Ko Ai ʼAē Ka “Hāo Anai”?
“Ko ia ʼaē ʼe fetapā ki te huafa ʼo Sehova ʼe hāo anai ia.”—Gāue 2:21.
1. He koʼe ko te Penikosite ʼo te taʼu 33 ʼo totatou temi neʼe ko he ʼaho maʼuhiga ʼaupito ʼi te hisitolia ʼo te malamanei?
KO TE Penikosite ʼo te taʼu 33 ʼo totatou temi neʼe ko he ʼaho maʼuhiga ʼaupito ʼi te hisitolia ʼo te malamanei. Koteā tona tupuʼaga? Koteʼuhi ʼi te ʼaho ʼaia, neʼe tupu ai te puleʼaga foʼou. ʼI te kamata, neʼe mole faʼa lahi te puleʼaga ʼaia—neʼe ko te kau tisipulo ʼa Sesu e toko 120 pe ʼaē neʼe nātou fakatahitahi ʼi he kogafale fata ʼi Selusalemi. Ia ʼaho nei, ʼe lahi te ʼu puleʼaga ʼo te temi muʼa ʼe mole kei tou manatuʼi, kae ʼe kei maʼu ʼi te temi nei te puleʼaga ʼaē neʼe kamata faʼufaʼu ʼi te kogafale fata ʼaia. ʼE maʼuhiga ʼaupito te faʼahi ʼaia kia tatou fuli, heʼe ko te puleʼaga ʼaia ʼaē neʼe hinoʼi e te ʼAtua ke ina fakafofoga ia ia ʼi te malamanei.
2. Koteā te ʼu milakulo ʼaē neʼe hā ʼaki ai kua tupu he puleʼaga foʼou?
2 ʼI te temi ʼaē neʼe kamata faʼufaʼu ai te puleʼaga ʼaia, neʼe hoko ai te ʼu meʼa maʼuhiga, ʼo fakahoko ai te lea faka polofeta ʼa Soele. ʼE tou maʼu te ʼu meʼa ʼaia ʼaē neʼe hoko ia Gāue 2:2-4: “Fokifā pe kua logo ifo te logoaʼa mai te lagi ohage ko te logoaʼa ʼo he tuʼani matagi mālohi, pea neʼe ina fakafonu te fale ʼaē neʼe nātou nonofo ai. Pea neʼe hā kia nātou he ʼu ʼalelo ohage ko te afi pea neʼe fevaevaeʼaki ʼo tahi tuʼu ia nātou takitahi, pea neʼe nātou fonu fuli ʼi te laumālie maʼoniʼoni pea neʼe nātou kamata palalau ʼi te ʼu lea kehekehe, ʼo fai pe ki te meʼa ʼaē neʼe faka fealagia e te laumālie ke nātou palalau kiai.” ʼAki te ʼu meʼa ʼaia neʼe hoko, ko te ʼu tagata pea mo te ʼu fafine agatonu ʼaia e toko 120 neʼe liliu ko he puleʼaga fakalaumālie, ko te ʼu ʼuluaki hahaʼi ʼaē neʼe kau ki te puleʼaga ʼaē neʼe fakahigoaʼi ki muli age e Paulo “ko te Iselaele ʼa te ʼAtua.”—Kalate 6:16.
