Kotou Fefakamolemoleʼaki ʼAki Te Lotolelei

“Ke kotou fekatakiaki i okotou vahaa, pea . . . ke kotou fefakamolemoleaki.”—KOL. 3:13.

ʼE KOTOU TALI FEAFEAʼI ANAI?

He koʼē ʼe tonu ke tou loto fakamolemole gafua?

Ko te fakamatala fea ʼaē neʼe fakaʼaogaʼi e Sesu moʼo fakamahino mai ia te maʼuhiga ʼo te loto fakamolemole gafua?

Koteā te tapuakina ʼe tou maʼu anai mo kapau ʼe tou maʼu te loto fakamolemole gafua?

1, 2. He koʼē ʼe lelei ke tou vakaʼi tatatou loto fakamolemole ʼaē ki ʼihi?

ʼETOKONI mai te Tohi-Tapu ke tou ako te faʼahiga manatu ʼa Sehova ʼo ʼuhiga mo te agahala pea mo te meʼa ʼaē ʼe ina fai mokā tou agahala. Kae ʼe toe talanoa foki ki tona loto fakamolemole gafua. ʼI te ʼalatike ʼaē ki muʼa atu, neʼe tou vakaʼi ai te tupuʼaga ʼaē ʼo te fakamolemole ʼa Sehova kiā Tavite pea mo Manase. Neʼe nā lotomamahi moʼoni ʼo ʼuhiga mo te ʼu meʼa ʼaē neʼe nā fai, mo nā vete kiā Sehova pea mo nā fakapapau ʼe mole nā toe fai anai. Neʼe nā fakahemala moʼoni, koia neʼe lotolelei ai ia Sehova ke toe ʼofa kiā nāua.

² Tou talanoa leva ʼi te temi ʼaenī ʼo ʼuhiga mo tatatou loto fakamolemole ʼaē ki ʼihi. ʼE lave feafeaʼi anai kiā koutou mokanapaula neʼe mate hokotou kāiga ʼuhi ko te ʼu meʼa ʼaē neʼe fai e Manase? ʼE kotou fakamolemole anai koa kiā Manase? Iā ʼaho nei, ʼe tou māʼuʼuli ʼi te mālama ʼe agakovi, mo agamālohi pea mo tahi manatu pē kiā ia. He koʼē ʼe tonu ke tou ako te loto fakamolemole? Kapau ʼe gaohi koviʼi koe e he tahi, koteā ʼaē ʼe feala ke tokoni atu ke ke lolomi tou loto, mo ke fai te aga ʼaē ʼe loto kiai ia Sehova, pea mo ke maʼu te loto fakamolemole?

HE KO’Ē ʼE TONU KE TOU FAKAMOLEMOLE?

3-5. (1) Ko te fakamatala fea ʼaē neʼe fakaʼaogaʼi e Sesu moʼo fakamahino mai ia te maʼuhiga ʼo te loto fakamolemole gafua? (2) He koʼē ʼe ʼaoga ke tou mahino ki te ʼu palalau ʼa Sesu ʼaē ʼe tuʼu ia Mateo 18:21-35?

³ ʼE tonu ke tou loto lelei ʼo fakamolemole kiā nātou ʼaē neʼe agakovi mai, peʼe ko he tahi ʼo te kōkelekāsio faka Kilisitiano peʼe kailoa. ʼE tokoni anai te aga ʼaia kiā tātou ke tou taupau te tokalelei ʼi te fāmili, mo ʼotatou kaumeʼa, mo ʼihi atu hahaʼi pea mo Sehova. ʼE fakahā mai ʼi te Tohi-Tapu ʼe tonu ke tou fakamolemole tuʼumaʼu kiā nātou ʼaē neʼe agakovi mai. Neʼe fai e Sesu ia te fakamatala ʼo ʼuhiga mo te tagata faifekau neʼe lahi ʼaupitō tona maʼua paʼaga ki tona pule, pea ʼe tokoni mai te fakamatala ʼaia ke tou mahino ki te tupuʼaga ʼaē ʼe tonu ai ke tou fakamolemole.

