ʼE Tokaga Te ʼAtua Kia Koutou

KO MALIA, ko he fafine Kilisitiano mole heʼeki taʼu 50, neʼe lahi ʼaupito tona mamahi ʼi tona maʼuli. Ko tona ʼohoana ʼaē neʼe tono neʼe nā mavete kua hili kiai te ʼu taʼu e hogofulu tupu. Ki muli age, neʼe tauʼi e Malia te faigataʼaʼia ʼo tona ʼuhiga faʼe ʼi tana nofo tokotahi mo tana ʼu tamaliki ʼe toko fā. Kae ʼe kei nofo tokotahi pe ia, pea ʼi ʼihi temi ʼe hage ʼe mata faigataʼa ki ai te nofo tokotahi. ʼE ʼui fēnei e Malia, ‘ ʼE faka ʼuhiga koa ia ʼe mole tokaga te ʼAtua kia ʼau pea mo taku ʼu tamaliki ʼaē ʼe hala mo tāmai?’

Peʼe kua hoko kia koutou he fihifihia feiā peʼe kailoa, ʼe mahino ia ʼe feala ke koutou mahino ki te ʼu meʼa ʼaē neʼe logoʼi e Malia. Ko tatou fuli neʼe tou kātakiʼi te ʼu ʼahiʼahi kehekehe, pea e lagi neʼe tou fehuʼi peʼe ko te temi fea pea ʼe feafeaʼi anai te fai ʼo te ʼu gāue ʼa Sehova kia tatou. Ko ʼihi ʼi te ʼu meʼa ʼaia neʼe hoko, ʼe ko te ikuʼaga moʼoni ʼo tatatou maʼuliʼi te ʼu lao ʼa te ʼAtua. (Mateo 10:16-​18; Gāue 5:​29) Ko ʼihi meʼa ʼe ko te ikuʼaga ʼaia ʼo te heʼe haohaoa ʼo te tagata ʼaē ʼe maʼuli ʼi te mālama ʼa Satana. (1 Soane 5:​19) Neʼe tohi fēnei e te ʼapositolo ko Paulo: “Ko te ʼu meʼa fuli ʼaē neʼe fakatupu ʼo aʼu mai ki te temi ʼaenī, ʼe haga toʼetoʼe fakatahi pea mo mamahi fakatahi.”​—Loma 8:​22.

Kae, ko takotou tauʼi te ʼu fihifihia faigataʼa ʼe mole faka ʼuhiga ia kua līaki koutou e Sehova peʼe mole tokaga ia ki te meʼa ʼaē ʼe lelei kia koutou. ʼE lava feafeaʼi hakotou ʼiloʼi papau te faʼahi ʼaia? Koteā ʼaē ʼe hā ai ʼe tokaga te ʼAtua kia koutou?

Ko He Faʼifaʼitaki ʼo Te Temi ʼĀfea

ʼE foaki mai e te Tohi-Tapu te fakamoʼoni ʼe hā lelei ai te tokaga ʼa Sehova ki tana hahaʼi ʼi tonatou ʼuhiga takitokotahi. Tou vakaʼi te faʼifaʼitaki ʼo Tavite. Neʼe tokaga tāfito ia Sehova ki te tūpulaga ʼaia ʼe tauhi ōvi, ʼo ina tokagaʼi ia ia “ko he tagata agalelei ki tona loto.” (1 Samuele 13:14) Ki muli mai, ʼi te temi ʼaē neʼe hau ai ia Tavite, neʼe fakapapau age e Sehova ki ai: “ ʼE ʼau nofo anai mo koe ʼi he faʼahi pe e ke ʼalu ki ai.”​—2 Samuele 7:9.

