“Kua Hoko Mai Tona Hola!”
“Kua hoko mai tona hola ke alu ai mai te malama-nei ki te Tamai.”—Soane 13:1.
1. ʼI te fakaōvi mai ʼo te Pāsikate ʼo te taʼu 33 ʼo totatou temi, koteā te ʼu fehuʼi ʼaē neʼe lagaʼi e te hahaʼi ʼo Selusalemi, pea koteā tona tupuʼaga?
ʼI TONA papitema ʼi te taʼu 29 ʼo totatou temi, neʼe kamata e Sesu te gāue ʼe aʼu anai ki tona “hola” mate, mo tona fakatuʼuake, pea mo tona faka kolōlia. ʼI te temi nei, ʼe tou ʼi te fasiga taʼu mātala ʼo te taʼu 33 ʼo totatou temi. Neʼe hoki hili atu pe te ʼu kiʼi vāhaʼa, talu mai te ʼaho ʼaē neʼe fonofono ai te telepinale lahi ʼa te kau Sutea, te Sanetolio, ke nātou matehi Sesu. ʼI tana ʼiloʼi tanatou fakatuʼutuʼu, ʼaē neʼe lagi fakahā age e tona kaumeʼa ko Nikotemo ʼaē neʼe kau ki te Sanetolio, neʼe mavae ai Sesu ʼi Selusalemi, pea neʼe fakalaka ʼi te vaitafe ʼo Solotane ʼo ʼalu ki te ʼu potu ʼo te tuvao. ʼI te fakaōvi mai ʼo te Lafeti ʼo te Pāsikate, ko te tokolahi ʼo te hahaʼi neʼe nātou hake ʼi te fenua ʼo nātou ʼolo ki Selusalemi, pea neʼe lagaʼi e te hahaʼi te ʼatu ʼu fehuʼi ʼo ʼuhiga mo Sesu. Neʼe feʼekeʼaki e te hahaʼi, ‘koteā takotou manatu? ʼE koutou manatu koa ʼe mole haʼu anai ki te lafeti?’ Ko te kau pelepitelo pule pea mo te kau Faliseo, neʼe nātou fakaʼāsili te fia ʼiloʼi e te hahaʼi ia te faʼahi ʼaia, he neʼe nātou fakatotonu, ka sio anai he tahi kia Sesu pea ʼe tonu ke ina fakahā age kia nātou.—Soane 11:47-57.
2. Koteā te meʼa ʼaē neʼe fai e Malia ʼo tupu ai tona ʼitagiʼi, pea ʼe hā feafeaʼi mai ʼi te tali ʼaē neʼe fai e Sesu moʼo hāofaki ia Malia, neʼe mahino ki “tona hola”?
2 ʼI te ʼaho 8 ʼo Nisani, ia ʼaho e ono ʼi muʼa ʼo te Pāsikate, neʼe toe liliu ia Sesu ki te ʼu kolo tafaʼaki ʼo Selusalemi. Neʼe ʼalu ki Petania —te kolo ʼaē neʼe nonofo ai tona ʼu kaumeʼa ʼofaina ko Maleta, Malia, pea mo Lasalo—pea ko te kolo ʼaia neʼe tuʼu ia kilometa e tolu ʼi tuʼa ʼo Selusalemi. Neʼe ko te Feliaono afiafi, pea neʼe nofo ai Sesu ʼi te ʼaho ʼo te Sapato. ʼI te ʼapogipogi afiafi, neʼe ʼiʼita tana ʼu tisipulo ʼi te temi ʼaē neʼe liligi ai kia te ia e Malia te lolo magoni pea mo totogi kovi. Neʼe tali maʼa Sesu: “Koutou haganoa kia te ia, ke ina taupau te aho o toku avaifo. E koutou maù aipe te hahai masiva mo koutou, kae e mole koutou maù aipe anai ia au.” (Soane 12:1-8; Mateo 26:6-13) Neʼe ʼiloʼi e Sesu ‘kua hoko mai tona hola ke mavae ʼi te mālama ʼaenī ke ʼalu ki te Tāmai.’ (Soane 13:1) Neʼe kei toe pe ʼaho e nima, pea ʼe ina “foaki [anai] tona mauli moʼo totogi mai o te tokolahi.” (Maleko 10:45) Koia neʼe mole kei toe he temi lahi maʼa Sesu ke ina fai pea mo akoʼi ia meʼa fuli. Koia ʼe ko he faʼifaʼitaki fakatalakitupua ʼaē neʼe ina tuku mai kia tatou, ʼi tatatou talitali ki te fakaʼosi ʼo te tuʼu ʼaenī! Koutou fakatokagaʼi te meʼa ʼaē neʼe hoko kia Sesu ʼi te ʼapogipogi ake.