⁴ Ko te lahi ʼo te maʼua paʼaga ʼo te tagata faifekau ki tona pule ʼe fakatatau kiā ʼaho gāue e 60 miliona. Neʼe ʼofa mamahi tona pule kiā ia pea neʼe ina molehi tona maʼua. Kae koteā leva ʼaē kā fai e te tagata faifekau ʼaia mo kapau ʼe hoko kiā ia he ʼaluʼaga fēia? Neʼe ʼi ai te tahi tagata faifekau neʼe tuʼu maʼua kiā ia. Ko te lahi ʼo tona maʼua paʼaga neʼe fakatatau kiā ʼaho gāue e 100. Neʼe mole ina molehi tona maʼua kae neʼe ina fakamalohiʼi ke ina huʼi age. Neʼe tuʼutuli leva ia te lua tagata faifekau ʼo kole mamahi age ke tuku age hona temi ke ina huʼi age tona maʼua, kae neʼe fakafisi te ʼuluaki tagata faifekau pea ina ʼave ki te pilisoni. Neʼe ʼita kovi ai te pule ʼaē neʼe ina fakamolemole ki te ʼuluaki tagata faifekau, ʼo ina ʼui age pe koʼē neʼe mole fakamolemole ki tona kaumeʼa. Koia, neʼe ʼave ai e te pule ia te ʼuluaki tagata faifekau ki te pilisoni ʼo kaku ki tana huʼi fuli tona maʼua paʼaga.—Mat. 18:21-34.

⁵ Koteā ʼaē neʼe fia fakahā mai e Sesu ʼaki te fakamatala ʼaia? Neʼe ina fakamahino mai ko Sehova ʼe mole lotolelei anai ʼo fakamolemole kiā tātou mo kapau ʼe mole tou fakamolemole ki ʼihi ʼaki he lotolelei. (Mat. 18:35) ʼE tou heʼe haohaoa pea mo tou agahala tuʼumaʼu. ʼE mole feala tuʼa tahi ke tou fakalogo lelei ʼosi kiā Sehova. Kae ʼe lotolelei pē ke ina fakamolemole mai. ʼE feala pē ke tou ʼui, ʼe ina tali lelei ke pulihi ʼatatou agahala ohagē pē neʼe mole tou fai. Koia, kapau ʼe tou loto ke tou kaumeʼa mo Sehova, pea ʼe tonu ke tou loto fakamolemole. ʼE ko te faʼahi lā ʼaia neʼe fia ʼui e Sesu ʼi tana Akonaki ʼi te Moʼuga: “Kapau e kotou fakamolemole ki te u tagata anatou agahala, e toe fakamolemole anai e takotou Tamai i selo kia koutou foki; kae kapau e mole kotou fakamolemole ki te u tagata, e mole fakamolemole anai e takotou Tamai akotou agahala kia koutou.”—Mat. 6:14, 15.

6. He koʼē ʼe mole faigafua tuʼumaʼu te fakamolemole?

⁶ ʼE lagi kotou tonu tahi ʼo ʼuhiga mo te maʼuhiga ʼaē ʼo te loto fakamolemole, kae ʼi ʼihi temi ʼe feala ke faigataʼa te fai ʼo te faʼahi ʼaia. Ohagē lā mokā lahi tokita lotomamahi ki he agakovi neʼe fai mai e he tahi kiā kita. ʼE kita ʼita anai, ʼo lagi kita fia ʼiloʼi papau pe kua fakatūʼā ia ia ʼo ʼuhiga mo te aga ʼaē neʼe ina fai mai, peʼe kita loto ke mamahi ohagē ko kita. ʼI te lahi ʼo tokita lotomamahi, ʼe lagi feala ke kita ʼui ʼe mole feala tuʼa tahi anai hakita fakamolemole ki ai. Kapau ʼe kita maʼu te taʼi loto ʼaia, koteā te meʼa ʼaē ʼe feala ke kita fai moʼo fakamolemole ki he tahi ʼaki te loto lelei, ohagē ko tona kole mai e Sehova?

