Te Moʼoni ʼo ʼUhiga Mo Te Kau ʼAselo

ʼI te agamāhani kapau ʼe tou fia feʼiloʼiʼaki mo he tahi pea ʼe tou toe fia ʼiloʼi foki mo te ʼu meʼa ʼo ʼuhiga mo tona famili. ʼE toe feiā pe mo kapau kua tou ʼiloʼi ia Sehova ʼAtua. ʼE lahi te ʼu meʼa ʼe tonu ke tou mahino kiai, ka mole gata ʼaki pe tatatou ʼiloʼi ia tona huafa. ʼE tonu foki ke tou ʼiloʼi tona “famili” ʼaē ʼi selo. (Vakaʼi ia Efesi 3:14, 15.) ʼE fakahigoaʼi e te Tohi-Tapu te kau ʼaselo ko te ʼu “foha” ʼo te ʼAtua. (Sopo 1:6) Ka tou vakaʼi tonatou maʼuhiga ʼaē ʼi te Tohi-Tapu, ʼe tonu ke lahi tatatou fia ʼiloʼi ʼo ʼuhiga mo te kau ʼaselo ʼaia, ke tou mahino ki tonatou tuʼulaga ʼi te fakatuʼutuʼu ʼa te ʼAtua.

KO TE meʼa foʼou kua hoko. Ko te tokolahi ʼe nātou ʼui ʼe nātou tui ki te kau ʼaselo; ʼe hahaʼi mo nātou ʼaē ʼe nātou ʼui neʼe kua hoko te ʼu meʼa kia nātou ʼaki te kau ʼaselo, ʼi hona faʼahiga ʼaluʼaga. Neʼe fai te fehuʼi ʼaenī ki te kau Amelika e toko 500, “ ʼI tokotou maʼuli, kua koutou felāveʼi koa la mo he ʼaselo?” Ko te tokolahi ʼe nātou ʼio anai kiai. Ko te tahi meʼa fakapunamaʼuli, ko te tokolahi ʼo te kau tūpulaga ʼe nātou tui ki te kau ʼaselo—ʼo mulimuli ki te tānaki ʼi Amelika, ko te 76 ki te teau! ʼE ʼiloga ia, ko te hahaʼi ʼe nātou fia ʼiloʼi pe ko ai te kau ʼaselo. Kae ʼe ʼalutahi koa te manatu ʼo te temi ʼaenī ʼo ʼuhiga mo te kau ʼaselo, mo te moʼoni ʼa te Tohi-Tapu?

ʼAua Naʼa Tou Meʼa Noaʼi Te Tuʼulaga ʼo Satana

Ka tou talanoa ki te kau ʼaselo, ʼe mole tonu ke galo ia tatou te kau ʼaselo agakovi, te ʼu meʼa maʼuli ʼi selo ʼaē ʼe ʼui ʼi te Tohi-Tapu, neʼe nātou talagataʼa ki te ʼAtua. Ko Satana te ʼuluaki ʼaselo ʼaē neʼe talagataʼa. Ko te tohi ʼiloa ʼe higoa ko te Ask Your Angels, ʼe ina fakahā ko Satana ʼe “ko he ʼulugaaga ʼo te ʼAtua” moʼo tokoni ki te hahaʼi ke nātou fakamālohiʼi tanatou ʼu “ua ʼi te faʼahi fakalaumālie” mokā hoko tuʼumaʼu kia nātou he ʼu fakahala. Logope la “te ʼu fakatuʼutuʼu ʼofa” ʼa Satana, ʼe ʼui e te ʼu tagata tā tohi, ʼi te hoholo ʼo te ʼu sēkulō, kua faka ʼuhiga ia ia ki te kovi. ʼE nātou toe ʼui ko Satana pea mo Sesu, “logope la tonā mole tatau, ʼe nā kau ki te fakatuʼutuʼu pe e tahi, heʼe ko nāua ko te sino e tahi.” ʼE ko he ʼu talanoa fakapunamaʼuli ʼaia, kae koteā te ʼui ʼa te Tohi-Tapu?