Te ʼAho ʼAē Neʼe Hū Fakaʼaliʼaliki Ai Sesu
3. (a) Neʼe feafeaʼi te hū ʼa Sesu ki Selusalemi ʼi te ʼAhotapu, ʼaho 9 ʼo Nisani, pea neʼe tali feafeaʼi ia ia e te tokolahi ʼo te hahaʼi? (b) Koteā te tali ʼaē neʼe fai e Sesu ki te kau Faliseo ʼi tanatou ʼiʼita ki te hahaʼi?
3 ʼI te ʼAhotapu, ʼaho 9 ʼo Nisani, neʼe hū fakaʼaliʼaliki ia Sesu ki Selusalemi. ʼI tana fakaōvi atu ki te kolo—neʼe heka ʼi te kiʼi asino veliveli moʼo fakahoko ia Sakalia 9:9—ko te tokolahi ʼo te hahaʼi ʼaē neʼe nātou takatakai ia ia, neʼe nātou folahi tonatou ʼu kofu tuʼa ʼi te ala, pea ko ʼihi neʼe nātou tuʼusi te ʼu vaʼa ʼakau ʼo nātou folahi ʼi te ala. Neʼe nātou kalaga fēnei, “ ʼe manuʼia ia Ia ʼaē ʼe haʼele mai, te Hau, ʼi te huafa ʼo Sehova!” Ko ʼihi Faliseo ʼi te lotolotoiga ʼo te hahaʼi, neʼe nātou loto ke pupulaʼi e Sesu tana ʼu tisipulo. Kae neʼe tali maʼa Sesu: “ ʼE ʼau tala atu kia koutou, kapau ʼe fakalogologo ia nātou ʼaenī, pea ʼe kalaga anai te ʼu maka.”—Luka 19:38-40; Mateo 21:6-9, MN.
4. He koʼe neʼe gatutu ia Selusalemi ʼi te hū ʼa Sesu ki te kolo ʼaia?
4 ʼI he ʼu kiʼi vāhaʼa ki muʼa atu, ko te tokolahi ʼo te hahaʼi neʼe nātou sisio ki te fakatuʼuake e Sesu ia Lasalo. ʼI te temi ʼaia, ko te hahaʼi ʼaia neʼe hoko atu tanatou fakamatala ia te milakulo ʼaia. Pea ʼi te hū ʼa Sesu ki Selusalemi, neʼe gatutu ai te kolo katoa. Neʼe feʼekeʼaki te hahaʼi: “Ko ai koa?” Pea neʼe haga ʼui fēnei maʼa te hahaʼi: “Ko te polofeta ko Sesu, mai Nasaleti ʼi Kalilea!” ʼI tanatou sio ki te meʼa ʼaē neʼe hoko, neʼe meo fēnei ai te kau Faliseo: “Kua muli te malamanei ia te ia.”—Mateo 21:10, 11; Soane 12:17-19, MN.
5. Koteā ʼaē neʼe hoko ʼi te hū ʼa Sesu ki te fale lotu?
5 Ohage ko tana fai māhani mokā ʼalu ki Selusalemi, ko Sesu te Tagata Faiakonaki Lahi, neʼe ʼalu ʼo faiakonaki ʼi te fale lotu. Pea neʼe ʼōmai kia te ia te hahaʼi kivi pea mo te hahaʼi ketu, pea neʼe ina fakamālōlō ia nātou. Neʼe ʼiʼita te kau pelepitelo pule pea mo te kau sekelipa ʼi tanatou sio ki te faʼahi ʼaia, pea mo tanatou logo ki te kalaga fēnei ʼa te ʼu kiʼi tamaliki tagata ʼi te fale lotu: “Hāofaki, ʼe mātou kole atu, te ʼAlo ʼo Tavite!” Neʼe nātou meo fēnei, “ ʼe ke logo ki te meʼa ʼaē ʼe nātou ʼui?” Pea tali maʼa Sesu: “Ei. Neʼe mole heʼeki koutou lau koa la te meʼa ʼaenī: ‘Mai te gutu ʼo te kihiʼi tamaliki pea mo nātou ʼaē ʼe kei huhu, neʼe ke foaki ia te fakavikiviki’?” ʼI te hoko atu ʼo te faiakonaki ʼa Sesu, neʼe ina sioʼi lelei te ʼu meʼa ʼaē neʼe fai ʼi te fale lotu.—Mateo 21:15, 16, MN; Maleko 11:11, MN.
