Ko Sehova—Ko Te ʼAtua ʼe Faiakonaki

“ ʼE akoʼi anai nātou fuli e Sehova.”—Soane 6:45.

1. Koteā ʼaē ʼe fai e Sesu ʼi te temi nei ʼi Kapenaume?

NEʼE ko te hoki ʼosi age ʼaē ʼo te fai milakulo ʼa Sesu Kilisito pea koʼeni leva ia ʼe fai akonaki ʼi te sinakoka ʼi Kapenaume, ʼe ōvi ki te Tai ʼo Kalilea. (Soane 6:1-21, 59) Tokolahi neʼe nātou fakahā tanatou mole tui ʼi te temi ʼaē neʼe ina ʼui fēnei ai: “Neʼe ʼau hifo mai te lagi.” Neʼe nātou muhumuhu fēnei: “ ʼE mole koa la ko Sesu, te foha ʼo Sosefo, ʼaē ʼe tou ʼiloʼi pe tana tāmai pea mo tana faʼe? He koʼe ia ʼe ina ʼui nei, ‘Neʼe ʼau hifo mai te lagi’?” (Soane 6:38, 42) Moʼo fakatonutonuʼi nātou, ʼe ʼui fēnei age e Sesu: “ ʼE mole he tahi ʼe feala ke haʼu kia te ʼau, mo kapau ko te Tāmai ʼaē neʼe ina fekauʼi mai ʼau ʼe ina taki ia ia; pea ʼe ʼau fakatuʼuake anai ia ia ʼi te ʼaho fakamuli.”—Soane 6:44.

2. Koteā te fakatafito ʼe tou maʼu moʼo faka tui ki te fakapapau ʼa Sesu ʼo ʼuhiga mo te toe fakatuʼuake?

² ʼE ko he fakapapau taulekaleka ia—te toe fakatuʼuake ʼi te ʼaho fakamuli, ʼi te temi ʼaē ʼe ʼafio ai te Puleʼaga ʼo te ʼAtua! ʼE feala pe ke tou faka tui ki te fakapapau ʼaia koteʼuhi ʼe ko he fakamoʼoni ʼaia mai te Tāmai, ia Sehova ʼAtua. (Sopo 14:13-15; Isaia 26:19) ʼIo, ko Sehova, ʼaē ʼe akonaki ʼo ʼuhiga mo te toe fakatuʼuake ʼo te ʼu mate, ʼe “ko te tagata fai akonaki ʼaē ʼe lahi tokotahi.” (Sopo 36:22, Today’s English Version) ʼI tana fakatokagaʼi age te akonaki ʼa te Tāmai, ʼe toe ʼui fēnei e Sesu: “ ʼE tohi ʼi te ʼu Polofeta, ‘Pea ʼe akoʼi anai nātou fuli e Sehova.’ ”—Soane 6:45.

3. Koteā anai te ʼu fehuʼi ka tou vakaʼi?

³ ʼE mahino ia, ʼe ko he pilivilesio anai hakita kau ia nātou ʼaē neʼe tohi e te polofeta ko Isaia te manatu ʼaenī: “Ko tou ʼu foha fuli ʼe nātou liliu anai ko he ʼu hahaʼi neʼe akoʼi e Sehova.” (Isaia 54:13) ʼE feala koa ke tou kau ia nātou ʼaia? Ko ai koa ʼaē neʼe hage ko ni ʼona ʼu foha pea mo maʼu tana ʼu akonaki? Koteā te ʼu akonaki maʼuhiga ʼa Sehova ʼe tonu ke tou ʼiloʼi pea mo te aga ke tou fai moʼo maʼu ai tana tapuakina? Neʼe feafeaʼi te faiakonaki ʼa Sehova ʼi te ʼu temi muʼa, pea ʼe toe tatau aipe koa tana faiakonaki ia ʼaho nei? Ko te ʼu fehuʼi ʼaia ʼe tou vakaʼi anai.

