Te ʼAmanaki ʼo Te Fakatuʼuake​—Koteā Tona Faka ʼUhiga Kiā Koutou?

“ ʼE ke avahi tou nima pea ʼe ke fafaga te loto ʼo te meʼa maʼuli fuli pe.”​—Pesalemo 145:⁠16.

1-3. Koteā te ʼamanaki neʼe maʼu e ʼihi ʼo ʼuhiga mo te ka haʼu? Koutou tuku mai he faʼifaʼitaki.

ʼI TE uhu neʼe fai faka mafola ia Christopher ʼaē ʼe taʼu hiva mo tona tēhina lahi, mo te tokolua pea mo te tēhina ʼo tanā faʼē, pea mo tonā ʼu tēhina mataʼi tama e toko lua, ʼi te kolo ʼe ōvi mo Manchester, ʼi Pilitania. ʼI te nusipepa Réveillez-vous ! neʼe fakamatala ai te meʼa ʼaē neʼe hoko. “ ʼI te hili hoʼatā, neʼe nātou ʼolo ʼo haʼele ki Blackpool, ko te kolo mālōlō maʼa te kau tulisi, ʼe tuʼu ōvi ki te matātai. Ko te toko 6 ʼaia neʼe nātou kau ʼi te toko 12 hahaʼi ʼaē neʼe mamate ʼi te fakaʼī ʼi te ala, ʼaē neʼe higoaʼi e te kau polisi ko he ‘vela lahi.’ ”

² ʼI te pō ʼi muʼa ʼo te tuʼutāmaki, neʼe kau te famili ki te Ako Tohi ʼo Te Kokelekasio, pea neʼe nātou palalau ʼi te ako ʼaia ki te mate. ʼE ʼui fēnei e tana tāmai: “Ko Christopher neʼe ko he kiʼi tama neʼe poto. ʼI te afiafi ʼaia, neʼe palalau lelei ʼo ʼuhiga mo te mālama foʼou pea mo tana ʼamanaki ʼo ʼuhiga mo te ka haʼu. Fokifā pe ʼi te lolotoga ʼo te ako tohi neʼe ina ʼui fēnei: ‘Ko te meʼa ʼaē ʼe lelei ʼi tata kau ʼi te kau Fakamoʼoni ʼa Sehova heʼe kapau ʼe mate he tahi, ʼe tou ʼiloʼi ʼe tou toe fesioʼaki anai ʼi he ʼaho ʼi te kele.’ Ko mātou ʼaē neʼe mātou logo ki te ʼu palalau ʼaia, neʼe mole mātou ʼiloʼi ʼi te temi ʼaia ʼe ko he ʼu palalau ʼe mole galo anai kiā mātou.”a

³ ʼI te ʼu taʼu ki muʼa atu, ʼi te taʼu 1940, ko te Fakamoʼoni Otilisia ko Franz neʼe ina ʼiloʼi ʼe tuʼusi anai tona kiā ʼuhi ko tana fia nofo agatonu ʼaē kiā Sehova. Mai te fale pilisoni ʼo Berlin, neʼe fai e Franz tana tohi ki tana faʼē: “ ʼAki te ʼu meʼa ʼaē kua au mahino kiai, neʼe au ʼiloʼi ʼe ko he agahala ʼe tuha anai mo te mate, mo kanapaula neʼe au foaki toku maʼuli ki te [solia]. ʼE au agahala mamafa anai pea ʼe mole toe fakatuʼuake anai au. . . . Pea ʼi te temi nei, faʼē pea mo ʼoku tēhina mo tuagaʼane fuli, ʼaua naʼa koutou tuʼania, kae ke mahino kiā koutou ʼi te ʼaho nei kua au ʼiloʼi toku fakatūʼā, ko te mate, pea ʼe matehi anai au ʼapogipogi uhu. ʼE foaki mai e Sehova ia te mālohi ʼaē ʼe ʼaga kiā au, pea ko te mālohi ʼaia ʼaē neʼe ina foaki tuʼumaʼu ki te kau Kilisitiano moʼoni ʼo te temi muʼa. . . . Kapau ʼe koutou agatonu ʼo aʼu ki tokotou mate, ʼe tou toe fesioʼaki anai ʼi te fakatuʼuake. . . . Hoki tou toe felāveʼi.”b

4. ʼE malave feafeaʼi kiā koutou takitokotahi ia te ʼu hisitolia ʼo Christopher pea mo Franz, pea koteā ʼaē ka tou vakaʼi ʼi te alatike ʼaenī?

