Ko Te Kau Toʼo ʼo Te Mālama — Koteā Te Fakatuʼutuʼu Kia Nātou?
“Neʼe ʼau fakanofo ia koe ko te mālama ʼo te ʼu puleʼaga.” — Gāue 13:47.
1. Neʼe lave feafeaʼi ki te ʼapositolo ko Paulo te fakatotonu ʼaē ia Gāue 13:47?
“NEʼE fakamaʼua e Sehova kia tatou te fakatotonu, ʼi te ʼu palalau ʼaenī: ‘Neʼe ʼau fakanofo ia koe ko te mālama ʼo te ʼu puleʼaga, ke ke liliu ko te fakamaʼuliʼaga ʼo aʼu ki te ʼu potu taupotu ʼo te kele’ ”, ko te ʼui ʼaia ʼa te ʼapositolo ko Paulo (Gāue 13:47). ʼI tana fai ia te ʼu palalau ʼaia neʼe mahino ia ki te maʼuhiga ʼo te gāue ʼaia. ʼI tana liliu ko te tagata kilisitiano, neʼe tuku katoa e Paulo tona maʼuli ki te fakatotonu ʼaia (Gāue 26:14-20). ʼE toe fakamaʼua koa mo tatou ki te fakatotonu ʼaia? Kapau ʼe fakamaʼua mo tatou ki ai, he koʼe koa ʼe maʼuhiga te fakatotonu ʼaia ʼi totatou temi?
Te temi ʼaē neʼe ‘mole kei mū ai te ʼu mālama’ ki te malamanei
2. a) ʼI te kua tau ʼo mālama ʼaenī mo te temi fakaʼosi, koteā te meʼa neʼe hoko ʼo lave tāfito ki te faʼahi fakalaumālie feiā mo te faʼahi ʼo te aga ke fai? b) Koteā te palalau neʼe fai e te tagata pilitania ʼi tana mamata ki te meʼa ʼaē neʼe tuputupu ʼi te māhina ʼo ʼaukusito 1914?
2 Tokolahi ia tatou ʼaenī neʼe tou tuputupu ake ko te mālama ʼaenī kua tau mo te temi fakaʼosi. Ko te ʼu meʼa maʼuhiga neʼe fefakahoahoaʼaki fakavilivili. Ko Satana te Tevolo, ko ia ko te pule tāfito ʼo te ʼu fakapōʼuli fakalaumālie feiā mo te ʼu agaaga ʼo te maʼuli, neʼe lī ifo mo ia ki te kele (Efesi 6:12; Fakahā 12:7-12). ʼI te temi ʼaia neʼe felāveʼi ai te tagata mo te ʼUluaki Tau faka malamanei. ʼI te kamataʼaga ʼo ʼaukusito 1914, ʼi te kua ʼiloʼi papau leva ʼaē ka hoko te tau, ko Sir Edward Grey, ko te minisi fakapilitānia ʼo te ʼu gāue mo ʼihi puleʼaga, ʼi tana fakasiosio ifo ʼi te matapā sioʼata ʼo tona pilo ʼi Lonitoni, neʼe ina ʼui fēnei: “ ʼE mole kei mū te ʼu mālama ʼi te Eulopa katoa; ʼe mole tou toe sio anai ki tonatou toe mūhi ʼi totatou temi maʼuli.”
3. Koteā te fua neʼe maʼu e te kau takitaki ʼo te tuʼu ʼaenī ʼi tanatou fia foaki he ʼamanaki ki te malamanei?
3 ʼI te toe fia mūhi ʼo te ʼu mālama ʼaia, neʼe fakatuʼu ʼi te taʼu 1920 te Sosiete ʼo te ʼatu puleʼaga. Kae neʼe hage ia neʼe mole mū te ʼu mālama ʼaia. ʼI te fakaʼosi ʼo te Lua Tau faka malamanei, ko te kau takitaki neʼe nātou toe faigaʼi tanatou fia mūhi te ʼu mālama ʼaia ʼaki te Kautahi ʼo te ʼatu puleʼaga fakatahi. Kae ko te ʼu mālama neʼe mole mū fakalelei pe la. Kae, ʼaki te ʼu meʼa neʼe hoki hoko atu, ko te kau takitaki politike ʼe nātou talanoa ki te “tuʼu foʼou”. Kae, ʼe molemo feala pe ke tou ʼui ko te faʼahiga “mālama foʼou” ʼaē ʼe nātou fakatuʼu ʼe ina foaki he tokalelei pea mo he fīmālie moʼoni. Kailoa ia, ko te ʼu fihifihia faka solia, ko te fakapō, ko te mole maʼu ʼo he gāue, ko te masiva, ko te ʼulihi ʼo te ʼaele, pea mo te ʼu mahaki ʼe nātou haga pe ʼo pulihi te manuʼia ʼa te hahaʼi.
