Neʼe Fakaha e He Tagata Samalitana Te ʼOfa Moʼoni

ʼI te kei nofo ʼa Sesu ʼi te ʼu tafaʼaki ʼo Selusalemi, neʼe ʼomai kia te ia he kau Sutea mo ʼanatou manatu kehekehe. Neʼe loto ʼihi ke ina akoʼi natou kaʼe neʼe kumi e ʼihi ke natou ʼahiʼahiʼi ia ia. Ko te tahi ia natou neʼe poto ʼi te Lao pea neʼe ina fai age ki ai te fehuʼi ʼaeni: “ ʼAliki, kotea ʼae ʼe tonu ke au fai ke au maʼu ai te maʼuli heʼe gata?”—Luka 10:25.

Kaʼe neʼe tokagaʼi e Sesu neʼe mole fia iloʼi moʼoni e te tagata te tali ʼo tana fehuʼi. Neʼe lagi faiga ke fai age e Sesu he tali ʼe iita ai anai te kau Sutea. Neʼe iloʼi e Sesu neʼe kua nofo te tagata ʼaia mo tana ia manatu. Koia neʼe fakapotopoto te tali ʼae neʼe fai e Sesu, he neʼe fakaha ai e te tagata pe neʼe kotea tana manatu.

Neʼe fehuʼi fenei age e Sesu: “Kotea ʼae ʼe tohi ʼi te Lao? Kotea ʼae ʼe ke lau ʼi ai?” Neʼe ako e te tagata ia te Lao ʼa te ʼAtua, koia neʼe ina fakaʼaogaʼi te ʼu manatu ʼae neʼe tuʼu ʼi ai moʼo tali kia ia. Neʼe ina fakaʼaogaʼi te ʼu manatu ʼo Tetelonome 6:5 pea mo Levitiko 19:18, ʼo ina ui fenei: “ ‘ ʼE tonu ke ke ʼofa kia Sehova tou ʼAtua, ʼaki tou loto katoa, mo tou maʼuli katoa pea mo tou ʼatamai katoa’ pea ‘ke ke ʼofa ki tou tatau ohage pe ko koe totonu.’ ” (Luka 10:26, 27) Neʼe tonu koa tana tali?

Neʼe ui fenei e Sesu ki te tagata: “ ʼE tonu tau tali. Ke ke haga fai te meʼa ʼaia pea ʼe ke maʼu anai te maʼuli.” Kaʼe neʼe gata ai koa tanā faipalalau? Kailoa, he neʼe mole leleiʼia e te tagata te tali ʼae neʼe fai age e Sesu. Neʼe ina “fia fakaha tona faitotonu,” ke fakamoʼoni age e Sesu ʼe lelei ʼana manatu ʼo feia mo tana aga ki te hahaʼi. Koia, neʼe ina fehuʼi fenei age: “Ko ai moʼoni koa toku tatau?” (Luka 10:28, 29) ʼE lagi matafaigafua te fehuʼi ʼaia kaʼe ʼe maʼuhiga te ʼu ako ʼae ʼe feala ke tou taʼofi mai tona tali. ʼO feafeaʼi?

Maʼa te kau Sutea, ko te kupu “tatau” neʼe fakaʼuhiga pe kia natou ʼae neʼe natou mulimuli ki te ʼu talatisio Fakasutea, pea neʼe hage neʼe lagolago te vaega ʼo Levitiko 19:18 ki te manatu ʼaia. ʼI tona fakahagatonu, neʼe toe feala pe la ki he Sutea ke ina ui “ ʼe mole gafua ʼi te Lao” ke fakatahi mo he tahi ʼe mole Sutea. (Gaue 10:28) Koia, ko te tagata ʼaia pea lagi mo ʼihi ʼi te ʼu tisipulo ʼa Sesu, neʼe natou manatu ʼe natou faitotonu mo kapau ʼe natou agalelei kia natou pe ʼae neʼe Sutea. Kaʼe kapau neʼe mole natou agalelei ki he tahi neʼe mole ko he Sutea, pea neʼe mole kovi ia koteʼuhi neʼe mole ko ia tonatou “tatau.”