⁴ Ko te ʼamanaki ʼo te fakatuʼuake neʼe maʼuhiga ʼaupito kiā Christopher pea mo Franz. Maʼa nāua ko te ʼamanaki ʼaia ʼe hoko moʼoni anai. ʼE mahino ia ko te ʼu fakamatala ʼaia ʼe malave ki ʼotatou loto! Ke lahi tatatou loto fakafetaʼi kiā Sehova pea mo mālohi tatatou falala ʼaē ki te fakatuʼuake, tou vakaʼi age muʼa pe koʼe ʼe hoko anai te fakatuʼuake pea ʼe tonu ke malave feafeaʼi kiā tatou takitokotahi.

Te Sio Fakatomuʼa Ki Te Fakatuʼuake ʼi Te Kele

5, 6. Koteā ʼaē ʼe ʼasi mai iā Apokalipesi 20:12, 13 ʼo ʼuhiga mo te meʼa ʼaē neʼe sio kiai ia te ʼapositolo ko Soane?

⁵ ʼO ʼuhiga mo te ʼu meʼa ʼaē ka hoko ʼi Te ʼAfio ʼa Kilisito Sesu ia Taʼu e Afe, neʼe sio te ʼapositolo ko Soane ki te fakatuʼuake neʼe hoko ʼi te kele. ʼE ina ʼui fēnei: “Nee au mamata ki te hahai mate, natou lalahi mo natou liliki . . . Nee tukuʼage e te moana ana kau mate, pea nee tuku age e te mate mo [te] Hatesi tana kau mate.” (Apokalipesi 20:12, 13) ʼE fakatuʼuake anai ia nātou ʼaē ʼe nonofo ʼi te Hatesi (te Seole), te faitoka ʼa te hahaʼi fuli, peʼe nātou “lalahi” peʼe nātou “liliki.” ʼI te temi ʼaia ʼe toe fakatuʼuake anai mo nātou ʼaē neʼe mamate ʼi te tai. ʼE kau ia te gāue taulekaleka ʼaia ʼi te fakatuʼutuʼu ʼa Sehova.

⁶ ʼI te kamata ʼafio ʼa Kilisito ia taʼu e afe, ʼe ina haʼi anai ia Satana ʼo lī ki te vanu. ʼI te temi ʼafio ʼaia ʼa Kilisito, ʼe mole toe fakahalaʼi anai e Satana he tahi ia nātou ʼaē neʼe fakatuʼuake peʼe neʼe hāo mai te mamahi lahi, heʼe mole kei ina lava fakahoko hana meʼa. (Apokalipesi 20:​1-3) ʼE lagi maʼa koutou ko taʼu e afe ʼe mata fualoa, kae maʼa Sehova “e hage [pe ia ko] he aho e tahi.”​—2 Petelo 3:⁠8.

