Tagata Tauhi ʼApi Agatonu, Ke Ke Nofo Teuteu!

Neʼe fakamahino e Sesu ʼe ko he “kiʼi faga ovi” pe anai ʼae ka natou ulu ki te Puleʼaga ʼae ʼe ʼi selo. (Luka 12:32) Pea neʼe mole tonu ke meʼa noaʼi e he tahi tana maʼu ia te fakapale taulekaleka ʼaia. ʼI tona fakahagatonu, neʼe fakaha lelei e Sesu te maʼuhiga ʼae ke maʼu e he tahi te aga ʼae ʼe lelei ke feala hana kau ki te Puleʼaga.

Koia, neʼe tokoniʼi e Sesu ʼana tisipulo ke natou nonofo teuteu ki tana toe liliu mai. Neʼe ina ui fenei: “Ke kotou nonofo teuteu pea mo fakamu ʼokotou malama, pea ʼe tonu ke koutou hage ko he ʼu tagata ʼe natou fakaatalitali ki te liliu mai ʼo tonatou pule mai he faiʼohoana. Koia ka tau mai la pea mo tukituki te matapa, ʼe natou avahi atu aipe kia ia. Manuʼia te ʼu kaugana ʼaia neʼe nonofo ʼalaʼala ʼi te haʼu ʼo te pule!”—Luka 12:35-37.

Neʼe feala ke mahino gafua te ʼu tisipulo ʼo ʼuhiga mo te aga ʼae neʼe talanoa ki ai Sesu ʼi tana lea fakatata. Ko te ʼu kaugana ʼae neʼe talanoa ki ai neʼe natou teuteu, ʼo fakaatalitali ki te liliu mai ʼo tonatou pule. Neʼe fakamahino fenei e Sesu: “Manuʼia ia natou mo kapau ʼe haʼu [te pule] ʼi te poʼuli [te vaʼevaʼe hola 9 poʼuli ki te maʼupo], peʼe ʼi te ʼuʼua ʼa te moa [te maʼupo ki te vaʼevaʼe hola 3 mafoata], ʼo ina maʼu mai natou ʼe natou nonofo teuteu.”—Luka 12:38.

Neʼe mole ko he tokoni pe neʼe fai ke faʼafai ai te ʼu kaugana, peʼe ko te kau gaue. Neʼe ha lelei te faʼahi ʼaia he ʼe ko Sesu, te Foha ʼo te tagata, neʼe talanoa leva kia ia totonu ʼi te lea fakatata ʼaia. Neʼe ina ui fenei ki ʼana tisipulo: “Mo koutou foki, ke kotou nonofo teuteu, koteʼuhi ʼe haʼu anai te Foha ʼo te tagata ʼi he hola ʼe mole kotou manatu ki ai.” (Luka 12:40) Koia ʼi he temi ki ʼamuli, ʼe haʼu anai ia Sesu. Neʼe loto ai ia Sesu ke nonofo teuteu ʼana tisipulo, kaʼe tafito natou ʼae ʼe kau ki te “kiʼi faga ovi.”

Neʼe fia mahino lelei ia Petelo ki te fakaʼuhiga ʼo te lea fakatata ʼa Sesu. Neʼe ina fehuʼi fenei age: “ ʼAliki, ʼe ke fai mai koa te lea fakatata ʼaeni maʼa matou pe peʼe maʼa te hahaʼi fuli?” Neʼe mole tali fakahagatonu age ia Sesu kia Petelo, kaʼe neʼe ina fai he tahi lea fakatata neʼe ʼi ai tona pikipikiga mo te ʼuluaki. Neʼe ina ui fenei: “Ko ai moʼoni koa ia te tagata tauhi ʼapi agatonu, ia ia ʼae ʼe poto, ʼae ka fakanofo e tona pule ki ʼana hahaʼi gaue, ke ina haga foaki age kia natou tanatou vaega meʼa kai ʼi tona temi totonu? Manuʼia te tagata faifekau ʼaia mo kapau, ʼi te haʼu ʼo tona pule, ʼe ina maʼu mai ia ia ʼe ina fai feia! ʼE au tala moʼoni atu kia koutou, ʼe ina fakanofo anai ia ia ke pule ki ʼona koloa fuli.”—Luka 12:41-44.

