼi te potu fuli pe he tokalelei ʼe tologa, koteā te pule ʼaē neʼe foaki e Sehova ki tona ʼAlo?
9 ʼE maʼuhiga te tokalelei ʼaia mo te ʼAtua! Kapau ʼe mole ʼi ai he tokalelei mo te ʼAtua, pea ʼe mole feala ke tou maʼu ʼi he ʼu felogoi mo he tahi age, he tokalelei ʼe tologa mo mālohi. Ko te tokalelei mo Sehova ʼe ko te tafitoʼaga ʼaia ki te tokalelei moʼoni ʼi te kele. (Isaia 57:19-21) Ko Sesu Kilisito te ʼAliki ʼo te Tokalelei. (Isaia 9:6) ʼAki ia ia, ʼe feala ke toe tokalelei te hahaʼi mo te ʼAtua, pea neʼe toe foaki foki kia ia e Sehova te pule mālohi moʼo takitaki. (Taniela 7:13, 14) Pea ʼo ʼuhiga mo te ʼu fua ʼo te pule fakaʼaliki ʼa Sesu ki te malamanei, ʼe fakapapau fēnei e Sehova: “Ki te tokalelei ʼe mole ʼi ai anai hona gataʼaga.”—Isaia 9:7; Pesalemo 72:7.
10. Koteā te faʼifaʼitaki ʼaē neʼe tuku mai e Sesu ʼo ʼuhiga mo te kalagaʼi ʼo te logo lelei ʼo te tokalelei ʼa te ʼAtua?
10 ʼE ʼaoga ki te malamanei katoa te logo ʼa te ʼAtua ʼo ʼuhiga mo te tokalelei. Neʼe tuku e Sesu he faʼifaʼitaki ʼo ʼuhiga mo te faiva ʼo te faka mafola ʼo te logo lelei ʼaia. Neʼe ina fai te faʼahi ʼaia ʼi te fale lotu ʼi Selusalemi, ʼi te moʼuga, ʼi te ala, ki te fafine Samalitana ʼi te vai keli, pea ʼi te ʼu ʼapi ʼo te hahaʼi. ʼI te ʼu potu fuli ʼaē neʼe ʼi ai te hahaʼi, neʼe maʼu e Sesu te ʼu faigamālie ke ina faka mafola te tokalelei pea mo te Puleʼaga ʼa te ʼAtua.—Mateo 4:18, 19; 5:1, 2; 9:9; 26:55; Maleko 6:34; Luka 19:1-10; Soane 4:5-26.
ʼE Akoʼi Tatou Ke Tou Haʼele ʼi Te ʼu Tafuga Vaʼe ʼa Kilisito
11. Koteā te gāue ʼaē neʼe akoʼi e Sesu ki tana ʼu tisipulo?
11 Neʼe akoʼi e Sesu tana ʼu tisipulo ke nātou faka mafola te logo ʼa te ʼAtua ʼo ʼuhiga mo te tokalelei. Ko Sesu neʼe ko te “fakamoʼoni faitotonu pea mo moʼoni” ʼa Sehova, koia neʼe mahino ai kia nātou, ʼe maʼua ke nātou fakamoʼoni mo nātou. (Fakahā 3:14; Isaia 43:10-12) Neʼe nātou fakalogo ki tonatou tagata Takitaki ko Kilisito.
