Te Matalelei ʼe Mole Puli

“MATALELEI pulinoa; matalelei kua ʼosi tona temi”, ko te palalau ʼaia ʼa te tagata lea fakatuketuke ko Walter De la Mare. E lagi ko te meʼa ʼaia ʼe faka ʼuhiga ki te fisiʼi teu matalelei ʼo te cactus ʼe tuʼu ʼi te paki. Ko tonatou kolōlia ʼe puli fakavilivili.

Neʼe tohi fēnei e te tisipulo ko Sake: “Ohage ko he fisiʼi teu ʼi he mohuku ko ia [te tagata maʼu koloā] ʼe pulinoa anai ia. ʼI te hopo ʼo te laʼā ʼo vevela lahi pea mo magemage ai te mohuku, pea neʼe maluku ai tona fisiʼi teu pea ko tona agaaga matalelei kua pulinoa ia. ʼO tatau aipe foki mo te tagata maʼu koloā ʼe pulihi anai ia ʼi tona faʼahiga maʼuli.” — Sake 1:10, 11.

ʼI te mālama ʼaenī ʼe mole haʼele lelei, ko te koloā ʼe feala ia ke puli fakapuna’maʼuli. Koia, ko te tagata maʼu koloā — ohage ko te hahaʼi fuli — ʼe ‘nounou tonatou maʼuli, ohage ko he fisiʼi teu’. (Sopo 14:1, 2.) Neʼe talanoa Sesu ki te lea fakatā ʼo te tagata neʼe maʼumaʼua ʼo tatānaki tona koloā ke feala ai hana mālōlō pea mo fakafiafia ʼi tona maʼuli. Kae ʼi te temi ʼaē neʼe ina ʼui ai kua ina maʼu ia meʼa fuli ʼe ʼaoga ki te maʼuli fakafiafia, neʼe mate leva ia. Neʼe fakatokaga age e Sesu: “E feiā anai ki te tagata ʼaē ʼe ina tatānaki tona ʼu koloā maʼa ia kae ʼe mole maʼu koloā ia ki te ʼAtua.” — Luka 12:16-21.

“Maʼu koloā ia ki te ʼAtua.” Koteā koa te ʼuhiga ʼo te talanoa ʼaia ʼa Sesu? Ko he tagata maʼu koloā feiā ʼe ina maʼu te “ ʼu koloā ʼi selo” — he higoa lelei ia muʼa ʼo te ʼAtua. Ko te taʼi koloā ʼaoga ʼaia ʼe mole toe puli ia (Mateo 6:20; Hepeleo 6:10). ʼO mole tatau mo he fisiʼi teu ʼe fefe, ko te taʼi tagata ʼaia ʼe fakatatau e te Tohi-Tapu ki te fuʼu ʼakau, ʼaē ʼe mole moamoa tona ʼu lau. Pea, ʼe tou ʼiloʼi papau, “ko meʼa fuli ʼaē ʼe ina fai ʼe fua lelei anai ia”. — Pesalemo 1:1-3, 6.