3. Koteā te lea faka polofeta ʼa Soele ʼaē neʼe hoko ʼi te Penikosite ʼo te taʼu 33 ʼo totatou temi?
3 Neʼe ʼōmai te hahaʼi ʼo vakaʼi pe koteā te “tuʼani matagi mālohi” ʼaē neʼe nātou logo kiai, pea neʼe fakamahino age kia nātou e te ʼapositolo ko Petelo, neʼe lolotoga hoko te tahi lea faka polofeta ʼo Soele. Koteā te lea faka polofeta ʼaia? Koutou fakalogo ki te ʼu palalau ʼaē neʼe ina fai: “ ‘ ʼI te ʼu ʼaho fakamuli,’ ko te ʼui ʼaia ʼa te ʼAtua, ‘ ʼe ʼau folahi anai he koga ʼo toku laumālie ki te ʼu faʼahiga kakano fuli pe, pea ʼe lea faka polofeta anai ʼokotou foha pea mo ʼokotou ʼofafine, pea ʼe sisio anai ʼokotou tūpulaga ki he ʼu meʼa ʼe hā, pea ko ʼakotou matuʼa ʼe nātou fai anai hanatou ʼu moemisi; pea māʼia mo toku ʼu tagata kaugana pea mo taku ʼu fafine kaugana, ʼe ʼau folahi anai kia nātou he koga ʼo toku laumālie ʼi te ʼu ʼaho ʼaia, pea ʼe nātou lea faka polofeta anai. Pea ʼe ʼau fai anai he ʼu fakamelomelo ʼi te lagi ʼi ʼoluga pea ʼi te kele ʼi lalo, te toto pea mo te afi, pea mo he tuʼuga ʼahu; ʼe liliu anai te laʼā ʼo fakapōʼuli, pea mo te māhina [ʼe liliu anai] ʼo toto, ʼi muʼa ʼo te aʼu mai ʼo te ʼaho lahi pea mo fakamanavahe ʼo Sehova. Pea ko ia ʼaē ʼe fetapā ki te huafa ʼo Sehova ʼe hāo anai ia.’ ” (Gāue 2:17-21) Neʼe fakaʼaogaʼi e Petelo te ʼu palalau ʼaē ʼe tou maʼu ia Soele 2:28-32, pea ko te fakahoko ʼo te ʼu meʼa ʼaia neʼe ina faka ʼuhiga, kua nounou te temi ʼaē neʼe kei toe ki te puleʼaga Sutea. Neʼe kua vave hoko mai “te ʼaho lahi pea mo fakamanavahe ʼo Sehova” ʼaē neʼe tonu ke huʼi maʼua ai te Iselaele heʼe agatonu. Kae ko ai ʼaē neʼe feala ke hāo ʼi te ʼaho ʼaia? Pea koteā ʼaē neʼe fakatātā e te meʼa ʼaia?
Ko Te ʼu Fakahoko e Lua ʼo Te Lea Faka Polofeta
4, 5. ʼI tana ʼiloʼi te ʼu meʼa ʼaē neʼe kua ʼamanaki hoko, koteā te tokoni ʼaē neʼe fai e Petelo, pea he koʼe ʼe ʼaoga tana tokoni ʼaia ʼo aʼu mai ki te temi ʼaenī?
4 ʼI te ʼu taʼu ʼaē neʼe hoa ki te taʼu 33 ʼo totatou temi, neʼe maʼuli lelei ai te Iselaele fakalaumālie ʼa te ʼAtua, ka mole feiā ki te kau Iselaelite ʼo te kakano. ʼI te taʼu 66 ʼo totatou temi, neʼe fetauʼaki te kau Iselaelite mo te kau Loma. ʼI te taʼu 70 leva ʼo totatou temi, ʼe feala pe ke tou ʼui neʼe puli ai te puleʼaga ʼo Iselaele, pea neʼe tutu katoa te kolo ʼo Selusalemi pea mo tona fale lotu. ʼI te Penikosite ʼo te taʼu 33 ʼo totatou temi, neʼe fai e Petelo he ʼu tokoni lelei ʼo ʼuhiga mo te fakaʼauha ʼaia ʼaē neʼe ʼamanaki hoko. Neʼe ina toe fakaʼaogaʼi te ʼu palalau ʼa Soele, pea neʼe ina ʼui fēnei: “Ko ia ʼaē ʼe fetapā ki te huafa ʼo Sehova ʼe hāo anai ia.” Ko te kau Sutea takitokotahi, neʼe tonu ke nātou fili e nātou totonu ke nātou fetapā ki te huafa ʼo Sehova. Neʼe pipiki kiai te ʼu fakatotonu ʼaenī ʼaē neʼe fai e Petelo: “Koutou fakahemala, pea ke koutou tahi papitema ʼi te huafa ʼo Sesu Kilisito moʼo fakamolemole ʼakotou ʼu agahala.” (Gāue 2:38) Ko nātou ʼaē neʼe fakalogo ki te ʼu palalau ʼa Petelo, neʼe maʼua ke nātou tali ʼe ko Sesu te Mesia ʼaē neʼe fakafisi ki ai te puleʼaga ʼo Iselaele.
5 Ko te ʼu palalau fakakikite ʼaia ʼa Soele neʼe malave ʼaupito ki te kau agavaivai ʼi te ʼuluaki sēkulō. Kae ʼe toe lahi age te maʼuhiga ʼo te ʼu palalau ʼaia ia ʼaho nei, koteʼuhi ʼe hā mai ʼi te ʼu meʼa ʼaē ʼe hoko ʼi te 20 sēkulō, ʼe ʼi ai te lua fakahoko ʼo te lea faka polofeta ʼa Soele. Tou vakaʼi peʼe hoko feafeaʼi.
6. ʼI te fakaōvi mai ʼo te taʼu 1914, neʼe ʼiloʼi feafeaʼi pe ko ai te Iselaele ʼa te ʼAtua?