ʼE mahino ia, ʼi te ʼuluaki lea fakatata, ʼe fakaʼuhiga “te pule” kia Sesu, te Foha ʼo te tagata. Pea ko “te tagata tauhi ʼapi agatonu,” ʼe fakaʼuhiga ki he ʼu tagata ʼe natou kau ki te “kiʼi faga ovi” pea ʼe foaki age anai kia natou te Puleʼaga. (Luka 12:32) Pea neʼe ui e Sesu ʼi tana lua lea fakatata, ko ʼihi ʼi te kiʼi kutuga ʼaia ʼe natou fafaga anai “ ʼana hahaʼi gaue,” peʼe natou foaki age anai “tanatou vaega meʼa kai ʼi tona temi totonu.” Koia ko Petelo pea mo te tahi ʼu tisipulo ʼae neʼe akoʼi pea mo fafaga natou e Sesu ʼi te faʼahi fakalaumalie, neʼe natou mahino ai, ʼi he temi ki ʼamuli ʼe haʼu anai te Foha ʼo te tagata. Pea ʼi te haʼu ʼaia ʼa te Foha ʼo te tagata, ʼe ʼi ai anai he fakatuʼutuʼu moʼo fafaga te ʼu tisipulo ʼa Sesu, peʼe ko te ʼu “hahaʼi gaue” ʼa te Pule, ʼi te faʼahi fakalaumalie.

ʼI te tahi age faʼahi, neʼe fakaha lelei e Sesu ki ʼana tisipulo pe koʼe neʼe tonu ke natou nonofo ʼalaʼala pea mo tokakaga ki tanatou aga. Neʼe ina fai te faʼahi ʼaia, koteʼuhi neʼe feala ke fakaʼaoʼaoganoa he tahi, ʼo fakafeagai leva ki ʼona tehina mo tuagaʼane. Neʼe ina ui fenei: “Kapau ʼe ui fenei e te tagata faifekau ʼi tona loto: ‘ ʼE tuai mai toku pule,’ ʼo ina kamata ta te hahaʼi faifekau tagata mo fafine pea mo kai mo inu ʼo konahia, ʼe haʼu anai te pule ʼo te tagata faifekau ʼaia ʼi he ʼaho ʼe mole ʼamanaki ki ai pea mo he hola ʼe mole ina iloʼi. Pea ʼe ina fakatuʼā mamafa anai ia ia pea mo tuku anai ia ia mo te kau heʼe agatonu.”—Luka 12:45, 46.

Neʼe ui e Sesu neʼe haʼu “ ʼo tutu te afi ʼi te kele.” Neʼe ina fai te faʼahi ʼaia ʼi tana akoʼi he ʼu manatu neʼe iita mo fetokakoviʼaki ai te hahaʼi pea neʼe ha ai te hala ʼo te ʼu akonaki fakalotu pea mo te ʼu talatisio ʼo tona temi. Neʼe toe mavetevete ai foki mo he ʼu hahaʼi ʼae ʼi te agamahani ʼe natou felogoʼi lelei, “ ʼe fakafeagai anai te tamai ki tona foha pea mo te foha ki tana tamai, ʼe fakafeagai anai te faʼe ki tana taʼahine pea mo te taʼahine ki tana faʼe, ʼe fakafeagai anai te faʼe ki te ʼohoana ʼo tana tama pea mo te fafine ʼohoana ki te faʼe ʼo tona ʼohoana.”—Luka 12:49, 53.

Neʼe fakahagahaga tafito te ʼu palalau ʼaeni ʼa Sesu ki ʼana tisipulo. Pea neʼe haga leva ki te hahaʼi kaugā malie. Tokolahi neʼe kei natou fakafisi ki te ʼu fakamoʼoni ʼae neʼe ko ia te Mesia, koia neʼe ina ui fenei age kia natou: “Ka kotou sisio ʼe ha he ʼao ʼi te potu uesite, ʼe kotou ui fenei atu aipe: ‘ ʼE ʼamanaki to te afā,’ pea ʼe hoko ia. Pea ka kotou sisio ʼe agi mai te matagi mai te potu saute, ʼe kotou ui fenei: ‘ ʼE vevela kovi anai,’ pea ʼe hoko ia. Kau malualoi, ʼe kotou popoto ʼi te sivi ʼo te agaaga ʼo te kele pea mo te lagi, kaʼe he koʼe ʼe mole kotou popoto ʼi te sivi ʼo te temi makehe ʼaeni?” (Luka 12:54-56) Neʼe ha lelei ai neʼe mole natou nofo teuteu.