Ko Te Tāmai, Ko Te Tagata Faiakonaki, Ko Te Tagata ʼOhoana

4. Ko ai koa te ʼuluaki foha ʼa Sehova ʼaē neʼe ina maʼu tana ʼu akonaki?

⁴ Ko Sehova neʼe ʼuluaki liliu ia ko te Tāmai pea mo Tagata Fai Akonaki ʼi te temi ʼaē neʼe ina fakatupu ai tona ʼAlo ʼulu tokotahi, ia Sesu ʼi muʼa ʼo tana haʼu ʼo tupu tagata ʼi te kele. Neʼe higoaʼi ia ia “ko te Folafola” koteʼuhi ko ia neʼe ko te ʼAve Folafola Tāfito ʼa Sehova. (Soane 1:1, 14; 3:16) Ko te Folafola neʼe “liliu ʼi te tafa [ʼo te Tāmai] ohage ko he tahi ʼe gāue faiva,” pea neʼe ina ako fakalelei te akonaki ʼa tana Tāmai. (Tāʼaga Lea 8:22, 30) ʼI tona fakahagatonu, neʼe liliu ia ko te Tagata Gāue, peʼe ko he meʼa gāue neʼe fakaʼaogaʼi e te Tāmai moʼo fakatupu niʼihi age ʼu meʼa, ʼo kau ai te ʼu “foha ʼo te ʼAtua.” Neʼe feala pe ke nātou fakafiafia ʼi tonatou akoʼi ʼaē e te ʼAtua! (Sopo 1:6; 2:1; 38:7; Kolose 1:15-17) Ki muli age, neʼe fakatupu te ʼuluaki tagata, ko Atama. Mo ia pe foki neʼe ko te “foha ʼo te ʼAtua,” pea ʼe fakahā e te Tohi-Tapu ko Sehova ʼaē neʼe ina akoʼi ia ia.—Luka 3:38; Senesi 2:7, 16, 17.

5. Koteā te pilivilesio maʼuhiga ʼaē neʼe mole kei maʼu e Atama, kae ko ai ʼaē neʼe akoʼi e Sehova, pea koteā tona tupuʼaga?

⁵ Kae meʼa fakaʼofaʼofa, ko Atama, ʼaki tana talagataʼa faʼifaʼitaliha, neʼe mole kei na maʼu te pilivilesio ʼaē ke faka ʼuhiga ia ia ko he foha ʼo te ʼAtua. Koia ʼaē, ko tona hōloga neʼe mole feala ke nātou ʼui ʼe ko nātou ko ni ʼu foha ʼo te ʼAtua ʼaki pe tonatou fānauʼi age. Kae, neʼe akoʼi e Sehova te ʼu hahaʼi heʼe haohaoa ʼaē neʼe nātou haga age kia te ia ke ina taki nātou. Ohage la ko Noe, neʼe ina fakahā ko ia ʼe “ko he tagata agatonu” neʼe “haʼele mo te ʼAtua moʼoni,” pea ko Sehova neʼe ina akoʼi ia Noe. (Senesi 6:9, 13–7:5) ʼAki tana fakalogo, neʼe fakahā e Apalahamo ko ia “ko te kaumeʼa ʼo Sehova,” pea tahi ʼaē meʼa neʼe toe akoʼi pe foki mo ia e Sehova.—Sake 2:23; Senesi 12:1-4; 15:1-8; 22:1, 2.

6. Ko ai koa ʼaē neʼe faka ʼuhigaʼi e Sehova ohage ko tona “foha,” pea neʼe ko te faʼahiga tagata faiakonaki feafeaʼi ia kia nātou?

⁶ Hili te temi fualoa ki muli age, lolotoga ʼo te ʼu ʼaho ʼo Moisese, neʼe fai e Sehova te fuakava mo te puleʼaga ʼo Iselaele. Pea neʼe liliu te puleʼaga ʼaia ko tana hahaʼi neʼe ina fili pea neʼe faka ʼuhiga ia ohage ko hona “foha.” Neʼe ʼui maʼa te ʼAtua: “Ko Iselaele ʼe ko toku foha.” (Ekesote 4:22, 23; 19:3-6; Teutalonome 14:1, 2) ʼO fakatafito ki te fuakava ʼaia, neʼe feala ke ʼui e te kau Iselaelite, ohage ko tona fakahā e te polofeta ko Isaia, ʼo fēnei: “Ko koe, Ê Sehova, ko tomatou Tāmai.” (Isaia 63:16) Neʼe fakahoko e Sehova tona maʼua ʼaē ʼi tona ʼuhiga tāmai pea ʼaki te ʼofa neʼe ina akoʼi tana fānau, ia Iselaele. (Pesalemo 71:17; Isaia 48:17, 18) ʼI tona fakahagatonu, ʼi te temi ʼaē neʼe nātou heʼe agatonu ai, ʼaki te loto manavaʼofa neʼe ina ʼui age kia nātou: “Koutou tafoki mai, Ê ʼu foha heʼe agatonu.”—Selemia 3:14.

