ʼE Koutou Kau Koa Ia Nātou ʼAē ʼe ʼOfainaʼi e Te ʼAtua?

“Ko ae e ina maù aku folafofa pea e ina taupau ia, e ko ia alā e ofa ia te au, pea ko ae e ofa ia te au e ofa anai taku Tamai ia te ia.”—Soane 14:21.

1, 2. (a) Neʼe fakahā feafeaʼi e Sehova tona ʼofa ki te malamanei? (b) Koteā ʼaē neʼe fakatuʼu e Sesu ʼi te po ʼo te ʼaho 14 ʼo Nisani ʼo te taʼu 33 ʼo totatou temi?

ʼE ʼOFA Sehova ki te hahaʼi ʼaē neʼe ina fakatupu. ʼE moʼoni, “nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” (Soane 3:16) ʼI te kua ōvi mai ʼo te ʼAho Fakamanatu ʼo te mate ʼo Kilisito, ʼe tonu ki te kau Kilisitiano moʼoni ke nātou ʼiloʼi ko Sehova “neʼe ʼofa kia tatou pea mo ina fekauʼi mai tona ʼAlo ko he sakilifisio fai fakalelei ki ʼatatou ʼu agahala.”—1 Soane 4:10, MN.

² ʼI te po ʼo te ʼaho 14 ʼo Nisani ʼo te taʼu 33 ʼo totatou temi, neʼe fakatahitahi ia Sesu pea mo tana toko 12 kau ʼapositolo ʼi te kogafale fata ʼi Selusalemi moʼo fai ʼo te Pāsikate, te fakamanatuʼi ʼaia ʼo te faka ʼāteaina ʼa te kau Iselaele mai Esipito. (Mateo 26:17-20) Hili te lafeti Sutea ʼaia, neʼe fakamavae e Sesu ia Sutasi Isikaliote pea neʼe ina fakatuʼu te taumafa ʼo te afiafi, ʼaē neʼe liliu ko te toʼotoʼoga ʼo te ʼAho Fakamanatu ʼo te mate ʼo Kilisito ʼaē ʼe fai e te kau Kilisitiano.a Neʼe fakaʼaogaʼi e Sesu te pane neʼe mole hona meʼa fakatupu pea mo te vino, moʼo fakatātā ia tona sino pea mo tona taʼataʼa, pea neʼe ina vaevae te taumafa ʼaia mo te toko 11 kau ʼapositolo. ʼE koutou maʼu te tahi ʼu manatu ʼo ʼuhiga mo te fakaʼaluʼalu ʼo te taumafa ʼaia, ʼi te ʼu Evaselio, ʼo Mateo, mo Maleko pea mo Luka, pea ko te ʼapositolo ko Paulo neʼe ina fakahigoaʼi ko te “taumafa ʼo te ʼAliki.”—1 Kolonito 11:20, MN; Mateo 26:26-28; Maleko 14:22-25; Luka 22:19, 20.

3. Koteā te ʼu faʼahi maʼuhiga ʼaē ʼe kehekehe ai te fakamatala ʼa te ʼapositolo ko Soane pea mo te tahi ʼu fakamatala, ʼo ʼuhiga mo te ʼu hola fakamuli ʼa Sesu mo tana kau tisipulo ʼi te kogafale fata?