ʼE fakahā lelei e te Tohi-Tapu ko Satana ʼe mole “ko he ʼulugaaga ʼo te ʼAtua” kae ko te fili ʼo te ʼAtua. (Luka 10:18, 19; Loma 16:20) ʼE ina fakafihiʼi te Pule faʼitaliha ʼa Sehova, pea ko tana ʼu fakatuʼutuʼu ʼaē ʼo ʼuhiga mo te hahaʼi ʼe mole ko he ʼu fakatuʼutuʼu “ ʼofa.” ʼE ina fakahoko fakafefeka tona ʼita ki te ʼu kaugana ʼa te ʼAtua ʼaē ʼi te kele. ʼE ina tukugakoviʼi nātou ʼi muʼa ʼo te ʼAtua ʼi te ʼaho mo te po!a (Fakahā 12:10, 12, 15-17) ʼE fakatuʼutuʼu e Satana ke ina fakahehemaʼi nātou ʼi te faʼahi fuli. ʼI tana fakatagaʼi mālohi te tagata faitotonu ko Sopo, neʼe hā ʼaki ai tana aga fefeka ki te ʼu mamahi ʼa te hahaʼi.—Sopo 1:13-19; 2:7, 8.

ʼE mahino papau ia ko Satana pea mo Sesu ʼe mole nā “kau ki te fakatuʼutuʼu e tahi,” koteʼuhi ʼe nā fefakafeagaiʼaki. ʼE mahino ia ko Satana ʼaē neʼe ina uga ia Helote ke ina fai te puleʼaki ʼaē ke tāmateʼi te ʼu tamaliki—ʼi tana faiga ʼaē ke matehi te kiʼi tamasiʼi ko Sesu! (Mateo 2:16-18) Pea neʼe hoholo aipe te ʼu fakataga ʼa Satana ʼo aʼu ki te matehi ʼo Sesu. (Luka 4:1-13; Soane 13:27) Koia, ʼe mole tonu te ʼui ʼaē “ko te sino e tahi,” koteʼuhi ʼe fakafeagai ia Sesu pea mo Satana. ʼE fakahā e te Tohi-Tapu ʼe tonu ke hoko tanā fefakafeagaiʼaki. (Senesi 3:15) ʼE mahino ia, ko Sesu ʼaē kua fakatuʼuake ʼe ina fakaʼauha anai ia Satana ʼi te temi ʼaē kua fakakatofa e te ʼAtua.—Fakahā 1:18; 20:1, 10.

ʼE Fai Koa Te ʼu Faikole Kia Ai?

Ko ʼihi ʼaē ʼe nātou lagolago ki te gāue fakaʼaselo, ʼe nātou fakaneke te metitasio pea mo te tahi ʼu puleʼaki moʼo felogoi mo te kau ʼaselo. “Ko he kole fakamalotoloto ki he felogoi mo he tahi ʼi te famili ʼi selo ʼe logoʼi anai,” ko te ʼui ʼaia ʼa te tohi. “Koutou kole pea ʼe tali atu anai.” Ko Mikaele, Kapeliele, Uliele, pea mo Lafaele, ʼe nātou kau ʼi te ʼu ʼaselo ʼaē ʼe fakahā e te tohi ʼaia ke tou faikole ki ai.b

Kae, neʼe akoʼi e Sesu ki tana kau tisipulo ke nātou faikole ki te ʼAtua, kae mole nātou faikole ki te kau ʼaselo. (Mateo 6:9, 10) ʼO toe feiā aipe, neʼe tohi fēnei e Paulo: “Kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, koutou fakahā ki te ʼAtua takotou ʼu kole.” (Filipe 4:6) Koia, ʼi tanatou ʼu faikole, ʼe mole fakaōvi te kau Kilisitiano ki he tahi kehe kae ʼe nātou fakaōvi ki te ʼAtua, pea ʼe nātou fai te faʼahi ʼaia ʼaki pe te huafa ʼo Sesu Kilisito.c—Soane 14:6, 13, 14.

Ko Te Kau ʼAselo ʼe ʼi Ai Koa Hanatou Lotu?

