Ko Te Kau Fakamoʼoni Kilisitiano ʼe Nātou Maʼuʼuli Anai ʼi Selo

“Kae kia tatou, ko totatou kolo ʼe ʼi te lagi.”—Filipe 3:20.

1. Koteā te fakatuʼutuʼu taulekaleka ʼaē ʼe fai e Sehova ʼo ʼuhiga mo ʼihi hahaʼi ʼo te kele?

KO ʼIHI hahaʼi ʼi te kele ʼe nātou ʼafio anai ko ni ʼu hau pea mo pelepitelo ʼi selo, ʼo nātou puleʼi foki mo te kau ʼaselo. (1 Kolonito 6:2, 3; Fakahā 20:6) ʼE ko he moʼoni fakaofoofo! Ko te fakatuʼutuʼu ʼaia ʼa Sehova, pea ʼe ina fakahoko tana fakatuʼutuʼu ʼaia ʼaki tona ʼAlo ʼulu tokotahi ko Sesu Kilisito. He koʼe koa ʼe fai e totatou Tupuʼaga te meʼa feiā? Pea ʼe tonu ke malave feafeaʼi ki he Kilisitiano ia ʼaho nei, hana ʼiloʼi te fakatuʼutuʼu ʼaia? Tou vakaʼi pe koteā te ʼu tali ʼa te Tohi-Tapu ki te ʼu fehuʼi ʼaia.

2. Koteā te meʼa foʼou ʼaē neʼe fakahā e Soane Patita ʼo ʼuhiga mo te meʼa ʼaē ka fai e Sesu, pea neʼe pipiki kiteā te meʼa foʼou ʼaia?

² ʼI te temi ʼaē neʼe tofa ai e Soane Patita te ala ʼaē kia Sesu, neʼe ina fakahā ko Sesu ʼe ina fai anai te meʼa foʼou. ʼE ʼui fēnei e te fakamatala: “Neʼe fai faka mafola [ia Soane], ʼo ʼui maʼana: ‘ ʼO hoa mai kia te ʼau ʼe haʼu te tokotahi ʼe mālohi age ia ia te ʼau; ʼe mole tāu mo ʼau ke ʼau punou ifo ʼo vevete te ʼu haʼi ʼo tona ʼu tapugā vaʼe. Ko ʼau neʼe ʼau papitemaʼi koutou ʼaki te vai, kaʼe ko ia ʼe ina papitemaʼi anai koutou ʼaki te laumālie maʼoniʼoni.’ ” (Maleko 1:7, 8) ʼI muʼa atu, neʼe mole heʼeki ʼi ai he tahi neʼe kua papitemaʼi ʼaki te laumālie maʼoniʼoni. Neʼe ko te fakatuʼutuʼu foʼou ʼaia mo te laumālie maʼoniʼoni, pea neʼe pipiki ki te fakatuʼutuʼu ʼe ʼamanaki fai e Sehova moʼo teuteuʼi te hahaʼi ʼaē ka nātou ʼolo ʼo pule ʼi te lagi.

ʼE Nātou “Toe Tutupu”

3. Koteā te ʼu meʼa foʼou ʼaē ʼo ʼuhiga mo te Puleʼaga ʼe ʼi selo neʼe fakamahinohino e Sesu kia Nikotemo?

³ ʼI tana felāveʼi fakafūfū mo te Faliseo maʼuhiga, neʼe fakahā e Sesu te tahi ʼu meʼa ʼo ʼuhiga mo te fakatuʼutuʼu fakaʼatua ʼaia. Neʼe haʼu te tagata Faliseo ko Nikotemo ʼi te pōʼuli kia Sesu, pea neʼe ʼui maʼa Sesu kia te ia: “Kapau ʼe mole toe tupu he tahi, ʼe mole pe feala ke sio ki te puleʼaga ʼo te ʼAtua.” (Soane 3:3) Ko Nikotemo, ko te tagata Faliseo neʼe kua ina ako te ʼu Tohi Faka Hepeleo, pea neʼe kua ina ʼiloʼi te ʼu meʼa ʼaē ʼo ʼuhiga mo te moʼoni lahi ʼaē ʼo te Puleʼaga ʼo te ʼAtua. Neʼe fakakikite e te tohi ʼo Taniela ko te Puleʼaga ʼe foaki anai ki he “tahi ʼe hage ia ko he foha ʼo he tagata” pea mo te “hahaʼi ʼaē ko te kau maʼoniʼoni ʼa te ʼAtua māʼoluga.” (Taniela 7:13, 14, 27) Ko te Puleʼaga ʼe ina “laliki anai pea mo fakagata” te ʼatu ʼu puleʼaga fuli ʼaia pea ko ia totonu ʼe tuʼu anai ia ʼo heʼegata. (Taniela 2:44) ʼE mahino ia, neʼe manatu ia Nikotemo ki te moʼoni ʼaia ʼo ʼuhiga mo te ʼu lea faka polofeta ʼaē ʼe fakahoko anai ki te puleʼaga faka Sutea; kae neʼe ʼui e Sesu kapau ʼe fia sio he tahi ki te Puleʼaga, pea ʼe tonu ke toe tupu. Neʼe mole mahino Nikotemo ki te meʼa ʼaia, koia neʼe ʼui age ai e Sesu te manatu ʼaenī: “ ʼE mole feala ke hū he tahi ki te puleʼaga ʼo te ʼAtua mokā ʼe mole tupu ia ʼi te vai pea mo te laumālie.”—Soane 3:5.