³ ʼE lelei tatatou fakatokagaʼi, neʼe mole talanoa te ʼapositolo ko Soane ki te feʼāveʼaki ʼo te pane pea mo te vino, heʼe ʼi te temi ʼaē neʼe ina tohi ai tana Evaselio (ʼi te teitei taʼu 98 ʼo totatou temi), neʼe kua lagi māhani te ʼu ʼuluaki Kilisitiano ʼi tona fai. (1 Kolonito 11:23-26) Kae ʼaki te takitaki ʼo te laumālie, ʼe ko Soane tokotahi pe ʼaē neʼe ina foaki mai kia tatou he ʼu manatu maʼuhiga ʼo ʼuhiga mo te ʼu palalau ʼa Sesu pea mo te ʼu meʼa ʼaē neʼe ina fai, ʼi muʼa pea mo te hili ʼo Tana fai te toʼotoʼoga ʼo te ʼAho Fakamanatu ʼo Tana mate. ʼE maʼu te ʼu manatu ʼaia ia kapite katoa e nima ʼo te Evaselio ʼo Soane. ʼE fakahā lelei ai pe ko ai te hahaʼi ʼaē ʼe ʼofa ki ai te ʼAtua. Tou vakaʼi te ʼu kapite 13 ki te 17 ʼo Soane.

Tou Ako Mai Te Faʼifaʼitaki ʼo Te ʼOfa ʼa Sesu

4. Neʼe fakahā lelei feafeaʼi e Soane te faʼahi maʼuhiga ʼo te fakatahi ʼa Sesu mo tana kau tisipulo ʼi tana fakatuʼu ia te ʼAho Fakamanatu? (b) He koʼe ʼe ʼofa tāfito Sehova kia Sesu?

⁴ Ko te ʼofa ʼe ko te kupu tāfito ʼo te ʼu kapite ʼaia, pea ʼe maʼu ai te ʼu tokoni ʼa Sesu ki tana kau tisipulo. ʼE moʼoni, ko te ʼu faʼahiga faka ʼuhiga kehekehe ʼo te kupu “ ʼofa” ʼe hā tuʼa 31 ai. ʼE mole he tahi age ʼu kapite ʼe hā ai te ʼofa lahi ʼa Sesu ki tana Tāmai, ia Sehova, pea mo tana kau tisipulo, ʼi hona ʼaluʼaga makehe. ʼE hā lelei te ʼofa ʼa Sesu kia Sehova ʼi te ʼu Evaselio fuli ʼaē ʼe fakamatala ai tona maʼuli, kae ʼe ko Soane tokotahi pe ʼaē ʼe ina fakamatala te ʼui fēnei ʼa Sesu: “E au ofa i te Tamai.” (Soane 14:31) Neʼe toe ʼui e Sesu ko Sehova ʼe ʼofa kia te ia pea mo ina fakamahino tona tupuʼaga. Neʼe ʼui maʼana: “E hage ko te Tamai, nee ofa ia te au, pea mo au e au ofa ia koutou; koutou nofoaki i toku ofa. Kapau e koutou taupau aku folafola, pea e koutou nofoaki anai i tona ofa, o hage ko au, nee au taupau te u fekau o taku Tamai, pea e au nofo i tona ofa.” (Soane 15:9, 10) Ei, ʼe ʼofa Sehova ki tona ʼAlo ʼuhi ko tana fakalogo katoa. ʼE ko he ako lelei ʼaia ki te kau tisipulo fuli ʼa Sesu Kilisito!

5. Neʼe fakahā feafeaʼi e Sesu tana ʼofa ki tana kau tisipulo?

⁵ Ko te ʼofa lahi ʼa Sesu ki tana kau tisipulo ʼe hā lelei ʼi te kamata ʼo te fakamatala ʼa Soane ʼo ʼuhiga mo te fakatahi fakamuli ʼa Sesu mo tana kau ʼapositolo. Neʼe fakamatala fēnei e Soane: “I muà o te Pasikate, pea i te iloiʼage e Sesu kua hoko mai tona hola ke alu ai mai te malama-nei ki te Tamai, nee ofa kia natou ae aʼana i te malama-nei, nee ofa ia natou ki te gataʼaga.” (Soane 13:1) ʼI te po maʼuhiga ʼaia, neʼe ina foaki kia nātou te ako maʼuhiga, ʼo ʼuhiga mo te tauhi ki te hahaʼi ʼaki te ʼofa. Neʼe ina fufulu tonatou ʼu vae. Neʼe ko te meʼa ʼaia neʼe tonu ke nātou tahi fai ʼaki he lotolelei kia Sesu pea mo tonatou ʼu tēhina, kae neʼe mole nātou fai. Neʼe fakahoko e Sesu te gāue mālōlō ʼaupito ʼaia pea ina ʼui fēnei ki te kau tisipulo: “Kapau leva nee au fufulu outou vae, e au ko te Aliki mo te faipule, pea e tonu ke koutou fe’fufuluʼaki outou vae; he kuʼau tuku atu kia koutou he faifaitakiʼaga, o hagepe ko taku fai kia koutou, ke koutou fai feia.” (Soane 13:14, 15) Ko te kau Kilisitiano moʼoni ʼe tonu ke nātou lotolelei pea mo fiafia ʼo tauhi ki tonatou ʼu tēhina.—Mateo 20:26, 27, kiʼi nota ʼi te lalo pasina; Soane 13:17.

