Kua Faka ʼĀteaina Ia Nātou e Te Moʼoni

ʼI AMELIKA, ko te miliona tupu hahaʼi ʼe nātou nonofo ʼi te ʼu fale pilisoni. Ko te teitei toko tolu afe ia nātou kua fakatūʼa ki te mate. Kanapaula neʼe koutou ʼi te ʼaluʼaga ʼaia, koteā te meʼa ʼaē ʼe koutou logoʼi ʼi tokotou loto? ʼE moʼoni, ʼe ko he meʼa fakamataku mokā kita manatu ki te faʼahi ʼaia. Kae, ʼi te tahi faʼahi, ʼe ko te ʼaluʼaga ʼaia ʼo te hahaʼi fuli. ʼE ʼui fēnei e te Tohi-Tapu: “Ko tatou fuli neʼe tou agahala pea mole tou aʼu ki te kolōlia ʼo te ʼAtua.” (Loma 3:​23) Ei, ʼi totatou ʼuhiga fānau ʼa Atama, ʼe tou “pilisoni” ʼi totatou ʼuhiga agahala. (Loma 5:​12) ʼE tou logoʼi te ʼu fua ʼo tatatou nofo pilisoni ʼi te ʼaho fuli pe, ohage ko te ʼapositolo ko Paulo, ʼaē neʼe ina tohi fēnei: “ ʼE ʼau sio ʼau ki te tahi lao ʼi toku ʼu kogaʼi sino ʼe ina tauʼi ia te lao ʼaē ʼo toku laumālie, pea ʼe ina fakapōpulaʼi ʼau ki te lao ʼo te agahala ʼaē ʼe nofo ʼi toku ʼu kogaʼi sino.”​—Loma 7:​23.

ʼUhi ko totatou ʼuhiga agahala, ko tatou fuli, ʼi hona ʼaluʼaga fakatā, ʼe tou nonofo ʼi te fakatūʼa ki te mate, heʼe ʼui fēnei e te Tohi-Tapu: “Ko te totogi ʼaē ʼe foaki e te agahala ko te mate.” (Loma 6:​23) ʼE fakamatala lelei totatou ʼaluʼaga e te tagata ko Moisese, ʼi tana ʼui fēnei: “ ʼE tou gata pe ia taʼu e fitugofulu​—ko taʼu e valugofulu, mo kapau ʼe tou mālolohi; kae ko te ʼu taʼu fuli ʼaia ʼe nātou foaki mai te maveuveu pea mo te mamahi; kua vave fakaʼosi te maʼuli, pea ʼe tou mavae.”​—Pesalemo 90:10, Fakaliliu ʼo te Tohi-Tapu Today’s English Version; vakaʼi ia Sake 4:​14.

Neʼe manatu ia Sesu ki te maʼuli popūla ʼa te hahaʼi ʼi te agahala pea mo te mate, ʼi tana ʼui fēnei ki tana ʼu tisipulo: “Ko te moʼoni ʼe ina faka ʼāteaina anai koutou.” (Soane 8:​32) ʼI tana ʼu palalau ʼaia, neʼe fakahā e Sesu ki tana ʼu tisipulo te ʼamanaki ki he meʼa ʼe lahi age ʼi te ʼāteaina mai te pule ʼo Loma​—neʼe ina foaki age kia nātou te fealagia ʼaē ke fakamolemole tanatou ʼu agahala pea mo nātou ʼāteaina mai te mate! Neʼe lava feafeaʼi ke nātou maʼu te ʼu meʼa ʼaia? Neʼe ʼui fēnei e Sesu kia nātou: “Kapau ko te Foha ʼe ina faka ʼāteaina koutou, pea ʼe koutou ʼāteaina moʼoni anai.” (Soane 8:​36) Ei, ʼi tana foaki tona maʼuli, ko “te Foha,” ia Sesu, neʼe liliu ko he sakilifisio faifakalelei moʼo totogi ʼaki te meʼa ʼaē neʼe pulihi e Atama. (1 Soane 4:​10) Neʼe faka fealagia e te faʼahi ʼaia ke ʼāteaina te hahaʼi fakalogo mai te ʼu noʼo ʼo te agahala pea mo te mate. Neʼe mate te ʼAlo ʼulu tokotahi ʼo te ʼAtua “koteʼuhi ko ʼaē ʼe tui kia te ia, ke ʼaua naʼa fakaʼauha kaʼe ke ina maʼu te maʼuli heʼegata.”​—Soane 3:​16.

