Ko Te Ala Pe e Tahi Ki Te Maʼuli Heʼegata
“E ko au te Ala, mo te Mooni pea mo te Mauli.”—Soane 14:6.
1, 2. Neʼe fakatātā kiteā e Sesu te ala ʼaē ʼe ina taki ki te maʼuli heʼegata, pea koteā te faka ʼuhiga ʼo tana lea fakatātā ʼaia?
ʼI TANA Akonaki ʼiloa ʼaē neʼe ina fai ʼi te Moʼuga, ʼe fakatatau e Sesu te ala ʼaē ʼe ina taki ki te maʼuli heʼegata ki he ala ʼe ʼi ai hona matapā ʼe tonu ke kita fakalaka ai. Koutou fakatokagaʼi, ʼe fakahā lelei mai e Sesu ko te ala ʼaia ʼaē ʼe ina taki ki te maʼuli ʼe mole faigafua, heʼe ina ʼui fēnei: “Koutou hu i te matapa fasiʼi; koteuhi ko te matapa lahi pea mo falahi e ko te ala e fou ki te malaia mo te mate, pea e kaugamalie natou e fagona ai. Koteuhi e fasiʼi te matapa pea faveliveli mo te ala e alu ki te mauli [heʼegata]; e lavaki natou e natou muli ai.”—Mateo 7:13, 14.
2 ʼE koutou mahino koa ki te faka ʼuhiga ʼo te lea fakatātā ʼaia? ʼE mole ina fakahā mai koa la ʼe ko te ala pe e tahi ʼaē ʼe ina taki ki te maʼuli pea ʼe tonu ke tou nonofo tokaga ke ʼaua naʼa tou hēʼia mai te ala ʼaia? Koteā koa te ala pe ʼaia e tahi ʼaē ʼe ina taki ki te maʼuli heʼegata?
Te Meʼa ʼAē Neʼe Fai e Sesu Kilisito
3, 4. (a) ʼE fakahā feafeaʼi e te Tohi-Tapu te meʼa maʼuhiga ʼaē neʼe fai e Sesu moʼo hāofaki tatou? (b) Neʼe ko te temi fea ʼaē neʼe ʼuluaki fakahā ai e te ʼAtua te fealagia ʼaē ke maʼu e te malamanei te maʼuli heʼegata?
3 ʼE mahino ia neʼe maʼuhiga te meʼa ʼaē neʼe fai e Sesu ʼo ʼuhiga mo te ala ʼaia, ohage ko tona tala mai e te ʼapositolo ko Petelo: “E mole mau te mauli heegata i he tahiʼage, koteuhi e mole he tahiʼage higoa nee kua foaki ki te tagata i te lalo-lagi [gata pe kia Sesu] e tonu ke fakamauli ai tatou.” (Gaue 4:12) Neʼe toe manatu feiā te ʼapositolo ko Paulo, heʼe ina ʼui fēnei: “Ko te meaofa o te Atua e ko te mauli heegata ia Kilisito Sesu totatou Aliki.” (Loma 6:23) Neʼe fakahā e Sesu totonu ʼe ko ia te ala pe ʼaia e tahi ʼaē ʼe ina taki ki te maʼuli heʼegata, he neʼe ina ʼui fēnei: “E ko au te Ala, mo te Mooni pea mo te Mauli.”—Soane 14:6.
4 ʼE maʼuhiga ke tou tali te meʼa ʼaē neʼe fai e Sesu moʼo faka fealagia ke tou maʼu te maʼuli heʼegata. Koia, tou vakavakaʼi lelei tana ʼu gāue. ʼI te ʼosi talagataʼa ʼa Atama, ʼe koutou ʼiloʼi koa pe ko te temi fea ʼaē neʼe fakahā ai e Sehova ʼAtua te fealagia ʼaē ke maʼu e te malamanei katoa te maʼuli heʼegata? Neʼe ina fakahā ʼi te ʼosi agahala pe ʼa Atama. Tou vakaʼi ʼi te temi nei pe neʼe ʼuluaki fakakikite feafeaʼi te fakatuʼutuʼu ʼaē ke hāofaki e Sesu Kilisito te malamanei.
