Neʼe Ina Toe Kapu Te Hahaʼi Fakatau Koloa ʼi Te Fale Lotu

Talu tanatou tau fagona mai Seliko, neʼe nonofo ia Sesu mo ʼana tisipulo ʼi Petania ia po ʼe tolu. ʼI te Monite ʼaho 10 ʼo Nisani, ʼi te kei uhuuhu, neʼe natou olo ai leva ki Selusalemi. Neʼe fia kai ia Sesu. Koia, ʼi tana sio ki he fuʼu fiku, neʼe fakaovi ki ai. Neʼe fua koa?

Neʼe ko te fakaʼosi ʼaia ʼo te mahina ʼo Malesio, kaʼe ko te taʼukai ʼo te ʼu fiku neʼe ko te mahina ʼo Sunio. Kaʼe neʼe kua failau te fuʼu fiku. Koia neʼe manatu ai Sesu neʼe kua ʼi ai mo ʼona fua. Kaʼe neʼe mole ina maʼu pe la he foʼi fiku. Neʼe faihala ʼuhi ko te kua failau ʼo te fuʼu fiku. Neʼe ui fenei leva e Sesu: “Ke ʼaua naʼa toe kai he tahi ki tou fua.” (Maleko 11:14) Neʼe moamoa atu aipe te fuʼu fiku. Pea ʼi te uhu ake neʼe fakamahino e Sesu te fakaʼuhiga ʼo te meʼa ʼaia neʼe ina fai.

Mole fualoa, pea tau atu ia Sesu mo ʼana tisipulo ki Selusalemi. Neʼe alu ki te fale lotu, ʼae neʼe ina vakavakaʼi ʼi te ʼanafi, ʼi te hili hoʼata. Kaʼe ʼi tana alu leva ʼaeni ki ai, neʼe mole ina vakavakaʼi pe. Neʼe ina fai he meʼa neʼe tatau mo te meʼa ʼae neʼe ina fai kua hili ki ai taʼu ʼe tolu, ʼi te Pasikate ʼo te taʼu 30 H.T.S. (Soane 2:14-16) Neʼe kapu e Sesu ki tuʼa ia “natou ʼae neʼe faifakatau pea mo totogi ni koloa ʼi te fale lotu.” Neʼe ina tokatokahi mo “te ʼu laupapa ʼo te hahaʼi fetogi paʼaga pea mo te ʼu hekaʼaga ʼo natou ʼae neʼe fakatau lupe.” (Maleko 11:15) Pea neʼe mole ina tuku he tahi ke alu mo hana meʼa ki he tahi faʼahi ʼo te kolo, ke ina tuʼusi age ʼi te malaʼe ʼo te fale lotu.

He koʼe neʼe kapu e Sesu te hahaʼi fetogi paʼaga pea mo te hahaʼi ʼae neʼe natou fakatau te ʼu manu ʼi te fale lotu? Neʼe ina ui fenei: “ ʼE mole tohi koa la ‘ ʼE fakahigoa anai toku ʼapi ko he fale faikole maʼa te ʼu puleʼaga fuli’? Kaʼe neʼe kotou fakaliliu koutou ko he fale ʼo te kau kaihaʼa.” (Maleko 11:17) Neʼe ina ui ko te ʼu tagata ʼaia neʼe ko he kau kaihaʼa, koteʼuhi neʼe totogi kovi ʼaupito te ʼu manu ʼae neʼe tonu ke totogi e te hahaʼi moʼo fai he ʼu sakilifisio. Kia Sesu, neʼe ko he agakaka ia.

ʼE mahino papau ia, ko te kau pelepitelo pule, mo te kau sekelipa pea mo te kau takitaki ʼo te hahaʼi neʼe natou logo ki te meʼa ʼae neʼe fai e Sesu, pea neʼe lahi age tanatou faiga ke natou matehi ia ia. Kaʼe neʼe ʼi ai te faigataʼaʼia. Neʼe mole natou iloʼi pe ʼe feafeaʼi te matehi ʼo Sesu, koteʼuhi neʼe kaugā malie te hahaʼi ʼae neʼe fagono kia te ia.