TOU MAHINO KI TE ʼU MEʼA ʼAĒ ʼE TOU LOGOʼI KE TOU ʼILOʼI TE MEʼA ʼAĒ ʼE TONU KE TOU FAI

7, 8. Koteā ʼaē ʼe feala ke tokoni atu ke kotou fakamolemole gafua ki he tahi neʼe agakovi atu?

⁷ Kā gaohi koviʼi tātou peʼe tou manatu neʼe gaohi koviʼi tātou, ʼe feala ke tupu ai hotatou ʼita lahi. Neʼe fakamatala e te tūpulaga neʼe hake tona ʼita lahi, neʼe hū ki tuʼa ʼi tona ʼapi pea mo ina ʼui ʼe mole toe liliu mai anai. Neʼe ko te ʼaho lau lelei ʼo te temi vevela pea neʼe hifohifo ʼi te kiʼi ala. ʼI te koga meʼa matalelei mo lāvaki ʼaia, neʼe kamata malu leva tona ʼita. Ki muli age, neʼe liliu ki tona ʼapi mo fakahemala ki tana ʼita. Kapau ʼe kotou tuku he temi ke mālūlū ai tokotou ʼita ohagē ko tona fai e te tūpulaga ʼaenī, ʼe feala anai hakotou maʼu he fakakaukau lelei ʼo ʼuhiga mo te meʼa ʼaē neʼe hoko, ʼi hakotou fai he meʼa ʼe kotou fakahemala anai ki muli age.—Pes. 4:5; Taag. 14:29; Sakp. 1:19, 20.

⁸ Kae, ʼe feafeaʼi anai mo kapau ʼe mole mālūlū tokita ʼita ohagē ko te meʼa ʼaē neʼe fai e te tūpulaga? ʼE tonu leva ke kita vakaʼi pe koteā te tupuʼaga ʼo tokita ʼita. Neʼe tupu koa ʼuhi ko he ʼaluʼaga ʼe mole totonu? Peʼe ʼuhi ko he tahi neʼe mole aga fakaʼapaʼapa kiā kita? Pe neʼe ko he tahi neʼe ina fakatuʼutuʼu he meʼa ke lavea ai tokita loto? Neʼe kovi moʼoni koa te meʼa neʼe ina fai? Ko takotou faiga ʼaē ke kotou mahino ki te tupuʼaga ʼo takotou ʼita ʼe ina faka fealagia atu ke kotou maʼu ia te ʼu manatu faka Tohi-Tapu ʼaē ʼe tokoni atu ke fetogi tokotou loto. Pea ʼe feala anai ke kotou fai te aga ʼaē ʼe loto kiai ia Sehova. (Lau ia Taaga Lea 15:28; 17:27.) Kapau ʼe kotou fakakaukau lelei ʼo ʼuhiga mo te ʼu ʼaluʼaga ʼaē neʼe hoko kae mole kotou vakaʼi pe tokotou loto, ʼe feala ai ke kotou maʼu te loto fakamolemole. Tatau aipē peʼe faigataʼa ia te faʼahi ʼaia, ʼe feala ke tokoni atu te Tohi-Tapu ke kotou mahino ki te ʼu meʼa ʼaē ʼi tokotou loto ʼo ʼuhiga mo te ʼaluʼaga ʼaē neʼe hoko pea mo kotou faʼifaʼitaki ai ia te loto fakamolemole gafua ʼo Sehova.—Hep. 4:12.

ʼE TONU KOA KE KOTOU HOKO ʼITA?

9, 10. (1) Koteā te meʼa ʼe feala ke kotou fai mo kapau ʼe hake takotou ʼita? (2) Koteā ʼaē ʼe kotou logoʼi anai mo kapau ʼe kotou lolomi vave tokotou ʼita pea mo maʼu ia te loto fakamolemole gafua?