7. Neʼe feafeaʼi te ʼaluʼaga ʼo Iselaele pea mo Sehova?

⁷ ʼO mulimuli pe ki te fuakava ʼaē neʼe fai mo Iselaele, neʼe hage pe foki ia Sehova ʼi hona ʼaluʼaga fakatātā ko he ʼOhoana ʼo te puleʼaga, pea ki te puleʼaga ko hona hoa fakatātā. ʼO ʼuhiga mo te hoa ʼaia, neʼe tohi fēnei e te polofeta ko Isaia: “Ko tou Tupuʼaga lahi, ʼe ko hou pule pea mo hou ʼohoana, ko Sehova ʼo te kautau ʼe ko tona huafa.” (Isaia 54:5; Selemia 31:32) Logope la ʼaē ko Sehova neʼe ina fai lelei tona tuʼulaga ʼi tona ʼuhiga Tagata ʼOhoana, ko te puleʼaga ʼo Iselaele neʼe liliu ko te fafine ʼohoana heʼe agatonu. Neʼe ʼui maʼa Sehova: “Ohage ko he fafine ʼe ina kākāʼi tona hoa ʼo mavae mai ia ia, ʼe toe feiā pe mo koutou, Ê ʼapi ʼo Iselaele, neʼe koutou aga fakakākā kia te ʼau.” (Selemia 3:20) Neʼe fakatokagaʼi tuʼumaʼu pe e Sehova te ʼu foha ʼo tona hoa heʼe tui; neʼe haga nofo pe ia ko tonatou “Tagata Faiako Lahi.”—Isaia 30:20; 2 Fakamatala 36:15.

8. Logope ko Iselaele ʼi tona ʼuhiga puleʼaga neʼe fakafisi kiai Sehova, koteā ʼaē ʼe ina fakatātā nei te ʼohoana ʼaē ʼe toe maʼu e Sehova?

⁸ ʼI te temi ʼaē neʼe fakafisi ai Iselaele pea mo ina matehi Tona ʼAlo, ia Sesu Kilisito, neʼe haga leva te ʼAtua ʼo līaki ia ia. Koia ko te puleʼaga faka Sutea ʼaia neʼe mole kei faka ʼuhigaʼi leva ia ko hona ʼohoana fakatātā, ʼo toe feiā pe mo Sehova, neʼe mole kei faka ʼuhigaʼi ia ko he Tāmai pea mo he Tagata Faiakonaki maʼa te ʼu foha talagataʼa ʼo te fafine ʼaia. (Mateo 23:37, 38) Kae, ko Iselaele neʼe ina fakatātā te fafine. Neʼe toe toʼo e te ʼapositolo ko Paulo te manatu ʼaē ʼe tuʼu ia Isaia 54:1, ʼe talanoa ai ki te “fafine paʼa” pea ʼe kehekehe ia mo “te fafine ʼaē ʼe ʼi ai tona pule pea mo tona hoa,” te puleʼaga ʼo Iselaele ʼi te kakano. ʼE fakahā e Paulo ko te kau Kilisitiano fakanofo ʼe ko te fānau ʼa te “fafine paʼa,” ʼaē ʼe ina fakahigoaʼi ko te “Selusalemi ʼi ʼoluga.” Ko te fafine fakatātā ʼaia ʼe faʼufaʼu e te kautahi ʼo te ʼu meʼa maʼuli fakalaumālie ʼa te ʼAtua ʼaē ʼi selo.—Kalate 4:26, 27.

9. (a) Ko ai koa ʼaē neʼe talanoa ki ai Sesu ʼi te temi ʼaē neʼe ina ʼui ai ‘ko tou ʼu foha neʼe akoʼi e Sehova’? (b) Koteā anai ʼaē ka fakatafito kiai te faka ʼuhigaʼi ʼo te hahaʼi ko te ʼu foha fakalaumālie ʼa te ʼAtua?

