ʼE Koutou ‘Maʼu Koloā Koa Ki Te ʼAtua’?
ʼI TE ʼu tuʼuga lea fakatātā ʼa Sesu Kilisito ʼaē ʼe ina uga te fakakaukau, ʼe ʼi ai te lea fakatātā ʼo ʼuhiga mo te tagata maʼu koloā ʼe lahi tona ʼu kele. ʼI tana faiga ʼaē ke ina maʼu he ka haʼu fīmālie, ko te tagata maʼu kele ʼaia neʼe ina fakatuʼutuʼu ke ina laga he tahi ʼu faleoko ʼe lalahi age. Kae ʼi te lea fakatātā ʼa Sesu, ʼe ʼui ʼo ʼuhiga mo te tagata ʼaia ʼe ko he “tagata vale.” (Luka 12:16-21, MN ) He koʼe neʼe fai ia te ʼu palalau fefeka ʼaia?
ʼE hā mai ko te tagata maʼu koloā ʼaia neʼe ina fai he ʼu fakatuʼutuʼu kae neʼe mole manatu ia ki te ʼAtua; pea neʼe mole loto fakafetaʼi pe la ki te ʼAtua ʼo ʼuhiga mo te maʼuli lelei ʼo tona kele. (Mateo 5:45) Neʼe laupisi ia, ʼo ina ʼui fēnei: “Toku nefesi, ʼe lahi ʼaupito tau ʼu meʼa lelei kua tāʼofi ki he ʼu taʼu e lahi; mālōlō koe, kai, ʼinu, pea mo ke fakafiafia.” Ei, neʼe manatu ia ko te ʼu lelei ʼaē neʼe faiga kiai ʼe hage anai ko “he kaupā [ʼe ina] puipui” ia ia.—Tāʼaga Lea 18:11.
Neʼe fai e te tisipulo ko Sakopo ia te fakatokaga ʼo ʼuhiga mo te fialahi ʼaia, ʼo ina tohi fēnei: “Pea kiā koutou ʼaē ʼe koutou ʼui fēnei: ‘ ʼI te ʼaho nei peʼe ko ʼapogipogi ʼe mātou ʼolo anai ki te kolo ʼaenī, ʼe mātou nonofo ai anai ʼi te taʼu kātoa, pea ʼe mātou fai koloā anai pea mo fakatupu anai tamatou ʼu koloā,’ kae ʼe mole koutou ʼiloʼi peʼe feafeaʼi anai tokotou maʼuli ʼapogipogi. Heʼe koutou hage ko te hahau ʼo te uhu ʼaē ʼe hā ʼi he kiʼi temi siʼi pe pea pulinoa leva.”—Sakopo 4:13, 14, MN.
Neʼe hoko te ʼu palalau ʼaia ki te tagata maʼu koloā ʼo te lea fakatātā ʼa Sesu, he neʼe ʼui fēnei kiā ia: “Tagata vale, ʼi te po pe ʼaenī ʼe kumi atu anai kiā te koe tou nefesi. Pea ko te ʼu meʼa ʼaē neʼe ke tānaki, ko ai anai ka ina maʼu?” Ohage ko te hahau ʼaē ʼe liliu ʼo moamoa, ko te tagata maʼu koloā neʼe mate kae neʼe heʼeki sio ki te hoko ʼo tana ʼu fakatuʼutuʼu. ʼE koutou mahino koa ki te ako ʼaē ʼe feala ke tou tāʼofi? Neʼe ʼui fēnei e Sesu: “ ʼE feiā anai ki te tagata ʼaē ʼe ina tānaki he ʼu koloā maʼa ia totonu, kae ʼe mole maʼu koloā ki te ʼAtua.” ʼE koutou “maʼu koloā [koa] ki te ʼAtua”?