Ko tona faka ʼuhiga koa neʼe “puipui” e te ʼAtua te maʼuli ʼo Tavite, ʼo ʼāteaina mai te ʼu faʼahiga fihifihia? Kailoa, neʼe tauʼi e Tavite te ʼu ʼahiʼahi faigataʼa ʼi muʼa atu pea mo te temi ʼaē neʼe lolotoga hau ai. ʼI te ʼu taʼu loaloaga ki muʼa atu ʼo tana nofo hau, neʼe tuli fakakinau ia e te Hau fai fakapō ko Saulo. Lolotoga te temi ʼaia ʼo tona maʼuli, neʼe tohi fēnei e Tavite: “Ko toku nefesi ʼe ʼi te lotolotoiga ʼo te ʼu laione . . . te ʼu foha ʼo te tagata, ʼaē ko tonatou ʼu nifo ʼe ko te ʼu tao pea mo te ʼu nahau.”​—Pesalemo 57:4.

Kae, ʼi te lolotoga ʼo tona mamahi neʼe ʼiloʼi papau e Tavite ʼe tokaga tāfito ia Sehova ki ai. Neʼe ina ʼui fēnei ʼi tana faikole kia Sehova: “Ke ʼau liliu ko he tahi ʼe hola, ko tau ʼui totonu ʼaia.” ʼIo, kia Tavite neʼe hage neʼe tohi e Sehova ia meʼa fuli. Pea neʼe toe ʼui fēnei e Tavite: “Ke ke ʼai toku ʼu loʼimata ki tau foʼi hina kiliʼi manu. ʼE mole tuku koa la ʼi tau tohi?”a (Pesalemo 56:8) ʼAki te fakatā ʼaenī, neʼe fakahā e Tavite tana falala ʼaē ʼe mole gata pe ʼi te ʼiloʼi e Sehova tona ʼaluʼaga, kae ʼe ina toe ʼiloʼi pe foki mo te ikuʼaga ʼo te faʼahi ʼaia ki tona loto.

ʼI te fakaʼosi ʼo tona maʼuli, neʼe feala ke tohi e Tavite te meʼa neʼe hoko ki tona maʼuli: “ ʼAki ia Sehova neʼe teuteuʼi te ʼu ala ʼo te tagata mālohi, pea ʼe Ina leleiʼia tona ala. Tatau aipe peʼe feala ke tō, ʼe mole lī anai ia ki lalo, he ko Sehova ʼe ina lagolago tona nima.” (Pesalemo 37:23, 24) ʼE toe feiā pe foki mo koutou ʼe feala ke koutou falala mo kapau ʼe hoholo atu tokotou ʼu mamahi pea mo ʼāʼāsili, ʼe tokagaʼi e Sehova pea ʼe maʼuhiga kia ia takotou faʼa kātaki. Neʼe tohi fēnei e Paulo: “ ʼE mole heʼe agatonu te ʼAtua ʼo galoʼi takotou gāue mo te ʼofa ʼaē neʼe koutou fakahā ʼo ʼuhiga mo tona huafa, ʼi takotou tauhi te kau maʼoniʼoni pea kei koutou lolotoga tauhi nei pe kia nātou.”​—Hepeleo 6:​10.

Pea tahi ʼaē meʼa, ʼe feala ke gāue ia Sehova maʼa koutou ʼo ina foaki atu te mālohi moʼo kātakiʼi ʼo he faʼahiga fihifihia pe ʼe feala ke hoko kia koutou. “ ʼE lahi te ʼu malaʼia ʼo te agatonu,” ko te tohi ʼaia ʼa Tavite, “kae ko Sehova ʼe ina faka ʼāteaina ia ia mai te ʼu faʼahi fuli.” (Pesalemo 34:19) ʼE moʼoni, ʼe ʼui mai e te Tohi-Tapu ko te ʼu mata ʼo Sehova “ ʼe taka ʼi te kele katoa, ke ina fakahā tona mālohi kia nātou ʼaē ʼe katoa tonatou loto kia te ia.”​—2 Fakamatala 16:9.