Te Hāko ʼAē Neʼe Fakapapauʼi Mai
5. ʼE tou lava ʼiloʼi feafeaʼi pe ko ai te gata ʼaē neʼe ina fakahalaʼi ia Eva?
5 ʼAki he ʼu palalau fakatātā, neʼe fakahā e Sehova ʼAtua te Fakamaʼuli ʼaē neʼe fakapapauʼi mai. Neʼe ina fai te faʼahi ʼaia ʼi te temi ʼaē neʼe ina tauteaʼi ai “te gata” ʼaē neʼe palalau age kia Eva, ʼo fakahalaʼi ia ia ke talagataʼa ki te ʼAtua, ke ina kai ki te fuaʼi ʼakau ʼaē neʼe tapuʼi age kia nāua. (Senesi 3:1-5) ʼE mahino papau ia, ko te gata ʼaia neʼe mole faka ʼuhiga ki he gata moʼoni. Neʼe faka ʼuhiga ki te laumālie mālohi ʼaē ʼe fakahigoaʼi ʼi te Tohi-Tapu ko “te gata afea, iaʼia e higoa ko Tiapolo mo Satana.” (Apokalipesi 12:9) Neʼe fakaʼaogaʼi e Satana te manu ʼaia moʼo fakahoko tana ʼu palalau ʼo ina fakahalaʼi ai ia Eva. Koia, ʼi tana tauteaʼi ia Satana, neʼe tala fēnei age e te ʼAtua: “ ʼE ʼau tuku anai he fehiʼa ia koe mo te fafine, ʼi tou hāko pea mo tona hāko. Pea ʼe ina moloki anai koe ʼi tou ʼulu pea ʼe ke fakavolu anai ia ia ʼi tona muliʼi vaʼe.”—Senesi 3:15.
6, 7. (a) Ko ai te fafine ʼaē ʼe ina fānauʼi te “hāko”? (b) Ko ai te Hāko ʼaē neʼe fakapapauʼi mai, pea koteā ʼaē ʼe ina fakahoko?
6 Ko ai te “fafine” ʼaia ʼaē neʼe fehiʼa kiai Satana? Ohage pe ko tona fakahā mai ʼi te kapite 12 ʼo Apokalipesi pe ko ai ʼaē ʼe ina fakatātā “te gata afea,” ʼe ina toe fakahā mai ai pe foki pe ko ai ʼaē ʼe ina fakatātā te fafine ʼaē ʼe fehiʼa kiai Satana. ʼI te kapite ʼaia, ʼe ʼui ai ko te fafine ʼaia ʼe “kofu ki te laa, mo te mahina i ona lalo vae pea mo he kolona fetuu hogofulu-ma-lua i tona ulu.” ʼE fakatātā e te fafine ʼaia te kautahi ʼa te ʼAtua ʼaē ʼi selo ʼaē ʼe faʼufaʼu e te kau ʼaselo agatonu, pea ko te “tama” ʼaē ʼe ina fānauʼi ʼe ina fakatātā te Puleʼaga ʼa te ʼAtua, pea ʼe hau ai ia Sesu Kilisito.—Apokalipesi 12:1-5, Tohi-Tapu ʼo Selusalemi.
7 Kae ko ai koa te “hāko” ʼo te fafine ʼaē ʼe talanoa kiai ia Senesi 3:15, ʼaē ka ina moloki anai ia Satana ‘ ʼi tona ʼulu,’ ʼo ina matehi ia ia? ʼE ko Sesu, ia ia ʼaē neʼe fekauʼi mai e te ʼAtua mai selo ke tupu faka milakulo ʼi he taupoʼou. (Mateo 1:18-23; Soane 6:38) ʼI te kapite 12 ʼo Apokalipesi, ʼe fakahā ai ko te Pule ʼi selo ʼaē kua fakatuʼuake, te Hāko ʼaia, ia Sesu Kilisito, ʼe ina takitaki anai te tauʼi ʼo Satana pea, ohage ko tona tuʼu ia Apokalipesi 12:10, ʼe ina fakatuʼu anai “te pule o totatou Atua, pea mo te pule o tana Kilisito.”