6. Koteā te kehekehe ʼo te faʼahiga fai ʼa Sesu pea mo te meʼa ʼaē neʼe ina fai ki muʼa atu, pea koteā tona tupuʼaga?
6 Neʼe mole tatau leva tana faʼahiga fai ohage ko te meʼa ʼaē neʼe ina fai kua hili kiai māhina e ono! Heʼe ʼi te temi ʼaia, neʼe hake ki Selusalemi ki te Lafeti ʼo te ʼu Tapenakulo, kae neʼe “mole hake fakahāhā kaʼe neʼe hake fakafūfū pe ia.” (Soane 7:10, MN ) Pea neʼe faiga tuʼumaʼu ke ina hāofaki tona maʼuli, mokā ʼamanaki hoko he tuʼutāmaki kia ia. ʼI te temi leva ʼaia, neʼe hū fakahāhā ki te kolo, ʼaē neʼe fakatotonu ai ke puke ia ia! Tahi ʼaē meʼa, neʼe mole ko te agamāhani ʼa Sesu tana tala fakahāhā ko ia te Mesia. (Isaia 42:2; Maleko 1:40-44) Neʼe mole ina loto ke fai he ʼu kalaga logoaʼa ʼo ʼuhiga mo ia, peʼe felauʼaki e te hahaʼi he ʼu loi ʼo ʼuhiga mo ia. Kae neʼe kalagaʼi fakahāhā e te hahaʼi ʼe ko ia te Hau pea mo te Hāofakiʼaga—te Mesia—pea neʼe fakafeagai ki te kole age ʼa te kau takitaki lotu ke ina fakagata te kalaga ʼa te hahaʼi! He koʼe neʼe hoko te fetogi ʼaia? Koteʼuhi neʼe “kua hoko mai te hola ke fakakololiaʼi ai te Foha o te tagata,” ohage ko te meʼa ʼaē ka tala e Sesu ʼi te ʼapogipogi ake.—Soane 12:23.
Ko He Gāue Lototoʼa—Mo He ʼu Akonaki Moʼo Hāofaki Te Hahaʼi
7, 8. Neʼe tatau feafeaʼi te ʼu meʼa ʼaē neʼe fai e Sesu ʼi te ʼaho 10 ʼo Nisani ʼo te taʼu 33 ʼo totatou temi, mo te ʼu meʼa ʼaē neʼe ina fai ʼi te fale lotu ʼi te Pāsikate ʼo te taʼu 30 ʼo totatou temi?
7 ʼI tana tau atu ki te fale lotu ʼi te Mōnite, ʼaho 10 ʼo Nisani, neʼe fakahoko e Sesu te meʼa ʼo ʼuhiga mo te faʼahi ʼaē neʼe sio kiai ʼi te ʼanāfi hoʼatā. Neʼe ina kamata “kapu ki tua te hahai faifakatau mo too koloa i te faletapu, pea nee ina tokatokahi te u laupapa a te hahai fetogi paaga pea mo te u hekaʼaga a te hahai fakatau lupe. Pea nee mole ina tali he tahi, ke amo meaʼage i te faletapu.” Neʼe ina tauteaʼi te hahaʼi ʼaia ʼo ʼui maʼana: “Pe nee mole kua tohi: Ko toku api e higoai anai ko he api faikole ki te atu puleaga? Kae koutou fakaliliu ko he ana o te kau kaihaa.”—Maleko 11:15-17.
8 Ko te ʼu meʼa ʼaē neʼe fai e Sesu, neʼe tatau mo te ʼu meʼa ʼaē neʼe ina fai ia taʼu e tolu ki muʼa atu, ʼi te temi ʼaē neʼe ʼalu ai ki te fale lotu ki te Pāsikate ʼo te taʼu 30 ʼo totatou temi. Kae neʼe kovi age te tautea ʼaē neʼe ina fai ki te hahaʼi ʼaia. He neʼe ina ʼui ʼi te temi ʼaia ko te hahaʼi fakatau koloā ʼo te fale lotu, ʼe ko “te kau kaihaa.” (Luka 19:45, 46; Soane 2:13-16) Neʼe ina fai te tautea ʼaia kia nātou he neʼe nātou kaihaʼa te hahaʼi, ʼo hiki te ʼu totogi ʼo te ʼu manu ʼaē neʼe totogi e te hahaʼi moʼo fai ʼaki te ʼu sakilifisio. Ko te kau pelepitelo pule, mo te kau sekelipa, pea mo te kau takitaki ʼo te hahaʼi, neʼe nātou logo ki te ʼu meʼa ʼaē neʼe fai e Sesu, pea neʼe nātou toe kumi he ʼu puleʼaki ke nātou matehi ia ia. Kae neʼe mole heʼeki nātou ʼiloʼi peʼe feafeaʼi he matehi ʼo Sesu, he ko te hahaʼi fuli ʼaē neʼe nātou ʼofolele ʼi tana faiakonaki, neʼe nātou tapiki kia te ia moʼo fagono ki ai.—Maleko 11:18; Luka 19:47, 48.