⁹ Koia, ʼi te sinakoka ʼo Kapenaume, ʼi te toe toʼo e Sesu te lea faka polofeta ʼa Isaia ʼaē ʼe ʼui fēnei: “Ko tou ʼu foha fuli ʼe nātou liliu anai ko he ʼu hahaʼi neʼe akoʼi e Sehova,” neʼe talanoa ia ʼo ʼuhiga mo nātou ʼaē ʼe liliu anai ko te ʼu “foha” ʼo te “Selusalemi ʼaē ʼi ʼoluga,” ko te kautahi ʼa te ʼAtua ʼi selo ʼaē ʼe fakatatau ki he fafine ʼohoana. ʼAki te tali ʼo te ʼu akonaki ʼa Sesu Kilisito, ia ia ʼaē ʼe ina fakafofoga te ʼAtua, neʼe feala ki te kau Sutea ʼaē neʼe fagono kia te ia, ke nātou liliu ko he ʼu fānau ʼa te fafine ʼaē ʼi selo ʼo te ʼAtua, ʼaē ki muʼa atu neʼe paʼa, pea ko te ʼu fānau ʼaia ʼe nātou faʼufaʼu “te puleʼaga maʼoniʼoni,” te “Iselaele ʼo te ʼAtua” fakalaumālie. (1 Petelo 2:9, 10; Kalate 6:16) Moʼo fakamatalatala te fealagia lahi ʼaē neʼe foaki age e Sesu ke nātou liliu ko ni ʼu foha fakalaumālie ʼo te ʼAtua, neʼe tohi e te ʼapositolo ko Soane, ʼo fēnei: “Neʼe haʼu kio ia totonu, kae ko tana hahaʼi totonu neʼe mole nātou tali ia ia. Kae, kia nātou fuli ʼaē neʼe nātou tali ia ia, neʼe ina foaki age kia nātou te fealagia ʼaē ke nātou liliu ko ni ʼu fānau ʼa te ʼAtua, koteʼuhi neʼe nātou haga tui ki tona huafa.”—Soane 1:11, 12.

Te ʼu Akonaki Maʼuhiga ʼa Sehova

10. ʼI te ʼosi atu pe ʼo te talagataʼa ʼaē ʼi Eteni, koteā te akonaki neʼe fai e Sehova ʼo ʼuhiga mo te “hāko,” pea ko ai koa te Hāko ʼaia?

¹⁰ Ko Sehova, ohage ko he Tāmai ʼofa, ʼe ina fakahā ki tana ʼu fānau tana ʼu fakatuʼutuʼu. Koia, ʼi te temi ʼaē neʼe haga ai te ʼaselo fakafeagai ʼo fakahēhē te ʼuluaki taumatuʼa ke nā talagataʼa, neʼe foimo fakahā aipe e Sehova te meʼa ʼaē ka ina fai anai moʼo fakahoko tana fakatuʼutuʼu ʼaē ke liliu te kele ko he palatiso. Neʼe ina ʼui, ʼe ina tuku anai te fehiʼa ʼi “te gata olisinale” ia Satana te Tevolo pea mo “te fafine.” Pea neʼe ina fakamahinohino ko te “hāko” ʼo te fafine ʼe ina fakavolu moʼoni anai ia Satana, “ ʼi [tona] ʼulu.” (Senesi 3:1-6, 15; Fakahā 12:9; 20:9, 10) Ohage ko te meʼa kua tou mahino kiai, ko te fafine—ki muli age neʼe faka ʼuhigaʼi ko te “Selusalemi ʼaē ʼi ʼoluga”—ko te kautahi ʼo te ʼu meʼa maʼuli fakalaumālie ʼaē ʼi selo ʼa te ʼAtua. Kae ko ai koa tona “hāko”? Ko te ʼAlo ʼo te ʼAtua, ia Sesu Kilisito, ia ia ʼaē neʼe fekauʼi mai te lagi pea ʼe ʼamanaki anai ke ina fakaʼauha ia Satana.—Kalate 4:4; Hepeleo 2:14; 1 Soane 3:8.

11, 12. Neʼe feafeaʼi te fakamahino e Sehova tana akonaki maʼuhiga ʼo ʼuhiga mo te “hāko”?

¹¹ Neʼe toe fakamahino e Sehova te akonaki maʼuhiga ʼaia ʼo ʼuhiga mo te “hāko,” ʼi te temi ʼaē neʼe ina fai ai te fakapapau ʼaenī kia Apalahamo: “ ʼE ʼau fakahahaʼi moʼoni anai tou hāko ke hage ko te ʼu fetuʼu ʼo te lagi . . . ʼUhi ʼe ko tou hāko ʼaē ka tapuakina moʼoni ai anai te ʼatu puleʼaga fuli pe ʼo te kele.” (Senesi 22:17, 18) Neʼe fakaʼaoga e Sehova ia te ʼapositolo ko Paulo moʼo fakamahinohino ko Sesu Kilisito ʼe ko te Hāko ʼo Apalahamo ʼaē neʼe fakapapau mai kae ko ʼihi ʼe nātou liliu anai mo nātou ko te koga ʼo te “hāko.” Neʼe tohi fēnei e Paulo: “Kapau ko koutou ʼe ʼa Kilisito, pea ta ko koutou ko te hāko moʼoni ʼo Apalahamo, ko he kau tofiʼa ʼo ʼuhiga mo he fakapapau.”—Kalate 3:16, 29.