Tou Mulimuli Ki Te Fakatotonu Foʼou

6, 7. (a) Koteā te ʼu manatu maʼuhiga ʼe foaki mai e Soane ʼo ʼuhiga mo te fai ʼo te toʼotoʼoga ʼo te ʼAho Fakamanatu? (b) Koteā te fakatotonu foʼou neʼe foaki e Sesu ki tana ʼu tisipulo, pea he koʼe neʼe ko he meʼa foʼou?

⁶ ʼI te fakamatala ʼa Soane te meʼa ʼaē neʼe hoko ʼi te kogafale fata ʼi te po ʼaia ʼo te ʼaho 14 ʼo Nisani, ʼe ko ia tokotahi pe ʼaē ʼe talanoa ki te mavae ʼa Sutasi Isikaliote. (Soane 13:21-30) Ko te ʼu fakamatala ʼo te ʼu Evaselio, ʼe nātou fakahā mai neʼe hoki fai e Sesu te toʼotoʼoga ʼo te ʼAho Fakamanatu ʼo Tana mate, ʼi te ʼosi mavae ʼa te tagata kākā ʼaia. Neʼe palalau ai leva mo tana kau ʼapositolo agatonu, ʼo ina foaki kia nātou he ʼu tokoni pea mo te ʼu fakatotonu. Ka tou teuteuʼi anai ki te ʼAho Fakamanatu, pea ʼe tonu ke tou tokagaʼi fakalelei te meʼa ʼaē neʼe ʼui e Sesu ʼi te lakaga ʼaia, pea tāfito heʼe tou fia kau ia nātou ʼaē ʼe ʼofa ki ai te ʼAtua.

⁷ Ko te ʼuluaki fakatotonu ʼaē neʼe foaki e Sesu ki tana kau tisipulo ʼi tana ʼosi fai te toʼotoʼoga ʼo te ʼAho Fakamanatu ʼo tana mate, neʼe ko he meʼa foʼou. Neʼe ina tala fēnei: “E au foaki atu kia koutou he fekau foou, koutou feʼofaʼaki o hage ko au, nee au ofa ia koutou, pea koutou feʼofaʼaki. Aki te mea aia, e iloi anai e te tagata fuape, ko koutou ko aku tisipulo, kapau e koutou maù te feʼofaʼofani.” (Soane 13:34, 35) Koteā ʼaē neʼe foʼou ʼi te fakatotonu ʼaia? ʼI te hoko atu ʼo te po ʼaia, neʼe fakamahino e Sesu te faʼahi ʼaia, ʼo ʼui maʼana: “Koeni taku fekau, ke koutou feʼofaʼaki o hage ko toku ofa ia koutou. E mole he tahi e ina maù he ofa lahiʼage i te ofa o ia ae e ina momoli tona mauli ke matehi o uhiga mo ona kaumea.” (Soane 15:12, 13) Neʼe fakatotonu e te Lao ʼa Moisese ki te kau Iselaele ke nātou ‘ ʼofa ki tonatou kāiga ohage pe ko nātou totonu.’ (Levitike 19:18) Kae neʼe mole gata ai te fakatotonu ʼa Sesu. Neʼe tonu ke feʼofaʼaki te kau Kilisitiano ohage ko te ʼofa ʼa Kilisito kia nātou, ko tona faka ʼuhiga ke nātou mamate maʼa tonatou ʼu tēhina.

