Ke Taki Koutou e Sehova Ki Te ʼĀteaina Moʼoni
“[Kotou] sio loloto ki te lao haohaoa, lao o te ateaina.”—SAKP. 1:25.
ʼE FEALA KOA HAKOTOU FAKAMAHINO?
Ko te lao fea ʼaē ʼe ina teuteuʼi te hahaʼi ke natou maʼu te ʼāteaina moʼoni? ʼE fua lelei kiā ai te lao ʼaia?
Koteā ʼaē ʼe tonu ke tou fai ke tou maʼu te ʼāteaina moʼoni?
Ko te ʼāteaina fea ʼe maʼu anai e nātou fuli ʼaē ʼe natou haga fakalogo kiā Sehova?
1, 2. (1) ʼI te temi nei, kua feafeaʼi te ʼāteaina ʼaē ʼe maʼu e te hahaʼi? Koteā tona tupuʼaga? (2) Koteā te ʼāteaina ʼaē ʼe tui papau kiai te ʼu kaugana ʼa Sehova?
ʼI TE temi nei, kua lahi age te mānumānu ʼa te hahaʼi, mo tanatou agamālohi pea mo talagataʼa ki te ʼu lao. (2 Tim. 3:1-5) Koia ʼaē ʼe kua hilifaki ai e te ʼu puleʼaga he tahi ʼu lao, mo natou fakahahaʼi te kau polisi, pea mo fakaʼaogaʼi he ʼu kamela moʼo leʼoleʼo te hahaʼi. ʼI ʼihi fenua, ʼe maʼu ʼi te ʼu ʼapi ʼa te hahaʼi te ʼu masini moʼo fakaʼilo he tahi ʼe kaihaʼa, mo he ʼatu loka ʼi te ʼu matapā pea mo he ʼu ʼā ukamea ʼe hila moʼo puipui nātou. ʼI te lahi fau ʼo tanatou mataku, tokolahi ʼe mole lava ʼolo ki tuʼa ʼi te pōʼuli peʼe tuku ke gaoʼi tokotahi ʼanatou fānau ʼi tuʼa. ʼE hā mai ai ʼe mole kei maʼu e te hahaʼi he ʼāteaina ʼe feʼauga, pea ʼe lagi kei toe age lā tona kovi.
2 ʼI te ʼōloto ʼo Eteni, neʼe ʼui e Satana ʼe feala anai ke ʼāteaina moʼoni te hahaʼi mo kapau ʼe natou talagataʼa kiā Sehova. Ko te ʼu meʼa ʼaē neʼe hoko talu mai ai, ʼe fakamoʼoni ai neʼe loi! ʼE lahi te mamahi ʼa te hahaʼi heʼe mole natou fai te ʼu meʼa ʼaē ʼe loto kiai te ʼAtua, kae ko te ʼu meʼa pē ʼaē ʼe natou loto kiai. ʼE toe mamahi mo te ʼu kaugana ʼa Sehova ʼuhi ko te ʼaluʼaga ʼaia. Kae ʼe tou tui papau ʼe fakaʼāteaina anai te hahaʼi mai te agahala mo te pala, pea mo natou maʼu anai te faʼahi ʼaē ʼe fakahigoaʼi ʼi te Tohi-Tapu ko “te ateaina o te u foha a te Atua i te kololia.” (Loma 8:21) ʼE lolotoga teuteuʼi nei e Sehova ʼana kaugana ke natou maʼu ia te ʼāteaina ʼaia. Koteā ʼaē ʼe ina fai?