8. (a) Koteā te meʼa foʼou neʼe foaki e te ʼAtua ʼo ʼuhiga mo tana fakatuʼutuʼu ʼaē neʼe ina fai ʼi te kamata? (b) Ko ai ʼaē ʼe ina faʼufaʼu te puleʼaga foʼou ʼa te ʼAtua?
8 Ko te Puleʼaga ʼaia ʼaē ʼe hau ai ia Sesu Kilisito, ʼe ko he meʼa foʼou neʼe foaki mai e te ʼAtua ʼo ʼuhiga mo tana fakatuʼutuʼu ʼaē neʼe ina fai ʼi te kamata, ke maʼuli heʼegata te hahaʼi ʼi te kele. ʼI te ʼosi agatuʼu ʼa Satana, neʼe fai atu aipe e Sehova he ʼu fakatuʼutuʼu moʼo pulihi te ʼu fua kovi fuli ʼo te agakovi, ʼaki te pule ʼo te Puleʼaga foʼou ʼaia. ʼI tana kei maʼuli ʼi te kele, neʼe fakahā e Sesu ʼe mole ina takitaki tokotahi anai ia te puleʼaga ʼaia. (Luka 22:28-30) Neʼe fili te tahi ʼu hahaʼi ʼi te malamanei, pea ʼe nātou kaugā hau anai mo ia ʼi selo, pea ʼe nātou faʼufaʼu anai te lua koga ʼo te hāko ʼo te fafine. (Kalate 3:16, 29) ʼE fakahā mai ʼi te Tohi-Tapu ko te toko 144 000 ʼaē ka nātou kaugā hau mo Sesu—neʼe fili ia nātou fuli ʼaia mai te hahaʼi agahala ʼi te kele.—Apokalipesi 14:1-3.
9. (a) He koʼe neʼe tonu ke haʼu Sesu ʼo tupu tagata ʼi te kele? (b) Neʼe molehi feafeaʼi e Sesu te ʼu gāue ʼa te Tevolo?
9 Kae ʼi muʼa ʼo te kamata pule ʼo te Puleʼaga ʼaia, neʼe tonu ke haʼu ia Sesu Kilisito ki te kele, ko ia te koga tāfito ʼo te hāko. Koteā tona tupuʼaga? He neʼe hinoʼi ia ia e Sehova ʼAtua ke ina “maumauʼi [peʼe ina molehi] te u gaue a te temonio.” (1 Soane 3:8) Neʼe kau ki te ʼu gāue ʼa Satana tana uga ia Atama ke agahala, ʼo fakatūʼa ai te hōloga katoa ʼo Atama ki te agahala pea mo te mate. (Loma 5:12) Neʼe molehi e Sesu te gāue ʼaia ʼa te Tevolo ʼi tana foaki Tona maʼuli ko he totogi. Neʼe ina foaki ai he tafitoʼaga ki te faka ʼāteaina ʼo te malamanei mai tanatou fakatūʼa ki te agahala pea mo te mate, pea mo ina avahi ai te ala ki te maʼuli heʼegata.—Mateo 20:28; Loma 3:24; Efeso 1:7.
Te Meʼa ʼAē ʼe Hoko ʼAki Te Totogi
10. Neʼe koteā ʼaē neʼe tatau ai ia Sesu pea mo Atama?
10 Neʼe tupu haohaoa Sesu pea neʼe mole pikisia ʼi te agahala ʼa Atama, he neʼe momoli ifo tona maʼuli mai selo ki te fatu ʼo te fafine. Neʼe toe faʼu haohaoa mo Atama ʼaki te ʼamanaki ʼaē ke maʼuli ʼo heʼegata ʼi te kele. Neʼe manatuʼi e te ʼapositolo ko Paulo te hohoko ʼo te ʼu tagata ʼaia e lua ʼi tana tohi fēnei: “Ko te uluaki tagata, ia Atama, nee ko he sino mahani e mauli, ko te Atama muli [ia Sesu Kilisito] e ko he Laumalie e ina foaki te mauli. Ko te uluaki tagata nee toʼo mai te kele, pea e fakakelekele. Ko te lua tagata e hau mai selo.”—1 Kolonito 15:45, 47.