¹² Neʼe toe fakahā e Sehova ko Kilisito, te Hāko, ʼe haʼu anai mai te hōloga hau ʼo Suta, pea ʼa ia “anai te fakalogo ʼa te hahaʼi fuli pe.” (Senesi 49:10) ʼO ʼuhiga mo te Hau ko Tavite ʼo te telepi ʼo Suta, neʼe fēnei te fakapapau ʼa Sehova: “ ʼE mahino papau ia ʼe ʼau fakanofo anai tona hāko ke heʼegata pea mo tona hekaʼaga faka hau ohage ko te ʼu ʼaho ʼo te lagi. Ko tona hāko ʼe tuʼu anai ʼo aʼu ki te ʼu temi ʼe mole ʼiloʼi honatou gataʼaga, pea ko tona hekaʼaga hau ohage ko te laʼā ʼi ʼoku muʼa.” (Pesalemo 89:3, 4, 29, 36) ʼI te temi ʼaē neʼe fakahā ai e te ʼaselo ko Kapeliele te tupu ʼo Sesu, neʼe ina fakamahinohino ko te tamasiʼi, ko te Pule neʼe fakanofo e te ʼAtua, ko te Hāko ʼo Tavite. Neʼe ʼui maʼa Kapeliele: “Ko ia ia, ʼe lahi anai, pea ʼe fakahigoa anai ko te ʼAlo ʼo te Māʼoluga ʼAupito; pea ʼe foaki anai e Sehova ʼAtua kia te ia te hekaʼaga faka hau ʼo Tavite tana tāmai, . . . pea ko tona puleʼaga, ʼe mole ʼi ai anai hona gataʼaga.”—Luka 1:32, 33; Isaia 9:6, 7; Taniela 7:13, 14.

13. Moʼo maʼu te tapuakina ʼa Sehova, ʼe tonu ke feafeaʼi tatatou tali ki tana akonaki?

¹³ Ke feala hatatou maʼu te tapuakina ʼa Sehova, ʼe tonu ke tou ʼiloʼi te akonaki maʼuhiga ʼaia ʼo ʼuhiga mo te Puleʼaga ʼo te ʼAtua, pea ke tou muliʼi. ʼE tonu ke tou faka tui ko Sesu neʼe hifo mai te lagi, ko ia ko te Hau ʼaē neʼe fakanofo e te ʼAtua—te Hāko fakaʼaliki ʼaē ka ina takitaki anai te toe fakatuʼu ʼo te Palatiso ʼi te kele—pea ʼe ina fakatuʼuake anai te ʼu mate. (Luka 23:42, 43; Soane 18:33-37) ʼI Kapenaume ʼi te temi ʼaē neʼe talanoa ai Sesu ki te fakatuʼuake ʼaē ʼo te ʼu mate, neʼe tonu ke mahino lelei ki te kau Sutea neʼe talanoa ia ʼo ʼuhiga mo te moʼoni. Heʼe ʼi te ʼu kiʼi vāhaʼa pe ki muʼa atu, lagi ʼi Kapenaume, neʼe ina fakatuʼuake te ʼofafine ʼo te pelesita ʼo te sinakoka e taʼu 12! (Luka 8:49-56) ʼE mahino papau ia kua lahi te ʼu meʼa ke tupu ʼaki ai hatatou tui ki te faʼahi ʼaia pea ke tou gāue ʼo mulimuli pe ki te akonaki falala ʼa Sehova ʼo ʼuhiga mo tona Puleʼaga!

14, 15. (a) Neʼe maʼuhiga feafeaʼi kia Sesu te Puleʼaga ʼo Sehova? (b) Koteā ʼaē ʼe ʼaoga kia tatou ke tou mahino pea mo popoto ʼi te fakamahino ʼo te Puleʼaga ʼo Sehova?

¹⁴ Neʼe foaki e Sesu tona maʼuli ʼaē ʼi te kele moʼo akoʼi te Puleʼaga ʼo Sehova. Ko te Puleʼaga ʼaia neʼe ko te kupu tāfito ʼo tona minisitelio, pea neʼe ina toe fakatotonu ki tana kau tisipulo ke nātou faikole ʼo ʼuhiga mo te Puleʼaga ʼaia. (Mateo 6:9, 10; Luka 4:43) Ko te kau Sutea ʼi te kakano neʼe feala pe ko nātou “te ʼu foha ʼo te puleʼaga,” kae ʼuhi ko te mole lahi ʼo tanatou tui, tokolahi ia nātou neʼe mole nātou maʼu te pilivilesio ʼaia. (Mateo 8:12; 21:43) Neʼe fakahā e Sesu e gata pe ki te “kiʼi faga ōvi” ʼe nātou maʼu te pilivilesio ʼaē ke nātou liliu ko ni ʼu “foha ʼo te puleʼaga.” Ko te ʼu “foha” ʼaia neʼe nātou liliu ʼo “kaugā maʼu tofiʼa fakatahi mo Kilisito” ʼi tona Puleʼaga ʼi selo.—Luka 12:32; Mateo 13:38; Loma 8:14-17; Sake 2:5.

