Te Hu ʼa Te Hau Ki Selusalemi ʼi He Asino Mui

ʼI te ʼaho ake, ʼi te ʼAhotapu, ʼaho 9 ʼo Nisani, neʼe mavae ia Sesu mo ʼana tisipulo mai Petania ʼo natou olo ki Selusalemi. ʼI tanatou fakaovi atu ki Petefase, ʼi te Moʼuga ʼo Oliveto, neʼe ui fenei e Sesu ki ʼana tisipulo ʼe toko lua:

“Kolua olo ki te kolo ʼae ʼe haga mai, pea ʼe kolua maʼu atu aipe anai te asino fafine kua haʼi pea mo tona ʼuhi. Kolua veteki ʼo taki mai kia te au. Pea kapau ʼe faifehuʼi atu he tahi, kolua tali fenei age: ‘ ʼE nā ʼaoga ki te ʼAliki.’ ʼE ina tuku atu aipe anai ke kolua taki mai.”—Mateo 21:2, 3.

Neʼe mole mahino ki te ʼu tisipulo ko te ʼu fakatotonu ʼaia ʼa Sesu neʼe ʼi ai tonatou pikipikiga mo te lea fakapolofeta Fakatohi-tapu. Kaʼe neʼe hoki natou mahino ki muli age, neʼe fakahoko ai te lea fakapolofeta ʼa Sakalia. Neʼe ina tala fakatomuʼa ʼo ʼuhiga mo te Hau ʼae neʼe fakapapauʼi e te ʼAtua ʼae ʼe hu anai ki Selusalemi, “e agamalu ia ia pea e heka ia ia i he asino, i he asino, te uhi o he asino fafine.”—Sakalia 9:9.

ʼI te olo ʼa te ʼu tisipulo ki Petefase pea mo tanā toʼo te asino mui mo tana faʼe, neʼe fehuʼi fenei age e te hahaʼi ʼae neʼe tutuʼu ovi ai: “He koʼe ʼe kolua veteki te asino?” (Maleko 11:5) Kaʼe ʼi tanatou logo ʼae neʼe ʼaoga te ʼu manu ʼaia ki te ʼAliki, neʼe natou tuku te ʼu tisipulo ke nā ʼave kia Sesu. Neʼe faliki e te ʼu tisipulo ʼonatou kofu tuʼa ki te asino pea mo tona ʼuhi, kaʼe heka ia Sesu ʼi te asino mui.

ʼI te alu leva ʼa Sesu ki Selusalemi, neʼe ʼaʼasili te kaugā malie ʼa te hahaʼi. Tokolahi neʼe natou fofola ʼonatou kofu ʼi te ala. Ko ʼihi neʼe natou tuʼusi “mai te ʼu gaueʼaga te ʼu vaʼa ʼakau ʼae ʼe failaulau” pea mo natou fola ʼi te ala. Neʼe natou kalaga fenei: “ ʼAtua, ʼe matou kole atu ke ke haofaki ia ia! Ke tapuakiʼi ia ia ʼae ʼe haʼu ʼi te huafa ʼo Sehova! Ke tapuakiʼi te Puleʼaga ʼo tatatou tamai ko Tavite ʼae ka hoko mai!” (Maleko 11:8-10) Neʼe ʼi ai te kau Faliseo ʼi te hahaʼi kaugā malie ʼaia pea neʼe natou iita ʼi te ʼu meʼa neʼe kalagaʼi e te hahaʼi. Neʼe natou ui fenei kia Sesu: “ ʼAliki, fakatonutonuʼi ʼau tisipulo.” Kaʼe neʼe tali fenei age e Sesu: “ ʼE au tala atu kia koutou, kapau ʼe natou fakalogologo, pea ʼe kalaga anai te ʼu foʼi maka.”—Luka 19:39, 40.

Neʼe sioʼi e Sesu ia Selusalemi, mo tagi pea mo ina ui fenei: “Ka na pau la neʼe kotou mahino ʼi te ʼaho ʼaeni ki te ʼu meʼa ʼae ʼe feala ke kotou maʼu ai te tokalelei . . . kaʼe kua ugia ia ki ʼokotou mata.” ʼE utu anai e te hahaʼi ʼo Selusalemi te ʼu fua kovi ʼo tanatou talagataʼa. Neʼe tala fakatomuʼa fenei e Sesu: “[ʼE] laga ai [anai] e ʼokotou fili he ʼa ʼaki he ʼu pou masila, mo natou takatakai koutou pea mo ʼohofi koutou mai te ʼu faʼahi fuli pe. ʼE natou peʼehi anai koutou mo ʼakotou fanau ki te kele, pea ʼe natou holoʼi katoa anai te ʼu maka ʼaeni.” (Luka 19:42-44) Neʼe hoko te ʼu palalau ʼaia ʼa Sesu, he neʼe maumauʼi Selusalemi ʼi te taʼu 70 H.T.S.

ʼI te hu ʼa Sesu ki Selusalemi, “neʼe gatu te kolo katoa pea neʼe natou ui fenei: ‘Ko ai ia ia?’ ” Pea neʼe haga ui fenei e te hahaʼi: “ ʼE ko te polofeta ko Sesu mai Nasaleti ʼi Kalilea!” (Mateo 21:10, 11) Ko natou ʼae neʼe ʼi te hahaʼi kaugā malie pea neʼe sisio ki muʼa atu ki te fakatuʼuake e Sesu ia Lasalo, neʼe natou fakamatala ki ʼihi atu te milakulo ʼaia. Neʼe meo te kau Faliseo ʼi tanatou mole lava fai he meʼa. Neʼe natou feuiʼaki fenei: “Kua mulimuli te malamanei katoa ia te ia.”—Soane 12:18, 19.

Ohage pe ko tana agamahani moka alu ki Selusalemi, neʼe alu ia Sesu ki te fale lotu ʼo faiakonaki ai. Neʼe ina fakamalolo ai te kau kivi pea mo te kau ketu. Neʼe iita te kau pelepitelo pule mo te kau sekelipa ʼi tanatou sisio ki te ʼu meʼa ʼaia neʼe ina fai pea mo te kalaga fenei ʼa te ʼu tamaliki tagata ʼi te fale lotu: “ ʼAtua, ʼe matou kole atu, haofaki te Foha ʼo Tavite!” Neʼe fehuʼi fenei age e te kau takitaki lotu kia Sesu: “ ʼE ke logo koa ki ʼanatou palalau?” Neʼe ina tali fenei age: “Neʼe heʼeki kotou lau koa la ia te folafola ʼaeni: ‘ ʼE vikiʼi anai koe e te ʼu tamaliki pea mo te ʼu toe ʼae kei meamea’?”—Mateo 21:15, 16.

Neʼe vakavakaʼi e Sesu te ʼu meʼa ʼae neʼe ʼi te fale lotu. Neʼe kua afiafi, pea neʼe mavae ai mo ʼana apositolo. ʼI muʼa ʼo te kamata ʼo te ʼaho 10 ʼo Nisani, neʼe toe liliu ki Petania, ʼo nofo ai ʼi te po ʼo te ʼAhotapu.