12. Neʼe fakahā feafeaʼi e Paulo te maʼuhiga ʼo te gāue fai faka mafola?
12 Neʼe fai e te ʼapositolo ko Paulo te ʼu palalau ʼaenī ʼo ʼuhiga mo te maʼuhiga ʼo te gāue fai faka mafola: “ ʼE ʼui e te Folafola: ‘Ko ia ʼaē ʼe tui kia te ia ʼe mole lotomamahi anai.’ ” Ko tona faka ʼuhiga, ʼe mole lotomamahi anai ia ia ʼaē ʼe tui kia Sesu Kilisito, te Tagata ʼaē neʼe fakaʼaogaʼi e Sehova moʼo hāofaki te malamanei. Pea ʼe mole fakakeheʼi he tahi ʼuhi ko tona lanu, he neʼe ʼui fēnei e Paulo: “ ʼE mole kehekehe te kau Sutea mo te kau Keleka, heʼe ko te ʼAliki pe e tahi maʼa te hahaʼi fuli, pea ʼe koloaʼia maʼa nātou fuli ʼaē ʼe nātou fetapā kia te ia. He ‘ko ʼaē ia ʼe fetapā ki te huafa ʼo Sehova ʼe hāo anai ia.’ ” (Loma 10:11-13) Kae neʼe lava feafeaʼi ki te hahaʼi ke nātou ako te fealagia ʼaia?
13. Koteā ʼaē neʼe ʼaoga ke fai ke feala ai ki te hahaʼi ke nātou logo ki te logo lelei, pea neʼe mulimuli feafeaʼi te kau Kilisitiano ʼo te ʼuluaki sēkulō ki te faʼahi ʼaia?
13 Neʼe palalau ia Paulo ki te ʼaoga ʼaē ke ʼi ai he kau fai faka mafola, ʼo ina fai te ʼu fehuʼi ʼe tonu ke fakakaukauʼi lelei e te kau kaugana takitokotahi ʼa Sehova. Neʼe fehuʼi fēnei e te ʼapositolo: “ ʼE nātou fetapā feafeaʼi anai kia ia ʼaē ʼe mole nātou tui ki ai? Pea ʼe nātou tui feafeaʼi anai kia ia ʼaē ʼe mole heʼeki nātou logo ki he talanoa ʼo ʼuhiga mo ia? Pea ʼe nātou logo feafeaʼi anai, mo kapau ʼe mole he tahi ʼe fai faka mafola? Pea ʼe nātou fai faka mafola feafeaʼi anai, mo kapau ʼe mole fekauʼi nātou?” (Loma 10:14, 15) ʼE foaki e te ʼu fakamatala ʼo te Lotu Faka Kilisitiano ʼo te ʼuluaki sēkulō he fakamoʼoni, ʼo ʼuhiga mo te ʼu tagata mo te ʼu fafine, tūpulaga pea mo matutuʼa, neʼe nātou mulimuli ki te faʼifaʼitaki ʼaē neʼe tuku e Kilisito pea mo tana ʼu ʼapositolo. Neʼe nātou liliu ko he kau fai faka mafola faiva ʼo te logo lelei. Ohage ko Sesu, neʼe nātou faka mafola ki te hahaʼi ʼi te ʼu potu fuli ʼaē neʼe feala ke nātou maʼu ai ia nātou. ʼI tanatou loto ʼaē ke mole galoʼi he tahi, neʼe nātou fakahoko tanatou minisitelio ʼi te ʼu koga meʼa ʼaē neʼe hahaʼi ai pea mo nātou feʼoloʼaki ʼi te ʼu ʼapi.—Gāue 17:17; 20:20.