9. Koteā te ako ʼaē neʼe fai e Sesu, pea koteā te fakaafe ʼaē neʼe ina fai ki te hahaʼi ʼaē neʼe fakalogo kia te ia ʼi te fale lotu?
9 ʼI te hoko atu ʼa te faiakonaki ʼa Sesu ʼi te fale lotu, neʼe ʼui maʼana: “Kua hoko mai te hola ke fakakololiaʼi ai te Foha o te tagata.” Ei, neʼe ina ʼiloʼi ʼe kei toe pe he ʼu kiʼi ʼaho ki tona maʼuli fakatagata. ʼI tana ʼosi ʼui ʼaē ʼe tonu ke mate te fuaʼi fulumeto ke feala hona fua—ko tona faka ʼuhiga neʼe tonu ke mate, ke feala hana foaki te maʼuli heʼegata ki te hahaʼi—neʼe toe fai e Sesu tana fakaafe ki te hahaʼi ʼaē neʼe fakalogo kia te ia, ʼo ʼui maʼana: “Kapau e i ai he tahi e tuufekau mai kia te au, ke mulimuli mai ia te au, pea ko te faahi e au i ai pea e i ai anai mo taku faifekau. Kapau e i ai he tahi e tuufekau mai kia te au, e fakaapaapa anai kia te ia te Tamai.”—Soane 12:23-26.
10. Neʼe malave feafeaʼi kia Sesu te mate fakamataku ʼaē ka hoko kia te ia?
10 ʼI tana manatu ki te mate fakamataku ʼaē ka hoko kia ia ʼi te ʼu ʼaho e fā ʼaē neʼe kei toe, neʼe hoko atu e Sesu ʼo ʼui maʼana: “ ʼI te temi nei kua hoha toku nefesi, pea koteā te meʼa ke ʼau ʼui? Tāmai hāofaki ʼau mai te hola ʼaia.” Kae neʼe tonu ke hoko te meʼa ʼaē neʼe fakatalitali kia Sesu. Neʼe ʼui maʼana, “kaʼe ko te tupuʼaga la ʼaia ʼo taku kaku mai ki te hola ʼaia.” Ei neʼe mulimuli Sesu ki te fakatuʼutuʼu katoa ʼa te ʼAtua. Neʼe kua ina fakatotonu ke mulimuli tana ʼu gāue ki te finegalo ʼo te ʼAtua, ʼo aʼu ki tana mate faka sakilifisio. (Soane 12:27, MN ) ʼE ko he faʼifaʼitaki lelei ʼaē neʼe ina tuku mai kia tatou—he neʼe fakalogo katoa ki te finegalo ʼo te ʼAtua!
11. Koteā te ʼu akonaki ʼaē neʼe fai e Sesu ki te hahaʼi ʼaē neʼe nātou logo ki te leʼo mai te lagi?
11 Neʼe tuʼania ʼaupito ki te ʼu meʼa ʼaē ka lau ki tana Tāmai ʼuhi ko tona mate, pea neʼe faikole fēnei ia Sesu: “Tamai fakakololiaʼi tou huafa.” Pea neʼe ʼofolele ai te hahaʼi ʼaē neʼe fakatahitahi ʼi te fale lotu, he neʼe nātou logo ki te leʼo neʼe hifo mai te lagi, ʼo ina ʼui fēnei: “Kuʼau fakakololia ia pea e au toe fakakololiaʼi anai ia.” Neʼe fakaʼaogaʼi e te Tagata Faiakonaki Lahi te fealagia ʼaia moʼo tala ki te hahaʼi pe koʼe neʼe nātou logo ki te leʼo ʼaia, pea koteā anai te ʼu fua ʼo tona mate, pea he koʼe ʼe ʼaoga ke nātou tui. (Soane 12:28-36) ʼE mahino ia neʼe maʼumaʼua ai Sesu ʼi te ʼu ʼaho ʼaia e lua. Kae neʼe kei toe te tahi ʼaho maʼuhiga.