6 ʼI te ʼosi mate ʼo te kau ʼapositolo, neʼe mole kei hā te Iselaele ʼa te ʼAtua ʼuhi ko te ʼu fakafeagai ʼo te Lotu Faka Kilisitiano loi. Kae ʼi te lolotoga ʼo te temi fakaʼosi ʼaē neʼe kamata ʼi te taʼu 1914, neʼe toe hā lelei ki te hahaʼi te puleʼaga fakalaumālie ʼaia. Ko te ʼu meʼa fuli ʼaia ʼaē neʼe hoko, neʼe kau ki te lea fakatātā ʼa Sesu ʼo ʼuhiga mo te fulumeto pea mo te vao kovi. (Mateo 13:24-30, 36-43) ʼI te fakaōvi mai ʼo te taʼu 1914, neʼe kamata mavae te kau Kilisitiano fakanofo mai te Keletiate heʼe agatonu, ʼo nātou fakafisi ʼaki he lototoʼa ki tonatou ʼu akonaki loi pea mo nātou faka mafola te kua vave ʼosi ʼo “te ʼu temi ʼaē kua fakakatofa ʼo te puleʼaga.” (Luka 21:24) Kae neʼe hoko te ʼuluaki tau faka malamanei ʼi te taʼu 1914, pea neʼe hoko ai mo te ʼu fihifihia neʼe mole heʼeki nātou teuteu kiai. ʼI te mālohi ʼo te ʼu fihifihia ʼaē neʼe hoko kia nātou, ko te tokolahi neʼe nātou lotovaivai ai pea ko ʼihi neʼe mole nātou nofo agatonu. ʼI te taʼu 1918, ʼe feala hatatou ʼui neʼe fakagata tanatou gāue.
7. (a) Koteā te meʼa ʼaē neʼe hoko ʼi te taʼu 1919 neʼe tatau mo te Penikosite ʼo te taʼu 33 ʼo totatou temi? (b) ʼO kamata mai te taʼu 1919, koteā te meʼa ʼaē neʼe hoko ʼi te ʼosi folahi e te ʼAtua tona laumālie ki tana hahaʼi kaugana?
7 Kae neʼe mole fualoa te ʼaluʼaga ʼaia. ʼI te taʼu 1919, neʼe kamata folahi e Sehova tona laumālie ki tana hahaʼi ʼi hona ʼaluʼaga neʼe tatau mo te ʼu meʼa ʼaē neʼe hoko ʼi te Penikosite ʼo te taʼu 33 ʼo totatou temi. ʼE mahino papau ia, ʼi te taʼu 1919 neʼe mole palalau te kau Kilisitiano ʼi te ʼu lea kehekehe, pea neʼe mole ʼi ai he tuʼani matagi mālohi. Kua mahino kia tatou ʼaki te ʼu palalau ʼa Paulo ia 1 Kolonito 13:8, kua ʼosi talu mai fualoa te temi ʼo te ʼu milakulo. Kae neʼe hā lelei te gāue ʼo te laumālie ʼa te ʼAtua ʼi te taʼu 1919 ʼi te temi ʼaē neʼe toe fakaloto mālohi ai te kau Kilisitiano agatonu ʼi te fakatahi ʼo Cedar Point ʼi Ohio, ʼi Amelika, pea neʼe nātou toe kamata te gāue fai faka mafola ʼo te logo lelei ʼo te Puleʼaga. ʼI te taʼu 1922, neʼe nātou toe liliu ki Cedar Point pea neʼe fakaloto mālohiʼi ai nātou e te logo ʼaenī, “Koutou kalagaʼi, koutou kalagaʼi, koutou kalagaʼi te Hau pea mo tona puleʼaga.” Ohage ko tona kua hoko ʼi te ʼuluaki sēkulō, neʼe mole feala ke puli ki te hahaʼi te ʼu gāue ʼaē neʼe hoko ʼaki te folahi ʼo te laumālie ʼo te ʼAtua. Ko te kau Kilisitiano fuli ʼaē kua nātou foaki tonatou maʼuli ki te ʼAtua—tagata, mo fafine, mo te kau tūpulaga pea mo te kau matutuʼa—neʼe nātou kamata “lea faka polofeta,” ko tona faka ʼuhiga, neʼe nātou kalagaʼi “te ʼu meʼa taulekaleka ʼa te ʼAtua.” (Gāue 2:11) Ohage ko tona fai e Petelo, neʼe nātou fakaloto mālohiʼi fēnei te kau agavaivai: “Koutou hāofaki koutou mai te taʼiake aga kākā ʼaenī.” (Gāue 2:40) Neʼe lava feafeaʼi ki te hahaʼi ke nātou fai te faʼahi ʼaia? Neʼe tonu ke nātou mulimuli ki te ʼu palalau ʼaē neʼe fai e Soele ia Soele 2:32: “Ko ia ʼaē ʼe fetapā ki te huafa ʼo Sehova ʼe hāo anai ia.”