4. ʼO ʼuhiga mo nātou ʼaē ʼe tutupu ʼi te laumālie maʼoniʼoni, ʼe feafeaʼi anai te fetogi ʼo tanatou felogoi mo Sehova?

⁴ Neʼe talanoa ia Soane Patita ʼo ʼuhiga mo te papitema ʼaē ʼe fai ʼaki te laumālie maʼoniʼoni. ʼI te temi nei, ʼe toe ʼui e Sesu ko he tahi ʼe tonu ke tupu ʼaki te laumālie maʼoniʼoni mo kapau ʼe tonu ke hū ki te Puleʼaga ʼo te ʼAtua. ʼAki pe te tupu makehe ʼaia, ko te ʼu tagata pea mo te ʼu fafine heʼe haohaoa ʼe nātou maʼu te ʼu felogoi makehe mo Sehova ʼAtua. ʼE nātou liliu ko tana ʼu fānau neʼe ina vavae. ʼE tou lau fēnei: “Kia nātou fuli ʼaē neʼe nātou tali [ia Sesu], neʼe foaki age kia nātou te fealagia ʼaē ke nātou liliu ko he fānau ʼa te ʼAtua, koteʼuhi neʼe nātou haga tui ki tona huafa; pea neʼe mole nātou tutupu, ʼi te toto, peʼe ko he finegalo fakasino, peʼe ko he finegalo fakatagata, kae ʼaki te finegalo ʼa te ʼAtua.”—Soane 1:12, 13; Loma 8:15.

Ko Te ʼu Fānau ʼa Te ʼAtua

5. Ko ʼanafea ʼaē neʼe papitemaʼi ai te kau tisipulo agatonu e te laumālie maʼoniʼoni, pea koteā te ʼu gāue ʼaē ʼo ʼuhiga mo te laumālie maʼoniʼoni neʼe hoko ʼi te temi ʼaia?

⁵ ʼI te palalau ʼaē ʼa Sesu kia Nikotemo, neʼe kua ʼosi fakanofo ia Sesu ʼaki te laumālie maʼoniʼoni, ʼo fakanofo ai ia ki tona tuʼulaga hau ki ʼamuli ʼi te Puleʼaga ʼo te ʼAtua, pea neʼe fakamoʼoni e te ʼAtua ʼi muʼa ʼo te hahaʼi ko Sesu ko Tona ʼAlo. (Mateo 3:16, 17) Neʼe lahi age te ʼu fānau ʼi te faʼahi fakalaumālie ʼaē neʼe fakatupu e Sehova ʼi te Penikosite ʼo te taʼu 33 ʼo totatou temi. Ko te kau tisipulo agatonu ʼaē neʼe fakatahi ʼi Selusalemi ʼi te koga fale fata, neʼe papitemaʼi nātou ʼaki te laumālie maʼoniʼoni. ʼI te temi pe ʼaia, neʼe nātou toe tutupu ʼaki te laumālie maʼoniʼoni ʼo nātou liliu ko te ʼu foha fakalaumālie ʼa te ʼAtua. (Gāue 2:2-4, 38; Loma 8:15) Pea tahi ʼaē, neʼe fakanofo nātou e te laumālie maʼoniʼoni ʼaki te fakatuʼutuʼu ʼaē ke nātou maʼu te tofiʼa ʼi selo ʼi he temi ki ʼamuli, pea neʼe fakaʼiloga lelei nātou e te laumālie maʼoniʼoni ohage ko he fakamoʼoni ʼaia ʼo tanatou ʼamanaki ʼaē ke nātou ʼolo ki selo.—2 Kolonito 1:21, 22.