Koia, ko te moʼoni ʼaē ʼe feala ke ina faka ʼāteainaʼi tatou, ʼe pipiki kia Sesu Kilisito. Ko nātou ʼaē ʼe liliu ko tana ʼu tisipulo, ʼe nātou muliʼi tona ʼu tafuga vaʼe, pea ʼe nātou maʼu te ʼamanaki ʼaē ke faka ʼāteaina nātou mai te agahala pea mo te mate, ʼi te temi ʼaē ka puleʼi katoa ai e te Puleʼaga ʼa te ʼAtua te ʼu meʼa ʼo te kele. Māʼiape la mo te temi nei, ko nātou ʼaē ʼe nātou tali te moʼoni ʼo te Folafola ʼa te ʼAtua, ʼe nātou ʼiloʼi te ʼāteaina moʼoni. ʼI te ʼu faʼahi fea?

Te ʼĀteaina Mai Te Mataku Ki Te Kau Mate

ʼI te temi nei, ko te lauʼi miliona hahaʼi ʼe nātou maʼuʼuli ʼaki te mataku ʼaē ki te kau mate. Koteā tona tupuʼaga? Koteʼuhi neʼe akoʼi age e tanatou ʼu lotu, ko te nefesi ʼe mavae ʼi te sino ʼi te mate, pea ʼe ʼalu ki te koga meʼa fakalaumālie. Ko te tupuʼaga la ʼaia ʼo te liliu ko he agaʼi fenua ʼi ʼihi ʼu fenua, te ʼala e te ʼu kāiga ia te mate lolotoga he ʼu ʼaho mo he ʼu po. ʼI ʼihi temi, ʼe kau kiai te ʼu hiva fakamamahi pea mo te tā ʼo te nafa. Ko nātou ʼaē ʼe putu, ʼe nātou tui ko te meʼa ʼaia ʼe leleiʼia anai e ia ʼaē kua mate, pea ʼe tāʼofi ai tona laumālie ke mole toe liliu mai ʼo fakamamahiʼi te hahaʼi. Ko te ʼu akonaki hala ʼo te Keletiate ʼo ʼuhiga mo te kau mate, neʼe ʼaoga pe ia moʼo toe fakahoko atu ia te talatisio ʼaia.

Kae ʼe fakahā e te Tohi-Tapu te moʼoni ʼo ʼuhiga mo te ʼaluʼaga ʼo te kau mate. ʼE ina fakahā lelei ko te nefesi ko tatou, kae mole ko he koga faka misitelio ʼo tatou, ʼe maʼuli ʼi te hili ʼo te mate. (Senesi 2:7; Esekiele 18:4) Pea tahi ʼaē meʼa, ʼe mole fakamamahiʼi te kau mate ʼi he ʼifeli kakaha, peʼe nātou nonofo ʼi he potu fakalaumālie, ʼe feala ai ke nātou fai he ʼu meʼa kia nātou ʼaē ʼe kei maʼuʼuli. ʼE ʼui fēnei e te Tohi-Tapu: “Ko te hahaʼi ʼaē kua mamate, ʼe mole kei nātou ʼiloʼi he meʼa e tahi. . . . ʼE mole he gāue, he fai puleʼaki, he mālama, he poto ʼi te Seole [te faitoka], te potu ʼaē ʼe ke ʼalu kiai.”​—Tagata Tānaki 9:​5, 10.

Ko te ʼu moʼoni faka Tohi-Tapu ʼaia neʼe nātou faka ʼāteainaʼi te hahaʼi tokolahi mai te mataku ʼaē ki te kau mate. ʼE mole kei nātou momoli he ʼu sakilifisio totogi kovi moʼo fakafimālieʼi ʼo tanatou ʼu kui, pea ʼe mole kei nātou tuʼania peʼe fakamamahi te hahaʼi ʼaē ʼe nātou ʼoʼofa ai ʼuhi ko tanatou ʼu hala. Neʼe nātou ako ʼe foaki e te Tohi-Tapu te ʼamanaki fakatalakitupua kia nātou ʼaē kua mamate, heʼe ina ʼui mai, ʼi te temi ʼaē kua fakakatofa ai e te ʼAtua, ʼe ʼi ai anai “he toe fakatuʼuake mai te mate ʼo te kau faitotonu pea mo te kau heʼe faitotonu.” (Gāue 24:15; Soane 5:​28, 29) Koia, ʼi te temi nei ko te kau mate ʼe nātou mālōlō, ohage pe ʼe nātou momoe loloto.​—Vakaʼi ia Soane 11:11-​14.