8. Neʼe feafeaʼi te fakaʼaluʼalu ʼo te Iselaele ʼa te ʼAtua talu mai te taʼu 1919?
8 Talu mai te ʼu temi ʼāfea ʼaia, neʼe haʼele ki muʼa te ʼu meʼa ʼo te Iselaele ʼa te ʼAtua. ʼE hā mai, kua teitei ʼosi te fakaʼiloga ʼo te kau Kilisitiano fakanofo, pea talu mai te ʼu taʼu 1930 neʼe kamata hā te toe hahaʼi tokolahi ʼaē ʼe nātou ʼamanaki ki te maʼuli ʼi te kele. (Fakahā 7:3, 9) ʼE mahino kia nātou fuli te maʼuhiga ʼo te temi ʼaē ʼe nātou maʼuʼuli ai, heʼe hā mai ʼaki te lua fakahoko ʼo te koga tohi ʼo Soele 2:28, 29 te kua vave hoko mai ʼo te ʼaho fakamataku ʼo Sehova ʼaē ʼe lahi age, heʼe fakaʼauha ai anai te tuʼu faka lotu, mo te tuʼu faka politike, pea mo te tuʼu faka ekonomika katoa. Koia ʼe tonu ai ke tou ‘fetapā ki te huafa ʼo Sehova’ ʼo tou tui papau, ʼe ina fakahāo anai tatou!
ʼE Feafeaʼi Hatatou Fetapā Ki Te Huafa ʼo Sehova?
9. Koteā te ʼu maʼua ʼaē ʼe pipiki ki takita fetapā ki te huafa ʼo Sehova?
9 Koteā te meʼa ʼaē ʼe tonu ke tou fai mo kapau ʼe tou fia fetapā ki te huafa ʼo Sehova? ʼE tou maʼu tona tali ʼi te ʼu vaega ʼaē ʼe tuʼu ʼi muʼa ʼo te koga tohi ʼo Soele 2:28, 29. Ohage la, ʼe mole fakalogo e Sehova kia nātou fuli ʼaē ʼe fetapā kia te ia. ʼAki tana polofeta ko Isaia, neʼe ʼui fēnei e Sehova kia Iselaele: “Ka koutou folahi ʼokotou ʼu ʼalofi nima, ʼe ʼau fufū ʼoku mata kia koutou. Logo aipe te lahi ʼo te ʼu faikole ʼaē ʼe koutou fai, ka mole ʼau fakalogo [kiai].” He koʼe neʼe mole fia fakalogo ia Sehova ki tana hahaʼi ʼa ia totonu? ʼE ina fakamahino fēnei: “Kua liliu ʼokotou ʼu nima ʼo fonu ʼi te toto.” (Isaia 1:15) ʼE mole fakalogo anai ia Sehova ki he tahi ʼe ligi toto peʼe ko he tahi ʼe ina haga fai he agahala. Ko te tupuʼaga la ʼaia ʼo te ʼui ʼa Petelo ki te kau Sutea ʼi te Penikosite ke nātou fakahemala. ʼI te ʼu vaega ʼaē ʼe tuʼu ʼi muʼa ʼo Soele 2:28, 29, ʼe toe talanoa ai foki ia Soele ki te maʼuhiga ʼaē ke tou fakahemala. Ohage la ia Soele 2:12, 13, ʼe tou lau fēnei ai: “ ‘Pea ʼi te temi nei foki,’ ko te ʼui ʼaia ʼa Sehova, ‘koutou liliu mai kia te ʼau mo tokotou loto katoa, pea mo koutou sesunio mo fetāgihi pea mo fai ni ʼu tagilāulau. Pea koutou hae tokotou loto, ka mole ko ʼokotou mutuʼi meʼa; pea koutou liliu mai kia Sehova tokotou ʼAtua, heʼe agaʼofa pea mo manavaʼofa, tuai ʼi te ʼita pea mo mahu ʼi te lotoʼofa.’ ” ʼO kamata mai te taʼu 1919, neʼe mulimuli te kau Kilisitiano fakanofo ki te ʼu palalau ʼaia. Neʼe nātou fakahemala ki te ʼu hala ʼaē neʼe nātou fai, pea neʼe nātou fakatotonu ʼe mole nātou toe felogoi anai mo te mālama peʼe nātou fakatuai anai ʼi tanatou gāue. ʼI tanatou fai te faʼahi ʼaia, neʼe feala ai leva ke folahi age kia nātou te laumālie ʼo te ʼAtua. Ko nātou fuli ʼaē ʼe fia fetapā ki te huafa ʼo Sehova pea ke fagono age kia nātou, ʼe tonu ke nātou faʼifaʼitaki ki te kau Kilisitiano ʼaia.