6. Koteā te fakatuʼutuʼu ʼa Sehova ʼo ʼuhiga mo te Puleʼaga ʼaē ʼi selo, pea he koʼe koa ʼe tau mo feʼauga ke kau kiai he ʼu hahaʼi neʼe toʼo mai te kele?

⁶ Ko te kau fakanofo ʼaia neʼe ko te ʼu ʼuluaki hahaʼi heʼe haohaoa ʼaē neʼe fili e te ʼAtua ke nātou hū ki te Puleʼaga. Ko tona faka ʼuhiga ʼi te ʼosi ʼo tonatou mate pea mo tonatou fakatuʼuake, ʼe nātou kau anai ki te kautahi ʼaē ʼi selo ʼo te Puleʼaga ʼaē ka ina puleʼi te hahaʼi pea mo te kau ʼaselo. ʼE fakatuʼutuʼu e Sehova ke ina tāpuhā tona huafa lahi pea mo faka lākatonuʼi tona pule faʼitaliha ʼaki te Puleʼaga ʼaia ia muʼa ʼo te ʼu meʼa fuli ʼaē neʼe ina fakatupu. (Mateo 6:9, 10; Soane 12:28) ʼE tau mo feʼauga ke kau te hahaʼi ki te Puleʼaga ʼaia! Neʼe fakaʼaogaʼi e Satana te taumatuʼa ʼi te temi ʼaē neʼe ina lagaʼi ai tana ʼuluaki fakafihi ki te pule faʼitaliha ʼa Sehova ʼi te ʼōloto ʼo Eteni, pea ʼi te temi nei ʼe fakatuʼutuʼu e Sehova ke kau te hahaʼi ki te tali ʼo te fakafihi ʼaia. (Senesi 3:1-6; Soane 8:44) Neʼe tohi e te ʼapositolo ko Petelo ʼo ʼuhiga mo nātou ʼaē neʼe fili ke nātou pule ʼi te Puleʼaga ʼaia, ʼo ina ʼui fēnei: “Ke tapuaki te ʼAtua pea mo Tāmai ʼo totatou ʼAliki ko Sesu Kilisito, koteʼuhi ʼaki tona manavaʼofa lahi, neʼe ina tuku mai kia tatou te toe tupu foʼou, ki he ʼamanaki maʼuli, ʼaki te toe fakatuʼuake ʼa Sesu Kilisito mai te kau mate, ki he tōfiga ʼe heʼe popo, imakulata pea mo heʼe fefe. Ko te tōfiga ʼaia ʼe tuku maʼa koutou ʼi te lagi.”—1 Petelo 1:3, 4.

7. Koteā te felogoi makehe mo Sesu ʼe maʼu ʼe nātou ʼaē ʼe papitema ʼaki te laumālie maʼoniʼoni?

⁷ ʼI tonatou ʼuhiga ʼaē ko te ʼu foha neʼe vavae e te ʼAtua, ko te kau Kilisitiano ʼaia ʼaē neʼe fili kua nātou liliu ko te ʼu tēhina ʼo Sesu Kilisito. (Loma 8:16, 17; 9:4, 26; Hepeleo 2:11) ʼUhi neʼe fakamoʼoni e Sesu ko ia ko te Hāko ʼaē neʼe fakapapau age kia Apalahamo, ko te kau Kilisitiano fakanofo ʼaia ʼe ko he ʼu kaugā gāue peʼe ko he hahaʼi tokoni ki te Hāko ʼaia, ʼaē ka nātou foaki anai he tapuakina ki te hahaʼi ʼaē ʼe tui. (Senesi 22:17, 18; Kalate 3:16, 26, 29) Koteā koa te tapuakina ʼaia? Ko te fealagia ʼaē ke faka ʼāteaina nātou mai te agahala pea mo fakatokatoka tonatou vāhaʼa ʼaē mo te ʼAtua pea mo kaugana kia te ia ʼi te temi nei ʼo aʼu ki he temi ʼe mole hona gataʼaga. (Mateo 4:23; 20:28; Soane 3:16, 36; 1 Soane 2:1, 2) Ko te kau Kilisitiano fakanofo ʼaē ʼe kei nonofo ʼi te kele, ʼe nātou taki te hahaʼi agatonu ki te tapuakina ʼaia, ʼo nātou fakamoʼoni ʼo ʼuhiga mo tonatou tēhina fakalaumālie ko Sesu Kilisito pea mo tonatou Tāmai tauhi, ko Sehova ʼAtua.—Gāue 1:8; Hepeleo 13:15.