ʼI te manatu ʼa Eileen Elias Freeman, ʼaē ʼe pule ki te kautahi ʼaē ʼe nātou sivisivi te kau ʼaselo, “ko te kau ʼaselo ʼe nātou māʼoluga age ʼi te lotu fuli, ʼi te filosofia, ʼi te credo. ʼI tona fakahagatonu, kua mahino kia tatou ko te kau ʼaselo ʼe mole hanatou lotu.”

Kae ʼe fakahā lelei e te Tohi-Tapu ko te kau ʼaselo agatonu ʼe ʼi ai tanatou lotu; ʼe nātou tauhi ki te ʼAtua moʼoni, ko Sehova, ia ia ʼaē ʼe maheka ki te ʼu ʼatua kehe. (Teutalonome 5:6, 7; Fakahā 7:11) Koia, ko te tahi ʼaselo neʼe ina fakamahino ki te ʼapositolo ko Soane ko ia “ko te kaugā popūla” ʼo nātou ʼaē ʼe nātou fakalogo ki te ʼu fakatotonu ʼa te ʼAtua. (Fakahā 19:10) ʼE mole tou lau ʼi he vaega ʼo te Tohi-Tapu ko te kau ʼaselo agatonu ʼe nātou pipiki ki he tahi faʼahiga tauhi. ʼE nātou pipiki ʼāteaina pe kia Sehova.—Ekesote 20:4, 5.

“Te Tāmai ʼo Te Loi”

ʼE lahi te ʼu felāveʼi mo te kau ʼaselo ʼe pipiki ki te felogoi mo te kau mate. “Neʼe hage kia ʼau ko taku faʼe tagata neʼe ina maʼu he ala ke aʼu mai kia te ʼau pea mo fakahā mai ʼe fiafia,” ko te ʼui ʼaia ʼa te fafine ʼe higoa ko Elise ʼi tana ʼosi sio ki te meʼa ʼaē neʼe ina faka ʼuhiga ohage ko he fakaʼiloga. Neʼe toe manatuʼi e Terri neʼe hoko te meʼa feiā kia ia ʼi te mate ʼo tona kaumeʼa neʼe ʼofa mamahi ai. ʼE ina ʼui fēnei: “Hili te vāhaʼa e tahi ʼi tona ʼosi ʼavaifo, neʼe haʼu ia ʼo fetaulaki mai kia ʼau kae neʼe ʼau moemisi. Neʼe ina ʼui mai ʼe mole tonu ke ʼau tagi ʼi tana ʼalu, koteʼuhi ʼe fiafia pea mo fīmālie.”

Kae ʼe fakahā e te Tohi-Tapu ko te kau mate “ ʼe mole kei nātou ʼiloʼi he meʼa e tahi.” (Tagata Tānaki 9:5) ʼE ina toe ʼui mokā mate he tahi, “ ʼi te ʼaho pe ʼaia ʼe puli ai tana ʼu fakakaukau.” (Pesalemo 146:4) Kae ko Satana ʼe “ko te tāmai ʼo te loi.” (Soane 8:44) Ko ia ko te tupuʼaga ʼo te loi ʼaē ʼe ʼui ai ko te nefesi ʼo te tagata ʼe maʼuli ʼi te hili ʼo tona mate. (Vakaʼi ia Esekiele 18:4.) Ia ʼaho nei, tokolahi ʼe nātou tui ki te manatu ʼaia, pea ko he manatu ia ʼe lagolago ki te fakatuʼutuʼu ʼa Satana, heʼe fakafisi ki te tui ʼaē ki te toe fakatuʼuake—ko te akonaki tāfito ʼo te Lotu Faka Kilisitiano. (Soane 5:28, 29) Koia, mokā fakafehuʼi te kau mate peʼe ko he faʼahiga maʼu ʼo ni ʼu logo mai ia nātou, ʼe ko te tahi pe ʼaia potu ʼo te gāue fakaʼaselo ʼe mole tali e te ʼAtua.

ʼE Ko He Fakaōvi Koa Ki Te Kau ʼAselo Peʼe Ki Te Kau Temonio?