Te ʼAho ʼAē Neʼe Ina Fai Ai Te ʼu Valoki
12. ʼI te Feliatolu, ʼaho 11 ʼo Nisani, neʼe faiga feafeaʼi te kau takitaki lotu ke nātou faka lākahalaʼi ia Sesu, pea neʼe koteā tona ikuʼaga?
12 ʼI te Feliatolu, ʼaho 11 ʼo Nisani, neʼe toe ʼalu Sesu ʼo faiakonaki ʼi te fale lotu, pea neʼe ʼi ai te hahaʼi fakafeagai. ʼI tanatou talanoa ki te ʼu meʼa ʼaē neʼe fai e Sesu ʼanāfi, neʼe fehuʼi fēnei age kia te ia e te ʼu pelepitelo pule pea mo te ʼu tagata ʼāfea ʼo te hahaʼi: “Ko te pule mai fea e ke fai ai te u mea aia? Pe ko ai ae nee ina foaki atu te pule aia?” Neʼe fai age e te Pule Faiakonaki te tali neʼe nātou lainoa ai, pea neʼe ina fai te ʼu lea fakatātā mālohi e tolu moʼo fakahā te agakovi ʼo te kau fakafeagai ʼaia—ko te ʼu lea fakatātā e lua ʼo ʼuhiga mo te gāueʼaga vite, pea mo te tahi ʼo ʼuhiga mo te kaitahi ʼo te ʼohoana. Neʼe ʼiʼita ai te kau takitaki lotu ʼi te ʼu meʼa ʼaē neʼe nātou logo kiai, pea neʼe nātou fia puke ia ia. Kae neʼe nātou matataku ki te hahaʼi, he neʼe nātou faka ʼuhiga ia Sesu ʼe ko he polofeta. Pea neʼe nātou fia fakahalaʼi ia ia, ke ina fai he ʼu palalau ʼe feala ke nātou puke ai. Kae neʼe nātou fakalogologo ʼi te ʼu tali ʼaē neʼe fai age e Sesu.—Mateo 21:23–22:46.
13. Koteā te tokoni ʼaē neʼe fai e Sesu ki te hahaʼi ʼaē neʼe fakalogo kia te ia, ʼo ʼuhiga mo te kau sekelipa pea mo te kau Faliseo?
13 Mai tona ʼuhiga ʼaē ko te kau sekelipa pea mo te kau Faliseo neʼe nātou ʼui ʼe nātou ako ki te hahaʼi te Lao ʼa te ʼAtua, koia neʼe uga fēnei ai e Sesu te hahaʼi ʼaē neʼe fakalogo kia te ia: “Ko meafuape e natou tala atu kia koutou, koutou fai pea koutou taupau ia, kae aua naa koutou mulimuli ki anatou gaue; koteuhi e natou tala atu kae e mole natou fai.” (Mateo 23:1-3) Neʼe ko he valoki mālohi ʼaia ʼo te agakovi ʼo te kau takitaki lotu! Kae neʼe mole heʼeki ʼosi te valokiʼi ʼo nātou e Sesu. Ko tona ʼaho fakaʼosi ʼaenī ʼi te fale lotu, pea ʼaki he lototoʼa neʼe ina tala fakahagatonu age tanatou ʼu aga ʼe kovi—ʼo ina tala takitahi te ʼu aga ʼaia ohage tona mālohi ko te ʼuʼulu ʼo te mana.
14, 15. Koteā te ʼu valoki fefeka ʼaē neʼe fai e Sesu ʼo ʼuhiga mo te kau sekelipa pea mo te kau Faliseo?
14 Neʼe ʼui tuʼa ono e Sesu, “Malaʼia kia koutou, kau sekelipa mo koutou kau Faliseo, kau malualoi!” Neʼe ina fakamahino age pe koʼe ʼe nātou feiā, koteʼuhi neʼe nātou pupunu ki te hahaʼi te Puleʼaga ʼo selo, pea neʼe mole nātou fakagafua ke hū ia nātou ʼe fia hū kiai. Ko te kau malualoi ʼaia neʼe nātou fetuʼulaki ʼi te tai pea mo te kele moʼo fai ʼo he poloselite, pea ka liliu he tahi ʼo poloselite, pea neʼe nātou faka fealagia ia ia ki te fakaʼauha heʼegata. Neʼe nātou faka maʼuhigaʼi te totogi ʼo te time, kae nātou lotonoa ki “te ʼu meʼa ʼaē ʼe maʼuhiga ake ʼo te Lao, ʼaē ko te faitotonu pea mo te manavaʼofa pea mo te agatonu.” Ei, neʼe nātou fakamaʼa “te tuʼa ʼo te ipu pea mo te pa, kaʼe ʼi loto ʼe fonu ko te kaihaʼa mo te fakavalevale,” he neʼe nātou fakahā ki tuʼa ʼe nātou aga faka lotu, kae ko loto neʼe kua popo pea mo pala. Tahi ʼaē meʼa, neʼe nātou fia fakatuʼu he ʼu falemaka maʼa te kau polofeta, pea mo teuteuʼi ke tokagaʼi tanatou aga faka lotu ʼaia, kae ʼi tona fakahagatonu ko nātou “ko te ʼu foha . . . ʼo nātou ʼaē neʼe nātou fakapogi te kau polofeta.”—Mateo 23:13-15, 23-31, MN.