10. (a) Koteā te fakahemala moʼoni? (b) ʼE tali feafeaʼi e Sehova te fakahemala moʼoni?
10 Koutou manatuʼi, ko te fakahemala moʼoni ʼe mole gata ʼaki pe takita ʼui ʼaē, “ ʼE ʼau fai fakalelei atu.” Ko te kau Iselaelite neʼe nātou hae tonatou ʼu kofu tuʼa moʼo fakahā ʼaki te loloto ʼo te ʼu meʼa ʼaē neʼe nātou logoʼi ʼi tonatou loto. Kae ʼe ʼui fēnei e Sehova: “Koutou hae tokotou loto, ka mole ko ʼokotou mutuʼi meʼa.” Ko te fakahemala moʼoni ʼe haʼu ia mai te loto, ʼe ko he meʼa loloto ʼe kita logoʼi ia kita totonu. Ko tona faka ʼuhiga, ʼe tonu ke tou maliu mai te aga ʼaē ʼe kovi, ohage ko tona ʼui ia Isaia 55:7: “Ke mavae te tagata agakovi ʼi tona ala, pea mo te tagata kovi ʼi tana ʼu manatu; pea ke liliu mai kia Sehova.” Ko tona faka ʼuhiga, ke tou fehiʼa ki te agahala ohage ko tona fai e Sesu. (Hepeleo 1:9) Koia, ʼe tou falala ki te fakamolemole mai ʼa Sehova kia tatou ʼaki te sakilifisio faitotogi ʼo Sesu, koteʼuhi ko Sehova “ ʼe agaʼofa pea mo manavaʼofa, tuai ʼi te ʼita pea mo mahu ʼi te lotoʼofa.” ʼE ina tali anai tatatou tauhi kia te ia, pea mo te ʼu mōlaga fakalaumālie ʼaē ʼe tou fai age kia te ia. ʼE ina fakalogo anai mokā tou fetapā ki tona huafa.—Soele 2:14.
11. ʼE tonu ke maʼuhiga feafeaʼi te tauhi moʼoni ʼi totatou maʼuli?
11 ʼI te Akonaki ʼaē neʼe fai e Sesu ʼi te Moʼuga, neʼe ina fakahā mai te tahi faʼahi ʼe mole tonu ke galo kia tatou, ʼi tana ʼui ʼaē: “Ke koutou haga kumi muʼa te puleʼaga pea mo tona faitotonu.” (Mateo 6:33) Ko tatatou tauhi ʼe mole ko he meʼa ʼe tou fai feiā pe, ʼo tou fai pe moʼo fakafimālieʼi totatou leʼo ʼo loto. Ko tatatou tauhi ki te ʼAtua ʼe ko te meʼa maʼuhiga tāfito ʼaia ʼi totatou maʼuli. Koia ʼe hoko atu e Sehova tana palalau ʼaki ia Soele, ʼo ina ʼui fēnei: “Koutou pupuhi fakatagi ʼi Sione, . . . Koutou fakatahitahi te hahaʼi. Koutou fakatuʼutuʼu he fakatahi taputapu. Koutou fakatahitahi te kau tagata matutuʼa. Koutou fakatahitahi ia nātou liliki pea mo nātou ʼaē ʼe kei huhu. Ke hū mai ki tuʼa te tagata ʼaē neʼe hoki ʼohoana mai tona kogafale, pea ke hū mai ki tuʼa te fafine ʼaē neʼe hoki ʼohoana mai tona kogafale ʼohoana.” (Soele 2:15, 16) Kua tou māhani ʼi te sio ki he taumatuʼa foʼou, ʼe nā tokagaʼi pe ia nāua totonu, ʼo nā fesioʼaki tuʼumaʼu pe. Kae māʼia mo te ʼu taumatuʼa ʼaia, ʼe tonu ke maʼuhiga tāfito kia nātou te tauhi ʼaē ʼe fai kia Sehova. ʼE mole he tahi meʼa ʼe maʼuhiga age ʼi tatatou fakatahi kia muʼa ʼo Sehova, pea mo tatatou fetapā ʼaē ki tona huafa.