8. Koteā te “fakahā” ʼo te ʼu foha ʼo te ʼAtua ʼaē neʼe fakatupu ʼaki te laumālie?

⁸ ʼE talanoa te Tohi-Tapu ki te “fakahā” ʼo te ʼu foha ʼaia ʼo te ʼAtua, ʼaē neʼe fakatupu ʼaki te laumālie. (Loma 8:19) Moʼo hū ki te Puleʼaga ʼe tonu ke nātou kaugā hau mo Sesu, ke nātou kau ki te fakaʼauha ʼo te tuʼu ʼo te ʼu faʼahiga meʼa ʼa Satana. Ki muli age, ia taʼu e afe, ke nātou tokoni ki te foaki ʼo te ʼu lelei ʼo te totogi faka sakilifisio ki te malamanei pea mo nātou taki te hahaʼi ki te maʼuli haohaoa ʼaē neʼe pulihi e Atama. (2 Tesalonika 1:8-10; Fakahā 2:26, 27; 20:6; 22:1, 2) Ko tonatou fakahā ʼe fakapipiki ki te ʼu meʼa fuli ʼaenī neʼe tou talanoa kiai. ʼE ko he meʼa ia ʼe fakatalitali kiai te hahaʼi ʼaē ʼe tui.

9. E feafeaʼi te talanoa ʼa te Tohi-Tapu ʼo ʼuhiga mo te kau Kilisitiano fakanofo fuli ʼi te malamanei?

⁹ Ko te kau Kilisitiano fakanofo fuli ʼaē ʼi te malamanei ʼe “ko te kokelekasio ʼo te kau ʼuluaki tupu ʼaē neʼe kua tohi ʼi selo.” (Hepeleo 12:23) ʼE nātou kau ia nātou ʼaē ʼe nātou ʼuluaki maʼu te lelei ʼo te totogi faka sakilifisio ʼa Sesu. Tahi ʼaē meʼa, ʼe nātou faʼufaʼu te “sino ʼo Kilisito,” ʼaē ʼe hā ʼi tanatou ʼu felogoi lelei ʼo toe feiā mo tanatou felogoi ʼaē mo Sesu. (1 Kolonito 12:27) Neʼe tohi fēnei e Paulo: “Ohage pe ko he sino e tahi, ʼe lahi tona ʼu koga, pea ko te ʼu koga fuli pe ʼo te sino ʼaia, logope la tonatou tapuke, ʼe ko te meʼa e tahi ʼi te sino, ʼo toe feiā pe mo Kilisito. Koteʼuhi ʼi tona ʼaluʼaga moʼoni neʼe tou papitema fuli ʼaki te laumālie e tahi ke tou liliu ko he sino e tahi, Sutea peʼe Keleka, ʼu kaugana peʼe ʼāteaina, pea neʼe faka ʼinu fuli tatou ʼaki te laumālie e tahi.”—1 Kolonito 12:12, 13; Loma 12:5; Efesi 1:22, 23; 3:6.

“Ko Te Iselaele ʼo Te ʼAtua”

10, 11. ʼI te ʼuluaki sēkulō, he koʼe neʼe ʼaoga he Iselaele foʼou, pea ko ai ʼaē neʼe ina faʼufaʼu te puleʼaga foʼou ʼaia?

¹⁰ Ia taʼu e 1 500 ʼi muʼa ʼo te haʼu ʼa Sesu ʼi tona ʼuhiga Mesia ʼo te fakapapau, ko te puleʼaga ʼo Iselaele neʼe ko te hahaʼi makehe ʼaia ʼa Sehova. Logope la te ʼu fakamanatu ʼaē neʼe fai tuʼumaʼu kia nātou, ko te puleʼaga katoa neʼe ina fakahā lelei tana heʼe agatonu. ʼI te temi ʼaē neʼe haʼu ai Sesu, neʼe fakafisi te puleʼaga kia te ia. (Soane 1:11) Pea, neʼe ʼui fēnei e Sesu ki te kau takitaki lotu Sutea: “Ko te puleʼaga ʼo te ʼAtua ʼe toʼo anai ia koutou pea ʼe foaki anai ia ki he hahaʼi ka nātou fakatupu anai hona ʼu fua.” (Mateo 21:43) ʼE maʼuhiga ki totatou maʼuli ke tou ʼiloʼi pe ko te ‘ ʼu hahaʼi fea ʼaē ʼe nātou fakatupu te ʼu fua ʼo te Puleʼaga.”