Neʼe mole gata pe ki te hahaʼi ʼae neʼe tutupu Sutea ʼae neʼe ʼomai ki te Pasikate, kaʼe neʼe toe kau ki ai mo he kau poloselite, natou ʼae neʼe tafoki ki te lotu Sutea. Ia natou ʼaia, neʼe ʼi ai ʼihi Keleka neʼe ʼomai ʼo atolasio ʼi te ʼaho lahi. Neʼe natou olo kia Filipo, lagi ʼuhi ko tona higoa Fakakeleka, pea neʼe natou kole age ke natou felaveʼi mo Sesu. Neʼe mole faʼa iloʼi e Filipo pe ʼe lelei anai hanatou felaveʼi mo Sesu, koia neʼe ina fakaha ai kia Atelea. Pea neʼe nā olo toko lua ʼo fakaha age kia Sesu, ʼae neʼe lagi kei nofo ʼi te fale lotu.

Neʼe iloʼi e Sesu neʼe kei toe pe ni kiʼi ʼaho pea ʼe mate anai. Koia neʼe mole ko he temi ʼaia ke ina tali ki te ʼu fehuʼi ʼa te hahaʼi peʼe ke iloa ia ia. Neʼe ina tali age ki te ʼu apositolo ʼe toko lua ʼaki he lea fakatata, ʼo ina ui fenei age: “Kua hoko mai ia te hola ʼae ke fakakololiaʼi ai te Foha ʼo te tagata. ʼE au tala moʼoni atu kia koulua, kapau ʼe mole to te tegaʼi fulumeto ki te kele pea mo mate, ʼe ko he tegaʼi fulumeto pe ia ʼe tahi. Kaʼe kapau ʼe mate, pea ʼe fua anai ia ʼo lahi.”—Soane 12:23, 24.

Ko he tegaʼi fulumeto ʼe tahi ʼe hage ia ʼe mole faʼa maʼuhiga. Kaʼe kapau ʼe nunusi, peʼe “mate” te tegaʼi fulumeto, pea ʼe feala leva ke homo pea mo tuputupu ʼo fua ia ʼo lahi. ʼO toe feia, ko Sesu tokotahi pe ʼae neʼe haohaoa. Kaʼe, ʼaki tana nofo agatonu ki te ʼAtua ʼo kaku ki tona mate, ʼe feala anai ke maʼuli ʼo heʼe gata ia te hahaʼi tokolahi ʼae neʼe natou maʼu he manatu fakasakilifisio ohage ko ia. Koia neʼe ui fenei ai e Sesu: “Ko ʼae ʼe ʼofa ki tona maʼuli, ʼe ina pulihi anai, kaʼe ko ʼae ʼe fehiʼa ki tona maʼuli ʼi te malama ʼaeni ʼe ina taupau anai ki te maʼuli heʼe gata.”—Soane 12:25.

Neʼe mole manatu pe ia Sesu kia ia tokotahi, he neʼe ina ui fenei: “Kapau ʼe fia kaugana he tahi kia te au, ke mulimuli mai ia te au, pea ko te faʼahi ʼae ʼe au ʼi ai, ʼe toe ʼi ai foki anai mo taku kaugana. Kapau ʼe fia kaugana he tahi kia te au, pea ʼe fakamaʼuhigaʼi anai ia ia e te Tamai.” (Soane 12:26) ʼI toe fakapale lahi leva! Ko natou ʼae ʼe fakamaʼuhigaʼi e te Tamai ʼe natou kaugā gaue anai mo Kilisito ʼi te Puleʼaga.

ʼI te fakakaukauʼi e Sesu ia te mamahi lahi mo te mate fakamataku ʼae ka tau anai mo ia, neʼe ina ui fenei: “ ʼE au lotohoha ʼi te temi nei, pea kotea ʼae ke au ui? Tamai, haofaki au mai te hola ʼaeni.” Kaʼe neʼe mole fakaʼuhiga leva neʼe mole fia fakahoko e Sesu te finegalo ʼo te ʼAtua. Neʼe ina hoko atu fenei: “Kaʼe ʼe ko te hola ʼaeni ʼae neʼe tupu ai taku haʼu.” (Soane 12:27) Neʼe tali e Sesu te ʼu fakatuʼutuʼu fuli ʼa te ʼAtua, ʼo kau ai mo tona mate fakasakilifisio.