Neʼe Tuputupu Ake Ia Sesu Kaʼe Siʼisiʼi Ifo Ia Soane

ʼI te ʼosi ʼo te Pasikate ʼo te taʼu 30 H.T.S., neʼe mavae leva ia Sesu mo ʼana tisipulo ki Selusalemi. Neʼe ko te mahina ʼo Malesio peʼe ko Apelili. Kaʼe neʼe mole natou toe liliu ki ʼonatou ʼapi ʼi Kalilea. Neʼe olo ia ki te tahi ʼu kolo ʼo Sutea, ʼo natou papitemaʼi ai te hahaʼi tokolahi. Neʼe kua teitei taʼu katoa te fai e Soane Patita te gaue ʼaia ʼi te vaʼe Vai Tafe ʼo Solotane. Neʼe kei fakatahi pe mo ia ʼihi ʼo ʼana tisipulo.

Neʼe mole faipapitema ia Sesu, kaʼe neʼe ina takitaki te gaue ʼaia neʼe fai e ʼana tisipulo. ʼI te temi ʼaia, ko Sesu pea mo Soane neʼe nā akoʼi te kau Sutea ʼae neʼe fakahemala he neʼe natou agahala ki te Lao ʼa te ʼAtua.—Gaue 19:4.

Kaʼe neʼe maheheka te ʼu tisipulo ʼa Soane, ʼo natou meo fenei kia ia ʼo ʼuhiga mo Sesu: “Ko te tagata [ia Sesu] ʼae neʼe nofo mo koe . . . koʼeni ʼe lolotoga faipapitema ia, pea ʼe olo fuli te hahaʼi kia te ia.” (Soane 3:26) Neʼe mole maheka ia Soane kaʼe neʼe fiafia ia ʼi te fua lelei ʼo te gaue ʼa Sesu pea neʼe loto ia ke toe fiafia foki mo ʼana tisipulo. Neʼe ina ui fenei kia natou: “ ʼE kotou fakamoʼoni neʼe au ui fenei: ‘ ʼE mole ko au ia Kilisito, kaʼe neʼe fekauʼi mai au ke au muʼamuʼa ia te ia.’ ” Neʼe ina fai leva he fakata ke natou mahino fuli ki te faʼahi ʼaia, ʼo ina ui fenei: “Ko ʼae ʼe ina maʼu te fafine ʼohoana ʼe ko te tagata ʼohoana. Kaʼe ko te kaumeʼa ʼo te tagata ʼohoana, ʼi tana tuʼu pea mo logo ki ai, ʼe fiafia lahi ai ʼuhi ko te leʼo ʼo te tagata ʼohoana. Koia, kua katoa toku fiafia.”—Soane 3:28, 29.

Ohage pe ko te kaumeʼa ʼo te tagata ʼohoana, neʼe fiafia ia Soane ʼi te ʼu mahina ki muʼa atu ʼi tana fakaha kia Sesu ʼana tisipulo. Ko ʼihi ia natou neʼe natou mulimuli ia Sesu pea ki muli age, neʼe fakanofo natou ʼaki te laumalie maʼoniʼoni. Neʼe toe loto foki ke mulimuli te ʼu tisipulo ʼae neʼe fakatahi mo ia ia Sesu. Neʼe ko tana fakatuʼutuʼu ʼa Soane ke ina teuteuʼi te ala ki te minisitelio ʼo Kilisito. Neʼe fakamahino fenei e Soane: “Ko ia ʼaia ʼe tonu ke haga tuputupu, kaʼe kia au, ʼe tonu ke au siʼisiʼi ifo.”—Soane 3:30.

Ko te tahi age Soane, ʼae neʼe kamata mulimuli ia Sesu ʼi muʼa atu, neʼe ina tohi fenei ʼo ʼuhiga mo te haʼuʼaga ʼo Sesu pea mo tana gaue maʼuhiga moʼo haofaki ʼo te malamanei: “Ko ia ʼae ʼe haʼu mai selo ʼe maʼoluga ake ia ʼi te tagata fuli. . . . ʼE ʼofa te Tamai ki te ʼAlo pea ʼe ina foaki ia meʼa fuli ki tona nima. Ko ʼae ʼe tui ki te ʼAlo ʼe ina maʼu ia te maʼuli heʼe gata. Ko ʼae ʼe talagataʼa ki te ʼAlo ʼe mole ina maʼu anai te maʼuli, kaʼe ʼe to anai ki ai te hauhau ʼo te ʼAtua.” (Soane 3:31, 35, 36) Neʼe ko he fakamoʼoni maʼuhiga ʼaia neʼe tonu ke iloʼi e te hahaʼi!

ʼI te ʼosi talanoa ʼa Soane Patita ki te maʼua ʼae ke siʼisiʼi ifo tana gaue, neʼe puke ia ia e te Hau ko Helote. Neʼe ʼohoanaʼi e Helote ia Helotiate, te ʼohoana ʼo tona taʼokete ko Filipo. ʼI te fakaha e Soane ia muʼa ʼo te hahaʼi tana tono ʼaia, neʼe fakatotonu e Helote ke pilisoniʼi ia ia. ʼI te logo ʼa Sesu neʼe pilisoniʼi ia Soane, neʼe mavae ʼi Sutea mo ʼana tisipulo ʼo ‘toe liliu ki Kalilea.’—Mateo 4:12; Maleko 1:14.