Ko “Te Malama ʼo Te Malamanei” ʼe Ko Te ʼAlo ʼo Te ʼAtua

ʼI te ʼaho fakaʼosi ʼo te ʼAho Lahi ʼo Te ʼu Tapenakulo, ia te fitu ʼaho, neʼe faiakonaki ia Sesu ʼi te faʼahi ʼo te fale lotu ʼae neʼe tuʼu ai “te ʼu puha tanaki paʼaga.” (Soane 8:20; Luka 21:1) Neʼe lagi tuʼu te faʼahi ʼaia ʼi te Malaʼe ʼo Te Hahaʼi Fafine, pea neʼe ʼomai te hahaʼi ʼo ʼai ki ai ʼonatou meʼa ʼofa.

ʼI te ʼu po fuli ʼae neʼe fai ai te ʼaho lahi, neʼe malamagia te malaʼe ʼo te fale lotu. Neʼe ʼi ai te ʼu tuʼulaga malama lalahi ʼe fa, mo tanakiʼaga lolo lalahi ʼe fa. Neʼe malama lelei ai te fale lotu ʼo feia mo te ʼu faʼahi neʼe mamaʼo atu. Neʼe lagi manatuʼi e te hahaʼi te aluʼaga ʼaia ʼi te ʼu palalau ʼaeni neʼe fai e Sesu: “Ko au te malama ʼo te malamanei. Ko ʼae ʼe mulimuli mai ia te au, ʼe mole haʼele anai ʼi te fakapoʼuli, kaʼe ʼe ina maʼu anai te malama ʼo te maʼuli.”—Soane 8:12.

Neʼe fakafeagai te kau Faliseo ki te ʼu palalau ʼaia ʼa Sesu, pea neʼe natou ui fenei: “ ʼE ke fakamoʼoni ʼo ʼuhiga mo koe totonu, koia ko tau fakamoʼoni ʼe mole moʼoni.” Neʼe ui fenei e Sesu kia natou: “Tatau aipe pe ʼe au fakamoʼoni ʼo ʼuhiga mo au totonu, kaʼe ko taku fakamoʼoni ʼe moʼoni koteʼuhi ʼe au iloʼi pe ʼe au haʼu maifea pea mo au alu kifea. Kaʼe ʼe mole kotou iloʼi pe ʼe au haʼu maifea pea mo au alu kifea.” Neʼe ina hoko atu fenei: “ ʼE toe tohi fenei foki ʼi takotou Lao: ‘Ko he fakamoʼoni ʼa he toko lua, ʼe moʼoni.’ ʼE au fakamoʼoni ʼo ʼuhiga mo au totonu, pea ʼe toe fakamoʼoni foki ʼo ʼuhiga mo au ia te Tamai ʼae neʼe ina fekauʼi mai au.”—Soane 8:13-18.

Neʼe mole tali e te kau Faliseo te manatu ʼaia ʼa Sesu, koia neʼe natou fehuʼi fenei age: “ ʼE ʼifea tau Tamai?” Neʼe tali fakahagatonu fenei age e Sesu: “ ʼE mole kotou iloʼi au pea mo taku Tamai. Ka na neʼe kotou iloʼi la ia au, neʼe kotou toe iloʼi foki mo taku Tamai.” (Soane 8:19) Pea logo la neʼe kei fia puke pe e te kau Faliseo ia Sesu, kaʼe neʼe mole lava puke ia ia e he tahi.

Pea neʼe fai e Sesu te ʼu palalau ʼaeni neʼe kua ina ʼosi fai pe ʼi muʼa atu: “ ʼE au alu, pea ʼe kotou kumi anai au, kaʼe ʼe kotou mamate anai ʼi tokotou ʼuhiga agahala. Ko te potu ʼae ʼe au alu anai ki ai ʼe mole feala ke kotou ʼomai ki ai.” Neʼe mole mahino te kau Sutea ki te ʼu palalau ʼa Sesu, ʼo natou kamata feʼekeʼaki fenei: “ ʼE fakamate anai koa ia? Koteʼuhi ʼe ina ui fenei: ‘Ko te potu ʼae ʼe au alu anai ki ai ʼe mole feala ke kotou ʼomai ki ai.’ ” Neʼe mole natou mahino ki tona fakaʼuhiga, he neʼe mole natou iloʼi pe neʼe haʼu maifea ia Sesu. Neʼe ina fakamahino fenei: “ ʼE kotou ʼomai mai te ʼu potu ʼo lalo nei. ʼE au haʼu au mai te ʼu potu ʼo ʼoluga. ʼE kotou ʼomai mai te malamanei, ʼe mole au haʼu au mai te malamanei.”—Soane 8:21-23.