11. (a) Neʼe koteā te fua ʼo te aga ʼo Atama pea mo Sesu ki te malamanei? (b) Koteā te manatu ʼe tonu ke tou maʼu ʼo ʼuhiga mo te sakilifisio ʼa Sesu?
11 ʼE fakahā lelei mai e te Tohi-Tapu te tatau ʼo te ʼu tagata ʼaia e lua—neʼe ko te ʼu tagata haohaoa pe ʼaia e lua ʼaē neʼe maʼuʼuli ʼi te kele—heʼe ina ʼui ko Sesu “nee ina tukuʼage iaʼia, e ko he totogi [ʼe tatau] o uhiga mo te tagata fuape.” (1 Timoteo 2:6) Neʼe tatau Sesu mo ai? Neʼe tatau mo Atama, ʼi te temi ʼaē neʼe kei haohaoa ai! Ko te agahala ʼaē neʼe fai e te ʼuluaki Atama neʼe iku ki te fakatūʼa ʼo te hahaʼi fuli pe ki te mate. Ko te sakilifisio ʼo “te Atama muli” neʼe ko he tafitoʼaga ʼaia moʼo faka ʼāteaina ʼo tatou mai te agahala pea mo te mate, ke feala hatatou maʼuʼuli ʼo heʼegata. ʼE maʼuhiga ʼaupito te sakilifisio ʼa Sesu! Neʼe tohi fēnei e te ʼapositolo ko Petelo: “Nee mole ko he u mea fakaʼauha, te paaga pe ko te aulo nee huʼi mai aki koutou, mai tautou agaaga mauli alunoa nee koutou mau mai autou matua.” Kae neʼe fakamahino fēnei e Petelo: “Kae aki te taataa mauhiga, e tatau mo ae o he akeno hee mele mo hee uli, te taataa o Kilisito.”—1 Petelo 1:18, 19.
12. ʼE fakamatala feafeaʼi e te Tohi-Tapu te pulihi ʼo tatatou fakatūʼa ʼaē ki te mate?
12 ʼE matalelei te fakamatala ʼa te Tohi-Tapu peʼe pulihi feafeaʼi anai te fakatūʼa ʼo te malamanei ki te mate, ʼi tana ʼui ʼaē: “Aki te hala a he tokotahi [ia Atama] nee iku te tagata fuape ki te tautea; o feiape, aki te gaue o te susitisia a he tokotahi [te nofo agatonu katoa ʼa Sesu ʼo aʼu ki tana mate] e iku te tagata fuape ki te fakatonuhia o te mauli. Koteuhi, aki te talagataa a te tagata e tahi [ia Atama] nee fakanofo te tokolahi o agahala; pea e feiape, aki te fakalogo a te tagata e tahi [ia Sesu], e fakanofo anai te tokolahi o agatonu.”—Loma 5:18, 19.
Ko He ʼAmanaki Faka Kolōlia
13. He koʼe ʼe fakapunamaʼuli te manatu ʼa te tokolahi ʼo ʼuhiga mo te maʼuli heʼegata?
13 ʼE tonu ke tou fakafiafia lahi ʼi te meʼa ʼaia ʼaē neʼe foaki mai e te ʼAtua! ʼE mole koutou fiafia koa la ʼi te foaki mai he tagata ke ina hāofaki tatou? Neʼe fai te sivi e te sulunale ʼo te kolo lahi ʼi Amelika, pea neʼe lagaʼi te fehuʼi ʼaenī: “ ʼE koutou fia maʼuʼuli koa ʼo heʼegata?” pea neʼe punamaʼuli te tali ʼaē neʼe fai e te hahaʼi, he neʼe ko te toko 67,4 ʼi te teau neʼe nātou tali “Kailoa.” He koʼe neʼe nātou ʼui ʼe mole nātou fia maʼuʼuli ʼo heʼegata? ʼE mahino papau ia ʼe tupu ko te ʼu fihifihia ʼaē ʼe tou tau mo ia ʼi totatou maʼuli. Neʼe ʼui fēnei e te fafine: “ ʼE mole ko he meʼa fakafiafia kia ʼau taku fakakaukauʼi peʼe ʼau feafeaʼi anai ʼi toku taʼu 200.”