¹¹ Ko te puleʼaga foʼou ʼe ko te kokelekasio faka Kilisitiano fakanofo ʼaē neʼe tupu ʼi te Penikosite ʼo te taʼu 33 ʼo totatou temi. Ko tona ʼu ʼuluaki hahaʼi neʼe ko te kau tisipulo Sutea ʼa Sesu ʼaē neʼe nātou tali ia ia ohage ko tonatou Hau ʼaē ʼi selo. (Gāue 2:5, 32-36) Kae, neʼe nātou kau ki te puleʼaga foʼou ʼa te ʼAtua, neʼe mole fakatafito ki tonatou ʼuhiga Sutea, kae neʼe fakatafito ki tanatou tui ʼaē kia Sesu. Koia, ko te Iselaele foʼou ʼaia ʼa te ʼAtua neʼe ko he meʼa makehe ia—ko te puleʼaga fakalaumālie. ʼI te temi ʼaē neʼe fakafisi ai te tokolahi ʼo te kau Sutea kia Sesu, ko te fakaafe ʼaē ki te puleʼaga foʼou neʼe fai ki te kau Samalitana pea ki muli age ki te kau Senitile. Ko te puleʼaga foʼou ʼaia neʼe fakahigoaʼi “ko te Iselaele ʼo te ʼAtua.”—Kalate 6:16.

12, 13. Neʼe ʼiloga feafeaʼi ko te Iselaele foʼou ʼaia neʼe mole ko he magaʼi lotu faka Sutea?

¹² ʼI te Iselaele ʼāfea, kapau neʼe tafoki te kau matāpule ki te lotu faka Sutea, neʼe tonu ke nātou fakalogo ki te Lao ʼa Moisese, pea neʼe tonu kia nātou tagata ke nātou fakahā tanatou tafoki ʼo nātou silikosisio. (Ekesote 12:48, 49) Ko ʼihi kau Kilisitiano Sutea neʼe nātou manatu ko te meʼa ʼaia neʼe toe ʼaoga pe foki ki te hahaʼi ʼaē neʼe mole Sutea ʼi te Iselaele ʼo te ʼAtua. Kae, neʼe mole ko te manatu ia ʼaia ʼa Sehova. Neʼe taki e te laumālie maʼoniʼoni te ʼapositolo ko Petelo ki te ʼapi ʼo te tagata Senitile ko Kolonelio. ʼI te temi ʼaē neʼe tali ai e Kolonelio pea mo tona famili te fai faka mafola ʼa Petelo, neʼe nātou maʼu te laumālie maʼoniʼoni—māʼiape la neʼe mole heʼeki nātou papitema ʼi te vai. ʼO ʼiloga lelei ai ko Sehova kua ina tali te kau Senitile ʼaia ke nātou kau ki te Iselaele ʼo te ʼAtua, ʼo mole ina fakamaʼua kia nātou ke nātou mulimuli ki te Lao ʼa Moisese.—Gāue 10:21-48.

¹³ Ko ʼihi hahaʼi tui neʼe hage kia nātou ko te faʼahi ʼaia ʼe mata faigataʼa hanatou tali, pea mole tuai pea ʼave te fihi ʼaia ke felogoi kiai te kau ʼapositolo pea mo te kau tagata ʼāfea ʼi Selusalemi. Ko te kolesi ʼaia neʼe fagono pea neʼe ina fakahā fakalelei age pe neʼe feafeaʼi te gāue ʼa te laumālie maʼoniʼoni ki te hahaʼi tui ʼaē neʼe mole Sutea. Ko te ʼu kumi ʼi te Tohi-Tapu ʼe nātou fakahā mai ko te meʼa ʼaia neʼe ko te fakahoko ʼo te lea faka polofeta mai te ʼAtua. (Isaia 55:5; Amosi 9:11, 12) Ko te tonu neʼe fai: ko te kau Kilisitiano ʼaē mole Sutea neʼe mole tonu ke nātou mulimuli ki te Lao ʼa Moisese. (Gāue 15:1, 6-29) Koia, ko te Iselaele fakalaumālie neʼe ko te puleʼaga foʼou moʼoni kae neʼe mole ko he magaʼi lotu faka Sutea.

14. Koteā tona faka ʼuhiga ʼi te fakahigoaʼi ʼaē e Sake te kokelekasio faka Kilisitiano “ko te ʼu telepi e hogofulu-ma-lua ʼe mavetevete”?

