Neʼe Nātou Fai Te Finegalo ʼo Sehova

Neʼe Filifili e Malia “Te Inasi e Leleiʼage”

ʼI TE temi ʼo Sesu, neʼe faka tuʼakoi e te ʼu talatisio ʼa te kau lapi te ʼāteaina ʼo te hahaʼi fafine. Koia neʼe ʼui age kia nātou ke mole nātou ako te Lao. Neʼe fakaʼaogaʼi ʼi te Mishna te ʼu palalau ʼaenī ʼa te tagata: “Kapau ʼe akoʼi e he tagata te Lao ki tona ʼofafine, pea ʼe hage pe neʼe ina akoʼi age ki ai ke aga heʼeʼaoga.”​—Sota 3:4.

Koia ʼi te ʼuluaki sēkulō ʼi Sutea ko te tokolahi ʼo te hahaʼi fafine neʼe mole faʼa lelei tanatou ako. ʼE ʼui fēnei e te tikisionalio The Anchor Bible Dictionary: “ ʼE mole ʼiloʼi pe neʼe fakagafua ki te hahaʼi fafine Sutea, ʼi muʼa ʼo te minisitelio ʼo Sesu, ke nātou liliu ko he ʼu tisipulo ʼo he tagata faiako lahi pea ke nātou kaugā fagona mo ia, pea ke nātou akoʼi he ʼu hahaʼi kae mole gata pe ki he ʼu tamaliki.” Moʼo fakalainoaʼi te hahaʼi fafine, neʼe fai e te kau takitaki lotu he lekula neʼe ina tapuʼi te palalau ʼa he tagata mo he fafine ʼi muʼa ʼo te hahaʼi!

Neʼe mole tokagaʼi e Sesu te ʼu aga heʼe faka lotu ʼaia. Neʼe ina akoʼi te hahaʼi fafine, ʼo feiā mo te hahaʼi tagata, pea neʼe ʼi ai tana ʼu tisipulo tagata pea mo tana ʼu tisipulo fafine. (Luka 8⁠:​1-3) ʼI te tahi lakaga, neʼe fakaafe Sesu kiō Maleta pea mo Malia. (Luka 10⁠:38) Ko te ʼu fafine ʼaia e lua neʼe ko te ʼu tokolua ʼa Lasalo, pea ko nātou toko tolu ʼaia neʼe ko he ʼu tisipulo fuli ʼa Sesu pea neʼe ko tona ʼu kaumeʼa lelei. (Soane 11⁠:⁠5) Neʼe lagi ko he famili maʼu tuʼulaga, he neʼe kaugamālie te hahaʼi ʼaē neʼe ʼōmai ʼo fakaloto fīmālieʼi ia Maleta mo Malia ʼi te mate ʼa Lasalo. Tatau aipe pe neʼe maʼu tuʼulaga te famili peʼe kailoa, kae ko te meʼa ʼaē neʼe hoko ʼi tonatou ʼapi ʼi te temi ʼaē neʼe nātou fakaafe ai Sesu, neʼe ko he ako maʼuhiga kia nātou ʼaia ʼo feiā mo tatou.

Neʼe Akoʼi Ia Ia ʼi Te ʼu Vaʼe ʼo Sesu

ʼE mahino papau ia, ko Maleta pea mo Malia neʼe nā fia fai he kaitahi lahi maʼa Sesu, pea neʼe lagi ko he meʼa faigafua kia nāua. (Vakaʼi ia Soane 12⁠:​1-3.) Kae ʼi te haʼu ʼa Sesu, neʼe ʼalu ai Malia ʼo “nofo ia tafa o te u vae o te Aliki o fakalogo tana folafola.” (Luka 10⁠:39) Neʼe mole feala ki he talatisio fakatagata ke ina tāʼofi Sesu ke ina akoʼi he fafine neʼe fia ako fakamalotoloto! Neʼe lagi nofo Malia ia muʼa ʼo Sesu, ohage ko he taʼahine ako ʼe fakalogo fakalelei ki te akonaki ʼo tona ʼAliki.​—Vakaʼi ia Teutalonome 33:3; Gaue 22:3.

Ko Maleta neʼe mole tatau mo Malia he “nee fe’hohaʼaki Maleta i te lahi o mea e gaohi.” Neʼe ina teuteuʼi te meʼa kai lahi, koia neʼe maʼumaʼua ai. Pea neʼe ʼita Maleta he neʼe gāue tokotahi kae nofo tona tēhina ʼi te ʼu vaʼe ʼo Sesu! Koia neʼe tuʼusi ai e Maleta te palalau ʼa Sesu kia Malia, pea lagi ʼui fakafefeka fēnei: “Aliki, pe e ke leleiʼia pe toku tuku e toku kiʼi tehina ke au faifekau tokotahi? Leaʼage ki ai ke tokoni mai kia te au.”​—Luka 10:40.