ʼE Fakalalata Koutou e Sehova

Ko te tahi fakamoʼoni ʼe hā ai ʼe tokaga ia Sehova kia tatou takitokotahi ʼe tou maʼu ʼi te ʼu palalau ʼa Sesu. “ ʼE mole he tahi ʼe feala ke haʼu kia te ʼau,” ko tana ʼui ʼaia, “mo kapau ko te Tāmai ʼaē neʼe ina fekauʼi mai ʼau ʼe ina fakalalata ia ia.” (Soane 6:​44) ʼIo, ʼe tokoni Sehova ki te hahaʼi takitokotahi ke nātou maʼu te ʼu fua lelei ʼo te sakilifisio ʼo Kilisito. ʼO feafeaʼi? ʼI hona ʼaluʼaga lahi, ʼe ina fakahoko te faʼahi ʼaia ʼaki te gāue fai faka mafola ʼo te Puleʼaga. ʼE moʼoni, ko te gāue ʼaia ʼe hage “ko he meʼa fakamoʼoni ia ki te ʼu puleʼaga katoa,” pea tahi ʼaē meʼa ʼe ina fakaaʼu te gāue ʼaia ki te hahaʼi takitokotahi. Ko tona faka ʼuhiga ko takotou fakalogo pea mo takotou tali te logo ʼo te logo lelei ʼe ko te fakamoʼoni ʼaia ʼe tokaga ia Sehova ki te ʼu meʼa ʼaē ʼe ʼaoga kia koutou.​—Mateo 24:14.

ʼAki te laumālie maʼoniʼoni, ʼe fakalalata e Sehova te ʼu hahaʼi ki tona ʼAlo pea ki te ʼamanaki ʼo te maʼuli heʼegata. Ko te faʼahi ʼaia ʼe faka fealagia ai ki te hahaʼi takitokotahi ke nātou mahino pea mo nātou maʼuliʼi te ʼu moʼoni fakalaumālie logope la tonatou ʼu tuʼakoi pea mo tonatou heʼe haohaoa. ʼE moʼoni, ʼe mole feala ke mahino he tahi ki te ʼu fakatuʼutuʼu ʼa te ʼAtua, mokā ʼe mole tokoni te laumālie ʼo te ʼAtua ki ai. (1 Kolonito 2:​11, 12) Ohage ko te tohi e Paulo ki te kau Tesalonika, “ko te tui ʼe mole ko he meʼa ʼe maʼu e te hahaʼi fuli.” (2 Tesalonika 3:2) ʼE foaki e Sehova tona laumālie maʼoniʼoni kia nātou pe ʼaē ʼe lotolelei ke fakalalata ia nātou.

ʼE fakalalata e Sehova tana hahaʼi koteʼuhi ʼe ʼofa ia kia nātou ʼi tonatou ʼuhiga takitokotahi pea ʼe loto ke nātou maʼu te maʼuli. ʼE ko he fakamoʼoni mālohi ʼaia ʼo te tokaga ʼa Sehova! Neʼe ʼui e Sesu: “Pea ʼe toe feiā pe, ʼe mole loto he tahi, ʼi te ʼapi ʼo taku Tāmai ʼaē ʼe ʼi selo, ke mate he tokotahi ia nātou liliki ʼaia.” (Mateo 18:14) ʼIo, kia mata ʼo te ʼAtua ʼe maʼuhiga te hahaʼi takitokotahi. Koia ʼaē neʼe feala ai ke tohi e Paulo: “ ʼE ina foaki anai kia nātou takitokotahi ʼo mulimuli pe ki tana ʼu gāue.” (Loma 2:6) Pea neʼe ʼui fēnei e te ʼapositolo ko Petelo: “Ko te ʼAtua ʼe mole fakapulepule; ʼi te fenua fuli pe ko te tagata ʼaē ʼe manavasiʼi kia te ia pea mo maʼuli ʼi te faitotonu ʼe ina leleiʼia.”​—Gāue 10:34, 35.

Te ʼu Milakulo ʼa Sesu

Ko te tokaga tāfito ʼa te ʼAtua ki te hahaʼi ʼe hā ʼi te ʼu milakulo faka malave loto ʼaē neʼe fai e tona ʼAlo, ko Sesu. Ko te ʼu milakulo ʼaia neʼe fai ʼaki te lotoʼofa. (Maleko 1:​40, 41) Mai tona ʼaluʼaga ʼaē ko Sesu “ ʼe mole feala hana fai he meʼa ʼi tona loto faʼitaliha, kae ʼe ina fai pe te meʼa ʼaē neʼe sio ʼe fai e te Tāmai,” ko tona manavaʼofa ʼe hā ai te paki faka malave loto ʼo te tokaga ʼaē ʼa Sehova ki tana ʼu kaugana takitokotahi.​—Soane 5:​19.