3. Koteā te lao ʼaē neʼe foaki e Sehova ki ʼana kaugana? Ko te ʼu fehuʼi fea ʼaē kā tou vakaʼi anai?
3 Moʼo teuteuʼi ʼana kaugana ke natou maʼu te ʼāteaina ʼaia ʼi te kā haʼu, neʼe foaki mai e Sehova kiā tātou “te lao haohaoa, lao o te ateaina” ʼaē neʼe talanoa kiai ia Sakopo. (Lau ia Sakopo 1:25.) Kae ʼi te agamāhani ʼe manatu e te hahaʼi ko te ʼu lao ʼe natou takitaki tonatou maʼuli kae mole feala ia hanatou faʼifaʼitaliha. Kae koteā lā “te lao haohaoa, lao o te ateaina”? Pea ʼe ina fakaʼāteainaʼi feafeaʼi tātou?
TE LAO ʼAĒ ʼE INA FAKAʼĀTEAINA TĀTOU
4. Koteā ia “te lao haohaoa, lao o te ateaina”? ʼE fua lelei kiā ai?
4 “Ko te lao haohaoa, lao o te ateaina” ʼe mole ko te Lao ʼaē neʼe foaki age e Sehova kiā Moisese. Heʼe ko te Lao ʼaia neʼe tuku ia ki te kau Iselaele ke natou ʼiloʼi ai tonatou ʼuhiga agahala, pea ʼe ko Kilisito ʼaē neʼe ina fakahoko te Lao ʼaia. (Mat. 5:17; Kal. 3:19) Pea koteā lā te lao ʼaē neʼe talanoa kiai Sakopo? Neʼe talanoa ia ki “te lao a Kilisito,” ʼaē ʼe toe fakaʼuhiga foki ki “te lao o te tui.” (Kal. 6:2; Loma 3:27) Koia ko “te lao haohaoa” ʼe ko meʼa fuli ʼaē ʼe fakamaʼua mai e Sehova kiā tātou. ʼE fua lelei te lao ʼaia ki te kau Kilisitiano fakanofo pea mo te tahi ʼu ovi.—Soa. 10:16.
5. He koʼē ʼe faigafua pē hatatou mulimuli ki te lao ʼo te ʼāteaina?
5 Ko “te lao haohaoa” ʼe kehekehe ia mo te ʼu lao ʼo te ʼu fenua. ʼE tou maʼu ai te ʼu fakatotonu pea mo te ʼu pelesepeto ʼe faigafua pē hatatou mahino peʼe mulimuli kiai. (1 Soa. 5:3) Neʼe ʼui fēnei e Sesu: “E malu taku amo taki, pea e maamaa taku kavega.” (Mat. 11:29, 30) Pea ko “te lao haohaoa” ʼe mole ko he ʼu tuʼuga lēkula ia. ʼE fakatafito ia ki te ʼofa, pea ʼe tohi ʼi te ʼatamai pea mo te loto, kae ʼe mole tohi ia ʼi he ʼu maka ohagē ko te ʼu Fakatotonu e Hogofulu ʼi te Lao ʼa Moisese.—Lau ia Hepeleo 8:6, 10.
ʼE FAKAʼĀTEAINA FEAFEAʼI TĀTOU E “TE LAO HAOHAOA”?
6, 7. Koteā ʼaē ʼe feala ke tou ʼui ʼo ʼuhiga mo te ʼu fakamaʼua ʼa Sehova? Koteā ʼaē ʼe fakagafua mai e te lao ʼo te ʼāteaina ke tou fai?
6 Neʼe fakatuʼu e Sehova te ʼu tuʼakoi maʼa te hahaʼi ke fua lelei kiā nātou pea mo puipui nātou. Ohagē lā ko te lao ʼo te nātulā ʼaē kā ʼalu he tahi ʼo fakatōtō mai he moʼuga, ʼe tō anai ʼo lavea peʼe mate. ʼE mole meo te hahaʼi ʼo natou ʼui ʼe natou taʼomia ʼi te ʼu lao ʼaia. Kae ʼe natou fakafetaʼi kiai heʼe natou mahino ʼe fua lelei kiā nātou. ʼO toe fēia pē, ko te ʼu fakamaʼua ʼa Sehova ʼaē ʼe tou ako ʼi “te lao haohaoa” ʼa Kilisito, ʼe toe fua lelei pē kiā tātou.