ʼE lahi te ʼu meʼa ʼe hoko ʼi te gāue fakaʼaselo ʼe pipiki ki te ʼu meʼa fakatemonio. Koutou fakatokagaʼi te meʼa neʼe hoko kia Marcia. ʼE ina ʼui fēnei: “Mai te māhina ʼo Sepetepeli ki te māhina ʼo Tesepeli 1986, neʼe ʼau kamata maʼu te ʼu logo ‘mai te mālama fakalaumālie.’ Neʼe ʼau sio ki te ʼu meʼa pea neʼe ʼau moemisi ki toku ‘maʼuli ʼāfea.’ Neʼe ʼau felogoi mo toku ʼu kaumeʼa kua mamate pea neʼe lahi te ʼu meʼa feiā neʼe hoko kia ʼau, pea neʼe ʼau ʼiloʼi ai te ʼu meʼa ʼo ʼuhiga mo te ʼu hahaʼi neʼe hoki ʼau felāveʼi pe mo nātou. Neʼe toe tapuakinaʼi ʼau ʼaki te faitohi automatique pea mo te ʼu logo ʼe fakahoko mai e te ʼu meʼa ʼe mole honatou ʼu sino. Ko ʼihi, ʼaē neʼe mole heʼeki ʼau felāveʼi mo nātou ʼi tonatou maʼuli fakakelekele, neʼe nātou fakahā mai te ʼu logo ke ʼau fakahā ki niʼihi.”

Ko te fakaʼaogaʼi ʼo te tivinasio ohage ko he meʼa moʼo “felogoi” mo te kau ʼaselo, ʼe mole ko he aga foʼou. ʼE fakaloto mālohiʼi fakahagatonu e te nusipepa tana kau lautohi ke nātou fakaʼaogaʼi te ʼu maka fakamanamana, te ʼu kate ʼo te taro, te ʼu piesi Yi jing, te vakaʼi te ka haʼu ʼo he tahi ʼi tona ʼu ʼalofi nima, pea mo te kumi te faka ʼuhiga ʼo te ʼu fetuʼu. ʼE tohi fēnei e te hahaʼi tā tohi: “Koutou tuku takotou mālama ʼaē ia koutou ke ina taki koutou ki te meʼa fakamanamana, pea mo koutou falala ʼe koutou felāveʼi anai mo he ʼaselo ʼi te faʼahi ʼaia.”

Kae ʼe fakahā lelei mai e te Tohi-Tapu, ‘ko te ʼu meʼa ʼaē ʼe felāveʼi mo koutou ʼi te faʼahi ʼaia,’ ʼe mole ko he ʼu ʼaselo ʼa te ʼAtua. Koteā tona tupuʼaga? Koteʼuhi ko te ʼu meʼa fakatemonio ʼe fakafeagai ia ki te ʼAtua, pea ko te kau atolasio moʼoni—ʼi selo pea mo te kele—ʼe mole honatou pikipikiga mo te ʼu meʼa ʼaia. ʼIo, ko te gāue fakatemonio ʼi Iselaele neʼe ko he agahala mamafa! Neʼe ʼui fēnei e te Lao: “Ko ʼaē ʼe ina fai te ʼu meʼa ʼaia ʼe ko he meʼa fakalialia kia Sehova.”—Teutalonome 13:1-5; 18:10-12.

“Ko Te ʼAselo Gigila”

ʼE mole tonu ke tou punamaʼuli ko te Tevolo ʼe feala ke ina fai he meʼa fakatemonio ʼe hage ʼe lelei, tatau aipe mo kapau ko he gāue ʼe fai e he ʼaselo. ʼE ʼui e te Tohi-Tapu ko Satana “ ʼe ina fakaliliu tuʼumaʼu pe ia ia ko he ʼaselo ʼo te mālama.” (2 Kolonito 11:14) ʼE toe feala pe ke ina fakatupu he ʼu meʼa fakamanamana pea mo fakahoko moʼoni te ʼu meʼa ʼaia, ʼo ina kākāʼi ia nātou ʼaē ʼe mamata kiai, ʼo nātou manatu ko te fakakikite ʼe haʼu mai te ʼAtua. (Vakaʼi ia Mateo 7:21-23; 2 Tesalonika 2:9-12.) Kae ko te ʼu gāue fuli ʼa Satana—tatau aipe peʼe nātou ʼasi mai ʼe lelei peʼe kovi—ʼe nātou kau ki te ʼu fakatuʼutuʼu ʼaenī e lua: ko te fakaneke ʼo te hahaʼi ke nātou fakafeagai kia Sehova peʼe ke ina fakakiviʼi tonatou ʼu ʼatamai ke ʼaua naʼa ‘faka mālamagia nātou e te mālama gigila ʼo te logo lelei faka kolōlia ʼo ʼuhiga mo Kilisito.’ (2 Kolonito 4:3, 4) Ko te puleʼaki fakamuli ʼaia ʼe ko he faʼahiga fai ʼe iku lelei tuʼumaʼu.

