Te ʼu Fehuʼi ʼa Te Kau Lautohi
ʼI te ʼu Evaselio e tolu ʼe fakamatala ai te fihi ʼo ʼuhiga mo te moʼi lolo totogi kovi ʼaē neʼe liligi ki te ʼulu ʼo Sesu. Neʼe ko te kau ʼapositolo fuli koa ʼaē neʼe ʼiʼita pe neʼe ko Sutasi tāfito?
ʼE fakamatala te meʼa ʼaia neʼe hoko ʼi te ʼu Evaselio ʼo Mateo, Maleko pea mo Soane. ʼE hā mai neʼe ko Sutasi ʼaē neʼe kamata meo, pea ko ʼihi ʼapositolo neʼe lagolago kia ia. Ko te fihi ʼaia ʼe ina fakahā mai pe koʼe ʼe feala ke tou fakafetaʼi ki tatatou maʼu te ʼu Evaselio e fā. ʼE moʼoni te ʼu fakamatala ʼaē neʼe fai e te ʼu tagata takitahi ʼaia, kae ʼe mole tatau te ʼu agaaga ʼo tanatou fakamatala. Kapau ʼe tou fakatatau te ʼu fakamatala ʼaia, pea ʼe lahi te ʼu meʼa ʼe tou maʼu anai ʼo ʼuhiga mo te meʼa ʼaē neʼe hoko.
Ko te fakamatala ʼaē ʼe tuʼu ia Mateo 26:6-13 ʼe ina fakahā mai te koga meʼa ʼaē neʼe hoko ai—ko te ʼapi ʼo Simeone te tagata kilia, ʼi Petania—kae ʼe mole ina fakahā mai te higoa ʼo te fafine ʼaē neʼe ina liligi te moʼi lolo magoni ki te ʼulu ʼa Sesu. Neʼe tohi fēnei e Mateo: “Nee iʼita te kau tisipulo i tanatou mamataʼage” pea mo nātou meo ʼo ʼuhiga mo te moʼi lolo ʼaē neʼe feala ke fakatau pea mo foaki tona totogi ki te kau māsisiva.
ʼE tou toe maʼu te ʼu faʼahi ʼaia ʼi te fakamatala ʼa Maleko. Kae ʼe ina toe ʼui neʼe avahi e te fafine ʼaia te hina lolo. Pea ʼe ina ʼui ko te lolo magoni ʼaia ʼe ko te “naʼato moʼoni”, ohage ko te taʼi lolo magoni ʼaē ʼe ʼaumai mai Initia. ʼO ʼuhiga leva mo te meo, ʼe ʼui fēnei e Maleko “neʼe ʼi ai ʼihi neʼe nātou meo,” pea “neʼe nātou meo ai ʼo ʼuhiga mo ia.” (Maleko 14:3-9, MN) Koia, ʼe hā mai ʼi te ʼu fakamatala ʼaia e lua neʼe mole ko he ʼapositolo pe e tahi ʼaē neʼe meo. Kae neʼe kamata feafeaʼi te meo ʼaia?
Neʼe ʼi ai te tahi ʼu meʼa neʼe talanoa kiai ia Soane, ʼaē neʼe sio mata ki te meʼa ʼaia. ʼE ina fakahā mai te higoa ʼo te fafine—ko Malia, te tēhina ʼo Maleta pea mo tokolua ʼo Lasalo. Pea moʼo fakakatoa te fakamatala kae mole ko hona fakafeagai, ʼe fakahā mai e Soane te tahi meʼa, ʼo ina ʼui “neʼe ina liligi ki te ʼu vaʼe ʼo Sesu pea mo ina holo tona ʼu vaʼe ʼaki tona lauʼulu.” Ka tou fakatahiʼi te ʼu fakamatala ʼaia, pea ʼe tou mahino ai ʼe fakamoʼoni e Soane neʼe liligi e Malia ki te ʼulu pea mo te ʼu vaʼe ʼo Sesu, te moʼi lolo, ko te “naʼato moʼoni.” Ko Soane neʼe kaumeʼa lelei mo Sesu, pea neʼe ʼita ia ʼi te fakalainoaʼi ʼo Ia. ʼE tou lau fēnei: “Ko Sutasi Isikaliote, ʼaē neʼe kau ki tana ʼu tisipulo, pea mo ina ʼamanaki ke ina lavakiʼi ia ia, neʼe ʼui maʼana: ‘He koʼe neʼe mole fakatau te lolo magoni ʼaenā ki te tenalio e tolugeau, pea foaki ki te kau māsisiva?’ ”—Soane 12:2-8, MN.
ʼE moʼoni, ko Sutasi neʼe “kau ki tana ʼu tisipulo,” kae ʼe tou mahino ki te ʼita ʼo Soane ki he tahi ʼe ina maʼu te pilivilesio ʼaia kae ʼe ina ʼamanaki lavakiʼi Sesu. ʼE ʼui fēnei e te Polofesea fai fakaliliu ko C. Howard Matheny ʼo ʼuhiga mo Soane 12:4: “Ko te kupuʼi palalau ‘neʼe ina ʼamanaki ke ina lavakiʼi’ ʼe fakamahino mai ʼe ko he gāue hoholo. ʼE fakahā mai e te kupuʼi palalau ʼaia, ko te lavakiʼi ʼo Sesu e Sutasi neʼe mole ko he fakatuʼutuʼu neʼe ina hoki fai age pe, kae neʼe ina fakakaukauʼi pea mo fakatuʼutuʼu lolotoga ni ʼu ʼaho ki muʼa atu. Pea ʼe toe hoko fēnei e Soane ʼo ʼuhiga mo te meo ʼa Sutasi “neʼe mole ina ʼui te meʼa ʼaia, he neʼe manatu moʼoni ki te kau māsisiva, kae neʼe ko te tagata kaihaʼa ia pea neʼe nofo ia mo te kesi falā, pea neʼe ina ʼave te falā ʼaē neʼe ʼai kiai.”
Koia, ʼe tonu te ʼui ʼaē neʼe ko te tagata kaihaʼa ko Sutasi ʼaē neʼe ina fakatupu te meo ʼaia, ʼuhi ko tana loto ʼaē ke lahi te falā ʼaē ka ina kaihaʼa, mo kapau neʼe fakatau te lolo totogi kovi ʼaia pea ʼe tuku anai tona totogi ki te kesi ʼaē neʼe ina taupau. ʼI te fakatupu e Sutasi te meo ʼaia, neʼe muhumuhu ai ʼihi ʼapositolo moʼo lagolago ki te faʼahi ʼaē neʼe hage maʼa nātou ʼe matatonu. Kae neʼe ko Sutasi totonu ʼaē neʼe tupu ai te meo ʼaia.