7. Koteā ʼaē ka fakatafito kiai ia te fakamāu ʼi Te ʼAfio ʼa Kilisito ia Taʼu e Afe?

⁷ ʼOhage ko te meʼa ʼaē neʼe hā, ko Te ʼAfio ʼa Kilisito ia Taʼu e Afe, ʼe ko he temi anai ki te fakamāu. Neʼe tohi fēnei e te ʼapositolo ko Soane: “Nee au mamata ki te hahai mate, natou lalahi mo natou liliki, nee natou tutuʼu ia mua o te afioʼaga, pea nee avahi he u tohi. Nee avahi mo he tahi tohi: ko te tohi o te mauli, pea nee fakamau te hahai mate o mulimuli ki anatou gaue nee tuʼu i te u tohi. . . . Pea nee fakamauʼi takitahi natou ʼo mulimuli ki [ʼanatou] gaue.” (Apokalipesi 20:12, 13) Koutou fakatokagaʼi ko te fakamāu ʼaia, ʼe mole fakatafito ki te ʼu meʼa ʼaē neʼe fai peʼe neʼe mole fai e te hahaʼi ʼi muʼa ʼo tanatou mate. (Loma 6:7) Kae ʼe talanoa ki te “u tohi” neʼe avahi. ʼE fakafuafua anai peʼe tohi te higoa ʼa he tahi ʼi “te tohi o te mauli,” ʼo fakalogo ki te ʼu gāue ʼaē ka ina fai ʼi tana ʼosi mahino ki te ʼu meʼa ʼaē ʼe tuʼu ʼi te ʼu takaiga tohi.

Ko Te ‘Fakatuʼuake Ki Te Maʼuli’ Peʼe Ko Te ‘Fakatuʼake Ki Te Fakamāu’

8. Koteā te ʼu ikuʼaga e lua ʼe hoko anai ki te hahaʼi ʼaē ka fakatuʼuake?

⁸ ʼI te kamata ʼo te meʼa ʼaē neʼe hā kiā Soane, ʼe ʼui ai ko Sesu ʼe nofo mo “te u kalavi o te mate mo [te] Hatesi.” (Apokalipesi 1:18) ʼE gāue ohage ko he “Tupuaga o te mauli,” pea neʼe foaki age kiā ia te mālohi moʼo fakamāuʼi “te hahai mauli mo te hahai mate.” (Gaue 3:15; 2 Timoteo 4:1) ʼE ina fakahoko feafeaʼi anai te faʼahi ʼaia? ʼAki tana toe fakatuʼuake ia te kau mate. Neʼe ʼui e Sesu ki te hahaʼi ʼaē neʼe fagonogono ki ai: “ ʼAua naʼa koutou punamaʼuli ki te meʼa ʼaenī, koteʼuhi ʼe hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe nātou logo anai ki tona leʼo.” Pea neʼe ina toe ʼui fēnei: “Ko nātou ʼaē neʼe nātou fai te ʼu meʼa ʼe lelei, ki he fakatuʼuake [ki] te maʼuli, ko nātou ʼaē ne’ nātou fai te ʼu meʼa ʼe kovi, ki he fakatuʼake [ki] te fakamāu.” (Soane 5:​28-30, MN ) Koteā te ka haʼu ʼe hoko anai ki te hahaʼi tagata pea mo fafine agatonu ʼo te temi muʼa?

9. (a) ʼI te fakatuʼuake, koteā ʼapē ʼaē ka akoʼi anai e te tokolahi? (b) Koteā te ako lahi ʼaē ka fakahoko anai?