7 Ko te lao ʼo te ʼāteaina ʼe ina puipui tātou, pea ʼe feala ai foki ke tou fai te ʼu meʼa lelei fuli ʼaē ʼe tou loto kiai, ʼo toe fua lelei pē kiā tātou pea mo ʼihi atu. Koia ʼe feala pē hatatou fai te ʼu meʼa ʼaē ʼe tou loto kiai, mo kapau ʼe ko he ʼu meʼa ʼe lelei. Ko tona fakaʼuhiga ʼe tonu ke tou fia fakahoko te ʼu meʼa ʼaē ʼe leleiʼia e Sehova pea mo ʼana fakamaʼua ʼaē kiā tātou. ʼE tonu ke tou ako ke tou ʼofa ki te ʼu meʼa ʼe ʼofa kiai pea mo fehiʼa ki te ʼu meʼa ʼe fehiʼa kiai. ʼE tokoni mai te lao ʼo te ʼāteaina ke tou fai te faʼahi ʼaia.—Amo. 5:15.
8, 9. ʼE fua lelei feafeaʼi kiā tātou tatatou fakalogo ki te lao ʼo te ʼāteaina? Kotou tuku mai he faʼifaʼitaki.
8 ʼE faigataʼa ʼaupitō hatatou tātāʼofi te ʼu holi kovi heʼe tou agahala. Kae ʼe feala pē hatatou maʼu he ʼāteaina ʼi te temi nei mo kapau ʼe tou fakalogo ʼaki he agatonu ki te lao ʼo te ʼāteaina. Ohagē lā ko te tagata ʼe higoa ko Jay neʼe lahi tana suluka. ʼI te temi ʼaē neʼe ina kamata ako ai te Tohi-Tapu, neʼe ina ʼiloʼi ai ʼe fehiʼa te ʼAtua ki te aga ʼaia. Neʼe tonu ke ina filifili peʼe mulimuli anai ki tona holi ʼaē ke suluka peʼe fakalogo anai ia kiā Sehova. Neʼe ina fai te tonu fakapotopoto ʼaē ke tauhi ki te ʼAtua, logolā neʼe faigataʼa ʼosi kiā ia hana tuku tana suluka. Neʼe feafeaʼi ia Jay ʼi tana kua lava tuku tana agamāhani ʼaia? Neʼe ina ʼui neʼe lahi ʼosi tana fiafia pea mo tana “ ʼāteaina.”
9 Ko te maʼuli faʼifaʼitaliha ʼaē ʼe mulimuli kiai te hahaʼi ʼi te mālama, ʼe ina fakapelepeleʼi nātou ke natou fakafīmālie ʼonatou holi. Kae ohagē ko tona ako e Jay, ʼe liliu te hahaʼi ʼo pōpula ki te agahala. Ko nātou ʼaē ʼe fakalogo ki te lao ʼo te ʼāteaina ʼe natou tuku ke takitaki nātou e te laumālie ʼa te ʼAtua, pea ʼe natou maʼu ai te ʼāteaina, mo “te mauli mo te tokalelei.” (Loma 8:5, 6) Neʼe maʼu koa ʼifea e Jay te mālohi ke ina tuku tana suluka? Neʼe mole ina fai ia ʼaki tona mālohi. Kae neʼe ko te mālohi ia ʼa te ʼAtua, ʼaē neʼe ina maʼu ʼaki tana ako tuʼumaʼu ia te Tohi-Tapu, mo kole te laumālie māʼoniʼoni, pea mo tali te ʼu tokoni ʼofa ʼo te ʼu tehina mo tuagaʼane ʼo te kōkelekāsio. Ko te ʼu faʼahi ʼaia ʼe toe lava tokoni mai kiā tātou fuli ke tou maʼu te ʼāteaina moʼoni. ʼO feafeaʼi?