⁹ ʼE lahi te ʼu ʼaluʼaga ʼaē ʼe fakatupu ʼita ki he tahi. Ohagē lā, ʼe ke lolotoga taki motokā, pea ʼe haʼu te tahi motokā ʼo fakaʼī koe. Koteā anai kā ke fai? Tokolahi te hahaʼi, ʼi tanatou ʼiʼita ʼe natou ʼoho ki ʼaē neʼe ina fakaʼī tanatou motokā. Kae ʼi totatou ʼuhiga Kilisitiano, ʼe mole tou fia fai anai te faʼahi ʼaia.

¹⁰ ʼE lelei age takita fakakaukau muʼa ʼi hata hoko ʼoho. Heʼe lagi ko koe ʼaē neʼe tupu ai te fakaʼī, he neʼe ke tokaga ki he tahi meʼa. Pe neʼe ʼi ai he ʼu meʼa ʼe haʼele kovi pe neʼe maumau ʼi te motokā ʼaē. ʼE feala ke mālūlū tokita ʼita ʼi te hala ʼa ʼihi mo kapau ʼe tou faigaʼi ke tou mahino ki te meʼa ʼaē neʼe hoko, pea mo tou manatuʼi ʼe mole feala ke tou ʼiloʼi fuli ia te ʼu tupuʼaga ʼo te lakahala ʼaia, pea ʼe feala ai ke tou loto fakamolemole. Koia ʼe mole tonu ai ke tou hoko ʼita. ʼE ʼui fēnei ʼi te Ekelesiasi 7:9: “Aua naa ke ita vave i tou loto, koteuhi e nofo te ita i te fatafata o te kau vale.” ʼE tou tau ʼui, ko ʼihi ʼe natou fai pē te ʼu meʼa ʼaē ʼe tou loto mamahi ai. Kae ʼuhi ko tanatou heʼe haohaoa, ʼe feala ke tou mahino neʼe lagi faihala pe ia. Pe neʼe lagi mole tou ʼiloʼi te ʼu meʼa fuli ʼaē neʼe hoko. Koia, ʼe tonu ai ke tou manatuʼi ʼe mole feala ke tou ʼiloʼi te ʼu meʼa fuli ʼaē neʼe tupu ai tana fai te palalau peʼe ko te aga ʼaia. Kotou fakahā te ʼofa pea mo he loto fakamolemole gafua ki ai. ʼE kotou fiafia lahi anai mo kapau ʼe kotou fai ia te faʼahi ʼaia.—Lau ia 1 Petelo 4:8.

KE TOE LILIU ATU TAKOTOU TOKALELEI

11. Ko te aga fea ʼaē ʼe tonu ke tou haga taupau ʼi te minisitelio, tatau aipē pe neʼe tali leleiʼi tātou peʼe kailoa?

¹¹ ʼE feala ke tou tāʼofi feafeaʼi totatou loto mokā agapauʼu mai he tahi kiā tātou ʼi te minisitelio? ʼI te temi ʼaē neʼe fekauʼi ai e Sesu ia te toko 70 tisipulo ke natou ʼolo ʼo fai fakamafola, neʼe ina ʼui age kiā nātou ke natou tala fēnei ki te ʼu fāmili fuli ʼaē ʼe natou ʼolo kiai: “Ke hifo te tokalelei ki te fale aeni!” Neʼe ina toe hoko atu, kapau ʼe nofo ʼi ai he kaumeʼa ʼo te tokalelei, e hifo anai tanatou tokalelei kiā ia; kae kapau ʼe mole koia, pea e toe liliu age anai ia kiā nātou. (Luka 10:1, 5, 6) ʼE tou fiafia mokā tali leleiʼi e te hahaʼi ia te logo lelei ʼaē ʼe tou fakamafola, koteʼuhi ʼe natou maʼu ai te ʼu tapuakina. Kae ʼi ʼihi temi, ʼe mole natou tali leleiʼi ia tātou. Koteā te meʼa ʼe tonu ke tou fai? Neʼe ʼui e Sesu ʼe tonu ke tou taupau tuʼumaʼu te tokalelei. ʼE tonu ke tou lavaʼi te mavae mai te ʼu ʼapi ʼi te tokalelei, tatau aipē pe neʼe tali leleiʼi tātou peʼe kailoa. Kapau leva neʼe tou ʼita ʼuhi ko totatou tali koviʼi e he tahi, pea ʼe mole leva feala ke tou haga taupau ia te tokalelei ʼaē neʼe talanoa kiai ia Sesu.