⁹ Ka fakatuʼuake anai te kau agatonu ʼaia ʼo te temi muʼa, ʼe nātou sio leva ʼi te temi ʼaia ki te hoko moʼoni ʼo te ʼu fakapapau ʼaē neʼe tala age kiā nātou. ʼE nātou fia ʼiloʼi anai peʼe ko ai te Hāko ʼo te ʼohoana ʼo te ʼAtua, ʼaē neʼe talanoa ki ai te ʼuluaki lea faka polofeta ʼi te Tohi-Tapu, iā Senesi 3:15! ʼE nātou fiafia anai ʼi tanatou logo ko te Mesia ʼaē neʼe fakapapauʼi ifo, ia Sesu, neʼe agatonu ʼo aʼu ki tona mate, ʼo ina foaki tona maʼuli ko he totogi faka sākilifisio! (Mateo 20:28) Ko te hahaʼi ʼaē ka nātou fakatalitali anai ki te kau fakatuʼuake, ʼe nātou fiafia lahi anai ʼi he fakamahino age kiā nātou ko te totogi ʼaia ʼe ko he fakamoʼoni ʼo te ʼofa makehe ʼa Sehova pea tona manavaʼofa. Ka mahino anai te kau fakatuʼuake ki te ʼu meʼa ʼaē neʼe fai e te Puleʼaga ʼo te ʼAtua moʼo fakahoko te fakatuʼutuʼu ʼa Sehova ʼo ʼuhiga mo te kele, ʼe mahino ia ʼe nātou fakavikiviki anai mo nātou kiā Sehova. ʼE nātou maʼu anai te toe faigamālie lahi moʼo fakahā ia tanatou agatonu ki tanatou Tāmai ʼofa ʼaē ʼe ʼi selo pea mo tona ʼAlo. Pea ko te hahaʼi fuli ʼe nātou kau fakafiafia anai ki te ako lahi ʼaē ka fai anai ki te ʼu lauʼi miliale hahaʼi ʼaē ka fakatuʼuake, heʼe tonu mo nātou ke nātou tali te totogi ʼaē neʼe foaki e te ʼAtua maʼa nātou.

10, 11. (a) Koteā te ʼu faigamālie ʼaē ka maʼu anai e te hahaʼi fuli ʼo te kele ʼi Te ʼu Taʼu e Afe? (b) ʼE tonu ke malave feafeaʼi kiā tatou?

¹⁰ Ka fakatuʼuake anai ia Apalahamo pea ʼe fiafia anai ʼi tana maʼuli fakalogo ki te takitaki ʼa te “kolo” ʼaia ʼaē neʼe fakaʼamu ʼaupito kiai. (Hepeleo 11:10) ʼE fiafia anai te tagata agatonu ko Sopo ʼo te temi muʼa ʼi tana ʼiloʼi ʼaē ʼaki tona maʼuli agatonu neʼe feala ai ki ʼihi kaugana ʼa Sehova ke nātou lotomālohi ʼi te ʼahiʼahiʼi ʼo tanatou agatonu! ʼE fia ʼiloʼi anai e Taniela pe neʼe hoko feafeaʼi te ʼu lea faka polofeta ʼaē neʼe ina tohi ʼaki te takitaki ʼa te ʼAtua!

¹¹ ʼIo, ko nātou fuli ʼaē ka māʼuʼuli ʼi te mālama foʼou faitotonu, peʼe neʼe fakatuʼuake nātou mai te mate peʼe neʼe nātou hāo mai te mamahi lahi, ʼe lahi anai te ʼu meʼa ʼaē ka nātou ako ʼo ʼuhiga mo te ʼu gāue ʼaē ka fakahoko e Sehova ki te kele pea mo te hahaʼi. Ko te ʼamanaki ʼo ʼuhiga mo he maʼuli heʼegata pea mo he fakavikiviki kiā Sehova ʼo talu ai, ʼe ko he meʼa fakafiafia anai ki te polokalama ako ia Taʼu e Afe. Kae ʼe maʼuhiga age anai te ʼu gāue ʼaē ka tou fakahoko takitokotahi ʼo mulimuli ki te ʼu meʼa ʼaē ʼe tuʼu ʼi te ʼu takaiga tohi. ʼE tou maʼuliʼi anai koa te ʼu meʼa ʼaē ʼe tou ako? ʼE tou metitāsioʼi anai koa pea mo maʼuliʼi anai koa ia te ʼu logo maʼuhiga ʼaē ka ina foaki mai te mālohi moʼo tekeʼi te fai fakahala fakaʼosi ʼa Satana moʼo fakahiga tatou mai te moʼoni?

12. Koteā ʼaē ka tokoni anai ki te hahaʼi takitokotahi ke nātou kau ki te ako pea mo te fetogi ʼo te kele ke liliu ko he palatiso?