14. Neʼe hoko feafeaʼi te ʼui ʼaē ʼe ‘matalelei te ʼu vaʼe’ ʼo nātou ʼaē ʼe nātou tala te logo lelei?
14 ʼE mahino ia, neʼe mole ko te hahaʼi fuli ʼaē neʼe nātou tali lelei ia te kau fai faka mafola Kilisitiano. Kae ko te ʼu palalau ʼaē ʼe tuʼu ia Isaia 52:7 ʼaē neʼe fakaʼaogaʼi e Paulo, neʼe hoko moʼoni. ʼI tana ʼosi fai te fehuʼi ʼaenī ‘ ʼE nātou fai faka mafola feafeaʼi anai mo kapau ʼe mole fekauʼi he tahi?’ neʼe ina toe ʼui fēnei: “Ohage ko tona tohi: ‘ ʼE matalelei te ʼu vaʼe ʼo nātou ʼaē ʼe nātou tala te logo lelei ʼo te ʼu meʼa ʼaē ʼe lelei!” Tokolahi ia tatou ʼe mole tou manatu ʼe matalelei totatou ʼu vaʼe. Kae koteā koa te faka ʼuhiga ʼo te vaega ʼaia? ʼI te agamāhani, ʼe ko te ʼu vaʼe ʼaē ʼe nātou faka fealagia ki he tahi ke haʼele mokā ʼe ʼalu ʼo fai faka mafola ki te hahaʼi. ʼI tona ʼuhiga moʼoni, ko te ʼu vaʼe ʼaia ʼe nātou fakatā ia kita totonu. Pea ʼe feala ke tou tui papau, ko te tokolahi ʼo nātou ʼaē neʼe nātou fagono ki te logo lelei mai te ʼu ʼapositolo pea mo te ʼu tisipulo ʼa Sesu Kilisito ʼo te ʼuluaki sēkulō, neʼe ko he meʼa matalelei kia nātou tanatou sisio ki te kau ʼuluaki Kilisitiano ʼaia. (Gāue 16:13-15) Ko te meʼa ʼaē neʼe maʼuhiga tāfito, neʼe nātou maʼuhiga kia mata ʼo te ʼAtua.
15, 16. (a) Neʼe fakahā feafeaʼi e te kau ʼuluaki Kilisitiano neʼe ko he kau ʼave logo moʼoni ʼo te tokalelei? (b) Koteā ʼaē ʼe feala ke tokoni mai kia tatou ke tou fakahoko totatou minisitelio ohage ko tona fai e te kau Kilisitiano ʼo te ʼuluaki sēkulō?
15 Neʼe maʼu e te kau tisipulo ʼa Sesu te logo ʼo ʼuhiga mo te tokalelei, pea neʼe nātou fakahā te logo ʼaia ʼi te tokalelei. Neʼe foaki e Sesu ki tana ʼu tisipulo te ʼu fakatotonu ʼaenī: “ ʼI he loto fale pe ʼe koutou hū kiai, koutou ʼui age muʼa, ‘Ke haʼu te tokalelei ki te ʼapi ʼaenī.’ Pea kapau ʼe ʼi ai he kaumeʼa ʼo te tokalelei, ko takotou tokalelei ʼe hili anai kia te ia. Kaʼe kapau ʼe mole ʼi ai, pea ʼe toe liliu atu anai kia koutou.” (Luka 10:5, 6) Ko te kupu Sha·lohmʹ, peʼe “tokalelei,” ʼe ko te fefakamāloʼaki māhani ʼaia ʼa te kau Sutea. Kae neʼe faka ʼuhiga lahi age te ʼu fakatotonu ʼa Sesu ʼi te meʼa ʼaia. ʼI tonatou ʼuhiga “kau fakafofoga moʼo fetogi ʼo Sesu,” neʼe fakaloto mālohiʼi fēnei te hahaʼi e tana kau tisipulo ʼaē neʼe fakanofo: “Koutou fakatokatoka mo te ʼAtua.” (2 Kolonito 5:20) ʼO mulimuli ki te ʼu fakatotonu ʼa Sesu, neʼe nātou palalau ki te hahaʼi ʼo ʼuhiga mo te Puleʼaga ʼa te ʼAtua, pea mo te faka ʼuhiga ʼo te Puleʼaga ʼaia kia nātou takitokotahi. Ko nātou ʼaē neʼe nātou fakalogo kiai, neʼe nātou maʼu te ʼu tapuakina; kae kia nātou ʼaē neʼe nātou fakafisi ki te logo neʼe mole nātou maʼu te ʼu tapuakina ʼaia.