8. (a) Koteā te faka ʼuhiga ʼo te ʼofa faka sakilifisio? (b) Ia ʼaho nei, ʼe fakahā feafeaʼi e te kau Fakamoʼoni ʼa Sehova te ʼofa faka sakilifisio?

⁸ Ko te temi ʼo te ʼAho Fakamanatu ʼe ko he temi maʼuhiga ke tou vakavakaʼi ai ia tatou takitokotahi pea mo te kokelekasio, ke tou vakaʼi peʼe tou maʼu moʼoni koa te fakaʼiloga ʼaia ʼo te lotu faka Kilisitiano moʼoni—ia te ʼofa ʼaē neʼe maʼu e Kilisito. Ko te ʼofa faka sakilifisio ʼaia ʼe ko te tali ʼa he Kilisitiano ke mate kae mole ina lavakiʼi tona ʼu tēhina, pea neʼe kua hoko pe te faʼahi ʼaia. ʼE ina toe uga tāfito ia tatou ke tou fia sakilifisio te ʼu lelei ʼaē ʼe feala ke tou maʼu moʼo tokoni pea mo tauhi ki totatou ʼu tēhina pea mo te hahaʼi. Ko te ʼapositolo ko Paulo neʼe ko he faʼifaʼitaki lelei ʼi te faʼahi ʼaia. (2 Kolonito 12:15; Filipe 2:17) ʼE ʼiloa te kau Fakamoʼoni ʼa Sehova ʼi te malamanei ʼuhi ko tanatou manatu faka sakilifisio, ʼo nātou tokoni ki tonatou ʼu tēhina pea mo tonatou ʼu kāiga pea mo nātou faka mafola te moʼoni ʼo te Tohi-Tapu ki tonatou ʼu tatau.b—Kalate 6:10.

Ko He ʼu Felogoi ʼe Tonu Ke Tou Taupau

9. Moʼo taupau tatatou ʼu felogoi maʼuhiga mo te ʼAtua pea mo tona ʼAlo, koteā ʼaē ʼe tou fai ʼaki he loto fiafia?

⁹ ʼE mole he tahi age meʼa ʼe maʼuhiga kia tatou ʼi te ʼofa ʼa Sehova pea mo tona ʼAlo ko Sesu Kilisito kia tatou. Kae ke tou maʼu pea mo fakahā te ʼofa ʼaia, ʼe ʼi ai te meʼa ʼe tonu ke tou fai. ʼI te po fakamuli ʼaia mo tana kau tisipulo, neʼe ʼui fēnei e Sesu: “Ko ae e ina maù aku folafofa pea e ina taupau ia, e ko ia alā e ofa ia te au, pea ko ae e ofa ia te au e ofa anai taku Tamai ia te ia, e au ofa anai ia te ia pea e au fakahaʼage anai ia au kia te ia.” (Soane 14:21) ʼUhi ʼaē heʼe maʼuhiga kia tatou tatatou ʼu felogoi mo te ʼAtua pea mo tona ʼAlo, koia ʼe tou fakalogo fakafiafia ai ki tanā ʼu fakatotonu. ʼE kau kiai te fakatotonu foʼou ʼaē ke tou fakahā te ʼofa faka sakilifisio pea mo te fakatotonu ʼaē neʼe fai e Kilisito ʼi tana ʼosi fakatuʼuake, ke “faka mafola ki te hahaʼi pea mo fakamoʼoni katoa,” moʼo faiga ke “fai ni ʼu tisipulo” ʼi te hahaʼi ʼaē ʼe nātou tali te logo lelei.—Gaue 10:42, MN; Mateo 28:19, 20, MN.