4, 5. a) Ko te temi fea ʼaē neʼe ʼaofi ai e te fakapōʼuli te famili fakatagata pea neʼe hoko feafeaʼi? b) Koteā ʼaē ʼe maʼuhiga ke maʼu ai he hāofaki?
4 Ko tona fakanounou, neʼe mole ko te taʼu 1914 ia ʼaē neʼe mole kei mū ai te ʼu mālama. Neʼe hoko te meʼa ia ʼaia ʼi Eteni kua hili nei ki ai ko taʼu e 6 000, ʼi te temi ʼaē neʼe fia faʼifaʼitaliha ai ʼatatou ʼuluaki mātuʼa, ʼo mole nā tokagaʼi te finegalo ʼo te ʼAtua. ʼE ko he ʼu meʼa fakaʼofaʼofa neʼe hoko talu mai te temi ʼaia, ko he ʼaluʼaga pe ʼaia ʼo he maʼuli ʼaē ʼe fakahigoaʼi e te Tohi-Tapu ʼe taki e te “mālohi ʼo te ʼu fakapōʼuli”. (Kolose 1:13.) Ko te mālohi ʼo te taki ʼaē ʼa Satana te Tevolo ʼaē neʼe haga ai te ʼuluaki tagata ko Atama ʼo taki te malamanei ki te agahala, feiā aipe mo te mate ʼuhi ko te agahala; koteʼuhi mai ia Atama ko te mate neʼe mafola ki te tagata fuli (Senesi 3:1-6; Loma 5:12). Koia neʼe puli ai leva ʼi te malamanei te ʼofa ʼo Sehova, ia ia ʼaē ko te Matapuna ʼo te mālama pea mo te maʼuli. — Pesalemo 36:9.
5 Ko te meʼa pe e tahi ke toe maʼu e te malamanei te gigila ʼo te mālama, ko te toe maʼu ʼo te ʼofa ʼo Sehova ʼAtua, te Tupuʼaga ʼo te tagata. Pea tahi ʼaē, “ko te takafi ʼaia ʼaē ʼe ina ʼaofi te hahaʼi fuli”, ʼaē ko te tautea ʼuhi ko te agahala, ʼe feala anai hona toʼo. ʼE feafeaʼi anai hona toʼo? — Isaia 25:7.
Ia ia ʼaē neʼe foaki “ohage ko te mālama ʼo te ʼu puleʼaga”
6. Koteā te ʼu ʼamanaki lalahi neʼe faka fealagia e Sehova ʼaki ia Sesu Kilisito?
6 Ia muʼa ʼo te kapu ʼo Eva pea mo Atama ʼi te Palatiso, ko Sehova neʼe ina fakakikite te “hāko” ka ina hāofaki anai te ʼu kaumeʼa ʼo te faitotonu (Senesi 3:15). ʼI te ʼosi tupu fakatagata ʼo te Hāko ʼo te fakapapau, neʼe fai e Sehova te meʼa ʼi te fale lotu ʼo Selusalemi ke fakamoʼoni Simeone ko ia “ko te mālama neʼe fakatuʼu moʼo toʼo te pulou ʼi te ʼu puleʼaga”. (Luka 2:29-32.) ʼAki te tui ki te sakilifisio ʼo te maʼuli haohaoa ʼo Sesu, ʼe feala leva ki te tagata ke faka ʼāteaina ia ia mai te tautea ʼuhi ko te agahala olesinale (Soane 3:36). ʼO mulimuli ki te finegalo ʼo Sehova, kua feala ke fakaʼamu te tagata ki he maʼuli heʼegata haohaoa ʼi te Puleʼaga ʼo selo peʼe ʼi te palatiso fakakelekele. ʼE ko he toe fakatuʼutuʼu taulekaleka ia!
7. He koʼe koa ko te ʼu fakapapau ʼaē ia Isaia 42:1-4 feiā aipe mo tona fakahoko ʼaē ʼi te ʼuluaki sēkulō ʼe nā tuku kia tatou te falala?