TOU SIO LOLOTO KI TE FOLAFOLA ʼA TE ʼATUA
10. Koteā te fakaʼuhiga ʼo te sio loloto ki te lao ʼa te ʼAtua?
10 ʼE tou lau fēnei iā Sakopo 1:25: “Ko ae e sio loloto ki te lao haohaoa, lao o te ateaina, pea e kataki fualoa o fai mau ia . . . e manuia anai i tana gaue.” Ko te kupu Fakakeleka ʼaē neʼe fakaliliu ʼaki te kupu “sio loloto” ko tona fakaʼuhiga ko he tahi ʼe falele ke sio lelei ki he faʼahi. Pea ʼe fakamaʼua kiai he ʼu faiga. Koia kapau ʼe tou loto ke takitaki e te lao ʼo te ʼāteaina ʼatatou manatu pea mo totatou loto, ʼe tonu ke tou faiga ʼo ako fakalelei pea mo tuʼumaʼu ia te Tohi-Tapu pea mo tou metitāsio loloto ki te ʼu meʼa ʼaē ʼe tou lau.—1 Tim. 4:15.
11, 12. (1) Koteā ʼaē neʼe ʼui e Sesu ʼe fakahā ai ʼe tonu ke tou mulimuli ki te moʼoni ʼi te ʼu faʼahi fuli ʼo totatou maʼuli? (2) Ohagē ko tona fakahā ʼi te pāki ʼaē ʼe tuʼu ʼi ʼoluga, ko te tuʼutāmaki fea ʼaē ʼe tonu ke tou tekeʼi, tāfito lā mokā kei tou tūpulaga?
11 Pea ʼe tonu foki ke tou kātaki ʼo maʼuliʼi te Folafola ʼa te ʼAtua. ʼE tonu ke tou mulimuli ki te moʼoni ʼi te ʼu faʼahi fuli ʼo totatou maʼuli. Neʼe toe tatau mo te manatu ʼa Sesu ʼi tana ʼui fēnei ki ʼihi neʼe tui kiā te ia: “Kapau e kotou nonofo mau i taku folafola, pea ko aku tisipulo mooni koutou; pea e kotou iloi anai te mooni, pea e fakaateainai anai koutou e te mooni.” (Soa. 8:31, 32) ʼE fakamahino ʼi te tikisionalio Fakatohi-tapu, ko te kupu “iloi” ʼi te vaega ʼaia ʼe ko tatatou mahino ʼaē ʼe maʼuhiga ʼi totatou maʼuli te ʼu meʼa ʼaē ʼe tou ʼiloʼi. Koia mokā tou mulimuli ki te moʼoni ʼi te ʼu faʼahi fuli ʼo totatou maʼuli pea ʼe ʼiloga ai kua tou ʼiloʼi kātoa te moʼoni. Koia ʼe “gaue” anai “te folafola a te Atua” iā tātou. ʼE tokoni mai anai ke tou haga fakahoko he ʼu fetogi ʼi totatou ʼuluagaaga, ke tou faʼifaʼitakiʼi lelei ai totatou Tamai ʼaē ʼi selō.—1 Tes. 2:13.
12 Kotou fai te ʼu fehuʼi ʼaenī kiā koutou: “ ʼE au ʼiloʼi lelei koa te moʼoni? ʼE au mulimuli koa kiai ʼi te ʼu faʼahi fuli ʼo toku maʼuli? Peʼe kei au holi pē koa ki te maʼuli faʼifaʼitaliha ʼo te mālama?” ʼE fakamatala e he tuagaʼane neʼe pusiaki e ʼana mātuʼa Kilisitiano te meʼa ʼaē neʼe hoko kiā ia. ʼI tana kei finemui, neʼe tui ia kiā Sehova kae neʼe mole faiga ia ke ina ʼiloʼi lelei. Neʼe ina tohi fēnei: “Neʼe mole au ako ke au fehiʼa ki te ʼu meʼa ʼaē ʼe fehiʼa kiai, heʼe ʼi taku manatu neʼe mole maʼuhiga kiā te ia taku aga. Pea neʼe mole au fakaovi kiā te ia ʼi te ʼu temi faigataʼa. Neʼe au falala pē au ki toku poto, kae ʼi te temi nei kua au ʼiloʼi neʼe kovi he neʼe mole au mahino ki he meʼa.” Meʼa lelei foki, he neʼe mahino leva ki te tuagaʼane neʼe hala tana manatu pea neʼe ina fai he ʼu fetogi lahi. Pea neʼe ina toʼo leva tana selevisi pioniē kātoa.