15 Moʼo valokiʼi te meʼa noaʼi ʼo te ʼu meʼa fakalaumālie e tona kau fakafeagai, neʼe ʼui maʼa Sesu: “Malaʼia kia koutou, kau takitaki kivi.” Neʼe nātou kivi ʼo ʼuhiga mo te ʼu aga ʼaē neʼe tonu ke fai, koteʼuhi neʼe nātou faka maʼuhigaʼi tāfito te aulo ʼo te fale lotu, kae nātou meʼa noaʼi te maʼuhiga fakalaumālie ʼo te potu ʼaia ʼaē neʼe fai ai te tauhi. Neʼe toe hoko atu e Sesu, ʼaki te ʼu valoki mālohi ʼaenī. Neʼe ʼui maʼana, “ ʼAē faga gata, faga ʼuhiʼi gata, ʼe feala feafeaʼi anai hakotou hola ʼi te fakamāu ʼa te Seʼeni?” Ei, neʼe tala age e Sesu kia nātou, ʼuhi ko tanatou haga fai tanatou ʼu aga ʼe kovi, ʼe hoko anai kia nātou te fakaʼauha heʼegata. (Mateo 23:16-22, 33, MN ) ʼOfa pe ke tou lototoʼa mo tatou, ʼo kalagaʼi te logo ʼo te Puleʼaga, tatau aipe peʼe tonu ke tou tala te ʼu kākā ʼa te lotu hala.
16. ʼI tanatou heheka ʼi te Moʼuga ʼo Oliveto, koteā te lea faka polofeta maʼuhiga ʼaē neʼe tala e Sesu ki tana ʼu tisipulo?
16 Pea neʼe mavae leva Sesu ʼi te fale lotu. ʼI te teitei fakaʼosi ʼo te hili hoʼatā, neʼe hake mo tana ʼu ʼapositolo ki te Moʼuga ʼo Oliveto. ʼI tana heka ʼi te moʼuga ʼaia, neʼe ina tala age te lea faka polofeta ʼo ʼuhiga mo te fakaʼauha ʼo te fale lotu, mo te fakaʼiloga ʼo tana ʼafio pea mo te fakaʼosi ʼo te tuʼu ʼaenī. Ko te maʼuhiga ʼo te lea faka polofeta ʼaia ʼe faka ʼuhiga ki totatou temi. ʼI te afiafi ʼaia, neʼe toe tala fēnei e Sesu ki tana ʼu tisipulo: “ ʼE koutou ʼiloʼi ʼe kei toe ia ʼaho e lua ki te pāsikate, pea ʼe tonu ke ʼave te Foha ʼo te tagata ke haʼi ki he pou.”—Mateo 24:1-14; 26:1, 2, MN.
Ko Sesu “Neʼe ʼOfa Kia Nātou ʼo Aʼu Ki Te Fakaʼosi”
17. (a) Lolotoga te Pāsikate ʼo te ʼaho 14 ʼo Nisani, koteā te ako ʼaē neʼe fai e Sesu ki te toko 12? (b) Koteā te fakamanatu ʼaē neʼe fakatuʼutuʼu e Sesu, ʼi tana ʼosi fakamavae ia Sutasi Isikaliote?