7 Ko Sesu Kilisito totonu ko te fakamoʼoni ʼo te ikuʼaga ʼo te ʼu ʼamanaki lalahi ʼaia. ʼO ʼuhiga mo te fakamālōlō e Sesu te hahaʼi lotomamahi, neʼe fakaʼaoga e te ʼapositolo ko Mateo te meʼa ʼaē ʼe tohi ia Isaia 42:1-4 kia te ia. ʼE ʼui fēnei e te ʼu vaega ʼaia: “Koʼeni taku tagata kaugana ʼaē ʼe ʼau tāʼofi maʼu! Ko taku fili ʼaē kua fiafia ai toku nefesi! Neʼe ʼau tuku toku laumālie kia te ia. Ko te faitotonu ki te ʼu puleʼaga, koia ʼaia ka ina fakaʼaogaʼi.” ʼE mole ko te meʼa koa la ʼaia ʼe ʼaoga ki te ʼu puleʼaga fuli? ʼE toe ʼui fēnei e te lea faka polofeta: “ ʼE mole kalaga anai ia pea mo faka leʼo lahi anai tona leʼo, pea ʼe mole ina fakahā anai tona leʼo ʼi te ala. ʼE mole ina maumauʼi anai te kaho ʼaē kua volu; pea ki te vavaeʼi lino ʼaē ʼe mū veliveli, ʼe mole ina matehi anai.” ʼO mulimuli ki te meʼa ʼaia, neʼe mole gaohi fakamālohi e Sesu te hahaʼi ʼaē neʼe kua lotovaivai. Neʼe manavaʼofa kia nātou, ʼo ina ako kia nātou te ʼu fakatuʼutuʼu ʼa Sehova, pea mo fakamālōlōʼi ia nātou. — Mateo 12:15-21.
8. Koteā te faka ʼuhiga ʼo te ʼui ʼaē neʼe foaki e Sehova ia Sesu ohage “ko he fuakava ʼo te hahaʼi” pea “ko he mālama ʼo te ʼu puleʼaga”?
8 Ko Sehova totonu ʼaē neʼe ina fai te lea faka polofeta ʼaia, ʼo ina lea fēnei ʼo ʼuhiga mo tana kaugana ko Sesu: “Ko ʼau, ko Sehova, neʼe ʼau pāuʼi koe ʼi te faitotonu, pea neʼe ʼau puke tou nima. Pea ʼe ʼau taupau anai koe pea mo foaki anai koe ko he fuakava ʼo te hahaʼi, ko he mālama ʼo te ʼu puleʼaga, ke ke avahi te ʼu mata ʼo te kau kivi, ke ke toʼo ki tuʼa mai te fale pilisoni te tagata pilisoni, mai te fale fakapōpula ia nātou ʼaē ʼe heheka ʼi te ʼu fakapōʼuli.” (Isaia 42:6, 7). ʼIo, neʼe foaki e Sehova ia Sesu Kilisito ko te fuakava, ko te fakamoʼoni tukupau ʼo ʼuhiga mo te fakapapau ʼe hoko ia. ʼE ko he meʼa fakafimālie kia tatou! Neʼe fakahā e Sesu tana tokaga moʼoni ki te hahaʼi ʼi tana maʼuli ʼaē ʼi te kele; ʼo ina foaki ʼosi tona maʼuli maʼa te malamanei. Neʼe ko ia ʼaia neʼe tuku age e Sehova te pule ki te ʼu puleʼaga fuli. Koia ʼaē ʼe mole fakapuna’maʼuli ai, mokā ʼe talanoa ia Sehova ʼo ʼuhiga mo ia ohage ko te mālama ʼo te ʼu puleʼaga. Neʼe ʼui e Sesu ʼo fēnei: “Ko ʼau ko te mālama ʼo te malamanei.” — Soane 8:12.
9. He koʼe neʼe mole tuku katoa e Sesu tona maʼuli moʼo lagolago ʼo te ʼu faʼahiga meʼa ʼo te tuʼu ʼaē ʼi tona temi?
9 Koteā te tupuʼaga ʼaē ko Sesu ko te mālama ʼo te malamanei? ʼE mole ko he fakatuʼutuʼu ia fakatagata peʼe fakakoloa. Neʼe fakafisi ia Sesu ʼo ʼuhiga mo hana fakatonutonuʼi ia te faʼahiga tuʼu faka politike ʼi tona temi pea neʼe mole ina tali ke fakanofo hau ia ia e Satana te pule ʼo te malamanei peʼe ko te hahaʼi (Luka 4:5-8; Soane 6:15; 14:30). Neʼe fakahā e Sesu te toe manavaʼofa kia nātou ʼaē ʼe lotovaivai pea mo ina maʼu tonatou fakafimālieʼi ʼe mole maʼu ʼe he tahi age tagata te faʼahiga fakafimālie ʼaia neʼe ina fai. Kae neʼe ina ʼiloʼi pe foki, ʼe mole feala ke maʼu he fakafimālie talu ʼosi ʼi te lotolotoiga ʼo te sosiete fakatagata ʼaia ʼe tauteaʼi e te ʼAtua ʼuhi ko te agahala olesinale pea mo kakaʼi e te ʼu mālohi fakalaumālie agakovi fakapulipuli. ʼAki tana maʼu te fakasiosio tonu fakaʼatua, neʼe tuku katoa e Sesu tona maʼuli moʼo fakahoko te finegalo ʼo te ʼAtua. — Hepeleo 10:7.