10. Koteā te ʼu felogoi maʼuhiga ʼe feala ke maʼu e te kau fakanofo pea mo te “tahi ʼu ōvi”?

¹⁰ ʼI te hoko atu ʼo te pōʼuli, neʼe tali e Sesu ki te fehuʼi neʼe fai e te ʼapositolo agatonu ko Sutasi (Tateo), ʼo ʼui maʼana: “Kapau e i ai he tahi e ofa ia te au, e ina taupau anai taku folafola, e ofa anai taku Tamai ia te ia, e ’ma omai anai kia te ia pea e fakatuu anai ia te ia toma nofoaga.” (Soane 14:20-23) Logola kei nātou maʼuʼuli ʼi te kele, kae ko te kau Kilisitiano fakanofo, ʼaē ʼe tonu ke nātou kaugā hau mo Kilisito ʼi selo, ʼe ʼi ai tanatou ʼu felogoi makehe mo Sehova pea mo tona ʼAlo. (Soane 15:15; 16:27; 17:22; Hepeleo 3:1; 1 Soane 3:2, 24) Kae ko tonatou ʼu kaumeʼa ʼaē ʼe kau ki “te tahi ʼu ōvi,” ʼaē ʼe nātou ʼamanaki maʼuʼuli ʼo heʼegata ʼi te kele, ʼe toe maʼu mo nātou he ʼu felogoi maʼuhiga mo tanatou “tagata tauhi ōvi e tahi,” ia Sesu Kilisito, pea mo tonatou ʼAtua, ko Sehova, mo kapau ʼe nātou fakalogo.—Soane 10:16, MN; Pesalemo 15:1-5; 25:14.

“ ʼE Mole Koutou Kau ʼi Te Malamanei”

11. Koteā te fakatokaga fakapotopoto neʼe fai e Sesu ki tana kau tisipulo?

¹¹ ʼI te fakatahi fakamuli ʼaia mo tana kau tisipulo ʼi muʼa ʼo tana mate, neʼe foaki e Sesu te fakatokaga fakapotopoto ʼaenī: “Kapau ʼe fehiʼa te malamanei kia koutou, ʼe koutou ʼiloʼi neʼe kua fehiʼa ia kia te ʼau ʼi muʼa ʼo tana fehiʼa kia koutou. Kanapaula neʼe koutou kau ʼi te malamanei, kanaʼauala ʼe ʼofa te malamanei ki te meʼa ʼaʼana. Kae mai tona ʼuhiga ʼaē ʼe mole koutou kau ʼi te malamanei, ka neʼe ʼau filifili koutou mai te lotolotoiga ʼo te malamanei, ko te tupuʼaga la ʼaia ʼo te fehiʼa ʼa te malamanei kia koutou. Koutou manatuʼi te folafola ʼaē neʼe ʼau tala atu kia koutou: Ko he tagata kaugana ʼe mole lahi ake ia ʼi tona pule. Kapau neʼe nātou fakatagaʼi ʼau, pea ʼe nātou fakatagaʼi anai mo koutou; kapau neʼe nātou taupau taku folafola pea ʼe nātou taupau anai mo ʼakotou.”—Soane 15:18-20, MN.

12. (a) He koʼe neʼe fakatokaga e Sesu ki tana kau tisipulo ʼe fehiʼaʼinaʼi anai nātou e te malamanei? (b) Koteā ʼaē ʼe lelei ke tou fai fuli ʼi te ōvi mai ʼo te ʼAho Fakamanatu?