ʼE TOKONI ATU TE LAUMĀLIE MĀʼONIʼONI KE KOTOU ʼĀTEAINA
13. ʼE tokoni feafeaʼi mai te laumālie māʼoniʼoni ʼo te ʼAtua ke tou ʼāteaina?
13 ʼE tou lau fēnei iā 2 Kolinito 3:17: “I te kogamea e i ai te Laumalie o [Sehova], e i ai foki te ateaina.” ʼE tokoni feafeaʼi mai te laumālie māʼoniʼoni ke tou ʼāteaina? ʼE tokoni mai ke tou maʼu he ʼu kalitātē ohagē lā ko “te ofa, mo te fiafia, mo te tokalelei, mo te kataki, mo te agalelei, mo te agaofa, mo te agatonu, mo te agamalu, mo te agalolomi.” (Kal. 5:22, 23) ʼE mole ʼāteaina moʼoni te hahaʼi mo kapau ʼe mole natou maʼu te ʼu kalitātē ʼaia, tāfito lā te ʼofa, pea ʼe tou sio mata ki te faʼahi ʼaia ʼi te mālamanei. ʼI te ʼosi talanoa ʼa te ʼapositolo ko Paulo ki te fua ʼo te laumālie, neʼe ina tohi fēnei: “E mole fakafehagai te lao ki te u mea aia.” Koteā tona fakaʼuhiga? ʼE mole he lao ʼe ina tāʼofi te fua ʼo te laumālie ʼa te ʼAtua, pea ʼe mole ʼi ai anai he lao ʼe ina tāʼofi te tuputupu ʼo te ʼu kalitātē ʼaia ʼi totatou maʼuli. (Kal. 5:18) ʼE loto e Sehova ke tou haga fakahā te ʼu kalitātē ʼaia ʼo lahi age pea mo talu ai.
14. ʼE puleʼi feafeaʼi e te laumālie ʼo te mālamanei ia te hahaʼi?
14 Ko nātou ʼaē ʼe puleʼi e te laumālie ʼo te mālamanei pea mo fai pē te ʼu meʼa fuli ʼaē ʼe natou loto kiai, ʼe lagi maʼa nātou ʼe natou ʼāteaina. (Lau ia 2 Petelo 2:18, 19.) Kae ʼe mole mahino kiā nātou ʼe natou pōpula heʼe lahi te ʼu lao kua fai e te ʼu puleʼaga moʼo tātāʼofi ʼanatou aga pea mo ʼonatou holi. Pea neʼe ʼui e Paulo ʼe mole fai te ʼu lao “ki te tagata agatonu, kae ki te hahai pauu pea mo te hahai agatuu.” (1 Tim. 1:9, 10) ʼE natou toe pōpula ki tonatou kakano agahala heʼe natou “fai te u loto o te kakano” pea ko te kakano ʼe ko he pule agakovi ia. (Efe. 2:1-3) Ohagē ko he ʼu kiʼi manu ʼe natou fia kai te meli ʼe natou tō ki te ʼipu meli ʼo maʼua ai, pea ʼe toe fēia mo te hahaʼi ʼaia, ʼe natou mulimuli ki ʼonatou holi kovi pea ʼe natou pōpula ai ki te agahala.—Sakp. 1:14, 15.