Ko te moʼoni ʼo ʼuhiga mo te ʼaluʼaga ʼo te kau mate pea mo te ʼamanaki ʼo te fakatuʼuake, ʼe feala ke nātou faka ʼāteainaʼi tatou mai te lotomamahi ʼaē ʼe hoko kia tatou mokā mate he tahi. Neʼe tokoni te ʼamanaki ʼaia ki te taumatuʼa ʼi Amelika, ʼi te temi ʼaē neʼe mate ai tanā tama ʼaē neʼe taʼu fā ʼi te fakaʼī. ʼE ʼui fēnei e tana faʼe: “ ʼE mole ʼi ai he tahi ʼe feala ke ina fetogi tamā tama, ʼo aʼu ki tama toe sisio kia ia ʼi te fakatuʼuake. Kae ʼe ma ʼiloʼi ko te lotomamahi ʼaē ʼe tau mo māua, ʼe faka temi pe ia, heʼe fakapapau e Sehova ʼe ina holoholoʼi anai totatou ʼu loʼimata ʼaē ʼe tupu ʼuhi ko totatou lotomamahi.”​—Fakahā 21:​3, 4.

Te ʼĀteaina Mai Te Mataku Ki Te Temi Ka Haʼu

Koteā ʼaē ka hoko ʼi te temi ka haʼu? ʼE vela anai koa totatou kele ʼi he tau faka nukeleʼea? ʼE mole toe feala anai koa ke nofoʼi te kele, ʼuhi ko tona gaohi koviʼi? Ko te mole kei fai e te hahaʼi ia te ʼu aga ʼaē ʼe lelei, ʼe iku anai koa ki te maveuveu ʼo te malamanei katoa? ʼE ko te ʼu meʼa ʼaia ʼaē ʼe matataku moʼoni kiai ia te hahaʼi tokolahi ia ʼaho nei.

Kae ʼe foaki e te Tohi-Tapu te ʼāteaina mai te mataku ki te ʼu meʼa ʼaia. ʼE ina fakamoʼoni mai kia tatou ko “te kele ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga.” (Tagata Tānaki 1:4) Neʼe mole fakatupu e Sehova totatou kele ke maumauʼi e te hahaʼi ʼaē ʼe mole nātou fai tonatou ʼu maʼua. (Isaia 45:18) Kae neʼe fakatupu e Sehova te kele ke liliu ko he palatiso ki te famili logo tahi fakatagata. (Senesi 1:​27, 28) ʼE mole heʼeki fetogi tana fakatuʼutuʼu. ʼE ʼui fēnei mai kia tatou e te Tohi-Tapu, ko te ʼAtua ʼe ina ‘maumauʼi anai ia nātou ʼaē ʼe nātou maumauʼi te kele.’ (Fakahā 11:18) Hili te faʼahi ʼaia, ʼe ʼui fēnei e te Tohi-Tapu: “Ko te kau agavaivai ʼe nātou maʼu anai te kele, pea ʼe nātou fiafia anai ʼi te mahu ʼo te tokalelei.”​—Pesalemo 37:11.

ʼE feala ke tou tui ki te fakapapau ʼaia, koteʼuhi ʼe mole loi te ʼAtua. Neʼe ʼui e Sehova ʼaki tana polofeta ko Isaia: “Ko te folafola ʼaē ʼe mavae atu ʼi toku gutu ʼe mole toe liliu mai anai kia te ʼau ka mole hona ʼu fua, kae ʼe mahino papau ia, ʼe ina fai anai te meʼa ʼaē kua ʼau leleiʼia, pea ʼe mahino papau ia ʼe ina fakahoko anai te meʼa ʼaē neʼe ʼau fekauʼi kiai.” (Isaia 55:11; Tito 1:2) Koia, ʼe feala ke tou fakatalitali ʼaki he loto falala, ki te fakahoko ʼo te fakapapau ʼa te ʼAtua ʼaē ʼe tuʼu ʼi te Tohi-Tapu ia 2 Petelo 3⁠:13: “ ʼE tou talitali ki te ʼu lagi foʼou pea mo te kele foʼou ʼaia ʼe tonu ke nofo ai te faitotonu.”

Te ʼĀteaina Mai Te Mataku Ki Te Tagata

ʼE foaki mai e te Tohi-Tapu kia tatou, te ʼu faʼifaʼitaki mālohi ʼo te ʼu tagata mo te ʼu fafine neʼe mole nātou matataku ʼi tanatou pipiki ki te ʼAtua. Ia nātou ʼaia, neʼe kau ai ia Seteone, mo Palake, mo Tepola, mo Taniela, mo Esitele, mo Selemia, mo Apikaela, pea mo Saele​—pea mo ʼihi age. Neʼe fakahā e te ʼu tagata mo te ʼu fafine agatonu ʼaia, te manatu ʼa te tagata fai pesalemo ʼaē neʼe ina tohi fēnei: “Neʼe ʼau tuku taku falala ki te ʼAtua. ʼE mole ʼau mataku anai. Koteā ʼaē ʼe feala ke fai mai e te tagata ʼaē neʼe toʼo mai te kele?”​—Pesalemo 56:11.