12. ʼO mulimuli ki te ʼu palalau ʼaē ʼa Paulo ia Efeso 4:31, 32, ʼe tonu ke feafeaʼi ʼatatou aga?

¹² Kotou faiga ʼi te ʼu ʼaluʼaga fuli, ke kotou taupau te tokalelei, ʼo mole gata pē ʼi te minisitelio faka Kilisitiano. ʼE feala ke kotou fakamolemole ki ʼihi, kae ʼe mole fakaʼuhiga leva ʼe kotou tali tanatou aga ʼaē ʼe kovi peʼe kotou ʼui ʼe mole faʼa kovi fau. Kae ʼe fakaʼuhiga ia, ʼe mole tonu anai ke hoko atu takotou ʼita ʼuhi ko ʼanatou aga ʼaē ʼe kovi. ʼE tonu ke kotou faigaʼi tuʼumaʼu ke kotou taupau te tokalelei iā koutou. Ko ʼihi, ʼi tanatou manatu tuʼumaʼu ki te ʼu aga kovi ʼaē neʼe fai age kiā nātou, ʼe mole tokalelei tanatou fakakaukau. ʼAua naʼa kotou tuku te ʼita ke mālohi age iā koutou. ʼE mole feala ke kotou fiafia mo kapau ʼe kotou nonofo mo hokotou ʼita ki he tahi. Koia, ʼe tonu ai ke tou loto fakamolemole gafua.—Lau ia Efeso 4:31, 32.

TOU FAI TE AGA ʼAĒ ʼE LOTO KIAI IA SEHOVA

13. (1) ʼE tānaki feafeaʼi anai e he Kilisitiano “ni mamala kakaha” ki te fuga ʼulu ʼo tona fili? (2) Koteā te meʼa ʼe feala ke hoko mo kapau ʼe kotou agalelei ki he tahi neʼe aga kovi atu?

¹³ ʼE lagi feala pē ʼi ʼihi temi ke kotou fia ʼiʼita he neʼe aga kovi kiā koutou he tahi ʼe mole tauhi kiā Sehova. Kae ʼe feala ke kotou tokoni kiā ia ke fia logo ki te ʼu akonaki ʼa te Tohi-Tapu. Neʼe tohi fēnei e te ʼapositolo ko Paulo: “Kapau e fia kai tou fili, foaki kia ia he meakai; kapau e fia inu ia, foaki kia ia he meainu; koteuhi i tau fai te mea aia, e ke tanaki anai ni mamala kakaha ki tona fuga ulu. Ke aua naa ke tuku ke malo te kovi ia koe, kae ke ke malo i te kovi aki te lelei.” (Loma 12:20, 21) Kā kotou aga fakaʼapaʼapa ki he tahi māʼia mo ʼaē ʼe ʼita kiā koutou, ʼe feala ke kotou fetogi tana aga ʼo liliu ʼo agalelei. Kapau ʼe kotou lotomahino pea mo manavaʼofa ki he tahi neʼe aga kovi atu kiā koutou, ʼe feala ke fakatupu ʼi tona loto te fia ʼiloʼi ʼo te Tohi-Tapu. Tatau aipē pe koteā tana faʼahiga tali, kae ko takotou agamalū mo takotou agalelei ʼe ina uga anai ia ia ke ina fia ʼiloʼi pe koʼē ʼe kehe takotou aga.—1 Pet. 2:12; 3:16.

14. He koʼē ʼe tonu ke tou loto fakamolemole ki te hahaʼi, māʼia mo nātou ʼaē neʼe natou fai mai he meʼa ʼe kovi ʼaupitō?

