ʼE Feʼauga Te Meʼa Kai Ki Te Malamanei Katoa—ʼO Feafeaʼi?
NEʼE ʼui e Lester Brown, te pelesita ʼo te Worldwatch Institute ʼi Washington D.C.: “Tatau aipe peʼe tou faiga mālohi, kae ʼe mole lagi feala ke tou maʼu tuʼumaʼu anai he meʼa kai ʼe feʼauga ki te malamanei, ohage ko te meʼa ʼaē kua tau hoko lahi ʼi te sēkulō ʼaenī.” Ohage ko te meʼa ʼaē ʼe ʼui e te kaupepa New Scientist, ʼi te kamata ʼo te 1995, ko te lahi ʼo te pulapula ʼaē neʼe taupau ʼi te malamanei neʼe ko tane e 255 miliona—ko te veliveli ʼaia neʼe mole hoko ki muʼa atu, pea neʼe feʼauga pe ia moʼo fafaga te malamanei ia ʼaho e 48. ʼI te ʼu taʼu ki muʼa atu, kapau ko te pulapula ʼaē neʼe tānaki neʼe mole feʼauga moʼo fafaga ia te hahaʼi lolotoga ʼaho e 60, pea neʼe feala ki muli age ke toe fakatuputupu tona lahi. Kae ʼi te temi nei ʼe mole ʼiloʼi papau e te Worldwatch peʼe lava anai ke toe fakatupu e te kele he meʼa kai ʼe feʼauga.
Hili kiai taʼu e tolu ʼaē neʼe mole lelei ai te ʼu taʼukai, pea mai tona ʼuhiga ʼaē ko te ʼu fenua māsisiva ʼe nātou fakaʼaogaʼi te pulapula moʼo fafaga te faga manu, koia ʼe mole feʼauga ai te pulapula maʼa te kau māsisiva ʼaē ko tanatou meʼa kai tāfito ʼaia. ʼE fakatokaga mai e te kaupepa New Scientist, kapau ʼe mole foimo fai he meʼa ʼo ʼuhiga mo te ʼaluʼaga ʼaia, pea ko te toko miliale hahaʼi ʼaē ʼe nātou fakaʼaogaʼi te koga e 70 ʼi te teau ʼo tanatou totogi moʼo toʼo ʼaki ai tanatou meʼa kai, ʼe lagi nātou kamata pakupaku anai.
Ko te Tohi-Tapu neʼe ina fakakikite ʼe hoko anai “te ʼu hoge” ki te hahaʼi ʼi totatou temi. (Luka 21:11) Kae ko te ʼAtua ʼe ina fia fakatokatoka te fihifihia ʼaia. ʼIo, ko tana lototokaga ki te malaʼia ʼo te tagata ʼe hā anai ʼi te temi ʼaē ka puleʼi ai e tona Puleʼaga te kele katoa. ʼI te temi ʼaia, “ko te kele totonu ʼe ina foaki moʼoni mai anai tona fua.” “ ʼE mahu anai te pulapula ʼi te kele; ʼi te tumutumu ʼo te ʼu moʼuga ʼe tapuke ai anai.” (Pesalemo 67:6; 72:16) Ki muli age ʼe hoko anai te lea faka polofeta ʼaenī ʼo ʼuhiga mo te Tupuʼaga: “Kua ke tokagaʼi te kele, ke ke foaki age te mahu . . . Ko te telea mālalo totonu ʼe fonu ai te pulapula.”—Pesalemo 65:9, 13.
ʼE koutou leleiʼia koa te fakapapau taulekaleka ʼaia? ʼE koutou fia ʼiloʼi koa peʼe lava feafeaʼi hakotou kau kiai? Koia kapau ʼe ʼolo atu te kau Fakamoʼoni ʼa Sehova ki tokotou ʼapi, pea koutou kole age ke nātou fakamahino atu pe koteā te Palatiso ʼaē neʼe fakapapauʼi mai. Kapau ʼe koutou loto ki he tahi ke ina fai he ako faka Tohi-Tapu mo koutou, koutou faitohi ki te Sosiete “Les Témoins de Jéhovah,” B.P. 787, Nouméa, Nouvelle-Calédonie, peʼe vakaʼi te lisi ʼaē ʼi te pasina 2.
[Haʼuʼaga ʼo te paki pasina 32]
Inset: Pictorial Archive (Near Eastern History) Est.