Neʼe Ina Fafaga Te Toko Lauʼi Afe ʼAki Ni Foʼi Pane Mo Ni Kiʼi Ika

Neʼe taka faifakamafola te ʼu apositolo ʼe toko 12 ʼi Kalilea, pea neʼe natou fakamatala kia Sesu “ia meʼa fuli neʼe natou fai pea mo tanatou akoʼi ia te hahaʼi.” ʼE mahino ia neʼe kua natou gaʼegagaʼe. Kaʼe neʼe mole maʼu pe la he temi ke natou kakai ai he neʼe lahi te feoloʼaki ʼa te hahaʼi. Koia neʼe ui fenei ai e Sesu: “Tou olo ki he koga meʼa lavaki ke tou malolo ai.”—Maleko 6:30, 31.

Koia, ʼi he koga meʼa neʼe lagi tuʼu ovi ki Kapenaume, neʼe natou heheka ai ki he vaka pea natou olo ki he koga meʼa lavaki ʼi te potu esite ʼo te Vai Tafe ʼo Solotane, ʼo fakalaka atu ʼi Petesaita. Kaʼe tokolahi te hahaʼi neʼe natou sisio ki tanatou mavae, pea ko ʼihi neʼe logo ki ai. Neʼe natou feleleʼi fuli ki te matatai ʼo fakatalitali ki te tau age ʼa te vaka.

ʼI te hifo ʼa Sesu ʼi te vaka, neʼe sio ki te hahaʼi tokolahi, pea neʼe ʼofa mamahi kia natou, koteʼuhi neʼe natou hage ko he ’u ovi ʼe mole honatou tauhi ovi. Koia “neʼe lahi te ʼu meʼa neʼe ina kamata akoʼi age kia natou” ʼo ʼuhiga mo te Puleʼaga. (Maleko 6:34) Neʼe ina toe fakamalolo mo “natou ʼae neʼe mahahaki.” (Luka 9:11) ʼI te afiafi, neʼe ui fenei age e te ʼu tisipulo: “ ʼE tuʼu mamaʼo te koga meʼa ʼaeni pea kua afiafi. Koia, fekauʼi te hahaʼi ke natou olo ki te ʼu kolo liliki ʼo totogi ai hanatou meʼa kai.”—Mateo 14:15.

Neʼe tali fenei age e Sesu: “ ʼE mole ʼaoga ke natou mavae, kotou foaki age hanatou meʼa kai.” (Mateo 14:16) Logo la neʼe kua iloʼi pe e Sesu te meʼa ʼae ka ina fai, kaʼe neʼe ina ʼahiʼahiʼi ia Filipo ʼaki te fehuʼi ʼaeni: “ ʼE tou totogi anai maifea he ʼu pane ke kai e te hahaʼi ʼaeni?” Neʼe ina fai te fehuʼi kia Filipo, he neʼe haʼu ia mai he kolo neʼe ovi ki Petesaita. Kaʼe ko te totogi ʼo he ʼu pane neʼe mole ko he puleʼaki ʼaia, he neʼe ko te toko 5 000 hahaʼi tagata. Pea kapau neʼe lau te hahaʼi fafine mo te fanau, neʼe feala pe ke natou toko 10 000 tupu. Neʼe tali fenei e Filipo: “ ʼE mole feʼauga he ʼu tenalio ʼe 200 [ko he tenalio ʼe tahi ʼe ko he totogi ʼo he ʼaho gaue ʼe tahi] moʼo totogi ʼaki he ʼu pane ke feala ai hanatou maʼu takitahi he kiʼi moʼi pane.”—Soane 6:5-7.

Lagi moʼo fakaha te mole feala ʼae ke fafaga te hahaʼi fuli ʼaia, neʼe ui fenei e Atelea: “ ʼE ʼi heni te kiʼi tama mo ʼana foʼi pane olose ʼe nima mo kiʼi ika ʼe lua. Kaʼe kotea tona ʼuhiga ki te hahaʼi tokolahi ʼaeni?”—Soane 6:9.

Neʼe ko te mahina ʼaia ʼo Malesio peʼe ko Apelili, ʼi muʼa ʼo te Pasikate ʼo te taʼu 32 H.T.S., pea neʼe lunaʼia te koga meʼa ʼae neʼe natou nonofo ai. Neʼe fakatotonu e Sesu ki ʼana tisipulo ke natou ui age ki te hahaʼi ke natou nonofo ifo fakakutuga ki te luna, ʼo taki toko 50 pea mo taki toko 100. Neʼe ina toʼo te ʼu foʼi pane ʼae ʼe nima pea mo te ʼu kiʼi ika ʼe lua, pea neʼe fakafetaʼi ki te ʼAtua. Neʼe ina tofitofi te ʼu foʼi pane pea mo vaevae te ʼu kiʼi ika. Pea neʼe foaki age leva e Sesu ki te ʼu tisipulo ke natou tufatufa ki te hahaʼi. Meʼa fakapunamaʼuli foki he neʼe kakai fuli te hahaʼi ʼo makokona.

Hili ʼaia, neʼe ui fenei age e Sesu ki ʼana tisipulo: “Kotou tanaki te ʼu toega kai ke ʼaua naʼa alu noa.” (Soane 6:12) Neʼe natou tanaki ai te ʼu toega kai pea neʼe fofonu ai kato ʼe 12.