Tou vakaʼi te fakamatala ʼa te Tohi-Tapu ʼo ʼuhiga mo te taʼahine kaugana ʼi te ʼuluaki sēkulō. Neʼe lahi te falā neʼe maʼu e tana ʼu pule ʼi tana ʼu fai fakakikite. Lolotoga te ʼu ʼaho ʼaē neʼe mulimuli ai ki te kau tisipulo, ʼo ina ʼui fēnei: “Ko te ʼu tagata ʼaenī ko te ʼu kaugana ʼa te ʼAtua Māʼoluga, ʼaē ʼe nātou tala atu te ala ʼo te maʼuli.” Neʼe moʼoni te ʼu palalau ʼaia. Kae, ʼe fakahā e te fakamatala neʼe ulusino te temonio ia ia, mole ko he ʼaselo, kae “ko te temonio ʼo te tivinasio.” Ki muli age, ko Paulo “neʼe maliu age pea mo ina ʼui ki te laumālie: ‘ ʼE ʼau fakatotonu atu ʼaki te huafa ʼo Sesu Kilisito ke ke haʼu ki tuʼa mai ia ia.’ Pea ʼi te lakaga pe ʼaia neʼe hū mai ki tuʼa.”—Gāue 16:16-18.

He koʼe neʼe kapu e Paulo te laumālie ʼaia? ʼE moʼoni, neʼe lahi te ʼu koloā neʼe foaki age e te laumālie ʼaia ki ʼu pule ʼo te taʼahine ʼaē neʼe ulusino ai te temonio. ʼAki te ʼu mālohi fakatemonio, neʼe feala ke fakahā e te taʼahine kaugana ʼaia ki te hahaʼi gāue kele pe ko te temi fea ʼaē ʼe tonu ai ke tō ʼakau, ki te kau finemui pe ko te temi fea ʼaē ʼe tonu ai ke nātou ʼohoana, pea ki te hahaʼi kumi koloā, pe ko te potu fea ʼaē ʼe maʼu ai te aulo. Tahi ʼaē meʼa, ko te laumālie ʼaia neʼe ina fakaneke te taʼahine ke palalau ki te ʼu meʼa ʼe moʼoni, ke ina vikiʼi te kau tisipulo ʼi te kaugamālie!

Kae, neʼe “ko te temonio ʼo te tivinasio.” ʼUhi ko te temonio, neʼe mole feala ke ina fai he ʼu tala ʼo ʼuhiga mo Sehova pea mo tana ʼu fakatuʼutuʼu ʼaē ki te maʼuli. Ko tana ʼu palalau fakavikiviki, lagi neʼe fai moʼo fakaneke te hahaʼi ke nātou tui ki te ʼu fakakikite ʼa te taʼahine faifekau, ke tupu ʼo he hēhē ʼo nātou ʼaē ʼe nātou kumi te kau tisipulo moʼoni ʼa Kilisito. Koia la ʼaē, neʼe tonu ai te fakatokagaʼi ʼa Paulo te kau Kolonito: “ ʼE mole feala ke koutou kau ki te ‘laupapa ʼa Sehova’ pea mo te laupapa ʼa te kau temonio.” (1 Kolonito 10:21) ʼE mole ko he meʼa fakapunamaʼuli te ʼui ʼaē, ko te kau Kilisitiano ʼo te ʼuluaki sēkulō neʼe nātou maumauʼi tanatou ʼu tohi fuli ʼaē neʼe talanoa ki te tivinasio.—Gāue 19:19.