¹⁵ Ko te tokofia ʼaē ka nātou maʼu anai te pule ʼaē ʼi selo mo Kilisito ki te kele? ʼE fakahā e te Tohi-Tapu, ʼe gata pe ki te toko 144 000. (Soane 14:2, 3; 2 Timoteo 2:12; Fakahā 5:10; 14:1-3; 20:4) Kae neʼe ʼui e Sesu ʼe ʼi ai “te tahi ʼu ōvi,” ʼe ko ni ʼu hahaʼi fakalogo ʼi te kele ki te pule ʼo te Puleʼaga ʼaia. Ko te ʼu ōvi ʼaia ʼe nātou maʼu anai te maʼuli haohaoa pea mo te tokalelei heʼegata ʼi te palatiso fakakelekele. (Soane 10:16; Pesalemo 37:29; Fakahā 21:3, 4) ʼE ʼaoga ke tou mahino pea ke tou popoto ʼi te fakamahino ʼo te akonaki ʼa Sehova ʼo ʼuhiga mo te Puleʼaga.

16. Ko te akonaki maʼuhiga fea ʼa Sehova ʼe ʼaoga kia tatou ke tou akoʼi pea mo maʼuliʼi?

¹⁶ Ko te ʼapositolo ko Paulo neʼe ina fakahā te tahi akonaki maʼuhiga ʼa Sehova. Neʼe ʼui maʼana: “Ko koutou totonu ʼaē ʼe akoʼi e te ʼAtua ke koutou feʼofaniʼaki.” (1 Tesalonika 4:9) Ke leleiʼia tatou e Sehova, ʼe tonu ke tou fakahā te taʼi ʼofa ʼaia. “Ko te ʼAtua ʼe ʼofa,” ko te ʼui ʼaia ʼa te Tohi-Tapu, pea ʼe tonu ke tou muliʼi tana faʼifaʼitaki ʼo fakahā te ʼofa. (1 Soane 4:8; Efesi 5:1, 2) Meʼa fakaʼofaʼofa, tokolahi te hahaʼi neʼe mole nātou lavaʼi te ʼofa ʼaē ki ʼonatou ʼu tatau ohage ko tona akoʼi mai e te ʼAtua. E feafeaʼi kia tatou? Neʼe kua tou tali koa te akonaki ʼaia ʼa Sehova?

17. Ko te manatu koa ʼa ai ʼaē ʼe tonu anai ke tou faʼifaʼitakiʼi?

¹⁷ ʼE maʼuhiga ʼaupito ke tou fakalogo ki te ʼu akonaki fuli ʼa Sehova. ʼOfa pe ke tatau tatatou manatu mo te ʼu tagata fai pesalemo ʼo te Tohi-Tapu ʼi tanatou tohi te ʼu manatu ʼaenī: “Fakahā mai kia te ʼau tou ʼu ala totonu, Ê Sehova! Akoʼi mai tou ʼu haʼele aga totonu. Fakahaʼele ʼau ʼi tau moʼoni pea ke ke akoʼi ʼau.” “Akoʼi mai tau ʼu pelesepeto. Akoʼi mai tou lotoʼofa, te aga fakapotopoto pea mo te ʼatamai mālama . . . Akoʼi mai tau ʼu tonu faifakamāu.” (Pesalemo 25:4, 5; 119:12, 66, 108) Kapau ʼe tatau takotou ʼu manatu ʼaē ʼi ʼokotou ʼu loto pea mo te ʼu manatu ʼa te ʼu tagata fai pesalemo, ʼe feala ke koutou kau ʼi te toe hahaʼi ʼaē ʼe akoʼi e Sehova.