12. Koteā te tuputupu ʼaē ʼe feala ke hoko mokā tou vakaʼi te tānaki ʼaē neʼe fai ʼo ʼuhiga mo te ʼAho Fakamanatu ʼo te taʼu ʼaenī kua hili?
12 ʼI tatatou ʼiloʼi te faʼahi ʼaia, tou vakaʼi nei te meʼa maʼuhiga ʼaē ʼe hā ʼi te Tānaki Gāue ʼa te kau Fakamoʼoni ʼa Sehova ʼi te Taʼu 1997. ʼI te taʼu ʼaenī kua hili, neʼe maʼu te tupu foʼou ʼi te kau fai faka mafola ʼo te Puleʼaga ʼaki te toko 5 599 931—ʼe ko he toe hahaʼi tokolahi ʼaia! Ko te toko 14 322 226 neʼe nātou kau ki te ʼAho Fakamanatu—ʼo laka age ʼi te toko valu miliona vaelua ʼo te kaugamālie ʼo te kau fai faka mafola. ʼE hā mai ʼi te kaugamālie ʼaia, ʼe lahi te tupu ʼaē ka hoko mai. Ko te tokolahi ʼo te toko valu miliona vaelua ʼaia, kua nātou lolotoga ako te Tohi-Tapu mo te kau Fakamoʼoni ʼa Sehova koteʼuhi ʼe nātou fia ʼiloʼi te moʼoni, pea ko ʼihi ko te kau tamaliki ʼo te ʼu tēhina mo tuagaʼane. Ki te tokolahi ʼo nātou ʼaia, neʼe ko tanatou ʼuluaki kau ʼaia ki he fono. ʼI tanatou kau ki te fono ʼaia, neʼe feala ai ki te kau Fakamoʼoni ʼa Sehova ke nātou feʼiloʼiʼaki mo nātou pea mo tokoni kia nātou ke nātou tuputupu ʼi te moʼoni. Neʼe toe ʼi ai foki mo nātou ʼaē ʼe nātou kau ʼi te taʼu fuli ki te ʼAho Fakamanatu pea mo lagi ʼihi fono, kae mole nātou tuputupu ʼi te moʼoni. ʼE mahino papau ia, ʼe tou fiafia ʼi tanatou ʼōmai ki te ʼu fono. Kae ʼe tou fakaloto mālohiʼi nātou ke nātou vakaʼi fakalelei te lea faka polofeta ʼa Soele, pea ke nātou ʼiloʼi ai pe koteā te tahi ʼu meʼa ʼaē ʼe tonu ke nātou fai ke feala ai hanatou ʼiloʼi papau, peʼe fakalogo anai ia Sehova kia nātou mokā nātou fetapā ki tona huafa.
13. Kapau kua tou fetapā ki te huafa ʼo Sehova, koteā te maʼua ʼaē ʼe tou maʼu ʼo ʼuhiga mo ʼihi?
13 Neʼe fakahā e te ʼapositolo ko Paulo te tahi maʼua ʼe pipiki ki tatatou fetapā ki te huafa ʼo te ʼAtua. ʼI tana tohi ki te kau Loma, neʼe ina toe fakaʼaogaʼi te ʼu palalau fakakikite ʼa Soele ʼo ina ʼui fēnei: “Ko ia ʼaē ʼe fetapā ki te huafa ʼo Sehova ʼe hāo anai ia.” ʼOsi ʼaia, pea neʼe ina fai te ʼu palalau ʼaenī: “ ʼE nātou fetapā feafeaʼi anai kia ia ʼaē ʼe mole nātou tui ki ai? Pea ʼe nātou tui feafeaʼi anai kia ia ʼaē neʼe mole nātou logo he talanoa ʼo ʼuhiga mo ia? Pea ʼe nātou logo feafeaʼi anai mo kapau ʼe mole he tahi ʼe fai faka mafola?” (Loma 10:13, 14) Ei, ʼe tokolahi te hahaʼi ʼaē ʼe mole heʼeki nātou ʼiloʼi ia Sehova ʼo aʼu mai ki te temi ʼaenī, pea ʼe ʼaoga ke nātou fetapā ki tona huafa. Ko nātou ʼaē kua nātou ʼiloʼi ia Sehova, ʼe mole gata ʼaki pe te maʼua ʼaē ke nātou faka mafola, kae ʼe toe maʼua foki ke nātou kumi te hahaʼi ʼaia pea mo tokoni kia nātou.