¹² ʼAua naʼa galo ia tatou te ʼu tapuakina taulekaleka ʼaē ʼe tou maʼu mai te ʼu lelei ʼo te sākilifisio faitotogi ʼa Kilisito. ʼE mole toe maʼu anai e te hahaʼi ʼaē ka fakatuʼuʼuake ia te ʼu mahaki maʼimoa pea mo te ʼu mahaki ʼaē neʼe tau mo nātou ʼi te temi nei. (Isaia 33:24) ʼE feala anai ki te hahaʼi fuli ʼo te mālama foʼou ʼaē kua maʼuli haohaoa ke nātou kau ki te akoʼi ʼo te ʼu lauʼi miliale hahaʼi ʼaē kua fakatuʼuake. ʼE kau anai mo nātou ki te gāue lahi mole heʼeki fakahoko ʼi te kele​—ko te fetogi ʼo te kele kātoa ke liliu ko he palatiso moʼo fakavikiviki kiā Sehova.

13, 14. He koʼe ʼi te ʼahiʼahi fakaʼosi ʼe toe faka ʼāteaina mai ia Satana, pea koteā anai tona ikuʼaga kiā tatou takitokotahi?

¹³ Ka faka ʼāteaina anai ia Satana mai te vanu ki te ʼahiʼahi fakaʼosi, ʼe ina faiga anai ke ina toe fakahalaʼi te hahaʼi. Iā Apokalipesi 20:​7-9, ko te ʼu ‘puleʼaga ʼaē kua hēhē’ peʼe ko te hahaʼi ʼaē ka tō anai ki te fakahala ʼa Satana, ʼe fakaʼauha anai ia nātou: ‘ ʼE tō ifo anai te afi mai te lagi ʼo fakaʼauha ia nātou.’ Maʼa nātou ʼaē neʼe fakatuʼuake ʼi te ʼu Taʼu e Afe, ko te fakaʼauha ʼaia ʼe faka ʼuhiga anai kiā nātou ko te fakatuʼuake ki te fakamāu. Kae ko te kau fakatuʼuake ʼaē neʼe nofo agatonu ʼe nātou maʼu anai te maʼuli heʼegata. Ko tonatou fakatuʼuake ʼe faka ʼuhiga anai ko “he fakatuʼuake [ki] te maʼuli.”​—Soane 5:29, MN.

¹⁴ ʼE fakafimālieʼi feafeaʼi tatou e te fakatuʼuake ia ʼaho nei? Tahi ʼaē meʼa maʼuhiga, koteā ʼaē ʼe tonu ke tou fai moʼo maʼu te ʼu tapuakina ʼo te ka haʼu?

Te ʼu Ako ʼe Tonu Ke Tou Manatuʼi ʼi Te Temi Nei

15. ʼE lava tokoni feafeaʼi mai ʼi te temi nei ia te fakatuʼuake?

¹⁵ ʼE lagi mole heʼeki faʼa fualoa neʼe mate he tahi neʼe koutou ʼofa ai, pea lagi neʼe hoko ai mo he fetogi lahi ʼi tokotou maʼuli. ʼO mole hage ko te hahaʼi ʼaē ʼe mole nātou ʼiloʼi te moʼoni, kiā koutou ia ʼe koutou lava maʼu ʼaki te ʼamanaki ʼo te fakatuʼuake he loto fīmālie pea mo he lotomālohi. Neʼe fakaloto fīmālieʼi fēnei e Paulo ia te kau Tesalonika: “ ʼE mole mātou loto ke mole koutou ʼiloʼi te meʼa ʼaē ʼo ʼuhiga mo nātou kua momoe ʼi te mate, koteʼuhi ke mole koutou lotomamahi ohage ko nātou ʼaē ʼe mole hanatou falala.” (1 Tesalonika 4:13, MN ) ʼE koutou fakaʼamu koa ʼe koutou māʼuʼuli anai ʼi te mālama foʼou, ʼo sio ki te fakatuʼuake? Kapau koia, pea ʼe koutou loto fīmālie anai ʼi te temi nei ʼaki hakotou metitāsioʼi te ʼamanaki ʼaē ʼe feala ke koutou toe fesioʼaki ai mo te ʼu hahaʼi ʼaē neʼe koutou ʼoʼofa ai.