14. He koʼe ʼe katoa anai tatatou fiafia mokā tou maʼuli anai ʼo heʼegata?
14 Kae ʼe mole fakahā mai e te Tohi-Tapu ʼe maʼuli anai te hahaʼi ʼo heʼegata ʼi he mālama ʼe nātou mamahi ai ʼuhi ko te mahaki, pe ko te vaivai matuʼa, pe ko te tahi ʼu tuʼutāmaki. Kailoa, heʼe ʼi tana ʼuhiga Hau ʼo te Puleʼaga ʼa te ʼAtua, ʼe molehi anai e Sesu te ʼu fihifihia fuli ʼaē neʼe fakatupu e Satana. ʼE ʼui e te Tohi-Tapu, ko te Puleʼaga ʼa te ʼAtua “ ʼe ina laliki anai pea mo fakagata anai” te ʼu puleʼaga agamālohi fuli ʼo te mālama ʼaenī. (Taniela 2:44) ʼI te temi ʼaia, moʼo tali ki te faikole ʼaē neʼe akoʼi e Sesu ki tana ʼu tisipulo, ko te “finegalo” ʼa te ʼAtua ʼe “fakahoko [anai] ʼi te kele ohage ko tana fai ʼi selo.” (Mateo 6:9, 10, Today’s English Version) ʼI te mālama foʼou ʼaē ka fakatuʼu anai e te ʼAtua, ʼi te ʼosi fakamaʼa ʼo te kele mai te ʼu meʼa kovi fuli, ʼe fakahoko katoa anai te ʼu tapuakina ʼo te totogi ʼaē neʼe foaki e Sesu. Ei, ko nātou fuli ʼaē ka nātou aʼu kiai, ʼe nātou toe liliu anai ʼo haohaoa!
15, 16. ʼE feafeaʼi anai te maʼuli ʼi te mālama foʼou ʼaē ka fakatuʼu e te ʼAtua?
15 ʼE hoko anai ki te hahaʼi ʼaē ka maʼuʼuli ʼi te mālama foʼou ʼa te ʼAtua te vaega faka Tohi-Tapu ʼaenī: “Ke liliu tona kakano ʼo foʼou ake ʼi tona kei tūpulaga, ke toe liliu ki te ʼu ʼaho ʼo tona mālohi faka tūpulaga.” (Sopo 33:25) ʼE toe hoko anai te tahi fakapapau ʼo te Tohi-Tapu: “ ʼI te temi ʼaia ʼe ava anai te ʼu mata ʼo te kau kivi, pea ʼe toe logo anai te ʼu taliga ʼo te kau tuli. ʼI te temi ʼaia ko te ketu ʼe kake anai ohage he tia pea ko te ʼalelo mate ʼe kalaga fakafiafia anai.”—Isaia 35:5, 6.
16 Koutou fakakaukauʼi age muʼa: Tatau aipe peʼe tou taʼu fia ʼi te temi ʼaia, peʼe 80, peʼe 800, peʼe tou matuʼa age, kae kei mālohi pe anai totatou sino. ʼE hage anai ko te fakapapau ʼaenī ʼa te Tohi-Tapu: “ ʼE mole he tahi ʼe ina ʼui anai: ‘ ʼE ʼau mahaki.’ ” ʼI te temi ʼaia ʼe toe hoko anai mo te fakapapau ʼaenī: “[Ko te ʼAtua] e ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi, koteuhi kua puli te malama-nei afea.”—Isaia 33:24; Apokalipesi 21:3, 4.