Neʼe talanoa ia Sesu ʼo ʼuhiga mo tona maʼuli ʼi selo ʼi muʼa ʼo tana haʼu ki te kele pea mo tona ʼuhiga Mesia, peʼe ko Kilisito, ʼae neʼe iloʼi e te kau takitaki lotu neʼe tonu ke haʼu. Kaʼe ʼi tanatou fehihiʼa kia Sesu, neʼe natou fehuʼi fenei age: “Ko ai ia koe?”—Soane 8:25.

ʼI tanatou fakafisi pea mo fakafeagai kia Sesu, neʼe ina ui fenei ai: “Kotea te ʼuhiga ʼo taku palalau atu kia koutou?” Neʼe palalau leva ia Sesu ʼo ʼuhiga mo tana Tamai pea mo ina fakaha pe koʼe neʼe tonu ke fakalogo te kau Sutea ki te ʼAlo. Neʼe ina ui fenei: “Ko Ia ʼae neʼe ina fekauʼi mai au ʼe moʼoni, pea ko te ʼu meʼa ʼae neʼe ina fakaha mai ʼe au fakaha ki te malamanei.”—Soane 8:25, 26.

Neʼe fakaha leva e Sesu tana falala ʼae ki tana Tamai, ʼae neʼe mole maʼu e te kau Sutea ʼaia. Neʼe ina ui fenei: “ ʼI takotou ʼosi lagaʼi ake ia te Foha ʼo te tagata, ʼe hoki kotou iloʼi ai anai ʼe ko au ia ia ʼae neʼe tonu ke haʼu pea ʼe mole au fai he meʼa ʼi toku loto faʼitaliha. Kaʼe ohage pe ko te akoʼi au e te Tamai, ʼe au fakaha te ʼu meʼa ʼaia. Pea ko Ia ʼae neʼe ina fekauʼi mai au ʼe fakatahi mo au. Neʼe mole ina liakī au koteʼuhi ʼe au fai tuʼumaʼu pe te ʼu meʼa ʼae ʼe ina leleiʼia.”—Soane 8:28, 29.

Kaʼe neʼe tui ʼihi kau Sutea kia Sesu, pea neʼe ina ui fenei kia natou: “Kapau ʼe kotou nonofo ʼi taku folafola, ko koutou ko ʼaku tisipulo moʼoni. ʼE kotou iloʼi anai te moʼoni, pea ʼe fakaʼateaina anai koutou e te moʼoni.”—Soane 8:31, 32.

Neʼe matafaikehe ki ʼihi tana ui ʼae ʼe fakaʼateainaʼi anai natou. Neʼe natou ui fenei: “Ko matou ko te hakoga ʼo Apalahamo pea neʼe mole matou kaugana ʼi he temi ki he tahi. He koʼe ʼe ke ui fenei: ‘ ʼE kotou ʼateaina anai’?” Neʼe iloʼi e te kau Sutea ʼi ʼihi temi neʼe puleʼi natou e he ʼu puleʼaga matapule, kaʼe neʼe mole natou tali ke ui ko natou ko he kau kaugana. Kaʼe neʼe fakaha lelei e Sesu ʼe kei natou kaugana, ʼo ina ui fenei: “ ʼE au tala moʼoni atu kia koutou, ko he tahi ʼe ina fai he agahala ʼe kaugana ia ki te agahala.”—Soane 8:33, 34.

Neʼe mole fia fakamoʼoni te kau Sutea ki tanatou kaugana ki te agahala pea neʼe feala ke fakatupu kovi kia natou. Neʼe fakamahino fenei e Sesu: “Ko te tagata kaugana ʼe mole nofo ia ʼi te loto fale ʼo talu ai, kaʼe ko te foha ʼe nofo ia ʼo talu ai.” (Soane 8:35) Neʼe mole feala ke fakamaʼua e he kaugana ke foaki age hona vahe ʼi te tofiʼa pea neʼe feala ke fakamavae ʼi he temi pe. Neʼe gata pe ki he foha neʼe tupu ʼi he loto fale peʼe ko he foha neʼe vaheʼi, neʼe feala ke nofo “ ʼo talu ai” ʼi he loto fale, ko tona fakaʼuhiga, ʼi tona maʼuli katoa.

Koia, ko te moʼoni ʼo ʼuhiga mo te ʼAlo, ʼe ko te moʼoni ʼae ʼe ina fakaʼateaina ʼo talu ai te hahaʼi mai te agahala ʼae ʼe ina taki ki te mate. Neʼe ui fenei e Sesu: “Kapau ʼe fakaʼateaina koutou e te ʼAlo, ʼe kotou ʼateaina moʼoni anai.”—Soane 8:36.