Tou tokagaʼi te talanoa ʼo te milakulo ʼaē neʼe fai e Sesu, ʼaē ʼe fakamatala ia Maleko 7:​31-​37. ʼI henī neʼe fakamālōlō e Sesu te tagata neʼe tuli pea neʼe lotomamahi ʼuhi neʼe faigataʼa tana palalau. Neʼe ina “toʼo kehe ia ia [te tagata] mai te hahaʼi,” ko te fakamatala ʼaia ʼa te Tohi-Tapu. Pea, “ ʼi tana haga ake ki te lagi neʼe mānava lahi ia pea ʼui maʼana kia te ia: ‘Ephʹpha·tha,’ ko tona faka ʼuhiga, ‘Ke ke ava.’ ”

He koʼe neʼe toʼo kehe e Sesu te tagata ʼaia mai te hahaʼi? ʼE moʼoni e lagi ko te tagata ʼaia ʼe tuli ʼaē ʼe faigataʼa tana palalau, ʼe umiuminoa anai ʼi muʼa ʼo te hahaʼi. E lagi neʼe fakatokagaʼi e Sesu te umiuminoa ʼo te tagata ʼaia, pea koia la ʼaē neʼe ina fili ai ke ina fakamālōlō ia ia ʼo mamaʼo mo te hahaʼi. Neʼe fakatokagaʼi e te tagata sivi Tohi-Tapu: “Ko te hisitolia katoa, ʼe ina fakahā tāfito mai neʼe mole tokagaʼi pe e Sesu te tagata ʼaia ohage pe ko he mahaki; ka neʼe ina tokagaʼi ia ia ʼi tona ʼuhigaʼi tagata. Neʼe ʼi ai te meʼa makehe neʼe ʼaoga ki te tagata pea neʼe ʼi ai mo tona fihifihia makehe, pea ʼaki te manavaʼofa lahi neʼe tokaga ia Sesu ki ai ʼo mulimuli ki te ʼu meʼa ʼaē ʼe ʼi tona loto pea mo te meʼa ʼaē ʼe feala ke mahino ia kiai.”

Ko te fakamatala ʼaia ʼe ina fakahā mai neʼe tokaga tāfito ia Sesu ki te meʼa ʼaē ʼe ʼaoga ki te hahaʼi. ʼE feala ke koutou ʼiloʼi papau ʼe tatau mo tana tokaga ʼaē kia koutou. ʼE moʼoni, ko tona mate faka sakilifisio ʼe ko he fakahā ʼaia ʼo tona ʼofa ke feala ai he totogi ʼo te hahaʼi ʼi te malamanei katoa. Kae, ʼe feala ke koutou fakaʼaogaʼi te faʼahi ʼaia kia koutou takitokotahi, ohage ko te ʼui e Paulo, ʼaē neʼe ina tohi fēnei: ko “te ʼAlo ʼo te ʼAtua . . . neʼe ʼofa kia te ʼau pea mo ina foaki ia ia ʼuhi ko ʼau.” (Kalate 2:​20) Pea ʼi te ʼui ʼaē e Sesu ‘ko ia ʼaē neʼe sio kia te ia neʼe toe sio ia ki te Tāmai,’ ʼe feala ke tou ʼiloʼi papau ʼe toe feiā pe te tokaga ʼa Sehova ki tana ʼu kaugana takitokotahi.​—Soane 14:9.