Ko te Palatiso Fakalaumālie
14, 15. Koteā te ʼu tapuakina lahi ʼaē ʼe maʼu e te hahaʼi ʼa Sehova ʼuhi ko tanatou fetapā ki tona huafa ʼi te ʼaluʼaga ʼaē ʼe ina leleiʼia?
14 ʼE ko te manatu ʼaia ʼa te kau fakanofo pea mo te tahi ʼu ōvi, pea ʼe tapuakina ai nātou e Sehova. “ ʼE gāue faiva anai ia Sehova maʼa tona fenua pea ʼe ʼofa anai ki tana hahaʼi.” (Soele 2:18) ʼI te taʼu 1919, neʼe fakamalotoloto Sehova pea mo ʼofa ki tana hahaʼi ʼi tana toe fakatuʼutuʼu tanatou gāue pea mo tana tuku kia nātou te gāue fakalaumālie lahi. ʼE ko he palatiso fakalaumālie moʼoni ʼaē neʼe talanoa kiai ia Soele ʼi tana ʼui ʼaē: “ ʼAua naʼa ke mataku, Ê kele. Fiafia pea mo fakafiafia; heʼe fai moʼoni anai e Sehova he meʼa lelei ʼi te ʼu meʼa ʼaē ʼe Ina fai. ʼAua naʼa koutou matataku, ʼu faga manu ʼo te ʼu gāueʼaga, heʼe toe maʼuli anai te ʼu kele lunaʼia ʼo te toafa. Heʼe fua moʼoni anai te fuʼu ʼakau. Ko te fuʼu fiku pea mo te fuʼu vite ʼe tonu anai ke nā foaki tonā mālohi maʼuli. Pea ko koutou ʼu foha ʼo Sione, koutou fiafia pea mo fakafiafia ia Sehova tokotou ʼAtua; heʼe ina foaki moʼoni anai kia koutou te ʼua ʼo te fasiga taʼu fakatōlau ʼo ina fakafuafua lelei, pea ʼe ina fakahifo atu anai kia koutou he toe ʼua lahi, ko te ʼua ʼo te fasiga taʼu fakatōlau pea mo te ʼua ʼo te fasiga taʼu mātala, ohage ko tona fai ʼi te kamata. Pea ko te ʼu hahaʼaga fulumeto ʼe tonu anai ke fonu ai te pulapula kua fakamaʼa, pea ko te ʼu tane ʼe tonu anai ke fonu gutugutu ʼuhi ko te vino foʼou pea mo te lolo foʼou.”—Soele 2:21-24.
15 ʼI ʼaluʼaga taulekaleka leva! ʼE mahu anai te ʼu meʼa e tolu ʼaē neʼe maʼuhiga tāfito ki te maʼuli ʼi Iselaele—ko te pulapula, mo te lolo, pea mo te vino—pea ʼe toe mahu anai mo te ʼu faga manu. ʼE mahino papau ia ia ʼaho nei, ʼe lolotoga hoko te ʼu palalau faka polofeta ʼaia ʼi hona ʼaluʼaga fakalaumālie. ʼE foaki mai e Sehova te meʼa kai fakalaumālie fuli ʼaē ʼe ʼaoga kia tatou. ʼE mole tou fiafia koa ʼi te mahu ʼo te ʼu meʼa ʼaē ʼe foaki mai e te ʼAtua? Neʼe hoko moʼoni te meʼa ʼaē neʼe fakakikite e Malakia, he ko totatou ʼAtua neʼe ina ‘avahi te ʼu matapā ʼo te lagi ʼo ina tuku mai kia tatou he ʼu tapuakina ʼo aʼu ki te mole toe ʼi ai ʼo he hoge.’—Malakia 3:10.
Ko Te Fakaʼosi ʼo Te Mālama ʼAenī
16. (a) Koteā te faka ʼuhiga ʼo te folahi ʼo te laumālie ʼo te ʼAtua ʼi totatou temi? (b) Koteā te meʼa ʼaē ka hoko ʼi te ka haʼu?