17. Koteā te ʼu meʼa ʼaē ka fai e te hahaʼi ʼi te mālama foʼou ʼa te ʼAtua?
17 ʼI te mālama foʼou ʼaia, ʼe feala anai ke tou fakaʼaogaʼi totatou ʼuto ohage ko tona fakatuʼutuʼu e totatou Tupuʼaga, ʼi tana faʼu ʼaē ke mole he tuʼakoi ʼo te ʼu meʼa ʼaē ʼe tou ako. Koutou fakakaukauʼi muʼa te ʼu meʼa fakaofoofo ʼaē ka tou lava fai! Māʼia mo te ʼu tagata heʼe haohaoa neʼe nātou faʼu ʼaki te ʼu meʼa kehekehe ʼo te kele ia meʼa fuli ʼaē ʼe tou sio kiai—te ʼu telefoni ʼaē ʼe kita feʼāveʼaki, mo te ʼu mikolo, mo te ʼu ʼuasi, mo te ʼu récepteurs, mo te ʼu olotinatea, mo te ʼu vakalele, pea mo te tahi ʼu meʼa kehekehe. Neʼe mole faʼu te ʼu meʼa ʼaia ʼaki he ʼu meʼa gāue neʼe ʼaumai e te hahaʼi mai he potu mamaʼo ʼo te ʼatulaulau. ʼAki te ʼamanaki ʼaē ke tou maʼuʼuli ʼo heʼegata, ʼe mole he tuʼakoi anai ʼo te ʼu meʼa ʼaē ʼe feala anai ke tou fai ʼi te Palatiso fakakelekele!—Isaia 65:21-25.
18. He koʼe ʼe mole tou fiu anai ʼi te maʼuli ʼi te mālama foʼou ʼaē ka fakatuʼu e te ʼAtua?
18 Pea ʼe mole tou fiu anai ʼi te maʼuli ʼaia. Māʼiape la mo te temi ʼaenī ʼe tou atalitali ki te hola kai, logope la kua lauʼi afe tatatou kakai. ʼI te maʼuli haohaoa ʼi te Palatiso, ʼe toe lahi age anai tatatou leleiʼia te ʼu fuaʼi ʼakau kehekehe ʼo te kele. (Isaia 25:6) Pea ʼe tou toe fiafia heʼegata anai ʼi tatatou tokaga ki te ʼatu manu pea mo tou leleiʼia te matalelei ʼo te tō ʼo te laʼā, mo tatatou sio ki te ʼu moʼuga, mo te ʼu vaitafe, pea mo te ʼu mafa. ʼE mahino papau ia, ʼe mole tou pipiko anai ʼi te maʼuli ʼi te mālama foʼou ʼaē ka fakatuʼu e te ʼAtua!—Pesalemo 145:16.
Tou Fai Te ʼu Meʼa ʼAē ʼe Fakamaʼua Mai e Te ʼAtua
19. He koʼe ʼe fakapotopoto ke tou fai te ʼu meʼa ʼaē ʼe fakamaʼua mai e te ʼAtua, ke feala ai hatatou maʼu ia te meʼa ʼofa ʼa te ʼAtua, ʼaē ko te maʼuli?
19 ʼE koutou ʼamanaki koa ke koutou maʼu te meʼa ʼofa lahi ʼa te ʼAtua, te maʼuli heʼegata ʼi te Palatiso, kae mole koutou faiga kiai? ʼE mole koa la ko he aga fakapotopoto ke fakamaʼua mai e te ʼAtua ke tou fai he meʼa ʼo ʼuhiga mo te faʼahi ʼaia? ʼE mahino ia. ʼI tona fakahagatonu, ʼe mole tuku feiā mai e te ʼAtua te meʼa ʼofa ʼaia kia tatou. ʼE ina fakagafua mai ke tou maʼuʼuli ʼo heʼegata, kae ʼe tonu ke tou faiga ke tou aʼu kiai pea ke tou maʼu te maʼuli ʼaia. ʼE lagi koutou fai anai te fehuʼi ʼaē neʼe fai age e te tūpulaga koloaʼia kia Sesu: “Kotea he mea lelei ke au fai, pea e au mau ai te mauli heegata?” Peʼe koutou fai te fehuʼi ʼaē neʼe fai e te tagata leʼo pilisoni ʼi Filipe ki te ʼapositolo ko Paulo: “Kotea ia te mea e tonu ke au fai pea e au mauli ai?”—Mateo 19:16; Gaue 16:30.