¹⁴ ʼE ʼi ai ʼihi hahaʼi ʼe mole tonu anai ke tou fakatahi mo nātou, ohagē lā ko nātou ʼaē neʼe fakamavae ʼi te kōkelekāsio he neʼe natou fai te ʼu agahala mamafa pea neʼe mole natou fakahemala. Kapau neʼe kotou lotomamahi ʼuhi ko he tahi neʼe ina fai atu he agahala mamafa, ʼe lagi faigataʼa anai kiā koutou tona fakamolemole kiā ia. Tatau aipē pe kua fakahemala, kae ʼe lagi ʼe kei mamahi pē tokotou loto ʼuhi ko te meʼa ʼaē neʼe hoko. Kapau koia, ʼe tonu anai ke kotou kole kiā Sehova ke tokoni atu ke kotou maʼu te loto fakamolemole. ʼE maʼuhiga te faʼahi ʼaia, heʼe mole kotou ʼiloʼi te meʼa ʼaē ʼe manatu kiai peʼe ko te meʼa ʼaē ʼi tona loto. Kae ʼe ʼiloʼi ia e Sehova. ʼE ina ʼiloʼi te loto ʼo te hahaʼi takitokotahi pea ʼe faʼa kātaki ki te hahaʼi ʼaē ʼe agahala. (Pes. 7:10; Taag. 17:3) Ko te tupuʼaga lā ʼaia ʼo te ʼui mai ʼi te Tohi-Tapu ke ʼaua naʼa tou aga kovi ki ʼihi, māʼia mo nātou ʼaē neʼe natou fai mai he meʼa ʼe kovi. ʼE tohi fēnei: “Aua naa kotou totogi ki he tahi te kovi aki te kovi. Koutou kumi te mea e lelei ia mua o te u tagata fuli. Kapau e feala, pea e fakalogo kia koutou, ke kotou mauli i te tokalelei mo te u tagata fuli. Aua naa kotou taui koutou totonu, ofaaga, kae kotou tuku te ita ke fai, koteuhi e tuu i te Tohi: E ui e [Sehova]: A aku te lagavaka, a aku te totogi.” (Loma 12:17-19) ʼE mole feala ke tou ʼiloʼi te ʼu meʼa fuli ʼaē ʼe ʼiloʼi e Sehova, pea ʼe ʼui ʼi te Tohi-Tapu ke ʼaua naʼa tou fakamāuʼi he tahi. (Mat. 7:1, 2) Kae ʼe tou tui papau ʼe fakahoko anai e Sehova he fakamāu ʼe faitotonu.

15. Koteā ʼaē ʼe feala ke tokoni mai kiā tātou ke mālūlū totatou ʼita ki he tahi neʼe ina fai mai he meʼa ʼe kovi?

¹⁵ Kapau ʼe mata faigataʼa kiā koutou te fakamolemole ki he tahi neʼe ina fai atu he meʼa ʼe kovi, ʼe feala ke tokoni atu kiā koutou takotou manatuʼi ʼaē ʼe toe tau ia mo he ʼaluʼaga ʼe faigataʼa ʼaupitō. Ohagē pē ko tātou, neʼe tupu heʼe haohaoa mo ia. (Loma 3:23) ʼE lotomamahi ia Sehova ʼo ʼuhiga mo te hahaʼi fuli ʼuhi ko tanatou heʼe haohaoa. Koia ʼe tonu ai ke tou faikole maʼa ia ʼaē neʼe ina fakamamahiʼi kita. Kā tou faikole maʼa he tahi, pea ʼe mālūlū ai totatou ʼita kiā ia. Neʼe fakamahino lelei mai e Sesu, ʼe mole tonu ke tou nonofo mo totatou ʼita ki he tahi, māʼia mo ʼaē neʼe ina fai mai he meʼa ʼe kovi. Neʼe ina ʼui fēnei: “Kotou ofa ki okotou fili, . . . pea koutou hufaki natou ae e agakovi mai kia koutou pea mo fakatagai koutou.”—Mat. 5:44.