16. E feafeaʼi anai tokotou loto mokā hoko anai te fakatuʼuake?

¹⁶ ʼUhi ko te ʼu fua ʼo te talagataʼa ʼa Atama, ʼe lagi ʼe koutou tau nei mo he mahaki kovi ʼe feala aipe hakotou mate ai. ʼAua naʼa koutou tuku ki te ʼu mamahi ʼaē ʼe tupu mai te mahaki ʼaia, ke galo ia koutou te ʼamanaki fakafiafia ʼo te fakatuʼuake pea mo te maʼuli foʼou ʼaē ka koutou maʼu ʼi te mālama foʼou ʼaki he maʼuli pea mo he mālohi haohaoa. Pea ka koutou avahi anai ʼokotou mata pea mo koutou sio anai ki te ʼu mata fiafia ʼo nātou ʼaē ka nātou tali fakafiafia koutou ʼi tokotou fakatuʼuake, pea ʼe mahino ia ʼe koutou fakafetaʼi anai ki te ʼAtua ʼo ʼuhiga mo tona manavaʼofa ʼaia.

17, 18. Koteā te ʼu ako maʼuhiga e lua ʼe tonu ke tou manatuʼi?

¹⁷ Tou vakaʼi age muʼa te ʼu ako e lua ʼe tonu ke tou manatuʼi. ʼUluaki ako, ʼe maʼuhiga ke tou tauhi kiā Sehova ʼi te temi nei mo totatou nefesi kātoa. ʼO mulimuli ki te faʼifaʼitaki ʼo totatou Pule, ia Kilisito Sesu, ʼe tou fakahā anai ʼi totatou maʼuli faka sākilifisio ʼe tou ʼofa kiā Sehova pea mo totatou ʼu tatau. Kapau ʼe tou maʼuli fakaʼofaʼofa peʼe pilisoniʼi tatou ʼuhi ko te ʼu fakafeagai peʼe ko te ʼu fakataga, ʼe tou haga taupau aipe tatatou tui logola te ʼu fihifihia ʼaē ʼe tau mo tatou. Kapau ʼe tou mamate ʼuhi ko te ʼu ʼahiʼahi ʼaia, pea ko te ʼamanaki ʼo te fakatuʼuake ʼe ina fakafimālie pea mo fakaloto mālohiʼi tatou ke tou nonofo agatonu kiā Sehova pea mo tona Puleʼaga. Ei, ʼe tou maʼu anai te ʼu tapuakina heʼegata ʼaē neʼe fakatuʼutuʼu e Sehova maʼa te kau agatonu mo kapau ʼe tou gāue mālohi ʼi te faka mafola ʼo te Puleʼaga pea mo te fai ʼo ni ʼu tisipulo.

¹⁸ Lua ako, tou tauʼi te ʼu fakahala ʼaē ʼe tupu mai totatou ʼuhiga agahala. ʼE tou lotomālohi anai ʼo nonofo agatonu ʼo aʼu ki te mate, heʼe tou ʼiloʼi ʼe ʼi ai te fakatuʼuake pea mo tou fakafetaʼi ki te ʼofa makehe ʼo Sehova. Neʼe fakatokaga fēnei e te ʼapositolo ko Soane: “Aua tautou ofa i te malama-nei, mo te u mea i te malama-nei. Kapau e i ai he tahi e ofa i te malama-nei, e mole mau te ofa o te Tamai ia te ia, koteuhi ko meafuape e mau i te malama-nei, te holi a te kakano mo te holi a te mata pea mo te fiaha i te u koloa, e mole haù ia mai te Tamai, kae e haù mai te malama-nei. Io, e fakamole te malama-nei mo tana u holi; kae kia ia ae e ina fai te finegalo o te Atua e mauli o talu ai.” (1 Soane 2:​15-17) Ko te ʼu holi ʼo te malamanei ʼe mole hona ʼuhiga kiā tatou mokā ʼe tou fakatatau mo te “mauli mooni.” (1 Timoteo 6:​17-19) ʼE tou tekeʼi mālohi anai te ʼu fakahala ʼaē ʼe feala ai ke tou fai ni ʼu aga heʼeʼaoga. Kapau ʼe tonu ke tou mamate ʼi muʼa ʼo te hoko mai ʼo Halamaketone, tou manatuʼi ʼe mole fakatuʼuake anai tatou mo kapau neʼe tou haga fai te ʼu meʼa ʼaē ʼe fakafeagai kiā Sehova.