Ko Te “ ʼAselo ʼe Lele ʼi Te Lotomalie ʼo Te Lagi”

Ohage ko te meʼa neʼe kua tou vakaʼi, ʼe fakahā mai e te Tohi-Tapu ʼe lahi te ʼu meʼa neʼe hoko ʼe pipiki kiai te ʼu ʼaselo, ʼe ko he ʼu meʼa neʼe fakahoko tāfito e te Fili ʼo te ʼAtua ia Satana te Tevolo. ʼE faka ʼuhiga koa ko te kau ʼaselo maʼoniʼoni ʼe mole nātou kau ʼi te ʼu meʼa ʼa te tagata? Kailoa, ʼe nātou lolotoga gāue nei ʼi te gāue mālohi ʼi te kele. Koteā te meʼa ʼaia? Moʼo tali kiai, ʼe tonu ke tou vakaʼi te tohi ʼo te Fakahā ʼi te Tohi-Tapu. ʼE lahi age te talanoa ʼa te tohi ʼaia ki te kau ʼaselo ʼi te ʼu tohi fuli ʼo te Tohi-Tapu.

Ia Fakahā 14:6, 7, ʼe tou lau te fakamatala ʼa Soane ʼo ʼuhiga mo te fakakikite neʼe foaki age kia te ia: “Neʼe ʼau sio ki te tahi ʼaselo ʼe lele ʼi te lotomalie ʼo te lagi, pea neʼe ʼi ai tana logo lelei ʼe heʼegata ke ina kalagaʼi ohage he evaselio kia nātou ʼaē ʼe nonofo ʼi te kele, pea mo te puleʼaga kehekehe, te telepi kehekehe, te lea kehekehe pea mo te hahaʼi kehekehe ʼo ina ʼui leʼolahi: ‘Koutou manavasiʼi ki te ʼAtua pea mo foaki ki ai te kolōlia, heʼe kua hoko mai te hola ʼo tana fakamāu, pea koutou atolasio kia Ia ʼaē neʼe ina faʼu te lagi mo te kele mo te tai pea mo te ʼu matapuna vai.’ ”

Ko te vaega ʼaia, ʼe ina fakahā lelei te gāue ʼaē ʼe kau tāfito kiai te kau ʼaselo ia ʼaho nei. ʼE nātou kau ki te gāue ʼe maʼuhiga ʼaupito—ko te tala ʼo te logo lelei ʼo te Puleʼaga ʼo te ʼAtua. Neʼe ko te gāue ʼaia, ʼaē neʼe fakapapau e Sesu ki tana kau tisipulo: “ ʼE ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:18-20) ʼE nofo feafeaʼi ia Sesu mo tana kau tisipulo? ʼE tokoni kia nātou ʼo ina fakaʼaogaʼi te kau ʼaselo, ke feala ki te gāue lahi ʼaia ke fakahoko.

ʼI te taʼu fuli, ko hola e tahi miliale neʼe faka mafola ai te kau Fakamoʼoni ʼa Sehova te logo lelei ʼo te Puleʼaga ʼo te ʼAtua. ʼI tanatou lolotoga fai ʼo te gāue ʼaia, neʼe nātou sio ki te fakamoʼoni ʼo te taki fakaʼaselo. ʼI tanatou minisitelio ʼi te gāue fai faka mafola, ko te meʼa neʼe tautau hoko neʼe nātou felāveʼi mo te ʼu hahaʼi neʼe ko te hoki ʼosi age pe ʼaē ʼo tanatou faikole ke haʼu he tahi ʼo tokoni kia nātou ke nātou mahino ki te ʼu fakatuʼutuʼu ʼa te ʼAtua. Ko te meʼa neʼe hoko ʼaki te taki fakaʼaselo, ʼo ʼalutahi mo te fakatuʼutuʼu ʼa te kau Fakamoʼoni, neʼe ko te toko lauʼi teau afe ʼaē neʼe nātou maʼu te ʼatamai mālama ʼo ʼuhiga mo Sehova ʼi te taʼu fuli!