ʼE Liliu Ia Sehova Ko He Tahi ʼe Ina Fakapale

Ko te maʼu ʼo te ʼatamai mālama ʼo ʼuhiga mo te ʼAtua ʼe pipiki kiai tatatou ʼiloʼi te ʼu faʼahi kehekehe ʼo tona ʼulugaaga ohage ko tona fakahā ʼi te Tohi-Tapu. Ko te huafa totonu ʼo Sehova ko tona faka ʼuhiga “ ʼE ina fai ke hoko,” ʼe hā ʼaki ai ʼe feala ke fai e Sehova he faʼahiga meʼa pe ʼe ina fakatuʼutuʼu moʼo fakahoko ʼo tona finegalo. ʼI te lolotoga ʼo te hisitolia, neʼe ina fakahoko tona ʼu tuʼulaga kehekehe, ʼo kau ai tona ʼuhiga Tupuʼaga, Tāmai, Tuʼi ʼAliki, Tagata Tauhi Ōvi, Sehova ʼo te kautau, ʼe Fakalogo ki te ʼu faikole, Tuʼi Fakamāu, Faiako Lahi, pea ko Ia ʼaē ʼe ina totogi.b

Ke feala hatatou mahino katoa ki te huafa ʼo te ʼAtua, ʼe tonu foki ke tou ʼiloʼi ia Sehova ʼi tona ʼuhiga fai Fakapale. Neʼe tohi fēnei e Paulo: “Ka ʼe mole ʼi ai te tui ʼe molemo feala ke kita lelei kia ia, heʼe ko ʼaē ʼe fakaōvi ki te ʼAtua ʼe tonu ke tui ko ia pea ʼe ko ia ʼaē ʼe ina fakapale ia nātou ʼaē ʼe nātou kumi moʼoni ia ia.”​—Hepeleo 11:6.

Neʼe fakapapau e Sehova te maʼuli heʼegata ʼi te palatiso ʼi te kele kia nātou ʼaē ia ʼaho nei ʼe nātou fili ke nātou tauhi kia te ia mo tonatou loto katoa. ʼE mole kita manatu pe kia kita mokā kita holi fakavilivili ke hoko te fakapapau fakaofoofo ʼaia, pea ʼe mole kovi hakita manatu kua kita maʼuli totonu ʼi te faʼahi ʼaia. Ko Moisese neʼe “sio fakamamaʼu ia ki te totogi ʼo te fakapale.” (Hepeleo 11:26) ʼO feiā aipe mo Paulo neʼe holi fakavilivili ke sio ki te hoko ʼo te fakapapau ʼo ʼuhiga mo te kau Kilisitiano fakanofo agatonu. Neʼe ina tohi fēnei: “ ʼE hoko atu taku lele ki te totogi ʼo te pāui ʼa te ʼAtua, pāui ki selo, ʼaki ia Kilisito Sesu.”​—Filipe 3:​14.

Mo koutou foki ʼe feala ke koutou holi fakavilivili ki te fakapale ʼaē ʼe fakapapau e Sehova kia nātou ʼaē ʼe faʼa kātaki. Ko te sio fakatomuʼa ki te fakapale ʼaia ʼe ko he koga tāfito ʼo takotou ʼatamai mālama ʼo ʼuhiga mo te ʼAtua pea mo takotou faʼa kātaki ʼi tana gāue. Koia ke koutou metitasio ʼi te ʼaho fuli ki te ʼu tapuakina ʼaē ka foaki mai e Sehova. Ko Malia, ʼaē neʼe talanoa kiai ʼi te kamataʼaga, neʼe ina fai he faiga makehe moʼo fai te meʼa ʼaenī. “Ko te hoki hokoe ʼi toku maʼuli,” ko tana ʼui ʼaia, “neʼe hoki ʼau tali pe te fakaʼaogaʼi ʼo te sakilifisio faitotogi ʼa Sesu kia te ʼau. Kua ʼau kamata logoʼi ʼe tokaga ia Sehova kia ʼau ʼi toku ʼuhiga fafine. Neʼe ʼau liliu ko he Kilisitiano kua ʼosi kiai taʼu e 20 tupu, kae neʼe mole heʼeki faʼa fualoa taku tui moʼoni ki te faʼahi ʼaia.”