19. Koteā te pilivilesio lahi ʼe mole tonu ke galo kiā tatou?

¹⁹ Ko te meʼa ʼaē ʼe maʼuhiga tāfito, ʼe mole tonu ke galo ia tatou te pilivilesio lahi ʼaē ke tou fakafiafiaʼi te loto ʼo Sehova ʼi te temi nei pea mo talu ai. (Tāʼaga Lea 27:11) ʼE tou fakahā anai kiā Sehova ʼe tou lagolago ki tana pule faʼitaliha ʼi te ʼatulaulau mo kapau ʼe tou agatonu ʼo aʼu ki totatou mate peʼe tou agatonu ʼo aʼu ki te fakaʼosi ʼo te tuʼu agakovi ʼaenī. Pea ʼe ko he meʼa fakafiafia anai hatatou maʼuli ʼi te Palatiso ʼi te kele, peʼe neʼe tou hāo mai te mamahi lahi peʼe neʼe tou kau iā nātou ʼaē neʼe fakatuʼuake mai te mate!

ʼE Fakafimālieʼi Te ʼu Meʼa ʼAē ʼi ʼOtatou Loto

20, 21. Koteā ʼaē ka tokoni mai ke tou nonofo agatonu logola mole heʼeki ʼi ai he ʼu tali ki ʼihi fehuʼi ʼo ʼuhiga mo te fakatuʼuake? Koutou fakamahino.

²⁰ ʼE lahi te ʼu fehuʼi ʼo ʼuhiga mo te fakatuʼuake ʼe mole heʼeki ʼi ai he ʼu tali kiai. Koteā ʼaē ka fai anai e Sehova maʼa nātou ʼaē neʼe kua ʼohoana kae kua mamate? (Luka 20:34, 35) ʼE fakatuʼuake anai koa te hahaʼi ʼi te ʼu koga meʼa ʼaē neʼe mamate ai? ʼE fakatuʼuake anai koa te hahaʼi mamate ʼo ōvi ki te ʼu koga meʼa ʼaē ʼe māʼuʼuli ai ʼonatou famili? ʼE lahi te tahiʼu fehuʼi ʼo ʼuhiga mo te fakatuʼuake ʼe mole heʼeki ʼi ai he ʼu tali kiai. Kae ʼe tonu ke tou manatuʼi te ʼu palalau ʼaenī ʼa Selemia: “ ʼE agalelei ia Sehova ki ʼaē ʼe falala kiā te ia, ki te nefesi ʼaē ʼe ina kumi tuʼumaʼu ia ia. ʼE lelei te atalitali fakalogologo ki te hāofaki ʼo Sehova.” (Tagilāulau 3:25, 26) ʼI te temi ʼaē kua fakakatofa ai e Sehova, ʼe tou fiafia ʼaupito anai ʼi te ʼu tali ʼaē ka ina foaki mai ʼo ʼuhiga mo tatatou ʼu fehuʼi fuli. He koʼe ʼe tou tui papau ʼe hoko anai te faʼahi ʼaia?