16 ʼE toe feiā te fakahoko e te kau Fakamoʼoni ʼa Sehova tanatou minisitelio ia ʼaho nei. Ko te logo lelei ʼaē ʼe nātou fakahā ki te hahaʼi ʼe mole ko he logo ʼa nātou totonu; kae ʼe ko te logo ʼo Ia ʼaē neʼe ina fekauʼi nātou. Ko tanatou gāue ʼe ko te fakahā ʼo te logo ʼaia. Kapau ʼe tali e te hahaʼi, pea ʼe feala ke nātou maʼu ai te ʼu tapuakina fakatalakitupua. Kae kapau ʼe nātou fakafisi kiai, pea ʼe mole nātou fia tokalelei mo Sehova ʼAtua pea mo tona ʼAlo, ia Sesu Kilisito.—Luka 10:16.
ʼE Nātou Maʼuli ʼi Te Tokalelei ʼi He Mālama ʼe Maveuveu
17. Tatau aipe peʼe tou felāveʼi mo he hahaʼi agakovi, ʼe tonu ke feafeaʼi tatatou aga, pea koteā tona tupuʼaga?
17 Tatau aipe pe koteā te aga ʼa te hahaʼi, ʼe maʼuhiga ki te kau kaugana ʼa Sehova ke nātou manatuʼi ko nātou ko te kau ʼave logo ʼo te tokalelei fakaʼatua. ʼE lagi fakalaga kē te hahaʼi ʼo te mālama, pea mo nātou fakahā tanatou ʼita ʼo nātou fai he ʼu palalau lave kona, peʼe nātou munaʼi ia nātou ʼaē ʼe nātou ʼiʼita ki ai. Lagi ko ʼihi ia tatou neʼe tou fai te ʼu aga ʼaia ʼi muʼa atu. Kae, kapau kua tou kofuʼi te ʼuhiga tagata foʼou pea ʼe mole kei tou kau ʼi te temi nei ki te mālama, ʼe mole tou faʼifaʼitakiʼi anai tanatou ʼu aga. (Efesi 4:23, 24, 31; Sake 1:19, 20) Tatau aipe peʼe feafeaʼi anai te aga ʼa te hahaʼi, ʼe tou mulimuli pe anai ki te tokoni ʼaenī: “Kapau ko he meʼa ʼe feala, tāfito mo kapau ko he meʼa ʼe fakalogo kia koutou, koutou maʼuli ʼi te tokalelei mo te tagata fuape.”—Loma 12:18.
18. ʼE feafeaʼi anai tatatou aga mokā ʼe agakovi te ʼu hahaʼi ʼo te puleʼaga kia tatou, pea koteā tona tupuʼaga?
18 ʼI ʼihi temi, ʼe feala ke ʼave tatou ki muʼa ʼo te ʼu hahaʼi ʼo te ʼu puleʼaga ʼuhi ko tatatou minisitelio. ʼAki tonatou tuʼulaga ʼaia, ʼe lagi nātou ‘fehuʼi mai’ anai kia tatou pe koʼe ʼe tou fai ʼihi meʼa, pea mo te tupuʼaga ʼaē ʼo tatatou mole fakahoko ʼihi ʼu gāue. ʼE lagi ʼe nātou fia ʼiloʼi pe koʼe ʼe tou faka mafola te logo ʼaē ʼe tou tala—ko te logo ʼe ina fakahā te lotu hala, pea mo te logo ʼaē ʼe ina tala te fakaʼosi ʼo te tuʼu ʼo te ʼu faʼahiga meʼa ʼaenī. Ko tatatou fakaʼapaʼapa ki te faʼifaʼitaki ʼaē neʼe tuku mai e Kilisito, ʼe ina uga anai tatou ke tou fakahā he agamālū pea mo he fakaʼapaʼapa lahi. (1 Petelo 2:23; 3:15) Ko te meʼa ʼaē ʼe tautau hoko, ʼe uga te ʼu pule ʼaia e te Keletiate pe lagi uga nātou e tanatou ʼu hahaʼi takitaki. Ko he tali ʼe fai ʼaki he agamālū, ʼe lagi tokoni anai kia nātou ke nātou mahino ko tatatou gāue, ʼe mole fakatupu tuʼutāmaki kia nātou peʼe ki te tokalelei ʼo te hahaʼi ʼo te fenua. ʼE fakatupu e te taʼi tali ʼaia he fakaʼapaʼapa, mo he fetokoniʼaki, pea mo foaki te tokalelei kia nātou ʼaē ʼe nātou tali tatatou gāue.—Tito 3:1, 2.