ʼI te ʼuluaki sēkulō, neʼe fakahā e te ʼu ʼapositolo ko Petelo pea mo Soane te lototoʼa ʼaia, ʼi te temi ʼaē neʼe fakatotonu ai kia nāua e te ʼu pule ke nā fakagata tana fai faka mafola. Neʼe nā tali fēnei age: “Kia mātou, ʼe mole feala ke mātou tuku tamatou palalau ki te ʼu meʼa ʼaē neʼe mātou sisio kiai pea mo fagono kiai.” Ko te lototoʼa ʼaia ʼo Petelo mo Soane, neʼe iku ki muli age, ki tonā pilisoniʼi. ʼI te ʼosi faka ʼāteainaʼi faka milakulo ʼo nāua, neʼe nā toe fakahoko atu tanā gāue pea mo hoko atu tanā “palalau ki te folafola ʼa te ʼAtua ʼaki he lototoʼa.” Mole fualoa kiai, pea neʼe ʼave ia Petelo pea mo ʼihi ʼu ʼapositolo kia muʼa ʼo te Sanetualio ʼa te kau Sutea. Neʼe ʼui fēnei kia nātou e te pelepitelo lahi: “Neʼe mātou fakatotonu lelei atu kia koutou ke mole hoko atu takotou faiakonaki ʼi te huafa ʼaia, pea koʼeni! kua koutou fakafonu ia Selusalemi ʼaki takotou akonaki.” Neʼe tali fēnei e Petelo pea mo te tahi ʼu ʼapositolo: “ ʼE tonu ke mātou fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.”​—Gāue 4:​16, 17, 19, 20, 31; 5:​18-​20, 27-​29.

ʼI tanatou gāue ʼaē ko te faka mafola ʼo te logo lelei ʼo te Puleʼaga ʼa te ʼAtua, ʼe faiga ʼi te temi nei te kau Fakamoʼoni ʼa Sehova ke nātou faʼifaʼitakiʼi te loto faiva ʼo te kau Kilisitiano ʼo te ʼuluaki sēkulō. Māʼiape la mo te kau tūpulaga, ʼe nātou fakahā tanatou mole matataku, ʼo nātou palalau ki te hahaʼi ʼo ʼuhiga mo tanatou tui. Tou vakaʼi he ʼu faʼifaʼitaki.

Ko te finemui ko Stacie, ʼe umiuminoa. ʼUhi ko te faʼahi ʼaia, neʼe ko he meʼa faigataʼa kia ia te palalau ki te hahaʼi ʼo ʼuhiga mo tana tui. Neʼe koteā ʼaē neʼe ina fai moʼo tauʼi ia te faʼahi ʼaia? ʼE ina ʼui fēnei: “Neʼe ʼau ako te Tohi-Tapu pea neʼe ʼau faigaʼi ke ʼau mahino lelei ki te ʼu meʼa ʼaē ka ʼau palalau anai kiai. Neʼe liliu ai kia ʼau, ko he meʼa faigafua tona fai, pea neʼe mole kei ʼau mataku.” Neʼe talanoa te nusipepa ʼo te fenua, ki te aga lelei ʼa Stacie. Neʼe ʼui fēnei e te alatike, ʼaē neʼe tohi e te fafine faiako ʼo tona faleako: “Neʼe hage neʼe foaki e te tui ʼo Stacie he lotomālohi kia ia ke ina tauʼi te ʼu tuʼuga fihifihia ʼaē ʼe tau mo te kau tūpulaga. . . . Kia ia ʼe tonu ke manatu tāfito ki tana tauhi ki te ʼAtua.”

Neʼe kamata ako e Tommy te Tohi-Tapu mai tana ʼu mātuʼa ʼi tona kei taʼu nima. Logope la tana kei veliveli, kae neʼe pipiki mālohi ki te tauhi moʼoni. Lolotoga te pena ʼo tana ʼu kaugā ako te ʼu meʼa ʼaē ʼe fai e te hahaʼi ʼi te ʼu ʼaho lafeti, neʼe pena ia e Tommy te ʼu meʼa ʼaē ka maʼu anai ʼi te Palatiso ʼaē neʼe fakapapau mai e te ʼAtua. ʼI tona ʼuhiga tūpulaga, neʼe fakatokagaʼi e Tommy neʼe tokolahi te kau tūpulaga neʼe nātou punamaʼuli ʼo ʼuhiga mo te ʼu meʼa ʼaē ʼe tui kiai te kau Fakamoʼoni ʼa Sehova. Neʼe mole mataku ia, kae neʼe ina kole age ki tona tagata faiako, peʼe feala ke fai palalau mo tana kalasi ʼaki he ʼu fehuʼi pea mo he ʼu tali, ke feala ke ina tali ki tanatou ʼu fehuʼi fuli ʼi te temi ʼaia. Neʼe tali te meʼa ʼaē neʼe ina kole, pea neʼe ina foaki ai he fakamoʼoni lelei.

