Neʼe Ina Akoʼi Age Kia Nikotemo Te ʼu Meʼa ʼo ʼUhiga Mo Te Puleʼaga ʼi Te Kua Poʼuli

ʼI te nofo ʼa Sesu ʼi Selusalemi ki te Pasikate ʼo te taʼu 30 H.T.S., neʼe ina fai he ʼu milakulo fakaofoofo. Neʼe liliu ai te hahaʼi tokolahi ʼo tui kia te ia. Neʼe punamaʼuli ia Nikotemo, ʼae neʼe ko te Faliseo pea neʼe kau ki te fakamauʼaga lahi ʼo te kau Sutea ʼae neʼe higoa ko te Sanetualio. ʼI tana fia logo ki he tahi ʼu manatu, neʼe alu kia Sesu ʼi te kua poʼuli. Neʼe mataku ia naʼa sisio te tahi kau takitaki Sutea kia ia, ʼo mole kei natou fakaʼapaʼapaʼi anai ki ai.

Neʼe ui fenei e Nikotemo: “Lapi, ʼe matou iloʼi ko koe ko he faiako ʼe haʼu mai te ʼAtua, koteʼuhi ʼe mole feala ke fakahoko e he tahi ia te ʼu milakulo ʼae ʼe ke fakahoko mo ka na pau la ʼe mole ina maʼu te ʼofa ʼo te ʼAtua.” Pea neʼe ui e Sesu kia Nikotemo, kapau ʼe fia hu he tahi ki te Puleʼaga ʼo te ʼAtua, pea ʼe tonu ke “toe tupu.”—Soane 3:2, 3.

Kaʼe ʼe feala feafeaʼi ki he tahi ke toe tupu? Neʼe ui fenei e Nikotemo: “ ʼE mahino ia ʼe mole feala ke toe hu ki te fatu ʼo tana faʼe ʼo toe tupu mai.”—Soane 3:4.

Kailoa ia, ʼe mole ko te fakaʼuhiga ʼaia ʼo te toe tupu ʼa he tahi. Neʼe fakamahino fenei e Sesu: “Kapau ʼe mole tupu he tahi ʼaki te vai pea mo te laumalie maʼoniʼoni, ʼe mole feala ia ke hu ki te Puleʼaga ʼo te ʼAtua.” (Soane 3:5) ʼI te temi ʼae neʼe papitema ai ia Sesu pea mo hifo ifo kia te ia te laumalie maʼoniʼoni, neʼe tupu ai “ ʼaki te vai pea mo te laumalie maʼoniʼoni.” Pea neʼe toe logo ki te leʼo mai te lagi, neʼe ina ui fenei: “Ko toku ʼAlo ʼaeni, toku ʼofaina, ʼae ʼe au fiafia ai.” (Mateo 3:16, 17) Neʼe fakaha ai e te ʼAtua, neʼe toe tupu ia Sesu ko hona foha fakalaumalie ʼaki tana fakanofo ia ia ʼaki te laumalie maʼoniʼoni, ʼo ina maʼu ai te ʼamanaki ʼae ke hu ki te Puleʼaga ʼae ʼi selo. Ki muli age, ʼi te Penikosite ʼo te taʼu 33 H.T.S., neʼe foaki ia te laumalie maʼoniʼoni ki ʼihi neʼe kua papitema, pea neʼe natou toe tutupu ko he ʼu foha fakalaumalie ʼo te ʼAtua.—Gaue 2:1-4.

Neʼe faigataʼa kia Nikotemo hana mahino ki te meʼa ʼae neʼe akoʼi age e Sesu ʼo ʼuhiga mo te Puleʼaga. Koia neʼe fakaha age e Sesu he tahi ʼu manatu ʼo ʼuhiga mo tana gaue makehe ʼi te kele, ʼi tona ʼuhiga ʼAlo ʼo te ʼAtua. Neʼe ina ui fenei: “Ohage pe ko te lagaʼi ake e Moisese te gata ʼi te toafa, ʼo toe feia pe, ʼe tonu ke lagaʼi ake e te hahaʼi ia te Foha ʼo te tagata, ke feala kia ia ʼae ʼe tui kia te ia, ke ina maʼu te maʼuli heʼe gata.”—Soane 3:14, 15.

Ki muʼa atu, ko te kau Iselaele ʼae neʼe ʼuʼusi e te ʼu gata kafo kona, neʼe tonu ke natou sioʼi te gata kapa ke haofaki ai natou. (Numelo 21:9) ʼO toe feia pe, ʼe tonu ki te hahaʼi fuli ke natou tui ki te ʼAlo ʼo te ʼAtua ke haofaki ai natou mai te mate pea mo natou maʼu ia te maʼuli heʼe gata. Neʼe fakaha lelei e Sesu te ʼofa ʼo Sehova ʼi te fakatuʼutuʼu ʼaia, ʼi tana ui fenei kia Nikotemo: “Neʼe ʼofa mamahi te ʼAtua ki te malamanei ʼo ina foaki ai tona ʼAlo ʼulu tokotahi, pea ko ʼae ʼe tui kia te ia ʼe mole mate anai kaʼe ʼe ina maʼu anai te maʼuli heʼe gata.” (Soane 3:16) Koia, ʼi te nofo leva ʼaia ʼa Sesu ʼi Selusalemi hili mahina ʼe ono ʼi tana kua kamata tana minisitelio, neʼe fakaha lelei e Sesu ʼe ko ia te ala ki te haofaki ʼo te malamanei.

Neʼe ui fenei e Sesu kia Nikotemo: “Neʼe mole fekauʼi e te ʼAtua tona ʼAlo ki te malamanei ke ina fakamauʼi te malamanei.” Ko tona fakaʼuhiga neʼe mole fekauʼi mai ia ia ke ina tauteaʼi pea mo fakaʼauha te malamanei. Kaʼe ohage ko tona ui e Sesu, neʼe fekauʼi mai ia ia “ke haofaki te malamanei ʼaki ia ia.”—Soane 3:17.

ʼI te mataku ʼa Nikotemo, neʼe hoki haʼu kia Sesu ʼi te poʼuli. ʼE feala ke ke tokagaʼi, neʼe fakaʼosi e Sesu tanā faipalalau ʼo talanoa ki te malama. Neʼe ina ui fenei: “Pea koʼeni te fakatafito ʼo te fakamau: Ko te malama [te maʼuli pea mo te ʼu akonaki ʼa Sesu] neʼe haʼu ki te malamanei, kaʼe neʼe ʼoʼofa te hahaʼi ki te fakapoʼuli kaʼe mole ki te malama, he neʼe kovi ʼanatou gaue. Koteʼuhi ko ʼae ʼe ina fai he ʼu aga ʼe kovi ʼe fehiʼa ia ki te malama pea ʼe mole haʼu ki te malama, ke ʼaua naʼa valokiʼi ʼana gaue. Kaʼe ko ʼae ʼe ina fai te meʼa ʼae ʼe lelei, ʼe haʼu ia ki te malama, ke ha ai neʼe mulimuli ʼana gaue ki te finegalo ʼo te ʼAtua.”—Soane 3:19-21.

Neʼe tonu leva kia Nikotemo, te tagata Faliseo pea mo faiako ʼo Iselaele, ke ina fakakaukauʼi te ʼu meʼa ʼae neʼe logo ki ai ʼo ʼuhiga mo te gaue ʼa Sesu ʼi te fakatuʼutuʼu ʼa te ʼAtua.