19. Koteā te ʼu gāue ʼaē ʼe mole kau kiai te kau Fakamoʼoni ʼa Sehova?
19 ʼE ʼiloa te kau Fakamoʼoni ʼa Sehova ʼi te malamanei katoa ko he hahaʼi ʼe mole nātou kau ʼi te ʼu tau ʼo te malamanei. ʼE mole nātou pipiki ki te ʼu fihi ʼo te malamanei ʼo ʼuhiga mo te lanu, mo te lotu, peʼe ko te ʼu meʼa faka politike. (Soane 17:14) ʼE fakatotonu mai e te Folafola ʼa te ʼAtua ke tou “fakalogo ki te ʼu pule māʼoluga,” koia ʼe mole tou fakatuʼutuʼu anai ke tou kau ki he ʼu maveuveu moʼo fakafeagai ki te ʼu puleʼaga faka politike. (Loma 13:1) ʼE mole fakatahi te kau Fakamoʼoni ʼa Sehova mo he kūtuga ʼe fai puleʼaki ke ina fakatō he puleʼaga. ʼUhi ko te ʼu lekula ʼaē neʼe fakatuʼutuʼu e Sehova ki tana kau kaugana Kilisitiano, koia ʼe mole nātou kau ki he faʼahiga ligi toto pe ko he agamālohi. ʼE faka mafola e te kau Kilisitiano moʼoni te tokalelei moʼoni, pea ʼe nātou maʼuliʼi te meʼa ʼaē ʼe nātou faka mafola.
20. ʼO ʼuhiga mo te tokalelei, koteā te ʼu meʼa ʼaē kua ʼiloʼi ʼo ʼuhiga mo Papiloni Lahi?
20 ʼO mole tatau mo te kau Kilisitiano moʼoni, kua hā lelei ko nātou ʼaē ʼe nātou fakafofoga te ʼu kautahi faka lotu ʼo te Keletiate ʼe mole ko he kau ʼave logo ʼo te tokalelei. Ko te ʼu lotu ʼo Papiloni Lahi—ohage ko te ʼu ʼēkelesia ʼo te Keletiate pea mo te ʼu lotu ʼaē ʼe mole ko he ʼu lotu faka Kilisitiano—neʼe nātou faka lākatonuʼi, mo lagolago, pea mo nātou takitaki te ʼu tau ʼa te ʼu puleʼaga. Neʼe nātou fakaneke ke fakatagaʼi pea mo fakapogi te kau kaugana faitotonu ʼa Sehova. Koia, ʼo ʼuhiga mo Papiloni Lahi, neʼe tala fēnei e te Fakahā 18:24: “Iō ia neʼe maʼu ai te toto ʼo te kau polofeta pea mo te kau maʼoniʼoni pea mo nātou fuli ʼaē neʼe tāmateʼi ʼi te kele.”
21. Koteā te meʼa ʼaē ʼe fai e te tokolahi ʼo te hahaʼi ʼaē ʼe tui moʼoni, ʼi tanatou sio ki te kehekehe ʼo te aga ʼa te hahaʼi ʼa Sehova pea mo te aga ʼa te hahaʼi ʼaē ʼe tauhi ki te lotu hala?