10. Ko te ʼu faʼahi feafeaʼi ʼaē neʼe ko Sesu ko te mālama ʼo te malamanei pea koteā tona tupuʼaga?
10 Ko te ʼu faʼahi feafeaʼi ʼaē neʼe ko Sesu “ko te mālama ʼo te malamanei” pea koteā tona tupuʼaga? Neʼe ina fai ʼaupito te faka mafola ʼo te logo lelei ʼo te Puleʼaga ʼo te ʼAtua (Luka 4:43; Soane 18:37). Ko te faka mafola ki te moʼoni ʼo ʼuhiga mo te fakatuʼutuʼu ʼa Sehova, neʼe toe haga ia Sesu ʼo faka kolōliaʼi te huafa ʼo tana Tāmai ʼe ʼi selo (Soane 17:4, 6). Pea tahi ʼaē meʼa, ʼi tona ʼaluʼaga ʼaē ko ia ko te mālama ʼo te malamanei, neʼe tala e Sesu te ʼu loi faka lotu pea mo ina faka ʼāteaina fakalaumālie ai ia nātou ʼaē neʼe nonofo popūla ʼi te faʼahi faka lotu. Neʼe ina fakahā ko Satana ko te pule fakapulipuli ʼo te ʼu tagata ʼaē ʼe nātou tuku ke na haga ʼo fakaʼaogaʼi ia nātou. Neʼe ina toe fakamatalatala lelei te ʼu gāue ʼaē ʼe pipiki ki te ʼu fakapōʼuli (Mateo 15:3-9; Soane 3:19-21; 8:44). Neʼe fakahā e Sesu ko ia ko te mālama ʼo te malamanei ʼi he ʼaluʼaga fakatalakitupua ʼi tana foaki tona maʼuli fakatagata haohaoa ko he totogi, ke maʼu ʼe nātou ʼaē ka nātou haga tui ki te fakatuʼutuʼu ʼaia te fakamolemole ʼo ʼanatou ʼu agahala, ke nātou maʼu he felogoi lelei mo te ʼAtua pea ke nātou maʼu te falala ʼo he maʼuli heʼegata ʼi te famili ʼo te ʼatulaulau ʼa Sehova (Mateo 20:28; Soane 3:16). Pea ʼi tana fakahā te aga faka lotu katoa ʼi tona maʼuli ʼi te kele, neʼe lagolago aipe e Sesu te tuʼi faʼitaliha ʼa Sehova pea mo fakamoʼoni ko te Tevolo ʼe ko he tagata gutu loi, ʼo ina faka fealagia ai ki te ʼu kaumeʼa ʼo te faitotonu ke nātou maʼu te ʼu lelei heʼegata. Kae neʼe ko Sesu tokotahi pe ko te toʼo ʼo te mālama?
“Ko koutou ko te mlama ʼo te malamanei”
11. ʼO ʼuhiga mo nātou ʼaē ʼe liliu ko te kau toʼo ʼo te mālama, koteā te meʼa neʼe tonu ke fai e te kau tisipulo ʼa Sesu?
11 Ia Mateo 5:14, neʼe ʼui fēnei e Sesu ki tana kau tisipulo: “Ko koutou ko te mālama ʼo te malamanei.” Neʼe tonu ke nātou mulimuli ʼi te ʼu ala ʼa Sesu. ʼI tanatou aga feiā mo tanatou faka mafola, neʼe tonu ke nātou taki niʼihi kia Sehova, te Matapuna ʼo te mālama moʼoni. Ohage ko Sesu, neʼe tonu ke nātou fakahā te huafa ʼo Sehova, ke nātou lagolago Tana tuʼi faʼitaliha pea mo nātou faka mafola te Puleʼaga ʼo te ʼAtua, ko te falalaʼaga ʼaia e tahi ʼo te malamanei. Neʼe tonu foki ke nātou toe tala mo te ʼu loi faka lotu pea mo te ʼu gāue ʼaē ʼe pipiki ki te ʼu fakapōʼuli, feiā aipe mo te tagata agakovi ʼaē ko te matapuna ʼo te agakovi. Pea tahi ʼaē meʼa, neʼe tonu ke palalau te kau tisipulo ʼa Kilisito ki te hahaʼi fuli pea ʼi te ʼu potu fuli pe ki te ʼu fakatuʼutuʼu ʼofa neʼe fai e Sehova ki te maʼuli ʼaki ia Sesu Kilisito. Neʼe ko he toe faiga fakamalotoloto neʼe fai e te kau ʼuluaki kilisitiano ʼo ʼuhiga mo te gāue ʼaia, ʼo kamata atu ʼi Selusalemi pea mo Sutea, pea mo Samalia ohage ko tona fakatotonuʼi e Sesu! — Gāue 1:8.