Neʼe lava fakatonutonuʼi feafeaʼi e Sesu te manatu ʼaia kaʼe mole ita ai te tagata pea mo te tahi age kau Sutea? Neʼe ina fakamatala te hisitolia ʼaeni: “Neʼe hifo ifo te tagata mai Selusalemi ki Seliko ʼo ʼohofi e te kau kaihaʼa. Neʼe natou kaihaʼa ia ia, mo ta, pea natou olo ai kaʼe tuku ia ia kua meihiʼi mate.” Neʼe hoko atu fenei e Sesu: “Neʼe to tonu mo te hifo mai ʼa he pelepitelo ʼi te ala ʼaia, kaʼe ʼi tana sio ki ai, neʼe fakalaka ia ki te tahi kauala. Neʼe toe feia mo te tagata Levite. ʼI tana tau mai ki te koga meʼa ʼaia, neʼe sio ki ai kaʼe neʼe fakalaka ia ki te tahi kauala. Kaʼe neʼe fagona mai leva te Samalitana ʼi te ala ʼaia, ʼo kaku mai ki ai pea ʼi tana sio ki te tagata, neʼe ʼofa mamahi ai.”—Luka 10:30-33.

ʼE mahino papau ia, ko te tagata ʼae neʼe fakamatala age ki ai e Sesu te hisitolia, neʼe ina iloʼi neʼe tokolahi te kau pelepitelo mo te kau Levite ʼae neʼe gaue ʼi te fale lotu, neʼe maʼuʼuli ʼi Seliko. ʼI tanatou mavae mai te fale lotu ʼo toe liliu kio natou, neʼe tonu ke natou haʼele ia kilometa ʼe 23. Neʼe feala ke hoko he ʼu tuʼutamaki ʼi te ala, he neʼe ʼi ai te kau kaihaʼa. Pea kapau neʼe maʼu atu e he pelepitelo pea mo he Levite ia he tagata Sutea neʼe hoko ki ai he tuʼutamaki, ʼe mahino ia ʼe nā tokoni anai ki ai. Kaʼe ʼi te hisitolia ʼa Sesu, neʼe mole nā tokoni ki te tagata Sutea. Neʼe ko he tagata Samalitana ia ʼae neʼe tokoni ki ai, logo la te fehiʼaʼinaʼi ʼo te kau Samalitana e te kau Sutea.—Soane 8:48.

Neʼe tokoni feafeaʼi te tagata Samalitana ki te tagata Sutea ʼae neʼe lavea? Neʼe ui fenei e Sesu: “Neʼe fakaovi age ki ai pea mo ina takaī lolo mo vino ʼona mataʼi lavea, pea ina haʼi. Neʼe ina fakaheka leva ki tana manu ʼo ʼave ia ia ki he fale tali fagona pea mo taupau ia ia. ʼI te ʼaho ake, neʼe ina toʼo leva tenalio ʼe lua ʼo ʼavage ki te pule ʼo te fale tali fagona pea mo ui fenei age: ‘Tokaga kia ia, pea ko te falā ʼae ka ke fakaʼaogaʼi maʼa ia, ʼe au liufaki atu anai moka au toe liliu mai.’ ”—Luka 10:34, 35.

ʼI tana ʼosi fakamatala ia te hisitolia, ko Sesu, te Tagata Faiako Lelei Tukupau, neʼe ina fai age ki te tagata te fehuʼi ʼaeni ke tupu ai hana fakakaukau: “Kia koe, ko ai ʼi te toko tolu ʼaeni neʼe ina fakaha ʼaki tana aga, ʼe ko ia te tatau ʼo te tagata ʼae neʼe gaohi koviʼi?” Lagi neʼe ufiufi te tagata ʼi tana tali age ko “te Samalitana,” koia neʼe ina tali fenei age: “Ko ia ʼae neʼe manavaʼofa kia ia.” Neʼe fakaha lelei leva e Sesu kia ia te ako ʼae neʼe feala ke ina taʼofi mai te hisitolia ʼaia, ʼi tana ui fenei: “Alu la pea ke fai feia mo koe.”—Luka 10:36, 37.

ʼE ko he faʼahiga fai ʼe lelei moʼo akoʼi te hahaʼi. Ka na pau la neʼe fakaha age pe e Sesu ki te tagata ʼe toe kau ki ʼona tatau te hahaʼi ʼae ʼe mole Sutea, ʼe tali anai koa e te tagata pea mo te tahi kau Sutea ia te manatu ʼaia? Kailoa ia. Kaʼe ʼaki te kiʼi fakamatala ʼae neʼe fai e Sesu kia natou pea mo tana talanoa ki he ʼu faʼahi neʼe natou malama ki ai, neʼe natou mahino gafua ai ki te tali ki te fehuʼi ʼaeni: “Ko ai moʼoni koa toku tatau?” Ko he tahi ʼe ina fakaha te ʼofa pea mo te agalelei ʼae ʼe fakatotonu mai ʼi te Tohi-Tapu ke tou fakaha, ʼe ko ia moʼoni totatou tatau.