21 ʼO mole tatau mo te ʼu lotu ʼo te Keletiate pea mo te tahi ʼu koga ʼo Papiloni Lahi, ko te lotu moʼoni ʼe ko he mālohi ʼe ina uga te hahaʼi ki te logo tahi. Neʼe ʼui fēnei e Sesu Kilisito ki tana kau tisipulo moʼoni: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe koutou femaʼuʼaki te ʼofa.” (Soane 13:35) Ko te ʼofa ʼaia ʼe fakalaka ia ʼi te ʼu meʼa ʼaē ʼe nātou fakakeheʼi te hahaʼi ʼi te faʼahi ʼo te fenua, mo te faʼahi faka sosiale, mo faka ekonomike, pea mo te ʼaluʼaga ʼo te lanu, ʼaē kua mavetevete ai te malamanei ʼi te temi nei. ʼI tanatou fakatokagaʼi te faʼahi ʼaia, ʼe ʼui fēnei e te lauʼi miliona hahaʼi ʼo te kele katoa ki te kau kaugana fakanofo ʼa Sehova: “ ʼE mātou ʼolo anai mo koutou, he neʼe mātou logo ko te ʼAtua ʼe nofo mo koutou.”—Sakalia 8:23.
22. E feafeaʼi tatatou faka ʼuhiga ia te gāue faka mafola ʼaē ʼe kei toe ke fai?
22 Mai tona ʼuhiga ʼaē ko tatou te hahaʼi ʼa Sehova, ʼe tou fiafia ʼaupito ʼi te gāue ʼaē kua tou fakahoko, kae mole heʼeki fakahoko katoa te gāue ʼaia. ʼI tana kua ʼosi to te pulapula pea mo gāueʼi tana gāueʼaga, ʼe mole mavae te tagata gāue kele. ʼE haga gāue, tāfito ʼi te temi ʼaē ʼe lahi ai te taʼukai. ʼI te temi taʼukai, ʼe ʼaoga ai he ʼu faiga mālohi pea mo haga fai tuʼumaʼu. Pea ʼi te temi nei, ʼe ʼi ai te taʼukai lahi ʼo te kau atolasio ʼa te ʼAtua moʼoni neʼe mole heʼeki hoko ki muʼa atu. ʼE ko he temi fakafiafia ʼaenī. (Isaia 9:3) ʼE moʼoni, ʼe tou felāveʼi mo te fakafeagai ʼa te hahaʼi pea mo tanatou mole fia logo. Ko tatou fuli ʼe lagi tou faiga ke tou tauʼi te ʼu mahaki kovi, mo he ʼu faigataʼaʼia ʼi te maʼuli faka famili, pe ko he ʼu fihifihia ʼi te faʼahi faka ekonomike. Kae ko te ʼofa kia Sehova ʼe ina uga tatou ke tou kātakiʼi. Ko te logo ʼaē neʼe foaki mai e te ʼAtua kia tatou, ʼe ko he meʼa ʼe tonu ke logo kiai te hahaʼi. ʼE ko he logo ʼo ʼuhiga mo te tokalelei. ʼI tona fakahagatonu, ʼe ko te logo ʼaē neʼe faka mafola e Sesu totonu, te logo lelei ʼo te Puleʼaga ʼo te ʼAtua.
Koteā Takotou Tali?
◻ Neʼe hoko feafeaʼi te vaega ʼo Isaia 52:7 ʼi te Iselaele ʼāfea?
◻ Neʼe fakamoʼoni feafeaʼi e Sesu ko ia te tagata ʼave logo lahi ʼo te tokalelei?
◻ Neʼe fakapipiki feafeaʼi e te ʼapositolo ko Paulo ia Isaia 52:7 mo te gāue ʼaē ʼe kau kiai te kau Kilisitiano?
◻ ʼI totatou temi, koteā ʼaē ʼe tonu ke tou fai ʼi totatou ʼuhiga kau ʼave logo ʼo te tokalelei?
[Paki ʼo te pasina 13]
Ohage ko Sesu, ko te kau Fakamoʼoni ʼa Sehova ʼe ko he kau ʼave logo ʼo te tokalelei fakaʼatua
[Paki ʼo te pasina 15]
ʼE tokalelei pe te kau Fakamoʼoni ʼa Sehova tatau aipe pe koteā te faʼahiga tali ʼa te hahaʼi ki te logo ʼo te Puleʼaga