12. a) Neʼe tonu ke mafola kifea te mālama fakalaumālie ʼaia? b) Koteā te meʼa neʼe faka fealagia e te laumālie ʼo Sehova ke mahino ia Paulo ki te ʼu palalau ʼaē ia Isaia 42:6, pea ʼe tonu ke lave feafeaʼi anai te lea faka polofeta ʼaia ki totatou maʼuli?
12 Kae, neʼe mole tonu ke gata pe ʼi ai te faka mafola ʼo te logo lelei. Neʼe fakatotonu e Sesu ki tana kau tisipulo ke nātou “fai he kau tisipulo ʼi te hahaʼi ʼo te ʼu fenua fuli pe”. (Mateo 28:19.) ʼI te temi ʼaē neʼe fakamoʼoni ai Saulo ʼo Talesi kia Kilisito, neʼe fakahā fakalelei e te ʼAliki ko Saulo (ʼaē kua liliu ko te ʼapositolo ko Paulo) ka mole gata pe tana faka mafola ki te kau Sutea kae mo te kau Senetile foki (Gāue 9:15). ʼAki te tokoni ʼa te laumālie maʼoniʼoni, neʼe mahino ai leva Paulo ki te ʼaluʼaga ʼo te maʼua ʼaia. Koia ʼaē, neʼe mahino kia ia ko te lea faka polofeta ia Isaia 42:6, ʼaē ʼe faka ʼuhiga kia Sesu Kilisito, ʼe ko he fakatotonu ʼe fakamaʼua kia nātou fuli ʼaē ʼe nātou haga tui kia Kilisito. Koia ʼaē, ʼe toe talanoa ai ia Gāue 13:47 ki te meʼa ʼaē neʼe palalau kiai te tohi ʼo Isaia, ʼe ʼui fēnei e Paulo: “Neʼe fakamaʼua e Sehova kia tatou te fakatotonu, ʼi te ʼu palalau ʼaenī: ‘Neʼe ʼau fakanofo ia koe ko te mālama ʼo te ʼu puleʼaga, ke ke liliu ko te fakamaʼuliʼaga ʼo aʼu ki te ʼu potu taupotu ʼo te kele.’ ” Koteā te ʼui ʼo ʼuhiga mo tatou ʼaenī? ʼE tou faka ʼuhiga fakamalotoloto koa te maʼua ʼaenī kia tatou ke tou liliu ko te kau toʼo ʼo te mālama? Ohage ko Sesu mo Paulo, ʼe tou tuku katoa koa totatou maʼuli moʼo fakahoko te finegalo ʼo te ʼAtua?
Ko te mālama pea mo te moʼoni ʼo te ʼAtua ʼe nā taki tatou
13. ʼO mulimuli ki te talanoa ʼaē ia Pesalemo 43:3, koteā tatatou faikole maʼuhiga, pea ko te meʼa fea ʼaē ka ina hāofaki ai tatou?
13 Kapau ʼe tou faiga tokotahi ke tou ‘mūhi te ʼu mālama’, ke tou fakamālama te temi ka haʼu ʼo te malamanei, ʼe hāla anai mo tatou te ikuʼaga ʼo te Folafola ʼa te ʼAtua. Kae logope la te meʼa ʼaē ʼe fai e te hahaʼi fuli, ko te kau kilisitiano moʼoni ʼe nātou fakaʼaogaʼi ia Sehova ohage ko te Matapuna moʼoni ʼaia ʼo te mālama. ʼE nātou faikole ohage ko te talanoa ʼaē ia Pesalemo 43:3, ʼaē ʼe ʼui fēnei: “Tuku ifo tou mālama pea mo tou moʼoni. Ke nā haga ʼo taki totonu ʼau! Ke nā taki ʼau ki tou moʼuga maʼoniʼoni pea mo tou tapenakulo taulekaleka.”