¹⁴ ʼO mulimuli ki te meʼa ʼaia, ʼi tana faitohi ki te kau Kilisitiano fakanofo ʼo te ʼuluaki sēkulō, neʼe fai e te tisipulo ko Sake tana tohi “ki te ʼu telepi e hogofulu-ma-lua ʼaē ʼe mavetevete.” (Sake 1:1; Fakahā 7:3-8) ʼIo, ko nātou ʼaē ʼe nātou kau ki te Iselaele foʼou neʼe mole hinoʼi nātou ki he ʼu telepi. Neʼe mole vaevae te Iselaele fakalaumālie ko he ʼu telepi e 12, ohage ko te Iselaele ʼāfea. Kae, ko te palalau ʼaenī ʼa Sake, ʼe ina fakahā ko te manatu ʼa Sehova, ko te Iselaele ʼa te ʼAtua neʼe ina fetogi katoa te ʼu telepi e 12 ʼo te Iselaele ʼaē ʼi te kakano. Kapau ko he Iselaelite neʼe liliu ʼo kau ki te puleʼaga foʼou—logope la mo kapau neʼe kau ki te telepi ʼo Suta peʼe ko Levi—neʼe mole ʼi ai hona ia ʼuhiga.—Kalate 3:28; Filipe 3:5, 6.

Ko Te Fuakava Foʼou

15, 16. (a) Koteā te manatu ʼa Sehova ʼo ʼuhiga mo nātou ʼaē ʼe mole Sutea ʼe kau ki te Iselaele ʼo te ʼAtua? (b) Koteā ʼaē neʼe fakatafito kiai te fakatuʼu ʼo te Iselaele foʼou?

¹⁵ ʼI te manatu ʼa Sehova, ko nātou ʼaē ʼe mole Iselaelite ʼi te puleʼaga foʼou ʼaia ʼe faka ʼuhiga pe nātou ko he kau Sutea ʼi te faʼahi fakalaumālie! ʼE fakamahinohino fēnei e te ʼapositolo ko Paulo: “ ʼE mole Sutea ia ia ʼaē ʼi tuʼa, pea ʼe mole silikosisio ia ia ʼi tuʼa ʼo te kakano. Kae ʼe Sutea ia ia ʼaē ʼi loto, pea ko tona loto ʼaē neʼe silikosisioʼi ʼaki te laumālie, ʼe mole fai ʼaki he lao ʼe tohi. Ko te vikiʼi ʼo ia ʼaia ʼe mole haʼu ia mai te tagata, kae mai te ʼAtua.” (Loma 2:28, 29) Tokolahi te kau Senitile neʼe nātou tali ki te fakaafe ʼaē ke nātou kau ki te Iselaele ʼo te ʼAtua, pea ko te faʼahi ʼaia neʼe ina fakahoko te lea faka polofeta ʼo te Tohi-Tapu. Ohage la, neʼe tohi fēnei e te polofeta ko Osea: “ ʼE ʼau manavaʼofa anai kia ia ʼaē neʼe mole fai ki ai he manavaʼofa, pea ʼe ʼau ʼui anai kia nātou ʼaē ʼe mole ko taku hahaʼi: ‘Ko koe ko taku hahaʼi’; pea kia nātou ʼaia, ʼe nātou ʼui anai: ‘Ko koe ko toku ʼAtua.’ ”—Osea 2:23; Loma 11:25, 26.

¹⁶ Kapau neʼe mole nofo te kau Iselaelite fakalaumālie ʼi te fuakava ʼo te Lao ʼa Moisese, koteā te fakatafito ʼo tanatou kau ʼaē ki te puleʼaga foʼou? Neʼe fai e Sehova te fuakava foʼou ʼaki ia Sesu mo te puleʼaga fakalaumālie ʼaia. (Hepeleo 9:15) ʼI te fai ʼaē e Sesu te ʼAho Fakamanatu ʼo tona mate, ʼi te ʼaho 14 ʼo Nisani ʼo totatou temi, neʼe ina foaki kia nātou te pane pea mo te vino ki te kau ʼapositolo agatonu e toko 11 pea mo ʼui maʼana ko te vino ʼe ina fakatātā “te taʼataʼa ʼo te fuakava.” (Mateo 26:28; Selemia 31:31-34) Ohage ko te meʼa neʼe talanoa kiai ʼi te fakamatala ʼa Luka, neʼe ʼui e Sesu ko te ipu ʼo te vino ʼe ina fakatātā “te fuakava foʼou.” (Luka 22:20) Moʼo fakahoko te ʼu palalau ʼa Sesu, ʼi te temi ʼaē neʼe hifo ai te laumālie maʼoniʼoni ʼi te Penikosite pea neʼe tupu ai te Iselaele ʼo te ʼAtua, ko te Puleʼaga neʼe ina molehi te Iselaele ʼi te kakano pea neʼe ina foaki ki te puleʼaga foʼou, ko te puleʼaga fakalaumālie. ʼI te kua fetogi ʼo te Iselaele ʼo te kakano, kua liliu te puleʼaga foʼou ʼaia ko te kaugana ʼa Sehova, ʼe faʼufaʼu e tana kau fakamoʼoni.—Isaia 43:10, 11.