20. Koteā te fakamaʼua maʼuhiga ʼaē ʼe tonu ke tou fai ke tou maʼu ai te maʼuli heʼegata?
20 ʼI te po ʼi muʼa ʼo tana mate, neʼe fakahā e Sesu te fakamaʼua maʼuhiga, ʼi tana faikole fēnei ki tana Tāmai ʼi selo: “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.” (Soane 17:3) ʼE mole ko he fakamaʼua fakapotopoto koa la ʼaia ke tou ʼiloʼi ia Sehova, ʼaē ʼe ina faka fealagia ke tou maʼuʼuli ʼo heʼegata, pea ke tou ʼiloʼi ia ia ʼaē neʼe mate maʼa tatou, ia Sesu Kilisito? Kae ʼe mole gata ʼaki pe tatatou maʼu te ʼatamai mālama ʼaia.
21. ʼE tou fakahā feafeaʼi ʼe tou maʼu te tui, ohage ko tona fakamaʼua mai?
21 ʼE toe ʼui fēnei e te Tohi-Tapu: “Kia ia e tui ki te Alo e ina mau te mauli heegata.” Pea ina toe ʼui fēnei: “Kia ia e mole fakalogo ki te Alo e mole mamata anai ki te mauli, kae e malumalu ia te ia te hauhau o te Atua.” (Soane 3:36) ʼE feala ke koutou fakahā ʼe koutou tui ki te ʼAlo ʼo koutou fakahoko he ʼu fetogi ʼi tokotou maʼuli pea mo mulimuli ki te finegalo ʼo te ʼAtua. ʼE tonu ke koutou līaki te ʼu aga kovi ʼaē neʼe koutou muliʼi pea mo koutou fai te meʼa ʼaē ʼe leleiʼia e te ʼAtua. ʼE tonu ke koutou fai te meʼa ʼaē neʼe fakatotonu e te ʼapositolo ko Petelo: “Koia koutou fakahemala mo tafoki mai ke hihiko autou agahala, pea e koutou mau ai he temi mokomoko i te afiomai a [“Sehova,” MN].”—Gaue 3:19.
22. Koteā te ʼu meʼa ʼaē ʼe tonu ke tou fai ʼi tatatou mulimuli ki te ʼu tapugā vaʼe ʼo Sesu?
22 Ke ʼaua naʼa galo kia tatou ʼe hoki feala anai ke tou maʼu te maʼuli heʼegata, mo kapau ʼe tou tui kia Sesu. (Soane 6:40; 14:6) ʼE tou fakahā tatatou tui kia Sesu ʼi ‘tatatou mulimuli ki tana ʼu tapugā vae.’ (1 Petelo 2:21) Koteā tona faka ʼuhiga? ʼI tana faikole ki te ʼAtua, neʼe ʼui fēnei e Sesu: “Koeni au, kuʼau hau o fai tou Finegalo, Atua.” (Hepeleo 10:7) ʼE maʼuhiga ke tou faʼifaʼitakiʼi ia Sesu, ʼo tou tali ke tou fai te finegalo ʼa te ʼAtua pea mo tou foaki totatou maʼuli kia Sehova. ʼOsi ʼaia, pea ʼe tonu ke tou fakahā kua tou foaki totatou maʼuli ʼo tou papitema; neʼe toe papitema mo Sesu. (Luka 3:21, 22) ʼE ko he aga fakapotopoto tatatou mulimuli ki tona ʼu tapugā vaʼe. Neʼe tohi fēnei e te ʼapositolo ko Paulo “e pulei matou e te ofa o Kilisito.” (2 Kolonito 5:14, 15) ʼO feafeaʼi? ʼE ko te ʼofa ʼaē neʼe ina uga Sesu ke ina foaki tona maʼuli maʼa tatou. ʼE mole tonu koa la ke uga tatou e te faʼahi ʼaia ke tou tui kia te ia? Ei, ʼe uga tatou e te faʼahi ʼaia ke tou faʼifaʼitakiʼi tona ʼofa, ʼi tana foaki ia ia totonu moʼo tokoni ki te hahaʼi. Neʼe maʼuli ia Kilisito moʼo fai ʼo te finegalo ʼa te ʼAtua; ʼe tonu ke feiā mo tatou, ke mole tou toe maʼuʼuli maʼa tatou.
23. (a) Neʼe hilifaki kiteā ia nātou ʼaē neʼe nātou tali te maʼuli? (b) Koteā ʼaē ʼe fakamaʼua kia nātou ʼaē ʼi te kokelekasio faka Kilisitiano?