14, 15. a) ʼE tuku feafeaʼi e Sehova tona mālama pea mo te moʼoni ʼi te temi nei? b) ʼE feafeaʼi hatatou fakahā ko te mālama pea mo te moʼoni ʼa te ʼAtua ʼe nā taki tatou?
14 ʼE tali aipe e Sehova te faikole ʼaia ʼa tana kau kaugana agatonu. ʼE ina tuku ifo te mālama ʼi hana fakahā tana fakatuʼutuʼu, ʼi tana faka fealagia ki tana kau kaugana ke nātou mahino kiai, pea mo tana haga ʼo fakahoko te meʼa neʼe ina fakahā. Ka tou faikole ki te ʼAtua, ʼaua naʼa tou fia fakahā pe hotatou ʼaluʼaga fakamaʼoniʼoni. ʼE tou loto anai ke taki tatou e te mālama ʼaē ʼe haʼu mai ia Sehova, ohage ko te talanoa ʼaē ʼi te tohi ʼo te pesalemo. Ka koia, ʼe tou tali te maʼua ʼuhi ko tatatou maʼu te mālama ʼaē ʼe foaki mai e te ʼAtua. Ohage ko te ʼapositolo ko Paulo, ʼe tou mahino ko te ikuʼaga ʼo te Folafola ʼa Sehova ʼe pipiki ki te fakatotonu maʼuhiga ʼe tuku kia nātou ʼaē ʼe nātou haga tui kia te ia. ʼE tou fakamaʼuaʼi tatou ki te hahaʼi ʼo aʼu ki tatatou foaki kia nātou te logo lelei neʼe foaki mai e te ʼAtua. — Loma 1:14, 15.
15 Ko te mālama pea mo te moʼoni ʼaē ʼe tuku e Sehova ʼi totatou temi ʼe ko he fakamoʼoni kua ʼafio mālohi ia Sesu Kilisito ʼi tona hekaʼaga hau ʼi selo (Pesalemo 2:6-8; Fakahā 11:15). Neʼe fakakikite e Sesu ʼi tona temi hau, ko te logo lelei ʼaia ʼo te Puleʼaga ʼe faka mafola anai ʼi te kele katoa (Mateo 24:3, 14). Ko te gāue ʼaia ʼe lolotoga fakahoko fakamālohi ʼi te temi nei, ʼi te kele katoa. Kapau ko te gāue ʼaia ʼe maʼuhiga tāfito ʼi totatou maʼuli, pea ʼe mahino ia ohage ko te ʼui e te tagata faitohi ʼo te tohi pesalemo, ko te mālama pea mo te moʼoni ʼo te ʼAtua ʼe nā taki tatou.
Ko te kolōlia ʼo Sehova kua kamata gigila
16, 17. ʼE feafeaʼi koa te haga ʼa Sehova ʼo fakamū tona mālama faka kolōlia ʼi te taʼu 1914 ki tana kautahi ʼaē ʼe hage ko hona ʼohoana, pea koteā te fakatotonu ʼe ina tuku kia ia?
16 ʼE fakamatalatala fakaofoofo e te Tohi-Tapu te faʼahiga gigila ʼo te mālama ʼi te ʼu potu fuli ʼo ʼuhiga mo te fīmālie ʼo te hahaʼi. ʼE talanoa te koga tohi ʼo Isaia 60:1-3 ki te “ ʼohoana” ʼo Sehova, ko tana kautahi ʼi selo ʼaē ʼe faʼufaʼu e te ʼu kaugana agatonu. ʼE ʼui fēnei e te koga tohi ʼaia: “Tuú ake Selusalemi, gigila mai, he kua haú sióu mâlama, kua hopo ake te kolôlia o te ʼAliki ia te koe. Koéna e kei fakapoúli te fenua, é kei nofo i te poúli te hahaí, ka ko te ʼAliki kâ mafuta ia te koe, ko tona kolôlia kâ ha mai ia te koe. Pea é fakatau mai te hahaí ki tou mâlama, pea é fakatau mai te ú ʼAliki ki sií ááta lelei kâ hopo ia te koe.” (Isaia 60:1-3, TTK).
17 Neʼe kamata mū te kolōlia ʼo Sehova ki tana kautahi ʼi selo ʼi te taʼu 1914 ʼaē ʼe fakatatau ki he fafine, neʼe ina fakatupu te Puleʼaga faka mesia ko tona Hau ko Sesu Kilisito ʼaē neʼe fualoa tana fakatalitali kiai (Fakahā 12:1-5). ʼE mū te mālama faka kolōlia ʼo Sehova ki te puleʼaga ʼaia ʼe ʼofa kiai, pea ʼe tau mo te puleʼaga ʼaia ia te takitaki ʼo te kele katoa.