ʼE moʼoni neʼe mole kovi te meʼa ʼaē neʼe kole e Maleta. Ko te teuteuʼi ʼo he kaitahi ʼe ko te toe gāue kinakina, pea ʼe mole tonu ke fai pe e he tokotahi. Kae ʼi tana fai te ʼu palalau ʼaia, neʼe fakaʼaogaʼi e Sesu te faigamālie ʼaia moʼo akoʼi age kia ia te meʼa maʼuhiga. Neʼe ina ʼui fēnei: “Maleta, Maleta, e lahi ia mea e ke kinakina mo hoha ki ai. Kae ko te mea e tahi e aoga, nee filifili e Malia te inasi e leleiʼage, pea e mole too anai maia te ia.”​—Luka 10:41, 42.

Neʼe mole ʼui e Sesu neʼe mole leleiʼia e Maleta te ʼu meʼa fakalaumālie. Kailoa, he neʼe ina ʼiloʼi ʼe ko he fafine ʼe tauhi lelei ki te ʼAtua.a Pea ʼe lagi ko te tupuʼaga ʼaia ʼo tana fakaafe ia ia ki tona ʼapi. Kae ʼaki te tokoni agamālū ʼaia, neʼe fakatokagaʼi e Sesu kia Maleta, ʼuhi ko tana hoha fau ki te meʼa kai, neʼe hala ai ʼi te faigamālie ʼaē ke akoʼi ia ia e te ʼAlo ʼo te ʼAtua.

ʼE moʼoni, ʼaki te agaʼi fenua ʼo te temi ʼaia neʼe lagi manatu e te hahaʼi, ʼe fakafuafua te maʼuhiga ʼo he fafine ʼi tana poto ʼi te ʼu gāue ʼo te loto fale. Kae neʼe hā ʼi te ʼu palalau ʼa Sesu neʼe feala ki te hahaʼi fafine pea mo te hahaʼi tagata ke nātou nonofo ia vaʼe ʼo te ʼAlo ʼo te ʼAtua, pea ke nātou logo ki te ʼu folafola ʼo te maʼuli! (Soane 4:​7-​15; Gaue 5:​14) Koia neʼe lelei age mo kapau neʼe mole lahi te meʼa kai ʼaē neʼe fai e Maleta, tatau aipe pe ko he meʼa kai veliveli. He kanaʼauala neʼe feala kia ia ke nofo ʼi te ʼu vaʼe ʼo te ʼAliki pea ke ina fakalogo ki tana fai akonaki.​—Vakaʼi ia Mateo 6:​25.

Te Ako Maʼa Tatou

Ia ʼaho nei, ko te hahaʼi tagata pea mo te hahaʼi fafine ʼe nātou tali te fakaafe ʼa Sesu ke nātou “too noa te vai mauli.” (Apokalipesi 22:17) Ko te ʼofa ʼe ina uga ʼihi, ohage ko Maleta, ke nātou tauhi tonatou ʼu tēhina Kilisitiano. ʼE nātou fai te ʼu meʼa ʼe ʼaoga, mo nātou gāue fakavilivili, pea ʼe fakapapauʼi age e Sehova ʼe ina fakapale anai tanatou ʼu gāue ʼofa. (Hepeleo 6:​10; 13:16) Kae ko ʼihi ʼe nātou hoko kia Malia. ʼE mole ko he ʼu hahaʼi ʼe nātou lotohoha pea ʼe nātou leleiʼia te metitasio. Ko tanatou metitasioʼi tuʼumaʼu te Folafola ʼa te ʼAtua ʼe tokoni kia nātou ke nātou nofo mālohi ʼi te tui.​—Efeso 3:​17-​19.

ʼE ʼaoga te ʼu faʼahiga hahaʼi ʼaia e lua ki te kokelekasio faka Kilisitiano. Kae ʼe tonu kia tatou fuli ke tou ‘filifili te inasi ae e leleiʼage,’ ʼo tou fakamuʼamuʼa te ʼu meʼa fakalaumālie. Kapau ʼe tou ʼiloʼi te ʼu meʼa ʼaē ʼe maʼuhiga tāfito, pea ʼe tou maʼu anai te ʼofa pea mo te tapuakina ʼa Sehova.​—Filipe 1:​9-​11.

[Nota ʼi te lalo pasina]