ʼE TOU MAʼU TE ʼĀTEAINA ʼI TE LOTO KŌKELEKĀSIO
15, 16. Koteā te ʼu lelei ʼe tou maʼu talu mai tatatou kau ki te kōkelekāsio Fakakilisitiano? Ko te ʼāteaina fea ʼaē ʼe tou maʼu ʼi te kōkelekāsio?
15 Kapau ʼe kotou kau ki he kōkelekāsio Fakakilisitiano ʼe mahino ia neʼe mole kotou ʼolo ʼo kole ke tohi ai tokotou higoa. Kae neʼe ko Sehova ʼaē neʼe ina taki mai koutou kiai. (Soa. 6:44) He koʼē neʼe ina filifili koutou? Neʼe sio koa ki he tahi ʼe agatonu mo manavasiʼi ki te ʼAtua? ʼE lagi kotou tali anai “kailoa ia.” Kae koteā ʼaē neʼe sio kiai te ʼAtua? Neʼe ina tokagaʼi ʼe kotou fia fakalogo anai ki tana lao pea mo kotou fia tali anai tana takitaki ʼofa. Talu mai takotou kau ki te kōkelekāsio, neʼe tokaga ia Sehova kiā koutou ʼo ina akoʼi koutou ʼaki tana Folafola. Neʼe ina fakaʼāteaina koutou mai te ʼu loi ʼo te ʼu lotu hala pea mo ina akoʼi atu peʼe feafeaʼi hakotou faʼifaʼitakiʼi te ʼuluagaaga ʼo Kilisito. (Lau ia Efeso 4:22-24.) Koia kua kotou maʼu ia te pilivilēsio ke kotou kau ki te hahaʼi ʼaē ʼe natou maʼu te ʼāteaina moʼoni ʼi te mālamanei.—Sakp. 2:12.
16 Kotou fakakaukauʼi te faʼahi ʼaenī: Mokā kotou fakatahitahi mo nātou ʼaē ʼe ʼoʼofa kiā Sehova ʼaki tonatou loto kātoa, ʼe kotou mātataku koa? Kā kotou fai palalau mo te ʼu tehina mo tuagaʼane ʼi te Fale ʼo te Puleʼaga, ʼe kotou tuʼania koa naʼa kaihaʼa takotou kato? Kailoa ia. ʼE kotou logoʼi te fīmālie pea mo te ʼāteaina. ʼE kotou logoʼi koa te ʼu faʼahi ʼaia mokā ʼe kotou fakatahi mo he tahi age hahaʼi ʼi he tahi age koga meʼa? Kailoa ia. Kae ko te ʼāteaina ʼaē ʼe kotou maʼu ʼi te hahaʼi ʼa Sehova ʼi te temi nei, ʼe ko he koga pē ia ʼo te ʼāteaina ʼaē kā kotou maʼu anai ʼi te kā haʼu.
“TE ATEAINA O TE U FOHA A TE ATUA I TE KOLOLIA”
17. ʼE tokoni feafeaʼi anai te fakahā ʼo te ʼu foha ʼa te ʼAtua ki te hahaʼi ke natou maʼu te ʼāteaina?
17 Neʼe talanoa Paulo ʼo ʼuhiga mo te ʼāteaina ʼaē kā foaki anai e Sehova ki tana hahaʼi ʼi te kele. Neʼe ina ʼui fēnei: “E talitali . . . te malamanei katoa mo he holi mamahi ki te lakaga e fakaha anai e te Atua tana u foha.” Pea neʼe ina toe hoko atu fēnei: “E fakaateainai anai ia mai te popula o te pala, ke kau foki mo ia ki te ateaina o te u foha a te Atua i te kololia.” (Loma 8:19-21) Ko “te malamanei” ʼe ko te hahaʼi ʼaē ʼe natou ʼamanaki ke natou māʼuʼuli ʼo heʼegata ʼi te kele, pea mo maʼu anai te ʼu lelei mai te “fakahā” ʼo “te u foha a te Atua” ʼaē kua fakanofo. ʼE kamata anai te fakahā ʼaia ʼi te temi ʼaē kā tokoni anai te kau fakanofo ʼi selō kiā Kilisito, ke pulihi te kau agakovi pea mo taki “he hahaʼi kaugamalie” ki te mālama foʼou.—Apk. 7:9, 14.