Te “Selusalemi Foʼou”

17, 18. Koteā te ʼu fakamatalatala neʼe foaki ʼi te tohi ʼo te Fakahā ʼo ʼuhiga mo te kolōlia ʼaē ʼe fakatalitali ke maʼu e te kau Kilisitiano fakanofo?

¹⁷ ʼE ko he kolōlia ʼaē ʼe ʼamanaki ke maʼu e te hahaʼi pilivilesio ʼaia ʼi tanatou kau ki te pāui ʼi selo! Pea ʼe ko he meʼa fakafiafia te ʼiloʼi ʼo te ʼu meʼa fakaofoofo ʼaē ʼe ʼamanaki ke nātou maʼu! Ko te tohi ʼo te Fakahā ʼe ina foaki mai kia tatou te ʼu misi fakaofoofo ʼo ʼuhiga mo tonatou tōfiga ʼaē ʼi te lagi. Ohage la, ia Fakahā 4:4, ʼe tou lau fēnei: “ ʼI te takafoli ʼo te hekaʼaga faka hau ʼe ʼi ai te ʼu hekaʼaga faka hau e ʼuafulu-ma-fā, pea ʼi te ʼu hekaʼaga faka hau ʼaia neʼe ʼau sio ʼe heheka ʼi ai te toko ʼuafulu-ma-fā tagata ʼāfea, ʼe nātou kofuʼi te ʼu kofu tuʼa hina, pea ʼai ʼi ʼonatou ʼu ʼulu, te ʼu kolona aulo.” Ko te ʼu tagata ʼāfea ʼaia ʼe toko 24 ʼe ko te kau Kilisitiano fakanofo, ʼaē kua fakatuʼuake pea ʼe nātou maʼu te tuʼulaga ʼi selo ohage ko te meʼa neʼe fakapapau age e te ʼAtua kia nātou. Ko tonatou ʼu kolona pea mo tonatou ʼu nofoʼaga faka hau ʼe nātou fakamanatuʼi mai kia tatou tanatou agatonu. Koutou fakakaukauʼi age muʼa, ʼo ʼuhiga mo tanatou pilivilesio lahi pea mo taulekaleka ʼaē ko te kaugana ʼi te nofoʼaga hau ʼo Sehova!

¹⁸ Ia Fakahā 14:1, ʼe tou maʼu te tahi manatu ʼo ʼuhiga mo nātou ʼaia: “Neʼe ʼau sio, pea koʼeni! te Akeno ʼe tuʼu ʼi te Moʼuga ʼo Sione, ʼo kau kiai te toko teau-fāgofulu-ma-fā afe ʼaē ʼe tohi ʼi ʼonatou ʼu laʼe tona huafa pea mo te huafa ʼo tana Tāmai.” ʼI henī ʼe tou sio ʼe faka tuʼakoi te hahaʼi ʼo te kau fakanofo—ko te toko 144 000. ʼE hā ʼaki mai ko nātou ko te ʼu hau, heʼe nātou tutuʼu mo te Hau fakanofo ʼa Sehova, ia “te Akeno,” ko Sesu. Pea ʼe nātou tutuʼu ʼi te Moʼuga ʼo Sione ʼi selo. Ko te Moʼuga ʼo Sione ʼi te kele neʼe tuʼu ʼi Selusalemi, te kolo ʼaliki ʼo Iselaele. Ko te Moʼuga ʼo Sione ʼi selo ʼe ina fakatā te tuʼulaga māʼoluga ʼo Sesu pea mo tana kau kaugā gāue, ʼaē ʼe nātou faʼufaʼu te Selusalemi ʼaē ʼi selo.—2 Fakamatala 5:2; Pesalemo 2:6.