18. a) He koʼe koa ʼe ʼaofi te kele e te ʼu fakapōʼuli, ohage ko tona fakakikite ia Isaia 60:2? b) ʼE feafeaʼi koa he feala ʼāteaina ʼo ni hahaʼi mai te ʼu fakapōʼuli ʼo te kele?
18 ʼE mole tatau te puleʼaga ʼaia mo te ʼu fakapōʼuli ʼaē ʼe ʼaofi te kele, pea mo te fakapōʼuli gaogao ʼo te ʼu puleʼaga. Koteā tona tupuʼaga? Koteʼuhi ko te ʼu puleʼaga ʼe nātou fia fai nātou ki he pule fakatagata ʼi te puleʼaga ʼaē ʼo te ʼAlo ʼofaina ʼo te ʼAtua. ʼI tanatou manatu ʼi hanatou fakatuʼu he ʼu faʼahiga puleʼaga kehekehe ʼe feala anai hanatou fakatokatoka tonatou ʼu fihifihia. Kae ʼe mole nātou maʼu nātou te fīmālie ʼaē ʼe nātou fia fai kiai. Ko te ʼu puleʼaga ʼe nātou mavetevete ʼuhi ko te ʼu fihifihia fakafenua pea mo nātou tuʼutāmaki ia ʼuhi ko te holi fakavale ki te ʼu koloā. ʼE mole nātou ʼiloʼi nātou pe ko ai ʼaē ʼe ina gaohi nātou fakapulipuli, mai te ʼu koga meʼa fakalaumālie (2 Kolonito 4:4). ʼE nātou fakafisi ki te Matapuna ʼo te mālama moʼoni pea koia ʼaē ʼe nātou nonofo ai ʼi te ʼu fakapōʼuli (Efesi 6:12). Koia ʼaē, logope la he faʼahiga meʼa ʼe fai e te ʼu puleʼaga, ʼe feala ki ni ʼu hahaʼi ke nātou hāo mai te ʼu fakapōʼuli ʼaia. ʼO feafeaʼi? Mo kapau ʼe nātou maʼu te tui moʼoni ki te Puleaga ʼo te ʼAtua pea mo nātou fakalogo kia te ia.
19, 20. a) He koʼe koa ʼe mū te mālama faka kolōlia ʼo Sehova ki te kau tisipulo fakanofo ʼa Sesu pea ʼe feafeaʼi? b) Koteā te tupuʼaga ʼaē ʼo te haga ʼa Sehova ʼo fakaliliu tana kau kilisitiano fakanofo ko he kau toʼo ʼo te mālama? c) Ohage ko tona fakakikite, ʼe feafeaʼi he ʼomai ʼa he ʼu “hau” pea mo he ʼu “puleʼaga” ki te mālama ʼaē mai ia Sehova?
19 Ko te keletiate ʼe mole fakamoʼoni ki te Puleʼaga ʼo te ʼAtua pea ʼe mole fakalogo ia ki te Puleʼaga ʼaia. Kae ko te kau tisipulo fakanofo ʼa Sesu Kilisito ʼe fai ia ʼe nātou te ʼu faʼahi ʼaia. Koia ʼaē, ko te mālama ʼa Sehova ʼaē ko te ʼofa fakaʼatua ʼe mū ki te kau fakafofoga ʼaia ʼo te fafine ʼi selo, pea ko tona kolōlia ʼe ʼiloga ia nātou ʼaia (Isaia 60:19-21). ʼE nātou maʼu te mālama fakalaumālie ʼe mole lavaʼi ʼe he meʼa faka politike peʼe faka ekonomike ʼe hoko ʼi te malamanei ke ina pulihi. Neʼe faka ʼāteaina nātou e Sehova mai te Papilone Lahi (Fakahā 18:4). ʼE nātou maʼu tona ʼofa koteʼuhi ʼe nātou tali tana fakatonutonuʼi ia nātou, ʼe nātou mulimuli ki tana fakatotonuʼi ia nātou, pea ʼe nātou lagolago fakalelei tona ʼuhiga pule faʼitaliha ʼi te ʼatulaulau. ʼE feala ke nātou maʼu te ʼu fakaʼamu ʼaoga pea mo nātou fakafiafia ʼi te falala ʼaē ʼe foaki age e Sehova kia nātou.