17 Ko te ʼu ʼaho e lua ʼaē neʼe hoa kiai—te ʼaho 12 pea mo te ʼaho 13 ʼo Nisani—neʼe mole ʼalu fakahāhā ia Sesu ki te fale lotu. Neʼe faiga e te kau takitaki lotu ke nātou matehi ia ia, pea neʼe mole ina loto ke ʼi ai he meʼa ʼe ina fakaleluʼi tana fai te Pāsikate mo tana kau ʼapositolo. ʼI te Felianima afiafi neʼe kamata ai te ʼaho 14 ʼo Nisani—te ʼaho fakaʼosi ʼo te maʼuli fakatagata ʼo Sesu ʼi te kele. ʼI te afiafi ʼaia, neʼe fakatahitahi Sesu mo tana kau ʼapositolo ʼi te ʼapi ʼi Selusalemi, neʼe teuteuʼi ke nātou fai ai te Pāsikate. ʼI tanatou fai fakatahi te Pāsikate neʼe ina tuku age ki te toko 12 te ako lelei ʼo ʼuhiga mo te agavaivai, he neʼe ina fufulu tonatou ʼu vaʼe. ʼI tana ʼosi fakamavae ia Sutasi Isikaliote, ʼaē neʼe ina tali ke ina lavakiʼi tona ʼAliki kia foʼi piesi siliva e 30—ʼaē ʼe ʼui e te Lao ʼa Moisese ʼe ko te totogi ʼo he tagata kaugana—neʼe kamata fai ai leva e Sesu te Fakamanatu ʼo tona mate.—Ekesote 21:32; Mateo 26:14, 15, 26-29; Soane 13:2-30.
18. Koteā te tahi ʼu akonaki ʼaē neʼe fai e Sesu ʼaki te ʼofa ki tana ʼu ʼapositolo agatonu e toko 11, pea neʼe ina teuteuʼi feafeaʼi ia nātou ki tana ʼamanaki mavae?
18 ʼI te ʼosi fai ʼo te Fakamanatu, neʼe fihi ai te kau ʼapositolo pe ko ai ʼaē ʼe lahi ake ia nātou. Neʼe mole pupulaʼi nātou e Sesu, kae neʼe faʼa kātaki ʼo akoʼi age kia nātou te maʼuhiga ʼaē ke nātou fetauhiʼaki. Neʼe ina manatuʼi tanatou nonofo mo ia lolotoga tona ʼu ʼahiʼahi, pea neʼe ina fai tana fuakava mo nātou ki he puleʼaga. (Luka 22:24-30) Tahi ʼaē meʼa, neʼe fakatotonu age e Sesu ke nātou feʼofaʼofani ohage ko tana ʼofa ʼaē kia nātou. (Soane 13:34) ʼI tana nofo fualoa ʼi te kogafale ʼaia, neʼe ʼofa Sesu ʼo teuteuʼi ia nātou ki tana ʼamanaki mavae. Neʼe ina fakahā age ʼe kaumeʼa mo nātou, ʼo fakaloto mālohiʼi nātou ke nātou tui, pea neʼe ina fakapapau age ʼe tokoni anai te laumālie maʼoniʼoni kia nātou. (Soane 14:1-17; 15:15) ʼI muʼa ʼo tanatou mavae ʼi te ʼapi, neʼe kole fēnei e Sesu ki tana Tāmai: “Kua hoko mai te hola, fakakololiaʼi tou Alo ke fakakololiaʼi koe e te Alo.” Ei, neʼe teuteuʼi e Sesu tana ʼu ʼapositolo ki tana mavae, pea neʼe ‘ ʼofa moʼoni kia nātou ʼo aʼu ki te fakaʼosi.’—Soane 13:1; 17:1.
19. He koʼe neʼe nofo tuʼania ia Sesu ʼi te ʼōloto ʼo Setesemane?
19 Neʼe kua lagi ʼosi te māʼupō, ʼi te temi ʼaē neʼe tau ai Sesu mo tana ʼu ʼapositolo agatonu ʼe toko 11 ki te ʼōloto ʼo Setesemane. Neʼe tau ʼalu kiai mo tana ʼu ʼapositolo. (Soane 18:1, 2) Neʼe kei toe ni ʼu kiʼi hola, pea mate anai Sesu ohage ko he tagata neʼe ina maumauʼi te lao. Lolotoga te faikole ʼa Sesu, neʼe tuʼania lahi ki te meʼa ʼaē ka hoko kia ia, pea mo te manukinuki ʼaē ka fai ki tana Tāmai, ʼo liliu ai tona kakava ohage ko he ʼu toʼi toto neʼe hali ki te kele. (Luka 22:41-44) Neʼe ʼui maʼa Sesu ki tana ʼu ʼapositolo: “Kua hoko mai te hola!” pea “Koʼeni! Ko ia ʼaē ʼe ina lavakiʼi ʼau kua fakaōvi mai.” ʼI tana kei lolotoga palalau, neʼe fakaōvi age ia Sutasi Isikaliote, neʼe haʼu mo te hahaʼi tokolahi neʼe ʼi ai tanatou ʼu taume, mo tanatou ʼu mālama pea mo te ʼu mahafu. Neʼe nātou ʼōmai moʼo puke ia Sesu, pea neʼe mole fakafeagai ki te faʼahi ʼaia. Neʼe ina fakamahino fēnei: “Pea, ʼe feafeaʼi leva anai he fakahoko ʼo te ʼu folafola ʼo te ʼu Tohi, ʼaia neʼe fakahā ai ʼe tonu ke hoko feiā?”—Maleko 14:41-43; Mateo 26:48-54, MN.