16 ʼI tana ʼosi fakakikite te ʼaluʼaga fīmālie ʼa te hahaʼi ʼa te ʼAtua, neʼe fai fakakikite leva ia Soele ʼo ʼuhiga mo te folahi ʼo te laumālie ʼo Sehova. ʼI te temi ʼaē neʼe fakaʼaogaʼi ai e Petelo te lea faka polofeta ʼaia ʼi te Penikosite, neʼe ina ʼui neʼe fakahoko “ ʼi te ʼu ʼaho fakamuli.” (Gāue 2:17) Ko te folahi ʼo te laumālie ʼa te ʼAtua ʼi te temi ʼaia neʼe faka ʼuhiga, kua kamata leva te ʼu ʼaho fakamuli ʼo te mālama faka Sutea. Ko te folahi ʼo te laumālie ʼo Sehova ki te Iselaele ʼa te ʼAtua ʼi te 20 sēkulō, ko tona faka ʼuhiga kua tou maʼuʼuli ʼi te ʼu ʼaho fakamuli ʼo te mālama ʼaenī. Koia, koteā te meʼa ʼaē ka hoko mai anai? ʼE hoko atu te lea faka polofeta ʼo Soele ʼo fēnei: “ ʼE ʼau fai anai he ʼu fakamelomelo ʼi te lagi pea mo te kele, te toto pea mo te afi, pea mo te ʼu tuʼuga ʼahu. ʼE liliu anai te laʼā ʼo fakapōʼuli, pea [ʼe liliu anai] te māhina ʼo toto, ʼi muʼa ʼo te aʼu mai ʼo te ʼaho lahi pea mo fakamataku ʼo Sehova.”—Soele 2:30, 31.
17, 18. (a) Koteā te ʼaho fakamataku ʼa Sehova ʼaē neʼe hoko ki Selusalemi? (b) Koteā ʼaē ʼe tonu ke tou fai ʼi tatatou ʼiloʼi ʼaē kua vave hoko mai te ʼaho fakamataku ʼo Sehova?
17 ʼI te taʼu 66 ʼo totatou temi, neʼe kamata fakahoko ʼi Sutea te ʼu palalau faka polofeta ʼaia, ʼaki te ʼu meʼa maʼuhiga ʼaē neʼe hoko ʼo iku ai ki te ʼaho fakamataku ʼo Sehova ʼi te taʼu 70 ʼo totatou temi. Neʼe matataku ʼaupito te hahaʼi ʼaē neʼe mole nātou faka maʼuhigaʼi te huafa ʼo Sehova ʼi te temi ʼaia! Ia ʼaho nei, kua vave hoko te ʼu meʼa fakamataku feiā, ʼi te temi ʼaē ka fakaʼauha ai anai e Sehova te malamanei katoa ʼaenī. Kae ʼe feala ke tou hāo mai ai. ʼE hoko atu fēnei te lea faka polofeta: “ ʼE hoko moʼoni anai, ko ia ʼaē ʼe fetapā ki te huafa ʼo Sehova ʼe hāo anai ia; heʼe ʼi te moʼuga ʼo Sione pea mo Selusalemi ʼe ʼi ai anai te hahaʼi ʼaē neʼe hāo, ohage pe ko tona ʼui e Sehova, pea ia nātou ʼaē neʼe maʼuʼuli, ʼaē ʼe pāui e Sehova.” (Soele 2:32) ʼE loto fakafetaʼi ʼaupito te kau Fakamoʼoni ʼa Sehova ʼi tanatou ʼiloʼi te huafa ʼo Sehova, pea ʼe nātou falala moʼoni ʼe ina hāofaki anai nātou mokā nātou fetapā anai kia te ia.
18 Kae koteā te meʼa ʼaē ka hoko mokā hoko moʼoni anai te ʼaho lahi pea mo fakamataku ʼo Sehova ki te mālama ʼaenī? ʼE tou vakaʼi anai te faʼahi ʼaia ʼi te alatike ʼaē ka hoa mai.
ʼE Kei Koutou Manatuʼi Koa?
◻ Neʼe ko ʼanafea ʼaē neʼe ʼuluaki folahi ai e Sehova tona laumālie ki tana hahaʼi?
◻ Koteā te ʼu maʼua ʼaē ʼe pipiki ki takita fetapā ki te huafa ʼo Sehova?
◻ Neʼe hoko ʼanafea te ʼaho lahi pea mo fakamanavahe ʼo Sehova ki Iselaele?
◻ ʼE tapuakinaʼi feafeaʼi e Sehova ia nātou ʼaē ʼe fetapā ki tona huafa ia ʼaho nei?
[Paki ʼo te pasina 15]
Neʼe tupu te puleʼaga foʼou ʼi te Penikosite ʼo te taʼu 33 ʼo totatou temi
[Paki ʼo te pasina 16, 17]
ʼI te kamata ʼo te sēkulō ʼaenī, neʼe toe folahi e Sehova tona laumālie ki tana hahaʼi, ohage ko tona fakakikite ia Soele 2:28, 29
[Paki ʼo te pasina 18]
ʼE tonu ke tou tokoni ki te hahaʼi ke nātou fetapā ki te huafa ʼo Sehova