18. ʼI te mālama foʼou, ʼe feafeaʼi anai te fakaʼāteaina māmālie ʼa te hahaʼi fakalogo? Ko te ʼāteaina fea ʼaē kā maʼu leva anai e te hahaʼi?
18 ʼE maʼu anai e te hahaʼi ʼi te temi ʼaia te ʼāteaina lahi heʼe mole kei fakaneke anai nātou e Satana pea mo te kau temonio. (Apk. 20:1-3) ʼI toe fīmālie lahi leva anai! ʼI te temi leva ʼaia, ko te toko 144 000 kau hau pea mo pelepitelō ʼe natou fakaʼaogaʼi anai te sākilifisio faitotogi moʼo tapuakina te hahaʼi, ʼo aʼu ki te ʼāteaina ʼosi ʼa te mālamanei mai te agahala. (Apk. 5:9, 10) ʼI te ʼosi ʼahiʼahiʼi ʼo tanatou tui, ʼe maʼu leva e te hahaʼi fakalogo te ʼāteaina moʼoni ʼaē neʼe loto kiai e Sehova ke natou maʼu ʼi te kamataʼaga, ʼaē ʼe ko “te ateaina o te u foha a te Atua i te kololia.” Kotou fakakaukauʼi age muʼa ʼe mole toe faigataʼa anai kiā koutou hakotou fai te meʼa ʼaē ʼe totonu kiā mata ʼo te ʼAtua. ʼE liliu anai tokotou sino, mo tokotou loto pea mo tokotou ʼatamai ʼo haohaoa pea ʼe feala anai hakotou faʼifaʼitaki lelei ʼosi ia te ʼu kalitātē ʼa te ʼAtua.
19. Kapau ʼe tou fia maʼu “te ateaina o te u foha a te Atua i te kololia,” koteā ʼaē ʼe tonu ke tou haga fai?
19 ʼE kotou fia maʼu koa “te ateaina o te u foha a te Atua i te kololia”? Kapau koia, kotou tuku ke haga takitaki tokotou ʼatamai pea mo tokotou loto e “te lao haohaoa, lao o te ateaina.” Kotou ako fakalelei tuʼumaʼu ia te Tohi-Tapu. Kotou mulimuli ki te moʼoni ʼi te ʼu faʼahi fuli ʼo tokotou maʼuli. Kotou kole te laumālie māʼoniʼoni. Kotou fakaʼaogaʼi kātoa te ʼu lelei mai te kōkelekāsio Fakakilisitiano pea mo te meʼa kai fakalaumālie ʼaē ʼe foaki mai e Sehova. Pea ʼaua naʼa lohiʼi koutou e Satana, ohagē ko tana fai kiā Eva, ʼo kotou manatu ʼe fefeka fau te ʼu meʼa ʼaē ʼe fakamaʼua atu e te ʼAtua. Logolā ko te Tēvolo ʼe faiva ʼi te kakā, kae ʼe mole feala ia ke mālo iā tātou, “he mole pouli kia tatou ana fakatuutuu.” ʼE tou vakaʼi anai te faʼahi ʼaia ʼi te ʼalatike kā hoa mai.—2 Ko. 2:11.
[Paki ʼo te pāsina 14]
ʼE kei au holi koa ki “te maʼuli faʼifaʼitaliha” ʼo te mālama?
[Paki ʼo te pāsina 14]
ʼE au mulimuli koa ki te moʼoni ʼi te ʼu faʼahi fuli ʼo toku maʼuli?