²¹ Tou metitāsioʼi age muʼa te ʼu palalau ʼo te hiva ʼa te tagata fai pesalemo kiā Sehova: “ ʼE ke avahi tou nima pea ʼe ke fafaga te loto ʼo te meʼa maʼuli fuli pe.” (Pesalemo 145:16) Ka fakahaʼu te temi matuʼa, pea ʼe fetogi te ʼu meʼa ʼaē ʼe tou loto kiai. Ko te meʼa ʼaē neʼe tou loto kiai ʼi tatatou kei liliki ʼe mole kei tatau mo te temi nei. ʼE mulimuli tatatou faʼahiga sio ki te maʼuli, ki te ʼu meʼa ʼaē neʼe hoko kiā tatou pea mo te ʼu meʼa ʼaē ʼe tou fakaʼamu kiai. Kae ʼe mahino ia ʼi te mālama foʼou ʼe fakahoko anai e Sehova ia tatatou ʼu fakaʼamu fuli.

22. He koʼe ʼe tonu ke tou fakavikiviki kiā Sehova?

²² Ko te meʼa ʼaē ʼe maʼuhiga kiā tatou ia ʼaho nei ko tatatou nonofo agatonu. “Ko te meʼa ʼaē ʼe tou kumi ʼi te kau tagata tauhi ʼapi ʼe ko he tagata ʼe maʼu ʼe agatonu.” (1 Kolonito 4:​2, MN ) Ko tatou ko te ʼu hahaʼi tauhi ʼapi ʼo te logo lelei faka kolōlia ʼo te Puleʼaga ʼo te ʼAtua. ʼE tou nofo agatonu anai mo kapau ʼe tou haga tala te logo lelei ʼaia ki te hahaʼi fuli ʼaē ʼe tou felāveʼi mo nātou. ʼAua naʼa galo kiā koutou ko te ʼu “temi pea mo te ʼu meʼa fakafokifā” ʼe hoko kiā tatou fuli. (Tagata Tānaki 9:11) ʼAua naʼa koutou hoha fau ʼuhi ko te ʼu fetofetogi ʼo te maʼuli, koutou taupau maʼu takotou tui ʼaē ki te ʼamanaki faka kolōlia ʼo ʼuhiga mo te fakatuʼuake. Koutou manatuʼi, tatau aipe peʼe koutou mamate ʼi muʼa ʼo te kamata ʼo Te ʼAfio ʼa Kilisito ia Taʼu e Afe, kae ʼe koutou loto fiafia heʼe hoko moʼoni anai te fakafimālie. ʼI te temi ʼaē kua fakakatofa e Sehova, ʼe feala anai ke koutou toe fai te ʼu palalau ʼaenī ʼa Sopo ki te Tupuʼaga: “ ʼE ke pāui anai pea ʼe au tali atu anai.” Koutou fakavikiviki kiā Sehova, ʼaē ʼe fakaʼamu ʼaupito ke ina toe fakatuʼuake ia nātou ʼaē ʼe mole galo iā te ia!​—Sopo 14:⁠15.

[Kiʼi nota]

ʼE Kei Koutou Manatuʼi Koa?

• Koteā ʼaē ka fakatafito kiai te fakamāu ʼo te hahaʼi ʼi te ʼu Taʼu e Afe?

• He koʼe ko ʼihi ʼe “fakatuʼuake [ki] te maʼuli” pea ko ʼihi ʼe “fakatuʼuake [ki] te fakamāu”?

• ʼE lava fakafimālieʼi feafeaʼi tatou ia ʼaho nei e te ʼamanaki ʼo te fakatuʼuake?

• ʼE tokoni feafeaʼi mai te ʼu palalau ʼo te Pesalemo 145:16 ʼo ʼuhiga mo te ʼu fehuʼi ki te fakatuʼuake ʼaē ʼe mole heʼeki ʼi ai he ʼu tali kiai?

[Paki ʼo te pasina 21]

ʼE tokoni feafeaʼi mai kiā tatou ia ʼaho nei tatatou tui ʼaē ki te fakatuʼuake?