Ko Te Toe Hahaʼi Tokolahi ʼe Akoʼi Nātou

18. Koteā te meʼa neʼe fakakikite e te polofeta ko Isaia ʼe hoko anai ʼi totatou temi?

¹⁸ Neʼe fakakikite e te polofeta ko Isaia te meʼa ʼaē ka hoko anai ʼi totatou temi: “ ʼE hoko moʼoni anai, ʼi te temi fakaʼosi ʼo te ʼu ʼaho, ko te moʼuga ʼo te fale ʼo Sehova ʼe tuʼu maʼu anai ia ʼo māʼoluga ʼi te fuga ʼo te ʼu moʼuga . . . Pea ʼe mahino papau ia ʼe tokolahi anai te hahaʼi ʼe nātou ʼolo anai pea mo ʼui maʼa nātou: ‘Koutou ʼōmai pea ke tou hake ki te moʼuga ʼo Sehova, ki te fale ʼo te ʼAtua ʼo Sakopo; pea ʼe ina akoʼi anai tatou ki tona ʼu ala.’ ” (Isaia 2:2, 3; Mikea 4:2) Ko ai koa te ʼu hahaʼi ʼaia neʼe akoʼi e Sehova?

19. Ko ai koa ia ʼaho nei ʼe kau kia nātou ʼaē ʼe akoʼi e Sehova?

¹⁹ ʼE talanoa ki ʼihi age ʼe mole gata pe kia nātou ʼaē ka pule anai ʼi te lagi mo Kilisito. Ohage ko te meʼa neʼe kua tou talanoa kiai, neʼe ʼui e Sesu ʼe ʼi ai tana “tahi ʼu ōvi”—ko te ʼu hahaʼi fakalogo ʼo te Puleʼaga ʼi te kele—ʼe fakatahiʼi ki te “kiʼi faga ōvi” ʼo te kaugā hau ʼo te Puleʼaga. (Soane 10:16; Luka 12:32) Ko te “toe hahaʼi tokolahi,” ʼaē ka maʼuʼuli anai ʼi “te mamahi lahi,” ʼe nātou kau ki te kalasi ʼo te tahi ʼu ōvi, pea ʼe nātou maʼu te ʼofa ʼa Sehova ʼaki tanatou tui ki te taʼataʼa ʼo Sesu. (Fakahā 7:9, 14) Logope la ʼaē ʼe mole kau totonu te tahi ʼu ōvi ki te ʼu “foha” ʼaē ʼe talanoa kiai ia Isaia 54:13, neʼe tapuakina nātou ʼaki tonatou akoʼi ʼaē e Sehova. Pea tahi ʼaē, ʼe tau tanatou toʼo ʼaē te ʼAtua ko hanatou “Tāmai” koteʼuhi ʼe liliu moʼoni anai ia Sehova ko tanatou Kui Tagata ʼaki te “Tāmai Heʼegata,” ko Sesu Kilisito.—Mateo 6:9; Isaia 9:6.

E Feafeaʼi Te Faiakonaki ʼa Sehova

20. E feafeaʼi te ʼu faʼahiga faiakonaki ʼa Sehova?

²⁰ E lahi te ʼu faʼahiga faiakonaki ʼa Sehova. Ohage la, ʼe ina fai te faʼahi ʼaia ʼaki te ʼu meʼa ʼaē neʼe ina fakatupu, ʼaē ko he faʼahi ia ʼe fakamoʼoni ki tona maʼuli pea mo tona poto lahi. (Sopo 12:7-9; Pesalemo 19:1, 2; Loma 1:20) ʼO hilifaki atu kiai, ʼe faiakonaki fakahagatonu ia, ohage ko tana akoʼi ʼaē ʼo Sesu ʼi muʼa ʼo tana tupu tagata. ʼO toe feiā ki te ʼu ʼaluʼaga e tolu neʼe hoko, neʼe palalau fakahagatonu ia mai te lagi ki te hahaʼi ʼo te kele.—Mateo 3:17; 17:5; Soane 12:28.

21. Ko ai te ʼaselo ʼaē neʼe fakaʼaogaʼi tāfito e Sehova ohage ko hona fakafofoga, kae e feafeaʼi tatatou ʼiloʼi neʼe toe fakaʼaogaʼi pe foki mo ʼihi?