ʼAki te ako ʼo te Tohi-Tapu pea mo tona metitasioʼi fakamalotoloto, ko Malia, mo ʼihi lauʼi miliona hahaʼi, ʼe nātou lolotoga mahino ʼe tokaga ia Sehova ki tana hahaʼi, ʼo mole gata pe ʼi tonatou ʼuhiga kūtuga kae ʼi tonatou ʼuhiga takitokotahi. ʼI te mahino papau ʼa te ʼapositolo ko Petelo ki te faʼahi ʼaia neʼe ina tohi, ʼo fēnei: “Vevete kia te ia [te ʼAtua] takotou ʼu tuʼania fuli, heʼe tokaga ia kia koutou.” (1 Petelo 5:7) ʼIo, ʼe tokaga te ʼAtua kia koutou!

[Nota ʼi te lalo pasina]

[Talanoa ʼo te pasina 6]

Te Fakatuʼuake​—Ko Te Fakamoʼoni ʼo Te Tokaga ʼa Te ʼAtua Kia Tatou

KO TE fakamoʼoni tāfito ʼo te tokaga ʼa te ʼAtua kia tatou takitokotahi ʼe tou maʼu ʼi te Tohi-Tapu ia Soane 5:​28, 29: “ ʼE hoko mai anai te hola ʼaē ʼe logo ai anai ia nātou fuli ʼaē ʼe nonofo ʼi te ʼu falemaka fakamanatu ki tona leʼo [ʼo Sesu] pea ʼe nātou haʼu anai ki tuʼa.”

ʼE tou fakatokagaʼi ko te kupu faka Keleka mne·meiʹon (falemaka fakamanatu) ʼaē ʼe fakaʼaogaʼi ʼi henī, ka mole ko te kupu taʹphos (tānuma). Ko te kupu taʹphos ʼe faka ʼuhiga ki te faitoka. Kae ko te kupu mne·meiʹon ʼe hā ʼaki ai ko ia ʼaē kua mate ʼe toe manatuʼi.

ʼO ʼuhiga mo te faʼahi ʼaia, tou fakakaukauʼi muʼa te fakatuʼuake ʼaē ka fakahoko anai e Sehova ʼAtua. Moʼo ʼaumai ʼo he tahi ki te maʼuli, ʼe tonu ke ina ʼiloʼi meʼa fuli ʼo ʼuhiga mo ia ʼaia​—ʼo kau ai tona ʼu agaaga pea mo tana ʼu manatu katoa. Pea ko te faʼahi pe ʼaia ʼaē ʼe feala ai ki he tahi ke toe fakatuʼuake ʼo mulimuli pe ki tona ʼuhiga totonu.

ʼE mahino ia, ko te meʼa ʼaia ʼe faigataʼa ki te manatu ʼa te tagata, kae “ko meʼa fuli ʼe feala ki te ʼAtua.” (Maleko 10:27) ʼE toe feala foki ke ina ʼiloʼi lelei te meʼa ʼaē ʼe ʼi te loto ʼo he tahi. Tatau aipe pe neʼe mate he tahi kua hili kiai he ʼu sēkulō, ʼe manatuʼi tuʼumaʼu ia e te ʼAtua; ʼe mole galo ia. (Sopo 14:13-​15) Koia, ʼi tana talanoa ʼo ʼuhiga mo Apalahamo, Isaake, pea mo Sakopo, neʼe feala ke ʼui e Sesu tatau aipe peʼe neʼe nātou mamate kua hili kiai he ʼu sēkulō, ko Sehova “ ʼe mole ko he ʼAtua ʼo te kau mate, kaʼe ʼo te kau maʼuʼuli, heʼe kia ia ʼe nātou maʼuʼuli fuli.”​—Luka 20:38.

Koia, ko te lauʼi miliale hahaʼi kua ʼosi mamate ʼe kei manatuʼi nātou e Sehova ʼi tonatou ʼu agaaga kehekehe. ʼI fakamoʼoni fakatalakitupua leva ʼo te tokaga ʼa te ʼAtua ki tonatou ʼuhiga takitokotahi!

[Paki ʼo te pasina 7]

Neʼe tokaga lelei ia Sesu kia nātou ʼaē neʼe ina fakamālōlō