Kua Faka Kolōliaʼi Te Foha ʼo Te Tagata!
20. (a) Koteā te ʼu meʼa kovi ʼaē neʼe fai kia Sesu ʼi tona ʼosi puke? (b) ʼI muʼa ʼo tona mate, he koʼe neʼe kalaga fēnei ia Sesu: “Kua katoa te meafuape”?
20 ʼI tona ʼosi puke, neʼe tukugakoviʼi Sesu e te ʼu fakamoʼoni loi, neʼe faka lākahalaʼi e te ʼu tuʼi fakamāu kākā, neʼe tauteaʼi e Posio Pilato, neʼe manukiʼi e te kau pelepitelo pea mo te hahaʼi, pea neʼe vāʼi pea mo gaohi koviʼi e te kau solia. (Maleko 14:53-65; 15:1, 15; Soane 19:1-3) ʼI te fetapā ʼo te Feliaono, neʼe tutuki ai Sesu ki te pou fakamamahi, pea neʼe mamahi lahi, he neʼe ʼāsili ava te ʼu lavea ʼo tona ʼu nima pea mo tona ʼu vaʼe, ʼuhi ko te mamafa ʼo tona sino. (Soane 19:17, 18) ʼI te teitei hola tolu hoʼatā, neʼe kalaga fēnei Sesu: “Kua katoa te meafuape!” Ei, neʼe ina fakahoko katoa ia meʼa fuli ʼaē neʼe tonu ke ina fai ʼi te kele. ʼI tana tuku tona laumālie ki te ʼAtua, neʼe maleʼe ifo tona ʼulu pea mate ai. (Soane 19:28, 30; Mateo 27:45, 46; Luka 23:46) Pea ʼi te tolu ʼaho, neʼe fakatuʼuake e Sehova tona ʼAlo. (Maleko 16:1-6) Hili kiai ʼaho e fāgofulu ʼi tona ʼosi fakatuʼuake, pea hake ai Sesu ki selo, pea neʼe faka kolōliaʼi.—Soane 17:5; Gaue 1:3, 9-12; Filipe 2:8-11.
21. ʼE tou lava faʼifaʼitaki feafeaʼi kia Sesu?
21 ʼE lava feafeaʼi hatatou ‘mulimuli lelei ki te ʼu tafuga vaʼe ʼo Sesu’? (1 Petelo 2:21) Ohage ko ia, tou gāue mālohi ʼi te gāue ʼaē ko te faka mafola ʼo te Puleʼaga pea mo fai ni ʼu tisipulo, pea mo tou lototoʼa ʼo palalau ki te folafola ʼa te ʼAtua. (Mateo 24:14; 28:19, 20; Gaue 4:29-31; Filipe 1:14) Ke ʼaua naʼa galo kia tatou te maʼuhiga ʼo totatou temi, pea ke tou fefakaloto mālohiʼaki ki te ʼofa pea mo te ʼu gāue lelei. (Maleko 13:28-33; Hepeleo 10:24, 25) ʼOfa pe ke mulimuli katoa tatatou ʼu gāue ki te finegalo ʼo Sehova ʼAtua, pea ke mahino kia tatou ʼe tou maʼuʼuli ʼi “te temi fakaʼosi.”—Taniela 12:4.
Koteā Takotou Tali?
• Ko te ʼiloʼi e Sesu kua ōvi mai tona mate, neʼe malave feafeaʼi ki tona minisitelio fakamuli ʼi te fale lotu ʼo Selusalemi?
• Neʼe hā feafeaʼi ko Sesu “neʼe ʼofa kia nātou ʼo aʼu ki te fakaʼosi”?
• Koteā ʼaē neʼe hā ʼaki ʼo ʼuhiga mo Sesu, ʼi te ʼu meʼa ʼaē neʼe hoko kia ia ʼi te ʼu hola fakamuli ʼo tona maʼuli?
• ʼE tou lava faʼifaʼitaki feafeaʼi kia Kilisito Sesu ʼi totatou minisitelio?
[Paki ʼo te pasina 18]
Ko Sesu “neʼe ʼofa kia nātou ʼo aʼu ki te fakaʼosi”