²¹ ʼE toe fakaʼaogaʼi e Sehova te kau fakafofoga fakaʼaselo moʼo akoʼi, ʼo kau ai la tona Foha ʼuluaki tupu, “te Folafola.” (Soane 1:1-3) Logope la ʼaē neʼe feala ke palalau fakahagatonu ia Sehova ki tona foha haohaoa ko Atama, ʼi te ʼōloto ʼo Eteni, ʼe mahalo pe neʼe ina fakaʼaogaʼi ia Sesu ʼi muʼa ʼo tana haʼu ʼo tupu tagata ke palalau maʼa Ia. (Senesi 2:16, 17) E lagi neʼe ko ia “te ʼaselo ʼo te ʼAtua moʼoni ʼaē neʼe ʼalu ʼi muʼa ʼo te nofoʼaga ʼo Iselaele” pea ʼo ʼuhiga mo ia neʼe fakatotonu age e Sehova: “Fakalogo ki tona leʼo.” (Ekesote 14:19; 23:20, 21) ʼE mole he lotolotolua ʼi muʼa ʼo te tupu tagata ʼa Sesu, neʼe ko ia pe foki te “tama ʼaliki ʼo te kautau ʼa Sehova” ʼaē neʼe hā kia Sosue mo ʼona fakaloto mālohiʼi. (Sosue 5:14, 15) ʼE toe fakaʼaoga pe e Sehova te tahi ʼu ʼaselo moʼo fakahoko tana ʼu akonaki, ohage ko te kau ʼaselo ʼaē neʼe ina fakaʼaogaʼi moʼo fakahā tana Lao kia Moisese.—Ekesote 20:1; Kalate 3:19; Hepeleo 2:2, 3.

22. (a) Ko ai ʼi te kele neʼe fakaʼaogaʼi e Sehova moʼo faiakonaki? (b) Koteā te meʼa tāfito ʼaē ʼe fakaʼaogaʼi e Sehova moʼo akoʼi te hahaʼi ia ʼaho nei?

²² ʼO hilifaki atu kiai, ʼe fakaʼaogaʼi e Sehova ʼAtua te kau fakafofoga tagata moʼo faiakonaki. Neʼe tonu ki te ʼu mātuʼa ʼo Iselaele ke nātou akoʼi tanatou ʼu fānau; ko te kau polofeta, te kau pelepitelo, te kau tama ʼaliki, pea mo te kau Levite neʼe nātou akoʼi age ki te puleʼaga te Lao ʼa Sehova. (Teutalonome 11:18-21; 1 Samuele 12:20-25; 2 Fakamatala 17:7-9) Ko Sesu neʼe ko te ʼAve Folafola tāfito ʼa te ʼAtua ki te kele. (Hepeleo 1:1, 2) Neʼe tautau fakahā e Sesu ko te meʼa ʼaē ʼe ina akonakiʼi neʼe ko te ʼu meʼa neʼe ina ako mai te Tāmai, koia ʼi tona fakahagatonu ko nātou ʼaē neʼe fagono kia te ia, neʼe akoʼi nātou e Sehova. (Soane 7:16; 8:28; 12:49; 14:9, 10) Neʼe tohi e Sehova tana ʼu talanoa, pea ʼi totatou temi ʼe ina akoʼi tāfito te ʼu hahaʼi ʼaki te Tohi-Tapu.—Loma 15:4; 2 Timoteo 3:16.

23. Koteā te ʼu fehuʼi ʼe tou vakaʼi anai ʼi te alatike ka hoa mai?

²³ ʼE tou maʼuʼuli nei ʼi te ʼu temi maʼuhiga, heʼe fakapapau mai e te Tohi-Tapu ‘ ʼi te ʼu temi fakaʼosi ʼo te ʼu ʼaho [ʼaē ʼe tou maʼuʼuli nei ʼi ai] tokolahi te hahaʼi ʼe akoʼi anai nātou ʼo ʼuhiga mo te ʼu ala ʼo Sehova.’ (Isaia 2:2, 3) ʼE foaki feafeaʼi te ako ʼaia? Koteā te meʼa ʼe tonu ke tou fai moʼo maʼu te lelei ʼo te polokalama ʼo te akonaki lahi ʼa Sehova ʼaē ʼe tuputupu ʼi te temi nei, ʼo toe feiā pe ki te meʼa ʼaē ke tou fai moʼo kau kiai? ʼE tou vakaʼi anai te ʼu fehuʼi ʼaia ʼi te alatike ka hoa mai.

ʼE Feafeaʼi Anai Hakotou Tali?

◻ Neʼe feafeaʼi te faka ʼuhigaʼi ʼo Sehova ko he Tāmai, ko he Tagata Faiakonaki, pea mo he Tagata ʼOhoana?

◻ Koteā te akonaki neʼe fai e Sehova ʼo ʼuhiga mo te “hāko”?

◻ Koteā te akonaki maʼuhiga ʼa te ʼAtua ʼe tonu ke tou tokagaʼi?

◻ E feafeaʼi te faiakonaki ʼa Sehova?

[Paki ʼo te pasina 10]

Ko te fakatuʼuake ʼo te ʼofafine ʼo Sailusi neʼe ko he fakatafitoʼaga ʼaia ke tui ki te fakapapau ʼaē neʼe fai e Sesu ʼo ʼuhiga mo te fakatuʼuake