ʼE koutou fakalogo koa ki te ʼaselo ʼaē ʼe lele ʼi te lotomalie ʼo te lagi? Mokā ʼolo atu anai te kau Fakamoʼoni ʼa Sehova, he koʼe ʼe mole koutou felogoi muʼa mo nātou ʼo ʼuhiga mo te logo ʼaia ʼe ʼave e te kau ʼaselo?

[Nota ʼi te lalo pasina]

[Talanoa ʼo te pasina 8]

KO AI TE KAU ʼASELO?

ʼO MOLE ʼalutahi mo te tui ʼa te tokolahi, ko te kau ʼaselo ʼe mole ko he ʼu nefesi ʼe mavae ʼi te ʼu sino ʼo te ʼu hahaʼi ʼaē kua mamate. ʼE fakahā fakalelei e te Tohi-Tapu ko te hahaʼi ʼaē kua mamate “ ʼe mole kei nātou ʼiloʼi he meʼa e tahi.” (Tagata Tānaki 9:5) Kae ko te kau ʼaselo neʼe ʼōmai koa nātou maifea? ʼE fakahā e te Tohi-Tapu neʼe fakatupu nātou e te ʼAtua ʼi muʼa ʼo te fakatupu ʼo te kele. (Sopo 38:4-7) Ko te kaugamālie ʼo te famili ʼo te ʼAtua ʼi selo ʼe feala ke lau ko te ʼu ʼaselo ʼe lauʼi teau miliona, lagi ko te ʼu lauʼi miliale peʼe fakalaka age! Ko ʼihi ʼaselo neʼe nātou muliʼi te talagataʼa ʼa Satana.—Taniela 7:10; Fakahā 5:11; 12:7-9.

Mai tona ʼaluʼaga ʼaē ko Sehova ʼe ko he ʼAtua ʼe ina fakaʼaluʼalu lelei ia meʼa fuli, ʼe mole ko he meʼa fakapunamaʼuli te ʼui ʼaē ʼe fakaʼaluʼalu lelei tona foʼi famili ʼaē ʼe faʼufaʼu e te kau ʼaselo.—1 Kolonito 14:33.

• Ko te ʼaselo ʼaē ʼe lahi tāfito, ʼi te mālohi pea mo te ʼuhiga pule, ʼe ko te alekaselo, ko Sesu Kilisito, ʼaē ʼe toe fakahigoaʼi ko Mikaele. (1 Tesalonika 4:16; Suta 9) Pea ʼe fakalogo kia ia te kau selafimi, pea mo te kau kelupimi, pea mo te kau ʼaselo.

• Ko te kau selafimi ʼe nātou gāue ʼi te hekaʼaga faka hau ʼo te ʼAtua. ʼE mahino ia, ko tanatou gāue ʼe ko te kalagaʼi te maʼoniʼoni ʼo te ʼAtua pea mo nātou tokaga ki tana hahaʼi ke nātou taupau tonatou ʼuhiga maʼa.—Isaia 6:1-3, 6, 7.

• Ko te kau kelupimi ʼe nātou toe nonofo mo nātou ia tafa ʼo Sehova. Ko tanatou gāue, ʼe nātou ʼamo peʼe nātou fua te hekaʼaga faka hau ʼo te ʼAtua, pea mo nātou lagolago ki te māfimāfi ʼo Sehova.—Pesalemo 80:1; 99:1; Esekiele 10:1, 2.

• Ko te kau ʼaselo (ko tona faka ʼuhiga “ko te kau ʼave logo”) ko te hahaʼi gāue pea ko te kau fakafofoga ʼo Sehova. ʼE nātou fakahā te finegalo ʼo te ʼAtua, tatau aipe peʼe ko te hāofaki ʼo te hahaʼi ʼa te ʼAtua peʼe ko te fakaʼauha ʼo te kau agakovi.—Senesi 19:1-26.

[Paki ʼo te pasina 7]

ʼE koutou fakalogo koa ki te ʼaselo ʼaē ʼe lele ʼi te lotomalie ʼo te lagi?