16, 17. ʼE tonu ke kotou tali feafeaʼi he tonu ʼe fai e te kau tagata ʼāfea Kilisitiano ʼo ʼuhiga mo he tahi ʼe natou ʼiloʼi papau ʼe fakahemala moʼoni? Koteā tona tupuʼaga?

¹⁶ Neʼe foaki e Sehova ki te kau tagata ʼāfea Kilisitiano te maʼua ʼaē ke natou vakaʼi he tahi neʼe agahala mamafa peʼe fakahemala moʼoni peʼe kailoa. Ko te ʼu tehina ʼaia, ʼe mole natou ʼiloʼi te ʼu meʼa fuli ʼaē ʼe ʼiloʼi e Sehova ʼo ʼuhiga mo te ʼu ʼaluʼaga ʼaia. Kae ʼe natou faigaʼi ke natou fai ʼaki te tokoni ʼa te laumālie māʼoniʼoni ia he tonu ʼe fakatafito ki te Tohi-Tapu. Koia kā natou faikole kiā Sehova ke tokoni mai kiā nātou ki te kumi ʼaē ʼo he tonu, ʼe feala ke tou tui papau ko te tonu ʼaia kā natou fai ʼe ʼalutahi mo te manatu ʼa Sehova.—Mat. 18:18.

¹⁷ ʼI he ʼaluʼaga fēia, ʼe tonu ke tou agatonu mo tātou. ʼE tonu ke tou falala ki te faʼahiga fakatokatoka ʼaē ʼo te faʼahi ʼaia e Sehova pea mo tou tali te tonu ʼaē kā fai anai e te kau tagata ʼāfea. Kā kua ʼiloʼi papau pea mo tonu e te kau tagata ʼāfea ko he tahi ʼe fakahemala moʼoni ki tana agahala, ʼe ke fakamolemole anai koa kiā ia mo ke fakahā ʼe kei ke ʼofa pē ia ia? (2 Ko. 2:5-8) ʼE lagi mole faigafua anai, tāfito lā mo kapau neʼe kovi te meʼa ʼaē neʼe ina fai kiā koe peʼe ko he tahi ʼo tou fāmili. Kae kapau ʼe ke falala kiā Sehova pea mo tana faʼahiga fakatokatoka te ʼu faigataʼaʼia ʼaē ʼi te kōkelekāsio, pea ʼe ke fai ai he meʼa ʼe lelei. ʼE ke fakahā ai ʼe ke maʼu te loto fakamolemole gafua.—Taag. 3:5, 6.

18. Koteā te tapuakina ʼe kotou maʼu anai mo kapau ʼe kotou loto fakamolemole gafua?

¹⁸ ʼE lahi anai te ʼu tapuakina ʼe tou maʼu mokā ʼe tou loto fakamolemole gafua. ʼE tokoni mai foki ke tou maʼu he loto ʼe lelei ʼuhi ko tatatou tuku ʼaē ke pulinoa totatou ʼita pea mo totatou lotomamahi. Pea ʼe toe tokoni mai foki ke tou maʼu he ʼu felōgoi ʼe lelei age mo te hahaʼi. Kae kapau ʼe mole tou maʼu te loto fakamolemole gafua, pea ʼe feala pē ke fakatupu mahaki pea mo loto hoha kiā tātou, ʼo faigataʼa ai hatatou felōgoi lelei mo te hahaʼi. Kae, ko te tapuakina ʼaē ʼe maʼuhiga age ʼo te loto fakamolemole gafua ʼe ko tatatou maʼu anai he felōgoi lelei mo tatatou Tamai ʼaē ʼe ʼi Selō, ia Sehova.—Lau ia Kolose 3:12-14.

[Paki ʼo te pāsina 29]

He koʼē neʼe talanoa ia Sesu ki te hisitolia ʼo te tagata faifekau pea mo tona Pule?

[Paki ʼo te pāsina 32]

Tou manatuʼi ʼe fakamaʼua ki te kau Kilisitiano moʼoni ke natou maʼu te loto fakamolemole gafua