¹² Neʼe fai e Sesu te fakatokaga ʼaia ki te toko 11 kau ʼapositolo ʼaia pea mo te kau Kilisitiano moʼoni fuli ki muli age, ke ʼaua naʼa nātou lotovaivai pea mo fiu ʼuhi ko te fehiʼa ʼa te malamanei kia nātou. Neʼe ina toe ʼui fēnei: “Nee au tala atu ia mea aia kia koutou ke aua naa koutou higa ai. E natou haga anai o kapu koutou mai te u sinakoka; kae e hokosia mai te hola e natou lau ai ko he gaue lelei tanatou tamatei koutou o momoli ki te Atua. Pea e natou fai anai ia mea aia koteuhi nee mole natou iloi te Tamai mo au.” (Soane 16:1-3) ʼE fakamahino e te tikisionalio faka Tohi-Tapu, ko te faka ʼuhiga ʼo te kupu “higa” ko te “fai ʼaē ke puli te falala ʼa he tahi pea ke ina līaki ia ia ʼaē ʼe tonu ke falala pea mo fakalogo ki ai; ko te faka mālohiʼi ke mavae kehe.” ʼI te ōvi mai ʼo te ʼAho Fakamanatu, ʼe tonu ke tou fakakaukauʼi fuli te maʼuli agatonu ʼa te hahaʼi ʼi te temi muʼa pea mo totatou temi, pea mo tou faʼifaʼitakiʼi tanatou nonofo mālohi ʼi te ʼahiʼahi. ʼAua naʼa koutou tuku te fakafeagai peʼe ko te fakataga ke tupu ai hakotou līaki ia Sehova pea mo Sesu, kae koutou lotomālohi ʼo falala pea mo fakalogo kia nāua.

13. ʼI tana faikole ki tana Tāmai, koteā ʼaē neʼe kole e Sesu maʼa tana kau tisipulo?

¹³ ʼI tana faikole fakaʼosi, ʼi muʼa ʼo tanatou mavae mai te kogafale fata ʼi Selusalemi, neʼe ʼui fēnei e Sesu ki tana Tāmai: “Neʼe ʼau foaki age tau folafola kia nātou, ka neʼe fehiʼa te malamanei kia nātou, koteʼuhi ʼe mole nātou kau ʼi te malamanei, ohage pe ko ʼau, ʼe mole ʼau kau ʼi te malamanei. ʼE mole ʼau kole atu kia te koe ke ke toʼo kehe ia nātou ʼi te malamanei, kae ke ke leʼoleʼo kia nātou ʼuhi ko ia ʼaē ʼe agakovi. ʼE mole nātou kau ʼi te malamanei, ohage pe ko ʼau ʼe mole ʼau kau ʼi te malamanei.” (Soane 17:14-16, MN ) Tou tui papau ʼe leʼoleʼo e Sehova te hahaʼi ʼaē ʼe ʼofa ai, moʼo foaki kia nātou te mālohi ke mole nātou kau ki te malamanei.—Isaia 40:29-31.

Tou Nonofo ʼi Te ʼOfa ʼo Te Tāmai Pea Mo Te ʼOfa ʼo Te ʼAlo

14, 15. (a) Neʼe fakatatau e Sesu ia ia kiteā, pea koteā te ‘fuʼu vite ʼaē mole kei fua’? (b) Ko ai “te u vaʼa” ʼo “te fuu’vite mooni”?

¹⁴ ʼI tana fai palalau mo tana kau tisipulo agatonu ʼi te po ʼo te ʼaho 14 ʼo Nisani, neʼe fakatatau e Sesu ia ia ki “te fuu’vite mooni,” kae mole hage ko te Iselaele heʼe agatonu ʼaē neʼe fakatatau ki te ‘fuʼu vite mole kei fua.’ Neʼe ʼui maʼana: “E ko au te fuu’vite mooni, pea ko taku Tamai te tagata-gaue-vite.” (Soane 15:1) ʼI te ʼu sēkulō ki muʼa atu, neʼe tohi e Selemia te ʼu palalau ʼaenī neʼe fai e Sehova ki tana hahaʼi agatuʼu: “Neʼe ʼau to koe ohage ko he fuʼu vite kula maʼuhiga. . . . He koʼe koa neʼe ke fetogi ʼo liliu ko he fuʼu vite mole kei fua ʼi he gāueʼaga vite matāpule?” (Selemia 2:21) Pea neʼe tohi fēnei e te polofeta ko Osea: “Ko Iselaele ko he fuʼu vite ʼe mole kei fua lahi. ʼE kei fua kae ʼe fua pe ia maʼa ia. . . . Kua liliu tonatou loto ʼo malualoi.”—Osea 10:1, 2.