19, 20. (a) Ko te kautahi fea ʼaē ʼi selo ʼe kau anai kiai te kau Kilisitiano fakanofo? (b) Ko te temi fea ʼaē neʼe fili ai e Sehova ia nātou ʼaē ke ʼolo ʼo nonofo ʼi selo?

¹⁹ ʼO mulimuli ki te meʼa ʼaia, ko te kau fakanofo ʼi tonatou kolōlia ʼi selo ʼe toe fakahigoaʼi nātou ko te “Selusalemi Foʼou.” (Fakahā 21:2) Ko te Selusalemi ʼaē ʼi te kele neʼe “ko te kolo ʼo te Hau lahi” pea neʼe ko te tuʼulaga ʼaia ʼo te fale lotu. (Mateo 5:35) Ko te Selusalemi Foʼou ʼaē ʼi selo ʼe ko te kautahi fakaʼaliki ʼo te Puleʼaga ʼaē ʼe pule ai ʼi te temi nei te Pule Faʼitaliha lahi ko Sehova, pea mo tona Hau ʼaē neʼe hinoʼi ko Sesu, pea ʼe fai ai te gāue faka pelepitelo ʼaki te ʼu tuʼuga tapuakina ʼe hifo anai mai te nofoʼaga hau ʼo Sehova moʼo fakamālōlō te malamanei. (Fakahā 21:10, 11; 22:1-5) ʼI te tahi meʼa neʼe hā, ʼe logo ia Soane ko te kau Kilisitiano fakanofo agatonu ʼaē neʼe fakatuʼuake ʼe fakahigoaʼi nātou ‘ko te ʼohoana ʼo te Akeno.’ ʼE ko he fakatā fakaloto māfana ʼo ʼuhiga mo te felogoi ʼaē ka nātou maʼu anai mo Sesu pea mo tanatou fakalogo lelei ʼaē kia te ia! Koutou fakakaukauʼi age muʼa te fiafia ʼaē ʼi te lagi ʼi te temi ʼaē ka maʼu ai e te Kilisitiano fakanofo fakamuli tona fakapale ʼi selo. ʼI te temi ʼaia, “ko te ʼohoana ʼo te Akeno” kua feala leva ke kamata! Ko te kautahi fakaʼaliki ʼaia ʼi selo ʼe katoa anai.—Fakahā 19:6-8.

²⁰ Ei, ko te ʼu tapuakina taulekaleka ʼe ʼamanaki ke maʼu ʼe nātou ʼaē neʼe ʼui kiai e te ʼapositolo ko Paulo te ʼu palalau ʼaenī: “Kia tatou, ʼe tou maʼuʼuli anai ʼi selo.” (Filipe 3:20) Ia taʼu e lua afe, neʼe fili e Sehova tana fānau fakalaumālie pea mo ina teuteuʼi nātou ki te tōfiga ʼi te lagi. ʼO mulimuli ki te ʼu meʼa fuli ʼaē kua hoko, ko te gāue ʼaē ʼo ʼuhiga mo tonatou fili pea mo tonatou teuteuʼi kua ʼamanaki pe ke ʼosi. Kae kei ʼi ai te tahi meʼa maʼuhiga, ohage ko te meʼa ʼaē neʼe fakahā kia Soane ʼi te meʼa ʼaē neʼe sio kiai ʼe tuʼu ia Fakahā kapite 7. Koia ʼi te temi nei, ʼe ʼi ai te tahi kūtuga ʼe nātou loto ke tou tokagaʼi nātou, pea ʼe tou vakaʼi anai te faʼahi ʼaia ʼi te alatike ka hoa mai.

ʼE Kei Koutou Manatuʼi Koa?

◻ Koteā te ʼu gāue kehekehe ʼa te laumālie ʼo ʼuhiga mo nātou ʼaē ka nātou maʼu te tofiʼa ʼi selo?

◻ Koteā te ʼu felogoi lelei ʼe maʼu e te kau fakanofo mo Sehova pea mo Sesu?

◻ ʼE fakamatalatala feafeaʼi ʼi te Tohi-Tapu ia te kokelekasio ʼo te kau Kilisitiano fakanofo?

◻ Koteā ʼaē neʼe fakatafito kiai te fakatuʼu ʼo te Iselaele ʼo te ʼAtua?

◻ Koteā te ʼu pilivilesio ʼaē ʼi selo ʼe ʼamanaki ke maʼu e te kau Kilisitiano fakanofo?

[Paki ʼo te pasina 10]

Lolotoga ia taʼu e lua afe, ʼe filifili e Sehova ia nātou ʼaē ka pule anai ʼi te Puleʼaga