ʼI tona taʼu 17, neʼe maʼu e Markietta te fealagia lelei moʼo palalau kia nātou ʼaē ʼo tana kalasi ʼo ʼuhiga mo tana tui. ʼE ina ʼui fēnei: “Neʼe fakatotonu mai ke mātou teuteuʼi he kiʼi fai palalau. Neʼe ʼau fili te meʼa ʼaē ka ʼau palalau kiai mai te tohi Les jeunes sʼinterrogent — Réponses pratiques.a Neʼe ʼau fili te ʼu kapite e nima ʼi te tohi, pea neʼe ʼau tohi te ʼu kupu tāfito ki te laupapa faitohi. Neʼe ʼau kole ki te kalasi ke nātou sivi te ʼu meʼa ʼaia, ʼo vakaʼi te meʼa ʼaē ʼe maʼuhiga age maʼa nātou.” Neʼe hoa kiai te fai palalau ʼi te kalasi. Neʼe ʼui fakaʼosi fēnei e Markietta: “Neʼe ʼau fakahā te tohi ki te kalasi pea ko te tokolahi neʼe nātou kole hanatou tohi. Māʼiape la mo taku fafine faiako neʼe loto ki hana tohi.”

ʼE Feala Ke Faka ʼĀteaina Koutou e Te Moʼoni

Ohage ko te meʼa ʼaē neʼe tou vakaʼi, ko te moʼoni ʼaē ʼe maʼu ʼi te Tohi-Tapu ʼe ina faka ʼāteainaʼi te hahaʼi fuli ʼe nātou ako te tohi ʼaia pea mo nātou tali te logo ʼaē ʼe maʼu ai. ʼE ina faka ʼāteainaʼi nātou mai te mataku ki te kau mate, te mataku ki te temi ka haʼu, pea mo te mataku ki te tagata. ʼE mole kei tuai, pea ko te totogi ʼaē neʼe foaki e Sesu ʼe ina faka ʼāteaina anai te hahaʼi fakalogo mai te agahala pea mo te mate. ʼE ko he meʼa fakafiafia anai te maʼuli ʼo heʼegata ʼi te palatiso ʼi te kele, ʼo mole kei tou pilisoni ʼi totatou ʼuhiga agahala ʼaē neʼe tou tupu ake mo ia!​—Pesalemo 37:29.

ʼE koutou fia ako koa he tahi ʼu meʼa ʼo ʼuhiga mo te ʼu tapuakina ʼaē neʼe fakapapau mai e te ʼAtua? Kapau koia, pea koteā ʼaē ʼe tonu ke koutou fai? Neʼe ʼui fēnei e Sesu: “Ko te faka ʼuhiga ʼaenī ʼo te maʼuli heʼegata, ke nātou ako te ʼiloʼi ʼo koe, te ʼAtua moʼoni pe ʼaē e tahi, pea mo ia ʼaē neʼe ke fekauʼi mai, ia Sesu Kilisito.” (Soane 17:3) Koia, kapau ʼe koutou fia maʼu te ʼāteaina ʼaē neʼe fakapapau e Sesu ki tana ʼu tisipulo, ʼe tonu ke koutou ako te ʼiloʼi ʼo Sehova ʼAtua pea mo tona ʼAlo. ʼE ʼaoga ke koutou ʼiloʼi te ʼuhiga ʼo te finegalo ʼo te ʼAtua pea mo koutou fai te finegalo ʼaia, koteʼuhi ʼe ʼui fēnei e te Tohi-Tapu: “ ʼE mole te malamanei pea mo tona holi, ka ko ʼaē ʼe ina fai te finegalo ʼo te ʼAtua ʼe nofo maʼu anai ia ʼo talu ai.”​—1 Soane 2:​17.

[Nota ʼi te lalo pasina]

[Paki ʼo te pasina 7]

ʼI te Puleʼaga ʼo te ʼAtua, ʼe faka ʼāteainaʼi anai te malamanei mai te agahala pea mo te mate