¹⁵ Neʼe mole maʼu e Iselaele te ʼu fua ʼo te tauhi moʼoni, kae neʼe higa ki te ʼapositasia pea neʼe ina fakatupu te ʼu fua maʼa ia totonu. Ia ʼaho e tolu ʼi muʼa ʼo tana fakatahi fakamuli mo tana kau tisipulo agatonu, neʼe ʼui fēnei e Sesu ki te kau takitaki Sutea malualoi: “E au tala atu kia koutou: ‘E too anai maia koutou te Puleaga o te Atua pea e foakiʼage anai ki he puleaga e ina fakafua anai.’ ” (Mateo 21:43) Ko te puleʼaga foʼou ʼaia ʼe ko “te Iselaele a te Atua,” te toko 144 000 kau Kilisitiano fakafono pea ko nātou “te u vaʼa” ʼo “te fuu’vite mooni,” ia Kilisito Sesu.—Kalate 6:16; Soane 15:5; Apokalipesi 14:1, 3.

16. Koteā ʼaē neʼe uga e Sesu ke fai e te toko 11 kau ʼapositolo agatonu, pea koteā ʼaē ʼe feala ke tou ʼui ʼo ʼuhiga mo te toe ʼo te kau fakanofo ʼi te temi ʼaenī ʼo te fakaʼosi?

¹⁶ Neʼe ʼui fēnei e Sesu ki te toko 11 kau ʼapositolo ʼaē neʼe fakatahi mo ia ʼi te kogafale fata: “Ko te ʼu vaʼa fuli pe ia te ʼau ʼe mole hona fua, ʼe ina toʼo ia, pea ko te ʼu vaʼa fuli pe ʼaē ʼe fua, ʼe ina fakamaʼa ia, ke toe lahi ake hona fua. Koutou nonofo ʼo tahi mo ʼau, pea mo ʼau nofo ʼo tahi mo koutou. Ohage pe ko te vaʼa ʼaē ʼe mole feala ke ʼi ai hona fua, gata pe mokā ʼe pipiki maʼu ki te vite, pea ʼe toe feiā mo koutou, ʼe feala ke mole ʼi ai hokotou ʼu fua, mo kapau ʼe mole koutou nonofo tahi mo ʼau.” (Soane 15:2, 4, MN ) Ko te hisitolia ʼo te hahaʼi ʼa Sehova ʼo totatou temi, ʼe ina fakahā ko te toe ʼo te kau Kilisitiano fakanofo agatonu ʼe nātou tahi mo tonatou Pule, ia Kilisito Sesu. (Efeso 5:23) Neʼe nātou tali ke fakamaʼa nātou. (Malakia 3:2, 3) Talu mai te 1919, neʼe mahu te ʼu fua ʼo te Puleʼaga ʼaē neʼe nātou maʼu, ʼuluaki ʼaki te fakatahiʼi kia nātou te tahi kau Kilisitiano fakanofo, pea talu mai te 1935, te “hahai kaugamalie” ʼaē ʼe tuputupu tuʼumaʼu.—Apokalipesi 7:9; Isaia 60:4, 8-11.

17, 18. (a) Koteā te ʼu palalau ʼaē neʼe fai e Sesu ʼe tokoni ai ki te kau fakanofo pea mo te tahi ʼu ōvi ke nātou nofo ʼi te ʼofa ʼa Sehova? (b) ʼO ʼuhiga mo te faʼahi ʼaia, ʼe tokoni feafeaʼi anai kia tatou mokā tou kau ki te ʼAho Fakamanatu?