23 Kae ʼe mole gata ai. ʼE ʼui e te Tohi-Tapu ʼi te papitema ʼa te toko 3 000 hahaʼi ʼi te Penikosite ʼo te taʼu 33 ʼo totatou temi, neʼe “hilifaki” nātou. Neʼe hilifaki kiteā? ʼE fakamahino mai e Luka: “Nee natou taofi aipe te akonaki a te kau apositolo, mo te fe’tokoniʼaki, mo te tofi o te pane pea mo te faikole.” (Gaue 2:41, 42) Koia, neʼe nātou fono fakatahi moʼo ako te Tohi-Tapu pea neʼe nātou fakatahitahi pea neʼe hilifaki nātou, peʼe nātou kau ai ki te kokelekasio faka Kilisitiano. Ko te ʼu ʼuluaki Kilisitiano neʼe nātou fakatahitahi tuʼumaʼu ke akoʼi nātou ʼi te faʼahi fakalaumālie. (Hepeleo 10:25) ʼE toe fai feiā mo te kau Fakamoʼoni ʼa Sehova ʼi te temi nei, pea ʼe nātou fakaloto mālohiʼi koutou ke koutou kau mo nātou ki te ʼu fono ʼaia.
24. Koteā “te mauli mooni,” pea ʼe hoko anai ʼafea pea mo feafeaʼi?
24 ʼI te temi ʼaenī, ko te lauʼi miliona hahaʼi ʼe nātou muliʼi te ala fāveliveli ʼaē ʼe ina taki ki te maʼuli. ʼE tonu ke kita faiga mālohi ke feala hakita nofo ʼi te ala fāveliveli ʼaia! (Mateo 7:13, 14) Neʼe fakahā e Paulo te faʼahi ʼaia ʼi tana kole fakamalotoloto fēnei: “Tau mo te tau lelei o te tui, puke te mauli heegata nee pauiʼi koe ki ai.” Moʼo fakahoko te tau ʼaia ʼe ʼaoga “ke [tou] mau te mauli mooni.” (1 Timoteo 6:12, 19) Ko te maʼuli ʼaia ʼe mole ko te maʼuli ʼi te temi ʼaenī ʼaē ʼe tou mamahi ai ʼuhi ko te agahala ʼa Atama. Kae ʼe ko te maʼuli ʼi te mālama foʼou ʼaē ka fakatuʼu e te ʼAtua, ʼaē ka ʼamanaki hoko mokā fakaʼaogaʼi anai te sakilifisio faitotogi ʼa Kilisito kia nātou fuli ʼaē ʼe ʼoʼofa kia Sehova ʼAtua pea mo tona ʼAlo, mokā ʼosi molehi anai te tuʼu ʼo te ʼu faʼahiga meʼa ʼaenī. Tou fakaʼamu ke tou fili e tatou fuli te maʼuli—“te maʼuli moʼoni”—te maʼuli heʼegata ʼi te mālama foʼou pea mo faka kolōlia ʼaē ka fakatuʼu e te ʼAtua.
ʼE Koutou Tali Feafeaʼi Anai?
◻ Ko ai te gata, mo te fafine, pea mo te hāko ʼaē ʼe tuʼu ia Senesi 3:15?
◻ Koteā te faʼahi ʼaē ʼe tatau ai Sesu pea mo Atama, pea koteā ʼaē neʼe faka fealagia ʼaki te totogi?
◻ Koteā ʼaē ʼe feala ke tou ʼamanaki kiai, ʼi tatatou maʼuli fiafia ʼi te mālama foʼou ʼaē ka fakatuʼu e te ʼAtua?
◻ Koteā te ʼu fakamaʼua ʼe tonu ke tou fai ke tou maʼuʼuli ai ʼi te mālama foʼou ʼa te ʼAtua?
[Paki ʼo te pasina 10]
Ki te kau tūpulaga pea mo te kau matuʼa ʼe ko Sesu tokotahi pe te ala ki te maʼuli heʼegata
[Paki ʼo te pasina 11]
ʼI te temi ʼaē kua fakakatofa kiai e te ʼAtua, ʼe toe mālolohi anai te hahaʼi matutuʼa ohage ko tonatou temi tūpulaga