20 Kae koteā te tupuʼaga ʼaē ʼo te fai feiā e Sehova ʼo ʼuhiga mo nātou? Ohage ko tana fakahā ia Isaia 60:21, koteʼuhi ke “teuteuʼi”, ia ia, ke fakaʼapaʼapaʼi tona huafa, pea ke fia ʼomai niʼihi kia te ia, ko te ʼAtua moʼoni e tahi, ʼo ʼuhiga mo tonatou maʼuli fīmālie heʼegata. ʼO mulimuli ki te meʼa ʼaia, ʼi te taʼu 1931, ko te kau ʼatolasio ʼaia ʼo te ʼAtua moʼoni neʼe nātou toʼo te higoa ʼaē ko te kau Fakamoʼoni ʼa Sehova. Ko te fua ʼo tanatou gāue faka mafola, neʼe ʼomai koa he ʼu “hau” ki te mālama ʼaē ʼe nātou fakahā, ohage ko te fakakikite ʼa Isaia? Ei! ʼE mole ko te kau takitaki politike ʼo te kele, kae ko nātou ʼaē ʼe kau ki te toe ʼo te kau kilisitiano fakanofo pea ko nātou ʼaia ʼe pāuʼi ke nātou hau mo Kilisito ʼi tona Puleʼaga ʼi selo (Fakahā 1:5, 6; 21:24). Koteā te talanoa ʼo ʼuhiga mo te ʼu “puleʼaga”? Neʼe nātou ʼomai koa ki te mālama ʼaia? Ei! ʼO mole ko he ʼu puleʼaga ʼi tona ʼuhiga faka politike, kae ko te “toe hahaʼi tokolahi” mai te ʼu puleʼaga kehekehe ʼaia neʼe nātou lagolago te Puleʼaga ʼo te ʼAtua pea ʼe nātou ʼamanaki ke ina hāofaki la ia nātou ke nātou maʼuʼuli ʼi te mālama foʼou ʼo te ʼAtua. Ko he mālama ʼe foʼou moʼoni ia heʼe maʼu ai anai te faitotonu. — 2 Petelo 3:13; Fakahā 7:9, 10.
21. ʼE feafeaʼi hatatou fakahā ʼe mole hāla ia tatou te ikuʼaga ʼo te agalelei makehe ʼaē neʼe tuku mai e Sehova moʼo faka fealagia ke tou mahino ki tona finegalo?
21 ʼE koutou kau koa ʼi te toe hahaʼi ʼaia ʼe tuputupu tuʼumaʼu ʼo liliu ko te kau toʼo ʼo te mālama? Neʼe faka fealagia e Sehova ke tou mahino ki tona finegalo, koteʼuhi ohage ko Sesu ke tou liliu ko te kau toʼo ʼo te mālama. Tou fakahā ʼi tatatou faiga fakamalotoloto ʼi te gāue ʼaē neʼe foaki mai e Sehova ʼo ʼuhiga mo totatou temi, ʼe mole hāla ia tatou te ikuʼaga ʼo te agalelei makehe ʼaē neʼe ina tuku mai (2 Kolonito 6:1, 2). ʼE mole he tahi age gāue ʼe maʼuhiga ʼi totatou temi. Pea ʼe ko te pilivilesio pe kia tatou ko te faka kolōliaʼi ʼo Sehoa ʼi hatatou fakahā ki ʼihi te mālama faka kolōlia ʼaē ʼe haʼu mai ia te ia.
ʼE feafeaʼi anai hakotou tali?
◻ Koteā te ʼu tupuʼaga tāfito ʼo te ʼu fihifihia maʼuhiga ʼo te malamanei?
◻ Ko te ʼu faʼahi fea ʼaē ko Sesu pea mo tana kau tisipulo ko te “mālama ʼo te malamanei”?
◻ ʼE feafeaʼi koa te haga ʼo te mālama pea mo te moʼoni ʼo Sehova ʼo taki tatou?
◻ Neʼe feafeaʼi te haga ʼa Sehova ʼo fakamū tona mālama faka kolōlia ki tana kautahi?
◻ Koteā te tupuʼaga ʼo te haga ʼaē ʼa Sehova ʼo fai ko tana hahaʼi ko te kau toʼo ʼo te mālama?
[Paki ʼo te pasina 9]
Ko te meʼa neʼe hoko ʼi Eteni ʼe tokoni kia tatou ke tou mahino ki te fihifihia maʼuhiga ʼaē ʼe tau mo te malamanei ʼi te temi nei.
[Haʼuʼaga ʼo te ʼu paki]
Tom Haley/Sipa
Paringaux/Sipa