¹⁷ ʼE fai e Sesu te ʼu palalau ʼaenī ki te kau Kilisitiano fakanofo fuli pea mo tanatou ʼu kaugā gāue: “Ko taku Tāmai ʼe faka kolōliaʼi ʼi te faʼahi ʼaenī: ke koutou haga fua ke lahi, pea ke koutou hā ʼaki mai ko koutou ko taku ʼu tisipulo. Ohage ko te ʼofa ʼa te Tāmai kia te ʼau pea mo ʼau ʼofa kia koutou, koutou nonofo ʼi toku ʼofa. Kapau ʼe koutou taupau taku ʼu fakatotonu, pea ʼe koutou nonofo anai ʼi toku ʼofa, ohage pe ko taku taupau te ʼu fakatotonu ʼo te Tāmai pea mo ʼau nofo ʼi tona ʼofa.”—Soane 15:8-10, MN.

¹⁸ ʼE tou loto fuli ke tou nofo ʼi te ʼofa ʼa te ʼAtua, pea ʼe uga ai tatou e te faʼahi ʼaia ke tou liliu ko he kau Kilisitiano ʼe nātou fakatupu he ʼu fua. ʼE hā te faʼahi ʼaia ʼi tatatou fakaʼaogaʼi te ʼu fealagia fuli moʼo faka mafola “te Logolelei . . . o te Puleaga.” (Mateo 24:14) ʼE tou toe faiga lahi ke tou fakahā “te fua o te Laumalie” ʼi totatou maʼuli. (Kalate 5:22, 23) Ko tatatou kau ki te ʼAho Fakamanatu ʼo te mate ʼo Kilisito ʼe ina fakaloto mālohiʼi anai tatou ke tou fai te faʼahi ʼaia, heʼe fakamanatuʼi mai anai te ʼofa lahi ʼa te ʼAtua pea mo Kilisito kia tatou.—2 Kolonito 5:14, 15.

19. Koteā te tahi tokoni ʼaē ka tou talanoa anai kiai ʼi te alatike ka hoa mai?

¹⁹ Hili tana fakatuʼu te Fakamatu ʼo tana mate, neʼe fakapapau e Sesu ʼe fekauʼi anai e tana Tāmai ki tana ʼu tisipulo agatonu “te tokoni, te laumālie maʼoniʼoni.” (Soane 14:26, MN ) ʼE tou vakaʼi anai ʼi te alatike ka hoa mai peʼe tokoni feafeaʼi te laumālie ʼaia ki te kau fakanofo pea mo te tahi ʼu ōvi ke nātou nonofo ʼi te ʼofa ʼa Sehova.

[Kiʼi nota]

Te ʼu Fehuʼi Moʼo Fakamanatu

• Koteā te ako neʼe foaki e Sesu ki tana kau tisipulo ʼo ʼuhiga mo te tauhi ki te hahaʼi ʼaki te ʼofa?

• Koteā te ʼu faʼahi ʼe lelei ai ke kita vakavakaʼi ia kita totonu ʼi te temi ʼo te ʼAho Fakamanatu?

• He koʼe ʼe mole tonu ke tou tūkia ʼi te fakatokaga ʼa Sesu ʼo ʼuhiga mo te fehiʼa pea mo te fakatagaʼi ʼo tatou e te mālama?

• Ko ai “te fuu’vite mooni”? Ko ai “te u vaʼa,” pea koteā ʼaē ʼe tonu ke nātou fai?

[Paki ʼo te pasina 15]

Neʼe foaki e Sesu he ako maʼuhiga ki tana kau ʼapositolo ʼo ʼuhiga mo te tauhi ki te hahaʼi

[Paki ʼo te pasina 16, 17]

ʼE fakalogo te kau tisipulo ʼa Kilisito ki tana fakatotonu ʼaē ke nātou maʼu te ʼofa faka sakilifisio